Mu Togopuluw Ngak Fare Lem Ko Fayleng Ni Be Thil I Yan

“Gathi fare lem ko fayleng e ke yog ngodad, ya lem ni yib rok Got.”​—1 KORINTH 2:12, NW.

1. Mang boch e kanawo’ ni kan bannag Efa riy?

“FARE porchoyog​—e bannigeg.” (Genesis 3:13) U daken e pi thin nem ni de yoor, ma fa bin som’mon e ppin, i Efa, e kari guy rogon ni nge weliy ko mang fan ni ke togopuluw ngak Jehovah Got. Riyul’ e n’en ni ke yog, ma yugu aram rogon de mat’awnag e tin kireb ni ke rin’. Tomur riy e kan thagthagnag ngak Paul ni apostal ni nge yoloy ni gaar: “[Efa] e kan bannag ni polo’.” (1 Timothy 2:14, NW) Kan bannag ni nge mich uwan’ ni re ngongol nem ni dabni fol​—ni ngan kay fare wom’engin ni kan falownag—​e rab felngin ngak, me bod Got. Maku kan bannag de poy ko mini’ e cha’ nem ni ke pow’iy nga bayang. De nang ni riyul’ ni Satan ni fare Moonyan’ e be non ngak u l’ugun fare porchoyog.​—Genesis 3:1-6.

2. (a) Uwrogon ni ma bannag Satan e girdi’ e ngiyal’ ney? (b) Mang “fare lem ko fayleng,” ma mang boch e deer e gad ra weliy e chiney?

² Ka nap’an Adam nge Efa, i ulul Satan ni nge bannag e girdi’. Riyul’ ni, ir “faanem ni bannag e girdi’ nu fayleng ni polo’.” (Revelation 12:9) Dawori thil e wo’ rok. Yugu aram rogon ni daki fanay e porchoyog, ma be par ni be mithag ir ma dabi poy e girdi’. U daken boch ko fare entertainment industry, fare media, nge ku boch e kanawo’, e ma bannag Satan e girdi’ riy ni nge michan’rad ni de t’uf rorad ara dabi yib angin ngorad rogon ni ma pow’iyrad Got u fithik’ e t’ufeg. Maruwel ni yugu ma tay fare Moonyan’ ni nge bannag e girdi’ e ke sunmiy nga laniyan’ e girdi’ u ga’ngin yang ni ngan togopuluw ko motochiyel nge kenggin e motochiyel u Bible. Bible e be yog ni ireray “fare lem ko fayleng.” (1 Korinth 2:12) Re lem n’ey e ri ba gel ni ma gagiyegnag e michan’, nge rogon e lem, nge ngongol rok e piin ni dar nanged Got. Uw rogon ni nge gagiyel e re lem ney, ma uwrogon ni ngad togopuluwgad nga gelngin nib kireb? Ngada guyed.

Be War i Yan e Tayfan ko Ngongol nib Fel’

3. Mang fan ni “fare lem ko fayleng” e be lingagil i yan ko ngiyal’ ney?

³ Ngiyal’ ney, ma “fare lem ko fayleng” e kari lingagil. (2 Timothy 3:1-5) Sana kam guy ni ke war e tayfan ko ngongol nib fel’. Thin nu Bible e be weliy ko mang fan ni aram rogon. Tomren ni ke mudugil fare Gil’ilungun Got ko duw 1914, me tabab e mahl u tharmiy. Satan nge pi moonyan’ e kar wargad minin’rad nga tooben e fayleng. Bochan nke damumuw, me gelnag Satan e maruwel rok ni nge bannag e girdi’ nu fayleng ni polo’. (Revelation 12:1-9, 12, 17) U urngin e kanawo’ ni rayog rok, ma be athamgil ni nge “bannagey, nfaanra rayog, ma musko piin ni kan mel’egrad.” (Matthew 24:24) Bochan gadad e girdi’ rok Got, ma maruwel rok e ribe puluweg ngodad. Be athamgil ni nge kirebnag e michan’ rodad ko tirok Got ma aram gad ra mul u pa’ Jehovah nge fare athap rodad ni yafas ni dariy n’umngin nap’an.

4. Uw rogon e Bible u wan’ e pi tapigpig rok Jehovah, ma uw rogon u wan’ e girdi’ nu fayleng?

⁴ Be guy Satan rogon ni nge kirebnag felngin fare Bible, ni aram e babyor nib ga’fan ni be fil ngodad murung’agen e en Ta Sunmiy ni ma t’ufegey. Pi tapigpig rok Jehovah e ba t’uf ma baga’ fan e Bible u wan’rad. Gad manang ni ireray e Thin rok Got ni kan thagthagnag, ma gathi thin rok e girdi’. (1 Thessalonika 2:13; 2 Timothy 3:16) Machane fayleng rok Satan, e baadag ni ngad lemnaged ban’en ni de puluw. Ni bod ni, tin som’mon e thin ko fare babyor ni be weliy e thin nib togopuluw ko fare Bible e be yog ni gaar: “Dariy ban’en nib ‘thothup’ u murung’agen e Bible, ma gathi ‘thin rok Got aram.’ Piin kar yoloyed e gathi girdi’ nib thothup ma gathi girdi’ ni Got e ke thagthagnag ngorad, ya fapi prist ni ri yad baadag ni ngeb gelngirad.” Piin ni ke michan’rad ko pi thin nem e mmom ni ngar uned ko lem nib pufrogon ni ngar liyorgad ku Got u kanawoen ni yad baadag​—ara dabkuura pigpiggad ngak.​—Proverbs 14:12.

5. (a) Mang e ke yog e en tayol babyor u murung’agen e pi teliw nib peth ko Bible? (b) Uw rogon nib thil ni ra ngan taarebnag e lem ko girdi’ nu fayleng nge thin ni be yog e Bible? (Ba muun ngay fare kahol ko bin migid e page.)

⁵ Ngan nog e thin nib tamilang ni yibe togopuluw ko fare Bible, ara nga nog e thin nde tamilang ni be togopuluw ngay, mab muun ngay e piin ma yog ni yad be fol ko teliw rorad ni darur yul’yul’gad, ma ke yoor e girdi’ ni kar dabuyed e teliw, mab muun ngay e teliw ni be fanay e Bible. U lan fare news media ngu fithik’ e girdi’ nib tolang e skul rorad, e ri yima yog e thin riy nib togopuluw ko teliw. Reb e tayol babyor e yog ni gaar: “Lem nib kireb u murung’agen Judaism nge teliw ni ma yog ni yad e Kristiano e kan wereg u fithik’ e yalen ni ri yimanang. Ra ngan lemanag e tin th’abi fel’ riy ma yibe lemnag ni tin nib fel’ u wan’uy ni ke n’uw nap’an; ma ra ngan lemnag e tin th’abi kireb riy e yibe lemnag, ni ireray e lem ni ke n’uw nap’an ni be taleg ni nge mon’og e tamilangan’ ma be magawonnag e mon’og ko science. U lan e pi duw ni kefini yan, ma re lem ney e ke gel me ngal’ ni moning nge fanenikan.” Re togopuluw ney e baga’ ni yib rok e piin ni ma yog ni dariy e Got me aw “ndariy fan rogon ni yad ma weliy fan ban’en.”​—Roma 1:20-22, NW.

6. Mang e be lemnag e fayleng u murung’agen e ngongol ni darngal ni dubun Got?

⁶ Ere, dabni gin ngay, ni erfan ni girdi’ e kar sorgad nga bang kar paloggad ko motochiyel rok Got u rogon e ngongol. Ni bod ni, Bible e be weliy ni pumoon ni ma darngalnag e pumoon e ban’en ni “yima tamra’ ngay.” (Roma 1:26, 27) Maku be weliy ni piin ni un ko ngongol ni darngal e dabiyog ni ngar manged girdien e gin suwon Got. (1 Korinth 6:9) Yugu aram rogon, u lan boor e binaw e gathi kemus ni ke fel’ u wan’uy e pi ngongol ney nib kireb ya kan tay nga lan e yuke babyor, ngu lan e pi magazine, nge tang, nge kachido, ma yima dag ko TV ni bod e ban ni ke yim’ e girdi’ nbochan. Piin ni ma yog e thin nib togopuluw ko pi ngongol ney e yibe lemnag ni piin tatogopuluw, ma ba laniyan’, ma ka yad be fol ko lem ni ke kakrom. Girdi’ nu fayleng e dar ma lemnag ni motochiyel rok Got e be dag ni ri ma lemnag rarogodad, ya yad ma lemanag ni ireray e n’en ni be magawonnag e puf rogoy nge felfelan’ rorad.​—Proverbs 17:15; Jude 4.

7. Mang boch e deer ni thingarda fithed gadad riy?

⁷ U fithik’ ba fayleng ni rib gel e togopuluw ni yima ta’ ngak Got, gad ra gonop ni faan gad ra fal’eg i yaliy e ngongol rodad nge felngidad. Gubin ngiyal’, ma thingarda fal’eged i yaliyed gadad u fithik’ e meybil ngu fithik’ e yul’yul’ ma ra mudugil lanin’dad ni gathi gad be man’ i yan nga orel ko lem rok Jehovah nge kenggin e motochiyel. Ni bod ni, rayog ni ngada fithed gadad: ‘Gu ma felfelan’ ko n’en gu ma siyeg u boch e duw kafram? Ri gu ma pag e chiney e pi ngongol ni dubun Got? Gu ma lemnag e chiney ni tirok Got e gathi ri baga’ fan ni gathi taareb rogon ni u gu lemnag kafram? Rogon e par rog e be dag ni kug tay nib m’on Gil’ilungun Got ko yafas rog?’ (Matthew 6:33) Ran fal’eg i lemnag e pi ney ma ra ayuwegdad ni ngad togopuluwgad ko lem ko fayleng.

“Dabda Man’gad Riy Nga Orel”

8. Uw rogon ma ra man’ be’ nga orel rok Jehovah riy?

⁸ Ke yoloy Paul ni apostal ngak e pi walagen ni Kristiano ni gaar: “Aram fan nthingar da chichiiyed pa’dad ko fapi thin nib riyul’ ni kad rung’aged, nge siy da man’gad riy nga orel.” (Hebrews 2:1) Ba barkow ni be man’ e dabi taw ko gin ni be nameg. Faanra dabi tiyan’ fare captain ko nifeng nge gireng, ma mom ni nge yan fare barkow rok nge pag e gampek me ser nga daken e war ko gin ni boor e malang riy. Maku, faanra dabda tiyan’dad ni thin riyul’ ko thin rok Got nib tolang puluwon, ma rayog ni ngada man’gad riy nga orel rok Jehovah ma gad ra gafgow ko tirok Got ni bod ni ke man’ e barkow. Gad ra gafgow ni aram rogon, ma de t’uf ni ngada paged e tin riyul’ ni polo’. Tin riyul’ riy, de yoor e girdi’ ni kar paged Jehovah nib tomgin ni lem rorad. Baga’ ni, yad ma un ni buchuw ma buchuw ko n’en ni ra magawonnagrad lanin’rad ma dabkuura tiyan’rad ko Thin rok Got. Dar naabgad, ma kar man’gad iyan ko denen. Ni bod ba captain ni ke mol, girdi’ ni aram rogon e dabi od nge mada’ ko ngiyal’ ni ke sowath.

9. Mang boch e kanawo’ ni i flaabnag Jehovah Solomon riy?

⁹ Mu lemnag rogon e yafas rok Solomon. I pag Jehovah fan ngak ni nge mang pilung rok piyu Israel. I pag Got Solomon ni nge toy fare tempel me pow’iy ni nge yoloy bang ko fare Bible. I non Jehovah ngak ni l’agruw ya ngiyal’ me pi’ ngak e fel’ rogon, me mang be’ nib gilbuguwan, me pag ni nge gagiyeg u fithik; e gapas. Ma n’en ni rib ga’ fan riy e, i taw’athnag Jehovah Solomon nge gel e gonop rok. I yog fare Bible ni gaar: “Me ulul Got i pi’ ngak Solomon e gonop nge llowan’ ni boor nge gum’ircha’ nib ga’ radan, ni bod e yan’ u dap’e lay. Ma gonop rok Solomon e kab boor ko gonop rok e girdi’ nu Orientals ma kab boor ko urngin e gonop nu Egypt.” (1 Kings 4:21, 29, 30, NW; 11:9) Ba mudugil, ni rayog ni ngan lemnag ni, faanra bay be’ ni ngii par nib yul’yul’ ku Got, ma aram Solomon. Yugu aram rogon, me man’ Solomon me togopuluw ko tin riyul’. Uw rogon me buch ni aram rogon?

10. Mang fonow e de yog rok Solomon ni nge fol riy, ma mang wenegan?

¹⁰ Ri manang Solomon fan e Motochiyel rok Got. Dariy e maruwar riy ni ka ri adag e pi fonow ni kan ta’ ni fan ko piin ni pilung nu Israel. Ma bang ko pi fonow nem e be gaar: “[Fare pilung] e thingari dabi yoornag leengin, ma dabi chel gum’irchaen nga bang.” (Deuteronomy 17:14, 17) Yugu aram rogon ni immoy e pi thin nem nib tamilang, ma Solomon e medlip miriay pi leengin nge dalip miriay e mispil rok. Boor u fithik’ e pi ppin nem e yad ma liyor ko pi got nu bang. Dada nanged ko mang fan ni kaygi yoor leengin Solomon, maku dada nanged ko uw rogon ni weliy fan. Tin gad manang e de yog rok ni nge fol ko thin ni yog Got nib tamilang. N’en ni buch e rib puluw nga rogon ni ginangey Jehovah. Be yog ni gaar: “Fapi leengin [Solomon] e munmun mi yad . . . suruy gum’irchaen nge fol ko yugu boch e kan.” (1 Kings 11:3, 4) “Buchuw ma buchuw”​—machane ba mudugil—​ni war e gonop rok ni yib rok Got. I man’ riy nga orel. Munmun, ma lem rok Solomon ni baadag ni nge fol me felfelan’nag Got e kan thiliyeg ko lem ni baadag ni nge felfelan’nag e pi leengin ni girdien e pi nam. Rib gel e kireban’ riy, ya bochan Solomon e ir e en ke yoloy e thin u m’on riy ni gaar: “Fakag, mu par ni gab gonop, ma nguum falfalan’nag gum’irchaeg, ma aram rayog ni gu pi’ e fulweg ngak e en ni be moningnageg”!​—Proverbs 27:11, NW.

Fare Lem ko Fayleng e Ba Gel Gelngin

11. Uw rogon ma tin gad ma ta’ nga lanin’dad e ra rin’ ban’en rogon ni gad ma lemnag?

¹¹ N’en ni buch rok Solomon e be fil ngodad ni bay e riya’ riy ni nga dogned ni gad manang e tin riyul’, ma gelngin e fayleng e dabi kirebnag e lem rodad. Ni bod e ggan ni ra rin’ ban’en nga dowdad, ma ggan ko lem rodad e ra rin’ ban’en ko lem rodad. Tin gad ra duruwiy e lem rodad ngay e ra gagiyegnag lanin’dad nge pangidad. Bochan ni yimanang ni riyul’ ni aray rogon, ya corporation e ma n’ag bokum billion e dolla reb e duw ni nga nog ko girdi’ e chugum rorad. Advertisements ni ba’ angin e ma yog boch e thin ni ma wawliy laniyan’uy nge boch e sasing nrak’aring e girdi’ ma yad ra adag. Girdien e advertisement e ku yad manang ni ngan guy reb e advertisement ni kemus ni taab yay ara l’agruw e baga’ ni dabi k’aring e girdi’ ni ngara gurgurgad ngar chuw’iyed fare chugum. Machane, tomren ni yan e tayim nib n’uw nap’an boch ma ke guy e girdi’ ni boor yay e baga’ nra adag e girdi’ fare chugum. Maruwel ko advertising e ba’ angin​—ya ra danga’, ma dariy be’ ni nge ta’ e salpiy rok ngay. Ri ma suruy e lem nge pangin e girdi’.

12. (a) Uw rogon ni ma suruy Satan laniyan’ e girdi’? (b) Mang e be dag ni piin Kristiano e ku rayog ni ngan suruy lanin’rad?

¹² Bod ba advertiser, ma Satan e be mon’ognag e lem rok ni be tay ko pin’en nib mom ni nge adag e girdi’, ya manang ni ra yoor e tayim ma rayog ni nge gel riy ko girdi’ ngar folgad ko lem rok. U daken e gosgos ara entertainment nge yugu boch e kanawo’ me yog rok Satan ni nge bannag e girdi’ nge mich u wan’rad ni tin nib fel’ e ba kireb ma tin nib kireb e ba fel’. (Isaiah 5:20) Mus ko tin riyul’ e Kristiano e kar paged ni maruwel rok Satan ni ngan wereg e thin de riyul’ e ra gagiyegnag lanin’rad. Bible e be ginangey ni gaar: “Ke yog fare Kan ni Thothup nib tamilang ni boch e girdi’ e bay ra n’iged e michan’ rorad ngak Kristus ko tin tomren e rran; mi yad fol ko pi kan ni yad ma lifith l’ugunrad, ni aram e kar folgad ko machib rok e pi moonyan’. Pi machib ney e yib rok e sabanban ko girdi’ ni yad ma lifith l’ugunrad, ni lanin’rad e gowa ke yim’ ya dakir yog ngorad e kireb ni yad be rin’, ni gowa kan urfiy lanin’rad nga ba wasay nib gowel.”​—1 Timothy 4:1, 2; Jeremiah 6:15.

13. Mang e chag nib kireb, ma mang ban’en nra rin’ ngodad?

¹³ Gadad gubin ma rayog ni nge kirebnagdad fare lem ko fayleng. Gelngin e m’ag rok Satan e rib gel. Bible e be fonownagdad u fithik’ e gonop ni gaar: “Dabmu mpaged gimed nga ni bannagmed, ya ra yan i bod ni ke lunguy; “Nchag ngak e girdi’ nib kireb me kireb pangiy nib fel’.” (1 Korinth 15:33) Chag nib kireb e ba muun ngay urngin ban’en ara urngin e girdi’​—ni mus ngak be’ u lan e ulung—​ma ra m’ug e lem ko fayleng rok. Faan gad ra yog ni nchag ko kireb ma dabi kirebnagdad, me ere gathi gad ra yog ni ngan chag ko fel’ e ku dabi ayuwegdad? Rib gel e oloboch riy! Be weliy e Bible fan nib tamilang u nap’an ni yog ni gaar: “Cha’ ni ma chag ngak e piin nib gonop e ra yog e gonop ngak, machane en ma m’ag ir ngak e girdi’ ni balyang ma ra kireb.”​—Proverbs 13:20, NW.

14. Mang boch e kanawo’ nib togopuluw ko lem ko fayleng?

¹⁴ Rogon ni ngada togopuluwgad ko lem ko fayleng, e thingar uda chaggad ngak e girdi nib gonop​—ni piin be pigpig ku Jehovah. Thingrda suguyed lanin’dad ko tin ra ubung e michan’ rodad. Paul ni apostal e yoloy ni gaar: “Ngam suguyed lanin’med ko fapi n’en nib fel’, ni yira yog e fel’ ngay: ni n’en nriyul’, nge n’en nib yal’uw, ma mmat’aw, ma mmachalbog, ma mmanigil, nge tin ndariy thibngin.” (Filippi 4:8) Bochan ba pufrogodad ni ngad duguliyed, ma aram fan ni rayog ni ngad mel’eged e pi n’en ni gad ra lemnag. Yibe athapeg ni nguuda mel’eged ni gubin ngiyal’ ni ngad fal’eged i lemnag e pi n’en nra ayuwegdad ngada chuchugurgad ngak Jehovah.

Kan ni Thothup Rok Got e Rib Gel Gelngin

15. Uw rogon e pi Kristiano u Korinth kakrom ni yad ba thil ko girdi’ ni ma par ko re mach nem?

¹⁵ Ba thil ko piin ke bannagrad fare lem ko fayleng, ma tin riyul’ e Kristiano e kan ni thothup rok Got e ma pow’iyrad. I yoloy Paul ngak e ulung nu Korinth ni gaar: “Ma gadad e gathi lem nu roy u fayleng e ir e ke yog ngodad; ya fare Kan ni Thothup ni Got e l’og e ir e ke yog ngodad, ni fan e nge yog nda nanged urngin e tin ni ke pi’ Got ngodad.” (1 Korinth 2:12) Korinth kakrom e ir ba mach ni kari liyeg ko fare lem ko fayleng. Girdi’ ni ma par u rom e baga’ ni rib kireb e ngongol rorad ma aram fan ni fare bugithin ni “bod yu Korinth” (to Corinthianize) e be yip’ fan ni “ngan un ko ngongol ni darngal.” Ke ta’ Satan laniyan’ e girdi’ riy u fithik’ e lumor. Arfan ni, ke mus ni ri buchuw e yad manang murung’agen e bin riyul e Got ara ri dariy. (2 Korinth 4:4) Yugu aram rogon, u daken e kan ni thothup, me pithig Jehovah owchen boch e girdi’ nu Korinth, ma aram e ke yog ngorad e tamilangan’ ko tin riyul’. Kan ni thothup rok e ke k’aringrad me ke pow’iyrad ni ngar thiliyeged e yafas rorad ma yad ra fel’ u wan’ me flaabnagrad. (1 Korinth 6:9-11) Yugu aram rogon ni lem ko fayleng e ba gel, ma kab gel e kan ni thothup rok Jehovah ngay.

16. Uw rogon ni nge yog ngodad ma nguuda chaariyed e kan ni thothup rok Got?

¹⁶ Ku aram rogon e ngiyal’ ney. Kan ni thothup rok Jehovah e ir e th’abi gel gelngin u palpalthib, ma ri ma pi’ ngak urngin e girdi’ ni ma ning u fithik’ e michan’. (Luke 11:13) Machane, rogon ni nge yog ngodad e kan ni thothup rok Got, e gathi kemus ni nguuda togopuluwgad ko lem ko fayleng ya thingarda rin’ed e tin kab gel boch ngay. Maku thingarda filed e Thin rok Got ni gubin ngiyal’ ma ngad folgad riy ma aram ​—me puluw e lem rodad—​ko lem rok. Faanra ngada rin’ed ban’en ni aram rogon, ma Jehovah e ra gelnagdad ma rayog ni ngad gelgad ko urngin e kanawo’ nra fanay Satan ni nge kirebnagdad ko tirok Got ban’en.

17. Uw rogon ma tin ni buch rok Lot e rayog ni nge fal’eg lanin’dad?

¹⁷ Yugu aram rogon ni piin Kristiano e gathi yad bang ko fayleng, ma yad be par u fayleng. (John 17:11, 16) Dariy bagadad ni rayog rok ni nge siyeg e lem ko fayleng ni urngin, ya rayog ni gad be maruwel ara gad be par ko gini bay e girdi’ riy ni dariy e t’ufeg rorad ku Got nge kanawo’ rok. Gad be thamiy ni bod Lot, ni “kari kireban’,” maku ke gafgow, ko tin nib kireb ni ma rin’ e girdi’ nu Sodom, ni ir e binaw ni ma par riy? (2 Peter 2:7, 8) Faanra aram rogon, ma ra fel’ lanin’dad. I yororiy Jehovah Lot me ayuweg e yafas rok, ma ku rayog ni nge rin’ ban’en ni aram rogon ngodad. Chitamangidad ni tarunguyey e be guydad ma manang rarogodad, ma rayog rok ni nge pi’ e ayuw nge gelngidad nib t’uf rodad ma aramn rayog ni nguud pared ni gadad ba gel ko tirok Got. (Psalm 33:18, 19) Faanra pagan’dad ngak, ma gad pining, ma ra ayuwegdad ni ngad togopuluwgad ko lem ko fayleng, nyugu demtrug feni mo’maw’ rarogodad.​—Isaiah 41:10.

18. Mang fan ni thingarda chaariyed e tha’ u thildad Jehovah?

¹⁸ U lan fare fayleng nib dar rok Got ma ku ma bannagdad Satan, gadad ni gadad e girdi’ rok Jehovah e kan taw’athnagdad ko tamilangan’ ko tin riyul’. Ma arfan ni kad pirieged e falfalan’ nge gapas ni ban’en ndariy ko fayleng. (Isaiah 57:20, 21; Galatia 5:22) Baga’ fan u wan’dad fare athap rodad ni yafas ni manemus u Paradis, ni fare lem ko fayleng ni ke chuchugur ni nge m’ay e dariy u rom. Ere yibe athapeg ni ngad chaariyed e tha’ u thildad Got ma ngad kol ayuwgad ni nguuda yal’uweged urngin e pow ni gad ra man’ riy nga orel ko tirok Got. Ri ngada chuchugurgad ngak Jehovah, ma ra ayuwegdad ni ngad togopuluwgad ko lem ko fayleng.​—James 4:7, 8.

Rayog ni Ngam Weliy Fan?

• Mang boch e kanawo’ ni ma bannag Satan e girdi’ riy?

• Uw rogon ni ngad pilo’gad ni nge dabda man’gad nga orel rok Jehovah?

• Mang e be dag ni fare lem ko fayleng e ba gel gelngin?

• Uw rogon ni nge yog ngodad e lem ni yib rok Got me par ni dabi chuw?

[Chart on page 9]

GONOP KO FAYLENG NGE GONOP ROK GOT

Tin riyul’ e de mudugil​—girdi’ e ma gnongliy e tin riyul’ rorad.

“Thin rok [Got] e ba riyul’.”​—John 17:17.

Rogon ni nge mudugil e tin nib mat’aw nge tin nib kireb, mu pagan’um ko lem rom.

“Fare gum’ircha’ e ba sasalap ko urngin ban’en ma rib kireb.”​—Jeremiah 17:9.

Mu rin’ e tin ni ga baadag.

“De mil fan ngak e girdi’ ni be yan ni nge pow’iy e yan rok.”​—Jeremiah 10:23.

Chugum e ir e ra pow’iyey ko felfelan’.

“Ya chogowen e salpiy e ir lik’ngin urngin mit e kireb.”​—1 Timothy 6:10.

[Picture on page 8]

I man’ Solomon nga orel rok e liyor nib riyul’ me chel ngak e pi got ni googsur’

[Picture on page 10]

Ni bod e en ni advertiser, ma m’oneg Satan e lem ko fayleng. Ga ra mu togopuluw ngay?