Rayog ni Ngan Par ni Yib Yul’yul’ u Lan e Re Fayleng nib Kireb Ney, Fa?
“Gamad ba adag ni nguug rin’ed e tin nib mat’aw ni gubin ngiyal’.”—HEBREWS 13:18.
YUGU aram rogon ni gadad e tadenen, mab sug e ngongol nib kireb ko re fayleng ney, maku bay Satan ni ir e be magawonnagdad, machane, rayog ni ngad gelgad ko pi n’ey. Uw rogon? Faan gad ra chugur ngak Got ma gad fol ko pi kenggin e motochiyel ni gad be fil ko Thin rok u Bible. Gad ra guy l’agruw i ban’en.
KENGGIN E MOTOCHIYEL NU BIBLE: “Dab mu folgad ko ngongol ni yibe rin’ u roy u fayleng.”—Roma 12:2
Tin ni i buch ko yafas rorad: Guilherme ni be’ nu Brazil nib chag ko siyobay, e weliy nib mo’maw’ ni ngan par ni yib yul’yul’. I yog ni gaar: “Yu ngiyal’ mab mo’maw’ ni nge yag e tin nib t’uf nga barba’ e maruwel ara ba mo’maw’ ni ngan ulul ko maruwel ni bochan e ke magawon rogon e par, ere ba ga’ nrayog rok reb i girdien e siyobay ni nge un ko ngongol nib sasaliyeb. Ma boor e girdi’ ni yad be lemnag ndariy e kireb riy ni faanra yad ra pi’ ara ngar feked e salpiy ara boch ban’en u fithik’ e sasaliyeb. Faanra gur be’ ni bay e siyobay rom, ma boor ban’en ni thingar um pi’ puluwon, ma bochan e re n’ey ma yu ngiyal’ e ba mo’maw’ ni ngan par ni yib yul’yul’.”
Machane, ke yag rok Guilherme ni nge par nib yul’yul’. Ya yog ni gaar: “Rayog ni ngan par ni yib yul’yul’ u nap’an ni yibe un ko siyobay. Ba t’uf ni ngam par ni gab mudugil mag rin’ e tin ni ga be lemnag ni ir e ba fel’. Thin ko Bible e ke ayuwegeg ni nggu nang fel’ngin e yul’yul’. Be’ nib yul’yul’ e ma par nib beech e nangan’ rok, mab gapas, ma yima tay fan. Ma rayog ni nge pi’ e athamgil nga laniyan’ e tin ku bay e girdi’.”
KENGGIN E MOTOCHIYEL NU BIBLE: “Piin ni yad ba adag ni nge yoor e salpiy rorad e yad ma pagrad ngak e pi n’en ni ma pingeg e girdi’ nge denen, mi yad aw ko wup ko ar’ar ni aram e yibe ar’arnag e tin ndariy fan nge tin nra kirebnigey, ni ir e ma girngiy e girdi’ ko tagan mi yad malog. Ya chogowen e salpiy e ir lik’ngin urngin mit e kireb.”—1 Timothy 6:9, 10.
Tin ni i buch ko yafas rorad: André e be’ ni bay e siyobay rok ni ma fal’eg e security system. Bay reb e soccer club nib ga’ ni ma yan ngay ni nge fal’eg e security system rorad. Bay ba’ ngiyal’ ni yan nga ofis rorad ni nge pi’ babyoren e maruwel ni ke mu’ i ngongliy ya nge yag ni ngan pi’ puluwon. Ma gin ni yima pi’ puluwoy riy e boor e maruwel ni yad be ngongliy e ngiyal’ nem, ya yad be theeg e salpiy ni ke yag ngorad ko gosgos. Ere, ke gurgur faen ni nge pi’ puluwon e girdi’ ni yad be maruwel ko club rorad nib muun André ngay ya bochan ni ke pag e tayim ko maruwel e rorran nem.
I yog André ni gaar: “Nap’an ni gu be sul nga tabinaw ma kug pirieg ni boor e salpiy ni puluwog ni kan pi’. Ma gu lemnag ni facha’ ni ke pi’ puluwog e sana dabi nang ko mini’ e aromad ni ke pi’ e salpiy ngak ni boor. Ma n’en nra buch e ra yan i aw ni ir e ra sulweg fare salpiy ko maruwel rorad. Ere, kug dugliy u wan’ug ni nggu sul ngaram. Kug gay rogon ni nggu wan nggu taw nga ofis rorad, ya boor e girdi’ ni kar bad ni ngar guyed e gosgos e ngiyal’ nem. Ke gin faen ni ke pi’ puluwog ngog, ya dariy ba’ ngiyal’ ni ke sulweg be’ e salpiy ngak kafram ni aram rogon.”
Me ulul André ngay ni gaar: “Bochan ni gub yul’yul’ ko n’en ni kug rin’, ma re n’ey e ke k’aring faanem ni nge tayfag. Ma ke yan boor e duw ma yigoo birog maruwel e ka be ulul ko fare maruwel ko fare soccer club. Ri gub felfelan’ ni ke ayuwegeg e thin nu Bible ke yag ni nge fel’ murung’ageg ko maruwel rog.”
Rib gel e felfelan’ riy ni ngad nanged nrayog ni ngad siyeged e ngongol ni sasaliyeb u daken e ayuw rok Got. Machane, ra ngan chuweg e biney e ngongol ni sasaliyeb, ma dabiyog rok taa be’. Rib gel e biney e magawon, ma dabiyog ko girdi’ ni ngar chuweged. Ere gur, re n’ey e be yip’ fan ndariy ba ngiyal’ nra chuw e ngongol ni sasaliyeb? Bin tomur e article ni yira weliy e ra tamilangnag e fulweg ko pi deer ney u Bible ma ra pi’ e athamgil nga lanin’uy.