“Mi Gimed Weliy Murung’ageg”

1, 2. (a) Mini’ e bin th’abi fel’ e mich rok Jehovah? (b) Mang e be yip’ fan fare ngachal ni Jesus, ma uw rogon ni i ngongol Jesus nrogon nib puluw nga fithingan?

“NI GARGELNIGEG ngaray nga fayleng ni bochan e nggu weliy murung’agen e tin riyul’.” (Mu beeg e John 18:33-37.) I yog Jesus Kristus e pi thin ney u nap’an ni kan fek nga p’eowchen e am nu Roma ni be gagiyegnag yu Judea. Ka fini yog Jesus ni ir reb e pilung. Boch e duw nga tomuren, me weliy apostal Paul murung’agen e n’en ni rin’ Jesus, me yog ni “ir e weliy fare welthin nib fel’ u p’eowchen Pontius Pilate.” (1 Tim. 6:13) Ere, yu ngiyal’ e ba t’uf ni nge dab da rusgad ya nge yag nda pared ni gad e “mich nib yul’yul’ ma ba riyul’” u lan e re fayleng rok Satan ney nib sug ko fanenikan!​—Rev. 3:14.

² Bochan ni Jesus e ir reb e Jew, ma aram fan nni gargeleg ni ir reb e mich rok Jehovah. (Isa. 43:10) Ma ir e bin th’abi fel’ e mich rok Got ni immoy ni i fek Fithingan. Rib ga’ fan u wan’ Jesus e ngachal ni ke pi’ Got ngak. Nap’an ni yog reb e engel ngak Josef ni Chitamangin Jesus ni gelngin Got nib thothup e ir e ke yib i ying ngak Maria ke diyen, miki yog fare engel ni gaar: “Bayi gargeleg bochi pagel ma ngam tunguy fithingan ni Jesus ya bayi ayuweg girdien nge chuwegrad ko denen ni yad be ngongliy nge thapegrad ngak Got.” (Matt. 1:20, 21) Piin ni boor ban’en u murung’agen e Bible ni yad manang e yad ma yog ni fare ngachal ni Jesus e yib u bangachal ni Hebrew ni ka nog e Jeshua ngay, ma fan e re ngachal ney e “Jehovah e Ir e Ma Thapegey.” Ke ayuweg Jesus “piyu Israel, ni piin ni kar olobochgad ni bod e saf ni ke oloboch” ni ngar kalgadngan’rad ko denen rorad ya nge yag ngkur fel’gad u wan’ Jehovah bayay. (Matt. 10:6; 15:24; Luke 19:10) Aram fan ni i machibnag Jesus murung’agen Gil’ilungun Got u fithik’ e pasig. Mark ni ir e yoloy reb e Gospel e yog ni gaar: “Yan Jesus nga Galile nge machibnag ngak e girdi’ e Thin Nib Fel’ ni yib rok Got, ni be gaar, ‘Ke taw nga nap’an nnog, ma gagiyeg rok Got e ke chugur! Mpied keru’med ko denen ni gimed be rin’ nge mich u wun’med e Thin Nib Fel’ ni yib rok Got!’” (Mark 1:14, 15) Ku da i rus Jesus ni nge gagiyelnag e kireb ko pi tayugang’ ko teliw rok piyu Jew, ma aram reb i fan nra lied Jesus nge yim’.​—Mark 11:17, 18; 15:1-15.

“PI N’EN NIB SOROK GOT NI KE NGONGLIY”

3. Mang e buch ko bin dalip e rran u tomuren ni yim’ Jesus?

³ Machane, faani taw ko bin dalip e rran u tomuren ni ke yim’ Jesus, me buch ban’en ni yira ngat ngay. Ke faseg Jehovah Jesus nga reb e dowef ni gathi downgin e girdi’. (1 Pet. 3:18) Ma aram me pilyeg Somol Jesus ir nge m’ug nib girdi’ ni bochan e nge m’ug e mich riy nriyul’ ni ke fas ko yam’. Nap’an e bin som’on e rran u tomuren ni kan faseg ko yam’, ma lal yay ni m’ug ngak pi gachalpen.​—Matt. 28:8-10; Luke 24:13-16, 30-36; John 20:11-18.

4. Mang muulung e tay Jesus u tomuren ni kan faseg ko yam’, ma mang e yog ngak pi gachalpen nib milfan ngorad?

⁴ Yay ni gaman e lal ngay ni m’ug Jesus nib girdi’ e nap’an ni ke muulung e pi apostal rok nge boch i gachalpen nga taabang. Ma aram me fil boch ban’en ko Thin rok Got ngorad. Me “tamilangnag an’rad ngar nanged fan e pi n’em ni bay u lan e babyor nib thothup.” Ma aram e ngiyal’ ni tamilang u wan’rad ni yam’ ni tay u tan pa’ e pi toogor rok Got nge fas ko yam’ ni tay e aram boch ban’en ni kan yiiynag u lan e Babyor nib Thothup. U tungun e re muulung nem, me tamilangnag Jesus ngak pi gachalpen e n’en nib milfan ngorad ni ngar rin’ed. I yog ngorad nu “fithingan e ngan machibnag riy e thin rok Got ni murung’agen ni ngan kolngan’uy nga ni pi’ keruuy ko denen, me n’ag Got fan, ni thingar ni machibnag ngak urngin e pi nam, ni ngan tabab ngay u lan yu Jerusalem.” Miki ulul ngay ni gaar: “Gimed e mich ko pi n’ey.”​—Luke 24:44-48.

5, 6. (a) Mang fan ni gaar Jesus: “Mi gimed weliy murung’ageg”? (b) Mang e nge machibnag pi gachalpen Jesus murung’agen?

⁵ Ere 40 e rran nga tomuren u nap’an e yay ni tomur ni m’ug Jesus ngak pi gachalpen, ma dabisiy nib mom ni nang e pi apostal rok fan fapi thin ni tay chilen ngorad ni gaar: “Mi gimed weliy murung’ageg u lan yu Jerusalem, ngu lan yu Judea ni polo’, ngu lan yu Samaria, nge yan i mada’ ko yungi n’en ni yan i mus e fayleng ngay.” (Acts 1:8) Mang fan ni gaar Jesus: “Mi gimed weliy murung’ageg,” ma de gaar, mu weliyed murung’agen Jehovah? Rayog ni nge yog Jesus ngorad ni ngar weliyed murung’agen Jehovah. Machane, pi gachalpen Jesus e yad e girdi’ nu Israel, ere yad e pi mich rok Jehovah ni yad ma weliy murung’agen.

⁶ Ngiyal’ nem e ke taw nga nap’an ni nge weliy pi gachalpen Jesus murung’agen yugu reb e kanawo’ ni be fanay Jehovah ni nge lebguy e tin nib m’agan’ ngay. Binem e kanawo’ ni ngan thap riy ngak Got e kab gel e fel’ riy ko bin baaram e kanawo’ ni fanay Jehovah ni nge chuweg piyu Israel riy ko sib u Egypt ngu nap’an ni yad ba kalbus u Babylon. Yam’ ni tay Jesus Kristus e ir e ke pithigdad ko denen nge yam’. Nap’an e Pentekost ko duw ni 33 C.E., me weliy pi gachalpen Jesus ni kan dugliyrad nga gelngin Got nib thothup murung’agen e “pi n’en nib sorok Got ni ke ngongliy,” ma boor e girdi’ ni rung’ag e pi thin ney e ra kalgadngan’rad ko kireb rorad me mich Jesus u wan’rad. Ere nap’an ni bay Jesus u tharmiy ni ke par nga but’ ko ba’ ni mat’aw rok e Chitamangin, me tabab ni nge guy rogon ni ke gagiyel fithingan u nap’an ni ke kalngan’ bokum biyu’ e girdi’ ko kireb rorad me mich Jesus u wan’rad ni ir e en nrayog ni nge thapegrad ngak Jehovah.​—Acts 2:5, 11, 37-41.

“ME PI’ E POGOFAN ROK NGE BIYULIY BOOR E GIRDI’ NGAY”

7. Mang e be micheg e pi n’en ni buch u nap’an e Pentekost ko duw ni 33 C.E.?

⁷ Pi n’en ni buch ko Pentekost ko duw ni 33 C.E. e be micheg ni fare maligach nib flont ni pi’ Jesus ni nge biyuliy e girdi’ ko denen e ba fel’ u wan’ Jehovah. (Heb. 9:11, 12, 24) I yog Jesus nde yib “ni ngan pigpig ngak, machane yib ni nge pigpig me pi’ e pogofan rok nge biyuliy boor e girdi’ ngay.” (Matt. 20:28) I yog Jesus ni “boor” e girdi’ nra yib angin fare biyul ngorad, machane gathi kemus ni goo pi Jew ni kar kalgadngan’rad ko denen rorad. Ya baadag Got “urngin e girdi’ ni ngar thapgad ngak,” ya fare biyul e ra “chuweg e denen rok e girdi’ nu fayleng.”​—1 Tim. 2:4-6; John 1:29.

8. Uw e machib pi gachalpen Jesus ngar tawgad ngay, ma uw rogon ni yag ni ngar rin’ed e re n’ey?

⁸ Ere gur, ke yag rok e tin som’on i gachalpen Jesus ni ngar weliyed murung’agen ndar rusgad? Arrogon, machane dar rin’ed e re n’ey u gelngirad. Ya gelngin Jehovah nib thothup e ir e ayuwegrad me pi’ gelngirad ni ngar ululgad ko machib. (Mu beeg e Acts 5:30-32.) Sogonap’an 27 e duw nga tomuren e Pentekost ko duw ni 33 C.E., ma rayog ni nga nog ni ke taw fare “thin rok Got nib riyul’ . . . ni ir e Thin Nib Fel’” ngak piyu Jew nge piin ni gathi yad e Jew u ga’ngin yang e “fayleng.”​—Kol. 1:5, 23.

9. Mang e buch ko ulung ko tin som’on e Kristiano kakrom ni bod rogon ni kan yiiynag?

⁹ Machane, rib gel e kireban’ riy ni bochan e munmun me tabab boch e girdi’ u lan e ulung ko tin som’on e Kristiano ni ngar machibnaged boch ban’en nde riyul’. (Acts 20:29, 30; 2 Pet. 2:2, 3; Jude 3, 4) I yog Jesus u m’on riy ni Satan ni ir “Faanem nib kireb” e ir e be tay tanggin e re n’ey. Ma ra ulul nge mada’ ko “ngiyal’ ni ke chugur nga tomuren e re m’ag ney.” (Matt. 13:37-43, NW) Aram e ngiyal’ nra tay Jehovah Jesus ni nge mang Pilung ko girdi’ nu fayleng. I buch e re n’ey ko October ko duw ni 1914, ma aram e ngiyal’ ni tabab e “tin tomren e rran” ko re m’ag rok Satan ney.​—2 Tim. 3:1.

10. (a) Mang e re duw ni i machibnag e pi Kristiano ni kan dugliyrad murung’agen? (b) Mang e buch u nap’an e duw ni October 1914, ma uw rogon ni ke tamilang e re n’ey?

¹⁰ Ke yog e pi Kristiano ni kan dugliyrad u m’on riy, ni October 1914 e aram reb e duw nib ga’ fan. Kar feked e re n’ey ko fare yiiy rok Daniel ni murung’agen ba ke gek’iy nrib ga’ ken ni kan toy nga but’ mi ki tugul bayay u tomuren “medlip e duw.” (Dan. 4:16) Nap’an ni be yiiynag Jesus murung’agen e ngiyal’ ni bay nge “ngiyal’ ni ke chugur nga tomuren e re m’ag ney,” me yog ni aram e ngiyal’ ni bayi yot’ e pi nam “daken yu Jerusalem nge mada’ ko ngiyal’ ni ngar musgad riy.” Ka nap’an e duw ni 1914, ma ke m’ug e “pow ko ngiyal’ ni bay [Kristus] riy” ni ke mang e bin nib beech e Pilung ko fayleng. (Matt. 24:3, 7, 14; Luke 21:24) Ere, ka aram nap’an i yib ni “pi n’en nib sorok Got ni ke ngongliy” ni gad ma machibnag murung’agen e ba muun ngay murung’agen e n’en ni ke rin’ Jehovah ni aram e ke dugliy Jesus ni nge mang Pilung ko girdi’ nu fayleng.

11, 12. (a) Mang e tabab e bin nib beech e Pilung ni nge rin’ u nap’an e duw ni 1919 u tomuren e bin som’on e mahl ko fayleng? (b) Mang e gagiyel u nap’an e duw ni 1935 i yib ngaray? (Mu guy e sasing ni bay u tabolngin e re article ney.)

¹¹ Nap’an ni mang Jesus Kristus e Pilung me tabab ni nge chuweg pi gachalpen ni kan dugliyrad ko fare “Babylon nib gilbuguwan.” (Rev. 18:2, 4) Nap’an e duw ni 1919 u tomuren e bin som’on e mahl ko fayleng, me mab e kanawo’ ko piin ni kan dugliyrad ni ngar machibgad u ga’ngin yang e fayleng. Kar machibnaged murung’agen fare biyul nge fare thin nib fel’ ni murung’agen Gil’ilungun Got, ma angin ni yib riy e bokum biyu’ e girdi’ ni kur filed e tin riyul’ mar manged boch e piin ni kan dugliyrad ni ngar uned ngak Kristus nga tharmiy ni ngar manged boch e pilung.

¹² Nap’an e duw ni 1935 i yib ngaray me gagiyel ni ke tabab Kristus i kunuy bokum milyon “yugu boch e saf” ni ngar uned ko fapi “girdi’ ni ke muulung ni pire’ ni pire’.” Pi girdi’ ney e be pow’iyrad e pi Kristiano ni kan dugliyrad ma yad be folwok ko n’en ni i rin’ Jesus ma yad ma machibnag ni yigoo Got nge Kristus e yow ra pi’ e yafas ngorad. Bochan ni yad ma athamgil ni ngar machibgad mi yad maruweliy e michan’ rorad ko fare biyul ni pi’ Kristus, ma yad ra magey ni yad ba fas u nap’an “fare gafgow ni ba ga’” nra yib ko re fayleng rok Satan ney.​—John 10:16; Rev. 7:9, 10, 14.

NGAD ATHAMGILGAD NI NGAD WELIYED ‘FARE THIN NIB FEL’

13. Bochan ni gad e Pi Mich Rok Jehovah, ma mang e kad dugliyed u wan’dad ni ngad rin’ed, ma uw rogon ni nge pagan’dad nra yib angin?

¹³ Manga yigi par nib ga’ fan u wan’dad e tow’ath rodad ni gadad boch e Pi Mich ni gad be weliy murung’agen e “pi n’en nib sorok Got ni ke ngongliy” nge pi n’en ni ke micheg ni fan ngodad boch nga m’on. Riyul’ nde mom ni ngad weliyed murung’agen e pi n’ey. Ya boor e pi walagdad ni yad ma machib u boch e binaw ni boor e girdi’ riy ndubrad e machib, ara yad ma moningnag e pi walag, ara yad ma gafgownagrad. Rayog ni ngad rin’ed e n’en ni rin’ apostal Paul nge piin ni ur uned ngak. I yog ni gaar: “Machane, Got rodad e pi’ e athamgil nga lanin’mad ni nggu weliyed ngomed e Thin Nib Fel’ ni yib rok, ni yugu ereram gelngin e togopluw ni yibe tay ngomad.” (1 Thess. 2:2) Ere, dab da talgad. Ya ngad dugliyed u wan’dad ni ngad pared ni gad ba mudugil ngad rin’ed e n’en ni kad micheged ngak Got nge mada’ ko ngiyal’ ni kan thang e re m’ag rok Satan ney. (Isa. 6:11) Dabiyog ni ngad rin’ed e re n’ey u gelngidad, machane thingar da meybilgad ngak Jehovah ni nge fanay gelngin nib thothup ni nge pi’ fare ‘gelngin ni ir e ba th’abi gel’ ni nge ayuwegdad.​—Mu beeg e 2 Korinth 4:1, 7; Luke 11:13.

14, 15. (a) Uw rogon e piin Kristiano u wan’ e girdi’ u nap’an e bin som’on e chibog C.E., ma mang e yog apostal Peter u murung’agrad? (b) Faanra yibe gafgownagdad ni bochan e gadad boch e Pi Mich Rok Jehovah, ma mang e ngad lemnaged?

¹⁴ Ngiyal’ ney e boor e girdi’ ni yad ma yog ni yad e Kristiano, machane, ma “m’ug u pangirad ndar nanged Got. Ma dabuy pangirad ma darir folgad, ma dabiyog ni ngar ngongliyed ban’en nib fel’.” (Titus 1:16) Dab da paged talin nu nap’an e bin som’on e chibog, ma boor e girdi’ ni i fanenikay e tin riyul’ e Kristiano. Aram fan ni yoloy apostal Peter ni gaar: “Mu felfelan’gad ni faanra nog e thin nib kireb ngomed ni fan e gimed girdien Kristus; ya ra er rogon ma . . . fare Kan ni Thothup [“gelngin Got nib thothup,” NW] e ke yib nga dakenmed.”​—1 Pet. 4:14.

¹⁵ Gur, rayog ni ngan fanay e pi thin ney ngak e Pi Mich Rok Jehovah e ngiyal’ ney? Rayog ni bochan e gad be weliy murung’agen Jesus ni ke mang Pilung. Ere, faanra yibe fanenikaydad ni bochan e gad be weliy fithingan Jehovah maku taareb rogon ko nga ‘nog e thin nib kireb ngodad ni fan e gadad girdien [Jesus] Kristus,’ ni ir e yog ko pi toogor rok ni gaar: “Ku gub ngomed ni gag owchen e Chitamag, machane dabumed gag.” (John 5:43) Ere, yay ni migid ni ga ra mada’nag e togopuluw u nap’an e machib, ma dab mu rus. Ya re n’ey e be micheg ni gab fel’ u wan’ Got ma bay gelngin nib thothup u ‘dakenam.’

16, 17. (a) Mang e be guy e girdi’ rok Jehovah u ga’ngin yang e fayleng ni be buch? (b) Mang e kam dugliy ni ngam rin’?

¹⁶ Ku dab mu pagtalin ni boor e girdi’ ko pi nam u fayleng ni yad be yib ko tin riyul’. Ki mada’ ko pi binaw nib fel’ rogon ni yibe machib riy, ma ka gad be pirieg boor e girdi’ ni yad baadag ni ngar motoyilgad nrayog ni ngad weliyed fare thin nib fel’ ngorad. Ere, ngad athamgilgad ngad sulod ko piin ni yad baadag e machib ma gad guy rogon ni ngad tababgad i fil e Bible ngorad, ma gad ayuwegrad ni ngar mon’oggad nge yag nra ognaged e yafas rorad ngak Got mar uned ko taufe. Dabisiy ni taareb rogon e lem rom ngak Sarie ni ma par u South Africa, ni ke pag 60 e duw ni ma machib nib pasig. I yog ni gaar, “Ri gu be pining e magar, ya bochan fare biyul ni pi’ Jesus ma ke yag ni nge fel’ e tha’ u thilmow Jehovah ni ir e Th’abi Tolang u ga’ngin e palpalth’ib, ma gu be felfelan’ nrayog ni nggu weliy murung’agen fithingan.” Ke yag ni ngar ayuwegew Martinus ni pumoon rok boor e girdi’ ni kub muun ngay dalip i bitir ni fakrow ni ngar manged tapigpig rok Jehovah. Ki yog Sarie ni gaar, “Dakuriy reb e maruwel u bang ni ma yibnag e felfelan’ ni aray gelngin, ma be ayuwegmad Jehovah u daken gelngin nib thothup ni nggu ululgad i rin’ e re maruwel ney nra ayuweg e yafas ko girdi’.”

¹⁷ Demtrug ko kad uned ko taufe fa dawo’, ma boor fan ni ngad pininged e magar ko fare tow’ath ni bay rodad nrayog ni ngad chaggad e pi walagdad ko pi ulung ko Pi Mich Rok Jehovah ni bay u ga’ngin yang e fayleng. Ere, mu athamgil ni ngam weliy fare thin nib fel’ ni yib rok Got nge nang e girdi’, ma ga athamgil ni ngam par ni gab beech u lan e re fayleng rok Satan ney nde beech. Faan ga ra rin’ ni aray rogon ma aram e ga be pining e sorok ngak Jehovah ni ir e Chitamangidad ni bay u tharmiy, ni ir e gad be weliy fithingan ko girdi’.