“Mi Ni Faseg E Yam’”

“Bay non e bin tomur e rappa riy. Ya nap’an nra non, mi ni faseg e yam’ ma ra ngal’gad ni girdi’ ndab ki yim’ biid, ma gadad gubin ni bay nthiliyeg dowdad.”​—1 KORINTH 15:52.

1, 2. (a) Mang boch e thin ni ma fl’eg lanin’uy ni kan pi’ u daken Hosea ni profet? (b) Uw rogon ni gad manang ni ba adag Got ni nge faseg e girdi’ ko yam’?

KE yim’ be’ nib t’uf rom fa? Me ere ga manang e amith ni bochan e yam’. Machane, rayog ni nge gapas laniyan’ e Kristiano ni bochan e n’en ni ke micheg Got u daken Hosea ni profet ni gaar: “Gu ra chuweg e pi girdi’ ney u pa’ Sheol; mu gu lagrad u pa’ e yam’. Yam’, ba uw e gafgow rom. Sheol, ba uw e kireb rom?”​—Hosea 13:14, New World Translation.

² Ran weliy u morngaagen e yam’ ni bay ni fasegrad ma boor e girdi’ e ra moning. Machane dabi siy ni bay gelngin Got Nth’abi Ga’ ni nge rin’ e maangang ni aram rogon! N’en ni ran lemnag e faanra ba adag Jehovah ni nge faseg e piin ni kar m’ad. I fith Job ni gaar: “Faanra yim’ be’ nib moon ku rayog ni nge fas biyay?” Ma aram me pi’ e re fulweg ney ni gaar: “Ga ra piningeg ma ri gu ra fulweg. Ya ga be tawrengnag e pi n’en ni kam ngongliy u paam.” (Job 14:14, 15) Fare bugithin ni “tawreng” e ma sor fan nga ban’en ni ri yi ba adag. (Mu taarebnag ko Psalm 84:2.) Arrogon, ri be sonnag Jehovah e ngiyal’ nran faseg e yam’​—ya ke tawrengnag e pi girdi’ rok ni ur pared nib yul’yul’ ngak, ma ka yad be par nib fas u laniyan’.​—Matthew 22:31, 32.

I Tamilangnag Jesus Fare Fas Ko Yam’

3, 4. (a) Mang tamilang ni ke pi’ Jesus u morngaagen e athap ko fas ko yam’? (b) Mang fan ni kan faseg Jesus ko yam’ nib kan, ma gathi downgin e girdi’?

³ Pi girdi’ nib yul’yul’ nkakrom e dar nanged fan urngin ban’en u morngaagen e fas ko yam’. Ya Jesus Kristus e ke tamilangnag e re athap ney. Ke tamilangnag e n’en nra rin’ faani gaar: “En nra mich u wan’ e en ni Fak Got e aram e ke yog e yafos ndariy n’umngin nap’an ngak.” (John 3:36) U uw e rayog e re yafas nem riy? Boor e girdi’ ni ke michan’rad ngay nra par u fayleng. (Psalm 37:11) Machane, yog Jesus ko pi gachalpen ni gaar: “Gimed e chi ulung ney e dab mu tamdaggad! Ya Chitamangimed e ba adag ni nge pi’ e gin nsuwon ngomed.” (Luke 12:32) Gil’ilungun Got e bay u tharmiy. Ere fa “chi ulung” e ra un ngak Jesus nga tharmiy ni yad e kan. (John 14:2, 3; 1 Peter 1:3, 4) Rib fel’ e re athap nem! Miki tamilangnag Jesus ngak apostal John ni “fachi ulung” e ra gaman 144,000 e girdi’ me mus.​—Revelation 14:1.

⁴ Machane uw rogon ni ra un fapi 144,000 e girdi’ nga tharmiy? “Thin nib fel’ ni ke yib Kristus i weliy ngodad e ir e ke tamilangnagdad u murung’agen e yafos ndariy n’umngin nap’an.” U daken rachaen me bing reb e “kanawo’ nib biech mab fas” ni yan nga tharmiy. (2 Timothy 1:10; Hebrews 10:19, 20) Som’on e yim’ u rogon ni kan yiiynag u lan e Bible. (Isaiah 53:12) Ma aram me weliy apostal Peter ni gaar, “I Got e ke faseg e cha’ nem i Jesus ko yam’.” (Acts 2:32) Machane dan faseg Jesus ko yam’ nib girdi’. Ya ke gaar: “Re flowa ni bay gu pi’ e dowag, ni ir e bay gu pi’ ni bochan e nge yog ni fos e girdi’ nu fayleng.” (John 6:51, NW.) Faan mang e ke sulweg downgin e girdi’ ngak ma ra m’ay angin fare biyul’. Ere “kan li’ Jesus kem’ nib girdi’, machane . . . me fos nib kan.” (1 Peter 3:18) Ere rachaen Jesus e “fek i yan nge biyuliy e denen rodad ni aram e ka ni fanay e binem e biyul ndariy n’umngin nap’an” ni fan ko “fachi ulung.” (Hebrews 9:12) Ke pi’ ngak Got puluwon e yafas rok nib girdi’ mab flont ni nge biyuliy e denen ko girdi’, ma girdien fare 144,000 e yad e som’on ni ke yib angin ngorad.

5. Mang athap ni kan pi’ ngak pi gachalpen Jesus u nap’an e bin som’on e chibog?

⁵ Gathi ke mus ni goo Jesus e ran faseg me yan nga tharmiy. Yog Paul ngak e pi Kristiano u Roma ni kan dugliyrad ko kan ni thothup ni yad pi fak Got nge pi walagen Kristus nfaanra yad ra par nib yul’yul’ nge mada’ ko tomur. (Roma 8:16, 17) Ki weliy Paul ni gaar: “Faan gadad ra taab girdi’ ngak ko yam’ ni tay, me ere ku aram rogon ni gadad ra taab girdi’ ngak ngan fasegdad ko yam’ ni bod rogon ir.”​—Roma 6:5.

Ngan Micheg e Athap ni Bayni Faseg e Yam’

6. Mang fan ni kan togopuluw ko machib ko fas ko yam’ u Korinth, ma mang fulweg ni ke pi’ apostal Paul riy?

⁶ Fas ko yam’ aram reb e “machib nib mudugil” ko Kristiano. (Hebrews 6:1, 2, NW.) Machane kan togopuluw ko re machib nem u Korinth. Boch e girdi’ ko ulung e ke suwey e llowan’ nu Greek lanin’rad ni be gaar: “Piin ni kar m’ad e dabni fasegrad ko yam’.” (1 Korinth 15:12) Faani rung’ag apostal Paul u morngaagen e re n’em me weliy boch e thin ni be micheg e fas ko yam’, nge fare athap ko pi Kristiano ni kan dugliyrad. Ngad yaliyed e pi thin rok Paul nem ni bay ko 1 Korinth guruy ni 15. Ra ayuwegem ni ngam bieg e re guruy nem ni polo’, ni bod ni ka nog ko fa binem e article.

7. (a) Mang thin ni ke tamilangnag Paul? (b) Chon mini’ ni kar guyed Jesus ni kan faseg ko yam’?

⁷ U lan e gal som’on e verse ko 1 Korinth guruy ni 15, me weliy Paul kenggin e thin rok ni gaar: “Pi walageg ni girdien Kristus, gub adag ni nggu puguran ngomed fare Thin Nib Fel’ ni yib rok Got ni ir e gu machibnag ngomed, ni ir e ngam mu folgad riy, me ir e ke par e michan’ romed u daken nib mudugil, . . . machane gathi aram rogon nfaanra ke mich u wan’med ndariy rogon.” Faanra de par piyu Korinth nib mudugil ko fare thin nib fel’, ma aram e mm’ay fan ni kar uned ko thin riyul’. I ul’ul’ Paul ngay ni gaar: “Kug pi’ ngomed e tin ni yog ngog ni ir e ba th’abi ga’ fan, ni aram e Kristus e yim’ ni bochan e denen rodad, ni bod rogon ni ba’ ni kan yoloy u lan e babyor nib thothup; min k’eyag me faseg Got ko yam’ ko chirofen ni gaman e dalip fen ngay, ni bod rogon ni ba’ ni kan yoloy u lan e babyor nib thothup; me m’ug ngak Peter, nge mu’ me m’ug ngak ragag nge l’agruw i apostel. Me m’ug ngak pi gachalpen u taab ngiyal’ ni yad ba pag lal mir’ay, ni oren i yad e ka yad ba fos e chiney, ma boch i yad e yad be mol ya kar m’ad. Me m’ug ngak James, nge mu’ mfini m’ug ngak urngin e pi apostal. Me gag e tomur ni ki m’ug ngog​—ni yugu aram rogon ni gu bod be’ nni gargelnag ndawori taw nga pulan.”​—1 Korinth 15:3-8.

8, 9. (a) Uw fene ga’ fan ni nge mudugilan’ be’ ko fas ko yam’? (b) Wuin ni ke m’ug Jesus ngak e pi walag “ni yad pag lal mir’ay”?

⁸ Piin ni kar uned ko fare thin nib fel’ e thingari mich u wan’rad ni kan faseg Jesus ko yam’. Boor e girdi’ ni kar guyed u owcherad ni “Kristus e yim’ ni bochan e denen rodad” ma kan faseg ko yam’. Bagayad e Cephas, ni yima pining Peter ngak. Tomren ni yog Peter ni de nang Jesus ko re nep’ i n’em ni kan egnag Jesus min kol, ma dabi siy ni kan fl’eg laniyan’ u nap’an ni ke m’ug Jesus ngak. “Fa ragag nge l’agruw,” i apostal u gubin, e ke yib Jesus ngorad u tomren ni kan faseg ko yam’​—aram ban’en ni ke ayuwegrad ndab kur rusgad mar weliyed u morngaagen Jesus ni kan faseg ko yam’.​—John 20:19-23; Acts 2:32.

⁹ Ki m’ug Kristus ngak ba ulung e girdi’ ni baga’ ni “ni yad pag lal mir’ay” e pi walag. Kari mus ni piyu Galilee e boor e girdi’ riy ni yad pi gachalpen Jesus, me ere sana aram e ngiyal’ ni kan weliy u morngaagen u Matthew 28:16-20, u nap’an ni tay Jesus chilen ko pi gachalpen ni ngar pingeged e girdi’ ngar manged pi gachalpen. Rib gel e mich ni rayog ni nge pi’ e pi girdi’ nem! Boch i yad e ka yad ba fas ko duw ni 55 C.E. u nap’an ni yoloy Paul e bin som’on e babyor ngak yu Korinth. Ma amu tay fanam iyan riy ni ke yog ni piin ni kar m’ad e “yad be mol ya kar m’ad.” Daworn fasegrad ko yam’ ni ngar uned ko flaab rorad u tharmiy.

10. (a) Mang angin ni yib ko yan tomur ni ke mada’nag Jesus e pi gachalpen ngar muulunggad? (b) Uw rogon ni ke m’ug Jesus ngak Paul “ni bod be’ nni gargelnag ndawori taw nga pulan’”?

¹⁰ James ni fak Josef nge Maria ni chitingin Jesus e ku ir e ke m’ug Jesus ngak u tomren ni kan faseg ko yam’. U m’on riy ma de mich Jesus u wan’ James. (John 7:5) Machane tomren ni ke m’ug Jesus ngak me mich u wan’ ma sana ir e ke pingeg pi walagen ngar manged pi gachalpen Jesus. (Acts 1:13, 14) Nap’an e yan ntomur ni ke muulung Jesus nge pi gachalpen u taabang ko ngiyal’ ni nge yan nga lang, me tay chilen ngorad ni ngar “weliyed murung’agen . . . nge yan i mada’ ko yungi n’en ni yan i mus e fayleng ngay.” (Acts 1:6-11) Nge mu’ me m’ug ngak Saul ni be’ nu Tarsus, ni be’ ni i gafgownag e Kristiano. (Acts 22:6-8) I m’ug Jesus ngak Saul “ni bod be’ nni gargelnag ndawori taw nga pulan’.” Ya gowa ke m’ay i faseg Saul me mang kan ma rayog ni nge guy fare Somol ni kan rirnag me guy e re n’em in e chibog u m’on ni ran faseg ko yam’. Re n’en nem ni guy Saul e ke n’igin ni nge dabki gafgownag fare ulung ko Kristiano me piliyeg pangin. (Acts 9:3-9, 17-19) Ke mang Saul apostal Paul, ni ir be’ nib gilbuguwan ni bochan e maruwel ni ke tay ni fan ko Kristiano.​—1 Korinth 15:9, 10.

Ba T’uf ni Nge Michan’uy ko Fas ko Yam’

11. Uw rogon ni ke tamilangnag rogon fene balyang fare bugithin ni yima yog ni “Dariy e fas ko yam’”?

¹¹ Ere boor e girdi’ ni yad e mich u nap’an ni kan faseg Jesus ko yam’. Yog Paul ni gaar: “Thin rok Got ni gamad be yog e ke faseg Got Kristus ko yam’, ere ra diin me yog boch i gimed ni piin ni kar m’ad e dab ni fasegrad ko yam’?” (1 Korinth 15:12) Pi girdi’ nem e ke maruwaran’rad ko fas ko yam’ maku yad be yog u fithik’ e yoor ni de mich u wan’rad. Ere ke tamilangnag Paul ni de puluw e lem rorad. Ke yog ni faanra da ni faseg Kristus ko yam’ me ere urngin e machib ko Kristiano e goo ban, ma piin ni ur micheged ni kan faseg Kristus ko yam’ yad be “lifith l’ugun[rad] nib togopuluw ngak Got.” Ma faanra dan faseg Kristus ko yam’, me ere dan pi’ puluwon e biyul ngak Got; ma aram e ka be par e Kristiano ‘u fithik’ e denen ro[rad].’ (1 Korinth 15:13-19; Roma 3:23, 24; Hebrews 9:11-14) Ma pi Kristiano ni “kar m’ad” ni boch i yad kan li’rad ni bochan e michan’ rorad, e kar m’ad ni dariy e athap rorad. Rib gel e kireban’ riy nfaanra kari mus e n’en nrayog ko piin Kristiano! Urngin e gafgow ni ur k’adedan’rad riy e ra yan i aw nib mm’ay fan.

12. (a) Mang fan ni kan pining ngak Kristus ni ir e “bin som’on maawangin e piin ni kar m’ad”? (b) Mang ayuw ni pi’ Kristus ngki yog ni ngan faseg e girdi’ ko yam’?

¹² Machane gathi aram rogon. I ul’ul’ Paul ngay ni gaar: “Ka ni faseg Kristus ko yam’.” Me ir e “tin som’on maawangin ko urngin e piin ni kar m’ad ma yad be mol.” (1 Korinth 15:20) Nap’an ni pi’ yu Israel ngak Jehovah e tin som’on maawangin e woldug rorad me flaabnagrad Jehovah me yoor e woldug rorad. (Exodus 22:29, 30; 23:19; Proverbs 3:9, 10) Ere faani pining “tin som’on maawangin” ngak Kristus, ma be tamilangnag Paul ni ka bay reb e mokun woldug nga m’on ni aram e piin ni ran fasegrad ko yam’ nga ranod nga tharmiy. Yog Paul ni gaar: “Ni bod rogon ni yam’ e yib ni bochan taareb e girdi’, e aram rogon ni fos ko yam’ e yib ni bochan taareb e girdi’. Rogon ni ma yim’ urngin e girdi’ ni bochan e yad taab girdi’ Adam, e aram rogon ni gubin e girdi’ ni bay ni faseg ko yam’ ni bochan e kar taab girdi’gad Kristus.” (1 Korinth 15:21, 22) Ke yog e fas ko yam’ ni bochan ni pi’ Jesus e yafas rok nib flont ni fan ko biyul’, me pithig e kanawo’ nrayog ni nge chuw e girdi’ ndabkur pared ni yad e sib ko denen nge yam’.​—Galatia 1:4; 1 Peter 1:18, 19.a

13. (a) Wuin e ngiyal’ ni ran faseg e girdi’ ko yam’ mar ranod nga tharmiy? (b) Uw rogon ma boch e piin ni kan dugliyrad e “dabra m’ad”?

¹³ I ul’ul’ Paul ngay ni gaar: “nib yaram ni ke tay Got: ni Kristus e bin som’on i maawangin, me migid e piin ni girdien Kristus ko ngiyal’ nra moy Kristus riy.” (1 Korinth 15:23) Kan faseg Kristus ko yam’ ko duw ni 33 C.E. Machane pi gachalpen ni kan dugliyrad​—“ni yad e piin ni girdien Kristus”​—e thingar ra songad nge mada’ ko ngiyal’ ni ke tabab Jesus ko gagiyeg, ma thin ko profet u lan e Bible e be dag ni ke buch e re n’em ko duw ni 1914. (1 Thessalonika 4:14-16; Revelation 11:18) Ma nge diin e piin ni yad ba fas u nap’an ni ba’ Jesus? I gaar Paul: “Mu telmed ko re thin ni baaray nde nang e girdi’ fan: gathi gadad gubin ni bay da m’ad, machane lan ba talab e bay nthiliyeg dowdad riy, ni bod machregin lan mit be’ ni talab, ko ngiyal’ ni bay non e bin tomur e rappa riy. Ya nap’an nra non, mi ni faseg e yam’ ma ra ngal’gad ni girdi’ ndab ki yim’ biid, ma gadad gubin ni bay nthiliyeg dowdad.” (1 Korinth 15:51, 52) Ba tamilang ni gathi urngin e piin ni kan dugliyrad e ra par u lan e low rorad ni yad be mol mi yad sonnag e ngiyal’ nran fasegrad ko yam’. Ya piin ni ra yim’ u nap’an e ngiyal’ ni bay Kristus e ran thiliyeg dowrad nib machreg.​—Revelation 14:13.

14. Uw rogon ni kan taufenag e piin ni kan dugliyrad “ni fan ni ngar manged e piin ni kar m’ad”?

¹⁴ Me fith Paul ni gaar: “Ere uw rogon e piin ni kan taufenagrad ni fan ni ngar manged e piin ni kar m’ad? Mang e yad be finey ni ngar yogniged ko re n’em? Faanra ba riyul’ ni bod rogon ni yad be yog ni piin ni kar m’ad e dab ni fasegrad ko yam’, me ere mang fan ni kan taufenagrad ni fan ko re n’em? Ma gamad e mang fan ni gamad be yan u thatharen e riya’ ni gubin e awa?” (1 Korinth 15:29, 30, NW.) Gathi be yog Paul ni ngan taufenag e piin nib fas ni fan ko piin ni kar m’ad, ni bod ni be m’ug u yu ken e Bible. Ya taufe e fan ko Kristiano ni yad pi gachalpen Jesus, ma piin ni kar m’ad e dabiyog ni ngar manged gachalpen. (John 4:1) Ere n’en ni yog Paul e be sor fan ko pi Kristiano nib fas, ni yad bod Paul ni yad bay u “thatharen e riya’ ni gubin e awa.” Pi Kristiano ni kan dugliyrad e ‘kan taufenagrad ni kar uned ko yam’ ni tay Kristus.’ (Roma 6:3) Ka nap’an e ngiyal’ ni kan dugliyrad ma gowa yibe “taufenagrad” u reb e kanawo’ ni be sor iyan ko yam’ ni bod e yam’ ni tay Kristus. (Mark 10:35-40) Yad be athapeg ni yad ra yim’ mi ni fasegrad ko yam’ mi yad yan nga tharmiy.​—1 Korinth 6:14; Filippi 3:10, 11.

15. Mang boch e riya’ ni ke yib ngak Paul, ma uw rogon ni ke ayuweg ni nge k’adan’ ni bochan fare athap ko fas ko yam’?

¹⁵ Migid me weliy Paul ni ku ir e ki immoy u thatharen e riya’ ma aram e rayog ni nge gaar: “Gubin e rran nib chugur ni nggu m’ad.” Ma sana ra yog boch e girdi’ ni ke ga’nag Paul e thin rok me ere ki gaar: “Felfelan’ ni kug tay ngomed ko wok rodad u fithik’ Kristus Jesus ni Somol rodad e ir e ke ngongliyeg ku gog e re bugithin ney.” Rogon ni yog fare The Jerusalem Bible e pi thin nem e be gaar: “Pi walageg, gubin e rran ni ke chugur ni nggum’, ma rayog ni nggu micheg e re n’em u daken e falfalan’ ni kug tay ngomed u daken Kristus Jesus ni Somol rodad.” Ke weliy Paul u morngaagen e riya’ ni ke yib ngak u verse 32, ni ke ‘chamnag e gamanman ni maloboch u Efesus.’ Piyu Roma e ma li’ e girdi’ min nin’rad nga fithik’ e pi gamanman ni maloboch u lan tafen e gosgos. Faanra ke un Paul ko cham ko gamanman ni maloboch nriyul’ ma aram e kari mus rogon ni ke magay nib fas e bochan e ayuw rok Jehovah. Faanra dariy e athap ko fas ko yam’ ma ra aliliy ni nge turguy ni nge yan ko kanawo’ ni ra sor iyan ko riya’. Faanra dariy e athap ko fas ko yam’ ma dariy fan ni ngan k’adan’ ko gafgow ma dariy rogon ni nge pag be’ fan ko pigpig ku Got. Gaar Paul: “Mang e re n’en nib fel’ nra yib riy ngog ni faanra dab ni faseg e yam’? Ni bod rogon fare bugithin ni yima yog ni ma lunguy, ‘Marod nguud abichgad ma gadad be garbod, ya bayi gabul ma kad m’ad.’”​—1 Korinth 15:31, 32; mu guy 2 Korinth 1:8, 9; 11:23-27.

16. (a) U uw e sum fare bugithin riy ni “nguud abichgad ma gadad garbod ya bayi gabul ma kad m’ad”? (b) Mang fan ni bay e riya’ riy ni ngan un ko re lem nem?

¹⁶ Sana ke weliy Paul e pi thin ni bay ko Isaiah 22:13, ni be weliy u morngaagen e lem ko girdi’ nib kireb u Jerusalem. Fa be lemnag e machib ko piin ni Epicurean, ni de mich u wan’rad ni bayni faseg e yam’ me ere ur lemnaged ni n’en th’abi fel’ ni ngan rin’ e n’en nra yibnag e falfalan’. Yugu demtrug, ma fare lem ni “nguud abichgad ma gadad be garbod” e de sum rok Got. Ere i ginangrad Paul ni gaar: “Dab mpaged gimed nga ni bannagmed, ya ra yan i bod ni ke lunguy: ‘Nchag ngak e girdi’ nib kireb me kireb pangiy nib fel’.” (1 Korinth 15:33) Ngan chag ko piin ni ma togopuluw ko fas ko yam’ e rayog ni nge bod e yub. Sana aram fan ni sum e pi magawon u lan fare ulung nu Korinth ni thingari ayuwegrad Paul riy ni ngongol ndarngal, nge ke yu raba’nag girdien e ulung, ma boch e walag e ke yan i egnag e pi walag ngak e piin tapuf oloboch, ma boch e be dariy fannag e Abich Rok Somol.​—1 Korinth 1:11; 5:1; 6:1; 11:20-22.

17. (a) Mang e ke yog Paul ngak piyu Korinth? (b) Mang boch e deer ni ka bay?

¹⁷ Ere yog Paul e pi thin ney ngak piyu Korinth ni gaar: “Mu sulweged lanin’med ko tin nib mat’aw ban’en ndab kum pared ni bod ni kam chinggad. Baara’ bbugithin ni nggog ma ngam tamra’gad ngay ni nge lungug: ba’ boch i gimed ndar nanged Got.” (1 Korinth 15:34) Bochan ni ke togopuluw boch e girdi’ ko fas ko yam’ ma aram e bod ni kar chinggad ko tirok Got ban’en. Ba t’uf ni ngar odgad, me sul lanin’rad nga rogon. Ku arrogon e pi Kristiano ni kan dugliyrad ko ngiyal’ ney e thingara pared nib od ko tirok Got ban’en, ma dabra paged e lem ko re fayleng ney nge suwey lanin’rad. Thingara chichiiyed pa’rad ko athap rorad ko fas ko yam’ mi yad yan nga tharmiy. Machane ka ba boch e deer​—ni fan ko piyu Korinth nge ku fan ngodad ko ngiyal’ ney. Susun, ra uw rogon e 144,000 u nap’an nran fasegrad nga tharmiy? Ma uw rogon fa bokum milyon e girdi’ ni ka yad bay u lan e low rorad ma dariy e athap rorad ni nga ranod nga tharmiy? Ra uw rogon e fas ko yam’ ko pi girdi’ nem? Bin migid e thin ma gad ra yaliy e tin ni ka bay e thin ni yog Paul u morngaagen e fas ko yam’.

[Boch e Thin nra Tamilangnag Murung’agen]

Ka Ga Manang?

◻ Mang e ke tamilangnag Jesus u morngaagen e fas ko yam’?

◻ Mini’ boch e girdi’ ni yad e mich ya kar guyed Kristus ni kan faseg ko yam’?

◻ Mang fan ni kan togopuluw ko fare machib ko fas ko yam’, ma mang fulweg ni pi’ Paul?

◻ Mang fan nib t’uf ko pi Kristiano ni kan dugliyrad ni nge mich u wan’rad fare fas ko yam’?

[Sasing ko page 21]

Fachi ppin ni fak Jairus e ke mang reb e mich ni rayog ni ngan faseg e yam’

[Sasing ko page 22, 23]

Ra mm’ay fan e yam’ ni tay e pi Kristiano ni kan li’rad ni bochan e michan’ rorad ni faanra dariy e athap ko fas ko yam’