Rayog ni Nge Ayuwegdad fare Bible ko Ngiyal’ N’ey?

“RANI yaliy fare Bible ni polo’, ma sogonapan 1 e percent e ba fel’ ni ngan bieg, machane yugu boch e thin riy e dariy fan ya ke kakrom.” Aram e n’en ni ke yog reb e pumoon ni kab pagal. Ma boor e girdi’ nib fel’ uwan’rad e n’en ni ke yog e cha’ nem. Yugu aram rogon ni boor e girdi’ u ga’ngin yang e fayleng ni ma chuw’iy fare Bible, ma bay bokum million e piin ni kaygi achichig e tayfan ni yad ma ta’ ngay ya dar nanged fan e thin ni bay riy.

Fare German newspaper ni Süddeutsche Zeitung fithingan, e immoy reb e shimbung rorad ni kar ngongliyed ko duw ni 1996 u nap’an ni yibe madenomnag e Baynag ni ke weliy ni “be lich iyan e piin ni ma bieg e re ke babyor ney. Nap’an e natural sciences ma ke mon’og e n’en ni kan nog e secularization ngay, ma boor e piin ni ma lemnag ni pi thin u lan e Bible e aram e n’en ma gin e girdi’ ngay, ma mo’maw ni ngan nang fan.” Fapi survey ni kan ta’ e be dag ni riyul’ ni aram rogon. Ma rogon e survey ni kan ta’ e kan fil riy ni ri boor e bitir ni gathi rib tamilang u wan’rad ko mini’ Jesus. Nap’an reb e survey, ma de gaman baley ko urngin e girdi’ ni kan fithrad nrayog ni ngar weliyed boch e thin nib m’ag ko thin nu Bible ni be weliy murung’agen fare prodigal son nge fare pumoon nu Samaria nib fel’ ngongolen.

Reb e babyor ko Swiss Evangelical Church ni kan nog e Reformiertes Forum ngay e be weliy ni gathi rib t’uf u Switzerland fare Bible ni bod kafram. Mus ko piin ni bay e Bible rorad, ma baga’ ni ke mus ni be par u tafen e babyor ma ke m’ag e fiyath daken. Ku aram rogon u Britain. Rogon reb e survey nni ta’, e yugu aram rogon ni baga’ ni girdi’ e bay e Bible rorad, ma boor i yad e ba mo’maw ni nge bieg.

Machane, bay bokum million e girdi’ u ga’ngin yang e fayleng nib thil rogon ni yad ma lemnag e Bible. Yad be lemnag ni aram e Thin rok Got ma baga’ fan ma bay angin ni ma yib riy. Arfan, ni yad ma bieg e Bible u gubin e rran. Reb e rugod e ke yol ni gaar: “Ku guy rogon ni ngu ug bieg taareb fa l’agruw e guruy u Bible ni gubin e rran. Ma ke yib e falfalan’ riy ngog.” Girdi’ ni aram rogon e ri ma tiyan’ ko mang e be fil e Bible ngorad, ma yad ma guy rogon ni ngar pared nib puluw ko yafas rorad boch e fonow ni kar poyed. Ke mich uwan’rad ni rayog ni nge ayuwegrad fare Bible ko ngiyal’ n’ey ni ke wagey urngin ban’en u fayleng.

Uw rogon uwan’um? Riyul’ ni dakuriy fan fare Bible ko ngiyal’ n’ey fa? Ara aram e babyor ni baga’ fan ma bay angin? Ere rayog ko Bible ni nge ayuwegdad e chiney, fa?