Ngan Sul Ko But’​—Uw Rogon?

“GUR e but’, ere bay kum sul ko but’ bayay. Nap’an ni rung’ag fa bin som’on e pumoon ni Adam fithingan e pi thin ney, me nang e n’en nra yib i m’ug ngak. Kan ngongliy ko but’ ma ra sul ko but’. Ra yim’ e bochan nde fol rok e Ani Sunmiy, ni Jehovah Got.​—Genesis 2:7, 15-17; 3:17-19.

Be dag e Bible nni ngongliy e girdi’ ko but’. Maku be gaar: “En nra denen e aram e cha’ ni nge yim’.” (Ezekiel 18:4; Psalm 103:14) Yam’ e ke gafgownag bokum million e girdi’ ma boor yay ni ke sum e deer ko mang e ngan rin’ ko dogur.

Rogon ni Kan Rin’ Kakrom nge Rogon ni Yibe Rin’ e Ngiyal’ Ney

Mang e rin’ e girdi’ rok Got kakrom ko dogur? U tobolngin e Bible, be weliy boch e kanawo’ ni kan rin’ ko yam’, nib muun ngay rogon ni kan k’eyag nga fithik’ e but’. (Genesis 35:8) Kan keyag Abraham nge Sarah ni ppin rok, nge Isak ni fak, nge tongin ni Jakob u lan fare yiy u Makpelah. (Genesis 23:2, 19; 25:9; 49:30, 31; 50:13) Gideon nge Samson ni yow e tapuf oloboch nu Israel e kan ‘chibgiliyrow nga lan e re low ni baaram nni yan ni chibgiliy Joash ni chitamangirow ngay.’ (Judges 8:32; 16:31) Re n’ey e be dag ni girdi’ rok Got kakrom e baadag ni ngan keyag girdien e tabinaw u taabang. Faani yim’ Jesus Kristus u nap’an e bin som’on e chibog C.E., kan tay dowef rok nga lan e birok e low ndawori n’uw nap’an nni ker nga fithik’ e war u taban e rech. (Matthew 27:57-60) Ere baga’ ni kan keyag e dogur nga but’ ara kan chibgiliy nga lan e yiy. Ka yibe rin’ e re n’ey u yu yang u fayleng e ngiyal’ ney.

Machane u yu yang e fayleng e de gaman e gin ngan k’eyag e yam’ riy ma ba tolang puluwon e but’ ere mmo’maw’ ni nge gaman e teliw. Ere be lemnag boch e girdi’ rogon yugu reb e kanawo’ ni ngar chibgiliyed e yam’.

Ba yoor yang u fayleng ni yibe urfiy e yam’ min wereg e awat riy. Gonap’an 40 percent ko yam’ u England ni yibe rin’ ni aram rogon. U Sweden, gonap’an 80 percent e yam’ ni yibe urfiy, ma bay boch e gerger ni kan dugliy ni fan ni ngan wereg e awat ngay. Maku u Shanghai nge boch e mach u China, ma fl’eg e am ko mach rogon ni ngan wereg e awat nga maday ni in yay u reb e duw.

Uw e rayog ni ngan wereg e awat ngay? Dabiyog ni ngan wereg nga gubin yang. Ya be rus e girdi’ nrayog ni nge kirebnag e awat e girdi’ nge but’. Machane, ba riyul’ ni dariy e riya’ riy ni nge wer e liliy iyan ni faanra kan urfiy e yam’. Bay boch e teliw u England nge boch e park u Meriken ni kan dugliy bang riy ni bay e pan ara floras riy nrayog ni ngan wereg e awat ngay. Machane, piin ni Kristiano e yad baadag ni ngar lemnaged ko mang e be yog e Bible u morngaagen ni ngan urfiy e yam’ min wereg e awat.

Mang e Be Yog e Bible?

Nap’an ni pufthinnag Isaiah “fare pilung nu Babylon,” ma i gaar: “Kan n’agem ni dariy ba yang ni ngan keyagem riy.” (Isaiah 14:4, 19) Susun ni ngan taarebnag ko wereg e awat e pi thin ney ni nge tamranag fare pilung? Danga’, ya de weliy morngaagen e yam’ ni kan urfiy min ayuweg e awat riy ara rogon ni ngan wereg.

I yog Jesus u morngaagen e fas ko yam’ u fayleng nra buch u nap’an e Gagiyeg Rok ko Fare Biyu’ e Duw faani gaar: “Gubin e yam’ ni bay u lan e low ni bayi rung’ag lama[g] mi yad yib u lan e low rorad nga wuru’.” (John 5:28, 29) Machane de t’uf e teliw ni ngan faseg e yam’ riy ya bay boch e thin ko profet ni be dag e re n’ey. Be weliy Revelation 20:13 ni gaar: “Ma aram me pi’ e day e pi yam’ ni ba’ riy. Ma yam’ nge gin ni ma par e piin ni kar m’ad riy [hades] e kur piew e yam’ ni ba’ rorow.” Ere, n’en ni baga’ fan riy e gathi gin ni kan keyag be’ riy ara rogon nra ‘sul be’ ko but’.’ Machane n’en ni baga’fan riy e faanra felan’ Got ngay ma ra faseg ko yam’. (Job 14:13-15; mu taarebnag ko Luke 23:42, 43.) Dabi siy nde t’uf e teliw nib fel’ usun ni nge dabi pag Got talin e girdi’ riy. Faanra kan urfiy e yam’ ma dabi taleg Got ni nge faseg. Ma faan ran wereg e awat nga bang ni bpuluw e lem riy ma de sor fan e gumeyag ko pi yurba’ i teliw ni googsur, ma aram e bpuluw ko thin nu Bible.

Piin ni yad ra wereg e awat e thingar ra tedan’rad ko motochiyel ko nam. Maku bpuluw ni ngar lemnaged e lem ko tabinaw ko fare yam’ nge yugu boch e girdi’. Pi tapigpig rok Jehovah ni yad ra rin’ e re n’ey e thingar ra ayuwgad nga rogon ni ngar rin’ed ya daburad ni ngar kirebnaged e ngochol nib fel’ ni ke ngongliy e pi Kristiano. Ri baga’ fan e re n’ey ko pi nam ni be pag e motochiyel ko nam nrayog ni ngan urfiy e yam’ min wereg e awat machane dawori mecham e girdi’ ko binaw ngay. Dabi siy nra par e Kristiano nib orel ko yalen ni ba m’ag ko fare machib ni dabki yim’ e yaal.

Puf Rogoy ni De T’uf ni Ngan Gum’eyag Nga Teliw!

Girdi’ ni ma mon’ognag i wereg e awat e yad ma yog ni ke puf rogoy riy ya de t’uf ni ngan keyag e yam’ u lan e low ko yam’. Machane, ra yib e falfalan’ ko ngiyal’ nra lebug e thin ni kan micheg ni “bin th’abi tomur e toogor ni nge gel ngak e yam’.”​—1 Korinth 15:24-28.

Ere bayi m’ay e low ko yam’, teliw, nge mus ni ngan urfiy e yam’ min wereg e awat. Arrogon, ra m’ay e yam’. Ke tay Got nga laniyan’ apostal John ni nge yoloy ni gaar: “Mu gu rung’ag ba lam ni baga’ ni be non u tagil’ Got ni be gaar: ‘Chiney e keb i par tafen Got nga fithik’ e girdi’! Bayi par rorad, ma bay ra manged girdien. Mi Got e bay i par rorad, mi ir e bayi mang Got rorad. Ma bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith.’”​—Revelation 21:3, 4.

Ra lebug e pi n’en ney ko ngiyal’ nra chuweg e Gagiyeg rok Got e girdi’ ko yam’ ni i sum ko denen rok Adam. Aram e ngiyal’ ni dabki sul e girdi’ ko but’.

[Sasing ko page 31]

Yibe wereg e awat u Sagami Bay, Japan

[Credit Line]

Courtesy of Koueisha, Tokyo