Piin nib Tolang e Kar N’ufed e Pi Mich

U Cádiz, Spain, ni reb e binaw u charen e day ni gonapan 300 e mayal palongin nga yimuch ni ngal u Madrid, ma reb e mayor ni Doña Teófila Martínez e ke pi’ reb e plaque (bay e sasing u lang) ngak e Pi Mich Rok Jehovah. Be yog ni “Be pining e pi tayugang ko re mach ney e magar ko Pi Mich ni fan ko maruwel nge athamgil rorad ni kar ted ni fan ko re mach ney. Mang e ke rin’ e Pi Mich Rok Jehovah ni kan pining e sorok ngorad?

Kan pi’ ni fan ko maruwel ni ke tay e Pi Mich ni kar biechnaged bang ko fare tafen e muulung ni fen e binaw. U lan in e Sabado nge Madenom, ma ke pag ra’ay e Pi Mich ni kar ognaged yad ni ngar biechnaged e kolosis ko fare Carranza ni reb e tafen e gosgos. Chiney, ma gubin e girdi’ ni ma fanay fare tafen e gosgos e ke yib angin ngorad fapi pipe ni kan fl’eg’, nge fraf ni kan tay.

Ke pag boch e ngiyal’, ma Pi Mich Rok Jehovah e kar falfalan’gad ni ke par thilrad fare mach nu Cádiz nib manigil. Gubin e duw ma ke pag e pi tayugang ko binaw ni nge fanay e Pi Mich fare Carranza ni tafen e gosgos ni fan ko district convention rorad. Ma aram fan, ni ba falfalan’ e Pi Mich ni ngar rin’ed e tin nrayog rorad ni nge par fare tafen e gosgos nib biech.

Ma gathi ke mus e re mit i maruwel ni yad ma rin’, ya ku Pi Mich Rok Jehovah e yad ma yan u gubin e rran ko pi tabinaw u lan e mach ni ngar pi’ed e ayuw u reb e kanawo’. Yad ma wereg e “thin nib fel’” u murung’agen Gil’ilungun Got. Machane gathi yad ma yan ko machib u fithik’ e yoor ni bochan e ngan pining e sorok ngorad. Yad ma rin’ ni aram rogon, ya yad be fol ko n’en’ ni motochiyelnag Jesus ngorad ni ngar machibnaged fare “thin nib fel’ u murung’agen Gil’ilungun” ma ngar “pingeged e girdi’ ko gubin e pi nam.” (Matthew 24:14; 28:19) Aram rogon ni be athapeg e Pi Mich Rok Jehovah ni ngar pigpiggad ko binaw ni ngar skulnaged e girdi’ ko “kanawo’ nib mat’aw.”​—Proverbs 12:28.