“Nga Rim Lebuguy E Pigpig Rom”

“Nga rim lebuguy e pigpig rom.”​—2 TIMOTHY 4:5, Byington.

1, 2. Yugu aram rogon ni urngin e Kristiano e yad e pi tamachib, ma mang e bat’uf ni nge rin’ e piin ni piilal nrogon ni be yog e Bible?

GUR be’ ni ga ma wereg murung’agen gil’ilungun Got fa? Faanra aram rogon, ma ke magar Jehovah Got ko re taw’ath ney nrib fel’. Gur reb e piilal u lan e ulung fa? Ireray yugu reb e taw’ath ni kan puthuy ngay ni yib rok Jehovah. Machane dabda paged talin ni gathi skul nu fayleng ara salap ko welthin e rayog riy ngodad ni ngad pigpiggad ara ngada ayuweged e ulung. Jehovah e ke gaman i ayuwegdad rok ni rayog ni ngad pigpiggad, ma bochan ni bay boch e pumoon u fithik’dad ni kar folgad ko tin ni susun ni ngan rin’ nrogon ni yog e Thin rok Got ma aram e kan taw’ath nagrad kar manged piin ma ayuweg e ulung.​—2 Korinth 3:5, 6; 1 Timothy 3:1-7.

² Urngin e piin Kristiano ni kar ogniged e yafas rorad e nguura uned i rin’ e maruwel ko piin tamachib, machane piin ni ma ayuweg e ulung, ara piin piilal, e thingara daged ni yad be pigpig nib fel’ rogon. Piin piilal ni yad “be athamgil nguur pied e welthin ma yad ma fil ban’en ngak e girdi’” e manang Got nge Kristus e ngongol rorad, maku manang pi walagrad ni Pi Mich Rok Jehovah. (1 Timothy 5:17; Efesus 5:23; Hebrews 6:10-12) U tan urngin ban’en, ma piin ni piilal e thingara filed ban’en ni ra ayuweg e girdi’ ni be motoyil ko tirok Got, ya bochan Paul ni apostal e ke yog ngak Timothy ni en ma ayuweg e ulung ni gaar: “Ya ba’ ba ngiyal’ ni bayi taw ngay me dabuy e girdi’ ni ngar motoyilgad ko bin riyul’ e machib, ma bay u ranod nguur gayed i yan e piin ni nge machibnagrad ni yad e bay ra machibniged ngorad e tin ni ir e yad be yim’ ni bochan ni ngar rung’aged. Ma bay ra pied keru’rad ko tin nib riyul’ ndab kur rung’aged me mang yat e ra tiyan’rad ngay. Machane thingar mu par ni ga be filmunguyan’um u fithik’ urngin ban’en; mu um athamgiliy e gafgow ni beb ngom, ma ga rin’ e maruwel rok e tamachib ko Thin Nib Fel’ ni yib rok Got, ma ga ngongliy urngin e maruwel ni kan pi’ ngom nrogon e tapigpig rok Got.”​—2 Timothy 4:3-5.

3. Mang e thingarni rin’ ma aram e fapi machib ni googsur e dabi kirebnag rarogon e ulung ko tirok Got?

³ Rogon ni nge mudugil ni fapi machib ni googsur e dabi kirebnag e ulung, en ni ma ayuweg e ulung e thingari fol ko fonow ni pi’ Paul ni gaar: “Mu par ni ga be filmunguyan’um u fithik’ urngin ban’en, . . . ma nga rim lebuguy e pigpig rom ni polo’.” (2 Timothy 4:5, Byington) Arrogon, ani piilal e ba t’uf ni nge ‘pigpig ni polo’.’ Thingari rin’ e re maruwel ney ni urngin, ara nge lebuguy ni polo’, ara ngari mus rogon riy. Reb e piilal ni ma pigpig ni polo’ e ma tiyan’ ko urngin e maruwel rok, ndariy ban’en nge pag nde m’ay ara de rin’ ni urngin. Re pumoon ney e ba yul’yul’ nib muun ngay e tin ba achichig ban’en.​—Luke 12:48; 16:10.

4. Mang e rayog ni nge ayuwegdad ma rayog ni ngad lebuguyed e pigpig rodad ni polo’?

⁴ Pigpig rodad ni polo’ e gathi gubin ngiyal’ nib t’uf e tayim ni boor ngay, machane ba t’uf ni ngan fanay e tayim nib fel’ rogon. Ngan par nib thabthabel ma dabun i tal tal nrogon ni yima rin’ ban’en ma ra ayuweg urngin e Kristiano ni ngar mu’naged e pi n’en bay rogon ko pigpig rorad. Ra yoornag reb e piilal e tayim ko maruwel rok ni nge un ko wereg e machib, mab t’uf rok ni nge yarmiy urngin ban’en nib fel’ rogon ma rayog ni nge par nib thabthabel e maruwel rok mab t’uf ni nge nang boch ban’en ni nge pi’ ngak be ni nge rin’ nge rogon ni nge rin’. (Hebrews 13:17) Riyul’, ni en piilal ni yima tayfan e ku ma rin’ e maruwel rok, ni bod Nehemiah, ni ke un ko maruwel u nap’an ni yibe fal’eg e rungrung nu Jerusalem ni ke kireb. (Nehemiah 5:16) Ma urngin e tapigpig rok Jehovah e thingara uned ko maruwel ni ngan machibnag e thin ko Gil’ilungun ni gubin ngiyal’.​—1 Korinth 9:16-18.

5. Susun uw rogon u wan’dad e pigpig rodad?

⁵ Ri ma pi’ e fel’felan’ ngodad e maruwel rodad ni gadad e pi tamachib ko Gil’ilungun ni ke m’ay i sunmiy u tharmiy! Riyul’ ni baga’fan u wan’dad e taw’ath ni rayog ni ngad uned i machibnag fare thin nib fel’ nga gubin yang u fayleng u m’on ni ngeb e tomur. (Matthew 24:14) Yugu aram rogon ni daworda flontgad, ma rayog ni nge yib e athamgil nga lanin’dad ko fapi thin rok Paul ni gaar: “Ba’ romad e re n’ey nib fel’ [ni ngan pigpig] ni bod e rume’ ni but’, ni fare gelngin nrib gel e aram gelngin Got ma gathi gelngimad.” (2 Korinth 4:7) Arrogon, rayog ni ngad pigpiggad nrogon nib fel’ uwan’uy​—machane kemus nu daken gelngin nge gonop ni pi’ Got.​—1 Korinth 1:26-31.

Ngan Dag Feni Sorok Got

6. Mang e n’en nib thil u thilin piyu Israel nge fare Israel nib spiritual?

⁶ Be weliy Paul murung’agen e Kristiano ni kan dugliyrad, yog Paul ni God e ke “ubungdad ngad manged pi tapigpig ko fare m’ag nib biech.” Fare apostal e ke taarebrogonnag fare m’ag nib biech ni kan ngongliy ni fan ko fare Israel nib spiritual u daken Jesus Kristus ko fare m’ag ko Motochiyel ni ke kakrom ni kan ngongliy ni fan ko fare nam nu Israel u daken Moses. Miki yog Paul ni nap’an ni yib Moses u Burey ni Sinai ni be fek fare malang ni bay fare Ragag i Motochiyel riy, me ri be galgal ramaen owchen ndabiyog rok piyu Israel ni ngar yuluyed owcherad ngay. Yugu aram rogon, ma de n’uw nap’an me buch ban’en nib gel e kireb riy ya bochan “gelngin e lem rorad e ke war” ma kan upunguy gum’ircharad. Machane faanra ngan chel ngak Jehovah ngaun pigpig ngak u polo’ i gum’irchaey, ma ra chuw fare upung. Nap’an ni weliy Paul murung’agen e pigpig ni kan pi’ ngak e piin ni yad bang ko fare m’ag nib biech, mi yog ni gaar: “Gadad gubin, . . . ni dariy upungen u owchedad ni gadad bod e therek ni gad be dag ngan guy rogon feni sorok Jehovah.” (2 Korinth 3:6-8, 14-18, NW; Exodus 34:29-35) Fare “yugu boch e saf” rok Jesus e ngiyal’ ney e ku bay e taw’ath rorad ni ngar daged ngan guy rogon feni sorok Jehovah.​—John 10:16.

7. Uw rogon ma rayog ni nge dag e girdi’ ko yafas rorad feni sorok Got?

⁷ Uw rogon ma girdi’ ni tadenen e rayog ni ngar daged ko yafas rorad rogon feni sorok Got, ya dariy be’ ni rayog ni nge guy owchen me par nib fas fa? (Exodus 33:20) Thingarda lemnaged ni, gathi kemus ni goo Jehovah e ir be’ nib galgal ramaen, ya ku ba m’agan’ ngay ni ngan tamilangnag e gagiyeg rok nth’abi tolang u daken Gil’ilungun. Tin riyul’ nib peth ko Gil’ilungun e bang ko “tirok Got nrib pag feni fel’” ni piin kan puog e kan ni thothup nga dakenrad ko Pentecost 33 C.E e kar tababgad ko machib (Acts 2:11) U daken e kan ni thothup ni be pow’iyrad, ma rayog ni ngara lebuguyed e pigpig ni ni polo’ ni kan pagfan ngorad.​—Acts 1:8.

8. Murung’agen fare pigpig, ma mang e ke turguy Paul u laniyan’ ni nge rin’?

⁸ Ke turguy Paul u wan’ ni dariy ban’en ni nge taleg ni dabkiyog ni nge mu’nag e pippig rok ni polo’. I yoloy ni gaar: “Got e ke runguydad ke pi’ e re maruwel ney ngodad, aram fan nder mulan’dad. Kad paged urngin e ngognol nib mith ni yima tamra’ ngay, darid ngongolgad u fithik’ e sabanban, fa reb e gadad be pingeg fan e thin rok Got ngad banniged e girdi’ ngay. Gadad be weliy e tin nib riyul’ nib tamilang ma gadad be par u p’eowchen Got ma gadad be guy rogon ni nge guy e girdi’ e ngongol rodad mi yad nang u lanin’rad ni aray rogon.” (2 Korinth 4:1, 2, NW) U daken e n’en ni yog Paul ni “re pigpig ney,” e nge tamilangnag e tin riyul’ min wereg e tamilang nib spiritual i yan.

9, 10. Uwrogon ma rayog ni ngan guy feni sorok Jehovah u daken be’?

⁹ Ma rogon murung’agen tabolngin e tamilang ni yibe guy nge tamilang ko tirok Got, e yoloy Paul ni gaar: “Fare Got ni ir e yog ni gaar: “Nge m’ug e tamilang u fithik’ e lumor!” e ku ereram e re Got ni ir e ke tamilangnag an’mad kug nanged e flaab rok ni be gal ramaen u owchen Kristus.” (2 Korinth 4:6; Genesis 1:2-5) Bochan kan pagfan ngodad e taw’ath ni rib fel’ ni gadad e pi tapigpig rok Got, me ere nguuda pared ni gadad bbiech ma aram e gadad ra bod e therek nrayog ni ngada daged rogon feni sorok Jehovah.

¹⁰ Dabi guy e girdi’ ni be par u fithik’ e lumor feni sorok Jehovah ara rogon ni be dag Jesus Kristus ni ir fare Moses ni ga’. Machane gadad e pi tapigpig rok Jehovah, e kad feked e tamilang ni be galgal ramaen ni thin ko Bible yibe dag ngak boch e girdi’. Faanra piin ni yad bay u fithik’ e lumor ko tirok Got ban’en e chiney e nge dab ra uned ko mogothgoth, mab t’uf e tamilang rok Got rorad. Ere u fithik’ e felfelan’ nge pasig, ma gad be fol ko thin ni yog Got ni ngan wereg e tamilang u fithik’ e lumor ni fan ni ngan pining e sorok ngak Jehovah.

Mu Pag Nge Gal Ramaem u Nap’an e Fol Bible u Tabinaw

11. Mang e yog Jesus u murung’agen ni ngad paged e tamilang rodad nge gel ramen ma mang reb e kanawo’ ni ngada rin’ed e re n’ey riy ko pigpig rodad?

¹¹ I yog Jesus ngak pi gachalpen ni gaar: “Gimed bod e tamilang ngak e girdi’ nu fayleng ni polo’. Bbinaw ni kan tay nga daken bburey nib tolang e dabiyog ni nge mith. Dariy be’ nra tay e nifiy ko magal ni nge tay nga tan baraba’ i ban’en; ya ra tay nga tagil’ e magal, ko gin nrayog ni nge gal’ urngin e girdi’ ni yad bay u lan e naun. Ere ku er rogomed ni nge gal raamed u p’eowchen e girdi’, ya ngar guyed e tin nib fel’ ni gimed be rin’ mi yad yog e sorok ngak e Chitamangimed ni bay u tharmiy.” (Matthew 5:14-16) Ngongol rodad nib fel’ e ra k’aring boch e girdi’ ni ngar pininged e sorok ngak Got. (1 Peter 2:12) Ma pin’en nib thilthil ko maruwel rodad ni ngan wereg e machib e ra pi’ ngodad yu ngiyal’ ni boor ni rayog ni ngad paged nge mat e tamilang rodad. Reb ko n’en ni ri gad be nameg e ngan dag e tamilang nib spiritual ko Thin rok Got e aram e fol Bible u tabinaw ni gad ra tay. Ireray reb e kanawo’ ni rib ga’ fan ma rayog ni ngad lebuguyed e pigpig rodad ni polo’. Mang boch e thin ni kan pi’ ni ra ayuwegdad ni ngad ted e fol Bible nra taw nga gum’irchaen e piin yad be gay e tin riyul’?

12. Uw rogon ma meybil e ba peth ko fare maruwel ni ngan fil e Bible ngak be’ u tabinaw?

¹² Gad ra yibilay ngak Jehovah u murung’agen e re n’ey ma be dag ni gad baadag ni ngad filed e Bible ngak e girdi’. Maku be dag ni kad guyed feni ga’ fan ni ngada ayuweged boch e girdi’ nge yog ngorad e tamilangan rok Got. (Ezekiel 33:7-9) Rib mudugil ni ra fulweg Jehovah taban e meybil rodad me taw’athnagnagdad ko athamgil ni gad be tay ko pigpig rodad. (1 John 5:14, 15) Machane gathi kemus ni ngad yibilayed ni ngada pirieged be’ nrayog ni ngada filed e Bible ngak. Tomren ni ke mudugil ni ngan fil e Bible ngak be’, ma meybil min fal’eg i lemnag e tin ba t’uf rok facha’ e ra ayuwegdad ni ngad filed e Bible ngak ko kanawo’ nib manging’ u gubin ngiyal’.​—Roma 12:12.

13. Mang e ra ayuwegdad me yog ni ngad filed e Bible ngak u tabinaw meb angin?

¹³ Rogon ni ngeb angin e fol Bible u tabinaw, e thingarda fal’eged rogodad nib fel’ rogon ni fan ko tayim ko fol Bible. Faanra gad be lemnag ni dawori gaman e salap rodad, ma sana rayog ni ngad yaliyed rogon e an ma fil e babyor ngak e girdi’ ni en ma Ayuweg e Fol Babyor u gubin e wik. Yu ngiyal’, e sana rayog ni ngada uned ngak reb e tamachib ko Gil’ilungun ni ma fil e Bible ngak boch e girdi’ u tabinaw rorad me yib angin. Riyul’ ni, ngongol rok Jesus Kristus nge rogon ni ma fil ban’en ngak e girdi’ e rib t’uf ni nguuda fal’eged i lemnag.

14. Uw rogon me yog ni ngad puged laniyan’ e en ma un ko fol Bible?

¹⁴ Ke felfelan’ Jesus ni nge rin’ e tin’ nib m’agan’ e Chitamangin ngay ma nge weliy ngak boch e girdi’ murung’agen Got. (Psalm 40:8) Ba sumunguy me yog rok ni nge pug laniyan’ e piin ke motoyil ngak. (Matthew 11:28-30) Ere nguuda athamgilgad ni nge taw nga gum’irchen e piin gad be fil e Bible ngorad. Rogon ni ngad yodoromgad, e ba t’uf ni nguuda fal’eged rogodad ni fan nga urngin yay ni gad ma fil e Bible ngak be’ i gad be lemnag rarogon. Ni bod ni, nfaanra ke yib fa cha’ u fithik’ e girdi’ ni dar nanged e Bible, sana ba t’uf ni ngad ayuweged ni nge mich u wan’ ni Bible e ba riyul’. Ra aram rogon, ma ba tamilang ni thingarda bieged boor e thin nu Bible ma ngada weliyed fan ngorad.

Ngan Ayuweg e En ni Ma Un ko Fol Bible Nge Nang Fan e Fanathin

15, 16. (a) Uw rogon me yog ni ngad ayuweged e en ma un ko fol Bible ni der nang fan e fanathin ni bay u Bible? (b) Mang e rayog ni ngada rin’ed ni faanra reb e babyor rodad e be fanay reb e fanathin ni mo’maw’ rok be’ ni ma un ko fol Bible ni nge nang fan?

¹⁵ Sana en ma un ko fol Bible e der nang reb e fanathin ni kan fanay u lan e Bible. Ni bod ni, sana der nang fan ko mang e be yip’ Jesus fan u nap’an ni yog ni ngan tay e magal nga tagil’. (Mark 4:21, 22) I weliy Jesus murung’agen e magal kakrom ni yima tay e gapgep ngay ma bay e wik riy ni yima urfeg nge tamilangnag lan e naun. Re magal nem e yima tay nga daken ban’en ma aram rayog ni nge pi’ e tamilang nga bang u reb e naun. Sana ba t’uf ni ngan fal’eg i gay ko gali kenggin ney ni “Magal” nge “Tagil e magal” ko fare ke babyor ni Insight on the Scriptures ma rayog ni nge tamilang fan u wan’uy e fanathin ni weliy Jesus.a Machane rib ga e taw’ath riy ni ngan yan ngan guy be’ ni ma fil e Bible nrayog ni ngan weliy ngak nge nang fan ban’en me falan’ ngay!

¹⁶ Rayog ni reb e babyor ni ma ayuwegey e sana yira fanay reb e fanathin riy ni en ma fil e Bible e mo’maw’ ni nge nang fan. Mu saf’og ngam weliy fan, ara mu fanay yugu reb e fanathin ni taarebrogon fan ngay. Sana ba’ reb e babyor ni be tamilangnag ni rib ga’ fan ni ba wu’ i mabgol e rib taareb lanin’row ma yow ma maruwel u taabang. Rogon ni ngan dag e re n’ey, e ngan weliy murung’agen reb e pumoon ni be tagmachul ni trapeze be yon’ ir, me pithig pa’ riy u daken e nifeng, ni ke tor nga daken be’ ni yow be gosgos ni nge kol pa’ e cha’ nem. Ma reb e fanathin ni rayog ni ngan ta’ nga lon, ni be dag nib t’uf rok ba wu’ i mabgol ni nge taareb lanin’row ma ur maruwelgow u taabang e rayog ni ngan fanathinnag e piin yad ma maruwel u barkow ni yad be gachowriy boch e kahol ngar ted nga but’ ni ra bagayad ma be pi’ ngak bagayad.

17. Mang e gad ra fil rok Jesus u murung’agen e fanathin?

¹⁷ Ra ngan fanay reb e fanathin ni ngan tay nga lon ma sana ba t’uf ni ngan fal’eg rogon u m’on riy. Yugu aram rogon, ma reb ereram reb e kanawo’ ni ngad daged riy ni gad baadag ni ngad ayweged e en ma un ko fol Bible. I fanay Jesus boch e fanathin nib mom ni nge tamilangnag e pi kenggin e machib nib mo’maw. Welthin rok u daken e Burey e be dag ni aram rogon, ma be dag e Bible ni machib ni i tay e ba’ angin ngak e piin ni yad be motoyil. (Matthew 5:1–7:29) I weliy Jesus boch ban’en u fithik’ e gum’an’ ya bochan ri baadag ni nge ayuweg boch e girdi’.​—Matthew 16:5-12.

18. Mang e thin ni kan ta’ chilen ni ngan rin’ ko thin nu Bible ni yoloy fithingan e babyor nge guruy nge verse riy ko pi babyor rodad?

¹⁸ Lanin’dad ni gad baadag ni ngad ayuweged boch e girdi’ e ra k’aringdad ni ngad ‘weliyed ban’en ni kan fek u Bible.’ (Acts 17:2, 3) Ba t’uf ni ngan fil ban’en u fithik’ e yul’yul’ nge meybil min fanay e pi babyor ni “fare tapigpig nib yul’yul’ mab gonop” e ke ngongliy. (Luke 12:42-44) Ni bod fare ke babyor ni Knowledge That Leads to Everlasting Life ni be fanay boor e thin nu Bible.b Bochan bang ko babyor nrayog ni ngan yoloy ban’en riy ni ba achichig, boch e thin nu Bible e kemus ni kan ta’ fithingan e babyor nge guruy nge verse ngay. Nap’an e fol Bible, ma baga’fan ni ngan bieg min weliy boch e pi thin nu Bible ney. Ra ngan lemnag, ma Thin rok Got e ir e def ko machib rodad, ma ba’ gelngin nib gel. (Hebrews 4:12) Nguun fanay e Bible ni polo’ u urngin yay ni yima fol Bible, ma aram ngaun bieg ni gubin ngiyal’ e thin nu Bible ni bay ulan e pi paragraph. Ngan fil ngak en ma un ko fol Bible ni nge guy ko mang e be yog murung’agen reb e kenggin ara ngongol. Ngam athamgil ni ngam dag ngak ko uw rogon ni nge fel’ rogon nra nge fol rok Got.​—Isaiah 48:17, 18.

Ngan Fith e Deer ni Ra Pug e Tafinay Rok Be’

19, 20. (a) Mang fan ni susun ngad fanayed e deer ni ngan nang e n’en be lemnag be’ u nap’an e fol Bible u tabinaw? (b) Mang e rayog ni ngan rin’ nfaanra bay reb e kenggin e machib nib t’uf ni nga kun weliy biyay?

¹⁹ Rogon ni i fanay Jesus boch e deer u fithik’ e gonop e ke ayuweg e girdi’ ngar weliyed ban’en. (Matthew 17:24-27) Faanra ngad fithed e deer u murung’agen e n’en ni be lemnag e en ma un ko fol Bible ni dabi tamra’, ma fulweg rok e rayog ni nge dag ko mang e be lemnag murung’agen reb e kenggin e machib. Rayog ni ngad pirieged ni ka bay ban’en u laniyan’ nib togopuluw ko thin nu Bible. Ni bod ni, sana ba mich fare Trinitas u wan’. U lan fare babyor ni Knowledge ko guruy ni dalip e be weliy ni fare bugithin ni “Trinitas” e dariy u lan e Bible. Fare babyor e bay boch e thin riy ni kan fek u Bible ma ba’ ni kemus ni kan yoloy fithingan e babyor u Bible ngay nge guruy nge verse ni be dag ni Jehovah e be’ nib thil ku Jesus ma fare kan ni thothup e ir gelngin Got, ma gathi be’. Ngan bieg min weliy e pi thin nu Bible ney ma sana ba gaman. Machane uw rogon ni faanra ka bay ban’en nib t’uf? Bin migid e fol Bible ni sana tomur riy, e rayog ni ngan fanay boch e tayim ni ngan weliy e re kenggin ney ni bay ko yugu reb e babyor ko Pi Mich Rok Jehovah, ni bod fare brochure ni Should You Believe in the Trinity? Ma tomur riy, rayog ni ngad ululgad ko fol Bible nguud fanayed fare babyor ni Knowledge.

²⁰ Faanra rogon ni ke fulweg e en ma un ko fol Bible fare deer ni be fith murung’agen ban’en ni be lemnag e yira gin ngay ara ra mulan’uy riy. Faanra fan ko ngan thoy e tamagow, ara yugu reb e kenggin nrayog ni nge k’aring e damumuw, e ba muun ngay, ma rayog ni nga dogned ni gad ra ulul ko fol Bible ma ngad weliyed e re n’ey boch nga m’on. Bochan kad nanged ni en ma un ko fol Bible e ka ma thoy e tamagow ma ra yog ni ngada gayed reb e babyor nra ayuweg e cha’nem ni nge mon’og ko tirok Got. Nap’an ni gad be athamgil ni ngad k’aringed gum’ichaen e en ma fol Bible, ma rayog ni ngad meybilgad nge ayuweg Jehovah e cha’ nem ni nge ilal ko tirok Got.

21. Mang e rayog ni nge buch nfaanra ngad puluwnaged u rogon ni gad ma fil ban’en ko tin nrib t’uf ko en ma un ko fol Bible?

²¹ Ngan fal’eg rogoy u daken e ayuw rok Jehovah, ma dariy e maruwar riy ni ngad puluwnaged u rogon ni ngad filed ban’en ko tin nib t’uf rok e en ma un ko fol Bible. Tomren ni ke yan boch e tayim, e yibe athapeg nrayog ni ngad ayuweged ni ngari t’uf Got rok. Maku rayog ni ngad ayuweged ni ngari tayfan ma nge ga’ fan u wan’ e ulung rok Jehovah. Ma rib gel e felfelan’ riy u nap’an ni piin ma un ko fol Bible e ke michan’rad ni ‘Got e riyul’ ni bay u fithik’dad’! (1 Korinth 14:24, 25) Ere yibe athapeg ni gad ra fil e Bible ngak be’ ni ngeb angin ma ngad rin’ed e tin rayog rodad ni ngad ayuweged boch e girdi’ ngar manged pi gachalpen Jesus.

Ban’en ni Baga’ Fan ni Ngan Ayuweg

22, 23. Mang e bat’uf nfaanra ngad lebuguyed e pigpig rodad ni polo’?

²² Rogon ni nge lebug e pigpig rodad ni polo’, e thingarda torgad nga daken gelngidad ni ke pi’ Got. Paul ni be weliy murung’agen e pigpig, e i yol ngak e pi Kristiano ni kan dugliyrad ni walagen ni gaar: “Gamad e ba’ romad e re n’ey nib fel’ ni kan ta’ u lan e rume’ ni but’, ni fare gelngin nrib gel e aram gelngin Got ma gathi gelngimad.”​—2 Korinth 4:7.

²³ Demtrug ko gadad bang ko piin kan dugliyrad ara bang ko fare “yugu boch e saf,” ma gadad bod ba rume’ ni but nib war. (John 10:16) Yugu aram rogon, ma rayog rok Jehovah ni nge pi’ gelngidad nib t’uf rodad ni nge yog ni ngad lebuguyed e maruwel rodad ni yugu aram rogon ni bay ni be diliiy lanin’dad. (John 16:13; Filippi 4:13) Ere erfan ni nge pagan’dad ngak Jehovah ni polo’, ma ngad ayuweged e n’en nib ga’fan ni aram e pigpig, ma ngada lebuguyed e maruwel rodad ni polo’.

[Footnotes]

Uw Rogon ni Ngam Pi’ e Fulweg?

• Mang e ra rin’ e piin ni piilal ngar lebuguyed e pigpig rorad ni polo’?

• Uw rogon ma rayog ni ngad mon’oggad nrogon ni gad ma fil e Bible ngak be’ u tabinaw meb angin?

• Mang e gad ra rin’ nfaanra en ni ma un ko fol Bible e der nangfan reb e fanathin ara kub t’uf yugu reb e thin ara babyor ni nge tamilangnag reb e kenggin?

[Picture on page 24]

Piin piilal ni Kristiano e ma fil ban’en ngak e girdi’ u lan e ulung mi yad ayuweg e pi walagrad ngar salapgad ko machib

[Picture on page 26]

Ngan fil e Bible u tabinaw nib manging’ e reb e kanawo’ ni ngad paged e tamilang rodad nge gal ramen