Piin Pumoon, Mu Yunged Ban’en ni Fan nga Gelngin Got mi Gimed Nameg Boch e maruwel u Lan e Ulung

“Faanra yung be’ ban’en ni fan nga gelngin Got nib thothup, ma wom’engin nra yib riy ngak e yafas ndariy n’umngin nap’an.”​—GAL. 6:8, NW.

1, 2. (a) Uw rogon ni be lebug fare thin u Matthew 9:37, 38? (b) Mang e ba t’uf u lan e ulung rok Jehovah e ngiyal’ ney?

CHINEY e ga be guy boch ban’en ni be buch ndariy e ngiyal’ ni yira pagtalin! Fare maruwel ni yog Jesus ni ngan rin’ e yibe rin’ nib mus rogon. I yog Jesus ni gaar: “Woldug ni ngan kunuy ngan tay nga naun e ba ga’ ni ba ga’ yang, machane piin ni ngar maruweliyed nge thap nga naun e ba lich. Mu yibilgad ngak e en ni ir e suwon e re woldug nem ngki pi’ boch girdien e maruwel ngar maruweliyed e re woldug rok nem nge thap nga naun.” (Matt. 9:37, 38) Be fulweg Jehovah taban e meybil u reb e kanawo’ ni darud lemnaged nra fulweg riy. Nap’an e duw ni 2009 me mun 2,031 nga urngin e ulung ko Pi Mich Rok Jehovah u fayleng, ma chiney e ke gaman 105,298 u gubin. Ma sogonap’an 757 urngin e girdi’ ni yibe taufenag u gubin e rran!

² Ere bochan ni be mon’og e ulung rok Jehovah u fayleng, ma aram fan nib t’uf boch e walag ni pumoon ni ngar ayuweged e ulung. (Efe. 4:11) Nap’an fapi duw ni ke yan ma ke dugliy Jehovah boch e pumoon ni ngar ayuweged e girdi’ rok ko tin nib t’uf rorad, ma ba pagan’dad ndabi tal i ayuwegdad. Fare yiiy ni bay ko Mikah 5:5 e be tamilangnag ni nap’an e tin tomuren e rran ma ra moy boch e pumoon ni yad ra ayuweg e girdi’ rok Jehovah.

3. Mu weliy e n’en ni be yip’ fan ni ngan ‘yung ban’en ni fan nga gelngin Got nib thothup.’

³ Faanra gur reb e pumoon ni kam un ko taufe, ma mang e ra ayuwegem ni ngam adag ni ngam rin’ boch e maruwel u lan e ulung? Reb e ban’en nib ga’ fan e ngam ‘yung ban’en ni fan nga gelngin Got nib thothup.’ (Gal. 6:8) Re n’ey e ba muun ngay ni ngam pag gelngin Got nib thothup ni nge maruwel nib fel’ rogon u lan e yafas rom. Ere ngam dugliy u wan’um ndab mu ‘yung e tin nib kireb ni ga be ar’arnag.’ Dab mu pag e flaab nu fayleng, nge fafel, nge pi n’en ni yima chuweg e chalban ngay ni nge k’aringem ni nge dab kum adag ni ngam yoornag e n’en ni ga be rin’ ni fan ko pigpig ni ga be tay ngak Got. Gubin e Kristiano nthingar ra yunged ‘ban’en ni fan nga gelngin Got nib thothup,’ ma ra yan i taw nga nap’an ma pi walag ni pumoon ni yad ra rin’ e re n’ey e rayog ni nge mab e kanawo’ ngorad ni ngar rin’ed boch e maruwel u lan e ulung. Biney e thin e fan ngak e pi walag ni pumoon ni bochan e rib t’uf boch e walag ni pumoon ni ngar manged ministerial servant nge piilal u lan e ulung. Ere gimed e pi walag ni pumoon, e gamad be pi’ e athamgil nga lanin’med ni ngam fal’eged i lemnag e re thin ney.

Mu Nameg e Maruwel Nth’abi Fel’

4, 5. (a) Mang boch e maruwel ni yibe pi’ e athamgil nga laniyan’ e pi walag ni pumoon ni ngar nameged? (b) Uw rogon me yog ni nge rin’ be’ reb e pi maruwel ney?

⁴ Dabiyog ni nga yigi mang reb e walag ni pumoon e en ni ma yaliy boch e maruwel ni yima rin’ u lan e ulung, ya thingari nameg e re maruwel nem ni ir e “ba th’abi fel’.” (1 Tim. 3:1) Re n’ey e ba muun ngay ni ngan ayuweg e piin ni ke t’uf e ayuw rorad. (Mu beeg e Isaiah 32:1, 2.) Faanra ba puluw fan ni be nameg be’ boch e maruwel u lan e ulung ma aram e dabi k’aring ni nge lemnag boch ban’en ni ir e nge fel’ ngak, ya ra gay rogon ni nge rin’ boch ban’en nra fel’ rogon boch e girdi’ riy.

⁵ Rogon me yog ni nge mang be’ reb e ministerial servant ngemu’ me mang reb e piilal ni nga i yarmiy rogon ni yibe rin’ boch e maruwel u lan e ulung, e aram e nge rin’ e n’en ni bay u Bible nthingari rin’. (1 Tim. 3:1-10, 12, 13; Titus 1:5-9) Faanra gur reb e pumoon ni kam un ko taufe, ma ngam fithem ni nge lungum: ‘Gu be machib nib mus rogog riy, maku gu be pi’ e athamgil nga laniyan’ boch e walag ni ngar rin’ed ni aray rogon, fa? Gu ma lemnag e pi n’en nra pi’ e athamgil nga laniyan’ me fel’ rogon e piin taareb e michan’ romad riy, fa? Yi manangeg ni gag be’ ni gu ma tiyan’ug ko fol Bible, fa? Gu be gay rogon ni nge fel’ boch e fulweg ni gu ma pi’ u nap’an e muulung, fa? Gub pasig i rin’ e maruwel ni ke pi’ e piin piilal ngog, fa?’ (2 Tim. 4:5) Rib fel’ ni ngan fal’eg i lemnag e pi deer ney.

6. Mang e ba ga’ fan ni nge rin’ be’ ni faanra nge milfan boch e maruwel u lan e ulung ngak?

⁶ Reb e kanawo’ ni nge milfan boch e maruwel ngak reb e walag ni pumoon u lan e ulung e aram e nge ‘yib gelngin laniyan’’ u daken gelngin Got nib thothup. (Efe. 3:16) Danir ma towaliy be’ ni nge mang reb e ministerial servant ara reb e piilal u lan e ulung, ya rogon me yog e binem e maruwel ngak be’ e nge mon’og ko tirok Got ban’en. Ni uw rogon? Reb e kanawo’ e aram e nge pag gelngin Got nib thothup nge “mang ir e i gagiyegnag” pangin, me m’ug fel’ngin ko ngongol rok. (Gal. 5:16, 22, 23) Faanra m’ug ni bay e pi fel’ngin ney rok reb e walag ni kan pi’ boch e maruwel ngak, maku be fol ko fonow ni yibe pi’ ngak ma aram e rayog ni nge ‘guy e girdi’ ni gubin ni be mon’og i yan.’​—1 Tim. 4:15.

Ba T’uf ni Ngan Pag Fay

7. Mang e ba muun ko ngan ayuweg e ulung?

⁷ Piin ni yad ma ayuweg e ulung e ba t’uf ni ngar maruwelgad nib gel mar paged farad. Piin ni yad ma ayuweg e ulung e yad ma ayuweg e saf rok Got, ere aram fan nri yad ma lemnag rarogon e pi walag u lan e ulung nge magawon rorad. Mu tay fanam i yan u rogon e maruwel rok apostal Paul u wan’. I yog ngak e piin taareb e michan’ rorad u Korinth ni gaar: “Kug yoloy e babyor ngomed ni kari magafan’ug ngomed, ma kari kireban’ug ni be map’map’ e lu’ u owcheg, ni gathi fan e nggu kirebnag an’med, machane bochan e ngam nanged gelngin fanmed t’uf rog ni gimed gubin.” (2 Kor. 2:4) Ere rib tamilang nrib ga’ fan e maruwel rok Paul u wan’.

8, 9. Mu weliy e n’en ni rin’ boch e girdi’ u lan e Bible ni be dag rogon ni i ayuweg e piin pumoon e girdi’ rok Got kakrom.

⁸ Piin pumoon ni yad ma ayuweg e pi tapigpig rok Jehovah e ri yad ma pag farad. Bod rogon Noah nde gaar ngak chon e tabinaw rok: ‘Bayi m’ay i toy fare arke mi gimed yog ngog.’ Ma Moses e de yog ngak piyu Israel u Egypt ni gaar: ‘Bay da mada’gad nga tooben fare Day ni Row. Bay mu guyed rogon ngam thapgad e ngaram.’ Maku de yog Joshua ni gaar: ‘Bayi puth fare yoror nu Jeriko mi gimed yog ngog.’ Maku arrogon Isaiah nde yog ni gaar: ‘Baaram be’, am l’og!’​—Isa. 6:8.

⁹ Ma en nri pag gelngin Got nib thothup ni nge k’aring ni nge pag fan ir e aram Jesus Kristus. I m’agan’ ngay ni nge rin’ e maruwel ni ke pi’ Got ngak ni aram e nge Chuweg e girdi’ ko denen nge yam’. (John 3:16) Ere, gathi ra k’aringdad e re n’ey ni ngkud paged boch fadad? Reb e walag ni pumoon ni ke n’uw nap’an ni ke mang piilal e weliy rogon e ulung u wan’ ni gaar: “Fapi thin ni yog Jesus ngak Peter ni gaar, ‘Mu gafaliy e saf rog,’ e kari pug e tafinay rog. N’umngin nap’an ni kug mang piilal ma ri gu ma felfelan’ nga rogon ni kug guy be’ ni ke athamgil laniyan’ ni bochan e ka nog bbugithin ngak nib fel’ fa kan rin’ ban’en ni fan ngak. Reb e maruwel eray nri gu baadag.”​—John 21:16.

10. Mang e ra k’aring e pi walag ni pumoon ni ngar folwokgad rok Jesus ni ngar uned i ayuweg e ulung?

¹⁰ Pi walag ni pumoon ni yad ma ayuweg e tin ka bay e tapigpig rok Got e thingar ra boded Jesus ni faani gaar: “Mired ngog. . . . mu gu pi’ e toffan ngomed.” (Matt. 11:28) Michan’ nge t’ufeg ngak Got e ir e ma k’aring e pi walag ni pumoon ni ngar nameged e maruwel ni aray rogon ma dab ur lemnaged ni kaygi mo’maw’. Machane, uw rogon ni faanra der lemnag reb e walag ni pumoon ni nge nameg e biney e maruwel? Rayog ni nge gay rogon nge adag ni nge un i ayuweg e ulung, fa?

Mu Gay Rogon ni Ngam Adag ni Ngam Pigpig

11. Mang e ra ayuweg be’ ni nge adag ni nge un i ayuweg e ulung?

¹¹ Faanra damur nameg e pi maruwel ney ya bochan ni ga be lemnag ndabiyog rom, mab fel’ ni ngam meybil ngam ning gelngin Got nib thothup. (Luke 11:13) Gelngin Jehovah e ra ayuwegem ni nge dab ki magafan’um ko re n’ey. Jehovah e ir e ra ayuwegem ni ngam adag ni ngam nameg ni ngam pigpig ni aray rogon, ya gelngin Jehovah nib thothup e ir e k’aring reb e walag ni pumoon ni nge nameg boch e maruwel u lan e ulung me pi’ gelngin ni nge pigpig u polo’ i gum’irchaen. (Fil. 2:13; 4:13) Ere ba puluw ni ngam wenig ngak Jehovah ni nge ayuwegem ngam adag ni ngam rin’ boch e maruwel u lan e ulung.​—Mu beeg e Psalm 25:4, 5. 

12. Uw rogon me yog e gonop ngak be’ ni nge rin’ boch e maruwel ni kan pag fan ngak u lan e ulung?

¹² Rayog ni nge lemnag reb e walag ndabi nameg e maruwel ni ngan ayuweg e ulung ni bochan e be guy ni aram reb e maruwel nib mo’maw’. Fa reb e be lemnag ndariy e gonop rok nrayog ni ngan pag fan boch e maruwel ngak. Faanra aray e magawon, ma sana rayog ni nge gay rogon ngki tiyan’ boch ko fol Bible ni be tay miki beeg boch e pi babyor ni yibe ngongliy ya nge yog ni ga’ e gonop rok. Rayog ni nge fith ir ni nge gaar, ‘Kug tay ba ngiyal’ ni nggu fil e Bible riy, ma gu ma yibilay e gonop, fa?’ James nreb i gachalpen Jesus e yoloy ni gaar: “Faanra dariy e gonop rok bigimed, ma nge wenignag ngak Got, ye ir e ra pi’ ngak; yi Got e ba gol ngak urngin e girdi’.” (Jas. 1:5) Ba mich u wan’um e re thin ney, fa? I fulweg Got taban e meybil rok Solomon, nge pi’ ngak e ‘gonop nge tamilangan’’ ni ir e ayuweg ni nge nang e tin nib fel’ ni nge rin’ u nap’an ni be pufthin. (1 Ki. 3:7-14) Riyul’, ya ba thil e n’en ni buch rok Solomon. Machane rayog ni nge pagan’dad nra pi’ Got e gonop ngak e piin ni kan pag fan boch e maruwel u lan e ulung ngorad ya nge yog nra ayuweged e saf rok Got nib fel’ rogon.​—Prov. 2:6.

13, 14. (a) Mu weliy rogon ni i gagiyegnag e ‘t’ufeg rok Kristus’ Paul? (b) Uw rogon nra ayuwegdad “gelngin fadad t’uf rok Kristus”?

¹³ Ku reb e ban’en nra ayuwegem ni ngam adag ni ngam un i ayuweg e ulung e aram e ngam fal’eg i lemnag gubin ban’en ni ke rin’ Jehovah nge Fak ni fan ngodad. Am lemnag fare thin u 2 Korinth 5:14, 15. (Mu beeg.) Uw rogon ni be gagiyegnagdad ‘gelngin fadad t’uf rok Kristus’? Rib gel fadad t’uf rok Kristus ma aram fan ni pi’ e yafas rok ni fan ngodad. Ma faanra tamilang fan u wan’dad miki ga’ fan u wan’dad ma aram e ra k’aringdad ni ngad rin’ed e tin nib m’agan’ Jehovah ngay. T’ufeg rok Kristus e aram e n’en ni i gagiyegnag Paul. Maku aram e n’en ni ayuweg ni nge dabi rin’ ban’en ni ir e nge fel’ ngak, me pigpig ngak Got me ayuweg e girdi’ u lan e ulung nge wuru’.

¹⁴ Faan gad ra fal’eg i lemnag e t’ufeg rok Kristus ngak e girdi’, ma ra k’aringdad ni ngad pininged e magar. Ma angin e re n’ey e aram e ra ayuwegdad ni ngad nanged nde fel’ ni ngad ‘yunged e tin nib kireb ni gad be ar’arnag.’ Maku ra ayuwegdad ni nge dab ud nameged boch ban’en ni goo gadad e nge fel’ rogodad riy. Machane ngad thilyeged boch ban’en ko yafas rodad ya nge yog nda mon’eged e maruwel ni ke pi’ Got ngodad ni ngad rin’ed. Re t’ufeg ney e ku ra k’aringdad ni ngad ‘pigpiggad’ ngak pi walagdad u fithik’ e t’ufeg. (Mu beeg e Galatia 5:13.) Faan gad ra lemnag ni gadad bogi tapigpig ni gad be maruwel ni fan ngak e pi tapigpig rok Jehovah, ma aram e ra k’aringdad ni ngad ted farad. Arrogon, dubdad ni ngad boded Satan nib tagathibthib ma ma yaliy thibngin e girdi’.​—Rev. 12:10.

Thingari Pi’ e Tabinaw e Ayuw

15, 16. Mang e thingari rin’ chon e tabinaw ni faanra ngar ayuweged e en lolugen e tabinaw rorad ni nge mang ministerial servant ara piilal?

¹⁵ Faanra bay e ppin nge bitir rok reb e walag ni pumoon, ma u m’on ni nge nameg ni nge mang reb e piilal fa ministerial servant, ma thingari lemnag rarogon e tabinaw rok. Ya thin girdien e tabinaw rok nge rarogorad ko tirok Got ban’en e bay rogon ko maruwel rok u lan e ulung. Re n’ey e be dag feni ga’ fan ni nge rin’ chon e tabinaw e n’en nib milfan ngorad ya nge yog ni ngar ayuweged fare matam ni nge rin’ e n’en ni be nameg ni aram e nge mang reb e ministerial servant ara piilal.​—Mu beeg e 1 Timothy 3:4, 5, 12.

¹⁶ Ri ma felfelan’ Jehovah ni faanra chon e tabinaw e ngar ayuweged yad. (Efe. 3:14, 15) Faen lolugen e tabinaw e thingari yarmiy rogon ni nge rin’ e maruwel rok u lan e ulung miki ayuweg e tabinaw rok “nib fel’ rogon.” Ere rib ga’ fan ni ministerial servant ara piin piilal e ngar Filed e ppin nge bitir rorad e Bible u taabang u gubin e wik. Thingari un ngak e tabinaw rok ko machib ko ngiyal’ ni kar dugliyed. Ku aram reb i fan nthingari ayuweg chon e tabinaw faen lolugen e tabinaw ko n’en ni be rin’.

Ka Ga Ra Pigpig Bayay?

17, 18. (a) Faanra dabkiyog ni nge mang reb e walag ni pumoon reb e ministerial servant ara piilal, ma mang e sana ba t’uf ni nge rin’? (b) Mang e ba fel’ ni nge lemnag reb e walag ni immoy ni ir reb e piilal ara ministerial servant kafram?

¹⁷ Sana um moy ni gur reb e piilal ara ministerial servant kafram? Ba mudugil nib t’uf Jehovah rom maku arrogon ir ni ma lemnagem. (1 Pet. 5:6, 7) Ka nog ngom ni bay boch ban’en nib t’uf ni ngam thilyeg u rarogom, fa? Ngam dag ni kam oloboch mag gay rogon ni ngam thilyeg u daken e ayuw rok Got, ma dab mu damumuw. Mu gonop mu um sap nga fel’ngin ban’en. Bay reb e walag ni immoy ni ir reb e piilal kafram ni gaar: “Kug turguy u wan’ug ni nggu un ko muulung, nge machib, ma ngaug beeg e Bible rog ni bod rogon kafram. Kug fil rogon ni ngaug gum’an’ ni bochan e kug lemnag nrayog ni nggu sul nggu mang piilal u lan taareb ara l’agruw e duw, machane ri gu fek medlip e duw. Ku reb e ban’en ni ki ayuwegeg e athamgil ni kan pi’ nga lanin’ug ya nge dabi chalbag i rin’ e ngongol nib fel’, mu gu nameg boch e maruwel u lan e ulung.”

¹⁸ Faanra ke buch rom ni aray rogon, ma dabi mulan’um. Mu lemnag rogon ni be tow’athnagem Jehovah ko machib ni ga be tay nge rogon ni be tow’athnag e tabinaw rom. Mu ayuweg e tabinaw rom ngar gelgad ko tirok Got ban’en, mag nang salpen boch e walag ni ke m’ar, mag pi’ e athamgil nga laniyan’ e piin kar meewargad. Ma bin th’abi ga’ fan riy e nge ga’ fan u wan’um e tow’ath rom ni aram e ga be pining e sorok ngak Got ma ga be un i machibnag fare thin nib fel’ ni gur reb e Mich Rok Jehovah.a​—Ps. 145:1, 2; Isa. 43:10-12.

Mu Yaliy Rarogom Bayay

19, 20. (a) Mang e yibe pi’ e athamgil nga laniyan’ gubin e walag ni pumoon ni ngar rin’ed? (b) Mang e yira weliy ko bin migid e thin?

¹⁹ Chiney e kari t’uf boch e walag ni pumoon ni ngar ayuweged e ulung. Ere gimed e piin pumoon ni kam uned ko taufe, e gamad be pi’ e athamgil nga lanin’med ni ngkum fal’eged i yaliy rarogomed bayay, ma ra bigimed me fith ir, ‘Mang fan ni gathi gag reb e piilal ara ministerial servant?’ Mu paged gelngin Got nib thothup nge ayuwegmed nge yog nim nanged feni ga’ fan e re n’ey?

²⁰ Ra fel’ rogon e girdi’ u lan e ulung ko maruwel nib gel ni be tay e piin taareb e michan’ rorad. Ere faan gad ra un ko maruwel ni aray rogon, ma ri gad ra felfelan’. Machane, bin migid e thin e be yog ndab da rin’ed ban’en nib togopuluw nga rogon ni ma maruwel gelngin Got nib thothup. Uw rogon ndab da rin’ed e re n’em?

[Footnote]

Uw Rogon ni Ga Ra Fulweg?

• Mang e be micheg fare yiiy u Mikah 5:5 ngodad?

• Mu weliy ko mang e ba muun ko ngan pag fay?

• Mang e ra ayuweg be’ nge adag ni nge un i ayuweg e ulung?

• Mang e thingari rin’ chon e tabinaw ni faanra ngar ayuweged e en lolugen e tabinaw rorad ni nge mang ministerial servant ara piilal?

[Picture on page 25]

Mang e ga ra rin’ me yog nim un i rin’ boch e maruwel u lan e ulung?