Ngongol ni Sasaliyeb e Ra M’ay!

“Mpar ni Somol e ke l’agan’um ngak mu um fol ko tin ni ke yog . . . Bay mu guy e piin nib kireb ni kan tulufrad kar chuwgad u daken e binaw.”—PSALM 37:34.

TAAREB rogom ngak boch e girdi’ ni yad ma lemnag ni ngongol ni sasaliyeb e ban’en ni thingari buch, ma dariy ba ngiyal’ nra m’ay, fa? Faanra arrogon ma gathi goo gur e ga ma lem ni aram rogon. Kab kakrom i yib, ma boor mit e am ni ke sunmiy e girdi’ ni nge ayuwegrad. Machane, der yag rorad ni ngar chuweged e ngongol ko sasaliyeb. Ere, bay e athap nra ba ngiyal’ ma gubin e girdi’ ni yad ra dag ko ngongol rorad ni yad ba yul’yul’, fa?

Rogon ni be yog e Bible e bay e athap rodad. Ya ke yog Got ngodad ni dabki n’uw nap’an ma ra chuweg e ngongol ni sasaliyeb u ga’ngin yang e fayleng. Ma uw rogon nra rin’ e re n’ey? Ra fanay Got Gil’ilungun, ni ireram reb e am ni bay u tharmiy nra thilyeg gubin ban’en u roy u fayleng. Ireray fare Gil’ilungun ni fil Jesus murung’agen ngak pi gachalpen ni ngar yibilayed. Ni aram e n’en ni yima yog fare Meybil rok Somol ngay. Ya ke weliy Jesus ni gaar: “Ma ga par ni gur e ga be gagiyegnagmad [“Gil’ilungun,” NW], min rin’ e tin nib m’agan’um ngay u roy u but’.”—Matthew 6:10.

I yiiynag e Bible u murung’agen e en ni nge Pilung ko re Gil’ilungun nem ni aram Jesus Kristus ni gaar: “Piin ni gafgow e yad ra wenig ngak ni nge ayuwegrad ko gafgow ni ke yib ngorad ma ra chuwegrad u fithik’, maku ir i tay e piin ni gafgow ni dabisiy ni ngan ayuwegrad ma kan pagrad nda ni ayuwegrad. Ma runguy e piin ni meewar ma ba gafgow; ma ayuweg e pogofan rok e piin ni gafgow. Ma chuwegrad u fithik’ urngin mit e gafgow nib gel ni yibe tay ngorad.” (Psalm 72:12-14) Kad nanged ni manang Jesus gelngin e gafgow ni be tay e piin ni kan gafgownagrad ko ngongol ni sasaliyeb, mab m’agan’ ngay ni nge chuwegrad u fithik’ urngin mit e gafgow nib gel ni yibe tay ngorad! Ma re n’ey e susun nra pi’ e athamgil nga lanin’dad.

En ni nge mang Pilung u Gil’ilungun Got e ir be’ nib gel gelngin mab ta runguyey, ma ra chuweg gubin e ngongol ko sasaliyeb u ga’ngin yang e fayleng. Uw rogon? Aram e nge chuweg dalip i ban’en ni be k’aring e ngongol ni sasaliyeb.

Bochan ni Gadad e Ta Denen

Ngiyal’ ney e ba mom ni ngad rin’ed boch ban’en ni kemus ni gadad e nge fel’ rogodad riy ni bochan e gadad e ta denen. (Roma 7:21-23) Machane, ku bay e girdi’ nib fel’ ni yad baadag ni ngar rin’ed e tin nib mat’aw. Yad ma maruweliy e michan’ rorad ko fare biyul rok Jesus ma rayog ni ngan n’ag fan e denen rorad.a (1 John 1:7, 9) Ma pi girdi’ ney e ra yib angin fare t’ufeg ni dag Got ngorad ni bod rogon ni be yog ko John 3:16 ni gaar: “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.”

Bay boch ban’en nrib manigil nra rin’ Jehovah ni fan ko e piin ni yad ba yul’yul’ ngak. U lan e bin nib beech e m’ag ma dabisiy nra chuweg Jehovah e denen, ma ra sulweg e piin nib yul’yul’ ngar flontgad mar pared ni kar mat’awgad u mit Got. (Isaiah 26:9; 2 Peter 3:13) Ma dariy be’ ni ku ra ngongol u fithik’ e sasaliyeb ya bochan dakuriy e denen. U tan Gil’ilungun Got ma piin nib yul’yul’ e “bay ra pired ni gathi yad e sib rok e wod.”—Roma 8:20-22.

Bochan ni Gad Be Par ko Re Fayleng nib Kireb Ney

Rib gel e kireban’ riy, ya boor e girdi’ ni yad ma gafgownag yugu boch e girdi’. Yad ma darifannag e piin nib sobut’ ni yad ba gafgow, maku yad ma k’aring boch e girdi’ ni ngar ngongolgad u fithik’ e sasaliyeb. Thin nu Bible e be fonownag e pi girdi’ ney ni be gaar: “Piin nib kireb e ngongol rorad e ngar paged, mi yad thilyeg rogon e lem ni yad be tay.” Faan yad ra kalgadngan’rad, ma be micheg Got u Bible nra “gur ni nge n’ag fan ban’en u wan’.”—Isaiah 55:7.

Machane, ra thang Got e piin ndubrad ni ngar thilyeged e ngongol rorad. N’en ni be micheg e Bible e ra lebug u daken Gil’ilungun Got ma faanra “Somol [“Jehovah,” NW] e ke l’agan’um ngak mu um fol ko tin ni ke yog; . . . ma bay mu guy e piin nib kireb ni kan tulufrad kar chuwgad u daken e binaw.”b (Psalm 37:34) Bochan ni kan thang e piin nib kireb ma aram e dabkiyog ni ngar magawonnaged e piin ni yad be pigpig ngak Got u fithik’ e yul’yul’.

Bochan ni Be Gagiyeg Satan ni Moonyan’

Satan ni Moonyan’ e ir e ba’ nth’abi kireb. Ma gad be pining e magar ngak Jehovah ya dabki n’uw nap’an ma ra kalbusnag Satan ya nge dabki magawonnag e girdi’. Ma bay i munmun me thang Satan ni manemus, ma aram e dakuriy biid ni nge k’aring e girdi’ ni ngar ngongolgad u fithik’ e sasaliyeb.

Sana ga ra lemnag ni n’en ni i micheg Got ni nge chuweg tapgin e ngongol ni sasaliyeb e kemus ni ba lik’ay. Dabisiy ni ga ra lemnag ko, ‘Riyul’ nrayog rok Got ni nge rin’ e pi n’ey, fa? Faanra arrogon, ma mang fan ndawori rin’?’ Rib fel’ e gal deer ney, ma ra pi’ e Bible e fulweg riy nib tamilang.c Gamad be pi’ e athamgil ngom ni ngam fal’eg i gay e n’en ni be fil e Bible u murung’agen e tin ni bay nga m’on u nap’an yira chuweg gubin e ngongol ni sasaliyeb.

[Boch e thin nra tamilangnag murung’agen]