Pi Walag nib Pumoon nib Fel’ Yangaren, Gimed Baadag ni Ngam Pied e Ayuw?
1. Mingiyal’ e ba t’uf ni nge fol reb e walag nib pumoon nib fel’ yangaren ko fare fonow ni bay ko 1 Timothy 3:1?
1 “Faanra ba adag be’ ni ngari mang reb e girdi’ ni ngi i tay murung’agen girdien e galesiya ma aram e ke nameg reb e maruwel ni ir e ba th’abi fel’.” (1 Tim. 3:1) Pi thin ney e be pi’ e athamgil nga laniyan’ e pi walag ni pumoon ni ngar athamgilgad ni nge yag ngorad boch e maruwel u lan e ulung. Thingar mu son mfin mu ilal boch, ma aram mag pi’ e ayuw? Bin riyul’ riy e bfel’ ni ngam tabab u nap’an ni ka gab pagel. Ireray kanawoen nrayog ni ngam fil boch ban’en riy, mag dag ni ke bung rogom ni ngan mel’egem ni ngam mang reb e ministerial servant u nap’an ni kam ilal boch. (1 Tim. 3:10) Faanra gur reb e walag nib pumoon, ma uw rogon nrayog ni ngam pi’ e ayuw u lan e ulung?
2. Uw rogon ni ngan maruweliy min dag ni yibe pag fay?
2 Ngan Pag Fay: Gubin e ngiyal’ nthingar mu nameg ni ngam ngongliy e maruwel nib fel’, ma gathi ngam guy rogon ni nge yag reb e liw ngom u lan e ulung. Ere, ngam nameg ni ngam adag ni ngam ayuweg e pi walag u lan e ulung. Reb e kanawo’ ni ngan rin’ e re n’ey riy e ngan fal’eg i lemnag e ngongol ni i dag Jesus. (Matt. 20:28; John 4:6, 7; 13:4, 5) Ngam meybil ngak Jehovah ni nge ayuwegem nge ga’ fan e girdi’ u wan’um. (1 Kor. 10:24) Gur, rayog ni ngam pi’ e ayuw ngak e pi walag u lan e ulung ni kar pilibthirgad ara ke yib e m’ar ngorad? Ga ma un i pi’ e ayuw ni ngan th’ab e pan, min rakenag e chubung nga taabang ara ka ga ma un i pi’ e ayuw u boch e maruwel ni yima rin’ ni fan ko Kingdom Hall? Rayog ni ngam ognagem ni ngam pi’ e ayuw ngak be’ u nap’an e Theocratic Ministry Skul ko birok e welthin, ya de moy ni nge pi’? Faan ga ra pag fam, ma rayog ni ngam felfelan’.—Acts 20:35.
3. Uw feni rib ga’ fan ni ngan gel ko tirok Got ban’en, ma uw rogon ni ngan maruweliy?
3 Bay Rogon ko Tirok Got Ban’en: Kub ga’ fan ni nge ilal reb e tapigpig rok Got ko tirok ban’en ko bin nge yag e salap ngak ara nge yoor ban’en nrayog ni nge rin’. Be’ nib chugur e tha’ u thilrow Jehovah e ma gay rogon ni nge lemnag ban’en ni bod rogon ni ma lemnag Jehovah nge Jesus. (1 Kor. 2:15, 16) Ma ma dag ni bay wom’engin gelngin Got nib thothup rok. (Gal. 5:22, 23) Maku ir be’ nib pasig ko machib ma ma m’oneg e tirok Got ban’en. (Matt. 6:33) Rayog ni ngam gel ko tirok Got ban’en nfaan ga ra tay e tayim ni ngam fil e thin rok ni yigoo gur nib fel’ rogon. Ma re n’ey e ba muun ngay ni ngam beeg e Bible rom ni gubin e rran, ma ngkum beeg e Wulyang ko Damit nge Awake!, mag fal’eg rogom ni fan ko muulung, mag un ngay. (Ps. 1:1, 2; Heb. 10:24, 25) Nap’an ni be pi’ Paul e athamgil nga laniyan’ Timothy ni nge mon’og ko tirok Got ban’en, me yoloy ni gaar: “Mu ayuwegem, ma ga ayuweg rogon ni ga be weliy murung’agen e thin rok Got ngak e girdi’.” (1 Tim. 4:15, 16) Ere, mu fal’eg rogom nfaanra bay e welthin rom ni ngam pi’ u nap’an e Theocratic Ministry Skul. Mu fal’eg rogom u m’on ni ngam un ko machib, mag athamgil ni ngaum rin’ ni gubin e ngiyal’. Mu nameg ni ngam maruwel nib gel ya nge yag ni ngam un ko pioneer, ngam un ko maruwel u Bethel ara mu un ko fare Skul ni Fan ko Pi Walag ni Pumoon ni Yad Ba Muchugbil. Ga ra gel ko tirok Got ban’en ma rayog ni ngam “tiyem u urel ko tin ni ma ar’arnag e piin ni pagel.”—2 Tim. 2:22.
4. Uw feni rib ga’ fan ni ngan pagan’uy ngom, mag par ni gab yul’yul’?
4 Ngan Pagan’uy Ngom mag Par ni Gab Yul’yul’: Bochan ni pi walag nib pumoon ko bin som’on e chibog e kan pi’ e maruwel ngorad ni ngar pied e ggan ngak e piin Kristiano nib t’uf e ayuw rorad e ka nog ni kan ‘mel’egrad’, mab tamilang ni rayog ni nge pagan’uy ngorad ma yad ba yul’yul’, ma aram fan nde magafan’ e pi apostal ya yad manang nrayog ni ngar rin’ed e maruwel rorad nib fel’ rogon. Bochan e re n’ey ma ke yag ni ngar tiyan’gad nga yugu boch e maruwel ni kub ga’ fan. (Acts 6:1-4) Ere, nap’an ni yira pi’ reb e maruwel ni ngam ngongliy u lan e ulung, mag rin’ nrogon nrayog rom. Ngam folwok rok Noah, ni fol u urngin ban’en ni ka nog ngak u rogon ni nge toy fare arke. (Gen. 6:22) Be’ nib yul’yul’ ma ke mon’og ko tirok Got ban’en e ba ga’ fan u wan’ Jehovah.—1 Kor. 4:2; mu guy fare thin ni kenggin e “Angin nra Yib ni Bochan ni Yibe Skulnagrad.”
5. Mang fan ni nge nameg e pi walag ni pumoon nib fel’ yangaren e maruwel u lan e ulung?
5 Rogon ni kan yiiynag e be gur Jehovah ni nge kunuy e girdi’ rok. (Isa. 60:22) Gubin e duw sogonap’an 250 milyon e girdi’ ni yibe taufenagrad. Bochan ni ke yoor e girdi’ ni yad be yib ko tin riyul’, ma aram fan ni ke t’uf e ayuw rok e pi walag nib pumoon ni kar mon’oggad ko tirok Got ban’en, ya nge yag ni ngar rin’ed boch e maruwel u lan e ulung. Ngiyal’ ney e boor e maruwel ni ngan rin’ ni fan ngak Jehovah. (1 Kor. 15:58) Pi walag nib pumoon nib fel’ yangaren, gimed be athamgil ni ngam pied e ayuw u lan e ulung, fa? Faanra arrogon ma gimed be nameg reb e maruwel ni ir e th’abi fel’.
[Blurb ko page 2]
Bochan ni ke yoor e girdi’ ni yad be yib ko tin riyul’, ma aram fan ni ke t’uf e ayuw rok e pi walag nib pumoon ni kar mon’oggad ko tirok Got ban’en, ya nge yag ni ngar rin’ed boch e maruwel u lan e ulung
[Kahol ko page 3]
Angin nra Yib ni Bochan ni Yibe Skulnagrad
Ma yib angin ngak e pi walag nib pumoon nib fel’ yangaren u nap’an nra pi’ e piin piilal e maruwel ngorad, min skulnagrad. U tomuren reb e muulung, ma ke par e circuit overseer ko gin ni yima pi’ e pi welthin riy ni be pi’ e athamgil nga laniyan’ reb e walag. Me changar me guy reb e pagel nib sak’iy nib chugur ko gin ni yow bay fare walag riy, ma aram me mith fare circuit overseer ngak fare pagel ko be son ni nge non ngak. Me yog fare pagel ni kan pi’ e maruwel ngak ni nge klinnag fa gin ni yima pi’ e welthin riy u tomuren gubin e muulung. Gallabthir rok fare pagel e kar fal’egew rogorow ni nga ranod, machane dabun fare pagel ni nge yan nfaanra dawori mu’nag fare maruwel ni kan pi’ ngak. Manang fare circuit overseer fan e n’en ni nge rin’ fare pagel, ma aram e ke m’agan’ ngay ni nge chuw. I yog fare circuit overseer ni gaar: “Piin piilal ko re ulung nem e ba ga’ ni yad ma skulnag e pi walag nib pumoon nib fel’ yangaren u daken e pi maruwel ni yima pi’ ngorad u lan e ulung. Ere ba ga’ ni ku yad ma mel’eg reb e walag nib fel’ yangaren ni nge mang reb e ministerial servant u nap’an nra Gu lekag e re ulung nem.”