Pi Maang’ang Ni Fal’eg Jesus Rriyul’ Fa Un Tunguy?

“BOOR e girdi’ nni fek i yib ngak [Jesus Kristus] ni ke gabliyrad e moonyan’; me chuweg fapi kan nga taa bugithin, me golnag urngin e piin yad ba m’ar.” (Matthew 8:16, New World Translation) “Me suwon [Jesus] me non ko nifeng ni gaar: ‘Mmocha! Me gaar ngak e n’ew, Mu gapas!’ Me mocha e nifeng me aw e cho’.” (Mark 4:39) Uw rogon e lem rom ko pi thin ney? Be mich u wan’um ni yibe weliy chepin, bogi ban’en ni riyul’ ni buch, fa ga be lemnag, ni un tunguy?

Boor e girdi’ e chiney e yad be yog ni ke gel e maruwaran’ rorad nga rogon chepin fapi maang’ang ni fal’eg Jesus. Bochan nni ngiyal’ ney ni ke mon’og e llowan’ ni bod e telescope nge microscope, ni yibe guy lan e lang ngay nge rarogon e maruwel ko gene, e ba dake ke mo’maw’ ni nge mich u wan’rad murung’agen e maang’ang nge pi n’en ni rin’ Got ni yima ngat ngay.

Ma boch e girdi’ e be lemnag e pi maang’ang nem e kemus ni lem ara fanathin. Rogon ni yog facha ni yoloy bake babyor ni be yog ni nge gay e bin “riyul’” e Jesus, nge pi n’en ni murung’agen e pi maang’ang ni rin’ Kristus e dariy fan kemus ni “yibe yog ni nge nang urngin e girdi’” ya nge garer kanawoen e Kristiano.

Ma boch e girdi’ e be lemnag ni pi maang’ang ni rin’ Jesus e yig googsur. Kuun togopuluwnag ngak Jesus ni ku be ban. Rogon ni yog Justin Martyr ko bin l’agruw e chibog ko C.E., e piin ra pirieged e kireb rok Jesus e “u rogned nib tapig ma be’ ni ma bannag e girdi’.” Boch e girdi’ e ma yog ni Jesus e “da i fal’eg fapi maang’ang ni bod ba profet nu Jew, ya bod be’ ni ma pig, ni be’ nni skulnag ko pi tempel ko piin ma liyor ko Got nde riyul’.”

Fan ni Dabiyog

Rayog ni ngam lemnag ni pi maruwaran’ nem, e ba’ kenggin i fan ni be mo’maw’ rogon ko girdi’ ni nge mich u wan’rad e maang’ang. Kemus ni yad be pirieg nib mo’maw’, fa dabiyog, ni nge riyul’ u wan’rad ni pi gelngin nib gel ko tin u fayleng e ku rayog ni nge rin’ e tinem e maang’ang. “Maang’ang e gathi yugu ma buch​—ri dabiyog,” aray rogon ni be’ nib fel’ yangaren ni ma yog ni ir e be maruwar Got u wan’. Ma aram me sul u daken e pi thin rok reb e llowan’ nu Scotland ko bin 18 e chibog ni David Hume, ni yoloy ni gaar: “Ba maang’ang e ba togopuluw ko n’en ni ka nog e law of nature ngay.”

Machane, boor e girdi’ e ra safog u rogon ni nge dugliy ni maang’ang e dabiyog. Babyor ni The World Book Encyclopedia e yog ni maang’ang e “ban’en ni dabiyog ni ngan weliy rogon u fithik’ e pi n’en ni ka nog e law of nature ngay.” Rogon fan e binem, e milekag u lan e tharmiy, numon ni dariy e waya ni nge fek lamay, nge paluw ni yibe fanay e satellite e oren e girdi’ u nap’an 100 e duw ni ke yan e ra dake e ba “maang’ang” u wan’rad. Ere riyul’ ni de fel’ ni ngan dugliy ni maang’ang e dabiyog ni buch ya kemus ni bochan ni dabiyog ni ngad weliyed rarogon ni bochan rogon e llowan’ ko ngiyal’ ney.

Faan gad ra fal’eg i guy boch e mich u Bible nib l’eg rogon ko pi maang’ang ni rin’ Jesus Kristus, ma mang e gad ra pirieg? Pi maang’ang ni rin’ Jesus riyul’ fa googsur?