“Be Fek I Yib E Thin Nib Fel’ Ni Kab Gel Boch E Fel’ Riy.”

“Rib fel’ rifrifen ay e ani be milekag u daken e burey . . . ni be fek i yib e thin nib fel’ni kab gel boch e fel’ riy.”​—ISAIAH 52:7, NW.

1, 2. (a) Mang boch e kireb ni be buch ni gubin e rran? (b) Uw rogon laniyan’ e girdi’ ni bochan e goo thin nib kireb e yad be rung’ag?

NGIYAL’ ney ma ke kireban’ e girdi’ u fayleng iyan ni bochan e kari yoor e thin nib kireb. Yad ra cheleg e pi radio rorad mi yad rung’ag morngaagen e liliy ni ke gafgow e fayleng riy. Yad ma yaliy e news ko television mi yad guy yaan e bitir ni yad be yim’ ko uyungol ni yad be wenig ni ngan ayuwegrad. Yad ra bieg u lan e shimbung morngaagen e donmach ni ke kirebnag e naun me yim’ bokum e girdi’ riy ni dariy ban’en ni kar bucheged.

² Arrogon, gubin e rran ma bay e pi n’en nib kireb ni be buch. Kari thil rarogon e fayleng​—ma be ubchiya’ iyan. (1 Korinth 7:31) Reb e shimbung nu Europe e be yog ni yu ngiyal’ ma “gowa be n’en ni nge math e re fayleng ney.” Aram fan ni be yoor iyan e girdi’ ni kari magafan’rad! Be’ nu Meriken e ke weliy morngaagen e news ko television nu Meriken ni be gaar: ‘Ma mulan’ug u tomren ni gu ma yaliy e news ko television. Ya goo thin nib kireb e bay riy. Kaygi gel e tomal u lanin’ug ni bochan.’ Maku arrogon e lem rok bokum million e girdi’ u Meriken.

Thin ni Thingari Rung’ag Urngin e Girdi’

3. (a) Mang thin nib fel’ ni bay u lan e Bible? (b) Mang fan ni baga’ fan fare thin nib fel’ u morngaagen Gil’ilungun Got u wan’um?

³ Rayog ni ngan pirieg e thin nib fel’ u lan e re fayleng ney, fa? Ri rayog! Ke fel’ lanin’dad ni bochan e gad manang ni bay e thin nib fel’ u lan e Bible. Re thin nib fel’ ney e morngaagen Gil’ilungun Got ni ra chuweg e liliy, nge uyungol, nge bugel, nge mahl nge urngin mit e kireb. (Psalms 46:9; 72:12) Aram e thin nib fel’ ni thingari rung’ag urngin e girdi’, fa? Arrogon laniyan’ e Pi Mich rok Jehovah. Ma ba gilbugurad ni bochan e maruwel rorad ni yad be wereg fare thin nib fel’ u morngaagen Gil’ilungun Got nge rung’ag e girdi’ ko pi nam.​—Matthew 24:14.

4. Mang boch ban’en ko machib rodad ni gad ra weliy ko re thin ney nge bin migid e thin?

⁴ Mang e rayog ni ngada rin’ed ya nguuda felan’gad ko machib ni gad be tay ni gad be wereg e re thin nib fel’ ney ma bay angin e machib rodad​—ni mus ko pi binaw ni gathi ri yi ba adag e machib rodad riy? (Luke 8:15) Gad ra weliy dalip ban’en ni baga’ fan ko machib rodad ma ra ayuwegdad ni ngada felan’gad ko machib rodad. Gad ra weliy (1) rogon e machib u lanin’dad, ara fan ni gad ma machib; (2) machib ni gad ma wereg ara pi n’en ni gad ma machibnag; nge (3) kanawoen e machib rodad ara rogon ni gad ma machib. Faanra bpuluw lanin’dad, mab tamilang e machib rodad, ma bay angin kanawoen e machib rodad, ma aram e rayog ni nge yoor e girdi’ nra rung’ag e bin th’abi fel’ e thin​—ni aram fare thin nib fel’ u morngaagen Gil’ilungun Got.a

Fan ni Gad Ma Un i Machibnag fare Thin nib Fel’

5. (a) Mang e ma k’aringdad ni ngada machibnaged e girdi’? (b) Mang fan nrayog ni nga nog ni gad be dag nib t’uf Got rodad u nap’an ni gad be fol ko fare motochiyel u Bible ni ngan machib?

⁵ Ngada weliyed e bin som’mon e n’en ni ra ayuweg e machib rodad​—ni aram e rogon e machib u lanin’dad. Mang fan ni gad ma machibnag fare thin nib fel’? Taareb lanin’dad Jesus. I gaar: “Ba t’uf rog e en ni Chitamangiy.” (John 14:31; Psalm 40:8) T’ufeg rodad ngak Got e ma k’aringdad ni ngada machibnaged e girdi’. (Matthew 22:37, 38) Ma tamilangnag e Bible ni bay rogon e t’ufeg rodad ngak Got nge machib ni gad ma tay ya be gaar: “Ya ba aray fan ni nge t’uf Got rodad: fan e ngad folgad ko tin ni ke yog ni ngad rin’ed.” (1 John 5:3; John 14:21) Ma ke tay Got chilen ni ngada ayuweged yugu boch e girdi’ ni ngar manged pi gachalpen Jesus. (Matthew 28:19) Riyul’ ni Jesus e ir e yog e re thin nem, machane ke sum e re thin nem rok Jehovah. Uw rogon? I weliy Jesus ni gaar: “Dariy ban’en ni kug rin’ ni gag e lem rog, machane ke mus ni gu be yog e tin ni ke yog e en ni Chitamagiy ngog ni nggog.” (John 8:28; Matthew 17:5) Ere nap’an ni gad be fol ko fare motochiyel ni ngan wereg e machib ma gad be dag ngak Jehovah ni ir e ba t’uf rodad.

6. Mang boch e kanawo’ ni t’ufeg rodad ngak Got e ma k’aringdad ni ngada machibnaged e girdi’?

⁶ Maku t’ufeg rodad ngak Jehovah e ma k’aringdad ni ngada machibnaged e girdi’ ya gad ba adag ni ngada tamilangnaged e pi ban rok Satan ni be wereg iyan. (2 Korinth 4:4) Ke togopuluw Satan ko gagiyeg rok Got nib mat’aw. (Genesis 3:1-5) Gad e Pi Mich Rok Jehovah ere ri gad ba adag ni ngada tamilangnaged ni ba sasalap Satan ma gad ba adag ni ngad ted ni ba thothup e ngochol rok Got u p’eowchen e girdi’ nu fayleng. (Isaiah 43:10-12) Maku gad ma un i machibnag e girdi’ ni bochan e kada nanged pi felngin Jehovah nge pi kanawo’ rok. Ba fel’ e thin u thildad Got ma ri gad ba adag ni ngada weliyed morngaagen e Got rodad ngak e girdi’. Pi kanawo’ rok Jehovah nge ngongol rok nib fel’ e ma felan’nagdad ma aram fan ni dabiyog ni nge dab ku da weliyed morngaagen. (Psalms 145:7-12) Gad ba adag ni ngada pininged e sorok ngak ma ngada weliyed e “pi n’en nrib fel’ ni ke ngongliy Got” ngak e piin nra motoyilgad​—1 Peter 2:9; Isaiah 43:21.

7. Ku mang yugu reb i fan ni gad ma machibnag e girdi’?

⁷ Ku bay yugu reb i fan ni gad ba adag ni nguuda machibgad: Ri gad ba adag ni ngada ayuweged e girdi’ ni kari tomal lanin’rad ni bochan e thin nib kireb ni yibe rung’ag ara bochan e kar gafgowgad. Gad ba adag ni ngada folwokgad rok Jesus. Mu bieg e n’en ni be weliy e Mark guruy ni 6 morngaagen.

8. Mang e ke tamilangnag e thin u Mark guruy ni 6 u rogon e girdi’ u wan’ Jesus?

⁸ I sul e pi apostal ko milekag ni ur ted ni kar wereged e machib mar weliyed ngak Jesus urngin ban’en ni kar rin’ed ara kar machibnaged. Manang Jesus ni ke magar pi gachalpen, me yog ngorad ni nga ranod nga bang ngar “toffangad buchuuw.” Ere ra afgad nga bowoch nga ranod nga bang ni ba gapas. Me lekrad e girdi’ ni yad be mil u dap’e l’ay mi yad taw ko gini bay Jesus nge pi gachalpen riy. Mang e rin’ Jesus? Be gaar e Bible: “Me guy e girdi’ ni pire’ ni pire’, me ri taganan’ ngorad, ya yad bod e saf nde moy e en ni ma gafaliyrad rorad.” (Mark 6:31-34) Runguy rok Jesus e ke k’aring ni nge machibnag fare thin nib fel’ ni yugu aram rogon ni ke yib e magar ngak. Ba tamilang ni kari runguy Jesus e pi girdi’ nem. Yad ba t’uf rok.

9. Mang e gad ra fil ko fare thin u Mark 6 u morngaagen fan ni gad ma machibnag e girdi’?

⁹ Mang e gad ra fil ko re thin ney? Ke mil fan ngodad ni gad e Kristiano ni ngada machibnaged fare thin nib fel’ ma ngada ayuweged e girdi’ ni ngar manged pi gachalpen Jesus. Ke tamilang u wan’dad ni thingar da wereged fare thin nib fel’ ya mm’agan’ Got ngay ni “urngin e girdi’ ni ngar thapgad ngak.” (1 Timothy 2:4) Machane gathi ke mus ni gad ma machib ni bochan e thingar da rin’ed ya ku gad ma rin’ ni bochan e t’ufeg. Faan gad ra runguy e girdi’ ni bod rogon ni rin’ Jesus ma gumir’chadad e ra k’aringdad ni nguuda rin’ed urngin e tin nrayog rodad ni nguuda machibnaged fare thin nib fel’ ngorad. (Matthew 22:39) Faanra aram fan ni gad ma machib ma ra k’aringdad ni ngada machibnaged fare thin nib fel’ ni dab da talgad riy.

Thin ni Gad Ma Wereg​—fare Thin nib Fel’ ni Morngaagen Gil’ilungun Got

10, 11. (a) Uw rogon ni weliy Isaiah morngaagen fare thin ni gad be machibnag? (b) Uw rogon ni ke fek Jesus e thin ni kab gel boch e fel’ riy i yib, ma uw rogon ni ke fol e pi tapigpig rok Got riy e ngiyal’ ney ko kanawo’ ni ke dag Jesus?

¹⁰ Ma uw rogon e bin l’agruw ban’en ko machib rodad​—fare thin ni gad be wereg? Mang e gad ma machibnag? Ke weliy Isaiah ni profet morngaagen fare thin ni gad be wereg ni gaar: “Rib fel’ rifrifen ay e ani be fek e thin nib fel’ i yib ni be wereg e thin u morngaagen e gapas, ni ir e ani ke fek i yib e thin nib fel’ ni kab gel boch e fel’ riy, ni ir e be wereg morngaagen e yafas, ni be gaar ngak Zion: ‘Got rom e ke mang pilung!’”​—Isaiah 52:7, NW.

¹¹ Fare thin rok Isaiah ni “Got rom e ke mang pilung” e ma puguran ngodad ni fare thin ni gad ra wereg e ir fare thin nib fel’ u morngaagen Gil’ilungun Got. (Mark 13:10) Mu tay fanam iyan riy ni be tamilangnag e thin rok Isaiah ni ba fel’ e thin ni gad be machibnag. I weliy Isaiah yu bugithin ni bod e “yafas” nge “thin nib fel’” nge “gapas” nge thin ni “kab gel boch e fel’ riy.” In miriay e duw nga tomren Isaiah u nap’an e bin som’mon e chibog ma ke lebguy Jesus Kristus e re thin ko profet nem ni ke dag e kanawo’ nib fel’ ni kari pasig ni ke wereg fare thin nib kab fel’ boch​—ni morngaagen Gil’ilungun Got ni bay yib. (Luke 4:43) Ngiyal’ ney ni baga’ ni ka nap’an e 1919 e ke fol e Pi Mich Rok Jehovah rok Jesus ni kar pasiggad i wereg fare thin nib fel’ ni ke m’ay i duguliy Gil’ilungun Got ma ra yib e flaab riy.

12. Mang angin fare thin nib fel’ u morngaagen Gil’ilungun Got ngak e piin ni kar folgad riy?

¹² Mang angin fare thin nib fel’ u morngaagen Gil’ilungun ngak e piin ni yad ma motoyil ngay? Nap’an Jesus ma ke yog e athap nge fel’ laniyan’ ngak e piin ni kar folgad ko fare thin nib fel’, maku arrogon e ngiyal’ ney. (Roma 12:12; 15:4) Ma yib e athap ngak e piin nib yul’yul’ ni bochan e kar filed ni bay fan ni nge mich u wan’rad ni bay e flaab nga m’on rodad. (Matthew 6:9, 10; 2 Peter 3:13) Re athap ney e ma ayuweg e piin ni bay madgun Got u wan’rad ni nge puluw lanin’rad. I yog e ani yoloy e psalm ni “dabi tamdag ko thin nib kireb.”​—Psalms 112:1, 7, NW.

Machib ni Ra “Fl’eg Laniyan’ e Piin ni Ke Kireban’rad”

13. Uw rogon e thin rok Isaiah ni profet u morngaagen e flaab nrayog e ngiyal’ ney ngak e piin ni ra fol ko fare thin nib fel’?

¹³ Maku ma yib e ayuw ko ngiyal’ ney ngak e piin ni ra motoyil ko fare thin nib fel’. Uw rogon? Ke weliy Isaiah ni profet morngaagen boch e pi flaab nem ni gaar: “Fare Kan ni Thothup rok Somol ni Got e ke sugnigeg. Somol e ke turguyeg ke l’ugeg ni nggu fek e thin nib fel’ i yan ngak e girdi’ ni gafgow, ni nggu fal’eg laniyan’ e piin ni ke kireban’rad, mu gog ngak e piin ni kan fekrad nga reb e nam ni kar kalbusgad, nge piin ni yad bay u kalbus ni bay ni pagrad. Ke l’ugeg ni nggog ni ke taw nga nap’an ni nge chuweg Somol e girdi’ rok u pa’ e toogor rorad, me war e pi toogor rorad. Ke l’ugeg ni nggu fal’eg laniyan’ urngin e girdi’ ni ke kireban’rad.”​—Isaiah 61:1, 2; Luke 4:16-21.

14. (a) Fare bugithin ni ke “fl’eg laniyan’ e piin ni ke kireban’rad” e be yip’ fan e mang u morngaagen Gil’ilungun Got ni yibe machibnag? (b) Uw rogon ni gad ra dag fene gel e runguy rok Jehovah ngak e piin ni ke kireban’rad?

¹⁴ Rogon e thin ko re profet nem e ra “fl’eg Jesus laniyan’ e piin ni ke kireban’rad.” Rib tamilang e thin rok Isaiah! Rogon e dictionary ko Bible e be yog ni fare bugithin nu Hebrew ni kan pilyeg ni “fl’eg” e yib u bbugithin ni be yip’ fan ni “ngan m’ag ara ngan m’ag e maad’ad ara ngan tafalaynag ma ngan golnag e maad’ad ni ke tay be’.” Reb e nurse e ra m’ag e gini ke maad’ad ku be’ ya ngan gelnag. Maku aram e n’en ni ma rin’ e piin ni yad ma wereg fare thin u morngaagen Gil’ilungun Got ni yad ma gelnag ara ayuweg e piin ni yad ba gafgow ni yad ra motoyil ko machib. Ma nap’an ni yad be ayuweg e piin nib gafgow e yad be dag fene gel e runguy rok Jehovah. (Ezekiel 34:15, 16) Ani yoloy e psalm e ke weliy morngaagen Got ni gaar: “Be golnag e piin ni ke kireban’rad, ma ke m’ag e maad’ad rorad ni bay e amith riy.”​—Psalms 147:3, NW.

Bay Angin e Machib u Morngaagen Gil’ilungun Got

15, 16. Mang morngaagen l’agruw ni’ ni be tamilangnag ni fare machib u morngaagen Gil’ilungun e ma gelnag e piin ni yad ba gafgow?

¹⁵ Boor morngaagen e girdi’ ni be dag ni fare machib u morngaagen Gil’ilungun Got e ma gelnag e piin ni ke kireban’rad. Bay morngaagen Oreanna, ni be’ ni ppin ni ke pilibthir u South America. Kari mulan’ ma ba adag ni nge yim’. Ke yib reb e Mich Rok Jehovah nga tafen Oreanna me bieg e machib ni bay ko fare ke babyor ni Babyor Rog Ni Chep Nu Bible.b Som’mon ma ma motoyil Oreanna ni be mol u bet ni ke moleg owchen, ma yu ngiyal’ e ma gel’gel’. De n’uw nap’an me suwon u bet rok u nap’an ni yibe bieg fare ke babyor. Boch nga tomren ma i par u daken e chiya ni be sonnag e ani be fil e machib ko Bible ngak. Tomur riy me un ko muulung ko pi Kristiano u Kingdom Hall. Ri ba adag e machib ni be fil u nap’an e muulung me tabab ni nge pi’ e babyor ni ma weliy fan e Bible ngak e piin ni yad be yan u kanawo’ u tabinaw rok. Nap’an ni gaman e 93 e duw rok Oreanna me un ko taufe me mang reb e Mich Rok Jehovah. Fare machib u morngaagen Gil’ilungun Got e ke ayuweg Oreanna ni nge adag ni ngii par nib kab fas.​—Proverbs 15:30; 16:24.

¹⁶ Fare machib ni morngaagen Gil’ilungun e ma pi’ e gel ngak e piin ni yad manang ni dabki n’uw nap’an ni ngar pared ni yad ba fas. Bay be’ ni ppin ni Maria fithingan ni ma par u Western Europe. Bay e m’ar rok nra yim’ riy ma kari mulan’. Nap’an ni yib e Pi Mich Rok Jehovah nga tafen ma kari tomal e tafinay rok. Machane nap’an ni fil e tin nib m’agan’ Got ngay ni nge rin’ miki yib fan e yafas rok. Ke un ko taufe me machibnag e girdi’. Nap’an fa gal ni tomur e duw u m’on ni yim’ ma ke m’ug u owchen e felfelan’ nge athap. I yim’ Maria ni ke mudugil laniyan’ ni ra fas ko yam’.​—Roma 8:38, 39.

17. (a) Uw rogon angin e machib ni morngaagen Gil’ilungun Got ko yafas rok e piin ni yad ra fol riy? (b) Me gur, mang boch e kanawo’ ni kam guy ko yafas rom ni be “suwoneg Jehovah e piin ni ke lumel nga but’”?

¹⁷ Pi thin ni bod e gal ney e thin e ma micheg ni bay angin fare machib ni morngaagen Gil’ilungun ko yafas rok e piin ni yad ba adag e machib nu Bible. Piin ni yad be yornag e piin nib t’uf rorad ni kar m’ad e ma yib e gel nga lanin’rad u nap’an ni yad ra fil e machib u morngaagen e fas ko yam’. (1 Thessalonika 4:13) Piin ni yad ba gafgow ko salpiy ma bay e magawon rorad ni ngar pied e ggan ngak chon e tabinaw rorad e ke fel’ lanin’rad ma ke yib e gel nga lanin’rad u nap’an ni yad ra fil ni dabi pagrad Jehovah ni faan yad ra yul’yul’ ngak. (Psalms 37:28) U daken e ayuw rok Jehovah, ma boor e girdi’ ni kar mochuchgad nib gel e keb gelngirad ni buchuuw ma buchuuw ma aram ke yog rorad ni ngar kadan’rad riy ma boch e girdi’ e kar gelgad ngay. (Psalm 40:1, 2) Ngiyal’ ney e be “suwoneg Jehovah e piin ni ke lumel nga but’,” ni be rin’ u gelngin e Thin Rok. (Psalms 145:14) Gad ra yaliy rogon ni ma fl’eg fare thin nib fel’ ni morngaagen Gil’ilungun Got laniyan’ e girdi’ ni ke kireban’rad u lan e binaw rodad ngu lan e ulung rodad, ma ra mich u wan’dad ni bay rodad e bin th’abi fel’ e thin ko ngiyal’ ney!​—Psalms 51:17.

“Ri Gu Be Meybil Ngak Got ni Fan Ngorad”

18. Uw rogon laniyan’ Paul ni bochan e dubun piyu Jew fare thin nib fel’, ma mang fan?

¹⁸ Boor e girdi’ ni dubun e machib rodad ni yugu aram rogon ni ir e bin th’abi fel’ e thin. Ra uw rogon lanin’dad ni bochan e dubun e girdi’ e machib? Taareb lanin’dad apostal Paul. I machibnag Paul piyu Jew machane dubrad fare machib nra thapegrad ko yafas. Kari gel e kireban’ rok Paul ni bochan e dubrad e machib. I gaar: “Ri ba ga’ e kireban’ ni gu be tay, ma ri ba ga’ e amith ni bay u lan gum’irchaeg nder chuw.” (Roma 9:2) I runguy Paul piyu Jew ni i machibnagrad. Ke kireban’ ngay ni dubrad fare thin nib fel’.

19. (a) Mang fan ni ra kireban’dad yu ngiyal’? (b) Mang e ke ayuweg Paul ni ngii machibnag e girdi’?

¹⁹ Ku arrogodad ni gad ma machib ni bochan e gad ma runguy e girdi’. Ere yu ngiyal’ e ra kireban’dad u nap’an ni dubun e girdi’ e machib ni morngaagen Gil’ilungun Got. Be m’ug ko kireban’ rodad ni ri gad ma lemnag e girdi’ ni gad be machibnag. Machane dab da paged talin e kanawo’ ni ke dag apostal Paul. Mang e ke ayuweg ni ngii machibnag e girdi’? Yugu aram rogon ni dubun piyu Jew fare thin nib fel’, ma de pagrad Paul, ma de lemnag ni dabiyog ni ngan ayuwegrad. I athapeg ni ra mich Kristus u wan’ boch i yad. Ere i yoloy Paul morngaagen e pi girdi’ nem ni gaar: “Pi walageg, kari gum’ ni bochan ni manga yigi thap e girdi’ ko nam rog ngak Got! Ri gu be meybil ngak Got ni fan ngorad!”​—Roma 10:1.

20, 21. (a) Uw rogon nrayog ni ngada folwokgad rok Paul u rogon ni gad ma machib? (b) Mang e gad ra weliy ko bin ni migid e thin?

²⁰ Mu tay fanam iyan riy ni bay l’agruw ban’en ni i tamilangnag Paul. Ri ba adag ni nge yog e yafas ngak e girdi’, me yibilayrad ngak Got. Ngiyal’ ney e gad ma folwok rok Paul. Ri gad ba adag ni ngada pirieged yugu boch e girdi’ nra adag fare thin nib fel’. Ma ku gad ma yibilay ngak Jehovah ni ngada pirieged e pi girdi’ nem ya ngada ayuweged yad ni nga ranod ko fare kanawo’ nra yan ko yafas ni manemus.​—Proverbs 11:30; Ezekiel 33:11; John 6:44.

²¹ Machane faan gad ra machibnag urngin e girdi’ nrayog rodad ma thingar da tedan’dad nga rogon ni gad ma machib, ma gathi ke mus ni fan e gad ma machib nge pi thin ni gad ma machibnag. Gad ra weliy e re thin nem ko bin ni migid e thin.

[Footnotes]

Mang e Kam Fil?

• Mang boch i fan ni gad ma machibnag e girdi’?

• Mang e machib ni gad be machibnag?

• Mang taw’ath ni ke yog ngak e piin ni ke mich e machib ni morngaagen Gil’ilungun Got u wan’rad?

• Mang e ra ayuwegdad ni nguuda machibnaged e girdi’?

[Pictures on page 10]

Fare machib ni morngaagen Gil’ilungun Got e ma gelnag e piin ni ke kireban’rad

[Pictures on page 11]

Meybil e ra ayuwegdad ni nguuda athamgilgad ko machib ni gad be tay