Urngin E Tin Riyul’ Kristiano E Yad E Tamachib

“Mu tang ni fan ku Jehovah, mu pining e sorok nga fithingan. Gubin e rran ma nga mog fare thin nib fel’ ni yib rok ni ma ayuwegey.”—PSALM 96:2, New World Translation.

1. Mang thin nib fel’ e ba t’uf ni nge rung’ag e girdi’, ma uw rogon ni be dag e Pi Mich rok Jehovah rogon ni ngan wereg e re thin ney?

ULAN FARE fayleng ni ma yib e gafgow riy ni gubin e rran, e riyul’ nra fal’eg lanin’uy ni yira nang e thin ni be weliy e Bible ni mahl, nge bugel, nge uyungol, nge ngan gafgownagey e daki nu’uw nap’an ma ra m’ay. (Psalm 46:9; 72:3, 7, 8, 12, 16) Riyul’, ni dagathi ireray e thin nib fel’ ni urngin e girdi’ e ba t’uf ni ngar rung’aged? Ereray e n’en ni be lemnag e Pi Mich Rok Jehovah. Urngin yang ma yimanangrad riy ni yad e piin ni ma machibnag “fare thin nib fel’.” (Isaiah 52:7) Riyul’, ni Pi Mich e yad ma gafgow ko togopuluw nbochan e ke mudugil lanin’rad ni ngar wereged e thin nib fel’. Machane ri yad ma runguy e girdi’. Uw feni fel’ thin e pasig nge athamgil ko machib ni ke ta’ Pi Mich!

2. Mang reb i fan ni be par nib pasig e Pi Mich rok Jehovah?

² Pasig ni ma dag e Pi Mich rok Jehovah ko ngiyal’ ney e ba taareb rogon ko tin i dag e Kristiano ko fa bin som’mon e chibog. Fare shimbung ko Roman Catholic ni L’Osservatore Romano e ba sorok ni ke weliy murung’agrad ni gaar: “Tin som’mon Kristiano, e yug ra taufe bagayad ma ke nang nib milfan ngorad ni ngara wereged fare Gospel. Ma wereg e pi sib fare Gospel ni ma af u l’igin’rad.” Mang fan ni Pi Mich rok Jehovah e ri yad ba pasig ko maruwel rorad ni taab rogon ko fapi Kristiano kakrom? Bin m’on, ya bochan fare thin nib fel’ ni yad be machibnag e yib rok Jehovah Got. Gur ka bay reb i fan ni kab fel’ ngay? Machib ni yad ma ta’ e ba puluw ko thin ko fare psalmist ni gaar: “Mu tang ni fan ku Jehovah, mu pining e sorok nga fithingan. Gubin e rran ma ngam weliy fare thin nib fel’ ni yib rok n i ma ayuwegey.”—Psalm 96:2.

3. (a) Mang e bin l’agruw i fan ni be par nib pasig e Pi Mich rok Jehovah? (b) Mang e ba l’ag ko “ayuw ko yafas ni yib rok [Got]”?

³ Thin ko fare psalmist e be puguran ngodad ko bin l’agruw i fan ni Pi Mich rok Jehovah e yad ba pasig ko maruwel rorad. Machib rorad e bang e ayuw ko yafas. Boch e girdi’ e yad ma un ko maruwel ni ngan ayuweg e girdi’ nib m’ar, ara yu ulung i girdi’, nge magawon ko salpiy, ara boch ban’en nra ayuwegey me fel’ boch e par ko girdi’, ya aram e maruwel ni bay fan ni ngan pining e magar ngorad. Machane tin ni rayog ni nge rin’ e girdi’ e kaygi achig ni faanra ngan taarebnag ko “ayuw ni ma pi’ [Got].” U daken Jesus Kristus, ma ra ayuweg Jehovah e piin nib sobutan’rad min pithigrad ko denen, nge m’ar, nge yam’. Ma piin ni kan ayuwegrad e ra par ni dariy n’umngin nap’an! (John 3:16, 36; Revelation 21:3, 4) Ngiyal’ n’ey, ni ngan thap ngak Got e bay u fithik’ fapi “maruwel rok Got nyira ngat ngay” ni ma matheeg e Kristiano ngay ko ngiyal’ ney ni yad be fol ko fapi thin ni gaar: “Mu weliyed ngak e pi nam feni gilbuguwan [Got], nge tin ni ke rin’ nyira ngat ngay. Ya Jehovah e ba gel gelngin ma ri bay rogon ni ngan pining e sorok ngak. Ma bay madgun ni kab gel ngak urngin e kan.”—Psalm 96:3, 4.

N’en ni Ke Dag e Masta

4-6. (a) Mang fa bin dalip i fan ni be par nib pasig e Pi Mich rok Jehovah? (b) Uw rogon ni dag Jesus nib pasig ko fare maruwel ni nga un wereg fare thin nib fel’?

⁴ Fa bin dalip i fan ni Pi Mich rok Jehovah e yad ba pasig. Yad ma fol ko tin ni i rin’ Jesus Kristus. (1 Peter 2:21) Cha’ nem nib flont e i rin’ e maruwel ni kan pi’ ngak i “weliy e thin nib fel’ ngak e piin nib sobutan’rad” u polo’ i gum’ircha’en. (Isaiah 61:1, NW; Luke 4:17-21) Erfan ni, ke mang be’ ni tamachib, cha’ ni ma weliy e thin nib fel’. Ke yan nga urngin e binaw nu Galile nge Judea, i “machibnag e Thin Nib Fel’ ni murung’agen e gagiyeg rok Got.” (Matthew 4:23) Ma bochan ni manang ni boor e girdi’ ni ra adag e machib ko thin nib fel’, me yog ngak pi gachalpen ni gaar: “Boor e woldug ni ngan kunuy, machane kemus ni buchuw e piin ni ta mukun woldug. Ere, mu yibilgad ngak e en ni ir e suwon e re woldug nem ngki pi’ boch girdien e maruwel ko re mukun woldug rok nem.”—Matthew 9:37, 38.

⁵ Rogon nib puluw ko meybil rok Jesus, ma aram e i skulnag yugu boch e girdi’ ngar manged pi tamachib. Munmun, me l’og e pi apostal rok ni goo yad me yog ngorad ni gaar: “Marod ngam machibgad ni nge lungumed, ‘Gagiyeg rok Got e ke chuchugur.’” Gathi kab fel’ ni ngara yarmiyed boch ban’en ni fan e ngan lichnag e pi magawon ni bay ko yu rran? Ara susun ni ngara uned ko politics ni fan ni ngar chamgad ko kireb ni yibe wereg i yan? Danga’. Gathi aram rogon, I dag Jesus e kanawo’ ni nge fol urngin e tamachib ni Kristiano riy ko ngiyal’ ni yog ngak pi gachalpen ni gaar: “Marod ngam machibgad.”—Matthew 10:5-7.

⁶ Tomur riy, me l’og Jesus yugu reb e ulung ko pi gachalpen ni ngar weliyed ngan nang ni: “Gagiyeg rok Got e ke chuchugur.” Nap’an ni kar sulod ni ngar weliyed ni keb angin e machib ni kar ted ma kari falfalan’ Jesus. Me meybil ni gaar: “Chitamag ni gur e Somol u tharmiy ngu but’! Karimmagar ya kam dag ngak e piin bitir e n’en ni kam mithag rok e piin ni yad ba llowan’ nge piin ni yad ba sukul.” (Luke 10:1, 8, 9, 21) Fapi gachalpen Jesus, ni som’mon e ri yad e tafita, nge piin tamilay’ nib gel e maruwel rorad, nge yugu boch e maruwel, yad bod e bitir nfaanra ngan taarebnag ko fapi tayugang ko teliw nib tolang e skul rorad. Machane fapi gachalpen e kan skulnagrad ni ngar wereged e bin th’abi fel’ e machib u fithik’ urngin e thin nib fel’.

7. Tomren ni ke yan Jesus nga tharmiy, ma mini’ e ke machibnag pi gachalpen fare thin nib fel’ ngak nsom’mon?

⁷ Tomren ni ke yan Jesus nga tharmiy, me ulul pi gachalpen i wereg fare thin nib fel’ ni ma ayuweg e yafas. (Acts 2:21, 38-40) Som’mon ma ur machibnaged mini’? Ka ranod ngak e pi nam ni dar nanged Got? Danga’, bin som’mon e nam ni ur machibgad riy e Israel, girdi’ ni manang Jehovah ni ke pag 1,500 e duw. Bay mat’awrad ni ngar machibgad ko binaw ni yima liyor ngak Jehovah riy? Arrogon. I yog Jesus ngorad ni gaar: “Ma aram mi gimed weliy murung’ageg u lan yu Jerusalem, ngu lan yu Judea ni polo’, ngu lan yu Samaria, nge yan i mada ko yungi n’en ni yan i mus e fayleng ngay.” (Acts 1:8) Ba t’uf rok piyu Israel ni ngar rung’aged e thin nib fel’ ni taarogon ko yugu boch e nam.

8. Uw rogon ni be fol e Pi Mich rok Jehovah ko ngiyal’ n’ey rok fapi gachalpen Jesus ko fa bin som’mon e chibog?

⁸ Ba taabrogon ngay, Pi Mich rok Jehovah ko ngiyal’ ney e yad be wereg e machib nga gubin yang e fayleng. Yad ma ayuweg fare engel ni i guy John ni “bay e Thin Nib Fel’ ni nge weliy ngak e girdi’ nu fayleng, ni urngin e pi nam, nge ganong nge thin nge gubin mit e girdi’.” (Revelation 14:6) U lan e duw ni 2001, kar maruwelgad u 235 e nam nge pi binaw, nib muun ngay e pi nam ni yima lemnag ni girdi’ ni ma par riy e Kristiano. Ba kireb ni nge machib e Pi Mich rok Jehovah ko pi binaw ni piin ni Christendom e kar toyed e pi galesiya rorad riy? Boch e girdi’ e ma yog nib kireb e re n’ey ma yad be lemnag ni re maruwel n’ey e be “iring e saf.” Machane, keb ngan’ e Pi Mich rok Jehovah e n’en ni i lemnag Jesus ngak piyu Jew nib sobutan’rad ko ngiyal’ nem. Yugu aram rogon ni immoy e prist rorad, de maruwaran’ Jesus ni nge yog ngorad murung’agen e thin nib fel’. Ye “taganan’ ngorad, ya kar pired ni ke magafan’rad ndar nanged e n’en ni ngar rin’ed, ya yad bod e saf nde moy rorad e en ni ma gafaliyrad.” (Matthew 9:36) Faani pirieg e Pi Mich rok Jehovah e girdi’ nib sobut lanin’rad ndawora nanged murung’agen Jehovah nge Gil’ilungun, ma dab rogned e thin nib fel’ ngorad ya boch e teliw e ma yog ni bay mat’awrad ni ngar suweyed yad? Fulweg rodad riy e danga’ ma aram e n’en nib puluw ko tin ni i rin’ fapi apostal. Thingar ni wereg e thin nib fel’ “ngak e pi nam,” ni urngin.—Mark 13:10.

Urngin e Kristiano Kakrom e Goo Yad ma Machib

9. Mini’ u lan e ulung ni Kristiano ko fa bin som’mon e chibog, ni ke un ko fare maruwel ni ngan wereg e machib?

⁹ Nap’an e bin som’mon e chibog ma mini’ e ke un i wereg e machib? Bay e mich riy ni be dag ni yad urngin e ta machib. Reb e Author ni W. S. Williams fithingan e ke yog ni gaar: “Urngin ban’en e be dag ni urngin e Kristiano u Galesiya Kakrom . . . e kar machibnaged fare gospel.” Tin ni ke buch ko Pentekost 33 C.E., be yog e Bible ni gaar: “Mi yigoo sugnagrad e Kan ni Thothup mi yad [piin pumoon nge ppin] tabab ko numon nlungun boch e nam, ni bod rogon ni ke maruweliyrad fare Kan ni Thothup ni ngar nonod.” Piin tamachib e ba muun ngay e piin ni pumoon nge ppin, nge piin ni ka yad ba pagal nge piin ke pillibthir, nge piin ni sib nge piin ba puf rogon. (Acts 1:14; 2:1, 4, 17, 18; Joel 2:28, 29; Galatia 3:28) Nap’an ni kan togopuluw ngak e piin Kristiano ma kar milgad u Jerusalem, ma “piin kar wergad e ka ranod nga gubin yang ni yad be machibnag ngak e girdi’ fare Thin Nib Fel’ ni yib rok Got.” (Acts 8:4) Urngin e “piin kar wergad,” e ur machibgad ma gathi kemus ni piin nni dugliyrad ni ri yad buchuw.

10. Mang l’agruw e maruwel ni ke lebug u m’on ni kan gothey e m’ag rok piyu Jew?

¹⁰ Riyul’ ni ereray e pi n’en ni un rin’ ko pi duw nem kakrom. I yiiynag Jesus ni gaar: “Ma re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.” (Matthew 24:14) Rogon ni ke lebug e pi thin nem ko fa bin som’mon e chibog, e kari wer fare thin nib fel’ u m’on ni yib e pi salthaw nu Roma ra kirebnaged e teliw nge am rok piyu Jew. (Kolose 1:23) Maku, urngin e pi gachalpen Jesus e kara folgad ko thin ni ke yog ngorad ni gaar: “Ere mmarod ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge fare Kan ni Thothup, mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.” (Matthew 28:19, 20) Fapi Kristiano kakrom e gathi kemus ni kar ted yad ko piin nib sobutan’rad ni nge mich Jesus u wan’rad mar paged yad ngar rin’ed e tin yad baadag ko pigpig ku Got, ntaareb rogon ko tin ni be rin’ boch e ta machib ko ngiyal’ ney. Gathi aram rogon, ya kar filed ngorad rogon ni ngar manged pi gachalpen Jesus, ma kara yarmiyed ni ngar manged boch e ulung, min skulnagrad ni ku rayog ni ngar machibnaged fare thin nib fel’ ma ngar pingeged e girdi’ ngar manged pi gachalpen. (Acts 14:21-23) Ngiyal’ ney ma ka be fol e Pi Mich rok Jehovah ko re wo’ nem.

11. Mini’ ko ngiyal’ ney e be wereg e thin nib th’abi fel’ ngak e girdi’?

¹¹ Boor e Pi Mich rok Jehovah, ni be fol ko tin ni i rin’ Paul, nge Barnabas, nge yugu boch e girdi’ ko fa bin som’mon e chibog, ka ranod nga yugu boch e nam ni yad e missionary. Riyul’ ni maruwel rorad e ba’ angin, ya bochan dar uned ko politics ara yugu boch e kanawo’ nra magawonnagrad ma dabkuura machibnaged fare thin nib fel’. Ke mus ni yad ma fol ko thin ni ke ta’ Jesus chilen ngorad ni gaar: “Mmarod ngam machibgad.” Yugu aram rogon, ma kab boor ko baley ko Pi Mich rok Jehovah ni ka ranod nga yugu boch e nam e gathi missionary. Boor i yad e be un ko maruwel ni fan ko par rok, ma boch i yad e ka yad ma un ko skul. Boch i yad e be chuguliy pi fak. Machane yad urngin e Pi Mich ma yad ma weliy ngak e girdi’ fare thin nib fel’ ni kara filed. Piin pagal nge pillibthir, nge pumoon nge ppin, yad be fol ko fonow ni bay u Bible ni be gaar: “Ngam machibnag e thin rok Got ndemtrug ko kari mab e kanawo’ ngom fa dawor.” (2 Timothy 4:2) Ni bod rogon e pi tamachib ko fa bin som’mon e chibog, ni “urngin e rran nra ululgad ngay nguur filed ngak e girdi’ ma yad be machibnag ngak e girdi’ fare Thin Nib Fel’ ni murung’agen Jesus ni ir fare Messiah.” (Acts 5:42) Yad be wereg e thin ni th’abi fel’ ni fan ko girdi’.

Ngan Pingeg ara Ngan Machib?

12. Mang e ngan pingeg ara proselytism, ma uw rogon u wan’ e girdi’?

¹² Bay fare bugithin ni Greek ni pro·se’ly·tos, ni be yip fan be’ ni “kan pingeg.” Ma ir e yib fare thin nu Meriken riy ni “proselytism,” ni be yip fan “fare maruwel ni ngan pingeg e girdi’.” Ngiyal’ ney, ma boch e girdi’ e ma yog ni proselytism ara nga ni pingeg e girdi’ e ra kirebnigey. Reb e babyor ni fare World Council of Churches e ke yoloy ni be weliy murung’agen “e denen ko proselytism.” Mang fan? Fare Catholic World Report e be yog ni gaar: “Bochan e gun’gun’ ni ma tay girdien e Galesiya ni Orthodox, me aw ni fan e ‘proselytism’ e ngan pingeg e girdi’ u fithik’ e towasar.”

13. Mang boch ban’en ni be dag ni proselytism e ra kirebnagey?

¹³ Ra ngan pingeg be’ ma ma kirebnag ban’en? Rayog ni nge aw ni aram rogon. I yog Jesus ni fare thil ni ta’ fapi scribes nge Pharisees e ma kirebnag e girdi’ ni ur pingeged yad. (Matthew 23:15) Ba mudugil, ni “ngan towasariy ni ngan pingeg be’” e ba kireb. Ni bod rogon ni yog Josephus, ni reb e historian, nap’an ni ke gel John Hyrcanus ni Maccabean ko piyu Idumaean, me “pagrad ni ngara pared ko nam rorad nfaan ran maadadnagrad ma yad ra fol ko motochiyel ni kan pi’ ngak piyu Jew.” Faanra baadag fapi Idumaeans ni ngar pared u tan e am rok piyu Jew, ma susun ni ngar folgad ko teliw rok piyu Jew. Piin tayol e be yog ngodad ni nap’an e bin meruk e chibog C.E., me gel Charlemagne ko fapi pagan Saxons u northern Europe me pingegrad u fithik’ e yargel.a Machane, uw feni yul’yul’ e piin ni Saxon ara fapi Idumaeans? Ni bod, rogon feni yul’yul’ Herod ni Pilung ni Idumaean ko fare Motochiyel rok Moses ni Got e i thagthagnag ya ke guy rogon ni nge li’ Jesus ni kabran ngem’?—Matthew 2:1-18.

14. Uw rogon ni boch e missionary u Christendom e be tawasariy e girdi’ ni fan ni ngar pingeged yad?

¹⁴ Ka yima pingeg e girdi’ e chiney u fithik’ e towasar? Boch e ka yad ma rin’. Ka nog ni boch e missionary ko Christendom e ma ognag ngak be’ ni ke chuchugur ni nge un ko teliw rorad ni ra yan nga yugu reb e nam nge un ko skul ndariy puluwon. Ara yad ra ta’ boch e tagil’ ni fan ko girdi’ ni refugee ni ngar rung’aged reb e welthin ngemu’ fin ra pied e ggan ngorad. Bod rogon e thin ni kan weliy u reb e convention ko fapi Orthodox Primates ko duw ni 1992, ni “yu ngiyal’ ma kan pingeg e girdi’ nge un ko teliw u daken e chugum ma yu ngiyal’ e fithik’ e yargel nib thilthil rogon.”

15. Ma pingeg e Pi Mich rok Jehovah e girdi’ nrogon nib puluw nga fan ni yima yog ere bugithin ney ni proselytize? Mu weliy.

¹⁵ Ngan towasariy e girdi’ ni ngara thiliyeged e teliw e ba kireb. Pi Mich rok Jehovah e mmutrug ni dar ma rin ban’en ni aram rogon.b Ere, dar ma pingeged e girdi’ nrogon nib puluw nga fan e re thin ney e ngiyal’ ney. Bathil e tin ni yad ma rin’, ya taab rogon ko fapi Kristiano ko fa bin som’mon e chibog ni yad ma machibnag e thin nib fel’ ngak urngin e girdi’. Urngin e girdi’ ni baadag e machib e kan piningrad ni ngara filed ban’en meb e tamilangan’ ngorad u daken e fol Bible. Pi cha’ nem ni baadag e machib e kar nanged rogon ni ngar ted e michan’ rorad, nga daken e tamilangan’ nu Bible, nge Got nge tin nib m’agan’ ngay. Ma angin ni ma yib riy, e yad ra pining fithingan Got, ni Jehovah, ni fan ni nge yog e ayuw ko yafas ngorad. (Roma 10:13, 14, 17, NW) Demtrug ko yad baadag e thin nib fel’ fa danga’ ma yad e yad ra mel’eg. Dariy e tawasar riy. Ra ngan towasariy, ma kan pingeg e girdi’ ndariy fan. Pigpig ku Got, ni baadag e thingari yib u gum’ircha’ey.—Deuteronomy 6:4, 5; 10:12.

Machib ko Ngiyal’ N’ey

16. Uw rogon ni ke mon’og e maruwel ko Pi Mich rok Jehovah ko ngiyal’ ney?

¹⁶ Ngiyal’ n’ey, ma ke machibnag e Pi Mich rok Jehovah fare thin nib fel’ ko Gil’ilungun ni kari lebug e thin ni bay ko Matthew 24:14. Reb e talin e maruwel ni yad ma fanay ko maruwel rorad i wereg e machib e aram fare ke babyor ni Wulyang Ntagil’ E Damit.c U lan e 1879, nap’an ni kan fal’eg fa bin som’mon e babyor ni Wulyang Ntagil’ E Damit, ma kan fal’eg ni sagonapan 6,000 ken oren u taareb e thin. U lan fare duw ni 2001, tomren ni ke yan 122 e duw, ma ke gaman 23,042,000 ken ni kan fal’eg u 141 e thin. Ba muun ko re mon’og nem ni aram e ke gel fare maruwel ko Pi Mich rok Jehovah i wereg e machib. Mu taarebnag fa in i biyu’ e awa ni kan thognag u reb e duw ko maruwel ko machib ko fa bin 19 e chibog ko 1,169,082,225 e awa ni kan thognag ni fan ko machib ko duw ni 2001. Mu lemnag fa 4,921,702 e girdi’ ni ma un ko fol Bible u gubin e pul. Uw feni yoor e maruwel nib fel’ ni kan ta’! Ma sagonapan 6,117,666 e pi tamachib ko Gil’ilungun ni kara rin’ed e re n’ey.

17. (a) Miti mang got ni googsur e yima liyor ngorad ko ngiyal’ n’ey? (b) Yugu demtrug e thin, nge nam, nge rarogon tolngin e girdi’, ma mang e ba t’uf ni nge nang urngin e girdi’?

¹⁷ Fare psalmist e be gaar: “Urngin e kan e girdi’ e bogi kan ndariy felngin; machane Jehovah, e ir e sunumeg lan e lang ni ga’ngin.” (Psalm 96:5, NW) Girdi’ ko ngiyal’ ney ni nifengin e fayleng e be gagiyegnagrad, yad ma yul’yul’ ko nam, nge ban’en ni be yip’ fan e nam, nge piin nib tolang e liw rorad, ni mus ko chugum e ke mang ban’en ni yibe ta’ fan. (Matthew 6:24; Efesus 5:5; Kolose 3:5) Ke yog Mohandas K. Gandhi biyay ni gaar: “Ri gu be lemnag ni . . . Europe e ke mus ni fithingan e Kristiano. Bin riyul’ riy e ma ta’ fan e Mammon [salpiy].” Ba riyul’, ni fare thin nib fel’ e ba t’uf ni ngan wereg nga gubin yang. Urngin e girdi’, ndemtrug ko mang e thin rok, nge nam rok, ara rogon e yu ulung i girdi’, ma ba t’uf ni nge nang murung’agen Jehovah nge tin nib m’agan’ ngay. Gad be yim’ ni bochan ni yigi urngin e girdi’ me fol ko thin ko fare psalmist ni gaar: “Mu pininged e sorok ngak Jehovah nge feni gel gelngin. Mu pininged e sorok ngak Jehovah nge fithingan”! (Psalm 96:7, 8) Ma ayuweg e Pi Mich rok Jehovah yugu boch e girdi’ ni ngar nanged murung’agen Jehovah ma aram e rayog ni ngara pininged e sorok ngak nib fel’ rogon. Ma piin ni ra fol e ra fel’ rogorad riy nib gel. Mang angin ni keb ngorad? Ereray e pi n’en ni yira weliy ko bin migid e article.

[Footnotes]

Rayog ni Ngam Weliy?

• Mang fan ni Pi Mich rok Jehovah e yad e tamachib nib pasig?

• Mang fan ni Pi Mich rok Jehovah e ma wereg e machib ko gin ni piin Christendom e kara toyed e pi galesiya rorad riy?

• Mang fan ni Pi Mich rok Jehovah e dagathi yad ma pingeg e girdi’ nrogon fan ni yima yog fare bugithin ni proselytizers ko ngiyal’ ney?

• Uw rogon ni ke mon’og fare maruwel ni ma ta’ e Pi Mich rok Jehovah ni ngan wereg e machib ko ngiyal’ ney?

[Picture on page 7]

Jesus e ir e tamachib nib pasig ma ke skulnag yugu boch e girdi’ ni ngar uned ko re maruwel ney

[Picture on page 8]

Urngin e girdi’ u lan e ulung ko fa bin som’mon e chibog e kara uned i wereg e machib

[Picture on page 9]

Ra ngan towasariy e girdi’ ni nge thiliyeg e teliw rok ma ba kireb