Mu Ayuweg Boch e Girdi’ Ngar Folgad ko Machib nu Bible

“Ma awoch ni wer nga daken e but’ nib yong’ol e be yip’ fan e piin nrung’aged e thin rok Got mi yad tay u lanin’rad nguur folgad riy me par rorad nge yib wom’engirad.”​—LUKE 8:15.

1, 2. (a) Mang e n’en fan fare ke babyor ni What Does the Bible Really Teach? (Mang e Ri Be Fil e Bible?) (b) Tin chiney e duw e uw rogon ni ke flaabnag Jehovah e maruwel ko girdi’ rok ni ngar ayuweged boch e girdi’ nge mang pi gachalpen?

“RIB FEL’ fare ke babyor. Ba adag e piin ni gu ma machibnagrad. Maku gu ba adag. Rayog ni nggu fil e Bible ngak e girdi’ u langan e mab rorad ni bochan e re ke babyor nem.” Arrogon e thin rok reb e pioneer ni reb e Mich Rok Jehovah u murung’agen fare ke babyor ni What Does the Bible Really Teach? (Mang e Ri Be Fil e Bible?)a I yog reb e pilibthir ni ke n’uw nap’an ni i machib ni gaar: “Kug tow’ath ya boor e girdi’ ni kug ayuweg ni ngar nanged Jehovah u lan fa 50 e duw ni kug machibnag e girdi’. Machane dariy baken e babyor ni bod e re ke babyor ney. Rib fel’ e pi fanathin nge pi sasing ni bay riy.” Me gur, ku arrogon fare ke babyor ni Bible Teach u wun’um, fa? Kan fal’eg fare ke babyor ya nge ayuwegem ni ngam fol ko motochiyel rok Jesus ni gaar: “Mmarod ngak girdien e pi nam u gubin yang ngam pingeged yad ngar manged pi gachalpeg, . . . mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.”​—Matthew 28:19, 20.

² Dabi siy ni ma felfelan’ Jehovah ngay ni nge guy 6.6 milyon e Pi Mich rok ni ke m’agan’rad ngay ni ngar folgad ko thin rok Jesus ni ngar ayuweged boch e girdi’ ni ngar manged pi gachalpen. (Proverbs 27:11) Mab tamilang ni be flaabnag Jehovah e maruwel rorad. U lan fare duw ni 2005 e un machibnag fare thin nib fel’ u lan 235 e nam ma ke pag 6,061,500 e girdi’ ni yibe fil e Bible ngorad. Bochan e pi fol Bible ney ma boor e girdi’ e “kar rung’aged nge mu’ mi yad fol riy, ma dar lemniged ni thin rok e girdi’, ya kar lemniged ni thin rok Got, ni er e bin ni ir, ya ri ir e thin rok.” (1 Thessalonika 2:13) U lan fa gal nem e duw ni ke yan ma ke pag baley e milyon e girdi’ ni kar manged pi gachalpen Jesus ni kar folgad ko pi motochiyel rok Jehovah ma kar ognaged e yafos rorad ngak Got.

3. Mang boch e deer u rogon i fanay fare ke babyor ni Bible Teach ni gad ra weliy u lan e re thin ney?

³ Me gur, kam pirieg e felfelan’ buchuuw kafram nbochan ni ga be fil e Bible ngak be’? U fayleng i yan e ka bay e girdi’ riy “nib fel’ gum’ircharad” ma nap’an ni kar rung’aged e thin rok Got “mi yad tay nga lanin’rad nguur folgad riy me par rorad nge yib wom’engirad.” (Luke 8:11-15) Ngada weliyed rogon ni rayog ni ngam fanay fare Bible Teach u nap’an ni ga be ayuweg e girdi’ ni ngar manged pi gachalpen Jesus. Gad ra weliy dalip e deer: (1) Uw rogon ni ngam tababnag e fol Bible? (2) Mang boch i kanawoen ni ngan fil e machib ngak e girdi’ e ba manging’? (3) Uw rogon ni ngam ayuweg e girdi’ ni gathi kemus ni nge fil e Bible ya ngki machibnag e Bible ni Thin Rok Got ngak boch e girdi’?

Rogon ni Ngam Tabab i Fil e Bible ku Be’

4. Mang fan ni ma tun tun boch e girdi’ ni ngar filed e Bible, ma uw rogon ni ngam ayuwegrad ni nge puf rogorad?

⁴ Faanra yog be’ ngom ni ngam og nga barba’ ba lul’ ni ba ga’ ma sana ga ra magawon ni ngam rin’. Machane faan yira tay e malang ni ngam og u daken, ma sana ra m’ag u wan’um ni ngam th’ab fare lul’. Ku arrogon e ngiyal’ ney ni sana ra magawon laniyan’ be’ ni nge fil e Bible ni bochan e boor e maruwel rok. Sana ra lemnag nib mo’maw’ ni ngan fil e Bible ma dariy e tayim rok ni nge fil. Uw rogon ni ngam ayuweg ni nge dabi magawon laniyan’? Rayog ni ngam fol Bible gow in e yay nib ngoch nap’an ma yira nang fan, rayog ni ngam fanay fare Bible Teach ni ngam guy rogon faanem nge fil e Thin Rok Got ni gubin e wik. Faan ga ra tay talpem, ma rayog ni nge aw ni gubin ngiyal’ ni ngam sul ngam machibgow faanem ma ra bod fapi malang u lan e lul’ ni nge ayuweg faanem ni nge fel’ e thin rorow Jehovah.

5. Mang fan ni thingar mu beeg fare ke babyor ni Bible Teach?

⁵ Machane u m’on ni ngam ayuweg be’ ni nge fel’ rogon ko fare Bible Teach, ma thingar mu nang e thin riy. Gur, kam beeg fare ke babyor ni polo’? L’agruw e yabgol e ra fekew fare ke babyor u nap’an e matal rorow nga ur beegew u nap’an ni yow be toffan u dap’e l’ay. Ma nap’an ni yib be’ ni ppin ko fare binaw ngorow ni be’ ni ma pi’ e chugum ni chuway’ ngak e tourist me guy fare ke babyor ni What Does the Bible Really Teach? Me yog ngak fagali yabgol ni in e awa nga m’on ma ki i yibilay e re deer nem ngak Got ni ba adag ni nge nang e fulweg riy. Me pi’ fagali yabgol ba ken fare babyor ngak fare pin. Me gur, kam ‘tay ba ngiyal’’ ni ngam beeg e re ke babyor nem, ara kum beeg bayay u nap’an ni ga be sonnag ban’en ara ga be toffan u taban e maruwel ara u skul? (Efesus 5:15, 16) Faan ga ra beeg ma ga ra nang e n’en ni bay ko fare ke babyor ma rayog ni ngam weliy e thin riy ngak yugu boch e girdi’.

6, 7. Uw rogon ni ngam fanay fare ke babyor ni Bible Teach ngam tabab i fil Bible ko girdi’?

⁶ Nap’an ni ga be wereg fare ke babyor u mit e tabinaw, mu um dag fapi sasing ni bay ko page 4 nge 5 nge 6 ma ga beeg fapi thin ko Bible nge fapi deer ni bay ko pi page nem. Rayog ni ngam tababnag e machib ni nge lungum: “Ri boor e magawon ni bay ko girdi’ nu fayleng e ngiyal’ ney, me gur, mang e ga be finey nrayog ni nge pow’iydad?” Mu telim ko n’en ni ra yog faanem nge mu’ ma ga beeg e 2 Timothy 3:16, 17 ma ga weliy ni machib ko Bible e rayog ni nge pithig urngin e magawon rok e girdi’. Ma ga dag e n’en ni bay ko page 4 nge 5 ma ga fith ni nge lungum: “Am guy e pi sasing ney ni be dag e magawon rok e girdi’, me gur mang magawon e ma kireban’um ngay?” Faanra mel’eg faanem reb fapi magawon, ma ga pi’ fare ke babyor ngak nge kol ma ga beeg ko Bible rom fare thin ni murung’agen e re magawon nem. Ma ga beeg fare thin ni bay ko page 6, ma ga fith ngak nge lungum: “Fa nel’ i deer ni bay ko re page ney bin ngan e ga ba adag ni ngan pi’ e fulweg riy?” Faanra mel’eg faanem reb fapi deer, ma ga dag ngak fare guruy ni bay e fulweg riy ko fare deer, ma ga pi’ fare ke babyor ngak, mi gimew yog e ngiyal’ ni ngam sul riy ngam weliyew e fulweg ko fare deer.

⁷ Fare thin ni ka fin ni weliy e rayog ni ngan weliy u lan lal e minit. Machane u lan fa lal i minit e ga ra pirieg e n’en ni bay u laniyan’ faanem ni ga be non ngak, ma kam beeg ma kam weliy l’agruw e thin ko Bible ma kam tay tapgin ni ngam sul bayay. Ma sana fare welthin ni kam tayew e ke fal’eg laniyan’. Ma angin e ra be’ ni boor e maruwel rok ma ra adag ni nge n’uw boch nap’an ni ngam nonow ma ga ayuweg ni nge yog ni yan u “kanawoen e yafos.” (Matthew 7:14) Munmun ma ra adag e machib ma rayog ni nge n’uw boch nap’an ni ngam weliyew e machib. Rayog ni ngam pirew nga but’ ngam weliyew e machib nib n’uw boch nap’an.

Rogon ni Ngan Fil Ban’en ku Be’ Meb Angin nib Fel’

8, 9. (a) Uw rogon nrayog ni ngam ayuweg faanem ni ga be fil e Bible ngak ni nge gel ko fapi magawon ara skeng nra yib ngak? (b) U uw e yira pirieg riy fapi n’en ni der ma yik’ ni nge gelnag e michan’?

⁸ Nap’an ni ra tabab be’ ni nge fol ko machib nu Bible ma ra yib boch e magawon ngak ni ra magawonnag e mon’og ni be tay ko machib. Be gaar apostal Paul: “Urngin e girdi’ ni yad ba adag ni ngar pired u reb e pangin nib m’agan’ Got ngay ma kar taab girdi’gad Kristus Jesus e bay ni gafgownagrad.” (2 Timothy 3:12) I taarebnag Paul e pi skeng ney ko nifiy nrayog ni nge urfeg e pi n’en ni yima fanay ko dimow naun nib war, machane dabiyog ni nge urfeg e pi n’en ni bod e gol, nge silber nge yugu boch e malang nib tolang puluwon. (1 Korinth 3:10-13; 1 Peter 1:6, 7) Ra ngam ayuweg faen ga be machibnag ni nge yog ngak e pi fel’ngin nib t’uf ya nge yog rok ni nge gel ko fapi skeng nra yib ngak, mab t’uf ni ngam ayuweg ni nge dimow naun ko pi n’en ndabi yik’.

⁹ I taarebnag e en ni yoloy e psalm e “thin rok Jehovah” ko “silber nrib fel’ ni kan ranrannag kari machalbog e silber riy ni medlip yay ni ke mun ngay.” (Psalms 12:6, NW) Riyul’ ni bay u Bible urngin ban’en nib tolang puluwon nrayog ni ngan fanay ni nge gelnag e michan’. (Psalms 19:7-11; Proverbs 2:1-6) Ma fare ke babyor ni Bible Teach e ra dag ngom rogon ni ngam manging’ i fanay e thin nu Bible.

10. Uw rogon nrayog ni nga mup owchen faen ni be fil e machib ko thin nu Bible?

¹⁰ Nap’an ni ga be fil e machib ngak be’, mu u mup owchen ko fapi thin nu Bible ni bay ko fare ke babyor ni gimew be fil. Mu fanay boch e deer ni nge ayuweg nge nang fan e tin nib ga’ fan ko Bible ma nge yog rok ni nge fol riy. Mu ayuw ni nge dab mog ngak e n’en ni thingari rin’. Mu folwok rok Jesus. Nap’an ni deeriy be’ ni manang e Motochiyel Jesus, me fulweg ni gaar: “Mang e ke yog e babyor nib thothup? Ba uw rogon ni kam beeg?” Me fulweg fare moon e n’en ni yog e Bible, me ayuweg Jesus faanem ni nge nang rogon ni nge fol ko fare machib ni bay ko Bible. I weliy reb e fanathin ni ki ayuweg faanem nge nang rogon ni ra yib angin fare machib ngak. (Luke 10:25-37) Boor e fanathin ni bay ko fare babyor ni Bible Teach ni rayog ni ngam fanay ngam ayuweg e en ni be fil e Bible nge yog ni fol ko pi kenggin e motochiyel u Bible.

11. Uw urngin e n’en ni ngam weliyew u bayay fol Bible?

¹¹ Fare ke babyor ni Bible Teach e ba mom mab tamilang e thin riy ni nge weliy fan e Thin Rok Got, ni ri bod rogon ni i weliy Jesus e machib nib mo’maw’ me momnag. (Matthew 7:28, 29) Mu folwok rok. Mu weliy e machib nrogon nib mom, mab tamilang mab puluw. Dab mu gur ni ngam m’aynag fare ke babyor. Danga’, ya rarogon nge fene salap faanem ni be fil e Bible e ra turguy urngin e paragraph ni gimew ra fil u bayay e fol Bible. Manang Jesus rarogon pi gachalpen ma de weliy e machib ni boor ko tin nib t’uf ni ngar nanged ko ngiyal’ n’em.​—John 16:12.

12. Uw rogon ni ngan fanay e thin ni bay u tungun fare ke babyor ara appendix?

¹² U tungun fare Bible Teach e bay 14 e thin riy. Ni fan ko tin nib t’uf rok faani ga be machibnag, me gur ni gur e sensey rok e ngam dugliy ko uw rogon ni ngan fanay e pi thin ney nib fel’ rogon. Ni bod rogon ni faanra ke mo’maw’ rok faanem ni ga be fil e Bible ngak ni nge tamilang u wan’ ara be fith boch e deer u murung’agen boch ban’en nbochan e pi n’en ni michan’ ngay ko som’on, ma rayog ni ngam pow’iy ko bin nib puluw ko fa 14 i thin u tungun fare ke babyor ara appendix ya nge mang ir e beeg. Maku reb, e sana ra t’uf ni ngam beegew fare thin u tungun fare ke babyor ngam filew u taabang ni bochan rarogon faanem ni ga be machibnag. U tungun fare ke babyor ara appendix e bay boch e machib nu Bible riy nib ga’ fan ni bod e “‘Yaal’ nge ‘Marchaal’​—Mang Fan e Gali Bugithin ney?” nge “Mini’ e ‘Babylon nib Gilbuguwan.’” Rayog ni ngam weliy e pi thin ney ngak e en ni ga be fil e Bible ngak. Dariy e deer u lan e pi guruy nem ni bay nga tungun fare ke babyor, ere thingar mu nang e thin ni bay ko pi guruy nem nge yog nim fith boch e deer nib ga’ fan nra tamilangnag e machib u wan’ e en ni ga be fil e Bible ngak.

13. Uw rogon ni ma gelnag e meybil e michan’?

¹³ “Faanra gathi Somol e be toy ba naun, ma maruwel ni be tay e piin ni be toy e mm’ay fan.” Arrogon e thin u Psalms 127:1. Ere mu meybil ngak Jehovah ni nge ayuwegem u m’on ni ngam fil e Bible ngak be’. Ma nge m’ug fene fel’ thilmew Jehovah ko meybil ni ga ra fek u tabolngin ara tungun e fol Bible. Mu pi’ e athamgil nga laniyan’ e en ni ga be fil e Bible ngak ni nge yibilay e gonop rok Jehovah ya nge nang fan e Thin Rok ma ngeb gelngin ni nge fol ko fonow riy. (James 1:5) Faanra meybil faanem ma rayog ni nge gel ko fapi skeng ni ra yib ngak maku ra gel e michan’ rok.

Mu Ayuweg e Piin ni Ga Be Fil e Bible Ngorad Ngar Manged Sensey

14. Mang mon’og e thingari tay e piin ni yibe fil e Bible ngorad?

¹⁴ Faanra nge fol e piin ni gad be fil e Bible ngorad u ‘gubin e tin ni yog Jesus ngak pi gachalpen’ ni nguur rin’ed, ma ba t’uf ni ngar mon’oggad ngar manged boch sensey ko Thin Rok Got. (Matthew 28:19, 20; Acts 1:6-8) Mang e rayog ni ngam rin’ ngam ayuweg e en ni ga be fil e Bible ngak ni nge mon’og ni aram rogon?

15. Mang fan ni ngam pi’ e athamgil nga laniyan’ e en ni ga be fil e Bible ngak ni nge un ko muulung rok e Kristiano?

¹⁵ Ka nap’an e yay ni som’on ni ga ra fil e Bible ngak be’ ma ga pining ni nge un ngom ko muulung. Mu weliy ngak ni pi muulung e ga ma fil riy rogon ni ngam mang sensey ko Thin Rok Got. Tomren in e wik, ma ga pi’ in e minit u tomren e fol Bible romew ngam weliy rogon e pi muulung rodad nib thilthil nib muun e assembly ngay nge pi fonow ni kam fil riy. Mu weliy ni gab felan’ ngay murung’agen angin e machib ni kam fil u nap’an e pi muulung ney. (Hebrews 10:24, 25) Nap’an ni ra i un e en ni ga be fil e Bible ngak ko pi muulung ney ma ra adag ni nge fil e Thin Rok Got ngak boch e girdi’.

16, 17. Mang boch ban’en ni nge nameg e en ni be fil e Bible me turguy u wan’ ni nge rin’?

¹⁶ Mu ayuweg e en ni ga be fil e Bible ngak ni nge tay boch ban’en ni nge nameg ni nge rin’. Bod rogon ni ngam pi’ e athamgil nga laniyan’ ni nge weliy e pi n’en ni be fil ngak e fager rok ara girdien e tabinaw rok. Ku mu ayuweg ni nge dugliy u wan’ ni nge beeg e Bible ni polo’. Faan ga ra ayuweg ni nge mecham ngak ni nga i beeg e Bible ni gubin e rran ma ra fel’ rogon nge mada’ nga tomren ni ke taufe. Maku reb, e mog ngak ni nge nameg ni nge mit ngak reb e thin nu Bible ni fulweg u reb e deer nib ga’ fan u reb ngu reb e guruy ko fare babyor ni Bible Teach. Ra rin’ ni aram rogon ma ra mang “be’ ni girdien e maruwel nder tamra’ ko maruwel rok, ni ir be’ ni ma machibnag e thin rok Got nrogon.”​—2 Timothy 2:15.

¹⁷ Gathi ke mus ni ngam fil ngak ni nge yog e thin nu Bible ni bay u laniyan’ ara nge weliy ko thin rok, ya ngam ayuweg ni nge weliy fan u lan e Bible u nap’an ni be pi’ e fulweg ngak e piin ni be fith fan ban’en ko michan’ rok. Rayog ni ngam filew rogon in yay ni bod ni susun e gur be’ ni girdien e tabinaw ara be’ ni yow ma maruwel ni ga be fith ban’en ngak ma ir e nge weliy rogon e michan’ rok. Nap’an ni be weliy ma ga ayuweg ni nge pi’ e fulweg ko n’en nra fith be’ u ‘fithik’ e sumunguy nge tay fan.’​—1 Peter 3:15.

18. Nap’an ni ke bung rogon faanem ni ga be fil e Bible ngak ni nge un ko machib u mit e tabinaw, ma mang ayuw e ka bay ni ga ra pi’ ngak?

¹⁸ Munmun ma nge bung rogon e en ni be fil e Bible ni nge un ko machib u mit e tabinaw. Mu tamilangnag ngak ni ba tow’ath ni ngan pag be’ ni nge un ko re maruwel nem. (2 Korinth 4:1, 7) Nap’an ni ra turguy e piin ni piilal ni rayog rok faanem ni nge un ko machib u mit e tabinaw ni dawori un ko taufe, ma ga ayuweg ni nge weliy reb e machib nib mom ma ga un ngak ko machib u mit e tabinaw. Mu ul’ul i un ngak ko machib ma ga fil ngak boch i kanawoen e machib, mag ayuweg ni nge nang rogon ni nge sul nge guy e piin ni ke machibnag ngki ayuwegrad. Ba ga’ angin e kanawo’ nib fel’ ni ga be dag ngak ni nge folwok riy.​—Luke 6:40.

“Ngam Ayuwegem nge Piin ni Yad Ra Motoyil Ngom Ngar Thapgad Ngak Got”

19, 20. Mang e ngada nameged u wun’dad ni ngada rin’ed, ma mang fan?

¹⁹ Dabi siy ni ba gel e maruwel ni ngam ayuweg be’ ni nge “nang e tin nib riyul’.” (1 Timothy 2:4) Machane dariy e felfelan’ nib taareb rogon ko felfelan’ ni rayog ngom ni bochan e kam ayuweg be’ ni nge fol ko machib nu Bible. (1 Thessalonika 2:19, 20) Riyul’ ni gad ba tow’ath ni bochan e “gad be maruwel Got u taabang” ni gad be machib u fayleng i yan!​—1 Korinth 3:9.

²⁰ Dabi n’uw nap’an ma ra pufthinnag Got e “piin nde t’uf rorad ni ngar nanged murung’agen Got nge piin ndarir folgad ko Thin nib Fel’ ni yib rok Got ni murung’agen e Somol rodad i Jesus.” (2 Thessalonika 1:6-8) Yafos rok e girdi’ e ra yan u rogon e machib ni gad be tay. Rayog ni ngam nameg ni ngam tababnag i fil e Bible ngak be’ ko fare ke babyor ni What Does the Bible Really Teach? Faan ga ra rin’ ma “ga ra ayuwegem nge piin ni yad ma motoyil ngom ngar thapgad ngak Got.” (1 Timothy 4:16) Aray e ngiyal’ ni kari ga’ fan ni ngada ayuweged yugu boch e girdi’ ni ngar folgad ko machib nu Bible.

[Footnote]

Mang e Kam Fil?

• Kan fal’eg fare ke Bible Teach ni fan ko mang?

• Uw rogon ni ngam fanay fare Bible Teach ngam tabab i fil e Bible ku be’?

• Mang boch i kanawoen e machib ni bay angin?

• Uw rogon nrayog ni ngam ayuweg faen ni be fil e Bible nge mang reb e sensey ko Thin rok Got?

[Picture on page 12]

Ga be fanay e re ke babyor ney nib fel’ rogon fa?

[Picture on page 13]

Machib ni kam weliy ngak be’ e rayog ni nge ayuweg ni nge adag ngki nang yugu boch e machib nu Bible

[Picture on page 15]

Mang e rayog ni ngam rin’ me tiyan’ e en ni ga be machibnag ko thin nu Bible?

[Picture on page 16]

Mu ayuweg e en ni ga be fil e Bible ngak nge mon’og