Fare Athap Ko Fas Ko Yam’ E Ba Riyul!
“Be l’agan’ug ku Got . . . ni bayi faseg e yam’.”—ACTS 24:15, New World Translation.
1. Mang fan ni bay fan ni ngad athapeged ni ngan faseg e yam’?
KE pi’ Jehovah tapgin ngodad nib fel’ ni ngad athapeged ni bay e fas ko yam’. Ke micheg ngodad ni bay ni faseg e piin ni kar m’ad, biyay mar pared ni yad ba fas. Mab mudugil nra lebug e tin nib m’agan’ ngay ni fan ko piin ni kar m’ad. (Isaiah 55:11; Luke 18:27) Riyul’, ya ke dag Got gelngin kakrom ya ke faseg e yam’.
2. Uw rogon ni fare athap ko fas ko yam’ e ra fel’ rogodad riy?
2 Bay e michan’ rodad ku Got ni ra faseg e yam’ u daken Fak, ni Jesus Kristus, ma re n’ey e ra gelnagdad ko ngiyal’ ni ke kireban’dad. Faanra kari mudugil e athap rodad ni ra fas e yam’ ma ku ra ayuwegdad e re n’ey ni ngad pared nib yul’yul’ ngak e Chitamangidad nu tharmiy nge mada’ ko yam’. Sana, ra gel e athap rodad ni bay e fas ko yam’ nfaanra uda lemnaged boch e thin ni kan ta’ nga Bible ni be weliy murung’agen. Ma urngin e pi maangang ney e ke lebug u daken gelngin Jehovah ni ir fare Somol ni Th’abi Tolang.
Kan Pi’ Ngorad e Yam’ Rorad u Daken e Fas ko Yam’
3. Kan pi’ gelngin Elijah ni nge rin’ e mang u nap’an ni ke yim’ e bitir ko fare ppin nu Zarephath ni ke yim’ figirngin?
3 Nap’an ni ke weliy Paul gelngin e michan’ ni ke dag e pi mich rok Jehovah ko ngiyal’ ndawori yib Kristus, me yol ni gaar: “Piin ni ppin e kan faseg e yam’ rorad.” (Hebrews 11:35; 12:1) Bagayad ko pi ppin nem e ir fa en kem’ figirngin mab gafgow ni immoy ko mach nu Phoenicia u Zarephath. Bochan ni ke ayuweg e cha’ nem Elijah ni profet rok Got, ma aram me par ni daki m’ay e flowa nge gapgep rok ko ngiyal’ ni ke yib e uyungol u rom nra thang e pogofan rok nge fak. Munmun ma nap’an ni ke yim’ fare tir, ma aram me tay Elijah re tir nem nga daken e bet, me meybil, ni ke yan i palpal nga daken fare pagal ni dalip yay, ni be ning e ayuw ni gaar: “Jehovah ni Got rog, mfulweg e pogofan rok e re tir ney ngak.” Me n’igin Got fare yaal, ara yafas, nge sul ngak fare tir me fas. (1 Kings 17:8-24) Mu lemnag feni falfalan’ e re ppin nem ya kan taw’athnag ni bochan e michan rok ya ereram e bin somm’on e fas ko yam ni kan yoloy murung’agen—ni aram fak ni rib t’uf rok!
4. Mang maangang ni ke fal’eg Elisa u Shunem?
4 Yugu reb e ppin ni kan faseg e bitir rok ko yam’ e ir be’ ni ma par ko mach nu Shunem. Cha’ nem e leengin reb e pumoon ni ke pillibthir, ma ri ma gol ngak Elisa ni profet nge ngak e tapigpig rok. Min taw’athnag nga reb e bitir ni pumoon. Machane, tomren ni ke yan in e duw, me pining fare profet ya ke pirieg ni ke yim’ fak u lan e naun rok. Tomren ni ke meybil Elisa me yan u lan fare singgil iyan, “me tabab ni nge gowel dow fachi tir i yan.” Me “waangis fare tir ni medlip yay me pithig owchen.” Dariy e maruwar riy ni re fas ko yam ney e kari k’aring e falfalan’ ko fare matin nge fak. (2 Kings 4:8-37; 8:1-6) Machane uw feni gel e falfalan’ rorow ko ngiyal’ ni yira fasegrow uroy u fayleng u nap’an fare “fas ko yam’ ni rib fel’”—ni aram e n’en nra bing e kanawo’ ni nge yog e yafas ngorow ni dabkura m’ow biyay! Kari magar Jehovah ya ir e Got ko fas ko yam’ ni ma runguydad!—Hebrews 11:35.
5. Uw rogon ni kub l’ag Elisa ko fare maangang ni ke buch u tomren ni ke yim’?
5 Mus nga tomren ni ke yim’ Elisa min k’eyag, me pi’ Got gelngin e yil rok u daken e kan ni thothup. Be gaar: “Ba ba ngiyal’ ni kan yan [boch e girdi’ ni yad piyu Israel] ni ngan k’eyag ba yam’ mi yad guy boch fapi girdi’ [ni yad piyu Moab] ni yad ma yib ko cham nga Israel, mi yad garpey fare yam’ nga lan e low ko yam’ ni faan nni yan ni chibgiliy Elisa ngay, mi yad mil. Ma nap’an ni yigi math fare [yam’] ko yil rok Elisa, me fos me sak’iy nga lang.” (2 Kings 13:20, 21) Sana kari gin’ ma ke falfalan’ fare moon! Mu lemnag feni gel e falfalan’ rodad u nap’an ni yira faseg e piin kar m’ad nib t’uf rodad ni aram e n’en nib mudugil mab puluw ko n’en nib m’agan’ Jehovah ngay ndabi thil!
Ki Faseg Fak Got e Yam’
6. Mang maangang ni ke fal’eg Jesus nib chuchugur ko fare mach ni Nain, ma uw rogon ni re n’en nem e bay fan ngodad?
6 Jesus Kristus, ni ir Fak Got e ke pi’ tapgin ngodad ni nge michan’dad ni ran faseg e yam’, ma bay e athap rorad ni nge yog e yafas ni manemus ngorad. Fare n’en ni ke buch nib chuchugur ko fare mach ni Nain e ra tamilangnagdad ni fare maangang ni aray rogon e ra yib u daken gelngin Got. Ba’ biyay, ni ke mada’nag Jesus e girdi’ ni yad be yor ma yad be fek ba pagal ni ke yim’ ni nga ranod nga wuru’ e mach ko gum’eyag. Re pagal nem e kari maagirag ni fak fare ppin ni ke yim’ e pumoon rok. Me gaar Jesus ngak: “Dakumur yor.” Me yan i math ko kahol rok fare yam’ me gaar: “Fachi cha’! Be lungug ngom, mu suwon!” Me suwon fa cha’ me non. (Luke 7:11-15) Dariy e maruwar riy ni re maangang ney e ke ayuwegdad ni ngari michan’dad ni fare athap rodad ni ngan faseg e yam’ e ri ba mudugil.
7. Mang e n’en ni ke buch ko fachi pin rok ni fak Jairus?
7 Akum, lemnag e n’en ni ke buch nib muun Jairus ngay, ni ir e ga’ ko fare tafen e muulung u Kapernaum. I pining Jesus ni ngeb nge ayuweg e bitir rok ni ppin ni 12 e duw rok mab t’uf rok, ni ke chuchugur ni nge yim’. Dawori n’uw nap’an nga tomren mi nog ni ke yim’ fare buliyel. Ke pi’ Jesus e athamgil nga laniyan’ Jairus, ni kari kireban’, ni nge dabi war e michan’ rok, me un Jesus ngak nga tabinaw rok ni bay boor e girdi’ riy ni yad be yor. Kara minmingad ko ngiyal’ ni ke yog Jesus ngorad ni gaar: “Cha’nir e dawori aw e fan rok, ya be mol.” Riyul’ ni ke yim’ e cha’ nem, machane be dag Jesus ngak e girdi’ ni rayog ni ngan faseg e girdi’ ko yam’ ni bod rogon ni yad be mol nrayog ni ngan pugrad. Me kol pa’ fachi pin, me gaar ngak: “Fachi pin! Be lungug ngom, mu suwon!” Ka chingiyal’ nem me suwon, ma “gallabthir rok ni ur moyew u tooben” e ke pag rogon e falfalan’ rorow.” (Mark 5:35-43; Luke 8:49-56) Dariy e maruwar riy, ni girdien e tabinaw e “yad bay u toobrad” u nap’an ni yira faseg e piin ni kar m’ad nib t’uf rorad u paradis u fayleng.
8. Mang e i rin’ Jesus u tooben e low rok Lazarus?
8 Ke yan aningeg e rran nap’an ni ke yim’ Lazarus me yan Jesus ko fare low ko yam’ me yog ni ngan chuweg fare gaf i malang u langan fare yiy. Ma tomren ni ke meybil u fithik’ e yoor ya ba adag ni nge nang e girdi’ ni ma tor nga daken gelngin Got ni kan pi’ ngak, me pong Jesus ni baga’ laman ni gaar: “Lazarus, moy nga wen!” Me yib nga wen! Ma pa’ nge ay nruw raba’ e kan ing ko mad ko gum’eyag ma ka ni bachiy bangi mad nga owchen. Me gaar Jesus, “Mpithiged e mad u downgin nge yan”. Boor e girdi’ ni ur moyed u rom ya kar bad ni ngara fal’eged laniyan’ Maria nge Martha ni walagen Lazarus, ma nap’an ni kar guyed e re maangang nem ma ke mich Jesus u wan’rad. (John 11:1-45) Gathi ra ayuwegem e pi thin ney ni nge gel e athap rom ni ran faseg ko yam’ e piin nib t’uf rom u lan e bin nib biech e fayleng?
9. Mang fan ni ke mudugil lanin’dad ni rayog rok Jesus ni nge faseg e yam’ e chiney?
9 Nap’an ni kan kalbusnag John ni tataufe, me pi’ Jesus boch e thin nge yan ngak ni ra falfalan’nag gum’ercha’en ni gaar: “Piin ni malmit e ke yog ni ngar guyed ban’en, . . . ma piin ni kar m’ad e kan fasegrad.” (Matthew 11:4-6) Bochan ni nap’an ni immoy Jesus u fayleng mi i faseg e yam’, ma arfan ni ba mudugil nra rin’ e re n’ey ya ir reb e kan nib gel ya Got e ke pi’ gelngin. Jesus e “ir owchen e fas ko yam’ nge yafas,” ma tin ni ra fal’eg lanin’dad e aram e kad nanged ni dabki n’uw nap’an nga m’on ma “gubin e yam’ ni bay u lan e low ni bayi rung’ag laman mi yad yib nga wuru’”!—John 5:28, 29; 11:25.
Yugu Boch e Fas ko Yam’ nra Gelnag e Lagan’ Rodad
10. Uw rogon ni ngam weliy fare fas ko yam’ ni ireray e bin som’on e apostal ni ke fal’eg?
10 Nap’an ni ke l’og Jesus e pi apostal rok ni yad e pi tamachib ma aram ke yog ngorad, ni gaar: “Mi gimed faseg e yam’.” (Matthew 10:5-8) Ra ngan rin’ e re maruwel n’ey, ma riyul’ ni ba t’uf ni nge pagan’rad nga gelngin Got. U Joppa ko duw ni 36 C.E., ma Dorcas (Tabitha) ni ir reb e ppin ni bay madgun Got u wan’ e ke yim’. Pi n’en nib fel’ ni i rin’ e ba muun ngay ni ma fal’eg e mad ni fan ko pin ke yim’ e pumoon rorad, arfan ni kari kireban’ e girdi’ ngak ni ke yim’. Pi gachalpen e kara fal’eged rogorad ko gum’eyag min pining Peter ni apostal, sana ni fan ni nge fal’eg lanin’uy. (Acts 9:32-38) Me yog ngak urngin e girdi’ ni ur moyed u lan e singgil ko thal nlang e naun ni ngar chuwgad u rom, me meybil, me yog ni gaar: “Tabitha, mu suwon!” Me pithig owchen, me suwon, me kol Peter pa’, me ayuweg ni nge sak’iy. Re fas ko yam’ ney e ireray fa bin somm’on ni ke faseg reb e apostal e yam’ ma ke k’aring boor e girdi’ ni nge michan’rad. (Acts 9:39-42) Maku re n’em e ke ayuwegdad ni ngari gel e l’agan’ rodad ko fas ko yam’.
11. Mang e bin tomur e fas ko yam’ nrogon ni yog e Bible?
11 Fa bin tomur e fas ko yam’ ni kan yoloy nga Bible e aram e n’en ni ke buch u Troas. Nap’an ni ke tal Paul u rom ni ereram fa bin dalip e milekag ni i tay ko maruwel rok ni missionary, me n’uwnag e welthin ni ke pi’ nge yan i mada’ ko lukngun e nep’. Me Eutychus ni bochi pagal e ke mol me mul ko thal ni dalip thal e naun nga but’ ya kari magar ma sana bochan e gawelngin boor e magal nge kaygi yoor e girdi’. Mini yan ni fek ma ke “aw e fan rok,” ma gathi kemus ni ke tal e pogofan rok ya riyul’ ni ke yim’. Me yan Paul i pag ir nga daken Eutychus, nge dibey, me gaar: “Dab mu rusgad, ya ka bay e pogofan rok.” Thin ni yog Paul e be yip fan ni ke fas fare pagal biyay. Ma piin ni ur moyed u rom e “ke fel’ e tafinay rorad.” (Acts 20:7-12) Chiney, ma pi tapigpig rok Got e ngari falfalan’rad ya ke tamilang u wan’rad ni piin ni ur pigpiggad ku Got kakrom e ra riyul’ fare athap ko fas ko yam’ ni fan ngorad.
Fas ko Yam’—Ke N’uw Nap’an ni Be L’agan’uy Ngay
12. Mang e thin ni yog Paul ni kari pagan’ ngay u nap’an ni immoy u p’eowchen Felix ni ir e Am nu Roma?
12 Nap’an e skeng ko gafgow ni kan tay ngak Paul u p’eowchen Filix ni ir e Am nu Roma, e micheg ni gaar: “Ba michan’ug nga urngin ban’en ni bay ko fare Motochiyel nge pi’nen ni kan yoloy u nap’an e pi profet; ma ke l’agan’ug ngak Got . . . ni bay e fas ko yam’ ni fan ko piin nib mat’aw nge piin nde mat’aw.” (Acts 24:14, 15, NW) Uw rogon ma boch ko Thin rok Got, ni bod “fare Motochiyel,” e ba sorfan ko fas ko yam’?
13. Mang fan nrayog ni ngan nog ni fa bin somm’on e yiiy ni ke yog Got e be yip fan e fas ko yam’?
13 Nap’an ni ke pi’ Got fare yiiy ni bin somm’on u Eden ma thin rok e ba sor fan ko fas yam’. Nap’an ni ke yog Got boch e thin ko n’en nra buch rok “fare porchoyog ni ke kakrom,” ni Satan ni fare Moonyan’, me gaar: “I gur nge fare pin e bay mpirew ni gimew ba toogor; ma ku er rogon pi fak nge pi fakam ni bay ur pired ni yad ba toogor. Ma be’ nib moon ni fak fare pin e bay i pirdiiy lolugem nge maad’ad nib gel, mi gur e bay mu k’ad wurilen e rifrif u ay.” (Revelation 12:9; Genesis 3:14, 15) Ngan maadadnag wurilen ay owchen ara fak fare pin e ba sor fan ko ngan li’ Jesus Kristus ngem’. Faanra fare Owchen e ra maadadnag lolugen fare porchoyog u tomren, ma be dag ni re n’ey e thingar ni faseg Kristus ko yam’.
14. Uw rogon ni Jehovah “e gathi Got rok e girdi’ ni ba yam’, ya ir e Got rok e piin nib fas”?
14 Ke yog Jesus ni gaar: “Mi Moses e ri micheg nib tamilang ni bay ni faseg ko yam’ e piin ni kar m’ad, ni be yog ko fa gin’en ni ba’ fare thal i yol riy ni murung’agen fachi ke gek’iy ni be daramram ni be weliy murung’agen Somol riy ni ir e ‘Got rok Abraham, me ir e Got rok Isak, me ir e Got rok Jakob’. Ma ir fare Got rok e girdi’ nib fos, ma gathi Got rok e girdi’ nib yam’ ya rogon ni be guy Got e girdi’ e yad urngin ni yad ba fas.” (Luke 20:27, 37, 38; Exodus 3:6) I Abraham, nge Isak, nge Jakob e kara m’ad, machane rib mudugil nra fasegrad Got ko yam’ ma arfan ni yad be par nib fas u wan’.
15. Mang fan ni bay tapgin ni nge mich e fas ko yam u wan’ Abraham?
15 Bay fan ni be l’agan’ Abraham ngay nra fas e yam’, ya nap’an ni kar pillibthirgow Sarah, ma susun karmow ya dakuriy gelngirow ni ngar sunmiy e bitir, ma Got e ke ayuwegrow me pi’ gelngirow u daken e maangang. Re n’em e taareb rogon ko fas ko yam’. (Genesis 18:9-11; 21:1-3; Hebrews 11:11, 12) Nap’an ni ke gaman 25 e duw rok Isak, ni fakrow, ma aram me yog Got ngak Abraham ni nge pi’ ni maligach. Machane, nap’an ni ben’en Abraham ni nge li’ Isak ngem’, me yib e engel rok Jehovah taleg. Me “pagan’ Abraham ngay nrayog rok Got ni nge faseg [Isak] ko yam’, ere yan i aw nib fanathin ni susun ke fas Isak ko yam’ ke sul ngak Abraham.”—Hebrews 11:17-19; Genesis 22:1-18.
16. Chiney ni ke yim’ Abraham, ma be sonnag e mang?
16 I athapeg Abraham e fas ko yam’ u tan e gagiyeg rok fare Messiah, ni ir fare Awoch ni kan micheg. Nap’an ni dawori yib Fak Got nga fayleng nib girdi’, ma i nang Abraham ko michan’ rok. Nap’an ni immoy Jesus Kristus nib girdi’, me yog ngak piyu Jews ni gaar: “Chitamangimed i Abraham e i falfalan’ ni bayi guy e birog e rran, me guy me falfalan’.” (John 8:56-58; Proverbs 8:30, 31) Chiney ni ke yim’ Abraham, ma be son ni ngan faseg ko yam’ nge par u roy u fayleng u tan Gil’ilungun Got ni Kristus e pilung riy.—Hebrews 11:8-10, 13.
Tin Kan Micheg u Lan fare Motochiyel nge Pi Psalms
17. Uw rogon ma “pi n’en ni kan ta’ u lan fare Motochiyel” e ba sor fan ko fas ko yam’ ni ta’ Jesus Kristus?
17 Fare athap rok Paul ko fas ko yam’ e ba puluw ko “pi’ n’en ni bay ko fare Motochiyel.” Ke yog Got ngak piyu Israel ni gaar: “Thingar mu . . . feked i yib ni kam thumnaged e tin somm’on i waamngin e grain ni kam kunuyed u milay’ romed ngam pied ko fare prist. Ma [chirofen ni Nisan 16] e thingari chichingeg fare thum i nem’ u p’eowchen Jehovah ni ngam fel’gad u wan’.” (Leviticus 23:9-14, NW) Sana bochan ni Paul e ma lemnag e re motochiyel nem, ma arfan ni yol ni gaar: “Kristus e somm’on ni ngan faseg ko yam’, me migid e piin ni girdien Kristus ko ngiyal’ ni bayi sul Kristus riy.” Jesus e ir e “fare waamngin ni somm’on,” ni kan faseg ko yam’ ko Nisan 16, 33 C.E. Me munmun, u nap’an ni bay Jesus ni be gagiyeg, ma bay e fas ko yam’ ni fan ko ‘piin ni migid’—ni yad e pi gachalpen ni kan duguliyrad.—1 Korinth 15:20-23, NW; 2 Korinth 1:21; 1 John 2:20, 27.
18. Uw rogon ni dag Peter ni fare fas ko yam’ ni ta’ Jesus e kan weliy ko Psalms?
18 Maku fapi Psalms e be dag ni riyul’ fare fas ko yam’. Chirofen ni Pentekost ko duw ni 33 C.E., me weliy Peter ni apostal boch e thin nni fek u Psalm 16:8-11, ni gaar: “Yi David e weliy murung’agen [Jesus] ni gaar: Ug guy Somol ni bay u p’eowcheg ni gubin ngiyal’, ya bay u ba’ ni mat’aw rog, ere dariy ban’en ni nge rurgeg. Aram fan ni ke felan’ug ma ke sug e thin rog ko falfalan’; mi gag ni yugu aray rogon nra gum’, e bay ug par ni ke pagan’ug u fithik’ e l’agan’, ya dabiyog ni ngam n;igeg nggu par u tafen e yam’, ya dabiyog ni ga ra pag e tapigpig rom nib yul’yul’ ni nge mel.’ ” Me uneg Peter boch e thin ngay ni gaar: “I [David] e guy e n’en ni bayi rin’ Got, ma aram me weliy murung’agen e fos ko yam’ ni bayi tay fare Messiah ni faani gaar: Dan n’ag nge par u tafen e yam’, ma downgin e de mel. I Got e ke faseg e cha’ nem i Jesus ko yam’.”—Acts 2:25-32.
19, 20. Wuin e ke weliy Peter boch e thin ni kan fek u Psalm 118:22, ma uw rogon ni re n’ey e ba m’ag ko yam’ nge fas ko yam’ ni ta’ Jesus?
19 Tomren ni ke yan boch e rran, me sak’iy Peter u p’eowchen fare Sanhedrin me weliy biyay boch e thin ni ke fek ko Psalms. Kan fith ngak Peter ko uw rogon ni ke golnag fare mugutgut, ma aram ke yog ngorad ni gaar: “Me ere susun gimed e goo ngam nanged, nge urngin e girdi’ nu Israel nsusun e ngar nanged, nre moon ni baara’ nib sak’iy u roy u p’eowchemed e kari gol ni gelngin fithingan Jesus Kristus nu Nazareth e ir e ke golnag- ni ir faanem ni mu richibiyed nga ley e gek’iy ngem’ nge mu’ me faseg Got ko yam’. I [Jesus] e ir ‘Fare malang ndariy fan u wun’med e piin ni gimed be toy e naun e yan i aw ni araam e re malang ni ir e ba th’abi ga’ fan.’ Ke mus ni Jesus e rayog rok ni nge thapeg e girdi’ ngak Got; ya dakuriy yugu reb e ngachal nga bayang u roy u fayleng ni pi’ Got ngak e girdi’, ni ir e rayog rok ni nge thapegdad ngak Got.”—Acts 4:10-12.
20 I weliy Peter uroy e thin ko Psalm 118:22, me dag ni pi thin ni bay riy e ba m’ag ko fas ko yam’ ni tay Jesus. Pi ga’ ko teliw rok piyu Jew e kara k’aringed yad ni ngar dabuyed daken Jesus ma aram e ur dariyfanniged. (John 19:14-18; Acts 3:14, 15) Bochan ni ‘piin ni ma toy e naun ni kar n’aged fare malang’ ma aram ke yim’ Kristus, machane fare bugithin ni ‘fare malang e ke mang ba malang nth’abi ga’ fan ma re n’ey e be yip fan ni kan faseg ko yam’ me mang reb e kan nra par u tharmiy. Rogon ni yog fare psalmist e gaar, ‘Re n’ey e Somol e yodoromnag.’ (Psalm 118:23) Ran ngongliy “fare malang” ni ra mang ba malang nth’abi Ga’ fan ma be dag ni yira n’uf ya ra mang Pilung ni kan Dugliy.—Efesus 1:19, 20.
Kan Gelnag e Athap ko Fas ko Yam’
21, 22. Mang athap e ke weliy Job, murung’agen ni bay ko Job 14:13-15, ma uw rogon ni re n’ey e ra fal’eg laniyan’ be’ ni ke kireban’ e chiney?
21 Yugu aram rogon ni daworda guyed be’ ni kan faseg ko yam’, ma kada weliyed boch e Thin u Bible ni be micheg ngodad fare fas ko yam’. Arfan, ni rayog ni nge yog ngodad fare athap ni ke weliy Job murung’agen, ni ir fa en nib mat’aw. Nap’an ni ke yib e gafgow ngak, me wenignag ni gaar: “O [Jehovah] bay mu mithegeg nga Low ko yam’, . . . ma bay mu dugliy ba ngiyal’ ni ngam lemnageg mu ayuwegeg! Faanra yim’ be’ nib fel’ fithik’ i dow maku rayog ni nge fas biyay? . . . Bay mu piningeg, ma gu ra fulweg lungum. Ya ga be yim’ ni bochan e maruwel rom ni ngam rin’.” (Job 14:13-15, NW) Ri ma ‘tafinaynag Got e maruwel rok ni ke fal’eg nga pa’ ni nge rin’,’ ma ri ma lemnag ni nge faseg Job ko yam’. Re n’em e kari gelnag e athap rodad!
22 Ani bay madgun Got u wan’ u reb e tabinaw e rayog ni ngeb e m’ar ngak nib gel, ni bod Job, ma sana yam’ ni ir fare toogor rok e ra gel ngak. Piin ni ke kireban’rad e yad ra yornag, ni bod rogon Jesus ni ke yor ya ke yim’ Lazarus. (John 11:35) Machane kari pagan’uy ni kan nang ni ra pong Got ma piin ni bay u laniyan’ e ra fulweg! Bod ni kemus ni ka ranod ko milekag mi yad sul—ni gathi yad ba m’ar ara kar meewargad, ya ba fel’ fithik’ i dowrad.
23. Mang e ke yog boch e girdi’ ni be dag ni kari pagan’rad ko athap ni ran faseg e yam’?
23 Reb e Kristiano ni ke pillibthir mab yul’yul’ e ke yim’, ma re n’ey e k’aring ni nge yol boch e walag ngak fak, ni gaar: “Kari kireban’mad ni ke yim’ e chitinam. Ma dabki n’uw nap’an me sul biyay ngodad nib fas—ma ke pidorang ma ba ke gel!” Gallabthir ni ke yim’ fakrow e ra gaar: “Ri gamow be sonnag ni ngeb fare rran nra fas Jason biyay! Ma ra sap nga boch ban’en u tooben ma ra guy fare Paradis ni aram e n’en ni be finey ni ngeb. . . . Re n’ey e kari ayuwegmow ni nggu athamgilgow ni nggu moyew u rom ya ri ba t’uf romow.” Arrogon, kari falfalan’dad ya bochan fare athap ko fas ko yam’ ni ba mudugil!
Mang E Fulweg Rom?
• Uw rogon ni fare yaram rok Got ni ngan faseg e yam’ e ra fel’ rogodad riy?
• Mang boch ban’en ni ke buch kakrom ni kan yoloy u lan e Bible ni be ayuwegdad ni ngada athapeged ni ngan faseg e yam’?
• Mang fan nrayog ni nga nog ni fas ko yam’ e aram e athap ni ke n’uw nap’an?
• Mang athap nragelnagey ma rayog ni nge yog ngodad nib m’ag ko piin ni kar m’ad?
[Picture on page 8]
I fanay Elijah gelngin ni yib rok Jehovah, me faseg bochi pagal ni fak reb e ppin ni ke yim’ figirngin
[Picture on page 10]
Ngiyal’ ni ke faseg Jesus fare tir rok Jairus’ ni ppin ko yam’, ma immoy e gallabthir rok u toobrad ni kari falfalan’row
[Picture on page 13]
Chirofen ni Pentekost 33 C.E., ma de rus Peter ni apostal ni weliy murung’agen Jesus nni faseg ko yam’