Report Ko Piin Ni Ma Wereg E Thin U Murung’agen Gil’ilungun Got

Yib e Tow’ath Ngak Be’ ni Ke Gay e Bin Riyul’ e Got

NAP’AN e bin ragag e chibog B.C.E., ke gel e liyor ni googsur u lan fa l’agruw e ganong nu Judah. Machane u fithik’ e girdi’ ni ma liyor ko liyos ma immoy reb e pumoon nib mat’aw gum’erchaen ngak Got. Fithingan e re moon nem e Jehoshaphat. I weliy Jehu ni profet boch e thin u murung’agen Jehoshaphat ni gaar: “Kan guy felngim, ya ke . . . bung rogon gum’erchaem ni nge gay fa bin riyul’ e Got.” (2 Kronicles 19:3) Ku aram rogon e ngiyal’ ney nib “mo’maw’ ni ngan par” riy, ma bay bokum i million e girdi’ ni kar ‘yal’uweged rogon gum’ercharad’ ni ngar gayed fa bin riyul’ e Got, ni Jehovah. (2 Timothy 3:1-5) Kan micheg e re n’ey ko pi n’en ni buch u Togo, u Ngal u Africa.

Ke un Casimir ko sukul nib Katolic ma ke un ko Communion ko yay ni som’on ko ngiyal’ ni mereb e duw rok. Machane, nap’an ni ke gaman 14 e duw rok, ke tal Casimir ni nge un ko misa’. Ke rus ya ke lemnag nfaanra pag be’ e Misa’ ma wenegan nra yib ngak e nge yan nga infierno nge gafgow u fithik’ e nifiy, ara purgatory.

Ke un Casimir ngak boch e piin ni fel’ yangaren ni yad ma muulung u taabang ni fan ni ngar filed e Bible. Ke tabab Casimir ni nge bieg e Bible. Bay ba ngiyal’ ni ke bieg Casimir e thin ko fre babyor ni Revelation u murung’agen ba gamanman nib maloboch ni yib u fithik’ e day nga lang. (Revelation 13:1, 2) Faani fith ngak fa en ni ma yog e thin u nap’an e fol Bible u murung’agen fre gamanman, ma kan weliy ngak ni ba riyul’ fre gamanman ma riyul’ ni yib u fithik’ e day nga lang. Pi thin nem e ke k’aring e marus ngak Casimir ya ma par u ba yang nde palog ko dep’ e lay. Ke lemnag ni ir bagayad e tin som’on e girdi’ nra li’ fre gamanman nib maloboch.

Ke tabab Casimir ni nge kunuy e salpiy rok ni fan ni nge chur nge yan nga lel’uch me mil rok fre gamanman nib maloboch. Ke weliy ngak reb e pagal u skul e n’en ni be finey. Fre pagal e ir reb e Mich Rok Jehovah, ere ke weliy ngak Casimir ni fre gamanman nib maloboch nra yib u fithik’ e day nga lang e gathi reb e gamanman nib riyul’ ma dabi yib u fithik’ e day. De n’uw nap’an nga tomren, ma kan pining Casimir ni nge un ko muulung u Kingdom Hall. Ke falfalan’ ko pi muulung me un u gubin e wik. Maku ke felan’ ni nge un ko fol Bible u tabinaw rok.

Nap’an ni be mon’og Casimir iyan ko fol Bible, ma aram me togopluw e girdi’ rok ngak. Girdi’ rok e ma liyor ko girdi’ rorad ni kar m’ad ma yad ma ka’ e tin ni ka bay e ufin ko gamanman ni kan pi’ ni maligach ndan puog racha’en nga but’. Faani yog Casimir u fithik’ e gol ndabi ka’ fre ufin, ma kan puwan’ ngak min nog ni nge chuw u tabinaw. Ke par Casimir nib mocha’, ma dan rin’ e tin kireb ni kan nog ni yira rin’ ngak. Machane kan pi’ e ufin ko maligach ni dan puog e racha’ nga but’ u gubin e rran ko dalip e pul. Ba magawon Casimir ya de gaman e ggan ni nge ka’, machane ke k’adan’ ngay.

Ke mon’og Casimir iyan ko tirok Got ban’en me ognag e yafos rok ngak Got me un ko taufe. Munmun, kan dugliy ni nge mang reb e ministerial servant ma aram me un ko fa bin aningeg e class ko Ministerial Training School u Togo. Chiney ma be falfalan’ ni nge un ko maruwel u branch ofis.

Arrogon, ke riyul’ e pi thin rok David ni Pilung ko boor e girdi’: “Faanra ga ra gay [Jehovah], ma ra pag ni ngam pirieg.”​—1 Kronicles 28:9.

[Sasing ko page 30]

Casimir (ba’ ni mat’aw) e be fafalan’ ni nge un ko maruwel u branch ofis