Report Ko Piin Ni Ma Wereg E Thin U Murung’agen Gil’ilungun Got

“Boor e Thin nu Bible ni Ga Manang”

NAP’AN ni ke 12 e duw ku Jesus ma de rus ni nge non ko piin tayog e thin ko teliw nu Jerusalem, “urngin e girdi’ ni ur motoyilgad ngak e ra gingad nga feni llowan’ ko thin ni ur fithed ngak ngi i fulweg.” (Luke 2:47) Taabrogon ko chiney, boor e pi tapigpig ku Jehovah ni fel’ yangarrad ni ku darur rusgad ni ngar nonad ko sensey rorad nge piin yad nga skul u morngaagen Got nge fare Bible, ma boor yay ni ma yib wenegan nib fel’ ngorad.

Tiffany, 14 e duw rok , immoy u lan e class ni yibe weliy riy morngaagen e thin nu Bible kakrom ni bay fini m’ug ko 70 e wik, ni bay u Daniel 9:24-27. Fare sensey e pi’ boch e thin u morngaagen fapi verse me gur nge yan u daken e tin ni ka bay e thin.

Som’on, me i samo’maw rok Tiffany ni nge tining pa’ nga lang. “Machane,” i gaar, “ri be magawonigeg ni faanra dani weliy fapi verse nib fel’ rogon. Ma faanug nang an’ug, mu gu tining paag nga lang.” Fare sensey e ri gin ngay ni bay be’ ni baadag ni nge yog boch ban’en u morngaagen e re thin nem, ya boor ko fapi student e mo’maw’ rorad ni ngar nanged fan e pi n’em ni yibe weliy.

Faan ni pi’ mat’awun ni nge weliy fan fare yiiy, me sak’iy Tiffany nga lang me weliy urngin ban’en ni manang nrib fel’ rogon. Faani mu’, ma ri dakuriy be’ ni be non u lan fare class. Me dake nge yib buchuw i marus ku Tiffany. Ma de n’uw nap’an me wayway fare class nib n’uw nap’an.

Gaar fare sensey ni boor yay, “Tiffany rib fel’ rogon e n’en ni kam weliy,” Ke yog ni manang ni sana ka bay boch ni ngan weliy u morngaagen e pi verse nem, machane i Tiffany e ir e som’on ni ke weliy fan ma kari tamilang uwan’. Tomren e class, me fith Tiffany ko uw rogon nri manang boor e thin u Bible. Me gaar Tiffany, “Bochan ni gag reb e Pi Mich ku Jehovah,” me ulul ngay, ni gaar, “Gallabthir rog e kara weliyew fan e pi thin nem ngog ni boor yay u m’on ke yog ni nggu nang fan.”

Fapi classmate rok e kar gingad ko tin manang ko thin nu Bible. Reb e student e gaar ku Tiffany: “Chiney e kug nang fan ko mang fan ni gimed e Pi Mich Rok Jehovah e gimed ma yan u mit e tabinaw i yan; bochan ni ri gimed manang boor e thin u lan e Bible.” Ma aram e micheg bochi yad ni dakuriy biyay ni yad ra k’aring ko tin ni ke michan’ ngay.

Faani weliy Tiffany e n’en ni buch ngak ko gallabthir rok, ma rognew ngak ni nge pi’ fare babyor ni Knowledge That Leads to Everlasting Life ngak e sensey rok. Faan ni rin’ e n’en ni kar rognew ma aram me dag ko sensey rok fare thin ni be weliy u morngaagen e thin ku Daniel, ma rib pay ni fek fare sensey fare babyor me pining e magar ngak.

Rriyul, ni faanra dabirus e pi Kristiano nib fel’ yangaren ni nge weliy e tin ni ke fil e gallabthir rorad ngorad u morngaagen Got nge fare Bible, ma ri yad be pining e sorok ma yad be falfalan’nag Jehovah ma ku yad be fek i yib e taw’ath nib fel’ ngorad​—Matthew 21:15, 16.