Fare Fas Ko Yam’​—Ba Machib Ni Ba’ Rogon Ngom

“Ma taareb rogon e l’agan’ ni gu be tay ngak Got, . . . ni aram e be l’agan’mad ngak Got ni bayi faseg urngin e girdi’ ko yam’, ni tin nib fel’ nge tin nib kireb.”​—ACTS 24:15.

1. Uw rogon ma fas ko yam’ e ke mang ban’en ni yibe weliy u Sanhedrin?

NAP’AN ni m’ay e bin dalip e milekag ni tay Paul ni apostal ko machib ko duw ni 56 C.E., ma immoy u Jerusalem. Tomuren ni ke kol piyu Roma Paul, min pag ni nge yan nga tafen e pufthin nib ga’ rok piyu Jew ni Sanhedrin. (Acts 22:29, 30) Nap’an ni be yaliy Paul e girdien e re tafen e pufthin nem, me guy ni boch i yad e Sadduse ma boch i yad e Farise. Gali ulung ney e bay ban’en ni ri ba thil rorow. Piin Sadduse e de mich e fas ko yam’ u wan’rad; ma piin Farise e ba mich e fas ko yam’ u wan’rad. Rogon ni nge dag ko u rogon u wan’ e fas ko yam’, me yog Paul ni gaar: “Pi walageg! I gag reb e Farise ni gag be’ ni fak e Farise gag. Ma ngan pufthinnigeg u roy ni bochan e be l’agan’ug ngay ni yira faseg e yam’.” Bochan ni ke yog e thin ni aram rogon, ma girdi’ ni yad be muulung e ke balyangan’rad!​—Acts 23:6-9.

2. Mang fan nib fel’ rogon Paul ni nge ayuweg e n’en ni ke mich u wan’ ko fas ko yam’?

² Boch e duw nga m’on riy, u nap’an ni be yan nga Damaskus min piliyeg e changar rok Paul me rung’ag laman Jesus. Me fith Paul Jesus ni gaar: “Mang e nggu rin’, Somol?” Me fulweg Jesus ni gaar: “Mu sak’iy ngam man nga lan yu Damaskus, yu rom e bay nog ngom riy urngin ban’en ni ke turguy Got ni ngan rin’.” Nap’an ni taw Paul nga Damaskus, me pirieg reb e Kristiano nib gol, ni Ananias fithingan, me weliy fan ngak ni gaar: “Fare Got rok pi chitamangidad e ke turguyem ni gur e ngam nang e tin ni ba m’agan’ ngay, ma gguy e Tapigpig rok nib mat’aw [Jesus ni kan faseg ko yam’] ma ga rung’ag lungun ni be non.” (Acts 22:6-16) Ere dabni gin ngay, ni ke fal’eg Paul rogon ni nge weliy e n’en ni ke mich u wan’ ko fas ko yam’.​—1 Peter 3:15.

Yibe Weliy ni Nge Nang e Girdi’ ni Yoor fare Athap ko Fas ko Yam’

3, 4. Uw rogon ni ke dag Paul ni ri ma ayuweg e machib ko fas ko yam’ nib gel, ma mang e gad ra fil ko n’en ke rin’?

³ Tomur riy me yan Paul nga p’eowchen Felix ni Governor. Nap’an e re n’em, me Tertullus, ni “ma pi’ e welthin u fithik’ e yoor” ni ir e weliy fare pa’ i oloboch rok piyu Jew nib togopuluw ku Paul, e yog nib kireb ya ir e ga’ u reb e sect ara ba ulung e girdi’ ma ma togopuluw ko am. Ma fulweg riy e weliy Paul ni dariy e maruwar riy ni gaar: “Baaray e tin ni ir: gu ma meybil ngak fare Got rok e Chitamangimad ni kakrom ni gu be fol ko fare kanawo’ ni be lungurad e de riyul’.” Me yib ko fare kenggin e welthin me ulul ngay nge gaar: “Bay e athap rog ngak Got, ni fare athap ni ku bay rok e pi cha’ ney ni aram e bay ni faseg e girdi’ ko yam’, ni tin nib mat’aw nge tin nde mat’aw.”​—Acts 23:23, 24; 24:1-8, 14, 15, NW.

⁴ Sagonapan l’agruw e duw nga tomuren, me Porcuis Festus, ni ir e ke yan nga lon Felix’, e pining Herod Agrippa ni Pilung ni nge un ngak ngaur deeriyew Paul nib kalbus. I weliy Festus ni girdi’ ni ka rogned e thin nib togopuluw ngak Paul e kar togopuluwgad ko thin ni yog Paul ni “murung’agen be’ ni kem’ ni Jesus fithingan . . . ni ke fas ko yam’.” Nap’an ni be ayuweg Paul ir rorad me fithrad ni gaar: “Mang ni gimed be finey piyu Israel ndabiyog ni nge mich u wan’med nra faseg Got e yam’?” Ngemu’ me yog ni gaar: “Machane ke yib i mada’ ko bin daba’ e rran ni i ayuwegeg Got, ere kug sak’iy u roy ni gu be weliy e pi n’ey ngomed ni gimed gubin, ni taareb rogon e piin nsobut’ nge piin nib tolang. N’en ni gu be yog e ereray fare n’en ni yog e pi profet nge Moses ni bay yib i m’ug ni lungurad: fare Messiah e thingari gafgow me ir e cha’ ni som’mon ni nge fas ko yam’, me tamilangnag piyu Israel nge piin ni gathi piyu Israel u rogon me thap e girdi’ ngak Got.” (Acts 24:27; 25:13-22; 26:8, 22, 23) Kari ayuweg Paul fare machib ni murung’agen e fas ko yam’ u fithik’ e yul’yul’! Ku arogodad, ni ku rayog ni ngada machibnaged u fithik’ e pagan’ ni bay e fas ko yam’. Machane mang e ra rin’ e girdi’? Ba dake ku bod e n’en ni kun rin’ ngak Paul.

5, 6. (a) Bochan ni ke weliy fapi apostal kan nang murung’agen e fas ko yam’ ma mang e ke rin’ e girdi’? (b) Gad ra weliy murung’agen e athap rodad ko fas ko yam’, ma mang e baga’ fan?

⁵ Mu lemnag e n’en ni buch ko som’mon u nap’an ni tabab e bin l’agruw e milekag ko machib ni tay Paul ko ngiyal’ ni (sagonapan 49-52 C.E.) ni yan nga Athens. I weliy boch ban’en ngak e girdi’ ni ke mich boch e got ni googsur u wan’rad, ma be ta’ ir ngorad ni ngara tayedan’rad ko tin nib m’agan’ Got ngay ni nge pufthinnag e girdi’ nu fayleng ni rogon nib mat’aw u daken be’ ni Ke dugliy. I ir Jesus. I weliy Paul ni Got e ke pi’ e mich riy ya ke faseg Jesus ko yam’. Mang e ke rin’ e girdi’? Be yog e Bible ni gaar: “Ma nap’an nrungaaged e n’en ni ke weliy Paul ni murung’agen e fas ko yam’, me moning boch i yad ma boch i yad e gaar, ‘Gamad ba adag ni ngam weliy ngomad murung’agen e re n’ey biyay.’ ”​—Acts 17:29-32.

⁶ Re n’em e be dag nib chuchugur rogon ko n’en ni buch rok Peter nge John nde n’uw nap’an u tomuren e Pentekost 33 C.E. Ku biyay ni pi Sadduse e ri ki yad ba muun ko fare magawon. Acts 4:1-4 e be weliy e n’en ni buch ni gaar: “Ka be welthin Peter nge John ngak fapi girdi’ me yib e pi prist ngorow, nge be’ nib tolang ni ir e ma yog e thin rok e piin ni ma matanagen e tempel, nge pi Sadduse. Kar malalngan’gad ni bochan e fa gali apostal e yow be machibnag ngak e girdi’ ni Jesus e kan faseg ko yam’, ni aram e mich riy ni yira faseg e yam’.” Machane, boch e girdi’ e ba fel’ e thin ni kar rung’aged u wan’rad. “Boor e girdi’ ni rung’ag e thin nrognew me mich u wan’rad; ma aram me yan urngin e pi girdi’ nem nge yan i mada’ ko lal i biyu’.” Ba mudugil, nib thilthil e n’en ni ma rin’ e girdi’ u nap’an ni gad ra weliy murung’agen e athap ko fas ko yam’. Bochan e re n’em, ma baga’ fan ni ngada gelnaged e michan’ rodad ko re machib ney.

Michan’ nge fare Fas ko Yam’

7, 8. (a) Rogon ni kan dag u reb e babyor ni fan ko ulung nu Korinth ko fa bin som’mon e chibog, uw rogon me aw ni dariy fan e michan’? (b) Uw rogon ma tamilangan’ nib puluw ko athap ko fas ko yam’ e ra tay e tin riyul’ Kristiano nib ki’ ko tin ni googsur?

⁷ Gathi urngin e girdi’ ni kar manged Kristiano ko bin som’mon e chibog u nap’an Jesus nib mom ngorad ni nge mich e athap ko fas ko yam’ u wan’rad. Boch e girdi’ ni ra pirieged nib mo’maw’ ni nge mich e re athap ney u wan’rad e piin ni yad bang ko fare ulung nu Korinth. I yol Paul ngorad ni gaar: “Kug pi’ ngomed e tin ni yog ngog ni ir e th’abi ga’ fan, ni aram e Kristus e yim’ ni bochan e denen rodad, ni bod rogon ni ba’ ni kan yoloy u lan e babyor nib thothup; min k’eyag me faseg Got ko yam’ ko chirofen ni gaman e dalip fen ngay, ni bod rogon ni ba’ ni kan yoloy u lan e babyor nib thothup.” Ngemu’ me gagiyelnag Paul e tin riyul’ ney ya ke weliy ni Kristus ni ke fini faseg ko yam’ “me m’ug ngak pi gachalpen u taa ba ngiyal’ ni yad ba pag e lal miriay,” miki yog Paul ni, oren i yad e ka yad ba fas e ngiyal’ nem. (1 Korinth 15:3-8) Miki weliy fan ni gaar: “Thin rok Got ni gamad be yog e ke faseg Got Kristus ko yam’, ere ra diin me yog boch i gimed ni piin ni kar m’ad e dab ni fasegrad ko yam’? Faan mang e ba riyul’ e bug nir e thin, me ere ke yan i aw nda ni faseg kristus ko yam’. Ma faanra da ni faseg Kristus ko yam’, me ere dariy ban’en ni nggu machibnaged murung’agen ngak e girdi’, ma dariy ban’en ni ir e nge michan’med ngay.”​—1 Korinth 15:12-14.

⁸ Arrogon, fare fas ko yam’ e ir e kenggin e machib ko Kristiano ra aw ni dariy fan e michan’ ko Kristiano ni faanra de riyul’ u wan’uy e fas ko yam’. Riyul’, ni fare tamilangan’ ko fas ko yam’ nib puluw e be ki’eg e tin riyul’ e Kristiano ko tin ni googsur. (Genesis 3:4; Ezekiel 18:4) Arfan ni, ke uneg Paul fare machib ko fas ko yam’ “ko tin som’mon e machib” ko Kristiano. Ma nga yugu uda nameged ni ngada “ilalgad ko tirok Got.” “Ngad mon’oggad ko tin ni ngad filed ban’en,” ri weliy Paul ni gaar, “ni faanra mm’agan Got ngay.”​—Hebrews 6:1-3.

Fare Athap ko Fas ko Yam’

9, 10. Mang e be yip’ fan fare bugithin ni fas ko yam’ u lan e Bible?

⁹ Ra ngarda gelnaged e michan’ rodad ko fas ko yam’, ma ngada sulod nga daken boch e deer ni: Mang e be yip’ e Bible fan u nap’an ni ra weliy e murung’agen e fas ko yam’? Uw rogon ma machib ko fas ko yam’ e ra gagiyelnag e t’ufeg rok Jehovah? Fulweg ko gali deer ney e ra ayuwegdad ni ngad chuchugurgad ngak Got maku ra ayuwegdad ni ngad filed ngak boch e girdi’ murung’agen e fas ko yam’.​—2 Timothy 2:2; James 4:8.

¹⁰ “Fas ko yam’” e thin ni Greek ni kan piliyeg ni be yip’ fan e “ngan sak’iy bayay.” Mang e n’en nib muun ko re thin nem? Rogon ni yog e Bible, e fare athap ko fas ko yam’ e aram e michan’ nib gel ni girdi’ ni ke yim’ e ra fas bayay. Bible e ku be dag ni yira fulweg faanem nib girdi’ ara dowef ko kan, ya be yan u rogon e athap rok ko roy u fayleng fa tharmiy. Gad ra ngat ko t’ufeg nge gonop, nge gelngin Jehovah ni ra m’ug ko re athap ko fas ko yam’ ney ni rib fel’.

11. Mang athap ko fas ko yam’ e kan ognag ko pi tapigpig rok Got ni kan dugliyrad?

¹¹ Fare fas ko yam’ rok Jesus nge pi walagen ni kan dugliyrad e ra pi’ ngorad e dowef ko kan nib m’ag ko pigpig u tharmiy. (1 Korinth 15:35-38, 42-53) Bay ra pigpiggad u taabang ni pilung ko Gil’ilungun Kristus, ni ir e ra fal’eg e fayleng nge mang Paradis. U tan pa’ Jesus ni Prist nib Tolang, e piin ni kan dugliyrad e kar manged e pi prist ni pilung. Yad ra fanay e pi felngin e biyul rok Kristus ni fan ko girdi’ u lan fa bin nib biech e fayleng nib mat’aw. (Hebrews 7:25, 26; 9:24; 1 Peter 2:9; Revelation 22:1, 2) Ngiyal’ ney, ma piin ni kan dugliyrad ni ka yad bay u fayleng ni ka yad ba fas e yad baadag ni ngar pared ni yad ba fel’ u wan’ Got. Nap’an ni yad ra yim’, mar feked e “taw’ath” u daken e fas ko yam’ nge yog ngorad e yafas ko kan u tharmiy ni dabkunim’. (2 Korinth 5:1-3, 6-8, 10; 1 Korinth 15:51, 52; Revelation 14:13) I yoloy Paul ni gaar, “Ya faan gadad ra taab girdi’ ngak ko yam’,” “me ere ku aram rogon ni gadad ra taab girdi’ ngak ngan fasegdad ko yam’ ni bod rogon ir.” (Roma 6:5) Machane uw rogon e piin ni bay ni fasegrad ngar pared u fayleng ni girdi’ biyay? Uw rogon ni fare athap ko fas ko yam’ e ra chuchugurnagrad ngak Got? Rayog ni ngad filed boor ban’en ko tin ni rin’ Abraham.

Fas ko Yam’ nge Fager Ngak Jehovah

12, 13. Mang e def ko michan’ ko fas ko yam’ nib gel ni bay rok Abraham?

¹² Abraham, ni ka nog ni “fager rok Jehovah,” e ir reb e pumoon nib gel e michan’ rok. (James 2:23) Dalip yay ni ke weliy Paul murung’agen e michan’ rok Abraham u nap’an ni yoloy fithingan e piin nib gel e michan’ rorad ni pumoon nge ppin ni kan yoloy ko Hebrews guruy ni 11. (Hebrews 11:8, 9, 17) Yay ni dalip ni weliy Paul e dag rogon e michan’ rok Abraham u nap’an ni i fal’eg rogon ni nge pi’ Isak ni fak ni pumoon ni maligach. Ke mich u wan’ Abraham ni fare awoch ni kan micheg e ke micheg Jehovah ni ra yib rok Isak. Yugu ra yim’ Isak ni maligach, ma ba “pagan’ Abraham ngay nrayog rok Got ni nge faseg Isak ko yam’.”

¹³ Nap’an ni buch e re n’em, me guy Jehovah gelngin e michan’ rok Abraham, me gagiyegnag ba gamanman ni nge mang maligach nge yan nga lon Isak. Yugu aram rogon, ma n’en ni buch rok Isak e be dag yaan e fas ko yam’, ni bod ni weliy Paul ni gaar: “Me pagan’ [Abraham] ngay nrayog rok Got ni nge faseg [Isak] ko yam’ nge sul ngak Abraham.” (Hebrews 11:19) Maku, Abraham e ka bay e def ko michan’ rok nib gel ko fas ko yam’. Gathi ke sulweg Jehovah gelngin Abraham nge Sarah ngar diyennagew Isak ni fakrow ni pumoon u nap’an ni kar pilibthirgow?​—Genesis 18:10-14; 21:1-3; Roma 4:19-21.

14. (a) Rogon ni yog ko Hebrews 11:9, 10, mang e be sonnag Abraham? (b) Rogon ni ngeb ngak Abraham e pi flaab ko Gil’ilungun u lan e bin nib biech e fayleng, mang e thingari buch rok ko som’mon? (c) Uw rogon ni nge yib ngodad e pi flaab ko Gil’ilungun?

¹⁴ I weliy Paul murung’agen Abraham ni girdi’ nu bang ni ma par u tent ni “fare mach ni bay e def riy u but’ ni riyul’, cha’ni ubung me fal’eg e re mach nem e Got.” (Hebrews 11:9, 10, NW) Gathi mach nib riyul’ e re n’ey ni bod yu Jerusalem, ni ir e gin’en ni immoy e tempel rok Got riy. Danga’, ya ba mach ni be yip’ fan ban’en. Ni aram e fare Gil’ilungun Got u tharmiy ni Kristus Jesus nge fa 144,000 i girdi’ ni yad ra un ngak ko gagiyeg e yad ra mang gothon. Fare 144,000 ni bay u tharmiy nib flaab e ku yibe weliy ni aram “fare mach nib thothup, maku Jerusalem nib Biech,” maku fare “pin ni mabgol” rok Kristus. (Revelation 21:2) Duw ni 1914, e tay Jehovah Jesus nge mang Pilung ni Messiah ko Gil’ilungun u tharmiy me tay chilen ngak ni nge gagiyeg u fithik’ e pi toogor rok. (Psalm 110:1, 2; Revelation 11:15) Ni fan ni ngeb ngak e taw’ath ko gagiyeg ko Gil’ilungun, me Abraham, ni “fager rok Jehovah,” e thingari fas biyay. Maku, fan ni ngeb ngodad e taw’ath ko Gil’ilungun, ma thingarda pared nib fas u lan e bin nib biech e fayleng, ni demtrug ko gadad bang ko fare ulung nib ga’ ni da mageygad nib fas u tomren e Armageddon ara piin ni kan fasegrad ko yam’. (Revelation 7:9, 14) Ere, mang e def ko athap ko fas ko yam’?

Tufeg rok Got​—e Fare Def ko Athap ko Fas ko Yam’

15, 16. (a) Uw rogon ma bin som’mon e yiiy u lan e Bible e ke pi’ e def ko athap rodad ko fas ko yam’? (b) Uw rogon ma michan’ ko fas ko yam’ e ra ayuwegdad ngad chuchugurgad ngak Jehovah?

¹⁵ Tha’ rodad nib fel’ ngak e Chitamangidad nu tharmiy ni ma t’ufegey, nge michan’ rodad nib gel ni bod Abraham, ma gad ma fol ko pi motochiyel rok Got e ke yog ni nga nog ni gad ba mat’aw ma ra ta’ Jehovah ni gadad e fager rok. Re n’ey e ra bing e kanawo’ ni nge fel’ rogodad ko tin ra rin’ Gil’ilungun. Tin riyul’ riy, e bin som’mon e yiiy ni kan ta’ ko Thin rok Got, ko Genesis 3:15, e ke pi’ e def ko athap ko fas ko yam’ nge fager ku Got. I yiiynag ni gathi kemus ni ngan perdiiy lolugen Satan ya ku, ngan maadadnag wurilen ay faen Owchen fare pin rok Got ni aram e ulung rok Got. Yam’ ni tay Jesus u daken baley i ren e gowa kan maadadnag wurilen ay. Fas ko yam’ ni tay ko bin dalip e rran e ke golnag e re maadad nem me pi’ e kanawo’ ni ngan pufthinnag “moonyan’ ni bay e yam’ u pa’.”​—Hebrews 2:14.

¹⁶ I puguran Paul ngodad ni “Got e ke dag ngodad gelngin feni ri gadad ba t’uf rok, ya ka gadad be par ni gadad bogi tadenen me yan i yim’ Kristus ni fan ngodad.” (Roma 5:8) Gad ra pining e magar ko re ngongol nem nib gol ma ra chugurnagdad ngak Jesus nge Chitamangidad u tharmiy ni ma t’ufegey.​—2 Korinth 5:14, 15.

17. (a) Mang athap e ke weliy Job murung’agen? (b) Mang e be dag e Job 14:15 u murung’agen Jehovah, ma bochan e re n’ey ma mang e ga be lemnag?

¹⁷ Job, ni reb e pumoon nib yul’yul’ ko ngiyal’ u m’on ni dawori yib e Kristiano, e ku be sonnag e fas ko yam’. Rib gel e gafgow ni yib ngak ni bochan e n’en ni rin’ Satan ngak. De taareb rogon ko pi fager rok ni de riyul’, ni darur weliyed murung’agen e fas ko yam’, i yib e gapas nga laniyan’ Job ni bochan e re athap ney me fith ni gaar: “Faanra ke yim’ e girdi’ ma rayog ni nge fas biyay?” Mi ki fulweg Job ni gaar: “N’umngin nap’an ni gub yam’ e nggu sonnag, nge mada’ ko ngiyal’ ni nggu fas biyay.” Be non ngak Got, ni Jehovah, me yog ni gaar: “Bay mu piningeg, mu gu fulweg lungum.” Rogon laniyan’ e en ke Sunmiydad ni ma t’ufegey, e yog Job ni gaar: “Ya ga ma yim’ ni bochan e pi n’en ni kam ngongliy.” (Job 14:14, 15, NW) Arrogon, ri be lemnag Jehovah ba ngiyal’ ni piin nib yul’yul’ e ki yad ra fas u nap’an e fas ko yam’. Ri be ayuwegdad e re n’ey ni ngarda chuchugurgad ngak u nap’an ni gad ra fal’eg i lemnag e t’ufeg nge gol nib gel ni be dag ngodad ni yugu aram rogon ni daworda flontgad!​—Roma 5:21; James 4:8.

18, 19. (a) Mang athap e bay rok Daniel ko fas ko yam’? (b) Mang e ngada sulod nga daken ko bin migid e aritcle?

¹⁸ Daniel ni profet, e weliy ba engel rok Got rarogon ni be’ nib “moon ni ri yi baadag,” i pigpig ku Got u fithik’ e yul’yul’ nib n’uw nap’an. (Daniel 10:11, 19) Yul’yul’ rok ngak Jehovah e par ni kargon u nap’an nib kalbus u lan e duw ni 617 B.C.E. nge ni mada’ ko ngiyal’ ni yim’ u ba ngiyal’ u tomren ni kan piliyeg e changar rok ko duw ni 536 B.C.E., ni bin dalip e duw rok Cyrus, ni pilung u Persia. (Daniel 1:1; 10:1) U ba ngiyal’ ko re dalip i duw nem ko gagiyeg rok Cyrus, min piliyeg e changar rok Daniel u murung’agen e pi am ni ra gagiyegnag e fayleng ni reb nge reb ma tomur riy e gafgow ni baga’. (Daniel 11:1–12:13) Bochan ni de nang fan ni rib tamilang e n’en ni ke guy, me fith Daniel ngak fare engel ni keb i yog fare n’em ni gaar: “A Somol rog, uw rogon e tomur ko pi n’eney?” Ma fare fulweg riy e yog fare engel rogon e “tin tomren e rran,” ni ireray e ngiyal’ ni “piin ni yad ba gonop e bay ra nanged fan.” Me Daniel, mang e athap rok? I yog fare engel ngak ni gaar: “Me gur, Daniel, e nguum par ni gab yul’yul’ nge mada’ ko tomur.” (Daniel 12:8-10, 13) Bayi sul Daniel ko “ngiyal’ ni kan faseg ko yam’ e piin ni yad ba mat’aw,” u nap’an e gagiyeg rok Kristus u Bbiyu’ e Duw.​—Luke 14:14, NW.

¹⁹ Gad be par ko tin tomuren e rran ni kari chugur ko tungun ni kad chugurgad e chiney nga tabolngin e gagiyeg rok Kristus u lan Bbiyu’ e duw ko fa ngiyal’ ni ba aram ni som’mon ni michan’dad. Ere, thingarda fithed gadad, ‘Gu ra moy ko bin nib biech e fayleng nga gu chag ngak Abraham, Job, nge Daniel, nge boch e pumoon nge ppin nib yul’yul’?’ Gad ra moy ni faan gad ra par nib chuchugur ku Jehovah ma gad fol ko motochiyel rok. U lan e bin migid e article, e gad ra sul nga daken e athap ko fas ko yam’ ma rayog ni ngad nanged e ani yira faseg ko yam’.

Ka Ga Manang?

• Mang e ke pirieg Paul ni ke rin’ e girdi’ u nap’an ni ke machibnag e athap rok ko fas ko yam’?

• Mang fan ni fare athap ko fas ko yam’ e ke tay e tin riyul’ e Kristiano nib ki’ ko tin ni googsur?

• Uw rogon ni kad nanged ni Abraham, Job, nge Daniel e ke mich e fas ko yam’ u wan’rad?

[Picture on page 6]

Paul, e yib nga p’eowchen Felix ni Governor, nge machibnag e athap ko fas ko yam’ u fithik’ e pagan’

[Picture on page 8]

Mang fan ni ke mich e fas ko yam’ u wan’ Abraham?

[Picture on page 10]

I yib e gapas nga laniyan’ Job ni bochan e athap ko fas ko yam’

[Picture on page 10]

Ra sul Daniel u nap’an ni yira faseg e piin nib mat’aw