“Nguum Rin’ Fare Maruwel  Rok E Tamachib”

“Thingar mu par ni ga be filmunguyan’um u fithik’ urngin ban’en, . . . ma ga rin’ e maruwel rok e tamachib.”​—2 TIMOTHY 4:5.

1. Mang maruwel ni ke pi’ Jesus ngak pi gachalpen?

FITHINGAN Jehovah nge tin nib m’agan’ ngay e kan machibnag u fayleng ni ga’ngin. Aram rogon ya bochan ni girdi’ rok Got ni kar ognaged yad e ur yul’yul’gad ko maruwel ni ke pi’ Jesus Kristus ngak pi gachalpen u nap’an ni yog ni gaar: “Ere mmarod . . . ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge fare Kan ni Thothup, mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.”​—Matthew 28:19, 20.

2. Mang fonow e kan pi’ ngak Timothy, ma mang reb e kanawo’ nra ayuweg e piin Kristiano ni piilal ngar m’unaged e maruwel rorad ko machib?

² Pi gachalpen Jesus ko fa bin som’mon e chibog e kar yul’yul’gad ko re maruwel nem. Ni bodrogon Paul ni apostal, ni ke fonownag Timothy ni reb e Kristiano ni ma ayuweg e ulung ni gaar: “Ma ga rin’ urngin e maruwel ni kan pi’ ngom nrogon e tapigpig.” (2 Timothy 4:5) Ngiyal’ ney, e reb e kanawo’ ni en ma ayuweg e ulung e rayog ni nge lebuguy e maruwel rok nge par ni ma wereg e thin ko Gil’ilungun nib pasig, ma be’ ni ma un ko machib ni gubin ngiyal’. Ni bod ni, en ni kan ta’ ni ir e nge ayuweg reb e Fol Babyor ko Ulung e bay e taw’ath rok nib fel’ ni nge pow’iy e girdi’ ko fare maruwel ni ngan wereg e machib ma nge skulnag boch e girdi’ ngar salapgad. I lebuguy Paul e maruwel rok ni nge machibnag fare thin nib fel’, me ayuweg boch e girdi’ ni ngar salapgad ko pigpig ni yad ma tay.​—Acts 20:20; 1 Korinth 9:16, 17.

Piin Tamachib Kakrom ni Yad Ba Pasig

3, 4. Mang e tin ni buch rok Filip ni reb e tamachib?

³ Piin Kristiano kakrom e yimanangrad ni yad e pi tamachib nib pasig. Mu lemnag Filip ni ba tamachib. Ir bagayad fa “medlip i pumoon ni kan guyrad ni yad ba fel’ . . . ma yad ba sug ko kan ni thothup ma yad ba gonop” ni kan mel’egrad ni gubin e rran ma ngar foth’ed e ggan ni ri taareb urngin ngak e piin Kristiano ni ma non ni thin ni Greek nge piin ni ppin u Jerusalem ni ma non e thin ni Hebrew ni kem’ e ani mabgol rorad. (Acts 6:1-6) Tomren ni kan mu’ ko re maruwel nem ni yug ba thil ma ke wer urngin e piin Kristiano nbochan e togopuluw nge gafgow ni kan tay ngorad kemus ni fapi apostal e kar pared ko gin ni ur moyed riy, me yan Filip nga Samaria. Mu rom e i machibnag fare thin nib fel’ riy ma kan ni thothup e ke gelnag ni nge tuluf e pi moonyan’ miki golnag e girdi’ nib mugutgut nge girdi’ ni ke yaf. Boor e girdi’ nu Samaria e kar folgad ko thin ko Gil’ilungun min taufenagrad. Nap’an ni kan rung’ag e re n’en ney, ma fapi apostal u Jerusalem e kar l’ogged Peter ni apostal nge John nga ranow nga Samaria ma girdi’ ni kefini michan’rad min taufenagrad e rayog ni ngan pi’ e kan ni thothup ngorad.​—Acts 8:4-17.

⁴ Bin migid ma kan ni thothup rok Got e ke pow’iy Filip ni nge mada’nag be’ nu Ethiopia nib eunuch u kanawo’ ni be yan nga Gaza. Tomren ni i weliy Filip nib tamilang murung’agen e yiiy rok Isaiah, ma cha’ ney ni “be’ ni bay u tan gelngin Candace ni leengin e pilung rok piyu Ethiopia” e ke mich Jesus Kristus u wan’ min taufenag. (Acts 8:26-38, NW) Ma tomur riy me yan Filip nga Ashdod nge mu’ ke yan nga Caesarea, “ni be machibnag fare thin nib fel’ nga urngin e mach” ni immoy ko kanawo’ ni be yan riy. (Acts 8:39, 40) Riyul’ ni dag Filip rogon ni ngan rin’ nib fel’ rogon fare maruwel rok e tamachib!

5. Fa aningeg i ppin ni fak Filip e yimanangrad ko mang?

⁵ Sogonapan 20 e duw nga tomren me par Filip nib pasig i wereg e machib. Nap’an ni Paul nge Luke e kar parew u tabinaw rok, ma “aningeg e ppin ni fak ni ba’ ndawora uned ko mabgol ni yad ma machibnag e thin rok Got.” (Acts 21:8-10) Ba tamilang ni kan skulnagrad ko tirok Got nib fel’ rogon, ma yad ba pasig i wereg e machib, maku bay e taw’ath rorad ni nguur yiiygad. Pasig ko machib ni ma ta’ e piin galabthir e bay angin nib fel’ ngak pi fakrad ni pumoon nga ppin e ngiyal’ ney, ya ra k’aringrad ni ngar uned i wereg e machig u fithik’ e pasig ni n’umngin nap’an e yafas rorad.

Pi Tamachib nib Pasig e Ngiyal’ Ney

6. Mang angin ni keb ngak e pi tamachib ko fa bin som’mon e chibog?

⁶ U lan e yiiy rok Jesus Kristus nib ga’ fan ni be weliy murung’agen e re tayim rodad ney nge ngiyal’ ko tomur, me yog ni gaar: “Ma som’on e thingar ni machibnag fare Thin Nib Fel’ ni yib rok Got ngak urngin e nam.” (Mark 13:10) Ra yib e tomur u tomren ni kan machibnag fare thin nib fel’ “u gubin yang u fayleng.” (Matthew 24:14) Nap’an Paul nge boch e pi tamachib ko fa bin som’mon e chibog, e boor e girdi’ ni ke michan’rad, min ngongliy fapi ulung u lan boor e binaw u tan e Am nu Roma. Piin ni piilal ni kan dugliyrad ngar pigpiggad ko pi ulung ney ngar uned ngak e pi walagrad ni pumoon nge ppin nguur wereged e machib i yan ko fapi binaw ni boor mab palog. Ke wer e thin rok Jehovah e ngiyal’ nem ni be gel i yan, ni bod rogon e ngiyal’ ney ya bochan bokum million e Pi Mich rok Jehovah e yad be rin’ e maruwel rok e pi tamachib. (Acts 19:20) Gur bagayad e piin ni be pining e sorok ngak Jehovah u fithik’ e felfelan’?

7. Mang e be rin’ e pi tamachib e ngiyal’ ney?

⁷ Boor e pi tamachib ko Gil’ilungun e ngiyal’ ney e kar fanayed e tayim rorad ni ke mab ngar uned i wereg e machib nib elmerin. Bokum biyu e girdi’ e kar uned ko maruwel ni missionary, ma kab boor e girdi’ e kar uned ko machib ni polo’ e tayim rorad ni ka nog e regular nge auxiliary pioneer ngorad. Ma rib fel’ e maruwel ni be rin’ e piin ni pumoon, nge ppin, nge pi bitir ni yad be pigpig ni pi tamachib ko gil’ilungun nib pasig! Riyul’, ni urngin e girdi’ rok Jehovah e ri yad be falfalan’kari taw’athnagrad ni yad be pigpig ngak ni ra bagayad ma be ayuweg bagayad ni yad e Kristiano ni tamachib.​—Zephaniah 3:9.

8. Mang maruwel ni ngan tay e pow ngak be’ e yibe rin’ e chiney, mu daken mini’?

⁸ Ke pi’ Got e maruwel ngak pi gachalpen Jesus ni kan dugliyrad nguur machibnaged fare thin nib fel’ u ga’ngin yang e fayleng. Piin be ayuwegrad ko re maruwel ney ni ngan wereg e machib e aram e “yugu boch e saf” rok Kristus ni be yoor i yan. (John 10:16) U lan reb e yiiy, ma re maruwel n’ey ni be ayuweg e yafas ko girdi’ e kan taarebnag ko ngan tay e pow nga peri’ e piin ni yad be gel’gel’ nbochan e tin ni rib kireb ni be buch e ngiyal’ ney. Dabi n’uw napan, ma yira thang e piin nib kireb. Chiney, reb e taw’ath nib gel ni ngan fek e thin riyul’ ni be ayuweg e yafas ngak e girdi’ nu fayleng!​—Ezekiel 9:4-6, 11.

9. Uwrogon ni ngan ayuweg e piin kafin ra uned ko maruwel ngan wereg e machib?

⁹ Faanra ke n’uw nap’an boch ni gad ma un ko machib, ma baga’ ni rayog ni ngada ayuweged e girdi’ u lan e ulung ni kefin ra uned ko re maruwel ney. Yu ngiyal’, ma rayog ni ngan yarmiy ni ngar uned ngodad ko machib. Piin ni piilal e ngara adaged ni ngara rin’ed e tin rayog rorad ni ngar gelnaged e pi walagrad ko tirok Got. Maruwel nib fel’ ko piin ni piilal nib sobutan’rad e rayog ni nge ayuweg boch e girdi’ ngar manged pi tamachib nib pasig ma ba’ angin.​—2 Peter 1:5-8.

Ngan Wereg e Machib u Mit e Tabinaw i Yan

10. Kristus nge pi gachalpen kakrom e kar daged e mang kanawo’ ni fan ko machib?

¹⁰ I dag Jesus Kristus ngak pi gachalpen rogon ni nge rin’ e maruwel rok ni ir e tamachib nib fel’ ni ngan fol riy. Murung’agen e machib ni tay Kristus nge pi apostal rok, Thin rok Got e gaar: “Me milekag Jesus i yan u lan e pi binaw ni ba ga’ nge pi binaw ni ba achig, ni be machibnag ngak e girdi’ e Thin Nib Fel’ ni murung’agen e gagiyeg rok Got. Me un fare ragag nga l’agruw i gachalpen ngak nga ranod.” (Luke 8:1) Ma uw rogon e pi apostal? Tomren ni kan puog e kan ni thothup nga dakenrad Pentecost 33 C.E., “urngin e rran u lan fare tempel ngu mit e tabinaw i yan ni ur ululgad ndar talgad ni yad be machibnag fare thin nib fel’ ni murung’agen Kristus, Jesus.”​—Acts 5:42.

11. Rogon ni yog Acts 20:20, 21, ma mang e ke rin’ Paul ni apostol ko maruwel rok ni i wereg e machib?

¹¹ Bochan ke un Paul ni apostal ko maruwel ni ngan wereg e machib u fithik’ e pasig, ma rayog ni nge yog ngak e piin piilal ni Kristiano u Efesus ni gaar: “Gimed manang ndariy ban’en ni gu tel romed ni gomanga ban’en nra ayuwegmed nnap’an ni gu be machibnagmed ma gu be skulnagmed u fithik’ e girdi’ ni yoor ngu lan e tabinaw romed i yan.” Nap’an ni be machib Paul ‘u mit e tabinaw i yan,’ me yan i guy e tabinaw ko pi tapigpig rok Jehovah, ni be pi’ e athamgil ngak e piin ni ke michan’rad? Danga’, ya bochan i weliy fan ni gaar: “Ma ri taareb rogon piyu Israel nge piin ni gathi yad piyu IsraeI nri gu ta’ chilen ngorad ni ngar pied keru’rad ko denen ni yad be ngongliy ngar sapgad ngak Got, me mich e Somol rodad ni Jesus u wan’rad” (Acts 20:20, 21) Ngan lemnag ni polo’, ma piin ni kar ognaged e yafas rorad ngak Jehovah e de t’uf ni ngan fil ngorad murung’agen ni ngar “pied keru’rad ko denen ni yad be ngongliy ngar sapgad ngak Got, me mich e Somol rodad ni Jesus u wan’rad.” I skulnag Paul e piin ni piilal ni Kristiano u Efesus ngar salapgad ko machib u mit e tabinaw i yan ma ke fil ngak e piin ni de michan’rad murung’agen e ngan pi’ keru’uy ko denen nge michan’. Rogon ni rin’ Paul e n’en ni aram rogon, ma be fol ko wo’ ni dag Jesus.

12, 13. Rogon nib puluw ko thin ni bay ko Filippi 1:7, ma mang e ke rin’ e girdi’ rok Jehovah u murung’agen mat’awrad ni ngar machibgad?

¹² Rayog ni ngeb e magawon ko maruwel ni ngan machib u mit e tabinaw i yan. Ni bod ni, bay boch e girdi’ nra damumuw ko ngiyal’ ni gad ra yan ko tabinaw rorad ni gad be fek e thin nu Bible. Gathi gad baadag ni ngada k’aringed e girdi’ ngar damumuwgad. Yugu aram rogon, fare maruwel ni ngan machib u mit e tabinaw i yan e bay u Bible, ma t’ufeg ku Got nge ngak e en buguli yoror rodad e ra k’aringdad ni ngad machibgad ni aram rogon. (Mark 12:28-31) Rogon ni ‘ngan ayuweg min gelnag mat’awdad ni nguuda machibgad u mit e tabinaw i yan, e ke yoor e case ni kad feked nga court, nib muun ngay fare Supreme Court nu Meriken. (Filippi 1:7) Ke chugur ni urngin yay ni re court nem e kar dugliyed ni dariy e kireb ko n’en ni gad be rin’. Baga’ ni yima dugliy ni gaar:

¹³ “Fare maruwel ni ngan wereg e pi tract rok pi yurba i teliw e reb e kanawo’ ni ke kakrom nrogon ni ma machib e missionary​—ni ke tabab ko ngiyal’ ni kan ngongliy e printing presses. Ireray e talin e maruwel nib gel gelngin ni ma fanay e pi teliw ko maruwel rorad u lan boor e duw ni ke yan. Re wo’ ney u rogon ni ngan wereg e machib e ri be fanay boor e teliw nib thilthil e ngiyal’ ney, ni colporteurs rorad e be fek fare Gospel i yan ngak bokum biyu e tabinaw mar bad nga tabinaw ko girdi’ ngar pingeged yad ni ngara adaged e machib rorad. . . . Re maruwel ney ko pi yurba’ i teliw e ku ri yibe tayfan u tan fare First Amendment [Motochiyel nu Meriken] ni bod rogon e liyor ni ma tay e pi galesiya nge machib ko pulpit.”​—Murdock v. Pennsylvania, 1943.

Mangfan ni Nge Ulul ko Machib?

14. Mang angin ni ra yib ko maruwel rorad ni ngan wereg e machib ni buchuw nge buchuw?

¹⁴ Boor fan ni ngan machib u mit e tabinaw i yan. Gubin ngiyal’ ni gad ra yan ngad guyed be’ u reb tabinaw, ma gad be guy rogon ni ngad yunged e awochngin e thin riyul’ u Bible. Gad ra sul ngorad, ma gad be athamgil ni ngad puoged boch e ran ngay. Ma rayog ni ngeb angin nga i mon’og i yan ni buchuw ma buchuw, arfan ni yoloy Paul ni gaar: “I gag e gu yung e awoch me tugul, mi Apollos e i puog e ran ngay, machane Got e be pi’ gelngin be ga’.” (1 Korinth 3:6) Ere ngada ululgad ‘ngad yunged ma gad puog e ran ngay’ ni be pagedan’dad ni Jehovah e ra ‘pi’ gelngin nge ga’.’

15, 16. Mang fan ni gad ma yib nga tabinaw ko girdi’ biyay nge biyay?

¹⁵ Gad be rin’ e maruwel rok e pi tamachib ya bochan yafas ko girdi’ e kan ta’ nga thatharen e riya’. Gad ra wereg e machib ma rayog ni ngad ayuweged gadad nge piin ni yad ma motoyil ngodad. (1 Timothy 4:16) Faanra kad nanged ni yafas ko be’ e kan ta’ nga thatharen e riya’, kemus ni taab yay ni ngada guyed rogon ni ngada ayuweged e cha’ nem? Ri danga’! Bochan ni ba l’ag e yafas ko girdi’ ngay, ma arfan ni nguuda sulod nga tabinaw rorad ni boor yay. Ma thi rarogon e girdi’. En ni kaygi yoor pa’ u puluwon ba ngiyal’ ma de yog ni nge motoyil ngom e sana ra yib e tayim rok ma ra adag ni nge motoyil ko thin nu Bible. Sana yugu be’ ko fare tabinaw e ra bing e mab, ma rayog ni ngam weliyew reb e thin nu Bible.

¹⁶ Gathi kemus ni rarogon e girdi’ e ra thil ya ku rayog ni thil e ngongol rorad. Ni bod ni, ke kireban’ be’ ya bochan ke yim’ be’ nib t’uf rok e rayog ni nge k’aring ni nge motoyil ko thin ko Gil’ilungun. Gad baadag ni ngad fal’eged laniyan’ e cha’ nem, ma ngada ayuweged ni nge naab nib t’uf e tirok Got rok, ma ngada daged ko uw rogon ni ngan gamaneg.​—Matthew 5:3, 4.

17. Mang e kenggin i fan gad ma rin’ e maruwel rodad ni ngan wereg e machib?

¹⁷ Kenggin i fan ni gad ra un ko machib u mit e tabinaw i yan ara ngad uned ko yugu boch e kanawo’ ni ngan wereg e machib e aram e lem rodad ni ri gad baadag ni ngari nang e girdi’ fithingan Jehovah. (Exodus 9:16; Psalm 83:18) Reb e taw’ath eram ni faanra maruwel rodad ni gadad e pi tamachib e ra ayuweg e girdi’ nib t’uf e tin riyul’ nge tin nib mat’aw rorad mar manged e piin ma pining e sorok ngak Jehovah! I yon’ fare psalmist e tang ni gaar, “Gimed e pagel nge rugod, nge piin ni pilibthir ma ku er rogon e piin ni bitir! Yad urngin ni ngar pininged e sorok nga fithingan Jehovah. Fithingan e ir e th’abi ga’ u fithik’ urngin e ngachal; ma feni sorok e ba tolang ko fayleng nge tharmiy.”​—Psalm 148:12, 13, NW.

Machib e Ba’ Angin ni Be Ayuwegdad

18. Uw rogon ni nge fel’rogodad riy ni ngad uned i wereg e machib?

¹⁸ Gad ra rin’ e maruwel ko tamachib ma ra ayuwegdad u boor e kanawo’ nib thilthil. Gad ra yan u mit e tabinaw i yan ni gad be fek fare thin nib fel’ ma ra ayuwegdad ni ngad maruweliyed e gum’an’ rodad nge gel ni faanra dan gol ngodad. Rogon ni gad ra mang pi tamachib nib manging’, mab t’uf ni ngad boded Paul, ni ke mang ‘urngin mit e girdi’ ngak urngin mit e girdi’ ni fan nrayog ni nge ayuweg boch e girdi’.’ (1 Korinth 9:19-23) Tin ke buch rodad u nap’an ni yibe machib e ra ayuwegdad ni ngad rin’ed ban’en u fithik’ e gonop. Ra pagan’dad ngak Jehovah ma gad ra mel’eg e thin nib puluw, ma rayog ni ngad folgad ko fonow rok Paul ni gaar: “Ma gubin ngiyal’ nthingar umogned e thin ngorad nib fel’ ma ba’ fan, ma thingar mu nanged rogon ni ngam pied e fulweg nib mat’aw ko tin ni ke fith be’ nge be’ ngomed.”​—Kolose 4:6.

19. Uw rogon ni ke ayuweg e kan ni thothup e pi tamachib?

¹⁹ Gadra wereg e machib ma ku ra k’aringdad ni ngad pagedan’dad ko kan ni thohtup rok Got. (Zekariah 4:6) Ma fapi woom’ngin ni​—“t’ufeg, felfelan, gapas, gum’an’, gol, fel’ ngak e girdi’, michan’, sumunguy, nge t’ar laniyan’”​—e ma tamilang u nap’an ni gad be machib. (Galatia 5:22, 23) Bay ban’en ni ma rin’ ngodad ni gad ma rin’ ngak e girdi’, ya ngan fol u rogon ni be pow’iydad e kan ni thothup ma ra ayuwegdad ni ngada daged e t’ufeg, ma gad ba felfelan’ mab gapas lanin’dad, ma gad ba gum’an’ nge gol, ma gad ra dag e fel’ ngak e girdi’ nge michan’, ma gad ra dag e sumunguy nge t’ar laniyan’ u nap’an ni gad be machibnag fare thin nib fel’.

20, 21. Mang boch e taw’ath ni ra yib ngak e girdi’ ni tamachib ni be par ni ma maruwel nib elmerin?

²⁰ Maku reb e taw’ath ni ma yib ngodad ni gadad e pi tamachib e aram e ke gel boch e runguy rodad ko girdi’. Nap’an ni ra weliy e girdi’ murung’agen e magawon rorad ni bod​—e m’ar, nge maruwel ndakuriy, nge skeng u lan e tabinaw—​dabda ngongolgad ni bod e piin tafonow, machane gad ma bieg boch e thin nu Bible nra pi’ e athamgil nga lanin’uy ma ma fal’eg lanin’rad. Gad ma lemnag e girdi’ ni yad ba malmit ko tirok Got ban’en machane be m’ug ni bay e t’ufeg rorad ko tin nib mat’aw. (2 Korinth 4:4) Ma rib gel e felfelan’ riy ni ngan pi’ e ayuw ko tirok Got ngak e piin “nib puluw rogon ni yad adag e yafas ni manemus”!​—Acts 13:48.

²¹ Gad ra un ko maruwel ni ngan wereg e machib ni gubin ngiyal’ ma ra ayuwegdad ni ngad tedan’dad ko tirok Got ban’en. (Luke 11:34) Ba mudugil ni ireray e n’en ni ra ayuwegdad ya faanra danga’ ma rayog ni nge wawliydad e chugum ni baga’ ni ireray e magawon ko re fayleng ney. John ni apostal e ke yog ngak e piin Kristiano ni gaar: “Dabi t’uf romed e tin ni ba’ u fayleng ara n’en nib mil fan nga fayleng. Faanra t’uf romed e tin bay u fayleng, ma aram e de t’uf e en ni Chitamangiy romed. Gubin ban’en nib mil fan ngaray nga fayleng - ni aram e tin nib tagan ban’en ni yima ar’arnag, ni tin nra guy e girdi’ ma yad ba adag ni nge yog ngorad, nge urngin ban’en ni bay u roy u fayleng nri ma uf e girdi’ ngay - dariy reb e pi n’ey ni yib rok e en ni Chitamangiy; ya urngin me yib rok e fayleng. Re fayleng ney nge urngin ban’en ni ba’ riy ni be yim’ e girdi’ ni bochan e bayi m’ay; machane en nra rin e tin m’agan’ Got ngay e ra par nib fos ndariy n’umngin nap’an.” (1 John 2:15-17) Nge par nib boor pa’ u puluwdad ni fan ko maruwel rok Somol ni gadad e pi tamachib e ra ayuwegdad ni dabi t’uf rodad e tin u fayleng.​—1 Korinth 15:58.

Ngan Ulunguy e Flaab u Tharmiy

22, 23. (a) Mang flaab e ke ulunguy e piin Kristiano ni tamachib? (b) Uw rogon ni nge ayuwegdad e bin migid e article?

²² Pasig ko machib ni fan ko Gil’ilungun e ra fek i yib e tin nib fel’ ndariy n’umngin nap’an. I dag Jesus e re n’en ney u nap’an ni yog ni gaar: “Dabmu ulunguyed e flaab u roy u fayleng, ya ra kirebnag e ngal nge t’ay ma ra yib e moro’ro’ nga naun nge iring. Machane ngam ulunguyed e flaab romed u tharmiy, ya dabi yib e moro’ro’ nga naun nge iring. Ya lanin’med e gubin ngiyal’ ni bay i par ko gin ni bay e flaab romed riy.”​—Matthew 6:19-21.

²³ Yibe athapeg ni nguuda ululgad ngad ulunguyed e flaab u tharmiy, ya gad manang ni dakuriy e taw’ath ni kab gel ko tin ni baaray ni ngad feked fithingan Jehovah ni Somol ni th’abi tolang ni gadad e Pi Mich rok. (Isaiah 43:10-12) Nap’an ni gad ra maruwel ni gadad e pi tapigpig rok Got, ma rayog ni ngad thamiyed ni bod fare ppin ni Kristiano ni ke pag 90 e duw rok me weliy murung’agen e yafas rok nib nu’w nap’an ni be pigpig ku Got ni gaar: “U fithik’ urngin e pi n’ey ma gu be pining e magar ngak Jehovah ni ke dag e gum’an’ ngog ko urngin e pi duw ney ni ke yan, ma gu ma meybil u fithik’ e yul’yul’ ni nge mang Chitamag ni ma t’ufegeg ndariy n’umngin nap’an.” Faanra ngauda t’ufeged e tha’ u thildad Got ni aram rogon, mab mudugil ni gad baadag ni ngada rin’ed e maruwel rok e en tamachib ko kanawo’ nib polo’. Bin migid e article e ra ayuwegdad ni ngad guyed ko uw rogon ni ngarda mu’naged i wereg e machib.

Uw Rogon ni Ngam Pi’ e Fulweg?

• Mang fan ni thingarda rin’ed e maruwel rok e tamachib?

• Mang e rayog ni nga mog u murung’agen e maruwel rok e pi tamachib kakrom nge chiney?

• Mang fan ni nguuda wereged e machib u mit e tabinaw i yan?

• Uw rogon nra yib angin ngom nra ngam rin’ e maruwel rok e tamachib?

[Picture on page 18]

Pi tamachib ni bod Filip nge pi fak ni ppin e bay e piin taarebrogorad e ngiyal’ ney

[Picture on page 22]

Uw rogon ni ra yib angin ngom nfaanra ngam wereg fare thin nib fel’ ngak yugu boch e girdi’?