Angin Nib Fel’ni Yib Ko Fare Thin Nib Fel’

“Jehovah e ke turguyeg ni nguu gog fare thin nib fel’ ngak e piin nib sobut’ lanin’rad. I l’ugeg ni nggu ayuweg e piin ni ke m’ingan’rad, . . . muug fal’eg laniyan’ e piin ni yad be yor.”—ISAIAH 61:1, 2, New World Translation.

1, 2. (a) Mang e i dag Jesus ni ra rin’, ma uw rogon? (b) Mang flaab e ra fek fare thin nib fel’ i yib ni ke weliy Jesus?

CHIROFEN ni sabbath u nap’an ni kefini tabab Jesus ko maruwel rok ni ngan wereg e machib, e i yan nga tafen e muulung u Nazareth. Rogon e thin ni kan yoloy e be gaar, “mi ni pi’ e babyor rok Isaiah ni profet ngak, me pithig fare gi babyor ni kan bachiy ko fa gin’en ni kan yoloy ni gaar: ‘Kan ni thothup rok Jehovah e keb nga dakenag, ya ke liyfeg ni nggu machibnag e Thin nib Fel’.’” Me ulul Jesus ngay i beeg boch fapi thin ni kan yiiynag. Me par nga but’ me yog ni gaar: “Thin ni kefin mu rung’aged e ke m’ug nib riyul’ e daba’.”—Luke 4:16-21, NW.

² Ireray e kanawo’ ni i dag Jesus ni ir fare tamachib ni kan yiiynag, ir e en ni ma wereg e thin nib fel’ ma ra fal’eg lanin’uy. (Matthew 4:23) Ma riyul’ ni rib fel’ fare thin nra weliy Jesus! I yog ngak e piin ni be motoyil ko thin rok ni gaar: “I gag e tamilang ko girdi’ nu fayleng. En nra i lekeg e ke yog e tamilang ko yafas ngak ma dabki yan u fithik’ e lumor biid.” (John 8:12) Maku i yog ni gaar: “Faan gimed ra fol ko thin ni gu be machibnag ngomed ma aram e kari mudugil ni kam manged pi gachalpeg; ma bay mu nanged e tin riyul’, ma tin riyul’ e ir e bayi ayuwegmed nge dab kum pired ni gimed e sib.” (John 8:31, 32) Arrogon, Jesus e ir e en ni bay “fapi thin rok ni ma pi’ e yafas ndariy numngin nap’an.” (John 6:68, 69) Tamilang, nge yafas, nge puf rogoy—rriyul’ ni ereram e pi flaab ni nguun chaariy!

3. Mang thin nib fel’ e i machibnag pi gachalpen Jesus?

³ Tomren e Pentekost 33 C.E., me ulul e pi gachalpen Jesus iyan ko maruwel ni ngan wereg e machib. Kar machibnaged fare “thin nib fel’ ko Gil’ilungun” ngak piyu Israel nge girdien e pi nam. (Matthew 24:14; Acts 15:7; Roma 1:16) Piin ni ke adag e machib e kara nanged Got ni Jehovah. Kan pithigrad ni dabkuura pired ni sib ko teliw mi yad mang bang ko fare nam ni spiritual mab biech, ni “fare Israel rok Got,” ni yad bang ko piin ni athap rorad e yad ra un ku Somol rorad i Jesus Kristus ngar gagiyeggad u tharmiy ndariy numngin nap’an. (Galatia 5:1; 6:16; Efesus 3:5-7; Kolose 1:4, 5; Revelation 22:5) Riyul’ ni aram e pi taw’ath nib tolang puluwon!

Ngan Wereg e Machib ko Ngiyal’ N’ey

4. Uw rogon ni fare maruwel ni ngan machibnag fare thin nib fel’ e yibe lebuguy ko ngiyal’ ney?

⁴ Ngiyal’ ney, ma fapi Kristiano ni kan dugliyrad, e yad be dunubiy fare “ulung ni baga’” ni be yoor i yan ni ka nog “yugu boch e saf” ngay, yad be ulul ni ngar lebguyed fare maruwel ni Jesus e som’mon ni kan pi’ ngak. (Revelation 7:9; John 10:16) Ma angin ni ke yib riy, e kan wereg e thin nib fel’ ko pi binaw i yan ni boor ni dawori buch ban’en ni aram rogon biid. U lan 235 e nam nge pi binaw i yan, ma Pi Mich rok Jehovah e ka ranod ngay ni ngar “wereged e thin nib fel’ ngak e piin nib sobutan’rad . . . , ni ngar ayuweged e piin ni ke m’ingan’rad, ma ngar machibgad ni ngan pag e piin ni kan kolrad ma ngan pithig owchen e piin bay u kalbus; ni fan ni ngan weliy ngorad ere duw ni kab fel’ laniyan’ Jehovah nge fare rran ni ra fulweg Got taban e kireb; min fal’eg laniyan’ e piin ni yad be yor.” (Isaiah 61:1, 2, NW) Arfan, ni maruwel ko Kristiano ni ngan wereg e machib e ke be ulul i yan ni ma yibnag e flaab ngak e girdi’ ni yoor ma riyul’ ni ma fal’eg laniyan’ e “piin ni keb e gafgow ngorad.”—2 Korinth 1:3, 4.

5. Rogon ni yima machibnag fare thin nib fel’, uw rogon nib thil e Pi Mich rok Jehovah ko fapi galesiya ni yad bang ko Christendom?

⁵ Ba riyul’ ni pi galesiya ko Christendom e ma pi’ e ayuw u boor e kanawo’ u rogon ni ngan wereg e machib. Boor e piin yima l’ograd ni aram e missionary nga yugu boch e nam ni ngar pingeged e girdi’ u fithik’ e towasar. Ni bod ni The Orthodox Christian Mission Center Magazine e be weliy murung’agen e maruwel ko fapi Orthodox missionary u Madagascar, nge southern Africa, nge Tanzania, nge Zimbabwe. Machane, taabrogon ko fapi galesiya nu Christendom, ma u lan fare Galesiya ni Orthodox, e boor ko baley ko girdi’ rorad e darur uned ko re maruwel ney. Ran taarebnag mab thil, ya urngin e Pi Mich rok Jehovah ni kar ognaged yad e yad ma athamgil ni ngar uned i wereg e machib. Ke tamilang u wan’rad ni ngan machibnag fare thin nib fel’ e aram e mich riy nib riyul’ e michan’ rorad. I yog Paul ni gaar: “U gum’erchaen be’ e ma maruweliy e michan’ rok ni fan ko tin mat’aw ban’en, machane l’igin be’ e ma machibnag ngak e girdi’ ni fan e nge yog e ayuw ko yafas ngak.” Michan’ ni dabi k’aring be’ ni nge rin’ ban’en e ba yam’.—Roma 10:10, NW; James 2:17.

Thin nib Fel’ ni Ma Fek i Yib e Flaab ni Dariy N’umngin Nap’an

6. Mang thin nib fel’ e yibe machibnag ko ngiyal’ ney?

⁶ Ma machibnag e Pi Mich rok Jehovah e thin nth’abi fel’. Yad ma pithig e Bible rorad ni nguur daged ngak e piin ni baadag e machib ni ke pi’ Jesus e yafas rok ni maligach ni nge pi’ ko girdi’ reb e kanawo’ ni ngara chuchugurgad ku Got, ma ra n’ag fan e denen rorad, nge fare athap ni nge yog ngorad e yafas ni manemus. (John 3:16; 2 Korinth 5:18, 19) Yad ma machibnag ni kan fal’eg e Gil’ilungun Got u tharmiy u tan pa’ fare Pilung ni kan dugliy ni Jesus Kristus, ma daki n’uw nap’an me chuweg e tin kireb u fayleng me gagiyegnag ni ngan sulweg e Paradis nga rogon. (Revelation 11:15; 21:3, 4) Rogon ni ke lebug e yiiy rok Isaiah, ma yad be yog ngak e piin buguli yoror rorad ni chiney e ir “fare duw ni kab fel’ laniyan’ Jehovah” ya ka bay e tayim ko girdi’ ni ngar folgad ko fare thin nib fel’. Maku yad ma ginangey ni ke chuchugur ni ngeb “fare rran ni ra fulweg e Got rodad taban e kireb” ko ngiyal’ ni ra thang Jehovah e pogofan rok e piin nib kireb ni dar kalgadngan’rad.—Psalm 37:9-11.

7. Mang e n’en ni ke buch ni be dag ni Pi Mich rok Jehovah e ba taareban’rad, ma mang fan ni yad be falfalan’ ni ke taareban’rad?

⁷ U lan e fayleng ni ke longobiy e gafgow nge riya’, ma kari mus ni re thin nib fel’ ney e ra yib angin ndariy n’umngin nap’an. Piin ni kar folgad riy e kar manged bang ko pi walag ni Kristiano ni ke taareban’rad ndarur paged e nam, nge ganong nib thilthil, nge magawon ko salpiy nge yoor raba’nagrad. Ka ron’ed nga dakenrad e ‘t’ufeg ni bod e munmad, ni ir e bod yuyal i gaf nib gel nra m’ag gubin e girdi’ nga taabang.’ (Kolose 3:14, NW; John 15:12) Fa binem e duw e kan guy ni aram rogon u reb e nam nu Africa. Reb e rran ni kakadbul ma ke od e girdi’ u reb e mach ni ir e baga’ ko fare nam nga lingan e boyoch. Ke tabab reb e ulung ni ngar chamgad ko am rorad. Ma ba tomgin e cham ni be yan u rom. Nap’an ni ke tabab reb ulung ko wagey, ma reb e tabinaw ko Pi Mich ni kan gathibthibnagrad nbochan ni ke par yugu boch e Pi Mich rorad ni kar bad u yugu reb e ulung nib thil ko girdi’ nu rom. Girdien fare tabinaw e kar fulweged ni gaar: “Kari mus ni goo Pi Mich rok Jehovah e bay u naun romad.” Ulung ko girdi’ nib thilthil e dariyfan u wan’rad; ya t’ufeg ni Kristiano—nge ngan fal’eg laniyan’ e piin ni ke t’uf e ayuw—rorad. Be’ rorad ni gathi reb e Mich e ke yog ni gaar: “Girdien urngin e teliw e ma yognag yugu boch e girdi’ u lan e ulung rorad. Kemus ni Pi Mich rok Jehovah e danga’.” Boor yay ni ke buch ban’en ni taabrogon ngay u boch e binaw ni ke wagey nbochan e cham ni sum u fithik’ e girdi’ ni ma par riy ma yima dag ni Pi Mich rok Jehovah e riyul’ “ni bay e t’ufeg ko walag rorad ngak urngin e girdi’ u lan e ulung.”—1 Peter 2:17.

Fare Thin nib Fel’ e Ra Thiliyeg e Girdi’

8, 9. (a) Mang e n’en ni ke thiliyeg e piin ni kar adaged e thin nib fel’? (b) Mang e ke buch ni be dag gelngin fare thin nib fel’?

⁸ Fare thin nib fel’ e ba peth ko n’en ni ke yog Paul ni “fare yafas e chiney nge yafas ni bay yib.” (1 Timothy 4:8, NW) Gathi ke mus ni ma ognag e athap nib fel’ mab mudugil nga m’on ya ku ra fal’eg rogon “e yafas e chiney.” Pi Mich rok Jehovah, e ra be’ ma be gagiyegnag e thin rok Got, ni fare Bible, nra pow’iy e yafas rok nib peth ko tin nib m’agan’ Got ngay. (Psalm 119:101) Kan biechnag pangirad ya yad be maruweliy ni ngari yog ngorad e ngongol nib mat’aw nge yul’yul’.—Efesus 4:24.

⁹ Mu lemnag e n’en ni ke buch rok Franco. Immoy e magawon rok ni rib ta damumuw. Yu ngiyal’ ni ra kireb ban’en, ma ra damumuw ni rib gel ma ra bilig boch ban’en. Pi Mich rok Jehovah e ke fil e Bible ngak leengin, ma ngongol ko Kristiano ni ke guy rorad e ir e ke ayuweg Franco ni nge thil. Ke un ngorad ko fol Bible ma tomur riy e ke yog rok ni nge dag fare woomngin e kan ni thothup ni gapas nge t’ar laniyan’. (Galatia 5:22, 23) Ma ir bagayad ko piin ni kan taufenagrad u Belgium ni yad 492 u nap’an e duw ni 2001. Maku, mu lemnag Alejandro. Re pagal nem e ke mecham ko drug ni ma yan nge mada’ nga tafen e dow ni nge gay boch ban’en nrayog ni nge pii ni chuway’ ni fan ni nge chuwiy e drug. Nap’an ni ke gaman 22 e duw rok, me pining e Pi Mich rok Jehovah Alejandro ni nge un ko fol Bible, me un ngay. Ma beeg e Bible ni gubin e rran ma ma un ko muulung ko Kristiano. Ke biechnag e yafas rok ni rib papey ya dawori gaman nel’ e pul, me yog rok ni nge un ko fare maruwel ni ngan i wereg e machib—ma ir bagayad ko fa 10,115 e girdi’ ni kara uned ngay fa binem e duw u Panama.

Fare Thin nib Fel’ —Reb e Taw’ath ko Piin nib Sobutan’

10. Mini’ e ke fol ko fare thin nib fel’, ma uw rogon ni ke thil e lem rorad?

¹⁰ I yiiynag Isaiah ni fare thin nib fel’ e yira machibnag ngak e piin nib sobutan’rad. Mini’ e piin nib sobutan’rad? Yad e piin ka nog murung’agrad ko fare babyor ni Acts ni “ba fel’ e yafas ndariy n’umngin nap’an u wan’rad.” (Acts 13:48, NW) Yad e piin nib sobutan’rad nrayog ni ngan pirieg u fithik’ e pi yuraba’ i girdi’ nib thilthil e liw rorad ni kar binged gum’ercharad ko thin riyul’. Pi cha’ nem e ke tamilang u wan’rad ni yira rin’ e tin nib m’agan’ Got ngay e ma yibnag e flaab ni kab fel’ ni dabi chuchugur ko pi flaab ni ma ognag e fayleng. (1 John 2:15-17) Machane, uw rogon ni Pi Mich rok Jehovah e rayog ni ngara ayuweged be’ me taw nga gum’erchaen e machib ni yad ma wereg?

11. Rogon ni yog Paul, ma susun uw rogon ni ngan machibnag fare thin nib fel’?

¹¹ Mu lemnag e n’en ni dag Paul ni apostal, faani yoloy e babyor me pi’ ngak piyu Korinth ni gaar: “Pi walageg ni girdien Kristus, fa ngiyal’ nem ni gub ngomed ni nggu machibnag ngomed e tin riyul’ ni i ta’ Got nib mith mfini dag, ma da ug non ni gu be maruwel nga yu bugithin nib pag rogon ara gu be welthin ni bod rogon e girdi’ nib tolang e skul rorad. Ya gu turguy u wun’ug ni nggu pag talin urngin ban’en ko ngiyal’ ni gu ba’ romed, ma kemus ni Jesus Kristus nri yam’ ni tay u daken e baley i gek’iy e ir e nggu ta’ nga lanin’ug.” (1 Korinth 2:1, 2, NW) De rin’ Paul ban’en ni fan ni nge gin e piin ni ra motoyil ngak ya nga rogned e sorok ngak nbochan e tin ke fil. Kemus ni thin riyul’ ni yib rok Got e ke fil ngorad, ni aram e tin riyul’ ni bay u Bible e chiney. Maku, amu lemnag e thin ni ke yog Paul ngak Timothy ni ur maruwelgow u taabang ni gaar: “Mu machibnag fare thin, mu rin’ nib papey.” (2 Timothy 4:2, NW) Ba t’uf ni nge machibnag Timothy “fare thin” ni aram e thin rok Got. Maku ke yoloy Paul ngak Timothy ni gaar: “Mu athamgiliy u rogon nrayog rom nge par e maruwel rom nrib fel’ u mit Got, ni bod rogon be’ ni girdien e maruwel nder tamra’ ko maruwel rok, ni ir be’ ni ma machibnag e thin rok Got nrogon.”—2 Timothy 2:15.

12. Uw rogon ni Pi Mich rok Jehovah ko ngiyal’ ney e yad be fol ko thin rok Paul nge tin ni i rin’?

¹² Ma fol e Pi Mich rok Jehovah ko tin ni ke rin’ Paul, maku yad ma fol ko thin ni ke yog ngak Timothy. Yad manang gelngin e thin rok Got nge rogon i fanay nib fel’ rogon ya yad ma gay rogon ni ngar daged ngak e piin ni buguli yoror rorad boch e thin nib puluw ni fan ko athap ma ma fal’eg lanin’uy. (Psalm 119:52; 2 Timothy 3:16, 17; Hebrews 4:12) Riyul’, ri yad ma fanay e pi babyor ni kan fek e thin riy u Bible ma piin ni baadag e machib e ra yog ngorad boch e tamilangan’ ko Bible ni ba puf rogorad. Machane gubin ngiyal’ ni yad ma gay e kanawo’ ni ngar daged ngak e girdi’ e thin nu Bible. Yad manang ni Thin rok Got ni kan thagthagnag e ra thiliyeg gum’erchaen e piin nib sobutan’rad. Ma bochan ni yad ma yodorom maku aray rogon ni ku ra gel e michan’ rorad.

“Ngan Fal’eg Laniyan’ Urngin e Piin Be Yor”

13. U lan e duw ni 2001, mang e n’en ni ke buch ma wenegen e ke yoor e girdi’ ni ke kireban’rad nib t’uf ni ngan fal’eg laniyan’rad?

¹³ Boor e gafgow ni keb ko duw ni 2001, ma wenegen, e boor e girdi’ nib t’uf ni ngan fal’eg lanin’rad. Fare pul ni September ma ke yib e magawon ni aram rogon nib gel u Meriken, ya ke kirebnag fapi terrorist fare World Trade Center u New York nge fare Pentagon nib chuchugur nga Washington, D.C. Uw feni gel e marus ni keb ngak e girdi’ ko re nam nem ni polo’ nbochan fare cham ni kan tay! Yugu aram rogon ni ke buch ban’en ni aram rogon, ma ma athamgil e Pi Mich rok Jehovah ni ngar lebguyed e maruwel rorad i ‘fal’eg laniyan’ urngin e piin ni yad be yor’. Boch ban’en ni ke buch e ra dag rogon ni kar rin’ed e re n’ey.

14, 15. Uw rogon ni Pi Mich e ke yog rorad ni ngara fanayed e thin nu Bible nib fel’ rogon u l’agruw ban’en nib thilthil ngalan’ ni ngara fal’eged laniyan’ e girdi’ ni ke kireban’rad?

¹⁴ Reb e Mich ni ppin ir e pioneer e ke chuchugur ngak fare pin ni immoy u tooben e kanawo’ e ke fith ngak ko mang e be lemnag u murung’agen fare cham ni kefini ta’ e piin terrorist. Me tabab fare ppin ko mayor. Me yog ni kari kireban’ ma be finey ni faan goma nga rayog ma ke pi’ boch e ayuw. Me yog fare Mich ngak ni gadad gubin e gad ba t’uf rok Got, ma ke beeg Isaiah 61:1, 2. Ma ke guy fare pin nib m’ag ngak e pi thin ney ni Got e thagthagnag, ni be yog ni urngin e girdi’ e ke kireban’rad. Ke fek reb e tract me ning ngak fare Mich ni ngeb nga tabinaw nge guy.

¹⁵ L’agruw e Mich ni yow ma un ko maruwel ni ngan wereg e machib e kara mada’nag reb e pumoon u lan e koyeng rok. Ka rognew ni yow baadag ni ngar dagew boch e thin nu Bible ngak ni ma fal’eg lanin’uy nbochan e n’en ni kefin i buch ko fare World Trade Center. Rogon nib puluw nga laniyan’ ma aram e kara biegew 2 Korinth 1:3-7, nib muun ngay fapi thin ni be gaar: “Fal’eg lanin’uy . . . u daken Kristus.” Ke falfalan’ fare pumoon ko gali Mich nem ni buguli yoror rok ni yow be wereg boch ban’en ni ra fal’eg laniyan’ yugu boch e girdi’ me yog ni gaar: “Got e ra flaabnagmew ko maruwel nib fel’ ni gimew be rin’.”

16, 17. Mang l’agruw ban’en ni ke buch ni be dag gelngin e Bible ni ke ayuweg e girdi’ ni ke kireban’rad ara kar magawongad nbochan e gafgow nib gel ni ke yib?

¹⁶ Reb e Mich e be yan ni nge guy boch e girdi’ ni baadag e machib ma ke mada’nag e bitir ko fare pin ni kafram e ke dag ni baadag e machib me weliy ni ri ma lemnag salpen e piin ni buguli yoror rok u tomren e n’en ni ke buch ndawori n’uw nap’an. Ke gin fare pumoon ni fare Mich e ke fanay e tayim rok ni fan ni nge yan nge nang salpen e girdi’. Ke yog ni be maruwel ko gin nib chuchugur boch ko fare World Trade Center u nap’an ni ke buch e re n’em ma ke guy urngin ni buch. Nap’an ni ke fith ko mang fan ni ke pag Got ni ngeb e gafgow, ma ke beeg fare Mich boch e thin nu Bible, nib muun ngay e thin ko Psalm 37:39, ni be yog ni: “Jehovah e ra ayuweg e piin nib mat’aw; ma ir e manab rorad ko ngiyal’ ni keb e gafgow.” Ke fith fare pumoon ko uw rogon boch salpen nge tabinaw rok, me pining ni nge sul biyay, nge pining e magar ngak ni fan keb i guy.

¹⁷ Bagayad u fithik’ bokum biyu’ fapi girdi’ ni ke kireban’rad ni ke fal’eg e Pi Mich rok Jehovah laniyan’ ko fapi rran nga tomren e cham ni ke tay fapi terrorist e reb e ppin ni ke mada’nag fare Mich u nap’an ni be yan ni nge guy e piin buguli yoror rok. Kaygi gel e damumuw rok nbochan e n’en ni ke buch me motoyil u nap’an ni yad be beeg e thin ni bay ko Psalm 72:12-14 ni gaar: “Piin ni gafgow e yad ra wenig ngak ni nge ayuwegrad ko gafgow ni ke yib ngorad ma ra chuwegrad u fithik’, ma ku er i tay e piin ni gafgow ni dabi siy ni ngan ayuwegrad ma kan pagrad nda ni ayuwegrad. Ma runguy e piin ni meewar ma ba gafgow; ma ayuweg e pogofan rok e piin ni gafgow. Ma ra ayuweg e yafas rorad u fithik’ e piin ni ma magawonnagrad ngu fithik’ e cham, mab tolang puluwon e racha’ rorad u wan’.” Ri bay fan e pi thin nem! Me ning fare pin ngak e Pi Mich ni ngar bieged biyay e pi verse nem me piningrad ni nga ranod nga tabinaw rok ni ngar ululgad i weliy boch. U tomuren fare sabethin rorad min tababnag e fol Bible.

18. Uw rogon ni ke ayuweg reb e Mich e piin ni buguli yoror rok u nap’an ni kan pining ni nge fek e meybil ni fan ngorad?

¹⁸ Reb e Mich ni ma maruwel u reb e restaurant u bang e nug nib fel’ rogon e girdi’ riy e dar adaged fare thin nib fel’ ko Gil’ilungun. Tomren e cham ni ke tay e pi terrorist, ma ke m’ug ni ke rus e girdi’. Rofen ni Biernes ni nep’ u tomren e cham ni kan ta’, ma ani ga’ ko fare restaurant e ke pining urngin e girdi’ ni ngar bad nga wen ngar koled e candle, ngar th’abed gulungrad bochuw nguur lemnaged ban’en ni fan ko piin ni kar m’ad ara kar gafgowgad nbochan e re magawon nem. Ke dag fare Mich ni be tayfarad, ma aram me yib nga wen ni be par u tooben e kanawo’ ni be th’ab gulungan. Manang fa cha’ ni ga’ rorad ni ir reb e minister ko Pi Mich rok Jehovah, ere tomren urngin ban’en ni ur lemnaged, me ning ngak fare Mich ni nge fek e meybil rorad. Ke fol fare Mich ko n’en ni be ning. Nap’an e meybil rok, ke weliy ni kaygi yoor e girdi’ ni ke kireban’rad machane ke yog ni de t’uf ni nge par nib kireban’rad ni bod ndakuriy e athap rorad. Me yog murung’agen e tayim ndabki yib e magawon ni aram rogon me yog ni urngin e girdi’ ma rayog ni ngara chuchugurgad ko fare Got ni ma fal’eg lanin’uy u daken e tamilangan’ ni yib u Bible. Tomren ni ke yog “Amen,” ma fa cha’ ni ga’ rorad—mab muun ngay e girdi’ ni ur moyed u wuru’ fare restaurant—e kar bad ngak fare Mich, me pining e magar ngak, me gumuchmuch ngak, me yog ni aram e meybil ni bin th’abi fel’ ni ke rung’ag.

Angin ni Yib Ngak Girdien e Flak

19. Mang e n’en ni ke buch ni be dag ni boch e girdi’ e yad manang ni Pi Mich rok Jehovah e ri yad ma dag e ngongol nib fel’?

¹⁹ Ngiyal’ ney, ni baga’ ni fapi flak ni bay e Pi Mich rok Jehovah riy nib pasig e keb angin e maruwel riy nbochrad—nrogon e n’en ni ke yog boor e girdi’. Arrogon, girdi’ ni ma mon’eg e gapas, nge yul’yul’, nge gafarig nib biech e rib mmutrug ni ra suruy lanin’rad ko tin nib mat’aw? U reb e nam nu Central Asia, ma ke mada’nag e Pi Mich fare officer ni ke retire ko fare state security agency kafram. Ke yog ni ba’ biyay ni kan pi’ ngak reb e maruwel ni nge fal’eg i yaliy e pi yuraba’ i teliw. Nap’an ni ke fal’eg i yaliy e Pi Mich rok Jehovah, ma ke gin nga ferad yul’yul’ nge feni fel’ e ngongol rorad. Ke ngat nga feni mudugil e michan’ rorad ma machib ni yad be fol riy e ba puluw ko Thin nu Bible. Re moon ney e ke adag ni nge un ko fol Bible.

20. (a) Mang e be dag fare maruwel ni ke ta’ e Pi Mich rok Jehovah nga babyor fa binem e duw ni ke yan? (b) Mang e be dag ni kab yoor e maruwel ni bayni ngan rin’, ma uw rogon angin e maruwel rodad ko machib u wan’dad?

²⁰ Bochan e pi n’en ni ke buch ni kan ta’ ko re article ney, ni kan fek ko bokum biyu’ e n’en ni kar rin’ed nrayog ni ngan weliy, mab tamilang ni be dag ni Pi Mich rok Jehovah e rib yoor e maruwel ni kara rin’ed ko duw ni 2001.a Kar nonad ngak bokum milyon e girdi’, ma kar fal’eged laniyan’ e girdi’ ni ke kireban’rad, ma kan flaabnag e maruwel rorad keb angin e machib. Immoy 263,431 e girdi’ ni kara ognaged yad ku Got ma pow riy ni kar daged e kara uned ko taufe. U gubin yang u fayleng, ma urngin e piin ni tamachib e ke mun 1.7 pasent ngorad. Ma bochan e immoy 15,374,986 ni kara uned ko fare madenom ko Puguran ko yam’ ni tay Jesus e be m’ug ni ri ka boor e maruwel ni ngan rin’. (1 Korinth 11:23-26) Yibe athapeg ni ngada ululgad ngad fal’eged i gay e piin nib sobutan’ nra adag e thin nib fel’. Ma nap’an ni dawori m’ay fare duw nib fel’ laniyan’ Jehovah, ma yibe athapeg ni gad ra ulul i fal’eg laniyan’ e piin “ke kireban’rad.” Uw feni fel’ e maruwel ni gad be un ngay! Rib mudugil ni gadad gubin ma ra yib ngan’dad e thin rok Isaiah ni gaar: “Ba mudugil ni ri gu ra falfalan’ ngak Jehovah. Ma ra falfalan’ e yafas rog ngak e Got rog.” (Isaiah 61:10, NW) Yibe athapeg ni manga ki ulul Got i fanaydad u nap’an ni be lebuguy e pi thin ney ni kan yiiynag ni gaar: “Jehovah ni ir e Somol rodad ni ba Th’abi Tolang e ra gagiyegnag nge tugul e tin nib mat’aw ya nga nog e sorok ngak u p’eowchen urngin e nam.”—Isaiah 61:11, NW.

[Footnote]

Ka Ga Manang?

• Uw rogon ni piin nib sobutan’rad e kar flaabgad nbochan fare thin nib fel’ ni i machibnag Jesus?

• Mang flaab e keb ngak e piin ni ke fol ko maruwel ni ngan wereg e machib ni ke tay pi gachalpen Jesus ko fa bin som’mon e chibog?

• Uw rogon ni keb angin ngak e piin ni kar folgad ko fare thin nib fel e chiney?

• Uw rogon u wan’dad e maruwel nib fel’ ni ngan wereg e machib?

[Chart on page 17-20]

2001 SERVICE YEAR REPORT OF JEHOVAH’S WITNESSES WORLDWIDE

(See bound volume)

[Pictures on page 13]

Pi Mich rok Jehovah e gubin ngiyal’ ni ri yad ma lemnag e maruwel nib mil fan ngorad ni ngara wereged e machib

[Pictures on page 15]

Piin ni kar folgad ko fare thin nib fel’ e kar manged bang ko pi walag u ga’ngin yang e fayleng ni kar taarebgad