Ke Chugur Ko Rran Rok Jehovah

“Mu telmed e piin ni piilal, mu telmed urngin e girdi’ ni be par u lan e binaw.”​—JOEL 1:2, New World Translation.

1, 2. Uw rogon yu Judah ma aram fan ni i thagthagnag Jehovah nga laniyan’ Joel ni nge yiiynag boch e thin?

“BIROK Jehovah e rran e ke chugur; Faanem ni Gubin ma Rayog Rok e bayi pi’ e kireb nge yib e rofen nem!” Rib baga’ fan e pi thin nem! Aram e thin ni yog Got ko girdi’ rok u daken Joel ni profet.

² Pi thin nem ni bay ko Joel 1:15 e kan yoloy u Judah, ni gonapan 820 B.C.E. Ngiyal’ nem ma immoy boor e hills ni ke ing e woldug nib galunglung. Ma boor wom’engin nge woldug ni bod e wheat. Ma baga’ yang e yu gin ni nge kay e gamanman e pan riy nib galunglung. Machane bay ban’en nib kireb ni be buch. Ya ke gel e liyor ku Baal u Jerusalem nu lan e binaw nu Judah. Ma ke un e girdi’ ko chingaw nge ngongol nib puwlag u p’eowchen e re got ngoogsur ney. (Mu taarebnag ko 2 Kronicles 21:4-6, 11.) Ra pag Jehovah ni nge ulul iyan e pi n’ey fa?

3. Mang e ke ginang Jehovah, ma pi nam e susun ni ngar fl’eged rogorad ko mang?

³ Rib tamilang e fulweg ko re deer nem u lan e babyor ni Joel ni bay ko Bible. Ya ra tamilangnag Jehovah Got ni bay mat’awun ni nge gagiyeg ma ra thothupnag e ngochol rok. Ke chugur ko rran rok Jehovah. Ma aram e ngiyal’ nra gechignag Got urngin e nam u lan “fare loway nu Jehoshafat.” (Joel 3:12) Ke pag ni ngar fl’eged rogorad ni fan ni ngar chamgad Jehovah ni An Th’abi Ga’. Ku arrogodad ni bay e rran rok Jehovah nga m’on rodad. Ere ngada yaliyed e thin ni yiiynag Joel ni fan ko ngiyal’ ney nge boch nga m’on.

Pi Gamanman e Ra Tharey e Binaw

4. Uw fene gel fare n’en ni ke ginang Joel u morngaagen?

⁴ I yog Jehovah u daken e profet rok ni gaar: “Mu telmed e piin ni piilal, mu telmed urngin e girdi’ u lan fare binaw. Mogned, kaa m’ug ban’en ni ara’ rogon ko biromed e tayim, ara birok e chitamangimed e tayim? Mogned murung’agen ngak pi fakmed; mi yad yog ngak pi fakrad, me yog pi fakrad ngak pi fakrad.” (Joel 1:2, 3) Pi piilal nge urngin e girdi’ e ra guy ban’en nda kaa buch ko ngiyal’ nem ara ngiyal’ nap’an e pi chitamangirad. Aram ban’en ni ri yira ngat ngay me ere ra weliy e girdi’ ngak pi fakrad, me yog pi fakrad ngak pi fakrad! Ma mang e re n’em nra buch nib lingagil? Ngad guyed, ma ngad lemnaged ni gad bay ko ngiyal’ u nap’an Joel.

5, 6. (a) Mu weliy ko uw rogon fare gafgow ni i yiiynag Joel u morngaagen. (b) Mini’ Tapgin e re gafgow nem?

⁵ Mmotoyil! Ke rung’ag Joel ban’en nib mal’af ni ke tolul. Ke talumor lan e lang, ma ke ga’ lingan e re n’em iyan me gel e talumor u lan e lang. Ma aram me yib e manileng ni bod e ath. Aram ba ulung i gamanman ni yad bokum milyon. Ma rib gel e magothgoth ni yad ma ta’! Mu lemnag e thin ko Joel 1:4. Pi gamanman nem ni kar bad e gathi ke mus ni pi asmen’ing ni bay po’rad. Danga’! Ya ku be yib bokum i bokum i asmen’ing ni dariy po’rad ni yad be yim’ ko bilig. Kar bad u daken e nifeng, mi yad yib nib tomgin, ma linganrad e bod e pi karro ni ma girngiy e os. (Joel 2:5) Ri boor ban’en nrayog ni ngar ked, me ere dabki n’uw nap’an ma bokum milyon i yad e rayog ni nge pingeg bang ni bod e paradis nge mang bangi ted nder tugul ban’en riy.

⁶ Ku bay e pi garamamam ni be yib i yib​—ni munmun ma yad ra ngal’ ngar manged e moth nge burag. Bokum e pi garmammam ney ni ke yib e bilig ngorad e rayog ni ngar ked bokum i bokum yuwan e woldug ni reb nge reb nge mada’ ko ngiyal’ ndakuriy ban’en nib galunglung raen ni ka bay ko woldug. Ma tin ni ke magay, e ra kay e asemn’ing. Ma tin ni ka bay e ra kay e alaw ni yad ma yan nib machreg mi yad kay urngin ban’en ni ka bay. Machane mu tiyan’um ko biney: U Joel guruy ni 2, ko verse 11, ma ke tamilangnag Got ni re ulung i asemn’ing ney e yad e “pi salthaw rok.” Arrogon, ir Tapgin fare gafgow ko asemn’ing ni ke yib i tharey e binaw me sum e uyungol riy. Wuin? U m’on ni ra yib “fare rran rok Jehovah.”

“Mu Odgad, Gimed e Pi Tachingnag”!

7. (a) Uw rogon e pi tayugang ko teliw nu Judah? (b) Uw rogon nib taareb rogon e pi tayugang ko teliw nu Kristendom e ngiyal’ ney ko pi tayugang ko teliw nu Judah?

⁷ Kan tamilangnag e kireb ko pi tayugang ko teliw nu Judah u nap’an ni kan gaar: “Mu odgad ngam yorgad, gimed e pi tachingnag; mu yorgad, gimed e pi tamuun wain nir; fapi grapes ni ngan ngongliy e wain nib beech riy e kan kirebnag.” (Joel 1:5) Arrogon, pi tachingnag nib spiritual nu Judah e kan nog ni ngar “odgad” ara dabkur pared ni yad ba ching. Machane dab mu lemnag ni re n’ey e ke mus ni ma sor fan ko n’en ni buch kakrom. Ya chiney ni ngiyal’ u m’on ko rran rok Jehovah ma pi tayugang ko Kristendom e ba dake yad ba sug ko wain nib biech ni aram e dar nanged fan e re n’ey ni be yog e Ani Ga’ ngorad. Yad be par nib ching u rogon nib spiritual me ere yad ra gin ngay u nap’an ni ran pugrad u nap’an fare rran rok Jehovah ni rran ni baga’ ma ra k’aring e marus!

8, 9. (a) Mang e weliy Joel u morngaagen e pi asemn’ing nge gafgow ni yad ma tay? (b) Ngiyal’ ney ma mini’ e be yip’ fan e pi asemn’ing?

⁸ Msap ko pi asemn’ing ni bod ba ulung i salthaw! “Asemn’ing ni pire’ ni pire’ e kar kirebniged e nam rodad; yad ba gel ma dabiyog i theegrad; nguwelrad e bod feni m’uth nguwelen e layon. Kar kirebniged e yu ke grapes rodad ma kar longuyed e yu ke gek’iy rodad ni fig. Kar fathiyed keru’ ni gubin, ke par papa’ngin ni ke wech. Mu yorgad, ni bod be’ ni ppin ni be yornag be’ nib moon ni dugil ni ngar mabgolgow me yim’ fare moon.”​—Joel 1:6-8.

⁹ Pi thin ko profet ney e ke mus ni ma sor fan ko “ba nam” i asemn’ing, ni yad ra yib nga Judah mar kirebnaged e binaw fa? Danga’, bay boor ban’en nib l’ag ngay. Ya Joel 1:6 nge Revelation 9:7, e be weliy u morngaagen e girdi’ rok Got ni yad bod e asemn’ing. Ere fare ulung i asemn’ing ni bod e salthaw e aram e pi asemn’ing rok Jehovah ni kan dugliyrad, ma chiney ma bay 5,600,000 e girdi’ ni yad “yugu boch e saf” rok Jesus ni kar uned ngorad. (John 10:16) Gathi gab falfalan’ ni gab bang ko re ulung ney ko piin ni ma liyor ku Jehovah fa?

10. Mang wenegan ni yib ngak yu Judah ni bochan e pi asemn’ing?

¹⁰ U Joel 1:9-12, ma gad be bieg u morngaagen wenegan ni yib ko pi asemn’ing ni kar bad nga daken e binaw. Ke yib reb e ulung nge reb mar gatheyed e binaw. Ere pi prist ndar yul’yul’gad e dabiyog ni ngar rin’ed e maruwel rorad ya dariy e woldug ni bod e wheat, maku dariy e wain, nge gapgep. Mus ni but’ e bod ni ke yor, ya dariy e woldug nge gek’iy ni bay wom’engin ni be tugul u daken. Ma ke kireb urngin e gek’iy ni grapes, me ere dakuriy e wain ni fan ko piin ni ta muun wain ni yad ma liyor ku Baal ni ku yad e ta chingnag nib spiritual.

“Mu Pirdiiyed Ngorongormed, Gimed e Pi Prist”

11, 12. (a) Mini’ e ma yog ni yad e pi prist rok Got ko ngiyal’ ney? (b) Uw rogon ni be gafgownag e pi asemn’ing e pi tayugang ko teliw nu Kristendom ko ngiyal’ ney?

¹¹ Motoyil ko n’en ni yog Got ngak e pi prist ndar pared nib yal’uw ni gaar: “Gimed e pi prist ni gimed ma pi’ fapi maligach u daken e altar rok Somol e nga mon’ed nga dakenmed madan e dolo’loy mi gimed yor, marod nga lan e tempel ngam pired u rom reb e nep’ ni kam chuwgad nga madan e dolo’loy.” (Joel 1:13) Yay nsom’on ni ke lebug e thin ni yiiynag Joel ma bay e pi prist nu Levi ni be pigpig ko fare altar. Ma uw rogon e bin migid yay nra lebug? Ngiyal’ ney ma pi tayugang ko Kristendom e kar feked mat’awun ni ngan pigpig ko altar rok Got, mi yad yog ni yad e pi tapigpig rok, ni yad e “pi prist.” Machane, mang e be buch e chiney ni bochan ni be yan e pi asemn’ing rok Got?

¹² Nap’an ni guy e “pi prist” nu Kristendom e girdi’ rok Jehovah ni yad be maruwel mi yad rung’ag e thin ni yad ma yog ni be ginang e girdi’ ko pufthin rok Got, ma aram me magafan’rad. Yad be pirdiiy ngorongorrad ya ke kankanan’rad ma kar damumuwgad ya be kirebnagrad fare thin ko Gil’ilungun Got. Ma yad ma dolo’loy ya girdi’ ko teliw rorad e be chuw rorad. Be lich iyan yu ran’ i saf rorad me ere yad ra par nnep’ ni kar chuwgad nga madan e dolo’loy, mi yad yor ni bochan ni be buch uw e salpiy ni yibe pi’ ngorad. Dabki n’uw nap’an ma dakuriy e maruwel ko prist! Ma rriyul’ ni be yog Got ngorad ni ngar dolo’loygad u reb e nep’ ni polo’ ya ke chugur ko ngiyal’ nran thangrad.

13. Ra fol yu Kristendom ko n’en ni ginang Jehovah fa?

¹³ Rogon ni yog Joel 1:14, ma kari mus ni n’en nra ayuwegrad e faanra yad ra kalngan’rad mi yad wenig ngak “Jehovah ni nge ayuwegrad.” Bpuluw ni ngad lemnaged ni urngin e pi tayugang ko Kristendom e ra yib ngak Jehovah? Ri danga’! Boch i yad e ra fol ko n’en ni ginang Jehovah. Machane ka ra par e pi tayugang ko teliw nge girdi’ rorad ni yad ba uyungol ko tirok Got ban’en. I yiiynag Amos ni profet ni gaar: “‘Ba’ ba ngiyal’ ni be yib ni bay gu pi’ e uyungol nge yib nga daken e re nam ney. Bay yib e bilig ngak e girdi’, machane gathi fan ko ggan; ma bay yib e belel ngorad, machane gathi fan ko ran. Bay ra m’ad ni bochan bbugithin ni nge yib rok [Jehovah] ngorad ni bod be’ ni yib e bilig ngak nib gel nge yim’ ni bochan e ggan. I gag [Jehovah] e ku gog e pi thin ney.” (Amos 8:11) Ma ri gad ma pining e magar ni bochan e ggan nib spiritual ni be pi’ Got ngodad u daken “fare tapigpig nib yul’yul’ mab gonop” rok!​—Matthew 24:45-47.

14. Mang e ra yib u tomren fare gafgow ko pi asemn’ing?

¹⁴ Fare gafgow ko asemn’ing e be sor fan nga ban’en. Mang? Be weliy Joel nib tamilang ni gaar: “Birok [Jehovah] e rran e ke chugur; faanem ni Gubin ma Rayog Rok e bayi pi’ e kireb nge yib e rofen nem. Rib gel e gafgow ni bayi fek e re rran nem i yib!” (Joel 1:15) Fare ulung i asemn’ing rok Got ko ngiyal’ ney e be yan nga gubin yang u fayleng ma aram e be tamilangnag ni kari chugur ko rran rok Jehovah. Dabi siy ni urngin e piin nib mat’aw gum’ercha’rad e yad ba adag ni nge yib e rorran nem ya ra gechignag Got e piin nib kireb ma ra gel Jehovah ni ir e An Th’abi Ga’ u Palpal Th’ib.

15. Mang e rin’ e piin ni ma fol ko n’en ni ginang Got ya yad be guy e gafgow u lan e binaw?

¹⁵ Be weliy u Joel 1:16-20 ni ke buch uw e ggan u Judah kakrom. Ku arrogon e falfalan’. Pi naun ni tafen e ggan e dakuriy ban’en riy, ma kan buthug e pi naun ni barn. Garbaw e yugu be yan yan ma ke yim’ e saf ni bochan ni ke kay e asemn’ing urngin e woldug ma dakuriy e pan ni ngar ked. Rib gel e gafgow! Ma mang e ke buch ku Joel u fithik’ e re magawon nem? Rogon ni yog ko verse 19, ma ke gaar: “[Jehovah], kug pag lamag nga lang kug yor ngom.” Ku arrogon e ngiyal’ ney ma boor e girdi’ e ma fol ko n’en ni ginang Jehovah Got mi yad pining ni nge ayuwegrad u fithik’ e michan’uy.

“Birok Jehovah e Rran e Ke Chugur ni Nge Taw”

16. Mang fan ni susun ni nge t’on e girdi’ ko marus “u lan e binaw”?

¹⁶ Mmotoyil ko n’en ni tay Got chilen: “Yu Zion ni er fare burey nib thothup, ni burey rok Got, e ngam thoyed e yabul riy ngan rung’ag min fal’eg rogoy. Girdi’ u lan e binaw ni urngin e susun e ngar t’ongad ko marus.” (Joel 2:1) Mang fan ni ngan ngongol ni aram rogon? Re thin ko profet nem e be pi’ e fulweg ni gaar: “Ya birok [Jehovah] e Rran e ke chugur ni nge taw! Ra yan i aw nde fel’ lan e lang ma der m’ug ramaen e yal’ e chirofen nem, ma ba talumor ni ba lumolang e chirofen nem ni bod e lumor ni ke upunguy e burey.” (Joel 2:1, 2) Rran rok Jehovah e ba l’ag ko lem ni ngan rin’ ban’en nib pay.

17. Uw rogon e binaw nge girdi’ nu Judah ni bochan e gafgow ni pi’ e pi asemn’ing?

¹⁷ Mu lemnag rogon fene gel ni yira gin ngay ko n’en ni guy fare profet u nap’an ni pig e changar rok me guy e pi asemn’ing ni kar bad nga bang ni bod yaan e milay’ nu Eden mar kirebnaged me mang bangi ted nder tugul ban’en riy. Mmotoyil ko n’en ni kan weliy u morngaagen fare ulung i asemn’ing: “Yad bod yaan e os; yad be mil ni bod rogon e os ni ma un ko mahl. Yad be tim’og u daken e burey i yan, ni bod lingan e karrow ni pire’ ni be girngiy e os ara bod lingan e pan nib melik’ ni aw e nifiy ngay. Kar k’afgad ni bod baraba’ i salthaw ni pire’ ni pire’ ni kar fal’eged rogorad ni nga ranod ko mahl. Nap’an ni yad ra chugur i yib ma urngin e girdi’ ni bay ra m’ad ko marus, ma urngin e owchef ni bayi pig nge par ni ke magafan’rad.” (Joel 2:4-6) Nap’an ni yib e pi asemn’ing u nap’an Joel ma ke gel e damumuw rok e piin ni ma liyor ku Baal, ma rayog ni ngan guy owcherad ni ke pig nge par ni ke magafan’rad.

18, 19. Uw rogon ma pi n’en ni ma rin’ e girdi’ rok Got ko ngiyal’ ney e bod e gafgow ko pi asemn’ing?

¹⁸ Fapi asemn’ing e yad ba yaram ma dar magargad ma dariy ban’en nrayog ni nge talegrad. Ur ranod ni yad be mil ni bod e “pi pumoon nib gel” ma ur gararawgad nga daken e yoror. Ma ‘n’en ni kan tay ni nge magawon ngorad e dabiyog ni nge talegrad.’ (Joel 2:7, 8) Rib tamilang e re thin nem ni be yaannag e n’en ni be yip’ fan e pi asemn’ing rok Got ko ngiyal’ ney! Ku arrogon e ngiyal’ ney ma fare ulung i salthaw ko asemn’ing rok Jehovah e yad be yan nga m’on ndarur talgad. Dariy reb e “yoror” ko togopuluw nrayog ni nge talegrad. Ma yad be par nib yul’yul’ ku Got u fithik’ e skeng me m’agan’rad ngay ni ngar m’ad ni bochan, ni bod fa bokum biyu’ e Pi Mich ni ‘kar m’ad’ ni bochan e dar siro’gad ku Hitler u nap’an e gagiyeg ko yu Nazi u Germany.

¹⁹ Pi salthaw rok Got ko ngiyal’ ney ni yad bod e asemn’ing e kar machibgad nga lan “fare mach” nu Kristendom. (Joel 2:9) Kar rin’ed u gangin e fayleng. Ma ka yad be gararaw nga daken urngin e magawon, mi yad yan nga lan bokum milyon e tabinaw, mar nonad e girdi’ u kanawo’, ma yad be non ko girdi’ ko telefon, ma yad be guy rogon ni ngar mada’naged e girdi’ u rogon nrayog ni fan ni ngar wereged e thin rok Jehovah. Ma kar wereged bokum bilyon e babyor ni bay e thin ko Bible riy maku boor ni yad ra wereg ko machib ni yad ma tay​—u fithik’ e yoor ngu mit e tabinaw iyan.​—Acts 20:20, 21.

20. Mini’ e be ayuweg e pi asemn’ing ko ngiyal’ ney, ma mang wenegan ni yib riy?

²⁰ Joel 2:10 e be dag ni ba ulung i asemn’ing ni baga’ e bod ba manileng ni rayog ni nge n’igin ndabkun guy e yal’ nge pul, nge pi t’uf. (Mu taarebnag ko Isaiah 60:8.) Bay e maruwar riy ko mini’ e be pi’ gelngin e re ulung i salthaw ney? U fithik’ lingan e pi gamanman ney ni yad be tolul ma gad be rung’ag e pi thin ney ni bay ko Joel 2:11: “I [Jehovah] e bayi yog ngak e salthaw rok e tin ni ngar rin’ed ni bay yib laman ngorad ni bod lingan e dirra’. Ma piin ni yad be fol rok e yad pire’ ni pire’ ma yad ba gel. Re Rran rok [Jehovah] nem e rib gel e gafgow ni bayi fek i yib! Mini’ e rayog rok ni athamgil riy?” Arrogon, Jehovah Got e ir e be pi’ e pi asemn’ing rok ni yad ba ulung i salthaw e chiney​—u m’on ko rran rok.

“De Sowath Jehovah”

21. Mang e ra buch u nap’an ni ra yib e ‘rran rok Jehovah ni bod ba mororo’’?

²¹ Bod Joel, ma i weliy apostal Peter u morngaagen e rran rok Jehovah. Ke yoloy ni gaar: “Ya chirofen nem ni rran rok [Jehovah] e bayi taw ni bod rogon ba mororo’. Chirofen nem e bay yan nga bayang lan e lang ni be falgar lingan, ma urngin e tin i bay u lan e lang ban’en ni bayi yik’ nge kireb, ma fayleng nge urngin e tin ni ba’ riy e bay chuw.” (2 Peter 3:10) Satan ni Moonyan’ e be suwey e pi “lan e lang” ni aram e pi am nib kireb ni yad be gagiyegnag e “fayleng” ni be yip’ fan e girdi’ ni be par nib dar ku Got. (Efesus 6:12; 1 John 5:19) Pi n’ey ni be yip’ fan e lan e lang nge fayleng e dabi magay nib fas ko fare gawel ko damumuw rok Jehovah u nap’an e rran Rok. Ya ran tay e “bin nib biech e lan e lang nge bin nib biech e fayleng” nga luwan, “ni aram e tin nib mat’aw e ngongol e bay i par riy, ni ereray e pi n’en ni gadad be sonnag.”​—2 Peter 3:13.

22, 23. (a) Susun uw rogon u wan’dad ni bochan ni be runguy Jehovah e girdi’ ma be gum’an’ u puluwrad? (b) Susun mang e ngad rin’ed ya ke chugur ni nge taw e rran rok Jehovah?

²² Rayog ni ngad paged talin rogon fene ga’ fan e ngiyal’ ney ya boor ban’en ni be wageynag lanin’dad ma be skengnag e michan’ rodad. Machane ka be yan e pi asemn’ing, ma boor e girdi’ ni be fol ko thin ko Gil’ilungun Got. Ke pag Got ba ngiyal’ ni fan ko re n’ey, machane dabda lemnaged ni ke sowath ni bochan ni be gum’an’. “Ya dawori sowath [Jehovah] ni nge rin’ e tin ni ke yog nra rin’, ni bod rogon ni be lemnag boch e girdi’. Ya be gum’an’nag ir u puluwmed, ni fan e dabun ni nge n’ag be’, ya ba adag ni nge urngin e girdi’ mi yad pi’ keru’rad ko urngin e denen ni yad be rin’.”​—2 Peter 3:9.

²³ Nap’an ni gad be sonnag e rran rok Jehovah, ma ngad lemnaged e thin ni yog Peter u 2 Peter 3:11, 12: “Faanra urngin ban’en ma bay ni kirebnag ni ara’ rogon, me ere mit i mang girdi’ e susun e ngam boded? Pangimed e nge par nib thothup ma kam pied gimed nga pa’ Got, ma gimed be sonnag e chirofen nem, ni ir e Rran rok Got, mi gimed athamgiliy nrogon nrayog romed nge papey nge taw ngay. Rofen ni baaram ni bay yik’ lan e lang nge kireb e urngin ban’en ni bay u lan e lang e bayi ranrannag e gowel!” Pi n’en ney e ba muun ngay ni nga darod u taabang ni gadad e pi asemn’ing rok Jehovah ni yad ba ulung i salthaw ni gad ma un ko machib u gubin ngiyal’ ni gad wereg fare thin nib fel’ ko Gil’ilungun Got u m’on nra taw ko tomur.​—Mark 13:10.

24, 25. (a) Uw rogon u wan’um fare taw’ath ni ngan un ko maruwel ko pi asemn’ing ni yad ba ulung i salthaw rok Jehovah? (b) Mang deer ni fith Joel?

²⁴ Pi asemn’ing rok Got ni yad ba ulung i salthaw e dabra talgad ko maruwel rorad nge mada’ ko ngiyal’ ni ke taw ko rran rok Jehovah. Re ulung i asemn’ing ney e dabiyog ni ngan talegrad e aram e mich riy ni kari chugur ko rran rok Jehovah. Gathi gab falfalan’ ni ga be un ko pi asemn’ing rok Got ni kan dugliyrad nge pi girdi’ ni be un ngorad ko maruwel ko ngiyal’ u m’on ko rran rok Jehovah fa?

²⁵ Ri ra gilbuguwan fare rran rok Jehovah! Aram fan ni kan fith ni gaar: “Mini’ e rayog ni nge athamgil riy?” (Joel 2:11) Re deer ney nge boch e yira weliy u lan fa gal ni migid e article.

Rayog ni Mu Weliy?

◻ Mang fan ni ke ginang Jehovah morngaagen e pi insect ni ra gafgownag yu Judah?

◻ Mini’ e pi asemn’ing rok Jehovah ko ngiyal’ ney ni be lebuguy e thin ni yiiynag Joel ni profet?

◻ Uw rogon u wan’ e pi tayugang ko Kristendom e gafgow ko pi asemn’ing, ma uw rogon nrayog ni nge chuw boch i yad ko re gafgow nem?

◻ Uw fene ga yang e gin ni ke wer e pi asemn’ing riy u nap’an e bin 20 e chibog, ma ra ul’ul’ i yan nge mada’ ko mang ngiyal’?

[Sasing ko page 16]

Fare gafgow ko pi asemn’ing e be m’on rok ban’en ni kab gel e gafgow riy

[Credit Line]

Gek’iy ndariy wom’engin: FAO sasing/G. Singh

[Sasing ko page 17]

Jehovah Got e ir e be n’igin e gafgow ko pi asemn’ing ko ngiyal’ ney

[Credit Line]

Asemn’ing: FAO sasing/G. Tortoli; ba ulung i asemn’ing: FAO sasing/Desert Locust Survey