KAR OGNAGED YAD NI NGAR MACHIBGAD—u Micronesia

KATHERINE e be’ ni ilal u Meriken, ma nap’an ni gaman 16 e duw rok min taufenag ni aram e ke mang reb e Pi Mich Rok Jehovah. Ir be’ nrib pasig ko machib, machane dariy be’ ni baadag e machib ko gin ni par riy. I yog ni gaar: “Ug beeg murung’agen e girdi’ ni yad ma meybil ngak Got ni nge pi’ be’ ni nge ayuwegrad, ya nge yag ni ngar nanged Got. Ba ga’ ni gu ma athapeg ni nggu pirieg be’ ni aram rogon u nap’an ni gu be machib, machane dawori buch rog ni aram rogon.”

Tomuren boor e duw ni ke machib Katherine ko binaw rok, ma aram me lemnag ni nge chuw nge yan i par ko gin nrayog ni nge pirieg e girdi’ riy ni yad baadag e machib. Machane, i fal’eg i lemnag ko rayog rok ban’en ni aram rogon, fa. Kari mus ni taab yay u lan e yafos rok e ke pag e tabinaw rok ke yan nga bang u lan l’agruw e wik, ma gubin e rran ni i tawrengnagrad. Machane, bochan nri baadag ni nge ayuweg e girdi’ ni ngar nanged Got, ma aram me dugliy ni nge rin’ e re n’em. Tomuren ni fal’eg i lemnag ko kun binaw e nge yan i par ngay nib t’uf e ayuw riy, ma aram me yol ko branch u Guam ya nge yag ni nga nog ngak e tin nib t’uf ni nge nang. Nap’an e pul ni July ko 2007 ni ke gaman 26 e duw rok Katherine, ma aram me yan nga Saipan, ni sogonap’an 6,000 e mayel palogin ko tabinaw rok. Ere, mang e buch rok?

L’AGRUW I MEYBIL NNI FULWEG TABAN

De n’uw nap’an nga tomuren ni taw Katherine ko ulung u rom, me mada’nag be’ ni Doris fithingan ni ke gaman 40 e duw rok ni baadag ni nge fil e Bible. Tomuren ni kar filew e guruy ni dalip ko fare ke babyor ni Mang e Ri Be Fil e Bible? ma aram me par Katherine ni kari magafan’. I yog ni gaar: “Doris e be’ ni ma tiyan’ ko fol Bible, ma dawor gu nang rogon ni nggu fil e Bible ngak nib fel’ rogon. Dariy ba ngiyal’ ni kug fil e Bible ngak be’. Ere gu lemnag ni sana ku bay reb e walag ni rayog ni nge fil e Bible ngak nib fel’ rogon. Dabisiy ni be’ ni yow taab yangar.” Ere i meybil Katherine ngak Jehovah ni baadag ni ngan ayuweg ni nge pirieg reb e walag nib pin nrayog ni nge ayuweg Doris. Ma aram me dugliy ni nge yog ngak Doris ni bay yib reb e walag ni ngar filew e Bible.

I yog Katherine ni gaar: “U m’on ni nggu weliyew murung’agen e re n’em me yog Doris ni baadag ni nge weliy murung’agen reb e magawon ngog. Tomuren ni kug motoyil ko n’en ni be yog ma aram mu gog ngak rogon ni ke ayuwegneg Jehovah u nap’an ni buch ban’en rog ni aram rogon. Ma aram me pining e magar ngog.” Me yog Doris ngak Katherine ni gaar: “Be fanayem Jehovah ni ngam ayuwegneg. Yay nsom’on ni mub nga tabinaw rog, mab n’uw nap’an ni ug beeg e Bible rog. Ug yor ni gu be yog ngak Got ni nge pi’ be’ ni nge yib ni nge ayuwegneg nggu nang fan e thin ko Bible. Ma aram mag tugtuguy e mab rog. Ke fulweg Jehovah taban e meybil rog!” I sug e lu’ nga owchen Katherine u nap’an ni weliy murung’agen e n’en ni buch rok. Me yog ni gaar: “Pi n’en ni yog Doris ngog e aram e fulweg ko meybil rog. Ke dag Jehovah ngog nrayog ni nggu ulul ko fare study romow.”

Kan taufenag Doris ko duw ni 2010, ma chiney e ku ma fil e Bible ngak boch e girdi’. I yog Katherine ni gaar: “Ri gu be felfelan’ ya ke yag ni nggu ayuweg be’ ni nge mang reb e tapigpig rok Jehovah, ni ireram e n’en ni ug athapeg!” Chiney e be pigpig Katherine nib felfelan’ ni ir reb e special pioneer u Kosrae.

DALIP BAN’EN NRAYOG NI NGE MAGAWONNAGEY NGE ROGON NRAYOG NI NGAN GEL NGAY

Boor ko raay e walag nib pin nge pumoon ni (bay e duw rorad u thilin e 19 nge 79) e yad be pigpig ko yungi n’en nib t’uf e ayuw riy u lan yu Micronesia. Erica ni yan nga Guam ko duw ni 2006 u nap’an ni ke gaman 19 e duw rok e weliy rogon e lem ko pi girdi’ ney ni yad ba pasig ni gaar: “Yira machib ko gin ni baadag e girdi’ e machib riy, ma riyul’ nrib gel e felfelan’ riy. Ri gu be felfelan’ ngay ni ke ayuwegneg Jehovah ni nge yag ni nggu rin’ e re maruwel ney. Ireray e bin th’abi fel’ kanawoen e yafos!” Ngiyal’ ney e ba felfelan’ Erica ni be pigpig ni ir reb e special pioneer ko fare donguch nu Ebeye u Marshall. Bin riyul’ riy e ku bay e magawon ni yima mada’nag ko pigpig u yugu reb e nam. Ere gad ra weliy murung’agen dalip e pi magawon ney, nge rogon ni ke gel e pi girdi’ ney ngay.

Rarogon e par. Tomuren ni taw Simon nga Balau ko duw ni 2007 ni ke gaman 22 e duw rok, me nang nde yoor e salpiy nra yag ngak ni bod urngin e salpiy ni i yag ngak u England. “Kug fil rogon ni nge dab kug chuw’iy boch ban’en ni gu baadag. Gu ma gay e gin ni nggu chuw’iy e chugum riy nib sobut’ puluwon. Nap’an nra kireb reb e chugum rog, ma gu ma changarnag e yungi n’en nrayog ni ngan thilyeg ngay nge be’ nrayog ni nge fal’eg.” Uw rogon ni ga be lemnag ni ke yib angin e re n’ey ngak? I yog Simon ni gaar: “Re n’ey e ke ayuwegneg ni nggu nang ko mang e rib t’uf ko yafos rog nge rogon nrayog ni nggu par nib fel’ u wan’ug e chuuw i n’en ni bay rog. Ba mich u wan’ug ni ke yoor yay ni ke ayuwegneg Jehovah. U lan medlip e duw ni kug machib u roy, ma gubin ngiyal’ ni bay e ggan rog nge gin ni nggu mol riy.” Riyul’, ni ma ayuweg Jehovah e piin ni kar lichnaged pa’ nga puluwrad, ya yad baadag ni ngar m’oneged e Gagiyeg rok u wan’rad.—Matt. 6:32, 33.

Tawreng. I yog Erica ni gaar: “Rib chugur e tha’ u thilmad chon e tabinaw rog, ma i magafan’ug nra gu tawreng ma ra magawonnag e machib ni gu be tay.” Uw rogon ni fal’eg rogon ir? U m’on ni nggu chuw u tabinaw rog, ma aram mug beeg boch e article ni bay ko Wulyang ko Damit ni murung’agen e tawreng. Re n’ey ni gu rin’ e ke ayuwegneg. Bay reb e pi article nem ni bay riy murung’agen reb e matin ni ayuweg e bitir rok ni nge mich u wan’ nra ayuweg Jehovah. I yog ngak ni gaar, ‘Rayog ni nge ayuwegem Jehovah nib fel’ boch nga rogon ni gu ma ayuwegem.’ Re n’em ni kug beeg e riyul’ ni ke pi’ gelngig.” Hannah nge Patrick ni pumoon rok e yow ma un ko machib u Majuro nreb e donguch ni bay u Marshall. Yugu aram rogon ni ma tawrengnag Hannah chon e tabinaw rok, machane ma athamgil nga i chag ngak e pi walag u lan e ulung, ya nge dabi gel e tawreng rok. I yog ni gaar: “Gu ma pining e magar ngak Jehovah ni bochan e pi walag ney, ya ku yad boch i chon e tabinaw rog. Faan gomanga da ur ayuweged gag, ma dabiyog rog ni nggu machib ko gin nib t’uf e ayuw riy.”

Rogon ni nge yag e fager. I yog Simon ni gaar: “Nap’an ni ga ra yan mu par nga reb e nam, ma ke thil urngin ban’en. Yu ngiyal’ e dabug ni gu ma yog ban’en ni susun ni ngan minmin ngay, ya der nang e pi girdi’ nem fan e n’en ni ku gog.” Ki yog Erica ni gaar: “Som’on e gowa kug par ni yigoo gag, machane ke ayuwegeg e re n’ey ni nggu fal’eg i lemnag fan ni kug wan ko re binaw nem. Kug wan ngaram ni fan e ngki yoor ban’en ni nggu rin’ ni fan ngak Jehovah.” Miki gaar: “Munmun ma ke yag ni nge yoor e fager rog u lan e ulung, ni aram e n’en nib ga’ fan u wan’ug.” I athamgil Simon ni nge fil e thin nu Balau, ma re n’ey e ke ayuweg ni nge weliy ‘laniyan’’ ko pi walag ko re ulung nem. (2 Kor. 6:13) Bochan ni ke athamgil ni nge fil e thin ko re nam nem, ma ke yag ni nge fel’ thilrad e pi walag u rom. Arrogon, nap’an nra maruwel e pi walag ni kar bad u reb e nam nge pi walag ko fare ulung u taabang, ma yad ma felfelan’ ni bochan e ke yag ni nge chugur e tha’ u thilrad. Ere mang boch e tow’ath ni ku ma yag ngak e piin ni ke m’agan’rad ngay ni ngar pigpiggad ko gin nib t’uf e ayuw riy?

‘PIRE’ E N’EN NRAYOG RIY’

I yog Apostal Paul ni gaar: “En nra yung e awoch ni pire’, e pire’ e n’en nrayog riy ngak.” (2 Kor. 9:6) N’en ni be yog e re thin ney e bay rogon ngak e piin ni yad ma yoornag e tayim rorad ni fan ko machib. Mang e pi n’en nib “pire’” ni be yag ngorad u Micronesia?

Boor e kanawo’ u rogon nrayog ni ngan tababnag e fol Bible ko girdi’ u Micronesia, ma rayog ni ngan guy rogon ni yad be mon’og ko tirok Got ban’en ni bochan e yad be fil e Thin rok Got ma yad be fol riy. I machib Patrick nge Hannah u reb e donguch nu Angaur ni kemus ni 320 e girdi’ ni yad be par riy. Tomuren l’agruw e pul nra machibgow u rom, mar mada’nigew reb e matin ndariy e pumoon rok. Ma baadag e re ppin nem ni nge un ko fol Bible, ma aram me thilyeg boch ban’en ko yafas rok. I yog Hannah ni gaar: “Nap’an ni gamad ra mu’ ko study magmow af e pumoon rog nga daken e rat romow, mug changargow u owchemow, ma gamow gaar: ‘Kammagar Jehovah!’” Miki yog Hannah ni gaar: “Gu manang nrayog rok Jehovah ni nge pow’iy e re ppin ney nge nang e tin riyul’, machane bochan ni gamow be machib ko gin nib t’uf e ayuw riy, ma ke yag ni nggu piriegew, ma gamow ayuweg e re ppin ney nib sobut’ laniyan’ ni nge nang Jehovah. Ireray reb e ban’en ni ke buch romow nrib gel e felfelan’ riy!” Miki yog Erica ni gaar, “Nap’an ni ga ra ayuweg be’ ni nge nang Jehovah, ma rib gel e felfelan’ ni ga ra tay!”

RAYOG NI NGAM UN KO RE MARUWEL NEY, FA?

Ba t’uf boch e girdi’ ni ngar machibgad u boch e nam. Gur, rayog ni ngam ognagem ni ngam pi’ e ayuw ko gin nib t’uf e ayuw riy? Mu meybil ngak Jehovah ni nge ayuwegem ngam adag ni ngam pi’ e ayuw ko gin nib t’uf e ayuw riy. Rayog ni ngam weliy e n’en ni kam lemnag ni ngam rin’ ngak e piin piilal ko ulung nge circuit overseer ara mu weliyed e piin ni kar rin’ed e re n’ey. Nap’an ni ga ra dugliy e n’en ni ngam rin’, mag yol ko fare branch ofis ni ma ayuweg fare ulung ni ga be lemnag ni ngam pi’ e ayuw riy, mag fithrad u boch ban’en nib t’uf ni ngam nang.a Dabisiy nrayog ni ngam un ngak bokum biyu’ e walag nib fel’ yangarrad ara kar pilibthirgad ara yad ba muchugbil ara yad ba mabgol, nib m’agan’rad ngay ni ngar rin’ed e re maruwel ney mab ‘pire’’ e felfelan’ ni kar pirieged.

a Mu guy fare article ni “Bay Gu Wan Nga Yugu Reb e Binaw?” ni bay ko fare Machib ko Gil’ilungun ko September 2000.

Rogon ni Ngan Skulnag Be’

PIIN piilal ni Kristiano ni ke yoor e duw ni kar ayuweged e ulung e yad ba muun ko piin ni ka ranod ni ngar pied e ayuw nga boch e nam. Uw rogon nrayog ko pi walag ney ni ngar skulnaged e tin ni ka bay e walag u lan e ulung ko tirok Got ban’en?

Richard ni ke gaman 65 e duw rok e chuw u Meriken nge yan i par nga Guam. I yog nib ga’ fan ni ngaum pining e magar ngak e en ni ga be ayuweg ni nge mon’og u rogon ni nge ayuweg be’. Miki yog ni gaar: “Reb e kanawo’ u rogon nrayog ni ngan ayuweg e girdi’ ngar m’onoggad ko machib e aram e ngaun un ngorad ko machib. Pi walag ni pumoon e rayog ni ngar guyed mi yad rung’ag rogon ni ga ma fil murung’agen Jehovah ngak yugu boch e girdi’. Ma yira machib u taabang ma ra gel e t’ufeg nge taareban’.”

Greg ni 60 e duw rok e i par u Saipan ko duw ni 2010. I yog ni gaar: “Piin piilal ni kar bad u boch e nam e yad ma gay rogon ni ngar ayuweged e pi walag ni be’ nge be’. Ke yag ni nge chugur e tha’ u thilmad ma ke pagan’mad ngomad, ma gamad ma tay famad.” Miki gaar: “Gathi kemus ni goo taabe’ e nge yib angin ngak e n’en ni yibe fil. Boor ban’en nrayog ni nggu filed ko pi walag u lan e ulung.”

Mike, ni ke gaman 60 e duw rok nge Alice ni ppin rok e kar machibgow ko pi donguch u lan e Pacific ni ke pag 20 e duw. Uw rogon ni ke ayuweg boch e girdi’? I yog ni gaar: “Gu ma fol u rogon e yaram ko ulung. Gu ma gay rogon ni nge nang e en ni gu be skulnag ni nge fol ko re n’ey. Ug athamgil ni nggu rin’ e tin ni ug fil ko girdi’ ma gu be dag e gum’an’, ma gu be pining e magar ngak e piin ni gamad be maruwel u taabang.” Miki yog ni gaar: “Nap’an ni ga ra yan nga reb e nam nib thil, ma ga ra nang ni boor kanawoen nrayog ni ngan rin’ reb e maruwel.”

Uw rogon u wan’ e pi walag ni kar ilalgad u Micronesia rogon ni yibe skulnagrad ko tirok Got ban’en? Joel ni ke gaman 21 e duw rok ni ma par u Guam e yog ni gaar: “Ma dag e piin piilal nib pagan’rad ngog, ya yad ma pi’ boch e maruwel ngog u lan e ulung. Re n’ey e ke ayuwegneg ni nggu nang nib ga’ fan e pigpig ni gu be tay ngak Jehovah.” Byron ni 31 e duw rok ni ma par u Saipan e yog ni gaar: “Bochan ni yad ba pasig ko machib nge bochan nib t’uf e pi walag rorad, ma ke ayuwegneg e piin piilal ni nggu tiyan’ug ko tirok Got ban’en ko bin ni nggu nameg e fel’ rogon.” Miki gaar: “Gamad ba tow’ath ni bay e pi walag ney ko ulung romad.”