Mu Par Nib Yul’yul’ Ku Jehovah

YUGU aram rogon ni fare ngongol ni ngan par nib yul’yul’ ngak be’ e ke war ko ngiyal’ ney, machane aram e ngongol ni ra m’ug ko mini’ e tin riyul’ e pi tapigpig rok Jehovah. En ni ba yul’yul’ e ra par nib mudugil ko ngiyal’ ni ke yib e skeng ngak ma dabi war e michan’ rok u tomuren ni ke yan e tayim nib n’uw nap’an. Am mu lemnag Hezekiah ni Pilung. Be weliy e Bible ni gaar, “Dakuriy yugu reb e pilung ni ke sum u tomuren Hezekiah ni bod ir u Judah, mus ko piin ni kar manged e pilung nib m’on rok e ku de bod ir”. Mang fan nib thil Hezekiah? Bochan ni ke “par nib yul’yul’ ngak Jehovah,” nyugu aram rogon ni boor e girdi’ u tooben ni ma liyor ko got rorad ni googsur ni Molech fithingan. Arrogon, “de sor Hezekiah nga bang ni daki lek [Jehovah], ya i par ni be fol ko motochiyel rok.”​—2 Kings 18:1-6, New World Translation.

Paul ni apostal e ir e en ni ku i par nib yul’yul’ ku Jehovah. Fapi thin ni kan yoloy u murung’agen e machib ni ta’ Paul ni bay ko fare Christian Greek Scriptures e be micheg ni de tal ko pigpig ku Got u polo’ i gum’ircha’en. Nap’an ni ke chuchugur ni nge yim’ Paul, me yog boch e thin u murung’agen, ni gaar: “Kug athamgiliy e tin nrayog rog ko sagreng, ma kug mil u n’umngin yang ni ngan mil riy, ya ug par nib mich Kristus u wun’ug.”​—2 Timothy 4:7.

Uw feni fel’ fare yul’yul’ ni dag Hezekiah nge Paul ni ngad folgad riy! Yibe athapeg ni ngada folwokgad ko michan’ rorow ma aram e ngada pared nib yul’yul’ ngak Jehovah, ni ir e Got rodad ni Tha’bi ga’.​—Hebrews 13:7.