666 Gathi Kemus ni Ban’en Ndabni Nang Fan

“Ni dariy be’ nrayog ni nge chuw’iy ban’en fa pi’ ban’en nchuway’ ni faanra dariy e re pow ney rok, ni aram fithingan fare gamanman ara re matheeg ni ke yan nga luwan fithingan. Re n’ey e ngan gonopiy: Ya en ni ba llowan’ e rayog ni nge pirieg fan fare namba rok fare gamanman, ya re namba nem e namba rok e girdi’; namba rok e nel’ miriay nge nel’ i ragag nge nel’.”​—Revelation 13:17, 18, New World Translation.

PI kenggin e thin nu Bible e ke pug lanin’uy ni ngan nang min lemnag fare yiiy u murung’agen fare pow ni dan nang murung’agen, ara fithingan, “fare gamanman ni maloboch”​—nge fare namba ni 666. Fare pow ko fare gamanman e ir e n’en ni ke ga’ dariy nap’an ni yibe fal’eg i lemnag ni be m’ug ko television nge Internet, maku e ri tay ko kachido, babyor, nge magazines.

Boch e girdi’ e be mich u wan’ ni 666 e pow ni be yog e Bible ko piin ni ma togopuluw ngak Kristus. Ma boch e be yog ni be yip’ fan boch ban’en nib t’uf ni ngan nang ko mang ni bod ban’en ni kan an nga dowey, ara microchip ni kan k’eyag nib toar ni ba’ e namba riy ni be yog ko mini’ e ani tapigpig ko fare gamanman. Maku boch e be mich u wan’rad ni re 666 nem e pow ko fare liw ko Katolik ni papa. Yira thiliyeg e math’eg nu Roma ko yol ni ngan ngongliy rogon u fithingan e liw rok papa ko ofis rok, ni Vicarius Filii Dei (ani be ngongol ni luwan faanem ni Fak Got), mini mithmitheg fapi namba bochu-uw, meb i m’ug e 666. Maku boch e girdi’e be yog ni ku pi namba nem e rayog ni ngan sumarnag ko fare ngachal ni Latin ni fithingan e Pilung nu Roma Diocletian nge rogon ni yog ni Hebrew fare ngachal ni Nero Caesar.a

Machane, pi n’eney ni kemus ni yibe susunnag yaan min sunmiy kan piliyeg ka nog ma, ri ba thil ko n’en ni be yog e Bible u murung’agen fare pow ko fare gamanman, ni bod rogon ni bayda guyed ko bin migid e article. Fare Bible e be dag ni piin ni bay fare pow rorad e yad ra pirieg e damumuw rok Got u nap’an ni ra museg e bin chiney e m’ag. (Revelation 14:9-11; 19:20) Bochan e re n’em, ma ra ngan nang fan e 666, ma ka boor ban’en nib l’eg ngay ko bin ni ngan nang rogon ni pirieg fan ban’en ni da nang fan. Bay falfalan’ riy, ya Jehovah Got, ni ir e th’abi ga’ ni be dag rogon e t’ufeg nge gin be yib e Tamilang ko tirok riy, e de tay e pi tapigpig rok u fithik’ e lumor ko re n’ey ni rib ga’ fan.​—2 Timothy 3:16; 1 John 1:5; 4:8.

[Footnote]