Fare Athap Ni Ra Fas E Yam’ E Bay Gelngin

“Ya urngin ban’en ma kug matheeg ngay ni kari yan i aw ni lus ni bochan e bin ni ka baga’ fan e nggu nang [Kristus] . . . mu gu thamiy gelngin e fas ko yam’ ni tay.”​—FILIPPI 3:8-10.

1, 2. (a) Boch e duw ni ke yan, ma uw rogon ni ke weliy reb e tayugang ko teliw murung’agen e fas ko yam’? (b) Uw rogon ni nge lebug fare fas ko yam’?

NGIYAL’ ni ka fini tabab e pi duw ni 1890, ma fare public press e ke weliy murung’agen reb e welthin nib thil ni pi reb e tayugang ko teliw u Brooklyn, New York, U.S.A. Ke gaar re fas ko yam’ nem e yira kunuy urngin e yil nge ufin nga taabang ni ngan ngongliy e girdi’ riy min pi’ e yafas ngorad biyay, ni yugu demtrug ko nifiy e li’rad fa kar maadadgad, ara reb e gamanman e ke longuyrad ara kar manged yongo’len e but’. Fare tamachib e be lemnag ni lan 24 e awa reb, ma ra pi’ e nifeng gelngin fapi paey, nge rifrifan ey nge buguli paey, nge yil, nguchey, nge yu ulungi ufin nge yalach u downgin bokum bilyon e girdi’ ni kar m’ad. Ma pi n’en ney e ra gay yu yang ko fare dowef ngan chamiy biyay ni ri aram fare dowef faram ni ke yim’. Ma ra yib e pi yaal u tharmiy nge infierno ni ngar pared ko fare dowef ni kan faseg ko yam’.

² Fare lem ni ngan chamiy biyay urngin e atom ara urngin yang ko fare dowef u nap’an e fas ko yam’ e de puluw, ya girdi’ e dariy e yaal rorad ndabi yim’. (Eklesiastes 9:5, 10; Ezekial 18:4) Jehovah, ni ir e Got ko fas ko yam’, e de t’uf ni nge chamiy biyay e pi atom ko boch ban’en ni aram e pi atom ko fare dowef ni kan sunmiy ko somm’on. Bay gelngin ni nge ngongliy e pi dowef nib biech ni fan ko piin ni kan fasegrad ko yam’. Ke pi’ Jehovah gelngin ngak Jesus Kristus, ni Fak, ni nge faseg e yam’ mab mudugil ni ra yog e yafas ni manemus ngorad. (John 5:26) Ere ke yog Jesus ni gaar: “I gag owchen e fas ko yam’ nge yafas. Yigu ra ke yim’ be’ ni gub mich u wan’ ma ra fas.” (John 11:25, 26) Ri ma pi’ e athamgil nga lanin’uy e pi n’en ney ni ke micheg! Ma ra gelnagdad e re n’ey u nap’an nra yib e pi skeng ngodad ni yugu aram rogon ni gad ra yim’ ni gadad e Pi Mich rok Jehovah nib yul’yul’.

3. Mang fan ni ba t’uf rok Paul ko ngiyal nem ni nge weliy boch e thin nib puluw ko fas ko yam’?

³ Fare fas ko yam’ e dabi puluw ko fare machib ni girdi’ e bay e yaal rorad ni dabi yim’​—ni aram e n’en ni be lemnag Plato ni ir fare philosopher nu Greek. Ere, mang e ke buch u nap’an ni be machibnag Paul ni apostal piyu Greek ni Areopagus u Athens nib tolang e liw rorad, ni be weliy murung’agen Jesus, me yog ni ke faseg Got e cha’ nem? Rogon ni yog uroy e be gaar, “nap’an nrung’aged e n’en ni ke weliy Paul ni murung’agen e fas ko yam’, me moning boch i yad ngak.” (Acts 17:29-34) Boor e piin ni kar guyed Jesus Kristus ni kan faseg ko yam’ e ka yad ba fas ko ngiyal’ nem, ma yugu aram rogon ni bay boch e girdi’ ni ma moningnag, ma aram kar weliyed ngorad ni kan faseg ko yam’. Machane pi tamachib ni googsur ni ma chag ko fare ulung nu Korinth e kar dariy fannaged e fas ko yam’. Arfan ni ke weliy Paul boch e thin nrib togopuluw ko re machib nem ni fan e nge ayuweg e machib ko Kristiano ni aram e n’en ni bay ko 1 Korinth guruy ni 15. Ngan fil e thin ni ke weliy Paul nib fel’ rogon ma kari micheg nrib mudugil e fas ko yam’ nge fare gelngin e athap ko fas ko yam’.

N’en ni Kari Micheg ni Kan Faseg Jesus ko Yam’

4. Mang e n’en ni i weliy Paul u murung’agen e piin ni kar guyed Jesus ni kan faseg ko yam’?

⁴ Ngam gu’ ko uw rogon ni tabab Paul ko welthin rok ni fan ni nge ayuweg e tin riyul e machib. (1 Korinth 15:1-11) Faanra girdi’ nu Korinth e gathi ke mus ni kar manged e Kristiano ma dariy fan e re n’ey u wan’rad, ma aram e ngar chichiiyed pa’rad ko fare thin nib fel’ ni fan ni ngan thap ngak Got. Ke yim’ Jesus ni bochan e denen rodad, kan k’eyag, ma kan faseg ko yam’. Riyul’, ni tomren ni kan faseg Jesus ko yam’, ma aram me m’ug ngak Cephas (Peter), “me m’ug ngak fa ragag nge l’agruw.” (John 20:19-23) Ma immoy sogonapan 500 e girdi’ ni kar guyed Jesus ni sana u nap’an ni ke ning chilen ngorad ni gaar: ‘Ere, mmarod ngak girdien e pi nam u gubin yang ngam pingeged yad ngar manged pi gachalpeg.’ (Matthew 28:19, 20) Ma ki guy James, maku arrogon e pi apostal nib yul’yul. (Acts 1:6-11) I m’ug Jesus ngak Saul ni ke chuchugur nga Damascus, “ni bod e bitir ni kan gargelnag ndawori taw nga pulan”​—ni bod ni kan faseg ko yam’ me mang reb e kan. (Acts 9:1-9) Ke mich Kristus u wan’ Piyu Korinth ni bochan e ke machibnagrad Paul, aram mar adaged fare thin nib fel’.

5. Uw rogon ni ke tamilangnag Paul ban’en ni aram e thin ni kan yoloy ko 1 Korinth 15:12-19?

⁵ Ngam guy ko uw rogon ni ke weliy Paul fan. (1 Korinth 15:12-19) Bochan ni piin ni kara guyed Kristus ni kan faseg ko yam’ ma kara machibnaged murung’agen, ma mang fan ni yima yog ni dariy e fas ko yam’? Faan manga dan faseg Jesus ko yam’, ma ke aw ndariy fan e machib ni gad ma wereg nge michan’ rodad, ma gadad e girdi ni ma lifith l’ugun ma gad be par nib togopuluw ku Got ya kadogned ni ke faseg Got Kristus ko yam’. Faanra dabni faseg e yam’, ‘ma ka gadad ba’ u fithik’ e denen rodad,’ ma piin ni kar m’ad ni ma chag ngak Kristus e ku dariy. Maku, “faanra l’agan’ rodad ngak Kristus e ke mus ni fan ko biney e tamilang, me ere susun e gadad e piin ni ngari kireban’uy ngodad u roy u fayleng.”

6. (a) Mang e ke yog Paul ni be dag ni riyul’ ni kan faseg Jesus ko yam’? (b) Mang e “bin tomur e toogor,” ma uw rogon ni ngan thang e re n’ey?

⁶ I gelnag Paul e mich riy ni ke fas Jesus ko yam’. (1 Korinth 15:20-28) Bochan ni Kristus e ir “faan somm’on” ko piin ni kar m’ad, ni kan faseg ko yam’ ma aram fan ni yugu boch e girdi’ e ku yira fasegrad. Yam’ e ke yib ngak e girdi’ nbochan e togopuluw ni tay Adam, ma aram fan ni ran faseg e yam’ u daken taareb e girdi’​—ni Jesus. Ma girdien Kristus e ran fasegrad u nap’an ni bay Kristus ko gagiyeg rok. Mi Kristus e ir e “bayi gel ngak urngin e pi kan ni be gagiyeg, nge piin ni yad be tay murung’agen ban’en, nge piin ni yad be yog e thin” nib togopuluw ko gagiyeg rok Got ma ra gagiyeg ni ir e Pilung nge mada’ ko ngiyal’ ni ke ta’ Jehovah urngin e pi toogor rok nga tan e rifrif u ay. Ma “bin tomur e toogor”​—ni yam’ ni yib nbochan Adam—​e bayni gothey u daken e maligach ni ke pi’ Jesus. Ma Kristus e “bayi ta’ ir nga tan pa’ Got ni Chitamangin ni ke ta’ urngin ban’en nga tan pa’ Kristus;” ma aram e Got e bay i gagiyegnag urngin ban’en.”

Taufe ni Fan ko Yam’?

7. Mini’ e pi cha’ ni “kan taufenagrad ni fan e ngar m’ad,” ma mang fan e re n’ey ngorad?

⁷ Piin ni ma togopuluw ko fas ko yam’ e kan fithrad ni gaar: “Ere uw rogon e piin ni kan taufenagrad ni fan ngak e piin ni kar m’ad?” (1 Korinth 15:29) Thin ni yog Paul e de yip’ fan ni ngan taufenag e piin nib fas ni fan ko piin ni kar m’ad, ya bochan pi gachalpen Jesus’ e thingara filed ban’en, me michan’rad, min taufenagrad. (Matthew 28:19, 20; Acts 2:41) Piin Kristiano ni kan dugliyrad e “kan taufenagrad ni fan e ngar m’ad” ya nguu ranod ko kanawo’ ni nge pow’iyrad ko yam’ nge fas ko yam’. Re taufe ney e ra tabab ko ngiyal’ ni fare kan ni thothup rok Got e ra yibnag nga laniyan’rad fare athap ni nga ranod nga tharmiy ma ra m’ay u nap’an ni ran fasegrad ko yam’ min pi’ ngorad e yafas ndariy n’umngin nap’an u tharmiy.​—Roma 6:3-5; 8:16, 17; 1 Korinth 6:14.

8. Mang fan ni ke mudugil laniyan’ e pi Kristiano nyugu aram rogon ni ra li’rad Satan nge pi tapigpig rok ngar m’ad?

⁸ Rogon e thin ni yog Paul, ni fare athap ko fas ko yam’ e ra ayuweg e pi Kristiano ni ngar pared nib mudugil u gubin ngiyal’ nib mo’maw’ e par rorad nge gafgow ni ma yib ngorad u gubin e rran ma rayog ni ngan li’rad ngar m’ad nbochan ni yad ma un ko maruwel ni ngan wereg e thin ko Gil’ilungun. (1 Korinth 15:30, 31) Yad manang ni faanra pag Jehovah ni nge li’rad Satan nge pi tapigpig rok ma bay gelngin ni nge fasegrad ko yam’. Goo Got e bay rogon ni nge thang e yaal rorad, ara yafas rorad, u Gehenna, ni be yip fan e mogothgoth ndariy n’umngin nap’an.​—Luke 12:5.

Ba t’uf ni Ngan Par nib Od

9. Mang e thingar da paloggad riy, ma aram rogon ni rayog ni nge par ni bay gelngin fare athap rodad ko fas ko yam’?

⁹ Fare athap ko fas ko yam’ e ke gelnag Paul. Nap’an ni immoy u Efesus, ma pi toogor rok e sana karon’ed ko gin ni ma gosgos e girdi’ riy ni yad ma cham ngak e pi gamanman ni maloboch. (1 Korinth 15:32) Faanra ke buch ba’nen rok ni aray rogon, ma kan ayuweg ke magay nib fas, ntaabrogon ngak Daniel ni kan ayuweg ni nge dabi li’ e lion. (Daniel 6:16-22; Hebrews 11:32, 33) Bochan ni bay e athap rok Paul ni ran faseg e yam’, me ere de taareb e lem rok Paul ko lem rok e piin ni apostates u nap’an Isaiah. Karogned nra gaargad: “Nguud abichgad ma gadad be garbod, ya bayi gabul ma kad m’ad.” (Isaiah 22:13, Septuagint) Faanra gelnagdad fare athap ko fas ko yam’ ni bod ni ir e ke gelnag Paul, ma aram e thingarda paloggad ko piin ni aram rogon e lem rorad. I ginangey Paul, ni gaar, “Dab mpaged gimed ni nga ni bannagmed. Nchag ngak e girdi’ nib kireb me kireb pangiy nib fel’.” (1 Korinth 15:33) Ma riyul’, ni re kenggin e motochiyel n’ey e ra m’ag ko boch ban’en ko yafas ko girdi’.

10. Uw rogon ni nge par nib fas e athap rodad ni yira faseg e yam’?

¹⁰ Piin ni ka be maruwaran’rad u murung’agen e fas ko yam’, e i yog Paul ngorad ni gaar: “Mu sulweged lanin’med mi gimed tal ndab kum denengad. Baara’ bbugithin ni nggog ma ngam tamra’gad ngay ni nge lungug: ba’ boch i gimed ndar nanged Got. Gu be non ni fan ni ngam tamra’gad.” (1 Korinth 15:34) Ngiyal’ n’ey ni “tin tomren e rran,” e thingarda ngongolgad nrogon e tamilangan’ rok Got nge Kristus. (Daniel 12:4; John 17:3) Ma ra ayuwegey e re n’ey ni nge par nib fas e athap rodad ni fan ko fas ko yam’.

Kan Faseg e Yam’ ko Miti Mang Dowef?

11. Uw rogon ni ke fanathinnag Paul fare fas ko yam’ ni fan ko piin Kristiano ni kan dugliyrad?

¹¹ Bin migid ma ke weliy Paul murung’agen boch e deer. (1 Korinth 15:35-41) Kan athamgil ni nge dabki maruwaran’ e girdi’ ni ran faseg e yam’, ma arfan ni sana immoy be’ ni i fith ni gaar: “Ra diin mi ni faseg e yam’? Miti mang dowef e bay yog ngorad?” Rogon ni weliy Paul e gaar, fare awoch ni kan yung nga but’ e ra munmun ma ra yim’ me piliyeg nge ngal’ ni woldug ni kefini tugul. Taabrogon ngak e piin ni kan duguliyrad ko kan ni thothup ni thingar ra m’ad. Taabrogon ko reb e woldug ni ke tugul nib awoch nge mang e kenggin nib biech, ere piin Kristiano ni kan duguliyrad ni kar fasgad ko yam’ e ke thil dowrad nga downgin e girdi’. Yugu aram rogon ni bay boch e felngin ni taabrogon faram u nap’an ni dawori yim’, ma yira faseg ko yam’ ma ke biech ni ke mang dowef ko kan nrayog ni nge par u tharmiy. Ba puluw ni ngan lemnag, ni piin ni ran fasegrad ko yam’ ngar pared u fayleng e ra yog ngorad e dowef ko girdi’.

12. Mang fan fare bugithin ni “tin nu tharmiy e dowef” nge “tin nu fayleng e dowef”?

¹² Rogon ni yog Paul, ni ufin e girdi’ e ba thil ko ufin e gamanman. Mus ko gamanman ma ba thil thil e ufin rorad. (Genesis 1:20-25) “Tin nu tharmiy e dowef” ni yad e kan e ba thil ko “tin nu fayleng e dowef” ni yad e girdi’. Maku bay ban’en nib thil ko yal, nge pul, nge pi t’uf. Machane piin ni kan dugliyrad ni kan fasegrad ko yam’ e ra mat ramerad ni rib gel.

13. Rogon ni yog ko 1 Korinth 15:42-44, ma mang e kan yung ma mang e ke tugul?

¹³ Tomren ni ke weliy Paul e n’en nib thil riy, me ulul ngay ni gaar: “Ereray e n’en ni bayi rin’ e yam’ ni kan fasegrad.” (1 Korinth 15:42-44) Me yog ni gaar: “Faan bay ni k’eyag e dowef ma ba dowef ni ra kireb; ma faan nni faseg ko yam’ ma dab ki yim’ biid.” Sana be weliy Paul uroy murung’agen e piin kan dugliyrad ni yad gubin. Kan k’eyag ni dowef ni ma yim’, ma bay ni faseg ko dowef ni dabki yim’ biid, ya dabki denen. Yugu aram rogon ni der tay e fayleng farad, machane kan fasegrad ko yam’ ni fan e nga ranod nga tharmiy ngar uned ko flaab rok Kristus. (Acts 5:41; Kolose 3:4) Faani yim’ be’ ma aram e kan k’eyag “downgin nib girdi’” min faseg nga “downgin e kan.” Bochan ni aray rogon e n’en ni ra yog ngak e piin Kristiano ni kan fakayrad ko kan ni thothup, mab mudugil ni boch e girdi’ e yira fasegrad ni ngar pared u fayleng.

14. Uw rogon ni ke weliy Paul ni be dag nib thil Kristus ku Adam?

¹⁴ Bin migid ma aram ke dag Paul e n’en nib thil u thilin Kristus nge Adam. (1 Korinth 15:45-49) I Adam ni ir fa bin somm’on “e ke mang yaal nib fas.” (Genesis 2:7, New World Translation) “Fare Adam ni bin tomur”​—i Jesus—​“e ke mang ba kan ni ma pi’ e yafas.” I pi’ e yafas rok ni maligach, somm’on e fan ko pi gachalpen ni kan duguliyrad. (Mark 10:45) Bochan ni yad e girdi’, ma arfan ni ‘yad bod yaan fa en ni kan ngongliy ko fiyath,’ machane tomren ni kan fasegrad ko yam’ ma kar boded yaan e bin tomur e Adam. Riyul’, ni fare maligach ni ke pi’ Jesus e ra ayuweg urngin e girdi’ ni ma fol rok, mab muun ngay e piin ni kan fasegrad ko yam’ ni ngar pared u fayleng.​—1 John 2:1, 2.

15. Mang fan ni piin Kristiano ni kan dugliyrad e dan fasegrad ko yam’ ko dowef nni ngongliy ko ufin, ma uw rogon ni kan fasegrad u nap’an ni bay Jesus ni be gagiyeg?

¹⁵ Faanra yim’ e piin ni kan dugliyrad, ma dabni fasegrad ko dowef nni ngongliy ko ufin’. (1 Korinth 15:50-53) Fare dowef ni ra yim’ nge racha’ e dabiyog ni nge yan nga gin suwon Got. Boch e piin ni kan dugliyrad e de t’uf ni ngar pared nib yam’ nib n’uw nap’an. Bochan ni kar pared nib yul’yul’ u nap’an ni be gagiyeg Jesus, ma nap’an ni yad ra yim’ ma aram e “lan ba talab e bay ni thiliyeg dowrad riy.” Chingiyal’ nem ma yira fasegrad ngar manged e kan ni dabkura m’ad biyay ma yad ba flaab. Tomur riy, ma piin ni bod be’ ni “ppin ni ngar mabgolgow” Kristus e ra gaman 144,000 u gubin.​—Revelation 14:1; 19:7-9; 21:9; 1 Thessalonika 4:15-17.

Kan Gel ko Yam’!

16. Rogon ni yog Paul nge fapi profet kakrom, ma mang e ra buch ko yam’ ni ke af ngak e girdi’ nbochan Adam?

¹⁶ I weliy Paul ni yira kirebnag e yam’ ni dariy n’umngin nap’an. (1 Korinth 15:54-57) Nap’an nra thiliyeg fare dowef ni ra yim’ ko fare dowef ni dabki yim’ biid, ma ke lebug e pi thin ney, ni be gaar: “Kan kirebnag gelngin e yam’ ndariy n’umngin nap’an.” “Yam’, ba uw e gel ni kam tay? Yam’, ke yan gelngim ngan ni ga ma amithnigey ngay?” (Isaiah 25:8; Hosea 13:14) Fare n’en ni ma amithnigey ma ma yim’ e girdi’ riy e aram e denen, ma gelngin e denen e aram fare Motochiyel, ni be pufthinnag e girdi’ ngar m’ad. Machane bochan e maligach ni ke pi’ Jesus’ nge fare fas ko yam’ ni tay, ma fare yam’ ni Adam ni denen e ir e ke abuweg ngodad e dabki gel.​—Roma 5:12; 6:23.

17. Uw rogon ni pi thin ni bay ko 1 Korinth 15:58 e ba m’ag ko ngiyal’ n’ey?

¹⁷ I yog Paul ni gaar: “Ere pi walageg ni girdien Kristus, um pired ni gimed mmudugil. Gubin ngiyal’ ma nguum muruweliyed e maruwel romed ni fan ngak Somol, ya gimed manang ni pigpig ni gimed be tay ngak Somol e gathi ra yan i aw nib m’ay fan.” (1 Korinth 15:58) Pi thin nem e ba m’ag ko tin ni ka ba’ ko piin ni kan dugliyrad nge fare “yugu boch e saf” rok Kristus nyugu aram rogon ni bay ra m’ad ko ngiyal’ n’ey ni tin tomren e rran. (John 10:16) Ma maruwel rorad ni yad e pi tamachib ko Gil’ilungun Got e dabi aw nib m’ay fan, ya bochan ni bay e athap rorad ko fas ko yam’. Ere, bochan ni gadad e pi tapigpig rok Jehovah, ma gubin ngiyal’ ma nguuda maruweliyed e maruwel rodad ni fan ngak Somol ko ngiyal’ ney ni gad be sonnag ba ngiyal’ nga m’on ni gad ra yog ni baga’ lamdad u fithik’ e falfalan’, ni gaar: “Yam’, ba uw e gel ni kam tay?”

Fare Athap ni Ngan Faseg e Yam’ e Ke Lebug!

18. Uw feni gel e athap rok Paul ko fas ko yam’?

¹⁸ Pi thin rok Paul ni kan yoloy ko 1 Korinth guruy ni 15 e ke tamilangnag ni fare athap ko fas ko yam’ e bay gelngin ko yafas rok. Kari mudugilan’ ni kan faseg Jesus ko yam’ ma manang ni fapi low ko yam’ e ra pi’ e yam’ ni bay riy ngar fasgad. Bay e michan’ rom nib gel ni aram rogon? Urngin ban’en ma ke matheeg Paul ngay ni “goo chubung” ma ‘kari yan i aw ni lus’ ma aram rogon e rayog ni ‘nge nang Kristus nge gelngin e fas ko yam’ ni tay.’ I adag ni nge yim’ ni bod rogon e n’en ni rin’ Kristus ya be athapeg ni nge yog ngak “fare fas ko yam’ nra yib nib papey.” Maku yima yog ni “yay nsom’on e fas ko yam’,” ma fa 144,000 i gachalpen Jesus ni kan duguliyrad. Arrogon, kan fasegrad ma kar manged e pi kan ka ranod nga tharmiy, machane “tin ni ka bay e yam’” e yira fasegrad ko yam’ ngar pared u fayleng.​—Filippi 3:8-11; Revelation 7:4; 20:5, 6.

19, 20. (a) Mini’ e piin ni kan yoloy fithingrad nga Bible ni yira fasegrad ko yam’ uroy u fayleng? (b) Mini’ e ra fas ko yam’ ni ga be sonnag?

¹⁹ Fare athap ni ngan faseg e yam’ e ke riyul’ ngak e piin ni kan dugliyrad ni kar pared nib yul’yul’ nge mada ko yam’. (Roma 8:18; 1 Thessalonika 4:15-18; Revelation 2:10) Piin ni ra magaygad nib fas u tomren “fare gafgow ni baga’ ” e yad ra guy rogon ni nge riyul’ fare fas ko yam’ u fayleng u nap’an nra ‘pi’ e day e pi yam’ ni bay riy, ma yam’ nge Low ko Yam’ e kur piew e yam’ ni bay rorow.’ (Revelation 7:9, 13, 14; 20:13, NW) Ma bagayad ko piin ni yira fasegrad uroy u fayleng e Job, ni i gafgow ko kireban’ ni bochan ni ke yim’ fa medlip e bitir rok ni pumoon nge dalip e bitir rok ni ppin. Mu lemnag feni falfalan’ u nap’an nra guyrad biyay​—ma uw feni gel e falfalan’ ko pi cha’ nem ni kar nanged ni ka bay medlip e pumoon nge dalip e ppin nib pidorang ni walagrad!​—Job 1:1, 2, 18, 19; 42:12-15.

²⁰ Uw feni ga’ e taw’ath u nap’an ni bay Abraham nge Sarah, Isak nge Rebekah​—arrogon nge yugu boch e girdi’, nib muun ngay “urngin fa pi profet”—​ni ra ni fasegrad ko yam’ uroy u fayleng! (Luke 13:28) Ma bagayad ko pi profet nem e Daniel, ni kan micheg ngak ni yira faseg ko yam’ u tan e gagiyeg rok Kristus. Sogonapan 2,500 e duw ni ke yan, ni be toffan Daniel u lan e low, machane u daken gelngin e fas ko yam’, ma aram ma dabki n’uw nap’an ‘ma ra sak’iy ma nge rin’ e tin mmil fan ngak ni ir e nge mang bagayad fapi “fak e pilung u ga’ngin yang e fayleng.” (Daniel 12:13; Psalm 45:16) Uw feni gel ni yira gin’ ngay ni bayda guyed e pi cha’ nem ni gathi kemus ni goo girdi’ kakrom ni kar yul’yul’gad ya kub muun ngay e chitamam, nge chitinam, nge fakam ni pumoon, nge ppin, ara yugu boch e girdi’ nib t’uf rom ni ke fekrad fare toogor ni yam’!

21. Mang fan ni dabda sowathgad ni ngada rin’ed e tin nib fel’ ni fan ngak yugu boch e girdi’?

²¹ Sana boch e girdi’ ni fager rodad nge piin ni yad ba t’uf rodad e kar pigpiggad ku Got nib n’uw nap’an ma kar pillibthirgad. Sana piin ni kar pillibthirgad ma ke mo’maw’ ngorad ni ngara rin’ed boch ban’en ni ngar pithiged e magawon rorad. Rib fel’ ni ngad pied e ayuw ngorad e chiney nrogon e n’en ni rayog rodad! Ma aram rogon ma ra dabi kireban’dad nbochan dad rin’ed e n’en nib mil fan ngodad ngorad nfaanra keb e tayim ni kar m’ad. (Eklesiastes 9:11; 12:1-7; 1 Timothy 5:3, 8) Nguuda lemnaged nib mudugil ni dabi pagtalin Jehovah e tin nib fel’ ni gad ma rin’ ngak yugu boch e girdi’ ndemtrug ko in e duw rok nge uw rogon salperad. I yol Paul ni gaar, “Ere urngin ngiyal’ nra puf rogodad,” me ulul Paul ngay ni gaar, ma “ngada ngongliyed e ngongol nib fel’ ngak urngin e girdi’, machane nge ga’ fadad ngak e piin ni kad manged girdien e tabinaw rok Got u fithik’ e mich u wun’uy ngak Kristus.”​—Galatia 6:10; Hebrews 6:10.

22. Mang e thingar da rin’ed e chiney i yan nge mada’ ko ngiyal’ ni ke lebug e athap rodad ko fas ko yam’?

²² I Jehovah e ir e “Chitamangiy nrib tarunguy e girdi’ ma ir e Got ni ma fal’eg lanin’uy.” (2 Korinth 1:3, 4) Thin rok e ma fal’eg lanin’dad ma ma ayuwegdad nrayog ni ngada fal’eged laniyan’ yugu boch e girdi’ u daken e athap ko fas ko yam’ ni bay gelngin. Nguuda boded Paul ni ir be’ ni bay e michan’ rok ko fas ko yam’ nge mada’ ko ngiyal’ ni gad ra guy ba ngiyal’ ni nge lebug e re athap rodad nem ni ran faseg e yam’ u roy u fayleng. Yibe athapeg ni ri ngad fol wokgad rok Jesus, ni ir e en ni fare athap ni ke ta’ nga gelngin Got ni nge faseg fak ko yam’ e ke riyul’. Dabki n’uw nap’an ma piin ni bay u lan e low ko yam’ e ra rung’ag laman Kristus ma ra bad nga wen. Yibe athapeg ni re n’ey e ra fal’eg lanin’dad ma ra falalan’nagdad. Ma n’en ni ri baga’ fan, e yibe athapeg ni ngada pininged e magar ku Jehovah, ya ir e ke bing a kanawo’ nrayog ni ngan gel ko yam’ u daken Jesus Kristus ni Somol rodad!

Mang E Fulweg Rom?

• Mang e n’en ni ke weliy Paul u murung’agen e piin ni kar guyed Jesus ni kan faseg ko yam’?

• Mang e bin “tomur e toogor,” ma uw rogon ni ra math e re n’ey?

• Rogon e par ko piin Kristiano ni kan dugliyrad, ma mang e n’en ngan yung nge mang e n’en ni ra tugul?

• Mini’ ko piin ni kan yoloy nga Bible e ga baadag ni ngam guyrad u nap’an ni yira fasegrad ko yam’ ngar pared u fayleng?

[Picture on page 14]

I weliy Paul ni apostal boch e thin nib gel ni fan e nge ayuweg fare machib ni fas ko yam’

[Pictures on page 18]

Nap’an ni yira faseg Job, nge tabinaw rok, nge yugu boch e girdi’ ni boor ma ra yib e falfalan’ nib gel riy ngak e girdi’!