Rogon Feni Ga’ Fan Fithingan Jehovah u Wan’ Jesus

1-2. (a) Mang e rin’ Jesus ko fare nep’ u m’on ni nge yim’? (b) Mang deer e gad ra weliy e fulweg riy ko re article ney?

KE N’UW e nep’ ko rofen ni Aningeg Fen e Maruwel ko Nisan 14 ko duw ni 33 C.E., ma yibe n’en ni ngan yognag Jesus, min pufthinnag, min dugliy nib kireb e rok, min gafgownag, ngemu’ min li’ nge yim’. Ka fin nra mu’gad e pi apostal rok ni yad ba yul’yul’ i tay reb e abich nib ga’ fan ko thal ni nga lang u reb e naun. Tomuren e re abich nem me yog Jesus boch e thin ngorad nra pi’ e athamgil nga lanin’rad. Ma de n’uw nap’an u m’on nra chuwgad u rom, me pi’ Jesus ba meybil nrib ga’ fan. I yoloy apostal John e re meybil ney ko John ko guruy ni 17.

² Mang e be dag e re meybil rok Jesus nem ngodad u murung’agen e n’en ni i lemnag e ngiyal’ nem? Uw rogon ni be tamilangnag e re meybil nem e n’en nib ga’ fan u wan’ u nap’an ni immoy u fayleng? Ngad weliyed e fulweg ko gal deer ney.

“KUG WELIY FITHINGAM NGORAD KAR NANGED”

3. Mang e yog Jesus u murung’agen fithingan Jehovah, ma mang e be yip’ fan? (John 17:​6, 26)

³ I yog Jesus u lan e meybil rok ni gaar: “Kug weliy fithingam ngorad kar nanged.” Bin riyul’ riy e l’agruw yay ni yog ni ke weliy fithingan Jehovah ngak pi gachalpen kar nanged. (Mu beeg e John 17:​6, 26, NW.a) Mang e be yip’ fan e re n’ey ni yog? Gur, ke yog ngorad ba ngachal ndar nanged? Pi gachalpen Jesus e yad boch e Jew, ere yad manang fithingan Got ni aram Jehovah. Bokum biyu’ yay ni ke m’ug e re ngachal nem u lan e Pi Babyor ko Bible nni Yoloy Nsom’on ni Thin ni Hebrew. Ere gathi be fil Jesus fithingan Got ngorad, ya be fil ngorad ko ba miti mang Got Jehovah. Ke ayuwegrad Jesus ni ngar nanged Jehovah nib fel’ rogon, nib muun ngay e n’en nib m’agan’ ngay ni fan ko fayleng nge girdi’, nge n’en ke rin’, nge n’en bayi rin’, nge pi fel’ngin. Kemus ni yigoo Jesus e manang Jehovah nrib fel’ rogon.

4-5. (a) Uw rogon nrayog ni ngari ga’ fan fithingan be’ u wan’dad? Mu susunnag. (b) Uw rogon nri ga’ fan fithingan Jehovah u wan’ pi gachalpen Jesus?

⁴ Mu susunnag ni bay reb e piilal u lan e ulung rom nib togta ni ka nog David ngak. Ke yoor e duw ni kam nang e re walag nem. Machane me yan i reb e rran mag m’ar nib gel nib t’uf ni nge tafalaynagem reb e togta. Ere ni milnagem ko fare aspital ni ma maruwel riy ma ir e ayuweg e yafos rom. Chiney e ke gel feni t’uf David rom nga rogon ni immoy nib t’uf rom kafram, ma nap’an ni ga ra rung’ag fithingan ni kan pining ma ga ra lemnag e n’en ke rin’ ni fan ngom. Ere gathi kemus nra um tay David ni ir reb e piilal ni ga manang, ya ku ra um lemnag ni ir fare togta ni ayuweg e yafos rom.

⁵ Ku arrogon pi gachalpen Jesus ni yad manang fithingan Jehovah. Machane i gel feni ga’ fan e re ngachal nem u wan’rad ni bochan e machib ni i tay Jesus. Mang fan nrayog ni nga dogned e re n’ey? Bochan ni gubin ban’en ni i yog ma be rin’ ni i m’ug rarogon e Chitamangin riy. Ere yag ni nge ‘nang’ e pi apostal rok Jesus Jehovah nib fel’ rogon ni bochan e ur tedan’rad nga rogon ni i machibnag, ma yad be guy rogon e ngongol rok ko girdi’.​—John 14:9; 17:3.

“FITHINGAM, NI FARE NGACHAL NI KAM TUNGUY NGOG”

6. Mang e yip’ Jesus fan u nap’an ni yog ni ke tunguy Jehovah fithingan ngak? (John 17:​11, 12)

⁶ Nap’an ni meybil Jesus, me yibilay pi gachalpen ni gaar: “Mu yororiyrad nga gelngin fithingam, ni fare ngachal ni kam tunguy ngog.” (Mu beeg e John 17:​11, 12, BT.) Gur, re n’ey e be yip’ fan ni aram e chiney e ngaun pining Jehovah ngak Jesus, fa? Danga’. Mu tay fanam i yan riy nnap’an ni weliy Jesus murung’agen fare ngachal ni Jehovah, me gaar “fithingam.” Gathi kan tunguy fithingan Jehovah ngak Jesus. Ere mang e yip’ Jesus fan u nap’an ni yog ni kan tunguy fithingan Got ngak? Som’on e Jesus e ir owchen Jehovah nge Mitethin rok. I yib ni be fek fithingan e Chitamangin miki ngongliy e maang’ang ni be fanay e re ngachal nem. (John 5:​43, NW; 10:​25, NW) Maku reb e, fan fare ngachal ni Jesus e “Jehovah e Ir e Ma Thapegey.” Arrogon, bay rogon fithingan Got nga fithingan Jesus.

7. Mu susunnag rogon nrayog ni nge non Jesus ni pa’ Jehovah.

⁷ Ra ngam nang fan nrayog ni nge non Jesus ni pa’ Jehovah, ma ngam lemnag e re fanathin ni baaray. Rayog ni nge pi’ e pilung u reb e nam be’ ni nga i non ko girdi’ ni pa’. Ere nap’an nra non e cha’nem, ma taareb gelngin e thin ni ke yog ko thin rok fare pilung. Ku arrogon Jesus ni bay mat’awun ni nge non ni pa’ Jehovah ni bochan e ir e ke l’og.​—Matt. 21:9; Luke 13:35.

8. Uw rogon ni i “fek” Jesus fithingan Jehovah u m’on ni nge yib nga fayleng? (Exodus 23:​20, 21)

⁸ Be yog e Bible ni Jesus e ir “fare Thin” ni bochan e fanay Jehovah ni nge yog ko pi engel nge girdi’ e n’en baadag ni ngar nanged mar rin’ed. (John 1:​1-3) Dabisiy ni Jesus e ir fare engel ni pi’ Jehovah ni nge ayuweg piyu Israel u nap’an ni yad bay u daken e ted. Nap’an ni be yog Jehovah ngak piyu Israel ni ngar folgad ko re engel nem, me gaar ngorad: “Bochan ni be fek fithingag.”b (Mu beeg e Exodus 23:​20, 21, NW.) I “fek” Jesus fithingan Jehovah ni be yip’ fan ni ir owchen, ma ri ir e en ni i micheg ni gubin ban’en ni ma rin’ Jehovah nib puluw ma kub thothup.

“AH CHITAMAG, MU TA’ FAN FITHINGAM”

9. Uw feni ga’ fan fithingan Jehovah u wan’ Jesus? Mu tamilangnag.

⁹ Ka dawori yib Jesus nga fayleng ma rib ga’ fan fithingan Jehovah u wan’ ni bod rogon ni ka fin nda weliyed. Dariy e maruwar riy ni aram fan ni gubin ban’en ni i rin’ Jesus u nap’an ni immoy u fayleng ni bay rogon nga fithingan Jehovah! Nap’an ni ke chugur ni nge mus nap’an e machib ni i tay Jesus me gaar: “Ah Chitamag, mu ta’ fan fithingam!” Ka chingiyal’ nem me non e Chitamangin u tharmiy nib ga’ laman ni gaar: “Kug ta’ fan ma bay kug rin’ bayay.”​—John 12:28.

10-11. (a) Uw rogon ni i tay Jesus fan fithingan Jehovah? (Kum guy e sasing.) (b) Mang fan nib t’uf ni ngan thothupnag fithingan Jehovah min micheg nde riyul’ urngin ban’en ni ka nog nib togopuluw nga fithingan?

¹⁰ Ku arrogon Jesus ni i tayfan fithingan e Chitamangin. Ni uw rogon? Reb e kanawo’ ni i rin’ riy e aram e i weliy ko girdi’ murung’agen pi fel’ngin e Chitamangin nge pi n’en ke rin’. Machane ku bay ban’en ni i rin’. Ba t’uf ni nge micheg nib puluw urngin ban’en ni ke rin’ Jehovah mab thothup fithingan. I dag feni ga’ fan e re n’ey u nap’an ni fil ngak pi gachalpen fare kenggin e meybil ni gaar: “Chitamangimad ni ga bay u tharmiy: Ngan tay fan fithingam nib thothup.”​—Matt. 6:9.

¹¹ Mang fan nib t’uf ni ngan thothupnag fithingan Jehovah min micheg nde riyul’ urngin ban’en ni ka nog nib togopuluw nga fithingan? Bochan ni darifannag Satan ni Moonyan’ Jehovah Got miki t’ar e thin nga daken u lan fare milay’ nu Eden. I yog Satan ni Jehovah e ba malulfith l’igin ma bay ban’en nib fel’ nder pi’ ngak Adam nge Efa. (Gen. 3:​1-5) Ki yog nde puluw rogon ni ma rin’ Jehovah ban’en. Bochan e ban ni tay Satan, ma aram me kirebnag thin ara fithingan Jehovah. Boch nga tomuren u nap’an Job, me yog Satan ni piin yad be pigpig ngak Jehovah e kemus ni yad be rin’ e re n’ey ni bochan e n’en be pi’ riy ngorad. Ki yog nra tal e girdi’ ndab kur pigpiggad ngak Jehovah u nap’an ni yad ra mada’nag e magawon ni bochan e gathi riyul’ nib t’uf Jehovah rorad. (Job 1:​9-11; 2:4) Ere ba t’uf ba ngiyal’ ni nge m’ug e mich riy ko Jehovah e ir e be ban fa Satan.

“DAB GU SIYEG NI NGGU PI’ E POGOFAN ROG”

12. Mang e ba m’agan’ Jesus ngay ni nge rin’ ni bochan e ba t’uf fithingan Jehovah rok?

¹² Bochan nib t’uf Jehovah rok Jesus, ma baadag ni nge rin’ urngin e tin nrayog rok ni nge thothupnag fithingan Jehovah me micheg nde riyul’ urngin ban’en ni ka nog nib togopuluw nga fithingan. Kub m’agan’ Jesus ngay ni nge yim’ ni nge micheg nib thothup Jehovah mab puluw rogon ni ma rin’ ban’en.c (John 10:​17, 18) Gal nsom’on e girdi’ ni yow ba flont ni aram Adam nge Efa e dakur folgow rok Jehovah mi yow mang ngak Satan. Machane Jesus e ba m’agan’ ngay ni nge yib nga fayleng me micheg nib t’uf Jehovah rok. I rin’ e re n’ey ni aram e i par nib yul’yul’ u n’umngin nap’an e yafos rok. (Heb. 4:15; 5:​7-10) I par nib yul’yul’ u n’umngin nap’an e yafos rok nge mada’ ko ngiyal’ ni yim’ u daken fare ley i gek’iy nib gel e amith ko yam’ ni tay. (Heb. 12:2) Aray rogon ni micheg nib t’uf Jehovah nge fithingan rok.

13. Mang fan ni Jesus e ir e th’abi fel’ ni nge micheg ni Satan e ba malulfith l’igin? (Kum guy e sasing.)

¹³ Gubin ban’en ni i rin’ Jesus ni micheg riy ni Satan e ba malulfith l’igin, ma gathi Jehovah! (John 8:44) Dariy be’ ni manang Jehovah nib fel’ rogon nge migid Jesus. Faan gomanga bay ban’en ni yog Satan nib togopuluw ngak Jehovah nib riyul’, ma ra nang Jesus. Machane i dugliy Jesus u wan’ ni nge ayuweg thin ara fithingan Jehovah. Mus ko ngiyal’ ndaki yororiy Jehovah ndabi buch ban’en rok, miki m’agan’ ngay ni nge yim’ ko bin nge dabki yul’yul’ ngak e Chitamangin.​—Matt. 27:46.d

“KUG MU’NAG E MARUWEL NI MPI’ NGOG NI NGGU RIN’”

14. Uw rogon ni tow’athnag Jehovah Jesus ko yul’yul’ ni i tay?

¹⁴ Nap’an ni meybil Jesus ko fare nep’ u m’on ni nge yim’, ma rayog ni nge gaar: “Kug mu’nag e maruwel ni mpi’ ngog ni nggu rin’.” Ba pagan’ ngay nra tow’athnag Jehovah ko yul’yul’ ni i tay. (John 17:​4, 5) Mab puluw e n’en ni rin’ ni i pagan’ ngak e Chitamangin. De pag Jehovah ni nge par u lan e low ko yam’. (Acts 2:​23, 24) I faseg ko yam’ me pi’ reb e liw nib tolang ngak u tharmiy. (Fil. 2:​8, 9) Munmun me tabab ko gagiyeg ni ir e Pilung u Gil’ilungun Got. Mang e ra rin’ Gil’ilungun Got? I pi’ Jesus e fulweg riy u nap’an ni fil ngak pi gachalpen ni ngar meybilgad ni nge lungurad: “Ma ga par ni gur e ga be gagiyegnagmad, min rin’ e tin nib m’agan’um ngay [Jehovah] u roy u but’ ni bod rogon ni yibe rin’ u tharmiy.”​—Matt. 6:10.

15. Mang e ku ra rin’ Jesus?

¹⁵ Dabki n’uw nap’an ma ra cham Jesus ko pi toogor rok Got me thang e piin nib kireb u nap’an e Armageddon. (Rev. 16:​14, 16; 19:​11-16) Dabi n’uw nap’an nga tomuren, ma ra yon’ Satan nga lan “fare low nib toar” min kalbusnag u rom ndakuriy ban’en nrayog ni nge rin’. (Rev. 20:​1-3) Ra sulweg Jesus e gapas nga fayleng me ayuweg e girdi’ ni ngar flontgad bayay u nap’an e Gagiyeg Nra Tay u Lan Fare Biyu’ i Duw. Ra faseg e yam’. Ma ra paradisnag e fayleng ni ga’ngin. Ra lebug e n’en nib m’agan’ Jehovah ngay!​—Rev. 21:​1-4.

16. Mang e ra buch u tungun fare Biyu’ i Duw Nra Gagiyeg Jesus riy?

¹⁶ Mang e ra buch u tungun fare Biyu’ i Duw Nra Gagiyeg Jesus riy? Ngiyal’ nem e ke chuw e denen ko girdi’ ma kar flontgad bayay. Ngiyal’ nem e daki t’uf ni nga i wenig e girdi’ ni ngan n’ag fan e denen rorad u daken fare biyul, maku daki t’uf be’ ni nge mang ta maaf rorad ara piin ngar manged prist. Ma “bin th’abi tomur e toogor ni [kan] gel ngak e yam’ [ni ke af rok Adam].” Ngiyal’ nem e goo kan faseg gubin e yam’. Ma gubin e girdi’ u fayleng ni kar flontgad.​—1 Kor. 15:​25, 26.

17-18. (a) Mang e ra buch u tungun fare Biyu’ i Duw Nra Gagiyeg Jesus riy? (b) Mang e ra rin’ Jesus u nap’an nra mus nap’an e gagiyeg rok? (1 Korinth 15:​24, 28) (Kum guy e sasing.)

¹⁷ Ku mang e ra buch u tungun fare Biyu’ i Duw Nra Gagiyeg Jesus riy? Ngiyal’ nem e ra buch ban’en nrib manigil. Dakuriy be’ nra maruwar u wan’ ba ngiyal’ ni Jehovah e ir reb e Got nib thothup mab mat’aw. Mang fan? I yog Satan u lan fare milay’ nu Eden ni Jehovah e ba malulfith l’igin ma der gagiyegnag e girdi’ u fithik’ e t’ufeg. Ka aram nap’an i yib ke mada’ ko chiney ni yugu be micheg e piin yad be pigpig ngak ni tirok e kanawo’ e aram e tin th’abi fel’. Ere nap’an nra taw nga tungun fare Biyu’ i Duw Nra Gagiyeg Jesus riy ma ri yira micheg nib puluw urngin ban’en ni ke rin’ Jehovah. Ngiyal’ nem e kki micheg ni ir e Chitamangidad ni bay u tharmiy ni gad ba t’uf rok.

¹⁸ Ra taw ko ngiyal’ nem ma ke gagiyel nde riyul’ gubin ban’en ni ke yog Satan u murung’agen Jehovah. Mang e ra rin’ Jesus u nap’an nra mus nap’an e gagiyeg rok? Gur, ra rin’ e n’en ni rin’ Satan me togopuluw ngak Jehovah, fa? Danga’! (Mu beeg e 1 Korinth 15:​24, 28.) Ra sulweg Jesus Gil’ilungun Got ngak e Chitamangin. Ku ra fol ko gagiyeg rok Jehovah. Arrogon, ba thil Jesus ngak Satan ya ba m’agan’ ngay ni nge sulweg urngin ban’en ngak Jehovah ni bochan e ba t’uf rok.

19. Uw rogon fithingan Jehovah u wan’ Jesus?

¹⁹ Aram fan nib m’agan’ Jehovah ngay ni nge tunguy fithingan ngak Jesus! Rib fel’ rogon ni ke dag Jesus rarogon e Chitamangin. Ere uw rogon fithingan Jehovah u wan’ Jesus? Dariy ban’en nib ga’ fan u wan’ nge migid. I m’agan’ ngay ni nge yim’ ni fan ko re ngachal nem, maku ra m’agan’ ngay ni nge sulweg urngin ban’en ngak Jehovah u tungun fare Biyu’ i Duw ko Gagiyeg Nra Tay. Ere uw rogon nrayog ni ngad folwokgad ko n’en ni rin’ Jesus? Gad ra weliy e fulweg ko re deer ney ko bin migid e article.