Mu Pasigan’um Ngay Ni Ngam Wereg Fare Thin Nib Fel’

“Mpigpiggad ngak Somol ni gimed ba pasig ngay u lanin’med.”—ROMA 12:11.

1, 2. Uw rogon laniyan’ e pi Kristiano ni yad ma machibnag fare thin nib fel’?

KE PASIGAN’ reb e pagal ni bochan e ke pirieg reb e maruwel nib biech. Be sonnag e thin ko ga’ rok ko bin somm’on e rran nra un ko maruwel. Ke l’agan’ ngay ko bin somm’on e maruwel nra rin’ ma baga’ fan u wan’. Ba adag ni nge rin’ e maruwel rok ni mus rogon.

² Ku arrogodad e Kristiano ni gowa gad be un ko reb e maruwel nib biech. Bochan ni gad be athapeg ni gad ra par ni manemus, ma rayog ni nga nog ni ka fin da tababgad ko maruwel rok Jehovah. Dabi siy ni ka bay boor e maruwel nra pi’ e Ani Tasunmiy ngodad ni ngada maruweliyed ni manemus. Machane fa bin somm’on e maruwel ni ke pi’ ngodad e ngada wereged fare thin nib fel’ u morngaagen Gil’ilungun. (1 Thessalonika 2:4) Uw rogon u wan’dad e re maruwel ney ni ke pi’ Got ngodad? Gadad bod fare pagal ni kada weliyed morngaagen faram, ni gad ba adag ni ngada rin’ed ni mmus rogodad, ma ke pasigan’dad ngay, ma ba falfalan’dad ngay​−arrogon, ma kari l’agan’dad ngay!

3. Mang e thingar nrin’ ni fan e nge m’ag e maruwel rodad ni gad e pi tamachib ko fare thin nib fel’?

³ Riyul’ nib mo’maw’ ni ngari puluw e maruwel rok Got u lanin’dad. Ya ka bay boor e maruwel rodad ni kub muun ko fare maruwel ko machib, ma gad ma fanay yu yang e gelngidad nge lanin’dad ni fan ko pi maruwel nem. Rayog rodad ni ngada maruweliyed e pi maruwel nem maku gad be machib nrogon. Machane mmo’maw’. (Mark 8:34) I tamilangnag Jesus ni ra m’ag e maruwel rodad ni faan gad ra athamgilgad ngay.​—Luke 13:24.

4. Uw rogon ni bay rogon e pi n’en ni ke magafan’dad ngay ko tirok Got ban’en u lanin’dad?

⁴ Ri boor ban’en ni thingar da rin’ed, ma rib mom ni nge magafan’dad ngay ara nge tomal lanin’dad. “Pi n’en ni ma magafan’uy ngay ko biney e tamilang” e rayog ni nge yoornag lanin’dad nge war e pasigan’ rodad ni fan ko maruwel rok Got. (Luke 21:34, 35; Mark 4:18, 19) Bochan e gadad e tadenen ma rayog ni nge “dabki t’uf Got rodad ni bod fene t’uf rodad ko somm’on.” (Revelation 2:1-4) Rayog ni nge aw ni gad be pigpig ku Jehovah ni dariy lanin’dad riy. Uw rogon ni ma pi’ e Bible e athamgil nga lanin’dad ni ngki pasigan’dad ni fan ko machib?

Bod “Ba Nifiy” U Gumercha’dad

5, 6. Uw rogon fare taw’ath ni ngan machibnag fare thin nib fel’ u wan’ apostal Paul?

⁵ Rib t’uf fare machib ni ke pi’ Jehovah ngodad ma thingar dab da ted ni gathi ri baga’ fan. I tay apostal Paul ni ri ba taw’ath ni bochan e rayog ni nge machibnag fare thin nib fel’, ma i finey ni de bung rogon ni nge machib. I gaar: “I gag e th’abi sobut’ u fithik’ urngin e girdi’ rok Got, machane ke pi’ Got ngog e re gaf I maruwel ney ndariy rogog ni ngan pi’ ngog, ni nggu fek fare Thin Nib Fel’ ni yib rok Got i yan ngak e piin ni gathi yad piyu Israel, ni murung’agen e flaab rok Kristus ndariy ko fol, mu gu tamilangnag urngin e girdi’ u rogon ni be muruwliy Got e tin ni ke m’ay i lemnag rok ni i tay nib mith. I Got ni ir e sunumiy urngin ban’en e tay nib mith e n’en ni ke m’ay i lemnag rok ni kab kakrom i yib.”​—Efesus 3:8, 9.

⁶ Rogon nib puluw e machib u laniyan’ Paul e ma pi’ e kanawo’ nib fel’ ngodad. U lan e babyor rok ngak yu Roma e i gaar: “Aram fan ni gub adag ni ngku gu machibnag e Thin Nib Fel’ ni yib rok Got ngomed.” De tamra’ ko fare thin nib fel’. (Roma 1:15, 16) Rib puluw laniyan’ mab pasigan’ ngay ni nge machib.

7. Mang e I weliy Paul morngaagen ngak yu Roma?

⁷ Manang apostal Paul ni thingar ni ngki pasigan’ ya i yog ngak e pi Kristiano nu Roma ni gaar: “Mmaruwelgad nib gel, ma dab um malmalgad. Mpigpiggad ngak Somol ni gimed ba pasig ngay u lanin’med.” (Roma 12:11) Fare bugithin nu Greek ni kan pilyeg ni “malmal” e be yip’ fan e “sagaal ara de tayan’ ko maruwel.” Yugu aram rogon ni gathi gad ba malmal ko machib rodad, thingar da tedan’dad ko fapi pow ni ra m’ug ni be dag ni gad be sagaal ko maruwel rok Got ma ngada yal’uweged lanin’dad ni faan manga be m’ug e pi pow nem rodad.​—Proverbs 22:3.

8. (a) Mang e ke bod rogon e “nifiy” u gumerchaen Jeremiah, ma mang fan? (b) Mang e gad ra fil ko n’en ni buch rok Jeremiah?

⁸ Gelngin Got e ra ayuwegdad ni faanra mulan’dad. Bay biyay ni i mulan’ Jeremiah ni profet, me lemnag ni nge tal ko maruwel rok ni profet. Me yog ngak Jehovah ni gaar: “Dab kug lemnag Somol ma dab kug weliy e thin rok ngak e girdi’.” Aram e pow ni ke war e michan’ rok Jeremiah, fa? Danga’. Ya ba gel e michan’ rok Jeremiah ma rib t’uf Jehovah rok, miki machib ni bochan e rib pasigan’ ngay. I gaar: “Mi i gak’ e thin rom ni bod ba nifiy u fithik’ i lanin’ug ngu fithik’ e yil rog ni dabiyog ni nge chuw. Me ngochngochan’ug ni kug tay rog ndagur yog, mu gu par ndabkiyog ni nge dab gog.” (Jeremiah 20:9) Yu ngiyal’ ma ra mulan’ e pi tapigpig rok Got ni yad ba yul’yul’. Machane faan yad ra meybil ngak Jehovah ni nge ayuwegrad ma ra nang e n’en ni bay u fithik’ gumercha’rad ma ra pi’ e kan ni thothup ngorad ni faanra yad bod Jeremiah ni bay e thin rok Got u gumercha’rad.​—Luke 11:9-13; Acts 15:8.

“Dab Mu Thang Nifiyen E Kan Ni Thothup”

9. Mang e rayog ni nge magawonnag e maruwel rok e kan ni thothup ni fan ngodad?

⁹ I yog apostal Paul ngak piyu Thessalonika ni gaar: “Dab mu thanged nifeyen e kan ni thothup.” (1 Thessalonika 5:19) Arrogon, ngongol nge lem ni ba togopuluw ko machib ni yib rok Got e rayog ni nge magawonnag e maruwel rok e kan ni thothup ni fan ngodad. (Efesus 4:30) Kan pi’ e maruwel ngak e pi Kristiano e ngiyal’ ney ni ngar machibnaged fare thin nib fel’. Gad ma tay fan e re taw’ath ney ni kan pi’ ngodad. Gathi gad be gin ngay ni piin ni dar nanged Got e ma dariy fannag e machib ni gad be tay. Machane nap’an ni dabi tayan’ be’ ni Kristiano ko machib ni kan pi’ ngak, ma ra math fare nifiy ko kan ni thothup ni be maruwel u daken faanem.

10. (a) Rayog ni nge uw rogon lanin’dad ni bochan rogon ni gad ma lemnag yugu boch e girdi’? b) Mang e be yog 2 Korinth 2:17 u morngaagen fene fel’ e machib rodad?

¹⁰ Boch e girdi’ u wuru’ e ulung ni Kristiano e ma lemnag ni machib ni gad be tay e ke mus ni gad be wereg e babyor. Ba oloboch yugu boch e girdi’ ni yad be lemnag ni gad ma yan u mit e tabinaw ni fan ko mokun salpiy. Faan gad ra pag e pi lem ney ni ba oloboch ni nge magawonnag lanin’dad, ma aram e ra war angin e machib rodad. Dab da paged e pi lem nem ni nge magawonnagdad, ya nge taareb lanin’dad Jehovah nge Jesus u rogon ni yow ma lemnag e machib ni gad ma tay. Aram rogon e lem ni tay apostal Paul ni gaar: “Gathi gadad bod pire’ e girdi’ ni yad ma wereg e thin rok Got ni gowa ba chugum nib sobut’ puluwon, machane gadad e Got e ke l’ogdad, aram fan ni gadad be weliy e thin nib riyul’ u p’eowchen nrogon e pi tapigpig rok Kristus.”​—2 Korinth 2:17.

11. Mang e ke ayuweg e tin somm’on e Kristiano ni ngar pasiggad ni yugu aram rogon ni kan togopuluw ngorad, ma uw rogon e ngongol rorad u lanin’dad?

¹¹ Boch nga tomren ni yim’ Jesus, un togopuluw ngak pi gachalpen u Jerusalem. Un nog ngorad u fithik’ e yargel ni ngar talgad ko machib. Machane i yog e Bible ni “I suruyrad fare kan ni thothup mi yad tabab i weliy e thin rok Got ngak e girdi’ ndaki yib e marus ngorad.” (Acts 4:17, 21, 31) In e duw nga tomren me yol Paul ngak Timothy me m’ug riy fene puluw laniyan’ e pi Kristiano. I gaar Paul: “Ya lanin’uy ni ke pi’ Got ngodad e gathi bin ni ma rus, machane ke pi’ lanin’uy ni bay gelngin nge t’ufeg riy. Ere dab mu tamra’ ni nguum weliy murung’agen e Somol rodad, fa reb e mu tamra’ ngog, ni kug kalbus ni bochan. Machane mu un ko gafgow ni fan ko fare thin nib fel’ ni yib rok Got nrogon gelngim ni bay I pi’ got ngom.”​—2 Timothy 1:7, 8.

Mang E Malfith Rodad Ngak E Girdi’?

12. Mang fan ni gad ma machibnag fare thin nib fel’?

¹² Faanra nge puluw e machib u lanin’dad maku thingari puluw fan ni gad ma machib. Mang fan ni gad ma machib? Kenggin i fan ni gad ma machib e be m’ug ko thin rok e ani yoloy e Psalm ni gaar: “Somol, urngin e tin ni kam sunumeg e bay ur pininged e sorok ngom, ma tirom e girdi’ e bay ur pininged e magar ngom! Bay ur weliyed murung’agen e flaab ko gagiyeg rom, mi yad weliy murung’agen gelngim ni ba’ nib gel, ya nge nang urngin e girdi’ feni sorom ko tin ni kam rin’ nge gagiyeg ni ga be tay.” (Psalm 145:10-12) Arrogon, gad ma machib ni bochan e gad ba adag ni ngada pininged e sorok ngak Jehovah u fithik’ e yoor ma ngada ted ni ba thothup fithngan u p’eowchen urngin e girdi’ nu fayleng. Yugu aram rogon ni buchuw e girdi’ e ra motoyil ko machib ma gad ra yul’yul’ ko machib nra thapeg e girdi’ maku ra n’uf Jehovah.

13. Mang e k’aringdad ni ngada weliyed machib ngak yugu boch e girdi’?

¹³ Ma ku gad ma machib ni bochan e ba t’uf e girdi’ rodad ma dubdad ni nge aw rachaen e girdi’ u pa’dad. (Ezekiel 33:8; Mark 6:34) Arrogon e thin rok Paul ni be non ngak e girdi’ ni gathi yad girdien e ulung ni Kristiano ni gaar: “I gag e thingar gu ayuweg e girdi’ ko pi nam, ni piin ni kar mon’oggad nge piin ndawor, nge piin ni yad ba sukul nge piin ndar sukulgad.” (Roma 1:14) I finey Paul ni bay e malfith rok u puluwon e girdi’ ere thingari machibnag fare thin nib fel’ ngorad ya nge thang e malfith rok, ya m’agan’ Got ngay ni “urngin e girdi’ ni ngar thapgad ngak.” (1 Timothy 2:4) Ku arrogodad e ngiyal’ ney ni ba t’uf e girdi’ rodad ma thingar da ayuweged yad. Rib t’uf e girdi’ rok Jehovah ere i l’og Fak nga fayleng ya nge yim’ ni fan ngorad. (John 3:16) Kari tolang puluwon fare maligach ni pi’ ni fan ngorad. Gad ma folwok rok Jehovah u rogon ni i t’ufeg e girdi’ u nap’an ni gad ma fanay e tayim rodad nge gelngidad ni gad be wereg fare thin nib fel’ ni rayog e yafas ni bochan e maligach rok Jesus.

14. Mang e thin nu Bible u morngaagen e girdi’ nu fayleng u wuru’ e ulung ni Kristiano?

¹⁴ Ma finey e Pi Mich Rok Jehovah ni yugu boch e girdi’ e rayog ni ngar manged e pi walagrad ni Kristiano. Thingar da machibgad ni dariy e madugdag riy, machane gathi be yip’ fan ni gad ra tugthin. Riyul’ ni ma fanay e Bible boch e thin nib gel u nap’an ni be weliy morngaagen e fayleng. Fare bugithin ni “fayleng” e be yip’ fan ban’en ni ba kireb u nap’an ni weliy Paul u morngaagen e “llowan’ nu fayleng” nge “chogowen urngin ban’en u fayleng.” (1 Korinth 3:19; Titus 2:12) I yog Paul ngak pi Kristiano nu Efesus ni gowa yad “ba yam’” u nap’an ni ur ngongolgad “u kaawoen e kireb nu fayleng.” (Ephesus 2:1-3) Pi thin ney e ba puluw ko thin rok apostal John ni gaar: “Tin ni ka bay e girdi’ nu fayleng e ke suweyrad Faanem nib Kireb.”​—1 John 5:19.

15. Mang e dab da rin’ed ngak e piin nu wuru’ e ulung ni Kristiano, mang fan ni dab da rin’ed?

¹⁵ Machane dab mu pag talin ni pi thin nem e be yip’ fan e girdi’ fayleng ni yad gubin ni dariy rogorad Got, ma gathi be yip’ fan be’ nge be’. Dariy mat’awen e pi Kristiano ni ngar pufthinnaged e girdi’ ko yad ra fol ko machib fa danga’. Dariy rogorad ni ngar rogned ni be’ e ir ba kaming. Dariy rogodad ni nga dogned ko mang e ra buch rok be’ u nap’an ni ra yib Jesus ni nge kieg e “saf” nge “kaming.” (Matthew 25:31-46) Kan duguliy Jesus ni nge pufthin, ma gathi gadad. Ma boor yay ni ke m’ug ni piin ni rib gel e kireb e ngongol rorad e kar folgad ko machib nu Bible mar thilgad ma kar manged e Kristiano nib fel’ e ngongol rorad. Ere yugu aram rogon ni dab da chaggad ngak boch e girdi’, gad ra weliy morngaagen Gil’ilungun Got ngorad. I weliy e Bible morngaagen boch e girdi’ ni dawori mich u wan’rad ni “ke mel’egrad Got ni nge yog e yafos ndariy n’umngin nap’an ngorad.” Munmun ma ke mich u wan’rad. (Acts 13:48) Dada nanged ko mini’ e ra fol ko machib ere thingar da machibnaged yad​−ma sana boor yay ni gad ra machibnagrad. Ere gad ra tay fan e piin ni dawori mich u wan’rad ma nge munguy e thin rodad ngorad ya gad be athapeg ni boch i yad e ra fol ko fare machib nra yognag e yafas ngorad.​—2 Timothy 2:25; 1 Peter 3:15.

16. Mang reb i fan ni gad ba adag ni ngada salapgad ko machib?

¹⁶ Faan gad ra salap ko machib maku gad ra adag ni ngada wereged fare thin nib fel’. Susun: Be’ ni de nang rogon ba gosgos e dariy u wan’ ni nge un ko fare gosgos. Machane ani ba salap ko fare gosgos e ma falan’ ngay. Maku arrogon e pi Kristiano ni yad ba salap ko machib, kab gel boch e falfalan’ rorad ni ngar uned ko machib. (2 Timothy 4:2; Titus 1:9) I yog Paul ngak Timothy ni gaar: “Mu athamgil u rogon nrayog rom nge par e maruwel rom nrib fel’ u mit Got, ni bod rogon be’ ni girdien e maruwel nder tamra’ ko maruwel rok, ni ir be’ ni ma machibnag e thin rok Got nrogon.” (2 Timothy 2:15) Uw rogon nrayog ni ngada salapgad boch ko machib?

17. Uw rogon nrayog ni “nge yib lamen” e thin nu Bible ngodad, ma uw rogon ni ra fel’ boch fare machib rodad ni bochan e ke tamilang e Bible u lanin’dad?

¹⁷ Reb e kanawo’ ni ngada salapgad e nge yog e tamilangan’ ngodad. I yog apostal Peter ngodad ni gaar: “Mpired ni gimed bod e bitir ni ka fin nni gargeleg, ni gubin ngiyal’ ma be yib lamen e milik ngomed, ni milik ni machalbog ni fan nga lanin’med ya ra um unumed mi gimed ilal ngam thapgad ngak Got.” (1 Peter 2:2) Ba bitir ni ka fini gargeleg e yugu ma yib lamen e milik ngak. Machane thingari fil be’ ni Kristiano rogon ni nge “yib lamen” e tamilangan’ nu Bible ngak. Rayog ni nge rin’ ni faanra ke mecham ngak ni nge fol babyor ma nge bieg babyor. (Proverbs 2:1-6) Thingar da athamgilgad ngay ma ngada gafaliyed gadad ya ngada salapgad ko machibnag e Thin rok Got, machane ra ga’ e taw’ath nra yib riy. Falfalan’ nra yib ngodad ni bochan e gad ma fil e Thin rok Got e ra yognag e pasig nga lanin’dad ma ra l’agan’dad ngay ni ngada weliyed ngak yugu boch e girdi’ e tin ni kada filed.

18. Uw rogon ni ra ayuwegdad e pi muulung ni ngada salapgad ko machib?

¹⁸ Pi muulung rok e pi Kristiano e ku ma ayuwegdad ni ngada salapgad u rogon ni gad ma maruweliy e Thin Rok Got. Nap’an ni yira bieg e Bible u lan e muulung mab fel’ ni ngada pithiged e Bible rodad. Ngada tedan’dad u nap’an e muulung ni baga’ ni pi welthin u morngaagen rogon ni gad ma machib. Baga’ fan fapi demonstration ni be dag rogon e machib, ma dab da paged gadad ni nge sor lanin’dad nga bang. Thingar da t’ared lanin’dad ma ngada tedan’dad. (1 Timothy 4:16) Pi muulung e ma gelnag e michan’ rodad maku ma ayuwegdad ni nge yib lamen e thin rok Got ngodad maku ma fil ngodad rogon ni ngada wereged fare thin nib fel’ ni ke pasigan’dad ngay.

Rayog Ni Nge Pagan’dad Ngay Ni Ra Ayuwegdad Jehovah

19. Mang fan ni baga’ fan ni ngada machibgad ni gubin ngiyal’ nrayog?

¹⁹ Pi Kristiano ni ke “pasigan’rad ni bochan e kan ni thothup” ma kari l’agan’rad ngay ni ngar wereged fare thin nib fel’ e yad ra guy rogon ni ngar uned ko machib u mit e tabinaw. (Ephesus 5:15, 16) Riyul’ ni ba thilthil rarogon e girdi’ ma dabi taareb rogon urngin e awa ni yira fanay ko re maruwel ney. (Galatia 6:4, 5) Machane, n’en ni ka baga’ fan ko urngin e awa ni gad ma tay ni fan ko machib e aram urngin yay ni gad ma weliy morngaagen e pi n’en ni ke michan’dad ngay. (2 Timothy 4:1, 2) Ya ra yoor yay ni gad ra machib maku ra ga’ fan e re maruwel ney u lanin’dad. (Roma 10:14, 15) Maku ra gel boch e runguy rodad ngak e piin ni gad ra mada’ ni yad be gel’gel’ ni bochan e kireb u fayleng ma dariy e athap rorad.​—Ezekiel 9:4; Roma 8:22.

20, 21. (a) Mang maruwel ni ka bay nga m’on rodad? (b) Uw rogon ni ma ayuwegdad Jehovah?

²⁰ Ke taw’athnagdad Jehovah ni ke mil fan fare thin nib fel’ ngodad. Ereray e bin somm’on e maruwel ni ke pi’ Got ngodad ni gad e pi “tamaruwel rok.” (1 Korinth 3:6-9) Kari l’agan’dad ngay ni ngada rin’ed re maruwel ney ni ke pi’ Got ngodad ni ke mus rogodad riy. (Mark 12:30; Roma 12:1) Ka bay boor e girdi’ u fayleng ni yad ba adag e machib. Ka boor e maruwel ni bay, machane rayog ni nge pagan’dad ngay ni ra ayuwegdad Jehovah nge ngada m’aynaged fare maruwel rodad.​—2 Timothy 4:5.

²¹ Ma pi’ Jehovah e kan ni thothup ngodad ma ke pi’ “fare sayden rok e kan ni thothup” ni aram e Thin Rok Got ngodad. Bochan e ayuw rok Got e rayog ni ngada welthingad ni dariy e marus riy ni “ke puf e thin rodad ni gad be weliy fare thin nib fel’ ni yib rok Got.” (Ephesus 6:17-20) Nga nog u morngaagdad e n’en ni yog apostal Paul ngak e pi Kristiano nu Thessalonika ni gaar: “Ya gu feked i yib ngomed e Thin Nib Fel’ ni yib rok Got, ni gathi ke mus ni ug weliyed, ya ku er rogon gelngin Got nge fare kan ni thothup ni chagil ngay, ma ku er rogon nib mich u wun’mad nib riyul’.” (1 Thessalonians 1:5) Arrogon, ngada wereged fare thin nib fel’ ni kari l’agan’dad ngay!

Ngada Sul U Daken

• Mang e rayog ni nge buch ko pasigan’dad ko machib ni bochan e pi n’en ni ke magafan’dad ngay.

• Uw rogon ni machib u lanin’dad e bod rogon e “nifiy ni be gak” u gumercha’dad?

• Mang boch e lem rok e girdi’ ni dab da fanayed?

• Uw rogon e girdi’ nu fayleng ni de mich u wan’rad u lanin’dad?

• Uw rogon ni ma ayuwegdad Jehovah ni ngki pasigan’dad ko machib?

[Pictures on page 19]

Pi Kristiano e ma folwok rok Paul nge Jeremiah u rogon ni yow ba pasig

[Pictures on page 20]

Kari l’agan’dad ko machib ni bochan e ba t’uf Got nge girdi’ rodad