Ngad Uned ko Maruwel ko Machib nge Mus Rogodad Riy

¹ I yog apostal Paul ko pi Kristiano ni nga ranod ko kanawo’ rok Got mar “athamgilgad boch.” (1 Thess. 4:1) Mang e ba l’ag ngay? Susun ni ngad gayed rogon ni nge yoor e n’en ni gad ma rin’ ko tirok Got ban’en, ma ngad athamgilgad ni ngad ‘ngongliyed urngin e maruwel ni kan pi’ ngodad nrogon e tapigpig rok Got.’​—2 Tim. 4:5.

² Mang e Be K’aringdad: Gad ma athamgil ni nge yoor e maruwel ni gad ma rin’ ko machib ya gad ba adag ni ngad pigpiggad ku Got nge mus rogon. Gad ba adag ni ngad ilalgad ko tirok Got ban’en ma gad salap ko machib. Gad ra ngongliy e tirok Got ban’en u gubin ngiyal’ uw rogon nib puluw ma aram e rayog ni ngad tawgad ko tin nib spiritual ni gad be nameg.​—Ps. 1:1, 2; Fil. 4:6; Heb. 10:24, 25.

³ Ba t’uf ni ngad paged fadad ni nge yoor e maruwel ko machib ni gad ma rin’. Rayog ni ngad paged fadad ni faanra gad ra fl’eg i lemnag e kanawo’ ni tay Jesus u fithik’ e meybil. (Matt. 20:28) I falfalan’ Jesus ko pigpig ko girdi’ u nap’an e machib ni tay. (Acts 20:35) Rayog ni ngad folwokgad rok Jesus ma ngad tedan’dad ko girdi’ ma ngad gayed rogon ni ngad rin’ed boor boch ban’en ko machib.​—Isa. 6:8.

⁴ Ayuw ni Pi’ e Pi Gallabthir: Nap’an ni kab bitir be’ ma rayog ni ngan ayuweg nge adag ni nge pigpig ko girdi’ ma nge maruweliy e maruwel nib elmirin. Pi bitir e ngar tayedan’rad ngak girdien e tabinaw rorad ni yad ba pasig ko machib. Bay reb e walag ni ba adag ni nge un ko machib nib elmirin ya nap’an ni kab pagal ma ke un ko tutuw rok ko tin nib spiritual ban’en. Ke guy e tutuw rok ni ba pasig ko machib mab falfalan’ ma kan k’aring ni nge pigpig ko pi walag. Chiney ir e ministerial servant.

⁵ Ba T’uf e Ayuw ko Pi Walag ni Pumoon: “Faanra ba adag be’ ni ngari mang reb e girdi’ ni ngi i tay murung’agen girdien e galesiya ma aram e ke nameg reb e maruwel ni ir e ba th’abi fel’.” (1 Tim. 3:1) Pi thin ney e ma pi’ e athamgil nga laniyan’ e pi walag ni ngar guyed rogon ni nge yoor e maruwel ni ngar rin’ed ko ulung rok Jehovah. De t’uf ni ngan cheg u ban’en fa ngan salap i rin’ ban’en. Reb e walag ni pumoon ni be athamgil ko machib e ra m’oneg Gil’ilungun Got ma ra pasig ko machib. (Matt. 6:33; 2 Tim. 4:5) Ra athamgil ni nge tay e kanawo’ nib fel’ ni fan ngak yugu boch e girdi’.

⁶ U Ga’ngin Yang e Fayleng: Be gurnag Jehovah e maruwel ko mokun girdi’. (Isa. 60:22) Ba t’uf ni urngin e piin ni be folwok rok Jesus ni ngar rin’ed nge mus rogon. Fare report ko machib ko 2006 ni fan ko fayleng ni polo’ e be yog ni 248,327 e girdi’ ni kar uned ko taufe. Aram 680 e girdi’ nib beech u gubin e rran! Nguud athamgilgad ni ngad maruwelgad nib elmirin.