Fapi Maang’ang Ni Fal’eg Jesus Mang E Rayog Nim Fil Riy?

RAYOG ni ngam gin ngay ni ga ra nang e pi n’en ni be weliy e Bible u rogon e yafas rok Jesus u fayleng ma de fanay fare bugithin ni ir e yima fanay ni “maang’ang.” Fare bugithin ni Greek (dyʹna·mis) e yu ngiyal’ ma yima piliyeg ni “maang’ang” ma bin ri fan e “gelngin.” (Luke 8:46) Ma ku rayog ni ngan piliyeg ni “gelngin ni nge rin’ ban’en” ara “maruwel nib gel gelngin.”​—Matthew 11:20; 25:15.

Fare Bible e der weliy rogon e maang’ang ni rin’ Jesus ni bogi sasalap ara bogi n’en ni be bannag e girdi’ ni kan fal’eg rogon ni nga i falfalan’ e girdi’ ngay. Ya bogi ngongol ni be tamilangnag “gelngin Got nib tha’bi gel,” ni bod rogon fachi pagal ni faani tuluf Jesus ba moonyan’ nge chuw rok. (Luke 9:37-43) Gur maruwel ko re gelngin nib gel nem e dabiyog rok Got nib Tha’bi Gel​—faani kan weliy murung’agen ni ba’ ba “gelngin rok nib tha’bi gel”? (Isaiah 40:26, NW) Riyul’ ni danga’!

Fapi thin ko Gospel e be weliy rogon gonapan 35 e maang’ang ni rin’ Jesus. Machane urngin u gubin e maang’ang ni rin’ e dan dag. Ni bod rogon ko, Matthew 14:14 ni gaar: “Ma faani guy [Jesus] fapi girdi’ ni pire’ ni pire’ me ri taganan’ ngorad, me golnag e piin ni yad mm’ar u fithik’rad.” Da nog ngodad ko in e girdi’ nib m’ar ni golnagrad ko yay i n’em.

Pi maruwel nem nib gel gelngin e aram kenggin ma baga’ fan ko n’en ni yog Jesus ni ir Fak Got, ni fare Messiah ni kan micheg. Fapi thin nu Bible e riyul’ ni kan micheg ni gelngin ni pi’ Got e ir e yog rok Jesus riy ni nge fal’eg fapi maang’ang. Apostal Peter e weliy rogon Jesus ni “be’ nib moon ni ke dag Got ngomed ni gimed gubin u daken e maruwel nib gel gelngin nge pow ni rin’ Got u daken u fithik’med ni gimed romed, ma gimed manang.”​—Acts 2:22, NW.

Pi maang’ang ni rin’ Jesus e ba chagil ma bang nib ga’ fan ko pi n’en ni fil. U Mark 1:21-27 e be dag rarogon e n’en ni rin’ fare ulung i girdi’ ko n’en ni fil Jesus nge reb e pi maang’ang ni rin’. Mark 1:22 e yog ni fa yu ulung i girdi’ e “ra gingad nib gel nga rogon ni be machib,” ma verse 27 e dag ni fapi girdi’ e “rib gel ni kar gingad” u nap’an ni tuluf reb e moonyan’. Gelngin e maruwel nib gel nge thin rok Jesus e pi’ e mich riy ni ir fare Messiah ni kan micheg.

Pi Mich ni Ba’ Rogon ni Ngan Pagan’uy Ngay

Mang fan ni rayog ni nge mich u wan’dad ni pi maang’ang ni rin’ Jesus e rriyul’, ma ba rogon ni ngan pagan’uy ngay? Mu lemnag boch e pow ni ba’ rogon ni nge pagan’uy ngay.

I ngongliy Jesus e pi maruwel rok nib gel gelngin, ma ri de guy rogon ni ir e nga nog e sorok ngak. Ri i guy rogon ni nge mudugil ni angin demtrug ere maang’ang me Got e nga nog e fel’ riy ngak me ir nga nog e sorok ngak. Ni bod rogon, u m’on ni nge golnag ba moon nib malmit, mi ri fal’eg Jesus i weliy ni bayi gol “ni bochan ni maruwel rok Got e nge yog ni nge gagiyel ko n’en ni ke rin’.”​—John 9:1-3, NW; 11:1-4.

Dariy e bengbeng, ara madenom, ara ban’en ni yibe dag yaan nib muun ngay. Jesus e i fal’eg e maruwel ko pi maang’ang rok u fithik’ e girdi’ da i rin’ nib mith ni dabni guy, boor yay ni ma rin’ ni be guy e girdi’ ni yoor. Da i fanay ba mit i raen e magal, fe i fal’eg ban’en u p’eowchen e girdi’.​—Mark 5:24-29; Luke 7:11-15.

Jesus e yu ngiyal’ ma manang rogon e michan’ ko piin baaram ni keb felngin e maang’ang ngorad. Machane ra dariy michan’ rok be’ ma de taleg Jesus ni nge fal’eg e maang’ang. Nap’an ni immoy u Kapernaum u Galilee, “me fek e girdi’ boch e girdi’ i yib ngak ni ke gabliyrad e moonyan’; me tuluf fapi moonyan’ nga taa bugithin ngar chuwgad, me golnag urngin e piin kar m’argad nib gel.”​—Matthew 8:16, NW.

Pi maang’ang ni rin’ Jesus e rin’ ni nge fel’ rogon e tin ba t’uf ko girdi’ u roy u fayleng, gathi nge fal’eg rogon e tin baadag be’ ni nge nang. (Mark 10:46-52; Luke 23:8) Me Jesus e ri da i fal’eg e maang’ang ni bochan ni nge yog puluwon ngak u bang riy.​—Matthew 4:2-4; 10:8.

Fare Moon ni Be Ngongliy Fapi Maang’ang

Kan skengnag fapi maang’ang ni rin’ Jesus ma dabi gaman ni faanra kemus ni nguun i tugthin ni fan e nge mich rogon ni rayog ni ngan pagan’uy ngay. Rogon nni weliy ko fapi maruwel nib gel gelngin ni fal’eg Jesus, e dag fapi Gospel ni be’ nib moon nrib tarunguyey ma dariy be’ ni taareb rogon e runguy rorow, ma ba m’uthan’ ko tin nib fel’ ngak e girdi’ rok.

Mu lemnag fa cha’ nib daraw ni yib ngak Jesus ni ri be wenig ni gaar: “Faanra mm’agan’um ngay ni ngam chuweg e daraw rog ma ga chuweg, ya rayog rom.” “Me taganan’ Jesus ngak,” me k’iyag pa’ nge math ngak, me fulweg ngak ni gaar: “Mm’agan’ug ngay, ere nge chuw e daraw rom.” Ma ka chi ngiyal’ nem me chuw e daraw rok faanem nge gol. (Mark 1:40-42) Jesus e aray rogon ni dag rogon ni ma ta’ ir nga lon be’ me k’aring ni nge fanay gelngin ni pi’ Got ni nga i fal’eg e maang’ang.

Ban’en ni ngan fil ni ra falan’uy ngay ni rayog ni ngan fek ko pi maang’ang ni rin’ Jesus e re n’en baaram ni “taganan’” me rin’ bogi ban’en ni nge ayuweg e girdi’. Machane pi maang’ang nem e gathi kemus ni bogi chep. I yog ko Hebrews 13:8, ni gaar: “Jesus Kristus e ku taareb rogon fowap nge daba’, nge manemus.” Chiney e be gagiyeg ni Pilung u tharmiy, ni ke fel’ rogon ma ke yog ni nge fanay gelngin ni ke pi’ Got ko maang’ang ni nge rin’ ni ke gel boch nga rogon ni i rin’ u fayleng nib girdi’. Dabki n’uw nap’an, ma bayi fanay Jesus e pi n’em nge golnag e girdi’. Ra falfalan’ e Pi Mich Rok Jehovah ni ngar ayuweged gur ngam fil boch i murung’agen e pi athap ney nib fel’ ni fan ko gabul nge langlath.