Ngan Yung Awochngin e Thin Nriyul’ U Morngaagen Gil’ilungun Got

“Mu yung e woldug ko ley ni kadbul e yal’ nge mithigyal’.”​—ECCLESIASTES 11:6.

1. Uw rogon ni be wereg e pi Kristiano e awoch e ngiyal’ ney?

RI BAGA’ FAN e maruwel ko milay’ u wan’ piyu Hebrew kakrom. Aram fan ni boor e fanathin ni i weliy Jesus u morngaagen e milay’, ya i par Jesus u Israel u nap’an ni immoy u fayleng. I taarebnag Jesus fare machib u morngaagen Gil’ilungun Got ko woldug ni yibe yung. (Matthew 13:1-9, 18-23; Luke 8:5-15) Yugu demutrug ko gad ma par ko gini yima woldug riy fa danga’, ri baga’ fan e maruwel rok e pi Kristiano ni yibe yung awochngin e tirok Got ban’en e ngiyal’ ney.

2. Uw fene ga’ fan e machib rodad, ma mang boch ban’en ni yibe rin’ e chiney ni fan ko machib?

² Ri gad ba taw’ath ni rayog ni ngada uned ko fare maruwel ni ngan wereg awochngin e thin nu Bible ko ngiyal’ ney ko tomur. Roma 10:14, 15 e ma weliy fene ga’ fan e re maruwel ney ni gaar: “Machane ra diin mi yad non ngak ni faanra dawori michan’rad ngak? Ma ra diin me michan’rad ni faanra dawor rrung’aged e thin rok? Ma ra diin mi yad rung’ag ni faanra danir machibnag e thin rok? Ma ra diin min machibnag e thin rok ni faanra dab nol’og e piin ni ngar machibnaged e thin rok nga ranod ngar machibgad? Ni bod rogon ni be yog e babyor nib thothup ni be gaar, “Rib manigil e wub ni ke tay e piin ni kar feked i yib e Thin Nib Fel’ ni yib rok Got!” Dariy ba ngiyal’ ni bod e ngiyal’ ney ni ka baga’ fan ni ngan rin’ e re maruwel ney ni ke pi’ Got ngodad ma nge puluw lanin’dad ngay. Aram fan ni ma fl’eg e Pi Mich Rok Jehovah e Bible nge pi babyor ni ma weliy fan e Bible ma bay ko 340 miti thin. Ke pag 18,000 e girdi’ ni ma maruwel u tochuch rorad nge pi ofis rorad u boch e nam, ma pi girdi’ ney e ma maruwel ni dariy puluwrad. Ma gonapan nel’ million e Pi Mich Rok Jehovah ni ma wereg e pi babyor ney u fayleng iyan.

3. Mang angin e maruwel ni yibe tay ni yibe wereg awochngin e machib u morngaagen Gil’ilungun Got?

³ Mang waamngin e re maruwel nib gel ney? Boor e girdi’ ni be un ko machib ni bod rogon nrin’ u nap’an e tin somm’on e Kristiano. (Acts 2:41, 46, 47) Boor e girdi’ ni be un ko taufe ni yad e tamachib ko Gil’ilungun Got, machane ka baga’ fan boch ni yibe yog e sorok nga fithngan Got ni ke mus ni ir e bin riyul’ e Got. (Matthew 6:9) Maku boor e girdi’ ni ke fel’ e par rorad ni bochan e tamilangan’ ko Bible maku rayog e yafas ni manemus ngorad.​—Acts 13:47.

4. Uw fene gel e runguy rok e pi apostal ngak e girdi’ ni kar machibnaged?

⁴ I nang e pi apostal fene ga’ fan fare thin nib fel’ ya rayog e yafas riy ma ur runguyed fapi girdi’ ni ur machibnaged. Ba tamilang ni aram rogon ko thin rok apostal Paul ni gaar: “Bochan e gimed ba t’uf romad ma gamad fal’eg rogomad ni gathi ke mus ni Thin Nib Fel’ ni yib rok Got e nggu bad gu pied ngomed, machane ngkug pied gamad nga pa’med nggu ayuweged gimed. Ya gimed ba t’uf romad.” (1 Thessalonika 2:8) Nap’an ni i t’ufeg Paul nge tin ni ka bay e apostal e girdi’, ur folgad wok rok Jesus nge pi engel nu tharmiy ni yad be un ko fare maruwel ni ngan ayuweg e yafas rok e girdi’. Ngada filed morngaagen e maruwel rok e pi tapigpig rok Got nu tharmiy ni yad be un ko fare maruwel ni ngan yung awochngin Gil’ilungun Got, ma ngada filed rogon ni kar pied e athamgil nga lanin’dad ni ngada rin’ed e maruwel rodad.

Jesus−Ani Ma Yung E Thin Nriyul’ U Morngaagen Gil’ilungun Got

5. Mang bin th’abi ga’ fan e maruwel ni un Jesus ngay u nap’an ni immoy u fayleng?

⁵ Bochan e ir be’ nib flont, immoy gelngin Jesus ni nge pi’ e tin nib fel’ ngak e girdi’ ko ngiyal’ nem. Rayog rok ni nge tamilangnag rogon e tafalay ya boor ban’en ni dar nanged e ngiyal’ nem, ara ku rayog rok ni nge fil e science ngak e girdi’ ko ngiyal’ i n’em. Machane nap’an ni i tabab ko machib, i tamilangnag ni ke yib ni nge machibnag fare thin nib fel’. (Luke 4:17-21) Ma nap’an ni i tal ko machib rok, i yog ni gaar: “Ni gargelnigeg ngara nga fayleng ni bochan e nggu weliy murung’agen e tin riyul’.” (John 18:37) Ere ke mang maruwel rok ni nge yung awochngin e machib u morngaagen Gil’ilungun Got. Ka baga’ fan ni nge machibnag Jesus e girdi’ ko ngiyal’ i n’em u morngaagen Got nge tin nib m’agan’ ngay ko bin ni nge fil yugu boch e llowan’ ngorad.​—Roma 11:33-36.

6, 7. (a) Mang e micheg Jesus u m’on ni yan nga tharmiy, ma mang e be rin’ ya nge lebguy e n’en ni ke micheg? (b) Uw rarogom ni bochan rogon e machib u wan’ Jesus?

⁶ I yog Jesus ni ir be’ ni ma yung awochngin e machib u morngaagen Gil’ilungun Got. (John 4:35-38) Gubin ngiyal’ ni rayog rok ma i wereg awochngin fare thin nib fel’. Nap’an ni be n’en ni nge yim’ u daken fare ley i ren, ma i weliy morngaagen e paradis nra yib nga fayleng. (Luke 23:43) Machane de tal fare machib u nap’an ni yim’. U m’on ni yan nga tharmiy i tay chilen ngak pi gachalpen ni nguur wereged awochngin e machib u morngaagen Gil’ilungun Got ma ngar ayuweged yugu boch e girdi’ ni ngar manged pi gachalpen. Ma aram me micheg Jesus ban’en ni baga’ fan. I gaar: “Gubin ngiyal’ ma gu ba’ romed nge yan i mada’ nga tomren e fayleng.”​—Matthew 28:19, 20.

⁷ Nap’an ni yog Jesus e re thin ney ma aram i micheg ni ra ayuweg, ma ra gafaliy fare maruwel ni ngan machibnag fare thin nib fel’ ni “gubin ngiyal’” nge mada’ ko tomren e re m’ag nib kireb ney. Ke mada’ ko ngiyal’ ney ma ri be l’ag Jesus ko fare maruwel ni ngan wereg fare thin nib fel’. Ir e Pilung rodad ma ke mil fan ngak ni ngan yung awochngin fare thin nib fel’ u morngaagen Gil’ilungun Got. (Matthew 23:10) Ir lolgen e ulung ni Kristiano, ma ke mil fan ngak ni ngan rin’ fare maruwel u ga’ngin yang e fayleng.​—Ephesus 1:22, 23; Kolose 1:18.

Fapi Engel E Ma Wereg Fare Thin Nib Fel’

8, 9. (a) Uw rogon ni ke dag e pi engel ni ri yad ma lemnag e pi n’en ni be rin’ e girdi’? (b) Uw rogon ni kada manged ba tayengeg u p’eowchen e pi engel?

⁸ Nap’an ni sunmiy Jehovah e fayleng, fapi engel e “ur tolulgad u fithik’ e falfalan’ . . . ur tolulgad ni yad be wayway.” (Job 38:4-7) Ka nap’an e ngiyal’ nem ma ri be l’agan’ e pi engel ko tin ni yibe rin’ u fayleng. I l’ograd Jehovah ni ngar weliyed e thin rok ngak e girdi’. (Psalm 103:20) Ma kub riyul’ ni aram rogon e ngiyal’ ney ni yibe wereg fare thin nib fel’. Faani pig e changar rok apostal John u lan fare revelation nni pi’ ngak, i guy “reb e engel ni be changeg nib tolang u fithik’ e nifeng ni ba’ rok e thin ndabi math biid ni Thin Nib Fel’ ni nge weliy ngak e girdi’ nu fayleng, ni urngin e pi nam nge ganong nge thin nge gubin mit e girdi’. Me gaar ni ba ga’ laman: “Nge yib madgun Got ngomed, mi gimed ta’ fan nga feni sorok! Ya ke taw nga nap’an ni nge pufthinnag e girdi’.”​—Revelation 14:6, 7.

⁹ I yog e Bible ni fapi engel e “yad e pi kan ni yad ma pigpig ngak Got ni ma l’ograd ngar ayuweged e piin ni ngar thapgad ngak Got.” (Hebrews 1:14) Nap’an ni ma rin’ e pi engel e maruwel ni kan pi’ ngorad ma yad ma yaliydad nge maruwel rodad. Gowa kada manged ba tayengeg ni gad be rin’ e maruwel rodad u p’eowchen piyu tharmiy. (1 Korinth 4:9) Ri gad ba falfalan’ ni gad manang ni gathi goo gadad ni gad be wereg awochngin e machib u morngaagen Gil’ilungun Got!

Gad Be Rin’ E Maruwel Rodad Ni Ke L’agan’dad Ngay

10. Uw rogon nrayog ni ngan fanay fare thin u Ecclesiastes 11:6 ko machib ni gad be tay?

¹⁰ Mang fan ni ke l’ag Jesus nge pi engel ko maruwel rodad? I weliy Jesus reb i fan ni gaar: “Ere ngog ngomed ni ku erera’ rogon e pi engel rok Got ni yad ra felfelan’, ni bochan taareb e tadenen ni pi’ keru’ ko kireb ni be ngongliy.” (Luke 15:10) Ku aram rogon lanin’dad ngak e yugu girdi’. Aram fan ni gad ma rin’ e tin nrayog rodad ni ngada wereged awochngin e machib u morngaagen Gil’ilungun Got u gubin yang. Fare thin ni bay ko Ecclesiastes 11:6 e rayog ni ngan fanay ko maruwel rodad. I yog e Bible ni gaar: “Mu yung e woldug ni ley ni kadbul e yal’ nge mathig yal’, ma dabi toofan paam ya dabiyog ni ngam nang ko gubin nra tugul nib fel’ rogon fa danga’, fa reb e ra tugul bang e woldug rom nib fel’ rogon ma bang e dabi fel’ rogon.” Riyul’ ni faanra michan’ be’ ko machib rodad ma bay bokum miriay ara bokum biyu’ e girdi’ ni dabi mich u wan’rad. Machane gad bod fapi engel ni gad ra falfalan’ ni faanra motoyil “reb e tadenen” ko machib rodad u morngaagen e yafas.

11. Mang angin e pi babyor ni ma weliy fan e Bible?

¹¹ Bay boor ban’en ni ke l’ag ko fare maruwel ni ngan machibnag fare thin nib fel’. Reb e ayuw ni baga’ fan e aram fapi babyor ni ma weliy fan e Bible ni ke fl’eg e Pi Mich Rok Jehovah. Pi babyor ney e bod rogon e awoch ni yima wereg. Dada nanged ko ra tugul fa danga’. Yu ngiyal’ ma reb e babyor e ra par u tafen be’ mfini yan nga tafen yugu be’ u m’on ni ra bieg be’ fare ke babyor. Ma rayog rok Jesus nge pi engel ni ngar suruyed e girdi’ ya nge fel’ rogon e girdi’ nib fel’ gumercha’rad. Amu lemnag boch e thin ni be dag rogon ni rayogrok Jehovah ni nge suruy e girdi’ ya nge fel’ rogorad ni bochan e pi babyor ni gad ma wereg.

Maruwel Rok E Bin Riyul’ E Got

12. Uw rogon ni kan ayuweg chon reb e tabinaw ni ngar nanged Jehovah ni bochan reb e magazine?

¹² Nap’an fare duw ni 1953 i chuw Robert nge Lila nge pi fakrow u reb e mach ni baga’ u Meriken kar ranod ngar pared u lan reb e naun ni bang u arow u Pennsylvania u Meriken. De n’uw nap’an u tomren ni kar tawgad ko re naun nem i fl’eg Robert reb e kolosis u bang u naun rok. I fathiy boch e plang u bang i rungrung me pirieg tafen e boro’ nni fl’eg ko babyor nge yugu boch e chubung. Ma u fithik’ e pi chubung nem e immoy baken e babyor ni The Golden Age ni reb e magazine rodad. Ma ri ba adag Robert fare thin u morngaagen rogon ni ngan chuguliy e bitir. Ri ba adag rogon ni ba tamilang e fonow ko Bible ni bay ko fare ke magazine, me yog ngak ppin rok ni Lila ni yad ra un ko “fare teliw ko fare ke Golden Age.” In e wik nga tomren me yib e Pi Mich Rok Jehovah nga tafen Robert. Me yog Robert ngorad ni ke mus ni fare “teliw ko fare ke Golden Age” e ba adag ni nge un ngay. I weliy fare Mich Rok Jehovah ni fare Golden Age e aram e Awake e chiney. I un Robert nge Lila ko fol babyor rok e Pi Mich Rok Jehovah ma munmun mar unew ko taufe. Kar yungew awochngin e machib nga lan pi fakrow mar kunuyew e woldug ni ke yoor. Chiney e ke pag 20 e girdi’ ko chon e re tabinaw nem ni kar uned ko taufe ni yad e pi tapigpig rok Jehovah Got nib muun medlip e pi fak Robert nge Lila ngay.

13. Mang e ke ayuweg l’agruw e mabgol ni ngar adaged ni ngar filed e Bible?

¹³ Gonapan 40 e duw faram e dariy u wan’ William nge Ada ni yow l’agruw e mabgol u Puerto Rico ni ngar filew e Bible. Gubin ngiyal’ nra yib e Pi Mich Rok Jehovah nga taferow ma yow be dake dar moyew u tabinaw. Reb e rran me yan William nga taloor ni nge gay bang I ban’en ni nge fanay nge fl’eg ban’en u tabinaw. Nap’an ni be n’en ni nge chuw u taloor me guy ba ken e babyor nib raen green u lan tafen e dow. Aram fare ke babyor ni Religion ni ba ken e babyor ni ke fl’eg e Pi Mich Rok Jehovah ko duw ni 1940. I fek William fare ke babyor nga tabinaw me falfalan’ ni ke bieg riy e n’en nib thil ko bin riyul’ e teliw ko pi yurba’ e teliw. Yay ni migid ni yib e Pi Mich Rok Jehovah nga taferow i motoyil William nge Ada ko machib mar unew ko fol Bible. In e pul nga tomren mar unew ko taufe u nap’an e Divine Will International Assembly ko duw ni 1958. Ka nap’an e ngiyal’ nem ma ke pag 50 e girdi’ ni kar ayuwegew ni ngar manged pi walagdad ni Kristiano.

14. Mang angin e pi babyor rodad ni ma weliy fan e Bible ni bod rogon ni be m’ug ko re thin ney?

¹⁴ Ke 11 e duw rok Karl mab balyang boch. U wan’ Karl ma gubin ngiyal’ e ke mit ko oloboch. Chitamangin Karl e be’ ni tamachib ko barba’ i teliw ni German Methodist, me fil ngak Karl ni girdi’ nib kireb e ra yik’ u infierno u tomren ni kar m’ad. Ere ke tamdag Karl ko infierno. Reb e rran ko duw ni 1917 me pirieg Karl bangi babyor u but’ me feng. Nap’an ni bieg fare babyor me guy Karl fare deer ni “Mang e infierno?” Re babyor nem e be pining e girdi’ ni ngar uned ko reb e muulung rok e Bible Students ara Pi Mich Rok Jehovah ma welthin ko re muulung nem e morngaagen e infierno. I un Karl ko fol Bible ma gonapan reb e duw nga tomren me un ko taufe me mang reb e Bible Student. Nap’an fare duw ni 1925 kan pining ni nge un ko maruwel ko tochuch rok e Pi Mich Rok Jehovah​−ma aram e gini be maruwel riy e chiney. Gonapan meruk i ragag e duw ni i maruweliy e maruwel ko Kristiano ma ke tabab ko bangi babyor nni feng u kanawo’.

15. Mang e rayog ni nge rin’ Jehovah ni faanra m’agan’ ngay ni nge rin’?

¹⁵ Riyul’ ni dabiyog rok e girdi’ ni ngar turguyed ko bay ban’en ni rin’ e pi engel ko pi thin ney ni kada weliyed. Machane dariy e maruwar riy ni ma maruwel Jesus nge pi engel ni fan ko fare machib maku rayog rok Jehovah ni nge suruy e pi n’en nib m’agan’ ngay. Machane pi thin ney e ma dag ni boor e ayuw ko pi babyor rodad ni kada wereged.

Kan Pi’ Ngodad Ba Taw’ath Ni Ngada Ayuweged

16. Mang e rayog ni ngada filed ko fare thin u 2 Korinth 4:7?

¹⁶ I weliy apostal Paul u morngaagen ba “taw’ath ni bay u lan ba rume’ ni but’.” Re taw’ath nem e aram fare maruwel ni pi’ Got ngodad ni ngada machibgad, ma fare rume’ e aram e girdi’ ni ke pi’ Jehovah fare taw’ath ngorad. Pi girdi’ ney e yad tadenen ma bay bang nra mus rogorad riy ere i yog Paul ni ra “m’ug ni re gelngin nem ni ir e ba th’abi gel e yib rok Got, ma gathi gamad e yib romad.” (2 Korinth 4:7) Arrogon, rayog ni ngada pagedan’dad ngak Jehovah nge pi’ gelngin ngodad ni ngada m’aynaged fare maruwel rodad.

17. Mang e gad ra pirieg u nap’an ni gad ra wereg awochngin e machib u morngaagen Gil’ilungun Got, machane mang fan ni nge fel’ lanin’dad?

¹⁷ Yu ngiyal’ ma thingar da paged fadad. Ma sana ra mo’maw ni ngan machib u boch e binaw. Ma bay boch e binaw ni dariy fan e machib u wan’ e girdi’ riy ara yad tatogopuluw. Ra gel e maruwel rodad ko pi binaw nem ma dariy angin. Machane bay fan urngin e athamgil ni gad be tay ya ke l’ag e yafas ngay. Dab mu pag talin ni fapi awoch ni ga be yung e ra yognag e falfalan’ ngak e girdi’ e chiney maku yad ra falfalan’ ko yafas ni manemus ko gabul nge langleth. Boor yay ni ke riyul’ fare thin ni bay ko Psalm 126:6 ni gaar: “Piin nranod ni kar feked awochngin e woldug ma yad be yor e bay ra sulod ni yad be tang u fithik’ e felfelan’, ni kar feked I yib e ggan ni ke yog riy ngorad.”

18. Uw rogon nrayog ni ngada tedan’dad ko machib ni gad be tay, ma mang fan ni ngada tedan’dad?

¹⁸ Gubin ngiyal’ ma ngada wereged awochngin e machib u morngaagen Gil’ilungun Got ma nge yoor e awoch ni ngada wereged. Dab da paged talin ni yugu aram rogon ni gadad e gad ma yung ma gad ma puog e ran ngay, machane Jehovah e ma pi’ gelngin nge tugul. (1 Korinth 3:6, 7) Jesus nge pi engel e yad ma rin’ e maruwel rorad ni yad ma ayuweg e machib, machane ba adag Jehovah ni ngada maruweliyed e bi rodad e maruwel nrogon nrayog rodad. (2 Timothy 4:5) Ngada tedan’dad u rogon e machib ni gad be tay, nge rogon lanin’dad, nge rogon nib pasigan’dad ko machib. Mang fan? I fulweg Paul ni gaar: “Um rin’ e pi n’ey i yan, ya faanra mu rin’ ma ra ayuwegem nge piin ni yad ma motoyil ngom ngar thapgad ngak Got.”​—1 Timothy 4:16.

Mang E Kada Filed?

• Mang boch angin e maruwel rodad ni gad be wereg e awoch?

• Uw rogon ni be un Jesus Kristus nge pi engel ko maruwel ni ngan wereg fare thin nib fel’ e ngiyal’ ney?

• Mang fan ni nge yoor awochngin e machib u morngaagen Gil’ilungun Got ni ngada wereged?

• Mang e ra ayuwegdad ni ngada athamgilgad u nap’an ni gad ra pirieg e girdi’ ni dariy fan e machib u wan’rad ara yad ma togopuluw ko machib?

[Picture on page 25]

Bod rogon ni rin’ e piin ni ma milay’ kakrom u Israel, pi Kristiano e ngiyal’ ney e ma wereg boor awochngin e machib u morngaagen Gil’ilungun Got

[Picture on page 26, 27]

Pi Mich Rok Jehovah e ma fl’eg maku yad ma wereg boor e babyor ni ma weliy fan e Bible u lan 340 miti thin