Mu Filed Ban’en Rok e Pi Profet​—Joel

1. Uw rogon ni ngad sobut’niged lanin’dad ni bod Joel u nap’an ni gad be machib?

¹ Mini’ fare profet ni Joel fithingan? Kemus ni yimanang ni ir “be’ nib moon ni fak Pethuel.” (Joel 1:1) Re profet ney nib sobut’ laniyan’ e tamilangnag fan e thin ni yog Jehovah, ma gathi liw rok nib tamol’og. Ere, ku arrogodad e ngiyal’ ney, ni gathi gad be guy rogon ni nga nog e sorok ngodad, ya gad be guy rogon ni ngan pining e sorok ngak Jehovah nge thin rok u Bible u nap’an ni gad be machib. (1 Kor. 9:16; 2 Kor. 3:5) Fare thin rok Got ni gad ma machibnag e ku rayog ni nge pi’ gelngidad. Mang e n’en ni bay ko fare yiiy rok Joel nrayog ni nge ayuwegdad ni ngad pasiggad, me yag e athap ngodad e ngiyal’ ney?

2. Bochan ni ke chugur fare rran rok Jehovah, ma mang e ra k’aringdad ni ngad rin’ed?

² “Birok Somol e Rran e Ke Chugur.” (Joel 1:15): Yugu aram rogon ni kan yoloy e pi thin ney bokum biyu’ e duw kafram, ma ngiyal’ ney e gad be par u ba ngiyal’ ni ke chugur ni nge lebug e pi n’ey. Tin nib kireb ni buch e ngiyal’ ney nge girdi’ ni yad ma darifannag e machib rodad, ma yad ma moningnagdad e be tamilangnag ni gad bay u tungun e re m’ag ney nib kireb. (2 Tim. 3:1-5; 2 Pet. 3:3, 4) Gad ra lemnag feni rib chugur tomuren e re m’ag ney, ma bay fan ni ngad m’oneged fare maruwel ni machib u wan’dad.​—2 Pet. 3:11, 12.

3. Mang nrib ga’ fan e machib ni gad be tay e ngiyal’ ney ni ke chugur fare gafgow nib ga’?

³ “Bayi Yoror Somol rok Girdien.” (Joel 3:16): Bay bang ko re verse ney ni be gaar, me rur e but’, ma re n’ey e be yip’ fan e gechig nra tay Jehovah u nap’an fare gafgow nib ga’. Ra fel’ lanin’dad ya gad manang nra ayuweg Jehovah e pi tapigpig rok ni yad ba yul’yul’ e ngiyal’ nem. (Rev. 7:9, 14) Nap’an ni gad ra un ko machib ma gad ra guy rogon nra ayuwegdad Jehovah, ma gad ra maruwel ni nge gel e michan’ rodad ma rayog ni ngad k’adan’gad nra ayuwegdad u nap’an fare gafgow nib ga’.

4. Mang fan ni ngad felfelan’gad, ma nge pagan’dad ko pi n’en ni bay nga m’on?

⁴ Yugu aram rogon ni boor e girdi’ e yad ma lemnag ni pi thin ni ke yiiynag Joel e ke k’aring e kireban’, machane be pi’ e athap ngak e tirok Got e girdi’ ni yira chuwegrad u fithik’ e gafgow. (Joel 2:32) Ere, ngad sapgad ko pi n’en ni bay nga m’on u fithik’ e pagan’, ma gad machibnag murung’agen Gil’ilungun Got u fithik’ e pasig, ma ngad lemnaged fare thin ni bay ko Joel 2:23 ni be gaar: “Mu felfelan’gad ni bochan e tin ni ke rin’ Somol ni Got romed ngomed.”