Nge Puluw E Ngongol Rom Ko Meybil Rok Jesus

1, 2. Mu weliy e n’en ni rin’ Jesus ni fan ngak fa 11 i apostal rok u tomuren nra madnomnaged fare Paluk’af ko duw ni 33 C.E.

KE N’UW e nep’ ko rofen ni Nisan 14 ko duw ni 33 C.E. Ma ka fini mu’ Jesus nge pi gachalpen i madnomnag fare Paluk’af. Re madnom nem e ke puguran ngorad rogon ni ke ayuweg Got e pi ga’ rorad u nap’an ni ur moyed u Egypt ni yad e sib. Machane, ka bay reb e kanawo’ ni yira ayuweg pi gachalpen riy ni kab pag feni fel’, ma aram e n’en nra ‘bayuliyrad ndariy n’umngin nap’an.’ Ra yan i bin migid e rran ma pi toogor rok Jesus e yad ra li’ nge yim’. Machane, bay angin e re n’ey nib fel’, ya rachaen Jesus ni map’ e aram e n’en nra pithig e girdi’ ko denen nge yam’.​—Heb. 9:12-14.

² I tababnag Jesus reb e madnom ni ir e ke yon’ lon fare madnom ko Paluk’af ni bochan e nga i puguran e re tow’ath ney ngodad. Rogon ni rin’ e re n’ey e aram e fek e flowa ndariy e is riy, me t’et’ar nge pi’ ngak fa 11 i apostal rok nra pared ni yad ba yul’yul’ ngak, me gaar: “Ereray dowag ni kan pi’ ni bochmed. Um rin’ed e re n’ey ngi i pugurag ngomed.” Ku aram rogon ni rin’ nga ba kap i wain, ni be gaar: “Re kap ney e bin nib beech e m’ag u thilin Got nge girdi’ ni rachaeg ni bay map’ nga but’ ni fan ngomed e ir e bayi micheg.”​—Luke 22:19, 20.

3. (a) Mang e buch u tomuren ni yim’ Jesus? (b) Mang boch e deer ni bay rogon ko fare meybil ni tay Jesus ni susun e ngad fal’eged i lemnag ni bay ko John ko guruy ni 17?

³ Ngiyal’ nem e ke chugur ni nge mus fa bin kakrom e m’ag ko Motochiyel u thilin Got nge piyu Israel. Ma yira ngongliy reb e m’ag nib beech u thilin Jehovah nge pi gachalpen Jesus ni kan dugliyrad. Kari magafan’ Jesus nga rarogon e re nam nib beech nem. Girdi’ nni gargelegrad u Israel e dakir taareban’rad ko liyor ni yad be tay ngak Got, ma kar darifannaged fithingan. (John 7:45-49; Acts 23:6-9) Machane, baadag Jesus ni nge par pi gachalpen nib taareban’rad ya nge yag nra maruwelgad u taabang ni ngar pininged e sorok nga fithingan Got. Ere, mang e rin’ Jesus? I pi’ reb e meybil ni fan ngorad, ma re meybil nem e aram e re meybil nth’abi fel’ ni gad ra beeg murung’agen. (John 17:1-26; mu guy fare sasing ni bay u tabolngin e re article ney.) Nap’an ni gad be weliy murung’agen e re meybil ney, ma ngad fithed gadad ni nge lungudad: “Ke fulweg Got taban e meybil rok Jesus, fa? Ma gur, ba puluw e ngongol rog ko re meybil nem?”

N’EN NIB M’ON U WAN’ JESUS

4, 5. (a) Mang e gad ra fil ko n’en ni yog Jesus u tabolngin e meybil rok? (b) Uw rogon ni fulweg Jehovah taban e n’en ni ning Jesus ko meybil rok?

⁴ Re nep’ nem e boor ban’en ni fil Jesus ngak pi gachalpen. I non ngorad nge n’uw e nep’. Ma aram me sap nga tharmiy me meybil ni gaar: “Chitamag, ke taw ko fare awa. Mu gilnag buguwan Fakam, me gilnag fakam buguwam. Ya kam pi’ gelngin ni nge gagiyegnag urngin e girdi’, ni bochan e nge yog ni pi’ e yafos ndariy n’umngin nap’an ngak e piin ni kam pi’rad ngak. . . . Kug gilnag buguwam u fayleng; ma kug mu’nag e maruwel ni mpi’ ngog ni nggu rin’. Chitamag! Mu gilnag buguwag u p’eowchem e chiney, ni fare gilbuguwan ni immoy rog nnap’an ni ug moy rom ko ngiyal’ ndawor ni sunumeg e fayleng riy.”​—John 17:1-5.

⁵ Mu tay fanam i yan u rogon ni tababnag Jesus e meybil rok. N’en nib m’on u wan’ e aram e nge pining e sorok ngak e Chitamangin ni bay u tharmiy, ma re n’ey e ba puluw ko n’en ni yog ko fare kenggin e meybil rok ni gaar: “Chitamangimad, ngan tay fan fithingam nib thothup.” (Luke 11:2) Bin migid e yibilay murung’agen e tin nib t’uf rok pi gachalpen, ya nge yag ni “pi’ e yafos ndariy n’umngin nap’an” ngorad. Tomur riy me yog ko Chitamangin ni gaar: “Chitamag! Mu gilnag buguwag u p’eowchem e chiney, ni fare gilbuguwan ni immoy rog nnap’an ni ug moy rom ko ngiyal’ ndawor ni sunumeg e fayleng riy.” Kab ga’ e tow’ath ni pi’ Jehovah ngak Fak ko n’en ni ning ni nge yag ngak, ya pi’ reb e ngachal ngak ni “ku ba tolang” nga fithingan e pi engel.​—Heb. 1:4.

‘NGAN NANG E BIN RIYUL’ E GOT’

6. Faanra nge yag e yafas ndariy n’umngin nap’an ko pi apostal rok Jesus, ma mang e ba t’uf ni ngar rin’ed, ma uw rogon ni kad nanged ni kar rin’ed e re n’ey?

⁶ U lan fare meybil rok Jesus e ki yog riy e n’en nthingar da rin’ed me yag e yafas ndariy n’umngin nap’an ngodad nib tow’ath. (Mu beeg e John 17:3.) I yog nthingar da ‘nanged’ Got nge Kristus. Reb e kanawo’ ni ngad rin’ed e re n’ey riy e aram e ngad fanayed owchedad nge teldad ni ngad filed boch ban’en u murung’agen Jehovah nge Fak. Reb e ban’en ni kub ga’ fan e aram e ngad folgad ko pi n’en ni kad filed u murung’agen Got. Aram e n’en ni ke rin’ e pi apostal rok Jesus, ya yog u lan e meybil rok ni gaar: “Kug weliy ngorad e thin ni mog ngog ni nggog ngorad kar folgad riy, ma kar nanged nriyul’ ni gub rom, ma ke mich u wun’rad ni gur e ka mol’igeg ku gub.” (John 17:8) Machane, faanra nge yag e yafas ndariy n’umngin nap’an ngorad mab t’uf ni ngaur fal’eged i lemnag e thin rok Got mar fanayed nga lan e yafas rorad. Ere gur, aray e n’en ni rin’ e pi apostal rok Jesus nge mada’ nga tungun e yafas rorad u fayleng? Arrogon. Kad nanged e re n’ey ni bochan e yad gubin ni kan yoloy fithingrad nga daken fa 12 i malang ni bay ko fa Bin nib Beech e Jerusalem u tharmiy ndab ki math biid.​—Rev. 21:14.

7. Mang e be yip’ fan ni ngad ‘nanged’ Got, ma mang nrib ga’ fan e re n’ey?

⁷ Rogon ni ke yog e piin ni yad ma fil murung’agen e thin ni Greek, e fare bugithin ni Greek ni kan pilyeg ni “nangem” e ku rayog ni ngan pilyeg ni “ngaun nangem” ara “ngan ulul ngan nangem.” Gal thin ney e bay rogon reb nga reb, ma l’agruw nib ga’ fan. Rogon ni be yog e footnote ko John 17:3 ko fare Reference Bible e “ngar nanged gur.” Ere, ra ngan ‘nang’ murung’agen Got ma be yip’ fan ni ngaun fil murung’agen. Re n’ey e gathi kemus ni be yip’ fan ni ngad nanged pi fel’ngin Got nge n’en nib m’agan’ ngay. Ya kub muun ngay ni nge chugur e tha’ u thildad nge piin ni gad ma liyor ngak u taabang. Be gaar e Bible: “En nde t’uf Got rok nge girdi’ e be’ nde nang Got” ni bochan e Got e ba t’uf e girdi’ rok. (1 John 4:8) Ere, faanra ngad nanged Got mab muun ngay ni ngaud folgad rok. (Mu beeg e 1 John 2:3-5.) Ri gad ba tow’ath ni gad ba muun ngak e piin ni kar nanged Jehovah! Machane, ku rayog ni nge kireb e tha’ u thildad Got ni bod rogon e n’en ni buch rok Judas Iskariot. Ere, ngad athamgilgad ni nga i par nib gel e tha’ u thildad Got. Faan gad ra rin’ ni aray rogon, ma aram e ra yag fare tow’ath ngodad ni aram e yafas ndariy n’umngin nap’an.​—Matt. 24:13.

“GELNGIN FITHINGAM”

8, 9. Mang e n’en ni i par nth’abi ga’ fan u wan’ Jesus u nap’an ni i machib u fayleng, ma mang reb e machib nde fol riy?

⁸ Nap’an ni gad ra beeg fare meybil rok Jesus ni bay ko John ko guruy ni 17, mab tamilang riy ni gathi kemus ni yigoo pi apostal rok Jesus e yad ba t’uf rok, ya ku er rogodad. (John 17:20) Machane, ba t’uf ni nge tamilang u wan’dad ni n’en nth’abi ga’ fan u wan’ Jesus e gathi rogon ni nge yag e yafas ngodad. Ya n’en ni i par nrib ga’ fan u wan’ ni ka nap’an ni tabab ko machib u fayleng nge mada’ nga nap’an ni mu’nag e re maruwel nem, e aram e nge pining e sorok nga fithingan e Chitamangin. Bod nu nap’an ni be weliy ko girdi’ fan ni ke yib nga fayleng u tagil’ e muulung u Nazareth, me beeg fare babyor rok Isaiah ni gaar: “Fare [“gelngin Jehovah nib thothup,” NW] e ke yib nga dakenag. Ke liyfeg ni nggu machibnag e Thin Nib Fel’ ni yib rok Got ngak e piin ni gafgow.” Dariy e maruwar riy ni ke yog Jesus fithingan Got nib fel’ rogon u nap’an ni be beeg e pi thin ney.​—Luke 4:16-21.

⁹ Ba n’uw nap’an u m’on ni yib Jesus nga fayleng, me yog e pi tayugang’ ko teliw rok e pi Jew ko girdi’ ndab ur fanayed fithingan Got. Gad manang nde fol Jesus ko re machib ney. I yog ngak e piin ni ur togopuluwgad ngak ni gaar: “Ku gub ngomed u fithingan e Chitamag, machane dabumed gag; ma ra yib be’ ni ir rok e ke yib rok, ma ri gimed ra felfelan’ ngak ni ke yib.” (John 5:43, NW) In e rran u m’on ni yim’, miki yog e n’en th’abi ga’ fan u wan’ u nap’an ni meybil ni gaar: “Ah Chitamag, mu ta’ fan fithingam!” (John 12:28) Ere, ba tamilang ko re meybil ney ni gad be weliy murung’agen ni n’en th’abi ga’ fan u wan’ Jesus e aram e nge tayfan fithingan e Chitamangin.

10, 11. (a) Uw rogon ni yog Jesus fithingan e Chitamangin ko girdi’? (b) Mang fan ni be machibnag pi gachalpen Jesus fithingan Jehovah ko girdi’?

¹⁰ I meybil Jesus ni gaar: “Kug weliy murung’agem [fithingam] ngak e piin ni kam pi’rad ngog u fayleng ni yad e ur pired nib mil farad ngom, me gur e kam pi’rad ngog. Ma kar folgad ko thin rom. Ere chiney e bay gub ngom; ni aram e kug chuw u fayleng, machane yad e ka yad bay u fayleng. Chitamag ni gab thothup! Mu yororiy nga gelngin fithingam e piin ni kam pi’rad ngog, nge yog nra pired ni kar taarebgad ni bod rogon gur nge gag ni gadow ba taareb.”​—John 17:6, 11.

¹¹ Gathi kemus ni yog Jesus fithingan e Chitamangin ni nge nang pi gachalpen, ya ki ayuwegrad ni ngar nanged fan e re ngachal nem, nge pi fel’ngin Got, nge rogon e ngongol rok ngodad. (Ex. 34:5-7) Maku reb e chiney ni ke pilung Jesus u tharmiy e ka be ulul ni nge ayuweg pi gachalpen ni ngar machibnaged murung’agen fithingan Jehovah u ga’ngin yang e fayleng. Mang fan ni yibe rin’ e re maruwel ney? Fan e nge yag ni kun yagnag boch e girdi’ ni ngar manged pi gachalpen Jesus u m’on ni ngan thang e re m’ag nib kireb ney. Nap’an nra taw ko re ngiyal’ i n’em, ma ra ayuweg e pi mich rok, me nang urngin e girdi’ fithingan Jehovah nth’abi tolang!​—Ezek. 36:23.

“NGE YOG NI MICH U WAN’ E GIRDI’ NU FAYLENG”

12. Mang dalip ban’en nib t’uf ni ngad rin’ed ni faanra ngad rin’ed fare maruwel ni tababnag Jesus nib fel’ rogon?

¹² Nap’an ni immoy Jesus u fayleng mab gel e maruwel ni i tay ni be guy rogon ni nge ayuweg pi gachalpen ni ngar gelgad ko pi meewar rorad. Rib ga’ fan ni ngar rin’ed e re n’em ya nge yag nra mu’naged fare maruwel ni tababnag Jesus. I meybil Jesus ni gaar: “Ku gol’ograd ni nga ranod nga fithik’ e girdi’ nu fayleng ni bod rogon ni kam l’ugeg ku gub nga fithik’ e girdi’ nu fayleng.” I tamilangnag Jesus ngorad dalip ban’en nib t’uf ni ngar rin’ed ya nge yag nra mu’naged e re maruwel nem. Bin som’on e, yibilay pi gachalpen ndab ra manged bang ko re fayleng rok Satan ney. Bin l’agruw e, yibilayrad ni nge ayuwegrad Got ni ngar folgad ko Thin Rok mi yad par ni yad ba thothup. Bin dalip e, wenig ko Chitamangin ni nge ayuwegrad ni ngaur pared nib taareban’rad u fithik’ e t’ufeg ni bod rogon ir nge Chitamangin. Ere, be m’ug ko re n’ey nra bagadad mab t’uf ni nge fith ir ni nge gaar, ‘Ba puluw e ngongol rog ko fa dalip i n’en ni yibilay Jesus, fa?’ I tamilangnag Jesus ko pi thin ney nib pagan’ ngay nra ‘mich u wan’ e girdi’ nu fayleng ni ir e ke l’og ke yib.’​—Mu beeg e John 17:15-21.

13. Uw rogon ni kan fulweg taban e meybil rok Jesus ko bin som’on e chibog?

¹³ Faan gad ra fil fare babyor ni Acts ma gad ra nang ni ke fulweg Jehovah taban e meybil rok Jesus. Ulung ni Kristiano ko bin som’on e chibog e ba muun ngay e pi Jew nge piin ni gathi yad e Jew, ni boch i yad e ba fel’ rogon ma boch i yad e ba gafgow, ma boch i yad e sib ma boch i yad e bay e sib ni ma maruwel rorad. Bochan e re n’ey mab mom ni ngar yurba’gad. Yugu aram rogon ma kar pared nib taareban’rad ni bod rogon yu yang u dowey nib peth nga taabang, ma Jesus e ir lolugrad. (Efe. 4:15, 16) Ireray ban’en ni yira gin ngay, ya gad manang nib mo’maw’ ni nge buch ban’en ni aray rogon ko re fayleng rok Satan ney nde taareban’ e girdi’ riy! Gubin e pi n’ey e thingar da pininged e sorok riy ngak Jehovah ya ir e ke ayuwegrad ni ngar rin’ed e re n’ey u daken gelngin nib thothup.​—1 Kor. 3:5-7.

14. Uw rogon ni kan fulweg taban e meybil rok Jesus e ngiyal’ ney?

¹⁴ Ba gel e kireban’ riy ya de yag ni nge par ni aram rogon u tomuren ni yim’ e pi apostal. Ya n’en ni buch e digey boch i yad e bin riyul’ e liyor mar chelgad ngar togopuluwgad ngay. Wenegan ni yib riy e kan fek boch e machib ni googsur nga lan e ulung, me k’aring e pi Kristiano ni ngar yurba’gad. (Acts 20:29, 30) Machane, nap’an e duw ni 1919, me ayuweg Jesus pi gachalpen ni kan dugliyrad ni ngar chuwgad u tan pa’ e pi yurba’ i teliw ni googsur me ‘chugumiyrad’ nga taabang ngar pared ni ke fel’ rogorad. (Kol. 3:14) Mang angin ni ke yib ko machib ni kar ted? Boor ko medlip e milyon “yugu boch e saf” nib muun ngorad ni kar bad u “gubin e nam, nge ganong, nge gubin mit e girdi’, ngu gubin e thin” ni kar uned ngak e piin ni ke dugliyrad Got yad be pigpig ngak u taabang nib taareban’rad. (John 10:16; Rev. 7:9) Rib manigil rogon ni kan fulweg taban fare meybil rok Jesus ni faani yog riy ni baadag ni nge ‘nang e girdi’ nu fayleng ni [Jehovah] e ke l’og ke yib ma yad ba t’uf rok ni bod rogon nib t’uf rok [Jehovah].’​—John 17:23.

RIB FEL’ ROGON NI KE MUSEG E MEYBIL ROK

15. Mang ban’en nib ga’ fan ni ning Jesus u lan e meybil rok ni fan ngak pi gachalpen ni kan dugliyrad?

¹⁵ Ku re nep’ nem ko Nisan 14 me micheg Jesus ngak pi gachalpen ni yad ra un ngak ko gagiyeg u Gil’ilungun. (Luke 22:28-30; John 17:22) Ere, yibilay e piin ni yad ra mang pi gachalpen ni kan dugliyrad ni gaar: “Chitamag! Kam pi’rad ngog, ma gub adag ni ngar pired rog ko gin ni gu ba’ riy, nge yog nra guyed e flaab rog, ni fare flaab ni mpi’ ngog; ya dawor ni sunumeg e fayleng, ma gu be par ni gub t’uf rom.” (John 17:24) Re n’ey e be k’aring e felfelan’ ngak e piin ni yad ba muun nga yugu boch e saf, ma darur lemnaged ni nge yag e re flaab ney ngorad. Ku be micheg nriyul’ ni bay e taareban’ u thilin e tin riyul’ e Kristiano e ngiyal’ ney.

16, 17. (a) Mang e ke yog Jesus nra rin’ u tungun e meybil rok? (b) Mang e susun ni ngad dugliyed ni ngad rin’ed?

¹⁶ Yooren e girdi’ ko re fayleng ney e kar dugliyed ndabi mich u wan’rad ni bay e girdi’ rok Jehovah nib taareban’rad ma ri yad manang Jehovah nib fel’ rogon. Ba ga’ ni ma buch e re n’ey ni bochan e pi machib ni googsur ni ke fil e pi tayugang’ ko teliw rorad ngorad. Ku er rogon e n’en ni buch u nap’an Jesus. Aram fan ni museg e meybil rok ko fapi thin ni gaar: “Chitamag ni gab mat’aw! Girdi’ nu fayleng e dawor ra nanged gur, machane gag e gu manangem, ma tiney e girdi’ e kar nanged ni gur e kam l’ugeg ku gub. Kug weliy murung’agem [fithingam] ngorad kar nanged gur, ma bay kug rin’ i yan ni ara’ rogon, ni bochan e rogon ni gub t’uf rom e ngki yog ngorad, me yog ni gu par u fithik’rad.”​—John 17:25, 26.

¹⁷ Riyul’ ni ke weliy Jesus murung’agen fithingan e Chitamangin kan nang. Bochan ni ir Lolugen e ulung ma ka be ulul i ayuwegdad ni ngkud weliyed murung’agen fithingan e Chitamangin nge tin nib m’agan’ ngay. Ngaud folgad u rogon ni be pow’iydad Jesus ma gad ulul ngad machibgad ni gad ba pasig ni gad be ayuweg boch e girdi’ ni ngar manged boch i gachalpen. (Matt. 28:19, 20; Acts 10:42) Mu kud maruwelgad u taabang nib taareban’dad ni gadad e girdi’ rok Got. Faan gad ra rin’ e pi n’ey, ma aram e gad be ngongol nib puluw ko fare meybil rok Jesus. Ma angin nra yib riy e aram e gad ra pining e sorok nga fithingan Jehovah ma gad par ni gad ba felfelan’ ndariy n’umngin nap’an.