Ngan Nog Nga Dap’ I L’ugundad Ma Aram E Kad Thapgad

“En nra pining fithingan Jehovah ni nge ayuweg e ra fos ni ke thap ngak Got.”​—ROMA 10:13, New World Translation.

1. Kakrom, iyib ngaray ma mang boch ban’en ni kan ginang e girdi’ riy?

CEPIN e Bible e be weliy morngaagen in e ‘rran rok Jehovah.’ Fare Ran ni ke tharey e fayleng u nap’an Noah, nge ngiyal’ ni kan thang mit yu Sodom nge yu Gomorrah, nge ngiyal’ ni kan thang yu Jerusalem u nap’an e 607 B.C.E. nge 70 C.E., pi n’em e boch e rran rok Jehovah ni ke k’aring e marus. Aram e pi rran ni ke pufthinnag e girdi’ me fulweg taban e kireb rorad ya kar togopuluwgad ngak. (Malaki 4:5; Luke 21:22) Nap’an e pi rran nem ma boor e girdi’ ni kar m’ad ni bochan e kireb rorad. Machane boch e girdi’ e ur magaygad nib fas. I n’igin Jehovah ni ngan ginang e girdi’, min nog ko piin ni kireb ni bay yib e magothgoth min pi’ ba ngiyal’ ko piin nib mat’aw ni ngar thapgad mar pared nib fas.

2, 3. (a) Mang thin ko profet ni ka nog u nap’an e Pentekost? (b) Ka nap’an e Pentekost 33 C.E., iyib ngaray ma mang e ba t’uf ni ngan pining fithingan Jehovah?

² Ngiyal’ ni kan thang yu Jerusalem u nap’an e 70 C.E. e be tamilangnag e re n’ey. I yiiynag Joel ni profet u morngaagen e re n’em 900 e duw u m’on riy ni gaar: “Bay gu tay e pow nga lan e lang nge nga daken e fayleng ni nge puguran ngak e girdi’ e re Rran nem. Ma bay un puog e racha’, ma bay yib e nifiy, nge manileng ni sum ko ath. Ma bayi talumor e yal’, ma bayi pig ramaen e pul nge row ni bod e racha’ u m’on ndawori taw e re Rran rok Jehovah nem, ni reb e rran ni baga’ ma ba gel e gafgow nra fek i yib.” Uw rogon ma rayog ni nge magay be’ nib fas ko re ngiyal’ i n’em? Kan thagthagnag nga laniyan’ Joel ni nge yoloy ni gaar: “Machane urngin e piin ni yad ra wenig ngak Jehovah ni nge ayuwegrad e yad ra fas. Ni bod ni ke gaar Jehovah, Ba’ boch e girdi’ u daken e burey ni Zion nge yu yang u Jerusalem ni bay ra thaygad. Piin ni ke mel’egrad Jehovah u fithik’ e girdi’ e yad ra fas.”​—Joel 2:30-32, NW.

³ Nap’an e Pentekost ko 33 C.E., me weliy apostal Peter ko piyu Jew nge piin ni gathi yad piyu Jew u Jerusalem e thin ko profet rok Joel me dag ni rayog ni ngar athapeged ni nge lebug e pi thin nem u nap’rad: “Bay gu ngongliy e maang’ang u lan e lang, mu gu ngongliy bogi ban’en u but’ ni yira ngat ngay: Bay yib i m’ug e racha’ nge nifiy nge ath nib dib’ag; ma bayi talumor lan mit e yal’, ma bayi row lan mit e pul nge bod ramaen e racha’ u m’on ndawori taw fare Rran ni ir e baga’ ma ba th’abi fel’, ni Rran rok Jehovah. Ma aram e cha’ nra pining fithingan Jehovah ni nge ayuweg e ra fas.” (Acts 2:16-21) Pi girdi’ ni yad be motoyil ku Peter e go’ yad bay u tan fare Motochiyel ku Moses, me ere kar nanged fithingan Jehovah. Ere weliy Peter ni ka bay ban’en nib l’ag ngay ni ngan pining fithingan Jehovah. Ba muun ngay ni ngan un ko taufe u fithingan Jesus, ni ir e en ni kan li’ kem’ min faseg ko yam’ me par ndariy n’umngin nap’an u tharmiy.​—Acts 2:37, 38.

4. Mang thin ni ke wereg e pi Kristiano iyan?

⁴ Ka nap’an Pentekost iyib ngaray me wereg e pi Kristiano e thin u morngaagen Jesus ni kan faseg ko yam’. (1 Korinth 1:23) Ur tamilangnaged ni rayog ni nge mang e girdi’ pi fak Jehovah nib spiritual mi yad mang bang fare “Israel rok Got,” ni aram ba nam nib spiritual ni ra ‘wereg morngaagen e n’en nrib fel’ ni ke ngongliy Jehovah.’ (Galatia 6:16; 1 Peter 2:9) Piin ni ra par nib yul’yul’ nge mada’ ko yam’ e ra un ko yafas ndariy n’umngin nap’an u tharmiy mi yad un ko gagiyeg rok Jesus u Gil’ilungun u thamrmiy. (Matthew 24:13; Roma 8:15, 16; 1 Korinth 15:50-54) Ku thingari wereg e pi Kristiano u morngaagen fare rran rok Jehovah ni ra k’aring e marus ni bay yib. Thingara ginang piyu Jew ni ra yib reb e gafgow ni ri kab mal’af ni kab gel e gafgow riy nga reb i ban’en ni kaa buch u Jerusalem fa ngak e girdi’ ni ma yog ni yad girdien Got nge mada’ ko ngiyal’ nem. Machane ra moy e piin nra magay nib fas. Mini’? Aram e piin ni ur pininged fithingan Jehovah.

“Nap’an e Tin Tomren e Rran”

5. Mang thin ko profet ni ke lebug ko ngiyal’ ney?

⁵ U boor e kanawo’ ma pi n’en ni buch ko ngiyal’ nem e ba puluw ko pi n’en ni gad ma guy ko ngiyal’ ney. Ka nap’an e 1914, ma be par e girdi’ ko ngiyal’ ni baga’ fan ni ka nog u lan e Bible e “ngiyal’ ko tomur,” fa “ngiyal’ ntomren e re m’ag ney,” fa “tin tomren e rran” ngay. (Daniel 12:1, 4; Matthew 24:3-8; 2 Timothy 3:1-5, 13) Nap’an e re chibog ney ma ke lebug e thin ko profet u lan e Bible ya bay e mahl ni rib gel e kireb riy, nge cham nib elmirin, nge par ko girdi’ ni be kireb iyan, ma yibe kirebnag e fayleng. Pi n’ey e go’ bang ko fare pow ni yiiynag Jesus, ni be tamilangnag ni ke chugur e girdi’ ko rran rok Jehovah ni ra k’aring e marus ni aram ban’en ni rib mudugil. Fare mahl ni Armageddon e aram e n’en nth’abi ga’ ko fare “gafgow ni baga’ ni ri kab mal’af ni kab gel e gafgow riy nga reb e gafgow ni kaa yib, ni ka nap’an ni sum e fayleng nge mada’ ko bin daga’ e rran, fa ki yib reb e gafgow ntaareb rogon ngay.”​—Matthew 24:21; Revelation 16:16.

6. (a) Mang e rin’ Jehovah ni nge ayuweg e piin nib sobut’an’? (b) Taman yang ni bay e thin rok Paul u morngaagen rogon ni ngan magay nib fas?

⁶ Be chugur iyan ko rofen nem ko magothgoth ma be rin’ Jehovah ban’en ni fan ko piin nib sobut’an’. Nap’an e “ngiyal’ ko tomur,” ma ke kunuy e tin ni ka bay girdien fare Israel rok Got nib spiritual me tiyan’ ko pi tapigpig rok ni ra par u fayleng ni ka nap’an e 1930 iyib ngaray ya be kunuy girdien “fare ulung ni baga’, ndariy be’ nrayog ni nge theegrad, nra bad u gubin e nam, nge ganong, nge gubin mit e girdi’, ngu gubin e thin.” Yad ba ulung i girdi’ ni “kar thapgad ngaray u fithik’ fare gafgow ni baga’”. (Revelation 7:9, 14) Machane uw rogon nrayog ni ra be’ ma nge guy rogon ni ra mudugil ni ra par nib fas? I pi’ apostal Paul e fulweg ko re deer nem. U Roma guruy ni 10 me pi’ e fonow ni ra ayuwegey ni ngan par nib fas​—ni fonow nib puluw ko ngiyal’ nem nge ngiyal’ ney.

Ba Meybil ni Fan ni Ngan Par nib Fas

7. (a) Mang athap ni bay ko Roma 10:1, 2? (b) Mang fan nra ga’nag Jehovah rogon ni yibe wereg fare “thin nib fel’”?

⁷ Nap’an ni yoloy Paul fare babyor ni Roma, ke mu’ i n’ag Jehovah fare nam nu Israel. Machane ke yog e re apostal nem ni gaar: “Kari gum’ ni bochan ni manga yigi thap e girdi’ ko nam rog ngak Got.” Ke athapeg ni boch e girdi’ ni Jew e ra tamilangan’rad ko tin nib m’agan’ Got ngay, mi yad thap ngak. (Roma 10:1, 2) Maku ba adag Jehovah ni urngin e girdi’ u fayleng ni ke michan’rad ngak ni yad ra thap ngak, ya arrogon ni be yog ko John 3:16 ni gaar: “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafas ndariy n’umngin nap’an ngorad.” Maligach ni biyul ni pi’ Jesus e ke bing e kanawo’ nrayog ni nge thap e girdi’ ngak Got. Bod rogon nap’an Noah nge yugu boch e rran ko pufthin ni yib u tomren, me n’igin Jehovah ni ngan wereg fare “thin nib fel’”, min tamilangnag rogon ni ngan thap ngak.​—Mark 13:10, 19, 20.

8. Bod rogon Paul ma pi mini’ e ma ayuweg e pi Kristiano ko ngiyal’ ney ma uw rogon?

⁸ I dag Paul ni ba adag ni nge ayuweg e piin Jew nge piin ni gathi yad piyu Israel, ya ke machibnag e girdi’ u gubin ngiyal’. Ke “guy rogon ni nge mich e tin ni be yog u wan’ piyu Israel nge piyu Greek.” I yog ngak e piin piilal u Efesus ni gaar: “Dariy ban’en ni gu tel romed ni gomanga ban’en nra ayuwegmed nnapan ni gu be machibnagmed ma gu be skulnagmed u fithik’ e girdi’ ni yoor ngu lan e tabinaw romed iyan. Ma ri taareb rogon piyu Israel nge piin ni gathi yad piyu Israel nri gu ta’ chilen ngorad ni ngar pied keru’rad ko denen ni yad be ngongliy ngar sapgad ngak Got, me mich e Somol rodad ni Jesus u wan’rad.” (Acts 18:4; 20:20, 21) Ku aram rogon e Pi Mich Rok Jehovah ko ngiyal’ ney ni yad ma pi’ gelngirad ni ngar machibnaged e girdi’, ni gathi ke mus e piin ni yad ma yog ni yad e Kristiano, ya urngin e girdi’, ‘nge yan i mada’ ko yungi n’en ni yan i mus e fayleng ngay.”​—Acts 1:8; 18:5.

Ngan Weliy “fare ‘Thin’ ko Mich u Wan’uy”

9. (a) Miti mang mich u wan’uy ni be weliy Roma 10:8, 9 u morngaagen? (b) Wuin nge uw rogon ni susun ni ngad weliyed e n’en ni ke mich u wan’dad ngay?

⁹ Ba t’uf e mich u wan’uy ni ngan thap ngak Got. Weliy Paul e thin ko Deuteronomy 30:14 ni gaar: “‘Thin ni pi’ Got nge yib e ba chugur ngom, ni bay u daken dap’ i l’ugunam ngu fithik’ i lanin’um’; ni aram fare ‘thin’ ni murung’agen e mich u wan’uy ngak Kristus ni ir e gamad be machibnag.” (Roma 10:8) Nap’an ni gad ma machibnag e re “‘thin’ ko mich u wan’uy,” nem ma ra taw nga gumercha’dad. Aram rogon Paul, ma ka bay boch e thin ni yog ni rayog ni nge gelnagdad nge mudugilan’dad ni ngad boded ir ma gad wereg e re mich u wan’uy nem ko yugu boch e girdi’: “Faan ga ra yog e re ‘thin nem nga dap’ i l’ugunam,’ ni Jesus e ir Somol, ma ke mich u wan’um ni Got e faseg ko yam’, ma aram e kam thap ngak Got.” (Roma 10:9) Gathi ke mus ni ngan weliy ko girdi’ ni ke mich u wan’um ko re n’em ko ngiyal’ ni kam un ko taufe ya thingar kum weliy e re n’em iyan, ni ngam weliy u fithik’ e passig u morngaagen urngin ban’en nib l’ag ko fare thin riyul’. Re thin riyul’ nem e ma sor fan ko fithingan fare Somol Nth’abi Ga’ ni Jehovah; ma ma sor fan ko fare Pilung rodad ni ir e Mesiah nge An ke Biyuliydad, ni Somol Jesus Kristus; ma ma sor fan ko Gil’ilungun Got nge pi n’en nra yibnag.

10. Rogon nib puluw ko Roma 10:10, 11, ma uw rogon ni thingara maruweliyed fare “‘thin’ ko mich u wan’uy”?

¹⁰ Piin ndabra uned ko re “‘thin’ ko mich u wan’uy” ney e dabra thapgad ngak Got ya arrogon ni yog fare apostal ni gaar: “Ya ra mich u wan’dad me mat’awnagdad Got ngak; ma gadad ra yog nga dap’i l’ungudad, ma aram e kad thapgad. Ya be gaar e babyor nib thothup: ‘En nra michan’ ngak Kristus e dabi kireban’.’” (Roma 10:10, 11) Thingarda filed e re “‘thin’ ko mich u wan’uy” ney ma nguuda ted nga gumercha’dad ma aram e ra k’aringdad ngad weliyed ngak yugu boch e girdi’. I puguran Jesus ngodad ni gaar: “Ere faanra tamra’ be’ ni bochag nge n’en ni gu be fil ngak e girdi’ ko ngiyal’ ney ndakir mich Got u wan’ e girdi’ ma yad be rin’ urngin mit e kireb, e ku ra tamra’ e en ni Fak e girdi’ ngak ko ngiyal’ nra yib riy ni yad e pi engel rok Got ni be galgal ramaen ni bod e Chitamangin.”​—Mark 8:38.

11. Uw fene ga’ gang ni thingarni wereg e thin nib fel’ riy, ma mang fan?

¹¹ Rogon ni yiiynag Daniel ni profet ma ngiyal’ ko tomur ma “piin ni yad ba gonop” e bayi gal ramaerad “ni bod ramaen lan e lang,” u nap’an ni be garer iyan e machib ko Gil’ilungun Got nga yu gin ni ma mus e fayleng riy. Yad be “fil ngak boor e girdi’ ni nguur rin’ed e tin nib mat’aw,” ma kari ga’ iyan e tamilangan’ nib riyul’, ya be tamilangnag Jehovah iyan e thin ko profet u morngaagen e ngiyal’ ney ko tomur. (Daniel 12:3, 4) Ereray e thin nib t’uf ni fan ni nge par nib fas e piin ni ba t’uf rorad e thin riyul’ nge tin nib mat’aw ban’en.

12. Uw rogon nib peth e thin ko Roma 10:12 ko n’en nib mil fan ngak fare engel u Revelation 14:6?

¹² I ul’ul’ apostal Paul ngay ni gaar: “Dariy ban’en nib thil rok piyu Israel nge piin ni gathi yad piyu Israel; i Got e taaab Somol rorad ni yad gubin, ma ri ma tow’athnag urngin e piin ni yad ma pining fithingan.” (Roma 10:12) Thingarni machibnag fare “thin nib fel’” ko ngiyal’ ney ni rib elmirin u gubin yang u fayleng​—ngak urngin e girdi’, nge mada’ ko yu gin ni ma mus e fayleng riy. Fare engel ni bay ko Revelation 14:6 e ka be changeg nga lang ni ke tay nib mil fadad fare “thin ndabi math biid, ni thin nib fel’ ni nge weliy ngak e girdi’ nu fayleng, ni urngin e pi nam, nge ganong nge thin nge gubin mit e girdi’.” Mang angin nra yib ko girdi’ ni ma un ko re thin ney?

Ngan Pining Fithingan Jehovah

13. (a) Mang thin ni kenggin e duw ni 1998? (b) Mang fan nib puluw e pi thin nem ko ngiyal’ ney?

¹³ Yog Paul e thin ni bay ko Joel 2:32, ni be gaar: “En ra pining fithingan Jehovah ni nge ayuweg e ra fas ni ke thap ngak Got.” (Roma 10:13, NW) Rib puluw ni ereram e pi thin ni fan ko duw ni 1998 ko Pi Mich Rok Jehovah! Dariy biyay ni kab gel rogon fene ga’ fan ni nguuda mon’oggad iyan ma nge pagan’dad ngak Jehovah, ma gad weliy fithingan ngak e girdi’ nge tin nib m’agan’ ngay! Bod u nap’an e bin som’on e chibog, ma ku arrogon ko ngiyal’ ni tin tomren e rran ko re m’ag nib kireb ney, ma yibe wereg e pi thin ney ni gaar: “Mu lufed gimed ko gechig ni bay yib ngak e girdi’ nib kireb ko biney e mfen.” (Acts 2:40) Aram ba pong ni bod e trumpet ni be pining urngin e girdi’ ni bay madgun Got u wan’rad ni ngar weniggad ku Jehovah ni nge thapegrad ngak nge piin ni ma motoyil ko thin nib fel’ ni yad be wereg u dap’i l’ugunrad.​—1 Timothy 4:16.

14. Bin ngan e War e thingarda pininged ni nge ayuwegdad ngad magaygad nib fas?

¹⁴ Mang e ra buch u nap’an nra taw e rran rok Jehovah ko re fayleng ney? Baga’ ni dabi sap e girdi’ ngak Jehovah ni nge thapegrad. Baga’ ni ra “non e girdi’ ko burey nge war ni yad be tolul ni lungurad: ‘Mmuchubu’gad nga dakenmad ngam mitheged gamad u owchen faanem ni ke par nga but’ u tagil’, nge damumuw rok fare Fak e Saf.’” (Revelation 6:15, 16) Yad ra sap ko pi ulung ni bod e burey ko re m’ag ney. Machane kab fel’ nfaanra yad ra pagan’ ku fa bin th’abi ga’ e War ni Jehovah Got! (Deuteronomy 32:3, 4) Yog David ni Pilung morngaagen ni gaar: “Jehovah e ir e war rog me ir e yoror rog ma ir maduguwag.” Jehovah e ir e “War rodad ko thap rodad.” (Psalm 18:2; 95:1) Ngochol rok e bod e “wulyang nib gel,” ni kari mus e “wulyang” ni gel nrayog ni nge ayuwegdad u nap’an fare gafgow ni bay yib. (Proverbs 18:10) Ere ri baga’ fan ni urngin e girdi’ nrayog ko fa nel’ i bilyon e girdi’ nib fas ko ngiyal’ ney ni ngan fil ngorad ni ngar pininged fithingan Jehovah u fithik’ e michan’uy nge yul’yul’.

15. Mang e be yog u Roma 10:14 u morngaagen e mich u wan’uy?

¹⁵ Rib puluw e deer ni fith apostal Paul ni migid ni gaar: “Machane ra diin mi yad non ngak ni faanra dawori michan’rad ngak?” (Roma 10:14) Bay bokum e girdi’ ni daworn ayuwegrad ni ngar uned ko “fare ‘thin’ ko mich u wan’uy” ni aram e rayog ni ngar weniggad ku Jehovah ni nge thapegrad ngak. Mich u wan’uy e rib t’uf. Yog Paul u lan yugu reb e babyor ni gaar: “Dariy be’ nra fel’ u wan’ Got ni faanra de mich Got u wan’. Ya en nra yib ngak Got e thingari mich u wan’ ni ba’ Got ma ra tow’athnag e piin ni yad be gayiy Got.” (Hebrews 11:6) Machane uw rogon nrayog ni nge michan’rad bokum milyon e girdi’ ku Got? U lan e babyor ni yoloy Paul ngak piyu Roma me fith ni gaar: “Ra diin me michan’rad ni faanra dawor rrung’aged e thin rok?” (Roma 10:14) Ma pi’ Jehovah e n’en nib t’uf ni ngar rung’aged e thin rok fa? Ri arrogon! Mmotoyil ko n’en ni yog Paul ni gaar: “Ma ra diin mi yad rung’ag ni faanra danir machibnag e thin rok?”

16. Rogon e yaram ni tay Got ma mang fan nib t’uf e piin ni ta machib?

¹⁶ N’en ni weliy Paul e ma tamilangnag ni ba t’uf e piin nra wereg e machib. I yog Jesus ni ra aram rogon nge mada’ “nga tomren e fayleng.” (Matthew 24:14; 28:18-20) Aram e n’en ni ke yarmiy Got ni nge ayuweg e girdi’ ni ngar pininged fithingan Jehovah ni ngar thapgad ngak. Baga’ ni girdi’ ko Kristendom e dar rin’ed ban’en ni ngar ted fan fithingan Got. Boor e girdi’ e ke maathuk lanin’rad mi yad lemnag ni bay Jehovah nge l’agruw ni’ ni aram e machib ko Trinitas. Ku boor e girdi’ e bod rogon ni be yog ko Psalm 14:1 nge 53:1 ni gaar: “Piin ni balyang e ma lungurad u lanin’rad: ‘Dariy Jehovah.’” Ba t’uf ni ngar nanged ni Jehovah e ir fare Got nib fas, ma thingara nanged fan urngin ban’en nib l’ag nga fithingan ma aram e rayog ni ngar thaygad ko fare gafgow nib baga’ ni bay yib.

Rib ‘Gamog Ayrad’ e Piin ni ma Machib

17. (a) Mang fan nib puluw ni nge weliy Paul e thin ko profet u morngaagen boch ban’en nran sulweg nga rogon? (b) Mang e ba l’ag ko ‘ay nib gamog’?

¹⁷ Ka bay reb e deer ni baga’ fan ni fith apostal Paul ni gaar: “Ma ra diin min machibnag e thin rok ni faanra dab nol’og e piin ni ngar machibniged e thin rok nga ranod ngar machibgad? Ni bod ni be yog e babyor nib thothup ni be gaar: ‘Rib gamog ayrad e piin ni kar feked i yib e thin nib fel’ ni yib rok Got!’” (Roma 10:15, NW) Pi thin nem ni yog Paul e bay ko Isaiah 52:7, ni aram e thin ko profet u morngaagen boch ban’en nran sulweg nga rogon ni ma sor fan ko ngiyal’ ney ni ka nap’an e duw ni 1919. Ku biyay ko ngiyal’ ney ma be l’og Jehovah “fa en ni be fek e thin nib fel’ i yib, ma be wereg e thin ko gapas, ma weliy u morngaagen e n’en ni kab fel’, ma be weliy morngaagen rogon ni ngan thap ngak Got.” Pi “matanag” ni dugliy Got nge girdi’ ni be un ngorad e yad be fol ko re n’ey mi yad tolul u fithik’ e falfalan’. (Isaiah 52:7, 8) Sana ra magar ayrad e piin ni be wereg e thin u morngaagen rogon ni ngan thap ngak Got, ma sana ra thiy ko fiyath u nap’an ni yad be milekag iyan u mit e tabinaw, machane owcherad e be gal ramaen ko falfalan’! Ya go’ yad manang ni ke tay Jehovah chilen ngorad ni ngar wereged e thin nib fel’ ko gapas mar pied e athamgil nga laniyan’ e piin ni ke kireban’rad, mi yad ayuwegrad ni ngar pininged fithingan Jehovah ni rayog ni ngar thapgad ngak.

18. Mang e be yog u Roma 10:16-18 u morngaagen fare thin nib fel’ ni ran wereg nge tomur riy?

¹⁸ Demtrug ko ra “mich u wan’ e girdi’ e thin ni kar rung’aged” ara yad ra turguy ni dabra folgad riy, machane rriyul’ e thin rok Paul ni be gaar: “Gur riyul’ ndar rung’aged e re thin rok Got nem? Rrung’aged ya ‘lamrad e wer nga urngin yang u daken e fayleng, thin rorad e ke taw ko gin ni mus e fayleng riy.’” (Roma 10:16-18) Bod rogon “lan e lang e rib gagiyel ni be gilnag buguwan Got,” ya be m’ug riy ko tin ni sunumiy, maku arrogon e Pi Mich Rok u fayleng e thingara weliyed ni ke “taw nga nap’an ni nge chuweg Jehovah e girdi’rok u pa’ e toogor rorad, me war e pi toogor rorad . . . ma ngan fal’eg laniyan’ urngin e girdi’ ni ke kireban’rad.”​—Psalm 19:1-4; Isaiah 61:2.

19. Mang angin nra yib ko piin ni ma ‘pining fithingan Jehovah’ ko ngiyal’ ney?

¹⁹ Be chugur iyib fare rran rok Jehovah ni ra k’aring e marus. “Birok Jehovah e rran e ke chugur; faanem ni Gubin ma Rayog Rok e bayi pi’ e kireb nge yib e rofen nem. Rib gel e gafgow ni bayi fek e re rran nem i yib!” (Joel 1:15; 2:31) Gad be yibilay ni ra yoor e girdi’ ni ra un ko fare thin nib fel’, mi yad yib ko ulung rok Jehovah. (Isaiah 60:8; Habakkuk 2:3) Mu lemnag fa tinem e rran rok Jehovah ni ke yibnag e magothgoth ko piin nib kireb​—nap’an Noah, nge nap’an Lot, nge nap’an ni ke apostate piyu Israel nge piyu Judah. Gad bay u thatharen e bin th’abi ga’ e gafgow, ni aram e ngiyal’ nra yib e nanyor rok Jehovah nge chuweg e tin nib kireb ko re fayleng ney, me bing e kanawo’ nge yib e gapas u paradis ndariy n’umngin nap’an. Ra ra mang be’ ni be “pining fithingan Jehovah” u fithik’ e yul’yul’? Faanra er rogon, ma ga falfalan’ riy! Ya ke micheg Got ni ga ra magay nib fas.​—Roma 10:13.

Uw Rogon ni Ga Ra Fulweg?

◻ Mang boch ban’en nib biech ni kan weliy u tomren e Pentekost ko 33 C.E.?

◻ Susun uw rogon nge tiyan’ e pi Kristiano ko “fare ‘thin’ ko mich u wan’uy”?

◻ Mang fan fare thin ni ngan ‘pining fithingan Jehovah’?

◻ Uw rogon ma ba ‘gamog ayrad’ e piin ni ma wereg e thin ko Gil’ilungun Got?