Mu Pagan’um Ko Kan Ni Thothup Rok Got U Nap’an Ni Be Thil I Yan E Yafas

“Mu athamgiliy u rogon nrayog rom nge par e maruwel rom nrib fel’ u mit Got.”​—2 TIMOTHY 2:15.

1. Mang e pi n’en nib thil nra skengnag rarogodad ko tirok Got?

FARE fayleng nib liyegdad e be thil i yan. Gad be guy e mon’og ni ba tay e science nge technology ni yira ngat ngay mab muun ngay ni kari war e tayfan ko ngongol nib fel’. Nap’an ni kad weliyed fare article ni ke yan, piin Kristiano e thingara togopuluwgad ko lem ko fayleng nib togopuluw ku Got. Machane, nap’an ni be thil e fayleng i yan, maku gad be thil i yan u boor e kanawo’. Kafram e ka gad ba bitir ma chiney kad ilalgad. Sana ke yog boor e chugum ngodad, nge fel’ fithik’ i dowdad, nge girdi’ nib t’uf rodad. Boor ban’en ni aram rogon ni be thil iyan e dariy rogon ni ngad gagiyegnaged, ma rayog ni nge sum riy e magawon nib biech nib mo’maw’ ma ra magawonnag rarogodad ko tirok Got.

2. Uw rogon ni ke thil e yafas rok David?

² Buchuw e girdi’ ni ke thil e yafas rorad nib gel ni bod e n’en ni buch rok David, ni fak Jesse. Rib papey ni ke thil e yafas rok David ni som’mon ke mus ni ba pagel ni ta chugul saf me thil me mang be’ ni ba cheg nib gilbuguwan ko nam rok. Tomur riy e ke mang be’ ni be mil ni be mith i yan, ni bod ba gamanman ni yibe gay ni ngan li’ ni fan ni ke awan’ reb e pilung ngak. Tomur riy, me mang David ba pilung ni ma gel ko mahl. Me k’adan’ ko amith nge gafgow nbochan e denen rok nib gel. Me yib boch e riya’ nrib gel ngak ma ke yoor lungun e tabinaw rok. Ke yoor e chugum rok, ma ke pilibthir, me yib e m’ar ko pilibthir ngak. Machane, yugu aram rogon ni demtrug feni kari thil e yafas rok, mi i dag David ni kari pagan’ ngak Jehovah nge kan ni thothup rok u n’umngin nap’an e yafas rok. I rin’ e tin rayog rok ni nge “fel’ u wan’ Got,” me flaabnag Got. (2 Timothy 2:15) Yugu aram rogon ni par rodad e ba thil ko n’en ni buch rok David, ma rayog ni ngad filed ban’en u rogon ni ke rin’ ban’en ko yafas rok. Tin ni buch rok e ra ayuwegdad ni ngad nanged fan ko uw rogon ni nge par ni be ayuwegdad e kan ni thothup rok Got u nap’an ni be thil i yan e yafas rodad.

Subut’an’ ni Dag David​—Ffel’ ni Ngan Fol Riy

3, 4. Uw rogon ni David e som’mon ma ba pagel ni ta chugul saf ni dan nang me mang be’ nib gilbuguwan ko nam?

³ David ni kab pagel e gathi be’ nib gilbuguwan ni mus u lan e tabinaw rok. Nap’an ni yib Samuel ni profet nga Bethlehem, me fek i yib e chitamangin David medlip ko fa meruk i pagal ni fak. David, ni fak ni bin wen, e kan pag ngii ayuweg fapi saf. Yugu aram rogon, ni mel’eg Jehovah David ni nge mang pilung nu Israel boch nga ram. Min yan ni pining David u ted. Bin migid, ni kan ta’ ko Bible e be yog ni gaar: “Me fek Samuel fare gapgep me liyef nga lolugen u p’eowchen fapi pumoon ni pi walagen. Me tabab fare kan ni thothup rok Jehovah ni nge maruwel u daken David ni ka ngiyal’ nem i yan nga ram.” (1 Samuel 16:12, 13, NW) I pagan’ David ngak e re kan ni thothup nem u n’umngin nap’an e yafas rok.

⁴ De n’uw nap’an ma re pagel ney ni ba ta chugul saf e ra mang be’ nib gilbuguwan u lan e nam rok. Kan pining ni nge pigpig ngak fare pilung me chubeg e musik ni fan ngak. I li’ Goliath ni reb e tamacham ngem’, ni ba giant nib maangach ma arfan ni musko salthaw nu Israel nib cheg ko cham e kar rusgad ni ngar sabaliyed e cha’ nem. Kan ta’ David ni en ni ga’ ko pi salthaw, me cham ngak ngak piyu Philistine nib fel’rogon. Baadag e girdi’ daken David. Kar tunguyed boch e tang ni be pining e sorok ngak. U m’on riy, ma en tafonow rok Saul ni pilung e ke weliy murung’agen David ni kab pagel ma gathi kemus ni be’ “nib cheg ni nge chubeg” fare harp ya ku “be’ nder ma rus, ma ba fel’ ko salthaw, ma be’ nib salap ko welthin, ma ba pichoay.”​—1 Samuel 16:18; 17:23, 24, 45-51; 18:5-7.

5. Mang e n’en susun ra k’aring David nge mang be’ nib ufanthin, ma uw rogon ni gad manang ni de yodor?

⁵ Ba gilbuguwan, mab pichoay, ffel’ yangaren, ba salap ko welthin, ba salap ko musik, ba fel’ ko salthaw, ba fel’ u wan’ Got​—bod ni David e bay rok urngin e pi n’en ney. Demtrug reb ko pi salap ney ma rayog ni nge k’aring nge mang be’ nib ufanthin, machane dariy reb ni rin’. Mu tiyan’um ko fulweg rok David ngak Saul ni pilung, ni ognag fak ni ppin ngak David ni ngar mabgolgow. U fithik’ e subut’an’ nib riyul’, me yog David ni gaar: “I gag mini’, ma mang e birog e tabinaw ni nggu wechma’ ngak e en ni pilung?” (1 Samuel 18:18) Be weliy murung’agen e re verse ney, ma reb e scholar i yoloy ni gaar: “Fan e thin ni yog David, e aram musko salap rok, nge rarogon u p’eowchen e girdi’, nge pi llabthir rok, e dariy rogon me yog ni nge wechma’ ngak e en pilung.”

6. Mang fan ni ngad maruweliyed nge gel e sobut’an’ rodad?

⁶ I par David nib subut’an’ ya bochan e manang ni Jehovah kab tolang ndabi chuchugur rogon ngak e girdi’ ndawori flont u urngin e kanawo’. Ke gin David ngay ni Got e ma lemnag e girdi’. (Psalm 144:3) Maku manang David ni urngin e sorok ni ke yog ngak e ke mus ni bochan ke dag Jehovah nib subut’an, me subut’nag ir ni nge pi’ gelngin, me yororiy, me pi’ e tin nib t’uf rok. (Psalm 18:35) Ri be fil ban’en ngodad nrib fel’! Salap rodad, tin kad rin’ed ngeb angin, e re maruwel rodad u lan e ulung e susun dabi k’aringdad ngad ufgad. “Tin riyul’ riy, mang e n’en ni bay rom ni de pi’ be ngom?” e yoloy Paul ni apostal. “Chiney, faanra bay be’ ni ke pi’ ban’en ngom, ma mang fan ni ngam uf ni bod ni gowa dariy be’ ni ke pi’ ngom e re nir?” (1 Korinth 4:7) Ra nge yog ngodad e kan ni thothup rok Got ma gad fel’ u wan’, ma thingarda gelnaged ma ngad pared nib sobut’an’dad.​—James 4:6.

“Dabmu Fulweged Ngak Be’ Taban e Kireb ni Rin’ Ngomed”

7. Uw rogon ni ke mab e kanawo’ ngak David ni nge li’ Saul ni Pilung ngem’?

⁷ Yugu aram rogon feni sorok David ma de k’aring nge ufanthin, ke k’aring e awan’ nib gel ngak Saul ni Pilung, ni cha’ nem e ke chuw fare kan ni thothup rok Got rok. Yugu aram rogon ni dariy e kireb ni ke rin’ David, me mil ni nge ayuweg e yafas rok me i par u daken e ted ndariy ban’en ni be tugul riy. Ba’ biyay, ko ngiyal’ ni yibe lol’og David ndanir tal, me yan Saul ni Pilung nga lan ba yiy, ni de nang ni bay David nge boch e girdi’ ni be un ngak ni kar mithgad u rom. Girdi’ rok David e ka rogned ngak ni re tayim nem e ke mab ni Got e ke yarmiy ni nge li’ Saul ngem’. Rayog ni ngad susunnaged ni ur moyed u lan fare yiy nib talumor, mi yad sakathkath ngak ni be lungurad ngak: “Ireray e rorran ni ke yog Jehovah ngom riy ni gaar, ‘Am sap! Nggu pi e toogor rom nga paam, ma nga mu rin’ ngak rogon ni ga baadag.’”​—1 Samuel 24:2-6, NW.

8. Mang fan ni ke taleg David ir ni nge dabi fulweg taban e kireb ni kan rin’ ngak?

⁸ Dabun David ni nge maadadnag Saul. Bochan e michan’ rok nge gum’an’, ma ke fel’ u wan’ ni nge pag e pi’ n’em nga pa’ Jehovah. Tomren ni ke chuw fare pilung u lan fare yiy, me pining David ni gaar: “I Somol e nge turguy e arodow nib kireb! Ir e nge gechignigem ko tin ni kam ngongliy nib togopuluw ngog, yi gag e dariy bochi ban’en ni gu ra rin’ ngom.” (1 Samuel 24:12) Yugu aram rogon ni manang ni kireb rok Saul ma aram fan nde fulweg David taban e kireb ni kan rin’ ngak; maku de yog e thin nib kireb u murung’agen. Boor yay, ni taleg David ir nde fulweg taban e kireb ni ke rin’ be’ ngak. Tin ni ke rin’, e i pagan’ ngak Jehovah ni nge yal’uweg ban’en.​—1 Samuel 25:32-34; 26:10, 11.

9. Mang fan thingar dabda fulweg taban e kireb ni kan rin’ ngodad nfaanra keb e togopuluw ara yibe gafgownagdad?

⁹ Ni bod David, sana rayog ni ngam guy ni ga bay u fithik’ e magawon nib mo’maw’. Sana ke togopuluw ngom ara be gafgownagem e piin gimed nga skul, ara piin gimed u tabon e maruwel, ara chon e tabinaw rom, ara boch e girdi’ nib thil e michan’ romed. Dab mu fulweg taban e kireb ni kan rin’ ngom. Mu sonnag Jehovah, ma ga ning e kan ni thothup rok ni nge ayuwegem. Rayog ni piin ni de michan’rad e yad ra gin ko ngongol rom nib fel’ me michan’rad. (1 Peter 3:1) Demtrug ko mang e ra buch, ma ba mudugil ni be guy Jehovah rarogom ma ra rin’ ban’en nge ayuwegem u ngal’an ni ke duguliy. Paul ni apostal e yoloy ni gaar: “Dab mu fulweged ngak be’ taban e kireb ni kan rin’ ngomed, machane ngam paged fan ko damumuw rok Got nge mang ir e rin’. Ya be yog e babyor nib thothup ni be gaar, “Be gaar Somol, ke mil fan ngog, ni gag e bay gu fulweg taban e kireb.’”​—Roma 12:19.

“Mu Motoyil ko Thin ni Be Llowannagey”

10. Uw rogon ni aw David ko denen, ma uwrogon ni guy rogon ni nge mithag e denen rok?

¹⁰ Ke yan boch e duw. Me mang David ba pilung nrib gilbuguwan nib adag e girdi’. Yafas rok ni dag ni ir be’ nrib yul’yul’, mab muun ngay e pi psalms nib fel’ ni i yoloy ni nge pining e sorok ngak Jehovah, e sana mom ni nge lemnag e girdi’ ni ireray e girdi’ ni dabi aw ko denen nib ubchiya’. Machane ke aw ko denen nib ubchiya’. Reb e rran, ma fare pilung ni immoy u daken e chigiy ko naun rok e ke guy reb e ppin nib pidorang ni be maluk. Me fith ko mini’ e cha’ nem. Nap’an ni nang fithinagan ni fare pin e Bath-sheba ma pumoon rok, e Uriah, ni demo’ ya ke yan ko mahl, me l’og David be’ ni nge pining ma kar parew. Tomur riy, ma ke nang ni ke diyen. Ireray e n’en ni ma k’aring e tamra’ nib gel nap’an ni yira nang! U tan fare Motochiyel rok Moses, ngan li’ ngem’ e en kan pirieg ni ke un ko ngongol ni darngal ara adultery. Fare pilung e baga’ ni i lemnag ni denen ni ke rin’ e rayog ni ngan mithag. Ere ke pi’ e thin ke yan ngak e pi salthaw, ni be tay chilen ngak Uriah ni nge sul nga Jerusalem. I athapeg David ni Uriah nge Bath-sheba e ngar parew ko re nep nem, machane de buch ban’en ni aram rogon. Chiney ke kireban’ ni bochan, i l’og David Uriah biyay ko gin ni yibe mahl riy ni be fek e babyor ni fen Joab, ni ani ga’ ko salthaw. Fare babyor e be yog ni ngan tay Uriah ko gin ni rayog ni nge yim’ riy. I fol Joab riy, min li’ Uriah ngem’. Tomren ni ke lebuguy Bath-sheba fare yalen ni yima yornag e yam’, me fek David Bath-sheba nge mang leengin.​—2 Samuel 11:1-27.

11. Mang ban’en ni weliy Nathan murung’agen ngak David, ma mang e ke rin’?

¹¹ Fare liyeb e gowa ke yib angin, machane susun manang David ni urngin ni be buch e ri manang Jehovah. (Hebrews 4:13) Ke yan boch e pul, min gargelnag fare tir. Ngemu’, me pow’iy Got Nathan ni profet, me yan ngak David. I weliy fare profet ngak fare pilung rarogon murung’agen reb e pumoon nib fel’ rogon ni bay boor e saf rok me fek e saf rok be’ nib gafgow ni kari mus nib t’uf rok nge li’. Fare chep e ke pug e tafinay nib mat’aw rok David nib mat’aw machane de lemnag ni bay fan nib mith. Chi ngiyal’ nem i pufthinnag David fare pumoon nib fel’ rogon. U fithik’ e damumuw rok, mi yog ngak Nathan ni gaar: “Re moon ni ke rin’ e re n’ir e ba’ tapgin ni ngan li’ ngem’!”​—2 Samuel 12:1-6.

12. Mang pufthin e yog Jehovah nib togopuluw ku David?

¹² “I gur e cha’ nem!” i fulweg fare profet ni aram rogon. I pufthinnag David ir. Ba mudugil, ni damumuw rok David e papey nge ngal ni tamra’ nge kireban’ nib gel. Ke gin ngay, me motoyil u nap’an ni be weliy Nathan e pufthin rok Jehovah ni dabiyog ni ngan mil riy. Dariy bbug e thin ra fal’eg lanin’uy. I dariyfannag David e thin rok Jehovah u daken e tin ni kireb ni rin’. Gathi ke li’ Uriah ko sayden ko toogor? Ere dabi chuw e sayden ko tabinaw rok David. Gathi ke fek leengin Uriah nib mith? Tin kireb ni aram rogon ni buch rok, e dabi mith, ya goo ra nang e girdi’.​—2 Samuel 12:7-12.

13. Mang e ke rin’ David ko thin rok Jehovah ni be llowan’nagey?

¹³ N’en nib fel’ ni rin’ David, e de mithag e denen rok. De puwan ngak Nathan ni profet. De yog ni gathi kireb rok ya kireb rok boch e girdi’ ara i mat’awnag ir bochan e n’en ni ke rin’. Nap’an ni ka nog ngak e denen ni rin’, i yog David ni riyul’ ni i rin’ e pi nem, ni gaar: “Kug denen nib togopuluw ngak Jehovah.” (2 Samuel 12:13, NW) Psalm 51 e be dag gelngin e kireban’ nib gel nbochan e denen rok nge feni gel ni kari kalngan’. I wenig ngak Jehovah ni gaar: “Dab mu n’igeg nggu chuw u p’eowchem; dab mu chuweg rog fare Kan ni Thothup rom.” Ke mich u wan’ Jehovah nbochan e runguy rok, Jehovah e dabi n’ag be’ ni kari “kalngan’” ko denen rok. (Psalm 51:11, 17) I par David ni ba pagan’ ngak fare kan ni thothup rok Got. Yugu aram rogon ni de ayuweg Jehovah David ni nge yororiy ko magawon nib gel nbochan e denen rok, me ke n’ag fan e kireb ni rin’ u wan’.

14. Susun mang e thingarda rin’ed ko thin rok Jehovah ni be llowan’nagey?

¹⁴ Gadad gubin e daworda flontgad, ma gad ma denen. (Roma 3:23) Yu ngiyal ma rayog ni ngada awgad ko denen nib ubchiya’, ni bod David. Ni bod rogon, ba matam ni ma t’ufegey ma ma llowan’nag pi fak, e ku arrogon ni ma yal’uweg Jehovah e piin ni be athamgil ni ngar pigpiggad ngak. Yugu aram rogon ni thin ni be llowan’nigey e ba’ angin, machane, de mom ni ngan fol riy. Tin riyul’ riy, yu ngiyal’ e ma “kireban’uy nib gel.” (Hebrews 12:6, 11) Machane, faanra ngad “folgad ko thin ni be llowan’nigey,” ma rayog ni nge gapas thildad Jehovah biyay. (Proverbs 8:33) Rogon ni fare kan ni thothup rok Jehovah e ra flaabnagdad ni gubin ngiyal’, ma thingarda folgad ko fonow ma nguud maruweliyed ni gad ra fel’ u wan’ Got.

Dabni L’agan’uy ko Chugum nde Mudugil

15. (a) Mang boch e kanawo’ ni ma fanay boch e girdi’ e chugum rorad ngay? (b) Mang e baadag David ni nge fanay e chugum rok ngay?

¹⁵ Dariy ban’en ni be dag ni yib David ko tabinaw ni ri yimanangrad ara tabinaw nib fel’ rogon. Machane, nap’an ni ke mang pilung David, me yoor i yoor ban’en rok. Rogon e n’en ni kam nang, e boor e girdi’ e kar ulunguyed e chugum rorad, ni be mun daken e chogow riy, ara yad ma fanay ni goo yad. Boch e girdi’ e kar fanayed e salpiy rorad ni fan ni nga nog e sorok ngorad. (Matthew 6:2) Bathil rogon ni i fanay David e fel’ rogon. I finey ni nge ta’ fan Jehovah ngay. I yog David ngak Nathan ni baadag ni nge toy ba tempel ni fan ku Jehovah ni ngan ta’ fare kahol ko m’ag ngay, ni immoy u Jerusalem ni “bay ulan ba tent.” Ke felfelan’ Jehovah ko tin baadag David ni nge rin’ machane ke yog ngak u daken Nathan ni Solomon ni fak e ra toy fare tempel.​—2 Samuel 7:1, 2, 12, 13.

16. Mang e ke rin’ David ni fan ko maruwel ni ngan toy fare tempel?

¹⁶ I kunuy David boch ban’en ni ngan fanay ko maruwel ko re naun ney nib ga’. I yog David ngak Solomon ni gaar: “Kug kunuy ni fan ko naun rok Jehovah bokum biyu’ e talent ko gol reb e million talent ko silver, nge copper nge wasey ndabiyog ni ngan thabthabelnag ya kaygi yoor; ma kug kunuy e palang nge malang, machane nga mu uneg boch ngay.” Ma tirok e chugum, ke pi’ 3,000 talent ko gol nge 7,000 talent ko silver.a (1 Chronicles 22:14; 29:3, 4, NW) Rogon nib gol David, e gathi bochan nge guy e girdi’, ya be m’ug e michan’ rok ko tin ke pi’ nge yul’yul’ ku Jehovah Got. Bochan e manang ko mini’ e Tabolngin e flaab rok me yog ngak Jehovah ni gaar: “Urngin ban’en e tirom, ma gamad ma pi’ ban’en ngom ni yib u paam.” (1 Chronicles 29:14, NW) Gum’irchaen David nge feni gol e ke k’aring ni nge rin’ urngin ni rayog rok ni nge m’oneg e liyor nib machalbog.

17. Uw rogon ma fare fonow ni bay ko 1 Timothy 6:17-19 e ba puluw ku be’ nib fel’ rogon nge be’ nib gafgow?

¹⁷ Ku arrogodad, yibe athapeg ni ngad fanayed e chugum rodad ni ngad rin’ed e tin nib fel’. Dabda nameged e yafas nib sug ko chogow, ya kab fel’ ni ngad fel’gad u wan’ Got​—ireray e kanawo’ ko gonop nib riyul’ nge felfelan’. I yoloy Paul ni gaar: “Mog ngak e piin ni boor ban’en rorad ko biney e tamilang ni dabra ufanthingad, ma dabi l’agan’rad ko pi n’em nde mudugil, ni aram e pi n’en ni ma fel’ rogoy riy ko biney e tamilang, machane nge l’agan’rad ngak Got ni ir e ba gol ni be pi’ urngin ban’en ngodad ni be fel’ rogodad riy. Mog ngorad ngar ngongliyed e tin nib fel’, ma ngongol nib fel’ e nge yoor ni ngar ngongliyed, ma ngar golgad ni nge m’agan’rad ngay ni ngar pied boch e tin ni ba’ rorad ban’en ngak boch e girdi’. Ereray kanawoen mi yad kunuy e flaab ni fan ngorad ni ir e bay mang def ngorad nib gel ni fan ngorad e chiney i yan ngaram. Ma aram e ra yog ngorad e yafas ni ir e bin riyul’ e yafas.” (1 Timothy 6:17-19) Yugu demtrug ko ba fel’ rogodad fa danga’, ma nguuda pagedan’dad ko kan ni thothup rok Got ma ngad leked woen e yafas ni ra yoornag ban’en rodad u “p’eowchen Got.” (Luke 12:21) Dakuriy ban’en ni kab ga’fan ko tin baaray ni gad ra fel’ u wan’ e Chitamangidad u tharmiy nib tarunguyey.

Mu Piem Ngak Got ni Ke Fel’ u Wan’

18. Uw rogon ni rin’ David ban’en nib fel’ ni nge fol e Kristiano riy?

¹⁸ U n’umngin nap’an e yafas rok, ke athamgil David ni nge fel’ u wan’ Jehovah. I yon’ e tang nib ga’ laman ni gaar: “Mu runguyeg, O Got, mu runguyeg, ya gur e gu be naf ngom.” (Psalm 57:1) De aw nib m’ay fan e pagan’ rok ngak Jehovah. Ke pilibthir David, ma “ke fel’ e pi rran rok u wan’.” (1 Chronicles 23:1, NW) Yugu aram rogon ni ke denen David nib gel, ma yimanang ni bagayad boor e Pi Mich rok Got ni kar daged e michan’ rorad nib gel.​—Hebrews 11:32.

19. Uw rogon ni ngad pied gadad ngak Got ni gadad ba fel’ u wan’?

¹⁹ Ga ra mada’nag e yafas ni ke thil rarogon i yan, ma nga mu lemnag rogon ni ayuweg Jehovah David nge gelnag, me yaluweg, ere ku rayog ni nge rin’ ngom ni aram rogon. Paul ni apostal, e bod David, i mada’nag e yafas ni boor ban’en ni be thil riy. Machane, ku i par nib yul’yul’ ni be pagan’ ngak fare kan ni thothup rok Got. I yoloy ni gaar: “Demtrug e mit i n’en ni gu ra mada’nag ma ba’ gelngig ni bochan e cha’ nem ni be pi’ gelngig.” (Filippi 4:12, 13, NW) Faan ra pagan’dad ngak Jehovah, ma ra ayuwegdad. Baadag ni ngad pigpiggad ngak ni ngeb angin. Faan gad ra motoyil ngak ma gad chuchugur ngak, ma ra pi’ gelngidad ni ngad rin’ed e tin nib m’agan’ ngay. Faanra ngad ululgad ni nguuda pagedan’dad ko kan ni thohtup rok Got, ma rayog ni ngad ‘pied gadad ngak Got ni ke fel’ u wan’ e chiney iyan ngaram ndariy n’umngin nap’an.​—2 Timothy 2:15.

[Footnote]

Uw Rogon ni Ngam Pi’ e Fulweg?

• Uw rogon ni ngad kol ayuwgad ko ngongol ni ufanthin?

• Mang fan thingar dabda fulweged taban e kireb ni kan rin’ ngodad?

• Susun uw rogon e thin ni be llowan’nagey u wan’dad?

• Mang fan ni thingarda pagedan’dad ngak Got ma gathi chugum?

[Picture on page 14]

I pagan’ David ngak e kan ni thothup rok Got me athamgil nge fel’ u wan’ Got. Ereray e n’en ni ga ma rin’?

[Picture on page 16]

“Urngin ban’en i yib rom, ma kug pi’ed ngom ya yib u paam”