Mini’ E “Ra Fas”?

“Ma aram e cha’ nra pining fithingan [Jehovah] ni nge ayuweg e ra fos.”​—ACTS 2:21.

1. Mang fan ni baga’ fan e rofen ni Pentekost ko 33 C.E. ko chepin e fayleng?

ROFEN ni Pentekost ko 33 C.E. e ba rran ni baga’ fan ko chepin e fayleng. Mang fan? Ya rofen nem e sum reb e nam nib biech. Som’on ma gathi ri baga’ e re nam nem​—ya ke mus ni 120 e pi gachalpen Jesus ni kar muulunggad u lan e thal ni lang e singgil ko reb e naun u Jerusalem. Machane ka bay e re nam nem e ngiyal’ ney ma pi nam ko ngiyal’ nem e goo ke m’ay. Ri baga’ fan e re n’em ngodad ya aram fare nam ni dugliy Got ni ngar manged mich rok ngak e girdi’.

2. Mang boch e maang’ang ni ke buch u nap’an ni sum fare nam nib biech?

² Nap’an ni sum e re nam nib biech nem ma bay boch ban’en ni baga’ fan ni ke buch ni ke lebguy e thin ni yiiynag Joel ni profet. Acts 2:2-4 e be weliy u morngaagen e pi n’en ney ni gaar: “Ma yugu ni gin ma ke yib lingan ban’en u lan e lang ni bod lingan bangi nifeng nib gel ni ke thow, me sugnag fare naun ni polo’ ni kar pired riy nga but’. Mi yad guy e nifiy ni bod yaan e yunmon ni ke wer; ni ra be’ u rom ma ke yan i math reb ngak. Mi yigoo sugnagrad e kan ni thothup mi yad tabab ko numon nlungun boch e nam, ni bod rogon ni ke muruwliyrad fare kan ni thothup ni ngar nonod.” Aram rogon ma pi pumoon nge ppin nem nib yul’yul’ ni yad 120 u gubin e kar manged ba nam nib spiritual, ma yad e tin som’on ko n’en ni yog Paul ni aram “fare Israel rok Got.”​—Galatia 6:16.

3. Mang thin ni yiiynag Joel ni profet ni ke lebug u nap’an e Pentekost ko 33 C.E.?

³ Ke yib e girdi’ ni pire’ ni ngar nanged ko mang fare n’en ni bod e “nifeng nib gel ni ke thow,” me weliy apostal Peter ngorad ni aram e thin ni ke lebug u morngaagen e n’en ni ke yiiynag Joel. Bin ngan e thin? Mmotoyil ko n’en ni yog ni gaar: “Ke gaar Got, ‘Baaray e n’en ni bay gu rin’ ko tin tomur e rran: Bay gu puog fare kan ni thothup rog nga daken urngin e girdi’; ma pi fakmed ni pumoon nge ppin e bay ur yiiygad, ma pi pagel ni pi fakmed e bay ni piliyeg owcherad ngar guyed bogi ban’en ni bayi dag Got ngorad, ma piin ni pumoon ni kar pillibthirgad e bay ra lik’ayniged bogi ban’en ni Got e gagiyegnag. Ni mus ngak e piin ni yad e sib rog, ni pumoon nge ppin, ni bay gu puog fare kan ni thothup rog nga dakenrad ko pi rran nem, ma aram e bay ur yiiygad. Bay gu ngongliy e maang’ang u lan e lang, mu gu ngongliy bogi ban’en u but’ ni yira ngat ngay: Bay yib i m’ug e racha’ nge nifiy nge ath nib dib’ag; ma bayi talumor lan mit e yal’, ma bayi row lan mit e pul nge bod ramaen e racha’ u m’on ndawori taw fare Rran ni ir e baga’ ma ba th’abi fel’, ni Rran rok [Jehovah]. Ma aram e cha’ nra pining fithingan [Jehovah] ni nge ayuweg e ra fos.” (Acts 2:17-21) Pi thin nem ni yog Peter e bay ko Joel 2:28-32, ma bochan ni ke lebug ma aram e mich riy ni ke chugur ni nge m’ay e nam ko piyu Jew. Ke chugur ko “fare rran ni ir e baga’ ma th’abi fel’, ni Rran rok Jehovah,” ni aram e ngiyal’ nran fulweg taban e kireb rok yu Israel ya dar yul’yul’gad. Machane mini’ e ra par nib fas, ma rayog ni nge mil ko riya’? Ma re n’ey e be yip’ fan e mang?

L’agruw Yay Nra Lebug e Thin ko Profet

4, 5. Mang fonow ni pi’ Peter ni bochan e pi n’en ni bay yib, ma mang fan nib puluw e pi thin nem ko ngiyal’ ney?

⁴ U lan e pi duw u tomren e 33 C.E., ma ke yoor e girdi’ ko fare Israel rok Got nib spiritual, machane gathi aram rogon fare nam nu Israel. Nap’an e 66 C.E., ma bay e mahl u thilin yu Israel nge yu Roma. Nap’an e 70 C.E., ma ke chugur ni nge m’ay fare nam nu Israel, ma kan urfeg Jerusalem nge fare tempel riy. Nap’an e Pentekost 33 C.E., me pi’ Peter e fonow nib fel’ ni fan ko re gafgow nem ni bay yib. Ke weliy e thin ku Joel biyay me gaar: “Cha’ nra pining fithingan [Jehovah] ni nge ayuweg e ra fos.” Ra reb e Jew ma thingari turguy ni nge pining fithingan Jehovah. Re n’ey e ba muun ngay e n’en ni yog Peter ni gaar: “Nge bigimed me pi’ keru’ ko denen ni be rin’, min taufenag nga fithingan Jesus Kristus, ma aram me n’ag Got fan e denen romed.” (Acts 2:38) Piin ni ur motoyilgad ku Peter e thingari mich u wan’rad ni Jesus e ir fare Messiah, ma ir fare nam nu Israel ni kar n’aged.

⁵ Pi thin nem ni yiiynag Joel e ke pug laniyan’ e piin nib sobut’an’ u nap’an e bin som’on e chibog. Machane kab baga’ fan e pi thin nem ko ngiyal’ ney ya pi n’en ni be buch u lan e bin 20 e chibog e be dag ni ke lebug e thin ni yiiynag Joel ko yay nl’agruw. Ngad guyed ko uw rogon.

6. Uw rogon ni kan tamilangnag ko mini’ fare Israel rok Got u nap’an ni be chugur iyan ko 1914?

⁶ Tomren ni yim’ e pi apostal ma daki gagiyel fare Israel rok Got ya bod ni ke ing e pan ko Kristiano ni googsur. Machane nap’an e ngiyal’ ko tomur ni tabab ko 1914, ma ki gagiyel e re nam nib spiritual ney biyay. Re n’ey e ke lebuguy e thin ko fanathin rok Jesus u morngaagen e woldug ni wheat nge pan. (Matthew 13:24-30, 36-43) Nap’an ni ke chugur iyib ko fare duw ni 1914 ma pi Kristiano ni kan dugliyrad e kar chuwgad ko Kristendom, ma dar rusgad ni ngar togopuluwgad ko machib ni googsur mar machibnaged fare thin u morngaagen e “ngiyal’ ni kan dugliy ni fan ko pi nam” ni be chugur iyib. (Luke 21:24) Machane faani tabab e bin som’on e mahl ko fayleng ko duw ni 1914 ma ke sum boch e magawon ni dar ted talperad riy. Kan diliiyrad nib elmirin ma aram e boor iyad e dakura pasiggad ko machib, ma boch i yad e kar n’aged e michan’ rorad. Ma nap’an e 1918 ma kari chugur ni nge tal e machib.

7. (a) Mang ban’en ni buch ko 1919 ni taareb rogon ko n’en ni buch u nap’an e Pentekost 33 C.E.? (b) Nap’an e 1919 iyib ngaray ma mang wenegan ni yib ko kan ni thothup rok Jehovah ni kan puog nga daken e pi tapigpig rok?

⁷ Machane de par ni aram rogon nib n’uw nap’an. Ya nap’an e 1919, ma ke tabab Jehovah ni nge puog e kan ni thothup rok nga daken e girdi’ rok u rogon nib puluw ko n’en ni buch ko Pentekost 33 C.E. Ma ngiyal’ nem u nap’an e 1919 e dariy be’ ni ke yog ni nge non nlungun boch e nam ma dariy lingan e nifeng nib gel ni ke thow. Gad manang e thin ni yog Paul u 1 Korinth 13:8 ni ke m’ay e ngiyal’ ni fan ko maangang. Machane ke lingagil ni bay e kan ni thothup rok Got u nap’an e 1919 ko reb e convention u Cedar Point, Ohio, U.S.A., ya kan pi’ gelngin e pi Kristiano nib yul’yul’ ni ngar pasiggad i machibnag fare thin nib fel’ ko Gil’ilungun Got. Nap’an e 1922 mar sulod ko muulung u Cedar Point ma kan pi’ e athamgil nga lanin’rad ko fare thin ni baaray ni “Mwereged, mwereged, mwereged, fare thin u morngaagen fare Pilung nge gil’ilungun.” Bod rogon ni buch u nap’an e bin som’on e chibog ma kan tamilangnag ko fayleng angin ni yib ko piin ni kan puog e kan ni thothup rok Got nga dakenrad. Ya urngin e Kristiano ni ke ognag ir ku Got​—ni pumoon nge ppin, nge pillibthir nge piin fel’ yangarrad—​e kar tababgad ni ngar “yiiygad” ni aram e kar wereged e thin u morngaagen e “pi n’en nib sorok Got ni ke ngongliy.” (Acts 2:11) Bod Peter, ma kar pininged e piin nib sobut’an’rad ni gaar: “Mu lufed gimed ko gechig ni bay yib ngak e girdi’ nib kireb ko biney e mfen.” (Acts 2:40) Uw rogon nrayog ni nge fol e girdi’ ko re n’em? Faan yad ra fol ko thin ni yog Joel u Joel 2:32 ni be gaar: “Urngin e piin ni yad ra wenig ngak [Jehovah] ni nge ayuwegrad e yad ra fos.”

8. Ka nap’an e 1919 ma uw rogon ni ke mon’og iyan fare Israel rok Got?

⁸ Ka nap’an e ngiyal’ nem ma ke mon’og iyan fare Israel rok Got. Be m’ug riy ni ke chugur ni nge m’ay i dugliy e piin ni kan mel’egrad ni nga ranod nga tharmiy, ma ka nap’an e 1930 ma ke m’ug ba ulung ni baga’ ko piin nib sobut’an’rad ni yad be athapeg e par u fayleng. (Revelation 7:3, 9) Yad gubin e yad be lemnag ni bayi gur e chiney ya ke lebug e thin ko Joel 2:28, 29 ko yay nl’agruw ni aram e be dag ni ke chugur ko reb e rran rok Jehovah ni kab gel ko fa binem, ya ran gathey urngin e teliw nge am nge shiyobay ko re m’ag ney. Bay tapgin ni ngad ‘pininged fithingan Jehovah’ me mich u wan’dad ni ra ayuwegdad ngad pared nib fas!

Uw Rogon ni Ngad Pininged Fithingan Jehovah?

9. Mang boch ban’en nib l’ag ngay ni ngan pining fithingan Jehovah?

⁹ Mang e ba l’ag ngay ni ngan pining fithingan Jehovah? Fare thin ko Joel 2:28, 29 e ma ayuwegdad ngad nanged e fulweg ko re deer ney. Susun, dabi motoyil Jehovah ko urngin e piin ni ma pining fithingan. Ya ke yog Jehovah ngak yu Israel u daken Isaiah ni profet ni gaar: “Gimed ra pug pa’med nga lang ngam meybilgad ngog ma dab gu sap ngomed. Demtrug gelngin e meybil ni gimed ra tay ma dab gu telig ngomed.” Mang fan ni ke dabuy Jehovah ni nge motoyil ko meybil ni tay girdien e nam rok? Ke weliy ni gaar: “Ya pa’med e ke alit ko denen.” (Isaiah 1:15) Dabi motoyil Jehovah ku be’ ni bay e racha’ u pa’ ara be rin’ ban’en nib denen. Aram fan ni yog Peter ko piyu Jew u nap’an e Pentekost ni ngar kalgadngan’rad. Ku ma ga’nag Joel fan ni ngan kalngan’uy u Joel 2:28, 29. Susun, u Joel 2:12, 13, ma be gaar: “Me gaar [Jehovah], ‘Mus ko chiney nrayog ni ngan kolngan’uy ngan pi’ keruuy ko kireb ni yibe ngongliy ngan sul ngog, ni kan pag e abich ma yibe yor ma yibe dolo’loy. Lanin’med ni ke m’ing e ir e nge dag e kireban’ romed; ke siy ni ke mus ni ngam guchthuyed e mad romed. Mu sulod ngak [Jehovah] ni ir e Got romed. Ya ba gol ma ri be runguy e girdi’; ya ba gum’an’ ma ma rin’ e tin ni yog nra rin’.’” Ka nap’an e 1919, ma pi Kristiano ni kan dugliyrad e ur ngongolgad nib puluw ko pi thin ney. Ke kalngan’rad ko pi n’en nib kireb ni ur rin’ed mar dugliyed ni ngar pired nib yul’yul’ ma dabku ra sagaalgad. Ma aram me mab e kanawo’ ni nge yib e kan ni thothup rok Got nga dakenrad. Gubin e girdi’ ni ba adag ni nge pining fithingan Jehovah me rung’ag e thingari fol ko re kanawo’ ney.

10. (a) Uw rogon e bin riyul’ e kalngan’uy? (b) Uw rogon u wan’ Jehovah e bin riyul’ e kalngan’uy?

¹⁰ Dab mu pag talin ni bin riyul’ e kalngan’uy e gathi ke mus ni ngan gaar, “Wenig ngom.” Piyu Israel faram e ur guchthuyed e thal ni wuru’ e mad rorad ni ngar daged fene gel e kireban’ rorad. Machane gaar Jehovah: “Lanin’med ni ke m’ing e ir e nge dag e kireban’ romed; gathi ke mus ni ngam guchthuyed e mad romed.” Ya bin riyul’ e kalngan’uy e yib u gum’ercha’ey ngu fithik’ i lanin’uy. Ba muun ngay ni ngad pied keru’dad ko kireb, ni bod ni be yog u Isaiah 55:7 ni gaar: “Piin nib kireb e ngongol rorad e ngar paged, mi yad thiliyeg rogon e lem ni yad be tay. Mi yad chel ngak [Jehovah].” Ba muun ngay ni ngan fanenikay e denen ni bod Jesus. (Hebrews 1:9) Ma aram ma gad pagedan’dad ku Jehovah ni nge n’ag fan e denen rodad u daken e maligach ni biyul’ ni pi’ Jesus ya Jehovah e ba “gol ma ri be runguy e girdi’; ya ba gum’an.” Ra felan’ ko liyor ni gad be tay nge woldug nge garbod nib spiritual ni gad ma pi’ ngak ni maligach. Ra motoyil u nap’an ni gad ma pining fithingan.​—Joel 2:14.

11. Susun uw rogon e bin riyul’ e liyor ko yafas rodad?

¹¹ Nap’an ni welthin Jesus u daken fare burey miki weliy ban’en ni thingarda lemnaged faani gaar: “Ngam mon’eged u wun’med e gagiyeg rok Got nge tin nib m’agan’ ngay ni ngam rin’ed.” (Matthew 6:33) Liyor ni gad ma tay e gathi ban’en ni de ga’ fan, ni ke mus ni gad ma rin’ ya nge dariy ban’en ni nge methan’dad ngay. Pigpig ku Got e bay rogon ni nge m’on u wan’dad. Ere daken Joel me yog Jehovah ni gaar: “Mu thoyed e yabul u daken e burey ni Zion . . . Mu kunuyed e girdi’ nga taabang; mu fal’eged rogorad ni fan nga reb e muulung nib thothup; mu kunuyed e piin ni pillibthir; mu kunuyed e piin ni bitir, ma ku er rogon e bitir ni kabran. Mus ngak e piin ni ka fini mabgol ni thingar ra chuwgad u lan e pi singgil rorad ngar uned ko wub.” (Joel 2:15, 16) Rriyul’ ni piin ka fin ra uned ko mabgol e kari mus ni yad ma tiyan’ ko ani mabgol rorad. Machane mus ni yad e thingara mon’eged Jehovah u wan’rad. Susun ndariy ban’en ni nge m’on ko muulung ni fan ko liyor ngak e Got rodad, min pining fithingan.

12. Mang e be tamilangnag fare report ko Puguran ko fa binem e duw?

¹² Dabda paged talin e re n’ey, ma nguud lemnaged e thin ko report ko 1997 Service Year Report ko Pi Mich Rok Jehovah. Fa binem e duw ma immoy 5,599,931 e publisher ko Gil’ilungun Got ni aram e tin th’abi yoor​—ri aram ba ulung ni baga’ ko piin ni ma n’uf Got! Ma ke un 14,322,226 ko Puguran​—ni aram e ke mun meruk nge baley e milyon e girdi’ ni ka boor ko urngin e piin ni publisher. Re matheeg nem e be dag ni ku rayog ni nge yoor e ulung. Boor e pi girdi’ nem ni yad meruk nge baley e milyon e yad be fil e Bible u taabang ko Pi Mich Rok Jehovah ni yad e girdi’ ni ba adag e machib ara yad e bitir ko piin ni kar uned ko taufe. Ma boor e girdi’ e aram e yay nsom’on ni kar uned ko reb e muulung rodad. Ere ke yog ko Pi Mich Rok Jehovah ni ngar nonad ngorad mi yad pi’ e ayuw ngorad ni ngar mon’oggad iyan. Bay boch e girdi’ ni ma un ko Puguran u gubin e duw nge boch e muulung, machane dar mon’oggad. Machane ku rayog ni ngar uned ko muulung. Machane gad ma piningrad ni ngar fl’eged i lemnag e thin ko profet Joel mi yad lemnag e n’en ni ngar rin’ed ma nge mudugil nra motoyil Jehovah ngorad u nap’an ni yad ra pining fithingan.

13. Faanra gad be pining fithingan Jehovah, ma mang e mil fan ngodad ni ngad rin’ed ko yugu boch e girdi’?

¹³ I tamilangnag apostal Paul ban’en ni baga’ fan nib l’ag ngay ni ngan pining fithingan Got. U lan e babyor ni ke yoloy ngak yu Roma me weliy e thin ni yiiynag Joel ni gaar: “En ra pining fithingan [Jehovah] ni nge ayuweg e ra fos ni ke thap ngak Got.” Nge mu’ me weliy ni gaar: “Machane ra diin mi yad non ngak ni faanra dawori michan’rad ngak? Ma ra diin me michan’rad ni faanra dawor rrung’aged e thin rok? Ma ra diin mi yad rung’ag ni faanra danir machibnag e thin rok?” (Roma 10:13, 14) Arrogon, boor e girdi’ ni dawora nanged ko mini’ Jehovah e ba t’uf ni ngar pininged fithingan. Piin ni manang Jehovah e mmil fan ngorad ni ngar machibnaged e girdi’ maku ngar ayuweged yad.

Ba Paradis nib Spiritual

14, 15. Uw rogon ni gowa be par e girdi’ rok Jehovah u paradis ni bochan ni yad be pining fithingan u rogon ni ke felan’ ngay?

¹⁴ Aram rogon u wan’ e girdi’ ni kan dugliyrad nge piin ni yad yugu boch e saf, ma aram fan ni ma flaabnagrad Jehovah. “Me dag [Jehovah] ni be lemnag e nam rok ma be runguy e girdi’ rok.” (Joel 2:18) Nap’an e duw ni 1919, me dag Jehovah ni be lemnag e girdi’ rok ma be runguyrad ya ke sulwegrad nga rogon me tayrad nga lan e giyow ko tirok Got ban’en. Ma aram ba paradis nib spiritual, ma ke weliy Joel u morngaagen ni gaar: “Yungi milay’, dab kum rusgad, machane ngam falfalan’gad me fel’ lanin’med, ni bochan e kari pire’ ban’en ni ke ayuwegmed [Jehovah] riy. Pi gamanman, dab kum rusgad; ya binaw ni ma tugul e pan riy e ke galunglung, ma gek’iy e ke k’uf; ke yoor wom’engin e fig nge grapes. Mu felfelan’gad e girdi’ nu Zion, mu felfelan’gad ni bochan e tin ni ke rin’ [Jehovah] ni Got romed ngomed. Ke pi’ ngomed e n’uw nib fel’ urngin ko ngiyal’ ndabi siy ni nge yog ngomed, ni bod ni i rin’, ma ke puog e n’uw nga but’ u nap’an e garbeb ni fan ngomed, ma ke pi’ e n’uw u ngal’an e yafang ni ke tabab e gowel ni bod ni i rin’ ko som’on. Yungi n’en ni yima gunugunuy e grain riy e bayi sug ko grain; ma pi n’en ni tafen e wain ni bay u tooben e pi n’en ni yima uduy e wain riy e bayi sugubur ko wain nge gapgep.”​—Joel 2:21-24.

¹⁵ Aram yaan ban’en ni rib fel’! Ke yoor dalip i n’en nib t’uf ko yafas ko piyu Israel​—woldug, gapgep ni olive, nge wain​—nge boor e gamanman. Ngiyal’ ney ma pi thin ko profet nem e ke lebug u rogon nib spiritual. Ma pi’ Jehovah urngin e ggan nib spiritual nib t’uf rodad. Gathi gad ba falfalan’ ko pi n’en ni ma pi’ Got ngodad ni boor? Rriyul’ ni bod rogon ni yiiynag Malaki, ma ke bing e Got rodad ‘mban e tharmiy me puog nga daken[dad] e pi n’en nib fel’ nge pag e fol riy.’​—Malaki 3:10.

Ke Taw Nga Tungun Reb e M’ag

16. (a) Mang e ke tamilang u wan’uy ni bochan ni kan puog e kan ni thothup rok Jehovah ko ngiyal’ ney? (b) Mang e bay nga m’on rodad?

¹⁶ Tomren ni yiiynag Joel u morngaagen rarogon e girdi’ rok Got ni bod e paradis ma aram me weliy u morngaagen e kan ni thothup rok Jehovah ni yira puog. Nap’an Pentekost me weliy Peter u morngaagen e re thin ko profet ney me yog ni ke lebug u nap’an e “tin tomren e rran.” (Acts 2:17) Ngiyal’ nem ni ke puog Got e kan ni thothup rok nga daken e girdi’ rok e ke tamilangnag ni ke tabab e ngiyal’ ni tin tomren e rran ni fan ko piyu Jew. Ma ke puog Got e kan ni thothup rok nga daken fare Israel rok Got u nap’an e bin 20 e chibog ma aram e be dag ni gad bay ko tin tomren e rran ko re m’ag ney nib l’ag e fayleng ni polo’ ngay. Me ere mang e bay nga m’on rodad? Be weliy e thin ni yiiynag Joel ni gaar: “Bay gu tay e pow nga lan e lang nge nga daken e fayleng ni nge puguran ngak e girdi’ e re Rran nem. Ma bay un puog e racha’, ma bay yib e nifiy, ni manileng ni sum ko ath. Ma bayi talumor e yal’, ma bay pig ramaen e pul nge row ni bod e racha’ u m’on ndawori taw e re Rran rok [Jehovah] nem, ni reb e rran ni baga’ ma ba gel e gafgow nra fek i yib.”​—Joel 2:30, 31.

17, 18. (a) Mang rran ni baga’ e ke k’aring e marus ni aw nga daken yu Jerusalem? (b) Bochan ni kari mudugil nra yib e rran rok Jehovah nga m’on ma kan k’aringdad ngad rin’ed e mang?

¹⁷ Nap’an e 66 C.E., ma ke tabab ni nge riyul’ e pi thin ko profet ney u daken yu Judah ya ke bibiy iyan ko fare rran rok Jehovah u nap’an e duw ni 70 C.E. Rib gel e marus ko piin ni dar n’ufed fithingan Jehovah! Ngiyal’ ney ma boch ban’en ni ra k’aring e marus e bay nga m’on rodad, ya ra thang Jehovah e re m’ag ney. Machane rayog ni ngan chuw ko gafgow. Ya be ul’ul’ e thin ko profet ni gaar: “Machane urngin e piin ni yad ra wenig ngak [Jehovah] ni nge ayuwegrad e yad ra fos. Ni bod ni ke gaar [Jehovah], Ba’ boch e girdi’ u daken e burey ni Zion nge yu yang u Jerusalem ni bay ra thaygad. Piin ni ke mel’egrad [Jehovah] u fithik’ e girdi’ e yad ra fos.” (Joel 2:32) Pi Mich Rok Jehovah e ri yad ma pining e magar riy ni yad manang fithingan Jehovah, ma kar pagedan’rad ni ra ayuwegrad Jehovah u nap’an ni yad ra pining fithingan.

¹⁸ Machane mang e ra buch u nap’an ni ke taw fare rran rok Jehovah me pag e damumuw rok nga daken e fayleng? Aram e n’en ni ran weliy ko bin migid e thin.

Ka Ga Manang?

◻ Wuin e yay nsom’on ni ke puog Jehovah e kan ni thothup rok nga daken e girdi’ rok?

◻ Mang boch ban’en nib l’ag ngay ni ngan pining fithingan Jehovah?

◻ Wuin ni ke yib fare rran rok Jehovah nga daken yu Israel?

◻ Uw rogon ni ma flaabnag Jehovah e piin ni ma pining fithingan ko ngiyal’ ney?

[Sasing ko page 22]

Sum ba nam nib biech u nap’an e Pentekost 33 C.E.

[Sasing ko page 24]

Thingarni ayuweg e girdi’ ngar pininged fithingan Jehovah