“Nge Gel Ngak E Yam’”

“Ma bin th’abi tomur e toogor ni nge gel ngak e yam’.”​—1 KORINTH 15:26.

1, 2. (a) Mang athap ni yog apostal Paul ni bay ko piin ni kar m’ad? (b) Mang deer u morngaagen e fas ko yam’ ni ke tamilangnag Paul?

“KE MICH u wan’ug . . . ni ran faseg downgin e girdi’ ko yam’ nge yafas ni ndariy n’umngin nap’an.” Aram rogon ni yog fare Apostles’ Creed. Ma goo ke mit nga laniyan’ e piin Katolik nge Protestant, ma dar nanged ni machib rorad e kab chugur ko machib ni Greek philosophy ko n’en ni ke michan’ e pi apostal ngay. I togopuluw apostal Paul ko machib ni Greek philosophy ma de mich u wan’ ni dabi yim’ e yaal. Machane ke mich u wan’ ko yafas nga m’on me yoloy e thin ni kan thagthagnag nga laniyan’ ni gaar: “Ma bin th’abi tomur e toogor ni nge gel ngak e yam’.” (1 Korinth 15:26) Uw rogon nib l’ag e girdi’ ko re n’em ni yad e girdi’ ni be yim’?

² Ngad sulod ko n’en ni weliy Paul u morngaagen e fas ko yam’ ni bay ko 1 Korinth guruy ni  15. Tin som’on e verse riy me micheg Paul ni fas ko yam’ e reb e machib ni baga’ fan ko Kristiano. Nge mu’ me tamilangnag reb e deer ni baga’ fan: “Ra diin mi ni faseg e yam’? Mit i mang dowef e bay yog ngorad?’”​—1 Korinth 15:35.

Mit i Mang Dowef?

3. Mang fan ni ke togopuluw boch e girdi’ ko fas ko yam’?

³ Sana i fith Paul e re deer nem ni fan ni nge togopuluw ko machib ara philosophy rok Plato. Machib rok Plato e be yog ni girdi’ e bay e yaal ni ma par nib fas u tomren ni yim’ e dowef. Ma piin ni kar ilalgad ko re machib nem e dabi siy ni ur lemnaged ni de t’uf e machib ko Kristiano rorad. Ya faan mang ma par e yaal nib fas u tomren e yam’ me ere mang fan nib t’uf e fas ko yam’? Maku ke m’ug riy ni de puluw e machib ko fas ko yam’. Ya nap’an ni ke m’ay fare dowef ya ke mang but’, ma uw rogon nrayog ni ngan faseg? Heinrich Meyer ni be’ ni ma weliy u morngaagen e Bible e yog ni sana ke togopuluw piyu Korinth ngay ni bochan ni ur lemnaged ni “ri dabiyog ni ngan sulweg e dowef ni ke sul ko but’ nga rogon.”

4, 5. (a) Mang fan nde puluw e n’en ni yog boch e girdi’ nib togopuluw ko fas ko yam’? (b) Mu tamilangnag fare fanathin ni weliy Paul u morngaagen fare “awoch.” (c) Miti mang dowef ni ra pi’ Got ko piin ni kan dugliyrad u tomren ni ran fasegrad ko yam’?

⁴ I tamilangnag Paul ferad manan’ me gaar: “Gab manan! Ra mu yung ba awoch nga fithik’ e but’ ma dabi tugul ni faanra dabi pil nge wod; ma n’en ni kam yung e ke mus nib awoch, sana ba awochngin e woldug ni yima ngongliy e flowa riy, fa yugu mmit, ma gathi n’en ni bayi tugul ko re awoch nem e mu yung nib ken ni ke mus nga mam’ungun. I Got e re dowef nib m’agan’ ngay e ke pi’ ngak e re awoch nem; ra reb e awoch ma ke pi’ ngak e birok e dowef nib m’ag ngak.” (1 Korinth 15:36-38) Dabi faseg Got e dowef ko girdi’ ni immoy rorad u nap’an ni yad bay u fayleng. Ya ran piliyegrad.

⁵ I taarebnag Paul e fas ko yam’ ko ba awoch ni be tugul. Ba awochngin e wheat e de bod yaan fare woldug ni ra yib riy. Be weliy fare The World Book Encyclopedia ni gaar: “Nap’an ni be n’en ba awoch ni nge tugul, ma ra fanay boor e ran. Ma fare ran e ra n’igin nge thil boch ban’en nib chemical u fithik’ fare awoch. Ku ma n’igin ni nge thow u langgin ma ra pil keru’ fare awoch.” Ere gowa ke yim’ fare awoch ya daki par nib awoch ma ra mang ba woldug ni be tugul. Ma “Got e re dowef nib m’agan’ ngay e ke pi’ ngak” ya ke turguy e motochiyel ko science ni be gagiyegnag rogon nra tugul, ma ra mit e awoch min pi’ ba dowef ngak. (Genesis 1:11) Ku aram rogon e pi Kristiano ni kan dugliyrad e som’on ma yad ma yim’ nib girdi’. Ma ngiyal’ ni ke dugliy Got e ra fasegrad ko yam’ ma ra pi’ ngorad e dowef nib biech. Ma rogon ni yog Paul ngak yu Filippi e, “Jesus Kristus . . . e bayi piliyeg dowdad nib meewar ma ra yim’ nge bodnag downgin nib galgal ramaen.” (Filippi 3:20, 21; 2 Korinth 5:1, 2) Yira fasegrad ko yam’ ko downgin e kan ma yad ra par u giyow ko kan.​—1 John 3:2.

6. Mang fan nib puluw ni ngan lemnag ni rayog ni nge pi’ Got e dowef nib kan nib puluw ko piin ni kan fasegrad ko yam’?

⁶ Mo’maw ni nge mich u wan’uy ko re n’ey fa? Danga’. I weliy Paul ni boor mit i dowef ko gamanman ni ba’. Miki tamilangnag e thil u thilin e pi engel u tharmiy nge girdi’ ni bay e ufin nge racha’ u dowrad me gaar: “Bay e tin nu tharmiy e dowef ma bay e tin nu fayleng e dowef.” Ku arrogon e tin nde fas ni ba thil reb nga reb. I gaar Paul: “Ku er rogon e t’uf nra reb ma ba thil e birok e gamog,” ma ke yog e pi thin nem u m’on ni pirieg e science e pi n’en u tharmiy ni bod e pi t’uf ni blue star, nge red giant nge white dwarfs. Ere gathi ba puluw ni ngan lemnag ni rayog ni nge pi’ Got e dowef nib puluw ko piin ni kan dugliyrad ma kan fasegrad ko yam’ fa?​—1 Korinth 15:39-41.

7. Mang fan fare bugithin ni der kireb? nge fare bugithin ni dabi yim’ biid?

⁷ Ma aram me yog Paul ni gaar: “Ereray rogon e n’en ni bayi rin’ e yam’ ni ka ni fasegrad. Faani bay ni k’eyag e dowef ma ba dowef ni ra kireb; ma faan nni faseg ko yam’ ma dab ki yim’ biid.” (1 Korinth 15:42) Mus ni ba flont e dowef ko girdi’ ma rayog ni nge kireb. Rayog ni ngan li’ ngem’. Susun, i yog Paul ni kan faseg Jesus ko yam’ ma “dabki sul nga dowef nrayog ni nge kireb.” (Acts 13:34) Dabki sul ko yafas u fithik’ ba dowef ko girdi’ nrayog ni nge kireb ni yugu aram rogon nib flont. Dowef ni ma pi’ Got ngak e piin ni kan dugliyrad ma kan fasegrad ko yam’ e dabiyog ni nge kireb​—dabki yim’ biid ma dabi wod. I ul’ul’ Paul ngay ni gaar: “Faan bay ni k’eyag ma ke kireb usun ma ke m’ay gelngin; ma faan nni faseg ko yam’ ma kari gamog ma ke gel. Ngiyal’ ni ka ni k’eyag riy e ba dowef ko girdi’; ma faan nni faseg ko yam’ ma gathi ku dowef ndowngin e girdi’.” (1 Korinth 15:43, 44) Miki yog Paul ni gaar: “N’en nrayog ni nge yim’ e thingari yin’ nga daken e n’en ndabiyog ni nge yim’.” N’en ndabiyog ni nge yim’ e ma sor fan ko yafas ni dabiyog ni ngan taleg ma dabiyog ni ngan thang. (1 Korinth 15:53; Hebrews 7:16) Aram rogon ma piin ni kan fasegrad ko yam’ e “rogorad e yad bod faanem ni ir e yib u tharmiy,” ni Jesus, me ir e ke n’igin nrayog ni nge fas e girdi’ ko yam’.​—1 Korinth 15:45-49.

8. (a) Uw rogon ni gad manang ni piin ni kan fasegrad ko yam’ e yad fa piin ni ur moyed u fayleng faram? (b) Mang boch e thin ko profet ni ra lebug u nap’an nran faseg e girdi’ ko yam’?

⁸ Ran piliyeg e girdi’ ni kan fasegrad ko yam’ machane ka yad taareb rogon ko piin ni ur moyed u m’on ni kan piliyegrad. Ya ran fasegrad ni taareb rogon laniyan’rad ko kafram ma taareb rogon felngirad ni felngin e Kristiano. (Malaki 3:3; Revelation 21:10, 18) Aram rogon ma yad bod Jesus Kristus. Ya kan piliyeg downgin ni ir ba kan me mang girdi’. Ma aram me yim’ min faseg ko yam’ nib kan. Machane “I Jesus Kristus e ka rogon ni fowap, nge daba’, nge chiney i yan nga m’on ndariy n’umgnin nap’an.” (Hebrews 13:8) Rib flaab e piin ni kan dugliyrad! I gaar Paul: “Ere nap’an ni yira yin’ e n’en ndab ki kireb nga daken e n’en nra kireb nge n’en nra yim’ e yira yin’ nga daken e n’en ndabki yim’ ni bod e munmad, ma aram e bay yib i m’ug nib riyul’ fare bugithin ni bay u lan e babyor nib thothup ni faan ke gaar: ‘Got e ke kirebnag gelngin e yam’; mi Got e ke gel!’”​—1 Korinth 15:54, 55; Isaiah 25:8; Hosea 13:14.

Ran Faseg e Yam’ u Fayleng?

9, 10. (a) Fa ngiyal’ ni “tungun” ni bay ko 1 Korinth 15:24, e ma sor fan ko mang, ma mang boch ban’en nra buch nib l’ag ngay? (b) Mang e thingari buch ni fan ni nge m’ay e yam’?

⁹ Bay ban’en ni nge l’agan’rad ngay ko gabul nge langleth fa bokum milyon e girdi’ ni dariy e athap rorad ni ngar manged e pi kan ndabi yim’ biid u tharmiy fa? Ri arrogon! Tomren ni ke weliy Paul u morngaagen e fas ko yam’ u tharmiy u nap’an e ngiyal’ nra moy Kristus, ma aram me weliy Paul e pi n’en nra buch u tomren ni gaar: “Ma aram e bayi taw ko tungun; mi Kristus e bayi gel ngak urngin e pi kan ni be gagiyeg, nge piin ni yad be tay murung’agen ban’en, nge piin ni yad be yog e thin, me pi’ Kristus urngin ban’en ni be gagiyegnag ngak Got ni Chitamangiy.”​—1 Korinth 15:23, 24.

¹⁰ “Tungun” aram e ngiyal’ u tomren fare Biyu’ e Duw ko Gagiyeg rok Kristus, ma ba sobutan’ Jesus mab yul’yul’ me ere ra pi’ e Gagiyeg ngak e Got rok ni ir Chitamangin. (Revelation 20:4) Ma ra lebug e n’en ni finey Got ni nge “kunuy urngin e tin ni sunumeg ban’en nga taabang, ni urngin ban’en ni bay u tharmiy ngu but’, me par Kristus ni ir e llug riy.” (Efesus 1:9, 10) Machane som’on ma ra thang Kristus “urngin e am nge piin ni be tay murung’agen ban’en, nge urngin e piin nib gel gelngirad” ni be togopuluw ngak Got. Ka bay boch ban’en nib l’ag ko biney ni gathi ke mus e magothgoth u nap’an Armageddon. (Revelation 16:16; 19:11-21) I gaar Paul: “Yi Kristus e thingari mang ir e i gagiyeg nge yan i mada’ ko ngiyal’ ni ke gel Got ngak urngin e pi toogor me ta’rad nga tan e rifrif u ay. Ma bin tomur e toogor ni nge gel ngak e yam’.” (1 Korinth 15:25, 26) Arrogon, urngin ban’en nib l’ag ko yam’ nge denen ni sum rok Adam e ra m’ay. Me ere ra chuweg Got urngin e yam’ u lan e “low ko yam’” min fasegrad ko yam’.​—John 5:28.

11. (a) Uw rogon ni gad manang ni rayog rok Got ni nge sunmiy e pi yaal ni kar m’ad biyay? (b) Miti mang dowef ni ran pi’ ko piin ni ran fasegrad ko yam’ u fayleng?

¹¹ Ere ran sunumeg e girdi’ ni yad e yaal biyay. Dabiyog fa? Danga’, ya Psalm 104:29, 30 e be micheg nrayog rok Got ni nge rin’: “Nap’an ni ga ra taleg e pogofan rorad, mi yad yim’, mi yad sul ko but’ ni ir e ra sumgad riy. Ma nap’an ni ga ra pi’ e pogofan ngorad, mi yad fos.” Piin ni ran faseg ko yam’ e ra taareb rogon ko ngiyal’ u m’on ni kar m’ad, machane ra thil downgirad. Bod e piin ni ran fasegrad nga ranod nga tharmiy ma ra pi’ Got ngorad ba dowef nrogon ni ke felan’ ngay. Ma dabi siy ni ra fel’ dowrad ma ra chuchugur ni taareb rogon ko birorad e dowef kafram ma aram e ra poyrad e piin nib t’uf rorad.

12. Wuin e ran faseg e yam’ u fayleng?

¹² Wuin ni ran faseg e girdi’ ko yam’ u fayleng? Yog Martha u morngaagen Lazarus ni walagen ni kem’ ni gaar: “Gu manang ni bay ni faseg ko yam’ ko chirofen ni ir e tomur ko rran.” (John 11:24) Uw rogon ni ke nang e re n’em? Ngiyal’ nem ma kan maluag thinnag fare fas ko yam’ ya ke mich u wan’ e pi Farise machane de mich u wan’ e pi Sadducee. (Acts 23:8) Machane i nang Martha u morngaagen e pi mich rok Jehovah u m’on ko ngiyal’ ko Kristiano ni ke l’agan’rad ko fas ko yam’. (Hebrews 11:35) Maku sana ke poy fare thin ko Daniel 12:13 me nang ni ran faseg e yam’ u nap’an e chirofen ni ir e tomur ko rran. Fa sana ke weliy Jesus e re n’em ngak. (John 6:39) Chirofen nem ni “tomur ko rran” e ba puluw ko fare Biyu’ e Duw ko Gagiyeg rok Kristus. (Revelation 20:6) Mu lemnag uw fene falfalan’ e girdi’ ko “chirofen” nem ni ra tabab e re n’em!​—Mu taarebnag ko Luke 24:41.

Mini’ e Ra Sul?

13. Mang e kan guy u morngaagen e fas ko yam’ u Revelation 20:12-14?

¹³ Revelation 20:12-14 e be weliy e n’en ni guy John faani pig e changar rok me guy yaan e fas ko yam’ u fayleng ni gaar: “Ma aram mu gguy e piin ni kar m’ad ni piin nib tolang nge piin nib sobut’ ni kar sak’iygad u m’on u tagil’ Got. Min pithig e babyor, mu kun pithig ba ken, ni fare ke babyor ni babyoren e piin ni kar fosgad. Ma piin ni kar m’ad e ni pufthinnagrad ni be yan u rogon e n’en ni ur ngongliyed, ni bod rogon ni kan yoloy nga lan fa yu ke babyor. Ma aram me pi’ e day e pi yam’ ni ba’ riy. Ma yam’ nge gin ni ma par e piin ni kar m’ad riy e kur piew e yam’ ni ba’ rorow. Ma yad urngin nni pufthinnagrad ni be yan u rogon e n’en ni ur ngongliyed. Mi nin’ e yam’ nge gin ni ma par e piin ni kar m’ad riy nga lan fare lipath i nifiy. Re lipath nem e ereram fa bin l’agruw yay e yam’.”

14. Chon mini’ ni ni ran fasegrad ko yam’?

¹⁴ Piin nran faseg ko yam’ e ra un ngay e “piin nib tolang nge piin nib sobut’” ni piin nib lingagil nge piin ni gathi ri yi manangrad ni ur moyed mar m’ad. Mus ko bitir ni madway e ran fasegrad ko yam’! (Jeremiah 31:15, 16) Ma Acts 24:15, e be tamilangnag ban’en ni baga’ fan ni gaar: “Bay ni faseg urngin e girdi’ ko yam’, ni tin nib mat’aw nge tin nde mat’aw.” Piin ni yad e “tin nib mat’aw” e girdi’ e mmuun ngay e pi pumoon nge ppin kakrom ni ur pared nib yul’yul’ ni bod Abel, Enok, Noah, Abraham, Sarah, nge Rahab. (Hebrews 11:1-40) Amu lemnag ni rayog ni ngan sabethin u taabang ko pi cha’ nem min motoyil ko n’en ni yad ra weliy u morngaagen e pi n’en ni buch kakrom ni bay ko Bible! “Tin nib mat’aw” e girdi’ e ba muun ngay fa bokum biyu’ e piin ni bay madgun Got u wan’rad ni kar m’ad ko ngiyal’ ney ma dar athapeged e par u tharmiy. Bay reb e girdi’ rom ara be’ nib t’uf rom ni aram rogon fa? Ere ri ra fel’ lanin’um ni ngam nang ni rayog ni ngam guyrad biyay! Machane mini’ e “tin nde mat’aw” e girdi’ ni ku ran faseg ko yam’? Aram fa bokum milyon ara bilyon e piin ni kar m’ad ma dar nanged e thin riyul’ ko Bible.

15. Uw rogon nran pufthinnag e piin ni kar m’ad “u rogon e n’en ni ur ngongliyed ni bod rogon ni kan yoloy nga lan fa yu ke babyor”?

¹⁵ Uw rogon nran pufthinnag e piin ni kar m’ad “u rogon e n’en ni ur ngongliyed ni bod rogon ni kan yoloy nga lan fa yu ke babyor”? Pi babyor nem e gathi kan yoloy riy e tin ni ur ngongliyed faram; ya nap’an ni kar m’ad ma kar pied puluwon e denen rorad. (Roma 6:7, 23) Machane piin ni kan faseg ko yam’ e ka yad bay u tan pa’ e denen ni sum rok Adam. Ere pi babyor nem e bay e thin riy ni be yog e n’en nthingari rin’ urngin e girdi’ ni rayog ni nge yib angin ngorad fare maligach ni pi’ Jesus Kristus. Ma nap’an nran chuweg e denen ni sum rok Adam ma ra ‘m’ay gelngin e yam’’ nib mus rogon. Ma nap’an nra taw nga tungun fare biyu’ e duw ma “Got e bayi gagiyegnag urngin ban’en.” (1 Korinth 15:28) Daki t’uf ko girdi’ e ayuw ko Prist nib Tolang ara be’ ni nge biyuliyrad. Ya urngin e girdi’ e ran sulwegrad nga rogon ni bod ni immoy Adam u tabolngin.

Fas ko Yam’ nib Yaram

16. (a) Mang fan nib puluw ni ngan lemnag ni ran tay fare fas ko yam’ u rogon nib yaram? (b) Chon mini’ e yad e tin som’on ni ran fasegrad ko yam’?

¹⁶ Rogon e fas ko yam’ ko piin nra yan nga tharmiy e ba yaram, “ra be’ ma rogon e liw rok,” ma aram me m’ug riy ni rogon e fas ko yam’ u fayleng e dabi yoor e girdi’ u fayleng ntaab yay mab pag rogon. (1 Korinth 15:23) Ma ba t’uf ni ngan ayuweg e piin nra fas ko yam’. (Mu taarebnag ko Luke 8:55.) Ya ba t’uf ni ngan pi’ ggarad​—nge boch ban’en ni baga’ fan—ni ayuw ko tirok Got ban’en ni aram e tamilangan’ u morngaagen Jehovah Got nge Jesus Kristus ni rayog ni ngar pared nib fas. (John 17:3) Faan ran faseg urngin e girdi’ ko yam’ ntaab yay ma dabiyog ni ngan ayuwegrad nib fel’ rogon. Ere bpuluw ni ngan lemnag ni ran faseg e girdi’ ko yam’ ni boch nge boch. Sana pi Kristiano nib yul’yul’ ni kar m’ad u m’on ni kan thang e m’ag rok Satan e yad e tin som’on ni ran faseg ko yam’. Ku rayog ni ngad lemnaged ni pi pumoon kakrom ni yad ba yul’yul’ e yira fasegrad nib pay boch ya yad ra pigpig ni yad “pi fak e pilung.”​—Psalm 45:16.

17. Mang boch ban’en u morngaagen e fas ko yam’ ni dariy ko Bible, ma mang fan nsusun dabi maga’fan e Kristiano ko pi n’en nem?

¹⁷ Machane susun ndab dogned ni ra ri aram rogon. Boor ban’en ni der weliy e Bible morngaagen. Ya der yog ko uw rogon, fa wuin, fa taman yang ni ran faseg e yam’ riy. Ma der yog ko u uw e ra par e piin ni ra fas ko yam’ riy, ara uw rogon nran duruw’iyrad, ara uw rogon e mad rorad. Ma dabiyog ni nga dogned nib mudugil ko uw rogon nra turguy Jehovah ni ran ayuweg e bitir ni kar fasgad ko yam’ fa uw rogon nran pithig boch e magawon nib l’ag ko pi fager rodad fa piin nib t’uf rodad. Riyul’ ni dariy e kireb riy ni ngan lemnag e pi n’en ney; machane dariy e gonop riy ni ngan n’ag e tayim ni ngan guy rogon ni ngan nang boch ban’en ni ri dabiyog ni ngan nang e chiney. Susun ni ngad tedan’dad ko pigpig ku Jehovah u rogon nib yul’yul’ ni aram e rayog e yafas ni manemus ngodad. Pi Kristiano ni kan dugliyrad e ke l’agan’rad ni ran fasegrad ko yam’ u tharmiy. (2 Peter 1:10, 11) Ma piin ni yad “yugu boch e saf” e be athapeg ni ngar pared ndariy n’umngin nap’an u fayleng ni ku aram bang ko Gil’ilungun Got. (John 10:16; Matthew 25:33, 34) Ma boch ban’en u morngaagen e fas ko yam’ ni dawori tamilang e gad ra pagedan’dad ngak Jehovah. Falfalan’ ni ra yib ngodad gabul nge langleth e bay u pa’ fa En ni ra ‘gamaneg urngin ban’en ni be pi’ ngorad nge yan i aw ni ke fel’ u wun’rad ni yad gubin e tin ni ke yog ngorad.’​—Psalm 145:16; Jeremiah 17:7.

18. (a) Mang e ke tamilangnag Paul ni ran gel ngay? (b) Mang fan ni rayog ni ngad pagedan’dad ko fare athap ko fas ko yam’?

¹⁸ I museg Paul e welthin rok ko pi thin ney ni gaar: “Ngad pininged e magar ngak Got ni ir e ke gelnagdad ko pi n’ey u daken e Somol rodad i Jesus Kristus!” (1 Korinth 15:57) Arrogon ran gel ko yam’ ni sum rok Adam u daken e maligach ni biyul’ ni pi’ Jesus Kristus, ma girdien fachi ulung nge “yugu boch e saf” e ra gel ngay. Ma piin “yugu boch e saf” ni yad ba fas e chiney e bay e athap rorad nib lingagil ya kari mus fan ko re mfen ney. Yad bang ko fare “ulung ni baga’” ni be yoor iyan, me ere rayog ni ngar magaygad nib fas ko fare “gafgow ni baga’” ni be yib ma dabkur m’ad biid! (Revelation 7:9, 14) Ma piin ni ra yim’ ni bochan e “tin ni buch nda un lemnag ara dan nang ngalan’” ara bochan ni li’rad e pi girdi’ rok Satan e rayog ni nge l’agan’rad ko fas ko yam’.​—Eklesiastes 9:11.

19. Mang fonow ni thingari fol urngin e Kristiano ko ngiyal’ ney riy?

¹⁹ Ere gad be sonnag e rofen nem ni ran gel ko yam’. Ba puluw e lem rodad ni bochan ni ba mudugil rogon ni kad pagedan’dad ko n’en ni micheg Jehovah u morngaagen e fas ko yam’. Demtrug e n’en nra buch ngodad ko biney e tamilang​—ni mus ni faanra gad ra yim’​—ma dariy ban’en nrayog ni nge siyeg rodad fare taw’ath ni ke micheg Jehovah ni bayi pi’ ngodad. Ere bpuluw ko ngiyal’ ney e n’en ni yog Paul ngak piyu Korinth l’agruw e biyu’ e duw faram ni gaar: “Ere pi walageg ni girdien Kristus, um pired ni gimed mmudugil. Gubin ngiyal’ ma nguum muruwliyed e maruwel romed ni fan ngak Somol, ya gimed manang ni pigpig ni gimed be tay ngak Somol e gathi ra yan i aw nib m’ay fan.”​—1 Korinth 15:58.

Rayog ni Ngam Weliy?

◻ Mang fulweg ni pi’ Paul u morngaagen miti mang dowef ko piin ni kan dugliyrad u nap’an ni kan fasegrad ko yam’?

◻ Uw rogon nge wuin ni ra m’ay e yam’?

◻ Mini’ e ran faseg ko yam’?

◻ Susun u rogon u wan’dad e pi n’en nder weliy e Bible morngaagen?

[Sasing ko page 26]

“Ma yim’” ba awoch u nap’an ni kan piliyeg

[Sasing ko page 29]

Pi pumoon nge ppin nkakrom ni yad ba yul’yul’ ni bod Noah, nge Abraham, nge Sarah, nge Rahab, e ran fasegrad ko yam’

[Sasing ko page 30]

Ran falfalan’ ko ngiyal’ ni ran faseg e yam’!