Rogon Nsusun e Nge Ga’ Fan Fithingan Jehovah u Wan’dad

1-2. Uw rogon ni kad nanged nib ga’ fan fithingan Jehovah u wan’ Jesus?

RIB ga’ fan fithingan Jehovah u wan’ Jesus. Dariy be’ ni ke weliy fithingan Jehovah ni ngan nang ni bod ni rin’ Jesus. Kad weliyed ko fa binem e article ni m’agan’ Jesus ngay ni nge yim’ ni nge micheg nib thothup Jehovah mab puluw rogon ni ma rin’ ban’en. (Mark 14:36; Heb. 10:​7-9) Ma tomuren fare Biyu’ i Duw Nra Gagiyeg Jesus riy, ma ra m’agan’ ngay ni nge sulweg urngin ban’en ngak Jehovah ni bochan e baadag ni ir e ngan pining e sorok ngak. (1 Kor. 15:​26-28) Gubin ban’en ni ke rin’ Jesus ni fan ngak Jehovah e be micheg nrib t’uf Jehovah rok.

² I yib Jesus nga fayleng ni be fek fithingan e Chitamangin. (John 5:43; 12:13) I weliy fithingan e Chitamangin ngak pi gachalpen ngar nanged. (John 17:​6, 26) Nap’an ni i fil ban’en ko girdi’ ma be ngongliy e maang’ang, me tamilangnag ni Jehovah e ir e be pi’ e gonop ngak nge gelngin ni nge rin’ e pi n’em. (John 10:25) Bin riyul’ riy e yog Jesus ngak Jehovah ni nge yororiy pi gachalpen “nga gelngin [fithingan].” (John 17:​11, BT) Ere faanra aram feni ga’ fan fithingan Jehovah u wan’ Jesus, me ere uw rogon nrayog ni nge yog be’ ni ir reb e tin riyul’ i gachalpen Kristus ni faanra de nang ara der ma fanay fithingan e Chitamangin?

3. Mang e gad ra weliy ko re article ney?

³ Gadad e piin Kristiano ni gad ma guy rogon ni ngad leked luwan ay Jesus e ba ga’ fan fithingan e Chitamangin u wan’dad. (1 Pet. 2:21) Gad ra weliy ko re article ney fan ni ke pi’ Jehovah fithingan ngak e piin yad ma machibnag fare ‘Thin Nib Fel’ ni murung’agen e gagiyeg rok.’ (Matt. 24:14) Ku gad ra weliy rogon nsusun e ngari ga’ fan fithingan Jehovah u wan’dad ni be’ nge be’.

“BOCH E GIRDI’ U FITHIK’RAD NI NGAUR FEKED FITHINGAN”

4. (a) Mang e yog Jesus ngak pi gachalpen ni ngar rin’ed u m’on ni nge sul nga tharmiy? (b) Mang deer e ke sum ni bochan e re n’ey?

⁴ De n’uw nap’an u m’on ni nge sul Jesus nga tharmiy me gaar ngak pi gachalpen: “Bay yib gelngimed ko ngiyal’ ni bay yib fare Kan ni Thothup riy nga dakenmed, ma aram mi gimed weliy murung’ageg u lan yu Jerusalem, ngu lan yu Judea ni polo’, ngu lan yu Samaria, nge yan i mada’ ko yungi n’en ni yan i mus e fayleng ngay.” (Acts 1:8) Ere ku yira machibnag fare thin nib fel’ ko pi binaw ni bay nga wuru’ yu Israel. Ra munmun me mab e kanawo’ ko girdi’ u gubin e nam ni ngar manged boch i gachalpen Jesus. (Matt. 28:​19, 20) Machane i gaar Jesus: “Gimed [ra] weliy murung’ageg.” Ere gur ra t’uf ni nge nang e pi girdi’ ney ni ka fin nra manged boch i gachalpen Jesus fithingan Jehovah, fa kemus ni ngaur weliyed murung’agen Jesus? Pi n’en ni buch ni bay murung’agen ko Acts ko guruy ni 15 e be ayuwegdad ni ngad nanged e fulweg ko re deer ney.

5. Uw rogon ni dag e pi apostal nge piin piilal u Jerusalem ni gubin e girdi’ nib t’uf ni ngar nanged fithingan Jehovah? (Kum guy e sasing.)

⁵ Nap’an e duw ni 49 C.E., me mada’ e pi apostal nge piin piilal u Jerusalem nga taabang ni ngar weliyed e n’en nib t’uf ni nge rin’ e piin gathi yad e Jew ndawor ni maad’adnagrad ya nge yag nra manged boch e Kristiano. Nap’an nra tawgad nga tungun e re muulung nem, me gaar James ni walagen Jesus: “Ka fini mu’ [Peter] i weliy rogon ni ke dag Got nib t’uf girdien e pi nam rok ni fan e nge fek boch e girdi’ u fithik’rad ni ngaur feked fithingan, ni aram e som’on riy.” Fithingan mini’ e be yog James? I sul u daken e thin ni yog Amos ni profet ni gaar: “Be gaar Jehovah: Ma aram e urngin e tin ka bay e girdi’ e bay ra uned ngak girdien gubin e pi nam ni yad be fek fithingag ngaur gayed Jehovah.” (Acts 15:​14-18, NW) Gathi kemus nra fil e pi cha’ney ni ka fin nra manged boch i gachalpen Jesus murung’agen Jehovah, ya ku ‘yad ra fek fithingan.’ Re n’ey e be yip’ fan nra ur weliyed fithingan Got ko girdi’, maku yad be fek e re ngachal ney.

6-7. (a) Mang fan ni yib Jesus nga fayleng? (b) Ku mang reb i fan ni yib nga fayleng ni kab ga’ fan ko biney?

⁶ Fan fare ngachal ni Jesus e “Jehovah e Ir e Ma Thapegey,” ma ir e fanay Jehovah ni nge ayuweg e yafos rok e piin yad ra maruweliy e michan’ rorad. I yib Jesus nga fayleng ni nge pi’ e yafos rok ni fan ko girdi’. (Matt. 20:28) Aray rogon ni bing e kanawo’ ko girdi’ ni ngan n’ag fan e denen rorad me yag e yafos ni manemus ngorad.​—John 3:16.

⁷ Machane mang fan nib t’uf ni ngan ayuweg e yafos ko girdi’? Bochan e n’en ni buch u lan fare milay’ nu Eden. Kad filed ko fa binem e article ni gal nsom’on e ga’ rodad ni aram Adam nge Efa e ra togopuluwgow ngak Jehovah, me mul e athap ko yafos ni manemus u pa’row. (Gen. 3:​6, 24) Machane ku bay ban’en nib l’ag rogon ko re n’ey ni kab ga’ fan nga rogon ni nge yag e yafos ko girdi’ ni tadenen. Ka nog boch ban’en nde riyul’ u murung’agen fithingan Jehovah. (Gen. 3:​4, 5) Ere rogon ni nge yag e yafos ngak pi fak Adam nge Efa e ba l’ag rogon nga ban’en ni kab ga’ fan ni aram e rogon ni ngan thothupnag fithingan Jehovah. Bochan ni i non Jesus ni pa’ Jehovah ma be fek fithingan, ma ir e en th’abi fel’ ni nge thothupnag fithingan Jehovah.

8. Mang e ba t’uf ni nge tamilang u wan’ gubin i gachalpen Jesus?

⁸ Gubin e piin yad ra dag nriyul’ nib mich Jesus u wan’rad, ni aram e pi Jew nge piin gathi yad e Jew e ba t’uf ni nge mich u wan’rad e En Nra Pi’ e yafos ngorad ni aram Jehovah Got ni Chitamangin Jesus. (John 17:3) Maku reb e, ra un pining fithingan Jehovah ngorad ni bod Jesus. Ku ra t’uf ni ngar nanged feni ga’ fan ni ngar thothupnaged e re ngachal nem, ya bay rogon ko yafos ni manemus nra yag ngorad. (Acts 2:​21, 22) Ere gubin i gachalpen Jesus nib t’uf ni ngar filed murung’agen Jehovah nge Jesus. Aram fan ni mu’nag Jesus e meybil ni tay ko John ko guruy ni 17 u daken e pi thin ni baaray ni be gaar: “Kug weliy fithingam ngorad kar nanged ma bay kug rin’ i yan ni aray rogon, ni bochan e rogon ni gub t’uf rom e ngki yag ngorad, me yag ni gu par u fithik’rad.”​—John 17:​26, NW.

“GIMED E MICH ROG”

9. Uw rogon nrayog ni ngad daged nib ga’ fan fithingan Jehovah u wan’dad?

⁹ Ere urngin e piin nriyul’ ni yad boch i gachalpen Jesus e ba t’uf ni nge ga’ fan u wan’rad rogon ni ngar thothupnaged fithingan Jehovah. (Matt. 6:​9, 10) Thingari par fithingan Jehovah ni aram e re ngachal nth’abi ga’ fan u wan’rad. Re n’ey e ba muun ngay ni nge m’ug ko ngongol rorad. Ere uw rogon nrayog ni ngad uned i thothupnag fithingan Jehovah ara ngad micheged nde riyul’ urngin ban’en ni ke yog Satan nib togopuluw ko re ngachal nem?

10. Mang e kad beeged murung’agen ko Isaiah ko guruy ni 42 nge mada’ ko 44? (Isaiah 43:9; 44:​7-9) (Kum guy e sasing.)

¹⁰ Kan tamilangnag ko Isaiah ko guruy ni 42 nge mada’ ko 44 feni ga’ fan ni ngad thothupnaged fithingan Jehovah. U lan e pi guruy nem e yog Jehovah riy ko girdi’ ndarur liyorgad ngak ni ngar micheged nriyul’ e pi got rorad. Ki yog ni nge yib boch e girdi’ ni ngar micheged e re n’ey ni bod e n’en yima rin’ u tagil’ e puf oloboch. Machane dariy be’ ni yag rok ni nge micheg e re n’ey!​—Mu beeg e Isaiah 43:9; 44:​7-9.

11. Mang e be yog Jehovah ko girdi’ rok ko Isaiah 43:​10-13?

¹¹ Mu beeg e Isaiah 43:​10-13. I weliy Jehovah murung’agen e girdi’ rok ni gaar: “Gimed e mich rog. I gag e Got.” Be yog Jehovah ngorad ni ngar pied e fulweg ko re deer ni baaray ni be gaar: “Gur ba’ yugu reb e Got nga bang?” (Isa. 44:8) Gad ba tow’ath nrayog ni ngad pied e fulweg ko re deer ney. Gad ma micheg u daken e thin nge ngongol rodad ni kemus ni yigoo Jehovah e ir e bin riyul’ e Got. Birok e ngachal e ir e th’abi tolang u fithik’ gubin e ngachal. Gad ma micheg u daken e pi n’en gad ma rin’ u lan e yafos rodad nriyul’ nib t’uf Jehovah rodad ma gad ba yul’yul’ ngak ni yugu demtrug e re miti magawon nra fek Satan i yib ngodad. Aray rogon nrayog ni ngad uned i thothupnag fithingan Jehovah.

12. Uw rogon ni lebug fare yiiy ni bay ko Isaiah 40:​3, 5?

¹² Nap’an ni gad ra thothupnag fithingan Jehovah ara da micheged nde riyul’ urngin ban’en ni ka nog nib togopuluw nga fithingan, ma aram e gad be folwok rok Jesus Kristus. Ki yiiynag Isaiah ni bay be’ nra ‘yon’ ba pa’ i kanawo’ u daken e ted ni fan ngak Somol!’ (Isa. 40:3) Uw rogon ni lebug e re n’ey? John ni Tataufe e ir e fal’eg rogon e kanawo’ ni fan ngak Jesus, ni ir e en ni yib ni be fek fithingan Jehovah maku be weliy murung’agen e re ngachal nem. (Matt. 3:3; Mark 1:​2-4; Luke 3:​3-6) Ku be gaar e re yiiy nem: “Nge yib i m’ug feni sorok Somol.” (Isa. 40:5) Uw rogon ni buch e re n’ey? Nap’an ni yib Jesus nga fayleng, ma rib fel’ rogon ni m’ug rarogon Jehovah rok ni gowa bod ni ke yib Jehovah nga fayleng.​—John 12:45.

13. Uw rogon nrayog ni ngad folwokgad rok Jesus?

¹³ Gadad e pi mich rok Jehovah ni bod Jesus. Gad ma fek fithingan Jehovah, ma gad ma weliy ko girdi’ murung’agen e pi n’en ke rin’ ni yira ngat ngay. Machane faanra ngad rin’ed e re n’ey nib fel’ rogon, ma thingar da weliyed ko girdi’ rogon ni i thothupnag Jesus fithingan Jehovah. (Acts 1:8) Jesus e ir e bin som’on e Mich rok Jehovah, ma gad ma folwok rok. (Rev. 1:5) Machane uw rogon ni ngad daged nrib ga’ fan fithingan Jehovah u wan’dad ni be’ nge be’?

ROGON FITHINGAN JEHOVAH U WAN’DAD

14. Uw rogon fithingan Jehovah u wan’dad nrogon ni kan tamilangnag ko Psalm 105:3?

¹⁴ Gad ba uf nga fithingan Jehovah. (Mu beeg e Psalm 105:3.a) Ri ma felfelan’ Jehovah u nap’an ni gad ra uf nga fithingan. (Jer. 9:​23, 24; 1 Kor. 1:31; 2 Kor. 10:17) Ra ngad ‘ufgad’ ngak Jehovah ma be yip’ fan ni ngad ufgad ngay ni ir e Got rodad. Ri gad ba felfelan’ ni ngad thothupnaged fithingan, ma gad micheg nib puluw urngin ban’en ni ke rin’. Thingar dab da tamra’gad ni nga dogned ngak e piin gad nga maruwel, nge skul, nge pi buguli yoror rodad, nge yugu boch e girdi’ ni gad boch e Pi Mich Rok Jehovah! Baadag Moonyan’ ni ngad talgad ndab kud weliyed murung’agen fithingan Jehovah ko girdi’. (Jer. 11:21; Rev. 12:17) Bin riyul’ riy e baadag Satan nge pi profet rok ni googsur ni nge pagtalin e girdi’ fithingan Jehovah. (Jer. 23:​26, 27) Machane bochan nib t’uf fithingan Jehovah rodad, ma aram fan ni gad be par ni gad ba felfelan’ ngay ni “polo’ e rran.”​—Ps. 5:11; 89:16.

15. Mang e be yip’ fan ni ngan pining fithingan Jehovah?

¹⁵ Gad be ulul ni ngad pininged fithingan Jehovah. (Joel 2:​32, NW; Rom. 10:​13, 14) Ra ngad pininged fithingan Jehovah ma gathi kemus ni ngad nanged fithingan Got mu u dogned. Ya kub t’uf ni ngad nanged rarogon, me pagan’dad ngak, mu ud sapgad ngak ni nge ayuwegdad ma be pow’iydad. (Ps. 20:7; 99:6; 116:4; 145:18) Ku gad ma weliy murung’agen fithingan nge pi fel’ngin ko girdi’, ma gad be pi’ e athamgil nga lanin’rad ni ngar kalgadngan’rad mar rin’ed boch ban’en ya nge yag nra fel’gad u wan’ Jehovah.​—Isa. 12:4; Acts 2:​21, 38.

16. Uw rogon nrayog ni ngad micheged ni Satan e ba malulfith l’igin?

¹⁶ Ba m’agan’dad ngay ni ngad gafgowgad ni fan nga fithingan Jehovah. (Jas. 5:​10, 11) Nap’an ni gad ra par ni gad ba yul’yul’ ngak Jehovah u nap’an ni gad be gafgow, ma aram e gad be micheg ni Satan e ba malulfith l’igin. Baaray e n’en ni yog Satan u murung’agen e piin yad ma pigpig ngak Jehovah u nap’an Job. I gaar: “Be’ nib girdi’ e ra pag urngin ban’en ni fan e nge ayuweg e pogofan rok.” (Job 2:4) I yog Satan nra pigpig e girdi’ ngak Jehovah ni faanra ba fel’ rogon e par rorad. Machane nap’an ni yad ra mada’nag e magawon, ma yad ra digey Jehovah. I micheg Job nde riyul’ e re thin ney. Ku arrogodad nrayog ni ngad micheged ndemtrug e re miti magawon nra fek Satan i yib ngodad, ma dariy ba ngiyal’ ni gad ra tal ko pigpig ngak Jehovah. Rayog ni ngari pagan’dad ngay nra ulul Jehovah ni nge yororiydad nga gelngin fithingan.​—John 17:11.

17. Ku mang reb e kanawo’ nrayog ni ngad n’ufed fithingan Jehovah riy nrogon ni be yog e 1 Peter 2:12?

¹⁷ Gad ma tayfan fithingan Jehovah. (Prov. 30:9; Jer. 7:​8-11) Bochan ni gad owchen Jehovah ma gad ma fek fithingan, ma aram fan nrayog ni ngad n’ufed e ngachal rok ara da darifannaged. (Mu beeg e 1 Peter 2:12.) Ere gad baadag ni ngad rin’ed urngin e tin nrayog rodad ni ngad n’ufed Jehovah u daken e thin nge ngongol rodad. Aray rogon ni ngad n’ufed fithingan ni yugu aram rogon ndawor da flontgad.

18. Ku mang reb e kanawo’ nrayog ni ngad micheged nib ga’ fan fithingan Jehovah u wan’dad? (Kum guy e footnote.)

¹⁸ Kab ga’ fan fithingan Jehovah u wan’dad ko bin nge fel’ thidad. (Ps. 138:2) Mang nrib ga’ fan e re n’ey? Bochan e rayog ni nge kireb thidad u wan’ e girdi’ ni bochan e ba t’uf fithingan Jehovah rodad.b Ba m’agan’ Jesus ngay ni nge yim’ nib gel e tamra’ ko yam’ nra tay ni bod be’ ni ke th’ab e motochiyel ya nge yag ni thothupnag fithingan Jehovah. ‘Daki tafinaynag e tamra’ nra tay’ ni aram e de magafan’ nib pag rogon ko n’en nra lemnag e girdi’ u rarogon. (Heb. 12:​2-4) N’en nib m’on u wan’ e aram e nge rin’ e n’en nib m’agan’ Got ngay.​—Matt. 26:39.

19. Uw rogon fithingan Jehovah u wan’um, ma mang fan?

¹⁹ Gad ba uf nga fithingan Jehovah, ma gad ba felfelan’ ni yima pining e Pi Mich Rok Jehovah ngodad. Bochan e re n’ey, ma aram fan ni gad ra ulul ni ngaud n’ufed ni yugu aram rogon ni be darifannagdad e girdi’. Kab ga’ fan fithingan Jehovah u wan’dad ko bin nge fel’ thidad. Ere ngad dugliyed u wan’dad ni ngad ululgad i n’uf fithingan Jehovah ni yugu demtrug e re miti magawon nra fek Satan i yib ngodad. Gad ra rin’ e re n’ey, ma aram e gad ra micheg ni fithingan Jehovah e aram e n’en th’abi ga’ fan u wan’dad ni bod ni rin’ Jesus Kristus.