“Ngad Pasiggad u Lanin’dad”
1. Susun uw rogon ni ngad machibgad?
1 Susun ngad machibgad ni gad ba pasig. Ya yibe piningdad ni ngad “pasiggad u lanin’dad” ni gad be “pigpig ku Jehovah.” (Rom. 12:11) Machane bay boor ban’en nrayog ni nge magawonnagdad dabkud pasiggad ko machib. Uw rogon nrayog ni ngad “mon’oggad i yan” ngad pasiggad ko machib ni fan ko Gil’ilungun Got?—2 Tim. 1:6, 7.
2. Uw rogon nib m’ag e fol Bible ni goo gadad ko machib nib pasig?
2 Fol Bible ni Goo Gur: Be’ nib salap ni nge wereg e thin u murung’agen Gil’ilungun Got e ir be’ nib t’uf rok e pi motochiyel rok Got nge thin nriyul’. (Ps. 119:97) Nap’an ni gad be fil e Bible ni goo gadad ma rayog ni nge ayuwegdad ngad pasiggad ko machib. (Heb. 13:15) Ba tamilang, ni faanra gad ba pasig ni ngad wereged fare thin nib fel’ ma aram e be m’ug riy ni gad be ta’ fan fare thin nib fel’.
3. Uw rogon nra ayuwegdad gelngin Got ko machib u mit e tabinaw?
3 Ngam Yibilay Gelngin Got nib Thothup: Dabiyog ni nge yib angin e machib ni gad ma tay u gelgnidad. Gad ra pasig ni bochan gelngin Got nib thothup. (1 Pet. 4:11) Faan gad ra chugur ngak e Ani ma pi’ ‘gelngiy’ ma rayog ni nge gelnagdad ngad machibgad ni dab kud rusgad. (Isa. 40:26, 29-31) Nap’an ni yib e togopuluw ngak apostal Paul, me “ayuweg Got.” (Acts 26:21, 22) Gelngin Jehovah nib thothup e rayog ni nge ayuwegdad ngad pasiggad ko machib u mit e tabinaw, ere susun ni ngad yibilayed ni nge pi’ gelngindad.—Luke 11:9-13.
4. Mang angin e pasig, ma mang e thingar da ayuwgad riy?
4 Faan gad ra pasig i machibnag murung’agen Gil’ilungun Got ma rayog ni nge pi’ e athamgil nga laniyan’ boch e Kristiano ngar pasiggad. (2 Kor. 9:2) Faan gad ra machib ni gadad ba pasig ma ba ga’ nra motoyil e girdi’ ngodad. Machane, gubin ngiyal’ ma thingar da rin’ed ere maruwel ney u fithik’ e tayfan nge sumunguy. (Titus 3:2) Gad ma guy rogon ni ngad ted fan e girdi’ ma dab da towasariyed yad, ya yad e ngar mel’eged e n’en ni yad baadag.
5. Mang fonow e susun e ngad folgad riy?
5 Gad e piin ni ma wereg e thin u murung’agen Gil’ilungun Got, ere ngaud “maruwelgad nib gel.” Ngad maruweliyed ni nge gel e pasig rodad u daken e fol Bible nge meybil ni gad ma tay ku Jehovah, ya ir fa en nrayog ni nge pi’ Gelngin nib thothup ngodad. Aram rogon ma rayog ni ngad pasiggad ko machib ni bochan “gelngin Got nib thothup” nge michan’ rodad nib gel.—1 Thess. 1:5.