Ngan Lubeg Fagali Maruwel Ko​—Matam Nge Piilal

“Ya faanra de nang be’ rogon ni nge gagiyegnag girdien e tabinaw rok, me ere uw rogon me yog ni nge ayuweg e galesiya rok Got?”​—1 TIMOTHY 3:5.

1, 2. (a) U lan e bin som’on e chibog, ma uw rogon e pigpig ni be tay e piin piilal ndar mabgolgad nge piin piilal nib mabgol ngak e pi walagrad? (b) Mang kanawo’ ni ke dag Aquila nge Priscilla ni nge fol e piin mabgol riy e ngiyal’ ney?

PIIN PIILAL u lan e bin som’on e ulung ko Kristiano e demtrug ko kar mabgolgad fa dar mabgolgad ma dariy e bitir rorad fa kar mabgolgad ma bay e bitir rorad. Ma dabi siy ni boch iyad e ur folgad ko n’en ni yog apostal Paul u lan e bin som’on e babyor ni yoloy ngak piyu Korinth ko guruy ni 7, ni be yog ni dabkun un ko mabgol. I gaar Jesus: “Boch e girdi’ e darir uned ko mabgol ni fan ko gagiyeg nu tharmiy.” (Matthew 19:12) Pi pumoon ni aram rogon ni bod Paul nge piin ni un ngak ko milekag, e ke puf rogorad ni ngar milekaggad iyan mar ayuweged e pi walagrad.

² De yog e Bible ni de mabgol chon Barnabas, nge Mark, nge Silas, nge Luke, nge Timothy, nge Titus. Faanra kar mabgolgad ma ke puf rogorad boch nrayog ni ngar uned ko milekag. (Acts 13:2; 15:39-41; 2 Korinth 8:16, 17; 2 Timothy 4:9-11; Titus 1:5) Ma sana ke un e piin leengirad ngorad ni bod Peter nge fa “tin ni ka ba’ e apostal,” ni ke un pi leengirad ngorad u nap’an ni ur milekaggad iyan. (1 Korinth 9:5) Aquila nge Priscilla e ba wu’ i mabgol ni ke m’agan’row ngay ni ngar lekew Paul nga Korinth ma ranod nga Efesus, nge mu’ min yan nga Roma, ma aram min sul nga Efesus biyay. De yog e Bible ni bay e bitir rorow. Bochan e pigpig ni ur tew ni fan ko pi walag ma aram min pining e magar ngorow ni “urngin e galesiya rok e piin ni gathi yad piyu Israel.” (Roma 16:3-5; Acts 18:2, 18; 2 Timothy 4:19) Ngiyal’ ney ma bay boor wu’ e mabgol ni yad bod Aquila nge Priscilla, ni rayog ni ngar pigpiggad ko boch e ulung ma sana rayog ni ngar pared u bang nib t’uf e ayuw riy.

Matam nge Piilal

3. Uw rogon ni gad manang ni boor e piilal u nap’an e bin som’on e chibog e kar mabgolgad ma bay pi fakrad?

³ Nap’an e bin som’on e chibog C.E., ma baga’ ni piin piilal ko Kristiano e kar mabgolgad ma bay e bitir rorad. Nap’an ni weliy Paul ko susun uw rogon be’ ni ba adag ni nge “mang reb e girdi’ ni ngi i tay morngaagen girdien e galesiya,” me yog ni thingari “yog rok ni gagiyegnag girdien e tabinaw rok nib fel’ rogon, me guy rogon e bitir rok ngar folgad rok mi yad ta’ fan.”​—1 Timothy 3:1, 4.

4. Mang e mmil fan ngak e piin piilal ni kar mabgolgad ma bay pi fakrad?

⁴ Kad filed ni be’ ni piilal ko ulung e demtrug ko bay e bitir rok fa dariy, maku demtrug ko ke mabgol fa danga’. Machane faanra ke mabgol ma ra nge mang reb e piilal ara ministerial servant, ma thingari gagiyegnag e an leengin u fithik’ e t’ufeg me dag ni rayog ni nge gagiyegnag e bitir rok nib fel’ rogon. (1 Korinth 11:3; 1 Timothy 3:12, 13) Faanra de yog ni nge ayuweg e tabinaw rok nib fel’ rogon ma aram e dabiyog ni nge un ko boch e maruwel nib taw’ath u lan e ulung. Mang fan? Weliy Paul ni gaar: “Faanra de nang be’ rogon ni nge gagiyegnag girdien e tabinaw rok, me ere uw rogon me yog ni nge ayuweg e galesiya rok Got?” (1 Timothy 3:5) Faanra piin girdien e tabinaw rok e dubrad ni ngar folgad rok ma uw rogon yugu boch e girdi’?

“Pi Fak e Dabi Siy nib Mich Kristus u Wan’rad”

5, 6. (a) Mang e yog Paul ngak Titus u morngaagen e bitir? (b) Mang e mmil fan ngak e pi piilal ni bay pi fakrad ni ngar rin’ed?

⁵ Nap’an ni yog Paul ku Titus ni nge dugliy e piin piilal ko pi ulung nu Crete me gaar: “En ni ir reb e piilal ko galesiya e dabi siy ni be’ nib yal’uw; ma dabi siy ni ri taareb e ppin rok, ma pi fak e dabi siy nib mich Kristus u wan’rad ma de kireb thirad ko yanyan ni yad be tay ara reb e darir folgad. Ya ke mil fan e maruwel rok Got ngak, aram fan ni cha’ ni ir e be yog e thin rok e galesiya e nge par nib yal’uw.” Mang fan e pi thin ni baaray ni “pi fak e dabi siy nib mich Kristus u wan’rad”?—Titus 1:6, 7.

⁶ Fare thin ni “pi fak e dabi siy nib mich Kristus u wan’rad” e ma sor fan ko piin fel’ yangarad ni kar ognaged yad ku Jehovah mar uned ko taufe fa piin fel’ yangarad ni yad be mon’og iyan ma yad be nameg ni ngar ognaged yad ku Got mar uned ko taufe. Girdien e ulung e ra adag ni ngar guyed ni pi fak e piin piilal e yad ba llowan’. Susun nge gagiyel ni be rin’ e piilal urngin ban’en rayog rok ni nge ubing pi fak nge gel e michan’ rorad. Yoloy Solomon ni Pilung ni gaar: “Mu fil ngak ba bitir rogon e ngongol ni ngi i tay, mi i par u wan’ u n’umngin nap’an e yafos rok.” (Proverbs 22:6) Machane ra diin nfaanra kan chuguliy reb e fel’ yangaren ni aram rogon ma ke dabuy ni nge pigpig ku Jehovah fa ke rin’ ban’en ni rib gel e kireb riy?

7. (a) Mang fan ni gad manang ni pi thin ko Proverbs 22:6 e gathi aram ba motochiyel ni kari mudugil? (b) Faanra dabi mel’eg reb e bitir ni fak reb e piilal ni nge pigpig ku Jehovah ma mang fan ni dabni chuweg e re piilal nem ko liw rok?

⁷ Pi thin nem ko Proverb e gathi ba motochiyel nib mudugil. Ya ra be’ ma ke puf rogon ko n’en nra rin’. (Deuteronomy 30:15, 16, 19) Ere nap’an nra ilal ba fak ni pumoon ara ppin ma mmil fan ngak ni nge turguy ko ra ognag ir ku Got me un ko taufe fa danga’. Faanra ke ayuweg e piilal fak ko tirok Got ban’en me pow’iy nrogon me fonownag machane de adag fak ni nge pigpig ku Jehovah ma aram e gathi dabkiyog ko chitamangin ni nge mang piilal ko ulung. Machane faanra pi fak e piilal e ka yad ba bitir ma yad be par u tabinaw ma boor iyad e ke m’ar ko tirok Got ban’en ma kar uned nga boch ban’en nib kireb, ma aram ma rayog ni ngan turguy ni dabkiyog ni ngan nog ni ir be’ ni be “gagiyegnag girdien e tabinaw rok nib fel’ rogon.” (1 Timothy 3:4) Ere susun rib tamilang ni be athamgil e en piilal ni nge mus rogon riy ni nge ayuweg pi fak nge ‘mich Kristus u wan’rad ma de kireb thirad ko yanyan ni yad be tay ara reb e darir folgad.’a

Ba’ “Leengin nde Mich Kristus u Wan’”

8. Susun uw rogon e ngongol ku be’ ni piilal ngak e an leengin ni de mich Kristus u wan’?

⁸ Ke yoloy Paul u morngaagen e pi Kristiano ni pumoon ni piin leengirad e de mich Kristus u wan’rad ni gaar: “Faanra ba be’ nib moon ni ir reb i girdien Kristus ni ba’ leengin nde mich Kristus u wan’, ma kab fel’ u wan’ fare ppin ni nguur parew ni yow mabgol, ma thingar dabi n’ag fare pumoon fare ppin . . . Ya. . . leengin nde mich Kristus u wan’ e ke yib rogorow Got ni bochan e an figirngin ni ir reb e walag; ya faanra dabi ara’ rogon, ma ra par fakrow nde biech, machane rogorad ni yad be par e chiney e yad ba thothup u p’eowchen Got. Ke diin ma kam mu nang i gur e cha’ ni kam mang girdien Kristus ma figirngiy gur ndabkiyog ni ngam thapeg leengim ngak Kristus?” (1 Korinth 7:12-14, 16) Fare thin ni baaray ni “de mich Kristus u wan’” e gathi ma sor fan ko an leengiy ni dariy e teliw ni be un ngay machane dawori ognag ir ku Jehovah. Ya sana ir be’ ni Jew fa ke mich u wan’ yugu boch e kan. Ngiyal’ ney ma sana bay boch e piilal ni an leengirad e ma un ko yugu reb e teliw fa dariy e teliw ni be un ngay fa de mich Got u wan’. Machane fel’ u wan’ ni nguur parew ni yow mabgol ma aram e dabiyog ni nge digey ni fan e ba thil e michan rorow. Ya thingari ‘par ko an leengin ma thingari nang nib meewar ko pumoon, ere thingari tay fan,’ ma be athapeg nra ayuweg nge thap ngak Got.​—1 Peter 3:7; Kolose 3:19.

9. U lan e pi binaw ni bay e motochiyel riy ni bay mat’awun e an figirngin nge an leengin ni ngar filew e machib ko teliw rorow ngak pi fakrow, ma susun mang e ra rin’ e piilal, ma ra uw rogon e liw rok u lan e ulung?

⁹ Be’ ni piilal ni ba’ pi fak e ra gagiyegnag e tabinaw rok nrogon ma ra “chuguliyed yad me llowan’nagrad nrogon, mi fonownagrad nrogon girdien Jehovah.” (Efesus 6:4) Boor e nam ni bay e motochiyel u rogon ni ba wu’ e mabgol e ngar machibnagew e bitir rorow ko teliw rorow. Faanra er rogon ma sana ra yog ko fa an leengiy ni bay mat’awun ni nge fil e machib ko teliw rok ngak pi fak, ma ra fekrad ko galesiya rok.b Ma aram ma pi bitir nem e susun ni ngar folgad ko Bible ma dabra uned ko pi n’en ni ma rin’ fare galesiya. Ma fa an matam ni ir lolugen e tabinaw e ra fil e Bible ngak pi fak ma ra fekrad ko pi muulung u lan e Kingdom Hall ko ngiyal’ nrayog. Ma nap’an ni kar ilalgad nrayog ni ngar turguyed e n’en ni yad ra rin’ ma aram mi yad turguy e kanawo’ rorad. (Joshua 24:15) Ma faanra guy e tin ni ka bay e piilal nge girdi’ ko ulung ni be rin’ e re piilal nem urngin ban’en nrayog rok nrogon e motochiyel ko nam ma be fil e thin riyul’ ko pi fak, ma aram ma dabni chuweg ko liw rok ni ir e piilal.

‘Be Gagiyegnag Girdien e Tabinaw Rok nib Fel’ Rogon’

10. Mang e n’en nth’abi ga’ fan ni nge rin’ be’ ni bay e tabinaw rok ma ku ir e piilal?

¹⁰ Mus ni be’ ni ir e piilal nge matam ma ppin rok e ir e Kristiano e ku de mom ni nge f’oth e maruwel nge tayim rok nrogon ni fan ko an leengin nge bitir rok, nge pi n’en nib mil fan ngak u lan e ulung. Ma tamilangnag e Bible ni ba matam ni Kristiano e thingari ayuweg e an leengin nge pi fakrow. Yoloy Paul ni gaar: “Faanra dabi ayuweg be’ e girdi’ rok, ni baga’ ni girdien e tabinaw rok, ma aram e ke n’ag rogon nib mich Got u wan’ ma kab gel e kireb rok ngak be’ ndawori mich Got u wan’.” (1 Timothy 5:8) U lan e re babyor nem e weliy Paul ni kari mus ni goo piin pumoon ni kar mabgolgad ni ke m’ug ni yad be ayuweg e piin leengirad nge pi fakrad nrogon e rayog ni ngan dugliyrad ngar manged piin piilal ko ulung.​—1 Timothy 3:1-5.

11. (a) Ku mang boch ban’en ni thingari “ayuweg e piilal girdien e tabinaw rok” riy? (b) Uw rogon nrayog ni nge fol e piilal ko re n’ey me ayuweg ni nge rin’ e tin nib mil fan ngak u lan e ulung?

¹¹ Rogon ni nge “ayuweg” e piilal e tabinaw rok e gathi ke mus ni goo fan ko chugum ya ku fan ko tirok Got ban’en nge ku fan nga laniyan’rad. Yoloy Solomon ni Pilung nib gonop ni gaar: “Ngam yarmiy urngin ban’en ni bay u wen ngam fl’eg rogon e binaw. Nge mu’ ma ga ubing e tabinaw rom.” (Proverbs 24:27) Ere be’ ni ir e piilal e thingari pi’ e tin nib t’uf ko dowef rok e an leengin nge pi fak , nge laniyan’rad nge rogon e fafel machane ku ra ubingrad ko tirok Got ban’en. Boor e tayim nib t’uf ni ngan rin’ e pi n’ey​—aram boch e tayim ni dabiyog ni nge pi’ ko ulung. Ma aram e tayim ni ra yib angin riy nib baga’ ya ra falfalan’ e tabinaw rok mi yad ilal ko tirok Got ban’en. Ma faani munmun ma ra gel e tabinaw rok ko tirok Got ban’en ma aram ma de t’uf ni nge pi’ fare piilal e tayim ni boor ni nge pithig e magawon rorad. Ma aram e ra puf rogon boch ni nge ayuweg e ulung. Ma bochan ni ir e an figirngiy nib fel’ nge chitamangiy nib fel’ ma ra m’ag ni nge ayuweg e ulung.​—1 Peter 5:1-3.

12. Mang ban’en ni susun ni nge rin’ e piin matam ni yad e piilal mar daged e kanawo’ nib fel’ ko yugu girdi’?

¹² Rogon ni ngan gagiyegnag e tabinaw nib fel’ rogon e ba muun ngay ni ngan tay e tayim ni ngan fil e Bible u taabang. Rib baga’ fan ko piin piilal ni ngar rin’ed e re n’ey ngar ted e kanawo’ ni un lek ya faanra ba gel e pi tabinaw ko tirok Got ban’en ma aram me gel e ulung. Susun ndabi par e piilal ni kari pag rogon ni be pigpig ko ulung ma aram e dariy e tayim rok ni nge fil e Bible ngak e an leengin nge pi fak. Faanra er rogon, ma susun ni nge fl’eg i yaliy e schedule rok. Sana ba t’uf ni nge thiliyeg e schedule rok fa nge lichnag e tayim ni be pi’ ko yugu boch ban’en, ni mus ni nge siyeg boch e maruwel nib taw’ath yu ngiyal’.

Nge Taareb Tomalngin e Maruwel

13, 14. Mang fonow ni pi’ “fare tapigpig nib yul’yul’ mab gonop” ngak e piin piilal ni bay chon e tabinaw roradd?

¹³ Gathi ereray e yay nsom’on ni yibe fonownag ni nga un thabthabelnag e maruwel ko tabinaw nge ulung. Ya u lan in e duw ni be pi’ “fare tapigpig nib yul’yul’ mab gonop” e fonow ko piin piilal ko re n’ey. (Matthew 24:45) Ke pag 37 e duw faram ni kan weliy u lan fare The Watchtower ko September 15, 1959, pages 553 and 554, ni gaar: “Rriyul’ ni urngin e pi n’ey ma ma sor fan ko ngan thabthabelnag urngin ban’en nib mil fan ngodad fa? Ma susun nge puluw rogon ni ngam thabthabelnag tomalngin e ayuw ni ga ra pi’ ko tabinaw rom. Dabi siy ni der lemnag Jehovah Got ni thingari par be’ ni goo pigpig ko ulung e be tay ma goo be ayuweg e pi walag nge piin buguli yoror ni ngar thapgad ngak Got machane dawori ayuweg e tabinaw rok. N’en ntha’bi ga’ fan nib mil fan ngak e pumoon e nge ayuweg e an leengin nge pi fak.

¹⁴ Fare The Watchtower ko November 1, 1986, page 22, e begaar: “Faanra gimed ra un ko machib ni gimed taab tabinaw ma aram e ra fel’ thilmed, machane ku ba t’uf ko bitir ni ngam ayuwegrad ni ni reb nge reb. Ere ba t’uf ni ngan thabthabelnag ni ngan turguy in e tayim ni rayog ni ngam tay ko . . . pi n’en nib mil fan ngom ko ulung ya ku ga ra ayuweg ‘girdien e tabinaw rom’ ko tirok Got ban’en nge tin nib t’uf nga laniyan’rad nge dowrad. [Be’ ni Kristiano] e som’on ma thingari ‘fil rogon ni nge ngongliy e maruwel rok nrogon e maruwel ni ma tay girdien Kristus ngak girdien e tabinaw rok.’ (1 Timothy 5:4, 8)”

15. Mang fan nib t’uf e gonop nge llowan’ ko piin piilal ni bay leengirad nge pi fakrad?

¹⁵ Reb e thin ko Proverb e gaar: “Ngan ubing e tabinaw nga daken e gonop ma bochan e llowan’ ni ba’, ma ra par nib mudugil ni dabi rur.” (Proverbs 24:3) Arrogon, ra nge lebuguy e piilal e tin nib mil fan ngak ko ulung nge tabinaw taa ba ngiyal’ ni be ubing, ma ba t’uf e gonop rok nge llowan’. Ya rogon ni yog e Bible e boor ko taareb e pi n’en nib mil fan ngak ni nge ayuweg. Ya thingari ayuweg e tabinaw rok nge ulung. Ba t’uf ni nge gonopiy rogon nge thabthabelnag e gal n’ey. (Filippi 1:9, 10) Ba t’uf e gonop ni nge turguy e tin th’abi ga’ fan ni nge mon’eg. (Proverbs 2:10, 11) Demtrug ko be lemnag rogon nib mil fan ngak ni nge ayuweg e ulung, machane thingari nang u wan’ ni ir e an figirngiy nge chitamangiy me ere ke tay Got chilen ni nge ayuweg e tabinaw rok nsom’on me thapegrad ngak Got.

Pi Matam nib Fel’ ni Ku Yad e Pi Piilal nib Fel’

16. Mang felngin ni bay ku be’ ni ir e piilal ma ku ir e matam?

¹⁶ Be’ ni ir e piilal mab llowan’ pi fak e boor fel’ngin ni rib fel’. Faanra ke fil rogon ni nge auyuweg e tabinaw rok nib fel’ rogon, ma aram e rayog ni nge ayuweg yugu boch e tabinaw u lan e ulung. Ya manang fan e pi magawon rorad ma rayog ni nge pi’ e fonow nib puluw ya manang fan. Bay bokum biyu’ e piilal u gangin e fayleng ni yad be rin’ e tin nib mil fan ngorad nib fel’ rogon ni yad e piin figirngiy nge pi chitamangiy nge piin piilal.

17. (a) Susun mang e dabi pag talin be’ ni ir e matam nge piilal? (b) Uw rogon nrayog ko girdi’ u lan e ulung ni ngar lemnaged e piin piilal?

¹⁷ Faanra ba adag be’ ni bay e tabinaw rok ni nge mang reb e piilal, ma susun ir reb e Kristiano ni ke ilal ma be ayuweg e an leengin nge pi fak, ma nge yarmiy e schedule rok ngki yog ni nge ayuweg yugu boch e girdi’ u lan e ulung. Susun ndabi pag talin ni maruwel rok ko tachugul saf e ma tabab u tabinaw rok. Ma girdi’ ko ulung e thingara nanged ni piin piilal ni bay leengirad nge pi fakrad e thingara ayuweged yad maku ngara ayuweged e ulung me ere susun girdien e ulung e dabra ninged e ayuw rorad nge pag rogon. Susun, reb e piilal ni bay pi fak ni ra yan ko bin migid e rran nga skul e dabiyog ni nge par nib n’uw nap’an u tomren e muulung ko balayal’. Ma yugu girdi’ ko ulung e susun ni ngar nanged fan e re n’ey.​—Filippi 4:5.

Susun Ngad Runguyed e Piin Piilal Rodad

18, 19. (a) Mang e ke tamilangan’dad riy ko pi thin ni kad bieged ko 1 Korinth guruy ni 7? (b) Susun uw rogon u wan’dad e pi pumoon ni Kristiano ni aram rogon?

¹⁸ Kad weliyed ko guruy ni 7 ko fa bin som’on e babyor ni yoloy Paul ngak piyu Korinth ma aram ma ke tamilangan’dad riy ni bay boor e piin pumoon ni be fol ko thin rok Paul ma dar mabgolgad ma yad be mon’eg e tirok Got ban’en ni ke puf rogorad. Maku bay bokum biyu’ e pumoon ni kar mabgolgad ma dariy e bitir rorad ma yad be ayuweg e piin leengirad maku yad be pigpig ni yad e overseer ko district, nge circuit, nge ulung, ngu lan e pi ofis ko Watch Tower, ma piin leengirad e be ayuwegrad. Ma u lan e 80,000 e ulung rok Jehovah ma bay e piin ni yad e matam ni yad be ayuweg pi leengirad nge pi fakrad maku yad be pigpig ko pi walag ni yad e tachugol saf.​—Acts 20:28.

¹⁹ I yoloy apostal Paul ni gaar: “Ngan pag e piin piilal ko galesiya nib fel’ e maruwel ni yad be tay ni aram e yad be gagiyegnag girdien e galesiya e susun e ngan tafinaynag ni ba’ rogorad ni nge bagayad min ta’ fan ni ke l’agruw yay ni ba ga’ ni piin nrib gel e machib ni yad be tay nge thin rok Got ni yad be fil ngak e girdi’.” (1 Timothy 5:17) Arrogon, piin piilal ni yad be ayuweg e tabinaw rorad nge ulung nib fel’ rogon e bay rogorad ni ngad t’ufeged yad ma gad tay farad. Susun ni ngad “ted fan urngin mit e girdi’ ni aram rogon.”​—Filippi 2:29.

[Boch e Thin nra Tamilangnag Murung’agen]

Ngan Sul Nga Daken Boch Ban’en

◻ Uw rogon ni gad manang ni boor e piin piilal u nap’an e bin som’on e chibog C.E. e bay e tabinaw rorad?

◻ Mang e mmil fan ngak e piin piilal ni kar mabgolgad ma bay pi fakrad, ma mang fan?

◻ Mang fan fare thin ni “bitir rorad e dabi siy nib mich Kristus u wan’rad,” ma ra diin nfaanra mel’eg e bitir ko piilal ndabun ni nge pigpig ku Jehovah?

◻ Uw rogon ni susun ni nge ayuweg e piilal “girdien e tabinaw rok”?

[Sasing ko page 30]

Pi tabinaw nib gel e ma ayuweg e ulung nge gel