“Mu Fil Ngog Rogon ni Nggu Rin’ e Tin nib M’agan’um Ngay”
“Mu fil ngog rogon ni nggu rin’ e tin nib m’agan’um ngay.”—PS. 143:10, BT.
BOCH BAN’EN NIB GA’ FAN NDAB DA PAGED TALIN
Mang e pi n’en ni buch rok David ni be m’ug riy nrib ga’ fan u wan’ rogon ni ma lem Jehovah?
Mang e ke ayuweg David ni nge tamilang u wan’ e tin nib m’agan’ Got ngay?
Mang e ra ayuwegdad ni ngaud fel’gad u wan’ Jehovah?
1, 2. Uw rogon ni nge fel’ rogodad nfaanra kad filed e tin nib m’agan’ Got ngay? Uw rogon ni nge fel’ rogodad ko n’en ni ke rin’ David ni Pilung?
GA BE yan nga lan e loway. Ma kam guy ni ke yan ni l’agruw pa’ e kanawo’. Bin ngan e kanawo’ e ga ra yan riy? Sana ga ra yan nga daken e malang nib ga’ ya ngam guy ko ngan e be sor e gali kanawo’ nem ngay. Ere, nap’an ni gad ra dugliy ban’en nib ga’ fan, maku rayog ni nge ayuwegdad nfaanra ke tamilang u wan’dad u murung’agen e lem rok Got. Re n’ey e ra ayuwegdad ni ngad nanged e tin nib m’agan’ Got ngay. Ma aram e rayog ni ngad folgad ko ‘kanawo’’ nib fel’ u wan’ Jehovah.—Isa. 30:21.
2 Nap’an e yafas rok David ni Pilung nu Israel kakrom, mab ga’ ni ma athamgil ni nge lem ni bod Jehovah. Re n’em e be yip’ fan ni i athamgil ni nge rin’ e tin nib m’agan’ Got ngay. Ma ir e en ni i par nib yul’yul’ ngak Jehovah Got. Re article ney e ra ayuwegdad ni ngad filed ban’en rok David u nap’an ni ke yib e magawon ngak nib gel.—1 Ki. 11:4.
I TAY DAVID FAN FITHINGAN JEHOVAH
3, 4. (a) Mang e ke k’aring David ni nge cham ngak Goliath? (b) Uw rogon fithingan Got u wan’ David?
3 Nap’an ni kab fel’ yangaren David me cham ngak Goliath ni be’ nu Filistia. Mang fan ni ke lemnag David nrayog ni nge cham ngak e cha’ nem ni 2.9 meter n’umngin ma rib fel’ e talin e cham ni be fek. (1 Sam. 17:4) Gur, bochan ni ir be’ nib mudugil laniyan’? Ara bochan ni ke mich Got u wan’? Gali ney e ke ayuweg David ni nge rin’ e re n’em. Machane, bin th’abi ga’ i fan ni ke k’aring David ni nge cham ngak e re pumoon nem e ri ma tayfan Jehovah nge ngachal rok nrib gilbuguwan. I fith David u fithik’ e damumuw ni gaar: “Mini’ e re Filistine nem ni be’ nde nang Got ni be darifannag e salthaw rok Got, ni be’ ni be par nib fos?”—1 Sam. 17:26.
4 Yog David ngak Goliath ni gaar: “Kam fek e sayden nge sarey ni yima rugoy nge sarey ni yima yin’, machane gag e ku gub ngom u fithingan Somol ni Gubin ma Rayog Rok, ni ir e Got rok e salthaw nu Israel ni ga be darifannagrad.” (1 Sam. 17:45) I pagan’ David ngak fa bin riyul’ e Got ni nge ayuweg. Me fanay e gawul ni nge li’ Goliath ngay ngem’. Ma i par David ni i pagan’ ngak Jehovah ma i tayfan fithingan. Me yog David ngak piyu Israel ni ngar ‘mathangeluwolnaged’ fithingan Jehovah.—Mu beeg e 1 Kronicles 16:35.
5. Uw rogon ni ma darifannag e girdi’ Jehovah e ngiyal’ ney ni bod Goliath?
5 Gur, ga ma uf ngak Jehovah ni ir e Got rom? (Jer. 9:24) Mang e ga ra rin’ nfaanra piin buguli yoror rom, ara piin gimed nga maruwel, ara piin gimed nga skul, ara girdi’ rom e kar darifannaged Jehovah nge Pi Mich rok? Gur, ga ra non ya ngam ayuweg fithingan Jehovah nfaanra bay be’ ni be darifannag, ma ra pagan’um ngak ni nge ayuwegem? Riyul’ ni bay “ngal’an ni ngan th’ab gulungey,” machane thingar dab da tamra’gad ni gadad e Pi Mich Rok Jehovah ma gadad e pi gachalpen Jesus. (Ekl. 3:1, 7; Mark 8:38) Thingar da kol ayuwgad ko ngongol nge thin rodad ni nge dab da k’aringed e damumuw ngak e girdi’ ndarur ted fan Jehovah nge thin rok. Machane, dab da boded piyu Israel nnap’an ni kar rung’aged e thin ni ke yog Goliath “mi yad rus.” (1 Sam. 17:11) Ere, thingar dabi maruwaran’dad ni ngad nonad ya ngad ayuweged fithingan Jehovah, ma aram e rayog ni ngad thothupnaged. Gad baadag ni ngad ayuweged e girdi’ ni ngar nanged rarogon Jehovah Got. Ere, ngad fanayed e Bible ya nge nang e girdi’ fini ga’ fan ni ngad chugurgad ngak Got.—Jas. 4:8.
6. Nap’an ni ke cham David ngak Goliath, ma mang e be nameg? Mang e ngad ted nth’abi ga’ fan u wan’dad?
6 Cham ni tay David ngak Goliath e ku be fil ban’en ngodad. Nap’an ni be mil David ni nge yan ngak Goliath, me fith ni gaar: “Faanra li’ be’ e re Filistine nem nge chuweg e tamra’ rok yu Israel ma mang e yira pi’ ngak?” Me fulweg e girdi’ ngak ni lungurad: “En nra li’ e ra fal’eg e en ni pilung rogon, me pi’ fak ngak nge mang leengin.” (1 Sam. 17:25-27) Machane gathi pi tow’ath nem e ir e th’abi ga’ fan u wan’ David. Baadag ni nge pining e sorok ngak Got. (Mu beeg e 1 Samuel 17:46, 47.) Ma gadad, mang e bin th’abi ga’ fan u wan’dad? Kemus ni gad baadag ni nge pining e girdi’ e sorok ngodad, fa? Kemus ni gad baadag ni nge yoor e salpiy rodad, ma nge gilbuguwdad ko re fayleng ney, fa? Ba mudugil ni gad baadag ni ngad boded David ni gaar: “Mu uned ngog ngad weliyed ngak e girdi’ feni sorok Somol; marod ngad pininged e sorok nga fithingan!” (Ps. 34:3) Ere thingar da pagedan’dad ngak Got, ma ngad ted u wan’dad ni n’en th’abi ga’ fan e ngan pining e sorok nga fithingan.—Matt. 6:9.
7. Uw rogon ni nge yag ngodad e michan’ nib gel nib t’uf rodad u nap’an ni gad ra mada’nag e girdi’ ndabun e machib?
7 Ba t’uf ni bay e michan’ nge pagan’ rok David ngak Jehovah nib gel nge yag ni nge cham ngak Goliath. Maruwel rok David e ngiyal’ nem e ma gafaliy e saf, ma aram e ba t’uf ni nge pagan’ ngak Jehovah u nap’an ni be rin’ e re maruwel nem. (1 Sam. 17:34-37) Ere kub t’uf ni bay e michan’ rodad nib gel nge yag ni ngad ululgad ko machib nib ga’ nnap’an ni kad mada’naged e girdi’ ndabun e machib. Rayog ni nge gel e michan’ ni faanra ngaud pagedan’dad ngak Got ko pi n’en ni gad ma rin’ u gubin e rran. Bod ni, rayog ni ngad weliyed murung’agen e tin riyul’ u Bible ngak e girdi’ ni yad be par u toobdad u nap’an gad be un u bus ara taxi? Maku thingar da machibnaged e girdi’ ni bay u kanawo’ u nap’an ni gad be machib u mit e tabinaw i yan.—Acts 20:20, 21.
I PAR DAVID NI BE SONNAG JEHOVAH
8, 9. Nap’an ni ke athamgil Saul ni Pilung ni nge li’ David, ma uw rogon ni i dag David ni tin nib m’agan’ Got ngay e rib ga’ fan u wan’?
8 Reb e kanawo’ ni dag David ni ma pagan’ ngak Jehovah e bay rogon ngak Saul ni ir bin som’on e pilung nu Israel. Ke awan’ Saul ngak David. Ma dalip yay ni ke pag e sarey ngak David ya baadag ni nge li’ ngem’. Machane, i pilo’ David rok Saul ya dabun ni nge fulweg taban. Ma tomur riy, me mil David rok Saul. (1 Sam. 18:7-11; 19:10) Me fek Saul 3,000 ko tin th’abi falu’ e salthaw rok u Israel nge yan ni be gayiy David. (1 Sam. 24:2) Immoy ba ngiyal’ ni ke yan Saul nga lan ba yiy ni ireray e gin ni bay David nge pi salthaw rok riy. Bochan ni ke yog Got ni David e ra mang pilung, ma rayog ni nge lemnag David ni kan bing e kanawo’ ngak ni nge li’ Saul ngem’. (1 Sam. 16:1, 13) Ma pi salthaw rok e kar pied e athamgil nga laniyan’ David ni nge li’ Saul ngem’. Machane ke yog David ni gaar: “I Somol e nge ayuwegeg nge dab gu rin’ ban’en ngak e masta rog ni Somol e turguy ni nge mang pilung! Ya thingar dab gu rin’ bochi ban’en ngak, ya ir fare pilung ni Somol e ke turguy!” (Mu beeg e 1 Samuel 24:4-7.) Ngiyal’ nem, ma ka be par ni Saul e pilung ni ke dugliy Got. Dawori chuweg Jehovah Saul ko maruwel rok, ere dabun David ni nge chuweg. Ke th’ab David bayang e mad rok Saul. Re n’em e be micheg ndabun David ni nge li’ Saul ngem’.—1 Sam. 24:11.
9 Nap’an ni ke guy David Saul bayay miki dag ni ka be tayfan. Ngiyal’ nem, ma David nge Abishai e kar tawgow ko gin ni bay Saul riy ni be mol. Yugu aram rogon ni ke yog Abishai ngak David ni ke tay Got e en toogor rok nga lan pa’, miki yog ni nge rugoy e sarey rok ngak, machane de pag David ni nge rin’ e re n’em. (1 Sam. 26:8-11) Bochan ni gubin ngiyal’ ni ma athamgil David ni nge fol rok Jehovah, ma aram e dabun ni nge kirebnag e pilung ni Jehovah e ke dugliy, ma de fol ko n’en ni ke yog Abishai ngak.
10. Mang magawon e rayog ni ngad mada’naged? Mang e ra ayuwegdad ni nge yag ni ngad rin’ed e tin nib m’agan’ Got ngay?
10 Maku er rogodad nrayog ni nge k’aringdad boch e girdi’ ni ngad rin’ed e tin yad be lemnag nib fel’, ma darur ayuweged gadad nge yag ni ngad rin’ed e tin nib m’agan’ Got ngay. Ara sana yad baadag ni ngad rin’ed ban’en u m’on ni ngad fal’eged i lemnag e tin nib m’agan’ Got ngay u murung’agen. Ireray e n’en ni ke rin’ Abishai ngak David. Ere dabiyog ni nge k’aringdad be’ ni ngad rin’ed e tin yad be lemnag nib fel’ nfaanra ke tamilang u wan’dad e tin nib m’agan’ Got ngay, ma ngad turguyed ni ngad folgad riy.
11. Uw rogon ni i dag David ni bin th’abi ga’ fan ko yafas rok e nga i rin’ e tin nib m’agan’ Got ngay? Uw rogon ni ngad folwokgad rok David?
11 Ke meybil David ngak Jehovah Got ni gaar: “Mu fil ngog rogon ni nggu rin’ e tin nib m’agan’um ngay.” (Mu beeg e Psalm 143:5, 8, 10, BT.) Ri baadag David ni nge fil Got ban’en ngak ko bin ni nge pagan’ ngak ara nge fol ko n’en ni be yog boch e girdi’. Ma ‘lemnag murung’agen gubin e tin ke rin’ Jehovah, ma be puguran ngan’ gubin e ngongol rok.’ Maku er rogodad, rayog ni ngad nanged e tin nib m’agan’ Got ngay nfaanra ngad filed e Thin nu Bible ma gad fal’eg i lemnag fapi chep nu Bible nge rogon ni i ngongol Jehovah ngak e girdi’.
MANANG DAVID ROGON NI NGE FANAY KENGGIN E MOTOCHIYEL
12, 13. Mang fan ni ke puog David fare ran ni ke fek fa dalip i salthaw rok?
12 Ba ga’ fan u wan’ David e kenggin e motochiyel ara def ko tin riyul’ ni ma m’ug ko motochiyel, ma baadag ni nge fol riy. Ere fel’ ni ngad folwokgad rok. Mu lemnag e n’en ni buch u nap’an ni ke yog David ni baadag ni nge unum e “ran ko fare luwed u charen e garog nu Bethlehem.” Fa dalip i salthaw rok e ra chamniged wo’rad ngar thumurgad nga wuru’ e gin be par e pi Filistia riy, mi yad l’ing boch e ran u lan fare luwed, ngar sulweged ngak David. Machane, “de unum David; ya n’en ni rin’ ngay e puog nga but’ ni ke ognag ngak Somol.” Mang fan? Ke weliy David ni gaar: “Rdariy e n’en nra rin’ mu gu unum e pi ran ney! Ya ri bod ni kug unum rachaen e pi pumoon ney ni rdowgad ko pogofan rorad!”—1 Kron. 11:15-19, BT.
13 Manang David nrogon ni yog fare Motochiyel e dabiyog ni ngan kay e racha’ ya ba t’uf ni ngan puog nga but’. Maku manang ko mang fan nthingar ni rin’ e re n’em. Ya “yafas ko gubin ban’en nib fas e bay u fithik’ e racha’.” Machane, n’en ni kan pi’ ngak David e ran ma gathi racha’, ere mang fan nde unum? Ya manang fan kenggin e re motochiyel nem. Ke tamilang u wan’ ni racha’ e ba ga’ fan u wan’ Jehovah. Ma pi pumoon nem ni kar feked fare ran e rayog ni ngar m’ad, ere ke lemnag David nfaanra unum e re ran nem ma be m’ug riy ni be darifannag e racha’ rorad. Ere ke dugliy ni nge puog nga but’, ko bin ni nge unum.—Lev. 17:11; Deut. 12:23, 24.
14. Mang e ke ayuweg David nge yag ni nge dugliy ban’en ni ke felfelan’nag Jehovah?
14 Motochiyel rok Got e ke mang bang ko yafas rok David nrib ga’ fan. Yog ni gaar: “Got rog, ri gub adag ni nggu rin’ e tin nib m’agan’um ngay! Thin rom e be par u fithik’ i lanin’ug.” (Ps. 40:8) I fil David murung’agen e motochiyel rok Got ma i fal’eg i lemnag nib fel’ rogon. I pagan’ nra fel’ rogon nfaanra fol riy. Ma bochan e re n’em, ma ri baadag ni nge fol ko pi Motochiyel ni kan pi’ ngak Moses maku baadag ni nge fol ko pi kenggin e pi motochiyel nem. Ere nap’an ni gad ra fil e Bible ma thingar da fal’eged i lemnag e pi n’en ni kad beeged. Gad ra rin’ ni aram rogon, ma rayog ni nge mang bang ko yafas rodad e pi kenggin e motochiyel, ma aram e rayog ni ngad dugliyed ban’en nra felfelan’nag Jehovah.
15. Uw rogon, ma daki fol Solomon ko Motochiyel rok Got?
15 Boor e tow’ath ni ke pi’ Jehovah ngak Solomon ni fak David. Machane, munmun ma daki fol Solomon ko Motochiyel rok Got. De fol ko motochiyel rok Got ni be yog ni pilung nu Israel e thingari ‘dabi yoornag leengin.’ (Deut. 17:17, BT) Boor e ppin nu bang ni ke leengirad Solomon. Ma nap’an ni ke pilibthir ma “kar waliyed ke un i tayfan yugu boch e got.” Ma demtrug ko mang e ke yog Solomon ni nge tawey ngay, ke “denen nib togopluw ngak Somol ma daki par nib yul’yul’ ngak ni bod ni i par David ni chitamangin.” (1 Ki. 11:1-6, BT) Ere rib ga’ fan ni ngad folgad ko pi motochiyel nge pi kenggin e motochiyel ni bay ko Thin rok Got! Bod ni, rib ga’ fan ni ngad rin’ed ni aram rogon ko ngiyal’ ni gad be lemnag ni ngad uned ko mabgol.
16. Mang e gad ra fil ko motochiyel rok Jehovah ni ngan mabgol “nrogon e mabgol ni ma tay e piin ni girdien Kristus”?
16 Faanra be dag e piin ni gathi tapigpig rok Jehovah nri yad baadaged gad, ma mang e ngad rin’ed? Gur, ngad boded David ni i guy rogon ni nga i lem ni bod ni ma lem Got? Ara ngad boded Solomon ni i darifannag e motochiyel rok Jehovah? Tin riyul’ e tapigpig rok Got e ka nog ngorad ni ngar mabgolgad “nrogon e mabgol ni ma tay e piin ni girdien Kristus.” (1 Kor. 7:39) Ere, faanra ke lemnag reb e Kristiano ni nge un ko mabgol, ma thingari leengiy be’ u lan e ulung. Ma gad be nang fan ko re motochiyel ney nfaanra bay be’ ni gathi tapigpig rok Jehovah ni ke dag ko ngongol rok ni baadagem, ma ngam palognagem rok.
17. Mang e ra ayuwegdad ya nge yag ni ngad siyeged ni nge dab da yaliyed yaan e puwlag?
17 Maku ngongol ni dag David ni i guy rogon ni nge lem ni bod ni ma lem Jehovah e ra ayuwegdad ndab da yaliyed yaan e puwlag. Mu beeg e pi thin nu Bible ni baaray, ma ngam lemnag kenggin e motochiyel ni bay riy, ma ngam athamgil ni nge tamilang u wan’um e tin nib m’agan’ Jehovah ngay. (Mu beeg e Psalm 119:37; Matthew 5:28, 29; Kolose 3:5.) Thingar da fal’eged i lemnag e pi motochiyel rok Got ya nge yag ni ngad siyeged ni nge dab da yaliyed yaan e puwlag.
NGAM GUY ROGON NI NGAM LEM NI BOD ROGON NI MA LEM GOT
18, 19. (a) Yugu aram rogon ndawori flont David, ma mang e ke ayuweg nge yag ni nge par nib fel’ u wan’ Got? (b) Mang e kam dugliy u wan’um ni ngam rin’?
18 Yugu aram rogon ni boor ban’en ni ke rin’ David nib fel’ ni ngad folgad rok, machane ke rin’ boch ban’en nib gel e kireb riy. (2 Sam. 11:2-4, 14, 15, 22-27; 1 Kron. 21:1, 7) Machane gubin ngiyal’ ni ke kalngan’ David ko denen ni ke rin’. I “par nib yul’yul’” ngak Got. (1 Ki. 9:4) Mang fan nrayog ni nga dogned ni aram rogon? Ya ke athamgil David ni nge rin’ e tin nib m’agan’ Jehovah ngay.
19 Yugu aram rogon ndawor da flontgad ma rayog ni ngad fel’gad u wan’ Jehovah. Thingar da filed e Thin rok u fithik’ e yul’yul’, ma ngad fal’eged i lemnag nib fel’ rogon e pi n’en ni kad filed, ma ngaud ngongolgad nib puluw ngay. Gad ra rin’ ni aram rogon, ma rayog ni ngad boded fare psalmist ni ke wenig ngak Jehovah u fithik’ e sobut’an’ u daken e meybil ni gaar: “Mu fil ngog rogon ni nggu rin’ e tin nib m’agan’um ngay.”
[Sasing ko page 10]
Mang e ke taleg David ni nge dabi li’ Saul ngem’ nyugu aram rogon ni kan bing e kanawo’ ngak ni nge rin’?
[Sasing ko page 11]
Mang e gad ra fil rok David u nap’an ni ke dabuy ni nge unum fare ran ni ke fek e pi salthaw rok?