Ngan Poy fare Gamanman ni Malboch nge fare Pow Rok

GA MA falfalan’ ni ga ma pateg fan ban’en ni kan ta’ nib mith? Ra nge yog e re n’em, ma ngam changarnag i yan e pi pow ni ra ayuwegem ngam pirieg fan fa fare n’en. U fithik’ e pi Thin rok Got ni kan thagthagnag, e ke pi’ riy e pi pow nib t’uf nib sorfan ko fare matheeg ni 666, fare ngachal, ara pow, ko fare gamanman ni malboch ni ba’ ko Revelation guruy ni 13.

U lan e re article ney, e gadad ra sap nga aningeg ban’en nib ga’ ni ra pi’ fan​—fapi pow ni ra dag fan—​fare pow ko fare gamanman. Ngad fal’eged i lemnag (1) rogon e ngachal u Bible ni kan mel’eg yu ngiyal’, (2) be mang fare gamanman ni malboch, (3) mang e be yip’ fan fare 666 ni “namba rok e girdi’,” ma (4) n’en ni ma yip’ fan fare namba ni 6 nge mang fan ni kan yoloy ni dalip yay, ni aram e, 600 ngan puthuy nga 60 min puthuy 6, ngay ara 666.​—Revelation 13:18.

Ngachal nu Bible​—e Kub L’ag Boch Ban’en Ngay Gathi Kemus ni Pow

Pi ngachal nu Bible e boor yay ni bay i n’en ma ba’ ban’en ni be yip’ fan, ni rib ga’ ni faanra Got e ke pi’. Ni bod rogon, ni bochan ni ra mang Abram chitamangin e pi nam, me thiliyeg Got fare patriarch nge mang Abraham, ni fan e re n’em e “Chitamangin e Yoor.” (Genesis 17:5) I yog Got ngak Josef nge Maria ni ngan pining Jesus ngak fak Maria ni bay finib, ni fan e re n’em e “Jehovah e ra Thapegey.” (Matthew 1:21; Luke 1:31) Ba m’ag ko re ngachal nem ni ban’en ni be yip’ fan, ya daken e machib nge gafgow ko yam’ ni tay Jesus, me fal’eg Jehovah ni nge bung rogon ni ngad thapgad.​—John 3:16.

Ku aram rogon, ni fare namba​nib ngachal​ni pi’ Got ni 666 e thingar mang pow ko pi n’en ni be gu’ Got ni be dag fan rarogon gamanman. Rogon, min nang fan e pi n’en ni rarogon nem, e ba t’uf ni ngad poyed fare gamanman ko mini’ magad nang murung’agen e pi n’en ma rin’.

Kan Nang fare Gamanman

Fare Bible ko babyor rok Daniel e ba ga’ e tamilang ni pi’ nga rogon fan fare pow ni fapi gamanman. Guruy ni 7 e ba’ riy nib tamilang rarogon “aningeg i gamanman nib ga’”​—ba layon, ba bear, ba leopard, nge ba gamanman nib tatamdag yaan ni ba’ nguwlen ni wasey nib gagang. (Daniel 7:2-7) I yog Daniel ngodad ni pi gamanman ney e be yip’ fan e “pilung,” ara gagiyeg ko pi am, ni be gagiyeg ni ra chuw reb meb reb nge gagiyegnag boor e nam.​—Daniel 7:17, 23.

U rogon fare gamanman ni bay ko Revelation 13:1, 2, e fare babyor ni The Interpreter’s Dictionary of the Bible e be dag ni “bay rok ni ke puthuy urngin i gosgoson fa aningeg i gamanman ngay ni faan nni piliyeg e changar rok Daniel nge gu’ . . . Rogon ni ba’, e biney ni som’mon e gamanman [ko Revelation] e be yip’ fan urngin e pi am ni kar pethgad yad be gagiyeg nib togopuluw ku Got u fayleng.” Biney ni kan gu’ e ke micheg e Revelation 13:7, ni weliy murung’agen fare gamanman ni gaar: “Mini pi’ mat’awun ni nge ga’ lungun u puluwon urngin e ganong nge gubin mit e girdi’ nge gubin e thin nge nam.”

Fare Bible e ku be yog ni “fare dragon [Satan] e ke pi’ ngak fare gamanman gelngin nge tagil’ nge mat’awun nib ga’.” (Revelation 12:9; 13:2) Rogon nib puluw, e gagiyeg ko girdi’ e sum rok fare Moonyan’, arfan ni ma m’ug yaan riy ni yaan e gamanman, ni bod ngongolen e dragon. (John 8:44) Bochan gelngin fare Moonyan’, ma dariy be’ ara reb e ulung ko girdi’ ni ka e yibnag e gapas nge pagan’ nib n’uw nap’an ko girdi’.a​—John 12:31.

“Ba Namba Rok e Girdi’”

Bin dalip e pow u fan fare 666 e ba’ ko fare n’en ni ka nog ni “ba namba rok e girdi’,” ara bod rogon ni ba’ ko fare The Amplified Bible ni, “namba rok e girdi’.” Re n’ey ni ka nog e dabiyog ni be sor fan ngak be’ nib girdi’, ya Satan​—gathi ba girdi’—​e be gagiyegnag fare gamanman. (Luke 4:5, 6; 1 John 5:19; Revelation 13:2, 18) Ya n’en nib rin’, fare gamanman e bay rok “ba namba rok e girdi’,” ara pow, ni be yog ni ba girdi’, gathi ba kan ara moonyan’, ma aram fan ni be bi m’ug riy rarogon e girdi’. Ni aram e mang e pi n’enem? I fulweg e Bible, ni be gaar: “Urngin e [girdi’] ni ke denen ke mul e tamilang rok Got u pa’rad.” (Roma 3:23, NW) Fare gamanman ni ba’ rok “ba namba ko girdi’,” e arfan ni be dag, ni fapi am e be dag yaan rarogon e denen ko girdi’, ni fare pow ko denen nge dani flont.

Chiney ni kad poyed fare gamanman, ma kad nanged rogon u wan’ Got, ma aram e ke yog ni ngad fal’eged i lemnag e gin tomur ko fare n’en ni dannang fan​—fare namba ni nel’ nge mang fan ni kan yoloy ni dalip yay—​ni aram e, 666, ara 600 ngan puthuy 60 ngay min puthuy 6 ngay.

Nel’ ni Kan Sul u Daken Dalip Yay​—Mang Fan

U lan e Bible, e ba mudugil e namba ni bay e pow riy nib ga’ fan. Bod rogon, fare namba ni medlip, e boor yay ni yima fanay ni pow u ban’en ni ke mu’ ara ba flont, u p’eochen Got. Ni bod rogon, ni wik ni sunmiy Got ban’en e medlip e ‘rran,’ ni ba’ riy ara yu ngiyal’, ni mu’nag Got i sunmiy ni polo’ e tin nib m’agan’ ngay ni fan ko fayleng. (Genesis 1:3–2:3) Pi n’en ni “be yog” Got e bod rogon e silver ni kan “biechnag ni medlip yay,” ni arfan ni kari biech. (Psalm 12:6; Proverbs 30:5, 6) Ma fare daraw ni Naaman e nog ngak ni nge maluk ni medlip yay u lan fare Lul’ ni Jordan, me tomuren miri gol.​—2 Kings 5:10, 14.

Nel’ e taareb e de gaman riy ko namba ni medlip. Ere gathi ra puluw nib pow u ban’en nde flont, ara bay bang riy nib kireb, u p’eochen Got? Arrogon, rib riyul’! (1 Chronicles 20:6, 7) Maku reb, e nel’ ni kan sul u daken ni dalip yay, ni bod 666, e ri be elmerinnag i yog e re kireb nem. Ma re n’em ni ireray e bin nib puluw ko lem ni bochan fare mich ni 666 e “ba namba rok e girdi’,” ni faan kad mu’gad i weliy. Chepin fare gamanman, namba rok nib, “namba rok e girdi’,” nge fare namba ni 666 e urngin ni tomuriy ma be sor nga taa ban’en ni​—dabni oloboch riy ni aram e ngongol nde fel’ nge tin nde fel’ u p’eochen Jehovah.

Fare Pow e Kan Nang Fan

De n’uw nap’an nga tomuren ni ke m’ug fare namba ni 666, me yog e Revelation fa 144,000 i gachalpen fare fak e Saf, ni Jesus Kristus, ni ba’ fithingan nge fithingan e Chitamangin, ni Jehovah, ni kan yoloy nga peri’rad. Gali ngachal ney e pow ni piin ba’ rorad e ba mil farad ngak Jehovah nge Fak, ni murung’agen e yad ba uf ni yad be weliy i yan. Ere ku aram rogon, ni piin ni ba’ fare namba ko fare gamanman rorad e yad be dag ni ba milfarad ngak fare gamanman. Arfan, ni fare pow, ni demtrug ko ba’ u ba’ ni mat’aw i paey fa periiy, ma yibe fanathinnag i weliy, ni ba pow ni ngan poy e ani ba’ rok ni ir be’ ni ma liyor ma ma pi’ e ayuw ko fare am ni bod e gamanman ni aram e pi am ko fayleng. Piin baaram ni ba’ e re pow nem rorad e yad be pi’ ku “Caesar” e ne’n ni mat’aw e susun e ngan pi’ ngak Got. (Luke 20:25; Revelation 13:4, 8; 14:1) Uw rogon ni ra rin’ed? Ura liyorgad ngaur ted fan rogon e am, nge pow rok, nge gelngin, ni aram e ne’n ni yad be gay ni ngebnag e athap me ayuweg e yafas rorad. Ma ra ba’ e liyor ni yad be ta’ ko fare Got nib riyul’ ma kemus ni dap’i l’ugun’rad.

N’en nib thil riy e, fare Bible e be ta’ ir ngodad ni be gaar: “Dab mu ta’ e pagan’ rom nga daken e piin ni llowan’, ara fak e girdi’ nu fayleng, ni de mil fan e ayuw ko yafas ngak. Bayi chuw marchalen, me sul ko but’; ma rorran nem me tal e lem rok.” (Psalm 146:3, 4, NW) Piin yad ra tiyan’rad ko re fonow nib gonop nem e dabi balyangan’rad u nap’an ni pi am e de yog ni ra lebuguyed e tin kar micheged ara ngiyal’ ni ra m’ayfan e pi tayugang’ nib gel gelngirad.​—Proverbs 1:33.

Re n’ey gathi be yip’ fan ni tin riyul’ e Kristiano e nga yugu ra pared ni dab ra rin’ed ban’en nga rogon e magawon ko girdi’. Rib thil, yad ba pasig ni yad be wereg murung’agen fare am ni ir e ra chuweg e magawon ko girdi’ ni​—Am ku Got, ni ir e yad be weliy ma yad be maruwel ni fan ngay.​—Matthew 24:14.

Gil’ilungun Got​—Kemus Athap ko Girdi’

Nap’an ni immoy Jesus u fayleng, me ta’ Gil’ilungun Got ni ir kenggin e machib rok. (Luke 4:43) Fare meybil rok ni ngan folwok riy, ni yu ngiyal’ ma yima yog ni fare Meybil rok Somol, I fil Jesus ngak pi gachalpen ni ngaur yibiliyed e re Gil’ilungun nem ni nge yib min rin’ e tin nib m’agan’ Got ngay u roy u but’. (Matthew 6:9, 10) Fare Gil’ilungun e ba am ni ra gagiyeg u ga’ngin e fayleng, gathi nge yib u reb e tafen e pilung u fayleng, ya nge yib u tharmiy. Arfan, ni yog Jesus ni “fare gil’ilungun e tharmiy.”​—Matthew 11:12.

Gil’ilungun Got e ra yibnag e gapas ngak urngin e piin ni be fol riy. (Psalm 37:11, 29; 46:8, 9) Jesus, ni ir e Pilung ko re Gil’ilungun nem, e bayi chuweg Satan, ni ban’en ni dariy ba girdi’ ni rayog ni nge rin’. Ki mada’ko kireban’, amith, nge yam’ e ku ra m’ay. Uw feni rib fel’ e binem e athap ni fan ngak e piin ni ra pared ni dariy fare pow ko fare gamanman rorad!​—Revelation 21:3, 4.

[Footnote]

[Box on page 5]

Pi Pow ni Fan ko 666

1. Ngachal nu Bible e boor yay ni ma dag ban’en u rarogon ara rogon e yafas, facha’ ni bod rogon Abraham, nge Jesus, nge ku boch e girdi’. Ku aram rogon, fare namba’ ko fare gamanman nib pow u rarogon ngongolen.

2. U lan e Bible ko babyor ku Daniel, e fapi gamanman nib thilthil e ke yib nga luwan fapi gagiyeg ko girdi’, ara boch e nam ni ra chuw reb meb reb nga luwan. Fare gamanman ni bay ko Revelation 13:1, 2 e be dag yaan e am u ga’ngin e fayleng ni ke pi’ Satan gelngin, ma be gagiyegnag.

3. Fare gamanman ni ba’ e “namba ko girdi’ rok,” e be yip’ fan ni ban’en ko girdi’, gathi ba moonyan’. Arfan, ni be dag ni yaan e girdi’ ni ma yim’ ni bochan e denen nge dan flont.

4. Rogon e sap rok Got, e fare namba ni nel’, e de gaman ko n’en ni ma yog e Bible nib gaman, ara ba flont, medlip, e be yip’ fan e flont. Fare pow ni 666 e be tamilangnag ni de gaman ni bochan ni ke sul u daken ni dalip yay.

[Pictures on page 6]

Gagiyeg ko girdi’ e ke mich ni dabi fel’, ba fel’ ni pow riy e fare namba ni 666

[Credit Line]

Starving child: UNITED NATIONS/Photo by F. GRIFFING