Deer Ko Piin Ma Beeg
Ba puluw ni nge urfiy e piin Kristiano e yam’ rorad?
Dariy bang u Bible ni be yog nib kireb ni ngan urfiy e yam’.
Bay boch e thin nu Bible ni be weliy murung’agen boch e girdi’ ni ke yim’ ara yil rorad ni un urfeg kakrom. (Josh. 7:25; 2 Kron. 34:4, 5) Sana un rin’ e re n’ey ni nge m’ug riy ndariy rogon ni ngan k’eyag e pi girdi’ nem. Machane, gathi gubin e yam’ ni un urfeg kakrom e bochan ni dariy rogon ni ngan k’eyagrad.
Ireray e n’en ni kan rin’ ngak Saul ni Pilung nge fa dalip i pumoon ni fak. I yim’ e pi cha’ney u nap’an ni yad be cham piyu Filistia. Bagayad e pi pumoon ni fak Saul nem e Jonathan ni fager rok David, maku ir e i ayuweg. Nap’an ni nang boch e girdi’ nu Israel ni yad ma par u Jabesh-gilead e n’en ni ke buch, ma aram mi yad yan ra gayed e ldow ko fa aningeg i pumoon, mi yad fek ngar urfiyed, ngemu’ mi yad k’eyag e yil rorad. Boch nga tomuren mi ri pining David e sorok ngorad ko n’en ni kar rin’ed.—1 Sam. 31:2, 8-13; 2 Sam. 2:4-6.
Athap ko piin ni kar m’ad e ngan fasegrad ko yam’. Re n’ey e be yip’ fan ni nge sulweg Got e yafas rorad ngorad. Gubin e girdi’ ni kar m’ad e rayog ni nge fasegrad Got ko yam’ me pi’ reb e dowef nib beech ngorad ndemtrug ko ni urfegrad u nap’an ni kar m’ad fa danga’. Fa dalip i pagel ni Hebrew ni faani yog Nebukadnezzar ni Pilung ni nga non’rad nga lan fare stof ni be daramram e nifiy riy e dar rusgad nri chey nra m’ad ma de fasegrad Got ko yam’. (Dan. 3:16-18) Ku ireray e n’en ni buch ko pi tapigpig rok Jehovah ni yad ba yul’yul’ nra m’ad ngemu’ min urfiyrad ko fapi Nazi concentration camp. Ku boor e tapigpig rok Got ni yad ba yul’yul’ ni ke aw e donmach ngorad kar m’ad ara kar m’ad u yugu boch e kanawo’ ma dan piriegrad. Machane, gad manang ni mus ko pi girdi’ ney ni yira fasegrad ko yam’.—Rev. 20:13.
De t’uf ni nge puthuy Jehovah yu yang u downgin be’ nga taabang ya nge yag ni ngki faseg bayay ko yam’. Ra m’ug e re n’ey u rogon nra faseg Got e pi Kristiano ni kan dugliyrad ni nga ranod nga tharmiy. Pi Kristiano ni kan dugliyrad e nap’an ni yira fasegrad ko yam’ ma ka taareb rogorad ko ngiyal’ ni ur moyed ni yad ba fas, kemus ni kan pi’ reb e dowef ngorad ni gathi downgin e girdi’ ni bod rogon Jesus. Ya dabiyog ni nga ranod nga tharmiy ni yad be fanay downgin e girdi’.—1 Pet. 3:18; 1 Kor. 15:42-53; 1 John 3:2.
Athap rodad ko fas ko yam’ e gathi be yan u rogon e n’en ni yira rin’ ngodad u nap’an ni kad m’ad, ya be yan u rogon e michan’ rodad nga rogon nrayog rok Got ni nge lebguy e tin ni ke micheg. (Acts 24:15) Machane, sana gathi rib tamilang u wan’dad rogon ni i faseg Got boch e girdi’ ni ur m’ad kakrom, fa rogon nra rin’ boch nga m’on. Machane, be pagan’dad ngak. Ya ke “dag e mich ko re bugithin ney” ni bochan e ki faseg Jesus ko yam’.—Acts 17:31; Luke 24:2, 3.
Ere, piin Kristiano e ba fel’ ni ngar lemnaged rogon e yalen, nge rogon laniyan’ e girdi’, nge rogon e motochiyel ko am u murung’agen rogon ni yima k’eyag e yam’ ko gin ni yad ma par riy. (2 Kor. 6:3, 4) Ma bin baaray ni nge urfiy be’ ara boch e girdi’ e yam’ rorad e yad e ke milfan ngorad.