Pufthin U Lan Fare Loway Ni Bay Ni Mahl Riy Nge Mudugil E Ba’ Ni Ke Gel
“Pi nam e . . . ngar bad nga lan e loway nu Jehoshafat; I gag Somol e bay gu par u rom nggu pufthinnag e pi nam.”—JOEL 3:12.
1. Mang fan ni guy Joel e girdi’ ni boor biyu’ i biyu’ u lan “fare loway ni bay ni mahl riy nge mudugil e ba’ ni ke gel”?
“BOOR i biyu’ i biyu’ e girdi’ ni bay u lan fare loway ni bay ni mahl riy nge mudugil e ba’ ni ke gel”! Aram e n’en ni be yog u Joel 3:14. Mang fan ni kan muulung u rom? Be pi’ Joel e fulweg ni gaar: “Dabki n’uw nap’an me taw fare Rran rok [Jehovah].” Aram e rofen ni ran nog e sorok ngak Jehovah—fa rofen ni ra pufthinnag e girdi’ ni kar togopuluwgad ko Gil’ilungun Got ni Jesus Kristus e ga’ riy. Ra taw ko ngiyal’ ni ra pag fa “aningeg i engel” ni bay ko Revelation guruy 7 fa “aningeg e nifeng nu fayleng,” ma aram me yib e “gafgow ni ri kab mal’af ni kab gel e gafgow riy nga reb e gafgow ni kaa yib, ni ka nap’an ni sum e fayleng nge mada’ ko bin daba’ e rran, fa ke yib reb e gafgow ntaareb rogon ngay.”—Revelation 7:1; Matthew 24:21.
2. (a) Mang fan ni kan nog “fare loway nu Jehoshafat” ko fa gin ni ra pi’ Jehovah e gechig riy? (b) Uw rogon ni ke ngongol Jehoshafat nrogon u nap’an ni kan pig i cham ngak?
2 U Joel 3:12, ma kan nog fithingan e gin’em ko pufthin ni “fare loway nu Jehoshafat.” Bpuluw e re n’em ya bay ba ngiyal’ ni ke pi’ Jehovah e pufthin u rom ni fan ko Jehoshafat ni Pilung ni ir be’ nib fel’ ma fan e ngochol rok e “Jehovah e ir fare Tapufthin.” Faan gad ra sul nga daken e pi n’en ni buch ko ngiyal’ nem ma ra ayuwegdad nge tamilang u wan’dad ko mang e ra buch ko ngiyal’ ney. Bay e re thin nem ko 2 Kronicles guruy ni 20. Verse 1 ko re guruy nem e be weliy ni “pi fak Moab nge pi fak Ammon nge boch e girdi’ nu Ammonim e kar bad ni ngar chamgad ngak Jehoshafat.” Mang e rin’ Jehoshafat? Ke rin’ e n’en ni ma rin’ urngin e pi tapigpig rok Jehovah ni yad ba yul’yul’ ko ngiyal’ ni bay e magawon. Ke ning e ayuw rok Jehovah, me meybil ni gaar: “O Got romad, gathi ngam pufthinnagrad ngam gechignagrad? Ya dariy gelngimad ni rayog ni nggu gelgad ko pi girdi’ ney ni yad boor ni kar bad nib togopuluw ngomad; ma gamad e dagu nanged e n’en ni nggu rin’ed, me ere gamad be sap ngom.”—2 Kronicles 20:12.
I Fulweg Jehovah Taban e Meybil
3. Mang e yog Jehovah ku Judah u nap’an ni ke yib e pi nam u charrad ni ngar chamgad ngorad?
3 Nap’an ni “be sak’iy urngin e girdi’ nu Judah u p’eowchen Jehovah, ni mus ko pi bitir rorad, nge pi ppin rorad, nge pi pagal ni fakrad,” ma ke pi’ Jehovah e fulweg ko re meybil nem. (2 Kronicles 20:13) Bod rogon ni ma rin’ u daken fare “tapigpig nib yul’yul’ mab gonop” ko ngiyal’ ney ma fa Ani ma Rung’ag e meybil e ke pi’ gelngin Jahaziel ni be’ nu Levi me ir e profet ni nge pi’ e fulweg ngak e piin ni kar muulunggad ngaram. (Matthew 24:45) Gad be poy ni be gaar: “Ereray e n’en ni yog Jehovah ngomed, ‘Dab mu rusgad ara mu tamdaggad ni bochan e pi girdi’ nem ni yad boor; ya aram e mahl ni gathi biromed e mahl, ya birok Got. . . . De t’uf ni ngam chamgad ko re mahl ney. Mu pared nib mudugil, ma gimed guy rogon nra ayuwegmed Jehovah. . . . Dab mu rusgad ma dab mu tamdaggad. Gabul ma gimed yan ngam mada’gad, ma Jehovah e ra ayuwegmed.’”—2 Kronicles 20:15-17.
4. Mang e ba t’uf ku Jehovah ni nge rin’ e girdi’ rok, ma gathi yigi yad ra par mi yad son, u nap’an ni ke togopuluw e pi toogor rorad ngorad?
4 Ba t’uf rok Jehovah ni nge rin’ Jehoshafat ni Pilung nge girdi’ rok ban’en ma gathi ke mus ni ngar pared nga but’ mi yad sonnag ni nge ngongliy e maang’ang me thapegrad. Ya thingara rin’ed ban’en ngak e pi toogor rorad ni kar togopuluwgad ngorad. Fare pilung nge ‘urngin e girdi’ nu Judah ni mus ko pi bitir rorad, nge pi ppin rorad, nge pi fakrad,’ e kar daged nib gel e michan’ rorad ya kakadabul ko bin migid e rran ma ranod ngar mada’naged e pi toogor rorad ni yad be bab i yib. Ma nap’an ni yad be yan ma ke pi’ fare pilung e athamgil nga lanin’rad ni gaar: “Nge michan’med ngak Jehovah ni Got romed ma aram e ra n’uw nap’an ni gimed ra par. Nge mich u wan’med ko pi profet rok ma aram me yib angin ngomed.” (2 Kronicles 20:20) Nge michan’uy ku Jehovah! Nge michan’uy ko pi profet rok! Aram e n’en nra yibnag angin. Ku arrogon e ngiyal’ ney ma nap’an ni gad ma ul’ul’ iyan ko pigpig ku Jehovah, ma dabda paged ni nge maruwaran’dad ni ra ayuwegdad Jehovah ni bochan ni ke michan’dad ngak!
5. Mang e be rin’ e Pi Mich Rok Jehovah ko ngiyal’ ney ni ngar pininged e sorok ku Jehovah?
5 Bod rogon piyu Judah u nap’an Jehoshafat, ma thingarda “pininged e sorok ku Jehovah, ya runguy rok e dabi m’ay biid.” Uw rogon ni gad ma un ko re n’ey? Nap’an ni gad ra pasig i machibnag Gil’ilungun Got! Piyu Judah e “ka ranod u fithik’ e falfalan’ mi yad pining e sorok ku Got,” maku aram rogodad ni gad ma puthuy e ngongol ko michan’ rodad. (2 Kronicles 20:21, 22) Arrogon, ngad daged nib gel e michan’ rodad u nap’an ni be n’en Jehovah ni nge rin’ ban’en ngak e pi toogor rok! Yugu aram rogon ni be m’ug riy nib n’uw e kanawo’ machane nge mudugilan’dad ni ngad athamgilgad, ma ngad pared ni gad be maruweliy e michan’ rodad, ni bod ni be rin’ e girdi’ rok u yu yang u fayleng nib gel e magawon riy ko ngiyal’ ney. U boch e binaw ma ba gel e togopuluw, nge cham, nge uyungol, nge magawon ko salpiy, machane be yib angin ngak e pi tapigpig rok Got ni yad ba yul’yul’ ni bod ni be weliy u lan fare babyor ni 1998 Yearbook of Jehovah’s Witnesses.
Ma Ayuweg Jehovah e Girdi’ Rok
6. Uw rogon ma michan’ nib gel e ra ayuwegdad ngad pared nib yul’yul’ ku Got ko ngiyal’ ney?
6 Pi nam u charen yu Judah e ur guyed rogon ni ngar gelgad ngak e girdi’ rok Got, machane ke michan’rad ku Jehovah me yin’ e pi tapigpig rok e tang ni be pining e sorok ngak. Rayog ni ngad daged e michan’ rodad ni aram rogon ko ngiyal’ ney. Faanra gad ra par ni gubin ngiyal’ ni gad be rin’ e pi n’en ni ra n’uf Jehovah ma gad be gelnag madan e salthaw rodad nib spiritual, ma dariy e gin ni nge kan talin e cham rok Satan ngay rodad. (Efesus 6:11) Michan’ nib gel e ra ayuwegdad ndabi waliydad e entertainment, nge chogowen e chugum, nge lem ko fayleng ni dariy fan urngin ban’en. Michan’ rodad nib gel e ra ayuwegdad nguud pigpiggad u taabang ko “fare tapigpig nib yul’yul’ mab gonop” ma nguud ked fare ggan nib spiritual ni yad be pi’ ko “ngiyal’ nib puluw.”—Matthew 24:45.
7. Mang e rin’ e Pi Mich Rok Jehovah u nap’an ni kan togopuluw ngorad?
7 Michan’ rodad ni bochan e Bible e ra gelnagdad ngad pared nib mudugil u nap’an ni ma fanenikaydad e girdi’ ni bochan ni ke k’aringrad e piin ni yad bod fare “tapigpig nib kireb” ni bay ko Matthew 24:48-51. Piin ni yad e apostate e yad be lebuguy e re thin ko profet ney ni ke mus rogodad riy ya yad be wereg e thin ni googsur u boor e binaw ko ngiyal’ ney mi yad be makath u taabang nga boch e tayugang ko am. Ma ngiyal’ nib puluw ma ke rin’ e Pi Mich Rok Jehovah ban’en ni nge pi’ e fulweg ngorad, ya arrogon ni be yog ko Filippi 1:7 ni be gaar ni ngan ‘ayuweg e thin nib fel’ min micheg nga laniyan’ e girdi’ u rogon nib legal.’ Bod rogon nap’an e September 26, 1996, ma bay e magawon u Greece, me yan e re case nem ko mereb e tapuf oloboch ko fare European Court of Human Rights, u Strasbourg, ma yad gubin e kar turguyed ni “Pi Mich Rok Jehovah e yad baraba’ i ‘teliw ni yima nang,’” me ere bay mat’awrad ni ngar liyorgad nib puf rogon e lem rorad nge nangan’ rorad, nge michan’ rorad, ma bay rogorad ni ngar wereged e thin ni ke michan’rad ngay. Ma ke pufthinnag Got e pi apostate ni gaar: “Ya n’en ni kar rin’ed e ke m’ug riy ni fare bugithin ni yima yog e ba riyul’ ni faani ke lunguy: ‘Pilis e ma sul ko n’en ni ke sul u l’ugun nga but’, ma ba babiy ni kan luknag downgin ke beech e ma sul nge yan i pig u fithik’ e bar.’”—2 Peter 2:22.
8. Nap’an Jehoshafat ma uw rogon ni ke pufthinnag Jehovah e pi toogor ko girdi’ Rok?
8 Nap’an Jehoshafat ma ke pufthinnag Jehovah e piin ni yad ba adag ni ngar kirebnaged e girdi’ Rok. Be weliy ni gaar: “Ke tay Jehovah e girdi’ ni ngar awgad nga daken pi fak Ammon, nge Moab nge pi girdi’ nu burey nu Seir ni kar bad nga Judah, ma ra bagayad ma ke li’ bagayad. Ma pi fak Ammon nge Moab e kar chamgad ngak e pi girdi’ ko pi burey nu Seir mi yad li’rad ngar m’ad; ma nap’an ni kar mu’gad i thang piyu Seir, mi yad li’ed yad ngar m’ad.” (2 Kronicles 20:22, 23) Piyu Judah e ur tunguyed fithingan e gin’em fare Loway nu Beracah, ni fan e re bugithin nem e “Flaab.” Ku arrogon e ngiyal’ ney ma ra yib e flaab ko girdi’ rok Jehovah u nap’an ni ra pufthinnag e pi toogor rok.
9, 10. Mini’ ko ngiyal’ ney e kar daged ni bay rogon rok Jehovah ni nge gechignagrad?
9 Sana gad ra fith ku Jehovah ko ra pufthinnag mini’ ko ngiyal’ ney min turguy ni ngan gechignagrad? Ra ngan nang e fulweg ko re deer nem ma ba t’uf ni ngad sulod ko thin ni yiiynag Joel. Joel 3:3 e be weliy u morngaagen e pi toogor ko girdi’ rok Got ni “kar pied nchuway’ e pagel nge rugod ni ngar manged sib ni fan e nga ni pi’ ngorad e ppin ni yad ma chuway’ ngorad nge wain.” Arrogon, yad be sap nga but’ ko pi tapigpig rok Got ma yad be lemnag ni bitir rorad e taab puluwon e ppin ni ma chuway’ ngak ara puluwon e wain. Yira fulweg taban e kireb rorad ko re n’em.
10 Kub puluw ni ngan pufthinnag e piin ni ma un ko ngongol ni darngal nib spiritual. (Revelation 17:3-6) Ma rib gel e kireb ko piin ni ma suwey laniyan’ e pi am ni ngar gafgownaged e Pi Mich Rok Jehovah mi yad togopuluw ko machib ni yad ma tay, ni bod ni rin’ boch e tayugang ko teliw u Eastern Europe ko ngiyal’ ney. Ke mudugilan’ Jehovah ni nge fulweg taban e kireb ko pi girdi’ nem.—Joel 3:4-8.
“Ngan Un ko Mahl nib Thothup!”
11. Uw rogon ni ke tagenging Jehovah ko pi toogor rok ngar mahlgad?
11 Migid, ma ma pining Jehovah e girdi’ rok ni ngar tagenginggad ko pi nam mi yad gaar: “Ngan un ko mahl nib thothup! Nge yib e pi pumoon nib gel gelngirad! Ngar chugurgad ngomad! Ngar bad ngaray, ni yad gubin e pi pumoon ni fan ko mahl!” (Joel 3:9) Pi thin nem e be weliy u morngaagen ba mit e mahl ni yugu ba reb rogon—mahl nib mat’aw. Pi Mich Rok Jehovah e ma fanay e talin e cham nib spiritual u nap’an ni yad be pi’ e fulweg ko thin ngoogsur ni yibe yog u morngaagrad, ma yad ma weliy e thin riyul’ ni ngan togopuluw ko thin googsur. (2 Korinth 10:4; Efesus 6:17) Dabki n’uw nap’an ma ra thothupnag Got “fare mahl ni fan ko fare rran ni baga’ fan, ni rran rok Got ni Gubin ma Rayog Rok.” (Revelation 16:14) Ra chuweg urngin e piin ni ma togopuluw ko gagiyeg rok Got. Girdi’ rok u fayleng e dabra uned ngay. Ya goo kar ‘pirdiiyed e pi sayden rorad kar ngongliyed talin e maruwel riy ni ma gi’ e but’, mi yad yodoromnag e pi sarey rorad nge mang yar ni yima th’ab papa’ngin e woldug ngay.’ (Isaiah 2:4) Ma ke yog Jehovah ban’en nib math’ keru’ ko re n’em ko pi nam ni yad be togopuluw ngak ni gaar: “Wasey ni gimed ma gi’ e but’ ngay e ngam pirdiiyed ngam ngongliyed ni sayden, ma yar romed ni gimed ma th’ab pa’ngin e gek’iy ngay ni fan e nge yoor wom’engin e ngam pirdiiyed ngam ngongliyed ni sarey.” (Joel 3:10) Be yog ngorad ni ngar fanayed urngin e talin e cham rorad ni fan ko re mahl nem. Machane dabiyog ni ngar gelgad ya Jehovah e ra gel!
12, 13. (a) Yugu aram rogon ni ke m’ay fare Cold War, ma uw rogon e pi nam ma yad be dag ni ka yad ba adag e cham? (b) Pi nam e dar fl’eged rogorad ko mang?
12 Nap’an e 1990, ma ke yog e pi nam ni ke m’ay fare Cold War. Ma aram me thap fare United Nations ko n’en ni kar nameged ni aram e nge yog e gapas nge pagan’ ko girdi’ fa? Ri danga’! Ya mang e be dag e pi n’en ni buch u Burundi, nge fare Democratic Republic of Congo, nge Iraq, nge Liberia, nge Rwanda, nge Somalia, nge fare binaw ni ka nog yu Yugoslavia ngay faram? Bod rogon ni be yog u Jeremiah 6:14, ma yad be gaar: “‘Bay e gapas! Bay e gapas!’ Machane dairy e gapas.”
13 Yugu aram rogon ni ke tal e mahl u yu yang, machane ka be cham e pi nam ko fare UN ma yad be tagenging ko urngin e talin e mahl ni yad be ngongliy. Boch e nam e ke yoor e talin e mahl ni nuclear ni yad be chaariy. Ma boch e nam e be ngongliy e talin e cham ni chemical ara bacteriological ni rayog ni nge li’ boor e girdi’ taab yay. Yibe kunuy e pi nam nem u taabang ko fa gi n’en ni kan pining Armageddon ngay ni be yip’ fan ban’en, ma ke tagenging Got ngorad ni gaar: “Mus ngak e piin ni yad mmeewar nthingar ra uned ko cham. Mu gurgad ngam bad, gimed urngin e pi nam ni gimed ba liyeg yu Israel, mmuulunggad nga lan fare loway.” Ma arm me yog Joel ni gaar: “O [Jehovah], mfek i yib fare raba’ i salthaw rom nib gel.”—Joel 3:10, 11.
Ma Ayuweg Jehovah e Tirok e Girdi’
14. Mini’ e pi salthaw rok Jehovah nib gel?
14 Mini’ ni yad e pi salthaw rok Jehovah nib gel? Gonapan 280 yay u lan e Bible ma kan nog ngak fa bin riyul’ e Got ni ir “Jehovah ko pi salthaw.” (2 Kings 3:14) Pi salthaw ney e yad e pi engel nu tharmiy ni kar fl’eged rogorad ni ngar rin’ed e n’en ni yog Jehovah ngorad. Nap’an ni yib yu Syria mar guyed rogon ni ngar koled Elisa, me pithig Jehovah owchen fare tapigpig rok Elisa ma aram me guy ko mang fan ni dabiyog ni ngar gelgad ngak: “Msap! fare burey e ba sug ko os nge karrow nnifiy nib liyeg e gin’en ni bay Elisa riy.” (2 Kings 6:17) Yog Jesus ni rayog ni nge ning ko Chitamangin ni nge ayuweg nge l’og “e engel ngar bad nib pag ragag nge l’agruw ulung.” (Matthew 26:53) Be weliy ko Revelation u morngaagen e ngiyal’ nra yan Jesus u daken e os ni nge pi’ e gechig u nap’an Armageddon ni gaar: “Ma salthaw nu tharmiy e yad be lek keru’ ni kar afgad nga daken e os nib wechwech ni ka ron’ed e mad nib biech ma ba wechwech. Me yib ba sayden u lan l’ugun nib m’uth, ni ir e nge maruwel ngay nge gel ngak e pi nam. Bay mang ir e i gagiyegnagrad nga ba ley i wasey, ma bayi uduy e grapes u lan fare n’en ni ma uduy e grapes u lan, ni aram e damumuw rok Got ni Gubin ma Rayog Rok.” (Revelation 19:14, 15) Fare n’en ni ma uduy e grapes u lan ni be yip’ fan ban’en e yibe weliy u morngaagen ni aram e “damumuw rok Got nib gel.”—Revelation 14:17-20.
15. Uw rogon ni weliy Joel u morngaagen e mahl nra tay Jehovah ngak e pi nam?
15 Ere uw rogon ni ma fulweg Jehovah taban e meybil ku Joel ni nge pi’ e tirok e salthaw ngar bad? Be weliy ni aray rogon ni gaar: “Pi nam e thingar ra fal’eged rogorad ngar bad nga lan e loway nu Jehoshafat; I gag Somol e bay gu par u rom nggu pufthinnag e pi nam nib liyeg yu Israel. Ri yad ba kireb; mu th’abedrad nga but’ ni bod e grain ko ngiyal’ ni ke taw nga nap’an ni ngan th’ab u daken e milay’ ngan tay nga naun; mu pirdiiyed yad ni bod rogon e grapes nnin’ nga lan fare n’em ni ma uduy e grapes nge sug nge mu’ min uduy nge yib e wain i map’ u daken marichlen nga but’. Boor i biyu’ i biyu’ e bay u lan fare loway ni bay ni mahl riy nge mudugil e ba’ ni ke gel. Ereram e re gin’en ndab ki n’uw nap’an me taw fare Rran rok [Jehovah] ngay. Yal’ nge pul e bayi par ni ke talumor, ma dab ku ni guy ramaen e t’uf. [Jehovah] e bayi yan laman ni baga’ u daken e burey ni Zion; bay yan lungun u Jerusalem ni bod lingan e dirra’; me rur e but’ nge lan e lang.”—Joel 3:12-16.
16. Ku mini’ e ra un ko piin nra gechignag Jehovah?
16 Rib mutrug ni “Jehovah e ir e Tapufthin” ya aram fan fare ngochol ni Jehoshafat maku rib mutrug ni ra tamilangnag Jehovah Got ni bay mat’awun ni nge gagiyeg u nap’an ni ra pi’ e gechig. Fare thin ko profet e be weliy u morngaagen e piin ni ran gechignag ni yad ‘boor i biyu’ i biyu’’ ni yad ‘bay u lan fare loway ni bay ni mahl riy nge mudugil e ba’ ni ke gel.’ Piin ni be un ko pi yuraba’ i teliw ni googsur e yad bang ko pi girdi’ nem. Kub muun ngay e piin ni be weliy e bin l’agruw e Psalm u morngaagen ni—pi nam, nge girdien e pi nam, nge pi pilung nu fayleng, nge pi tayugang—ni yad e piin ni ba adag e re m’ag nib kireb ney ko bin ni ngan ‘pigpig ku Jehovah u fithik’ e marus.’ Dar adaged ni ngar “farayed owchen e en ni fak.” (Psalm 2:1, 2, 11, 12, NW.) Ma dar rogned ni Jesus e ir e Pilung ni dugliy Jehovah. Pi girdi’ ni pire’ ni ran thangrad e ba muun ngay urngin e girdi’ ni ke turguy fare Pilung ni yad e “kaming.” (Matthew 25:33, 41) Nap’an ni ke taw ko ngiyal’ ni ra yan laman Jehovah nib baga’ u Jerusalem u tharmiy, ma fare Pilung ni ke dugliy ni ir e Pilung ko pi pilung e ra yan nga daken e os ni nge pi’ e gechig. Ra rur e tharmiy nge fayleng! Machane kan pi’ e athamgil nga lanin’dad ko pi thin ney ni gaar: “Bayi yoror [Jehovah] rok girdien, ma ra manab piyu Israel ngak.”—Joel 3:16.
17, 18. Mini’ e ra magay nib fas ko fare gafgow ni baga’, ma mang boch e falfalan’ ni yad ra un ngay?
17 Be yog u Revelation 7:9-17 ni piin nra magay nib fas ko fare gafgow ni baga’ e yad ba “ulung ni baga’” ni yad e piin ni ke michan’rad ko falngin rachaen Jesus ni ke biyuliydad ngay. Ran ayuweg e pi girdi’ ney u nap’an e rran rok Jehovah, ma boor i biyu’ i biyu’ i girdi’ e ra un ko gechig ni ke yiiynag Joel u morngaagen. Be yog u Joel ngak e piin nra magay nib fas ni gaar: “Gimed piyu Israel, e aram e bay mu nanged ni gag [Jehovah] ni Got romed. Gu be par u Zion u daken e burey rog nib thothup,” ni aram tagil’ Jehovah u tharmiy.—Joel 3:17a.
18 Ni migid ma be weliy e re thin ko profet nem ni tagil’ e Gagiyeg rok Got u tharmiy e “bayi par nib thothup; ma girdi’ nu bang e dabkiyog ni ngar koled yu Jerusalem biyay.” (Joel 3:17b) Dabki moy e girdi’ nu bang u tharmiy ngu fayleng ko gin nsuwon e re Gagiyeg nem nu tharmiy, ya yad gubin e yad ra un ko liyor nib machalbog u taabang.
19. Uw rogon ni weliy Joel u morngaagen e falfalan’ ko girdi’ rok Got ko ngiyal’ ney ni gowa yad bay u paradis?
19 Mus ko ngiyal’ ney ma bay e gapas u fithik’ e girdi’ rok Jehovah u roy u fayleng. Yad be wereg e thin ko pufthin rok u boor ko 230 e binaw ma boor ko 300 mit e thin. I yiiynag Joel u morngaagen e par rorad nib fel’ rogon ni gaar: “Yungi milay’ ni grapes e bayi peth u daken e pi burey e re ngiyal’ i n’em; ma gubin yang e flang ni bay ni pirieg e garbaw riy; ma re ngiyal’ i n’em e bay e ran ni pire’ nra gaman yu Judah riy ni polo’.” (Joel 3:18) Arrogon, ra ul’ul’ Jehovah iyan ni nge puog nga daken e piin ni ma pining e sorok ngak e flaab nge fel’ rogon nge thin riyul’. Ma aram e ran tamilangnag mat’awun Jehovah ni nge gagiyeg u lan fare loway ni bay ni mahl riy nge mudugil e ba’ ni ke gel, ma ra yoor e falfalan’ u nap’an ni be gagiyegnag e girdi’ rok ni yad e piin ni kan biyuliyrad.—Revelation 21:3, 4.
Ka Ga Manang?
◻ Uw rogon ni ke ayuweg Jehovah e girdi’ rok u nap’an Jehoshafat?
◻ Mini’ e ke turguy Jehovah ni bay rogon ni ngan gechignag u lan fare “loway ni bay ni mahl riy nge mudugil e ba’ ni ke gel”?
◻ Mini’ e yad e pi salthaw rok Got ni yad ba gel ma mang e yad ra rin’ u nap’an e bin tomur e cham?
◻ Mang falfalan’ ni ra un e piin ni ma liyor ku Got ngay?
[Sasing ko page 27]
Ka nog ngak Judah ni gaar: ‘Dab mu rusgad ya aram e mahl ni gathi biromed e mahl, ya birok Got
[Sasing ko page 29]
I tagenging Jehovah ko pi toogor rok ni ‘Wasey ni gimed ma gi’ e but’ ngay e ngam pirdiiyed ngam ngongliyed ni sayden’
[Sasing ko page 30]
Be weliy e Bible u morngaagen ba ulung ni baga’ ni yad e piin nra magay nib fas u fithik’ fare gafgow ni baga’