Jesus Kristus Ir Mini’?

“MUS ko girdi’ ni gathi yad e Kristiano, ma ba mich u wan’rad ni Ir e sensey ni bin th’abi fel’ mab gonop. Ir be’ ni rib lingagil ni immoy u fayleng.” (The World Book Encyclopedia) “Mini’” e cha’nem’? Jesus Kristus, fa en ni sunmiy e Kristianity. Ga manang ko ir mini’? Ba l’ag Jesus ko yafos rom fa?

Bay e thin u murung’agen e machib ni i tay Jesus u lan e Bible ko aningeg e chep ni aram e Gospel. Uw fene riyul’ e pi thin nem? Tomren ni ke fil e pi thin nem, me yoloy Will Durant ni ir be’ ni ma fil chepin e girdi’ ni gaar: “Aram ba maang’ang ni kab gel ko tin ni bay ko fapi Gospel nfaan mang e ngan nog ni boch e girdi’ ni de tolang e skul rorad ma taab rogon ni kar fl’eged e chep u murung’agen be’ ni rib fel’, ma rib fel’ e gafarig rok mab manigil e n’en ni ma finey ko girdi’.”

Machane de nang bokum i million e girdi’ nu Asia ko mini’ Jesus. Ke mich u wan’rad ni immoy u fayleng, machane dar lemnaged ni pi n’en ni ke rin’ e ba m’ag ko yafos rorad. Der ma lemnag yugu boch e girdi’ nib ga’ fan ni ngar lemnaged murung’agen Jesus ni bochan e pi n’en ni ke rin’ e girdi’ ni yad ma yog ni yad e Kristiano. Boch e girdi’ u Sapan e ma yog ni ‘kar ron’ed e donmach ni atom nga daken Nagasaki, ni aram e mach nib th’abi yoor e Kristiano riy nga boch e mach u Sapan.’

Machane ra yog ni mon’ e kireb nga daken togta ko m’ar rok be’ ni faanra de fol ko fonow rok togta? Ba gagiyel ndanga’. Ke n’uw nap’an ni der fol e girdi’ ko Kristendom ko falay ni yog Jesus nra ayuwegrad ngar golgad ko pi magawon ko yafos rorad. Ere dabmu pag Jesus ni bochan e girdi’ ni yad ma yog ni yad e Kristiano, machane dar folgad ko thin rok, mang ndab mu fil murung’agen Jesus nge tamilang u wan’um? Mu fil e Bible ma ra tamilang u wan’um ko ir mini’ ma ga nang rogon ni nge ayuweg e yafos rom.

T’ufeg—e Falay Rok

Jesus Kristus e ir e sensey ni rib salap ni immoy u Palestine ni gonapan 2,000 e duw faram. Ri buchuw ni yima nang u murung’agen ko ngiyal’ ni kab bitir. (Matthew, guruy ni 1 nge 2; Luke, guruy 1 nge 2) Nap’an ni ke 30 e duw rok, me tabab Jesus ni nge “weliy murung’agen e tin riyul’.” (John 18:37; Luke 3:21-23) Fa aningeg e girdi’ ni kar yoloyed murung’agen Jesus e ur tedan’rad ko machib ni i tay u tomren dalip nge baley e duw ni immoy u fayleng.

Nap’an ni i machib Jesus, me pi’ e kiy ngak pi gachalpen ni nge ayuwegrad ngar gelgad ko pi magawon ko yafos rorad. Mang e re kiy nem? Ireram e t’ufeg. I pi’ Jesus e machib ni ri yi manang ni yima yog e Machib u Daken e Burey ngay, ma i fil Jesus ngak pi gachalpen rogon ni ngar daged e t’ufeg ngak e yugu girdi’. I yog ni gaar: “Mu rin’ed ngak e girdi’ e tin ni gimed baadag ni ngar rin’ed ngomed.” (Matthew 7:12) Yima yog e Golden Rule ngay. Fapi “girdi’ ” u roy ni yog Jesus u murung’agen e ba muun ngay e piin ni toogor. Ma nap’an e re machib ney me yog ni gaar: “Nge t’uf romed e pi toogor romed, mpied e meybil rok e piin ni yad be ngongliy e kireb ngomed.” (Matthew 5:44) Re t’ufeg ney ni arrogon e dabi pithig e pi magawon ni bay rodad e ngiyal’ ney? Mohandas Gandhi ni ir e Hindu ni ma yog e thin u India e ke lemnag nra pithig e pi magawon. I yog ni gaar: “Faan [gad] ra maruwel u taabang ko machib ni tay Kristus u Daken e Burey, ma aram ma kad pithiged e pi magawon . . . u polo’ e fayleng.”

I Maruweliy e T’ufeg Rok

I rin’ Jesus e pi n’en ni i machibnag. I ayuweg yugu boch e girdi’ u m’on ni nge ayuweg ir, ma aram rogon ni ke maruweliy e t’ufeg rok. Reb e rran, e ke machibnag Jesus nge pi gachalpen boor e girdi’, ndariy e ngiyal’ ni ngar abichgad. Ke lemnag Jesus ni ba t’uf rok pi gachalpen ni ngar toffangad, ere kar ranod nga ba yang ndariy e girdi’ riy. Machane pire’ e girdi’ ni guyrad me mil e girdi’ nga ranod ngar songad ko gin ni be sor Jesus nge pi gachalpen ngay. Uw rogon e lem rom nfaan manga gur Jesus? Jesus e “ri taganan’ ngorad” me “tabab i machinag boor ban’en ngorad.” (Mark 6:30-34) Bochan ni ke par ni ke taganan’ ngorad ma aram fan ni ma pi’ e ayuw ngak e girdi’.

Gathi ke mus ni ke ayuweg Jesus e girdi’ ko tirok Got ban’en. Ya ku i pi’ e pi n’en nra ayuwegrad. Ya amu lemnag ni ke duruwiy 5,000 e pumoon (nge boor e ppin nge bitir) ni kar motoyilgad ngak nge mada’ ko balayal’ u reb e rran. De n’uw nap’an nga tomren e binem mi ki duruwiy 4,000. Maku, i fanay lal yal’ e flowa nge l’agruw e nig ko yay ni som’on ni ke pi’ e ggan ngak e girdi’, ma bin l’agruw yay i fanay medlip yal’ e flowa nge noch e nig nib achig. (Matthew 14:14-21; 15:32-38; Mark 6:35-44; 8:1-9) Aram e maang’ang? Arrogon, i ir fa en ni ma fal’eg e maang’ang.

Ku i golnag Jesus boor e girdi’ nib m’ar. I ayuweg e girdi’ nib malmit, nge magutgut, ba daraw, nge piin ni biling. Mus ko yam’ ma i faseg! (Luke 7:22; John 11:30-45) Bay ba ngiyal’ ni yog be’ nib daraw ngak ni gaar: “Faanra mm’agan’um ngay ni ngam chuweg e daraw rog ma ga chuweg.” Uw rogon e fulweg rok Jesus? “Ke k’iyag pa’ nge math ngak me fulweg ngak ni gaar: ‘Mm’agan’ug ngay, ere nge chuw e daraw rom.’ ” (Mark 1:40, 41) Ke taganan’ Jesus ngak ma ba m’agan’ ngay nge ayuweg. Ke dag e t’ufeg rok ko piin nib gafgow ko pi maang’ang ni i ngongliy.

Mo’maw ni nge mich u wan’um fa? Machane baga’ ni i ngongliy Jesus e pi maang’ang u fithik’ e yoor. Mus ko pi tatogopuluw ni kar guyed rogon ni ngar pirieged e kireb rok ma dabiyog ni ngar togopuluwgad ko pi maang’ang ni ke ngongliy. (John 9:1-34) Pi maang’ang ni ke fl’eg e bay fan. Ke ayuweg e girdi’ ni nge tamilang u wan’rad ni Jesus e ir fa en ni l’og Got nge yib nga fayleng.—John 6:14.

Faan gad ra lemnag e machib ni i tay Jesus nge pi n’en ni i rin’ ko yafos rok ma ra falfalan’dad ngak maku ra mithmithegdad ni ngad folwokgad ko t’ufeg rok. Machane, gathi ke mus ni aram rogon ni ba l’ag Jesus ko yafos rom. Gathi ke mus ni ir reb e sensey nib salap ni ke fil e t’ufeg ngak e girdi’. I yog ni immoy nib fas u m’on ni ke yib nga fayleng ni ir Fak Got ni Kari Maagirag. (John 1:14; 3:16; 8:58; 17:5; 1 John 4:9) Maku ke par nib fas u tomren ni ke yim’ ke chuw u fayleng, ma aram fan ni rib ga’ fan Jesus ngom. Be dag e thin ko Bible ni kan faseg Jesus ko yam’ ma ke Pilung ko Gil’ilungun Got. (Revelation 11:15) Yog Jesus ni gaar: “Baara’ ira’ e yafos ndariy n’umngin nap’an ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.” (John 17:3; 20:31) Arrogon, ra ngam nang ko mini’ Jesus Kristus, ma rayog e yafos ndariy n’umngin nap’an ngom u Paradis! Uw rogon nrayog? Mang ni dabmu fil boch murung’agen Jesus ma ga nang “gelngin fadad t’uf rok Kristus ni ir e be gagiyegnagdad” ngad folwokgad rok? (2 Korinth 5:14) Ra falfalan’ e Pi Mich Rok Jehovah ni ngar ayuweged gur.—John 13:34, 35.

Faanra da nog ma gubin e thin ko Bible e yib ko New World Translation of the Holy Scriptures.