Mu Tiyan’um Ko Thin Rok Got Ni I Weliy Fapi Profet
“Aram fan ni kari pagan’mad ko thin rok Got ni i weliy fapi profet. Ba fel’ ni ngam tiyan’med ko pi thin nem.”—2 PETER 1:19.
1, 2. Mang messiah ni googsur ni rayog ni ngam weliy?
BOOR e chibog, ni fapi messiah ni googsur e kar rogned boch e thin ni bay fini yib nga m’on. Nap’an e bin lal e chibog C.E., ma reb e pumoon ni ma yog ni ir Moses e i weliy ngak piyu Jews u daken fa chi dongoch ni Crete ni ir fare messiah ma ir era ayuwegrad ni dabkuun magawonagrad. Nap’an ni ke taw fare rran ni kan dugliy ni ngan chuwegrad ko magawon, ma kar uned ngak nga ranod ko gin ni tha’bi tolang ni ba sap nga Maday ni Mediterranean. Me yog ngorad ni goo yad ra og nga ma Day ma ra ruwraba’ e day u p’owcherad. Ma boor i yad ni og nga ma Day nge limach, ma cha’ nem ni fare profet ni googsur e ke mil nge chuw u rom.
2 Nap’an fa bin 12 e chibog, me m’ug reb e “messiah” u Yemen. Fare caliph, ara pilung rorad, e ke fith reb e pow ngak ni nge dag ni ir e messiah ni riyul’. Re “messiah” ney e ke yog ngak fare caliph ni nge th’ab k’angan. Me yog ngak ni yira faseg ko yam’ nib tomgin ma e ir eram e pow riy. Me fol fare caliph ko n’en ni ke yog—ma aram tomuren e binem e “messiah.”
3. Mini’ fare Messiah nib riyul’, ma mang e be dag fare machib ni ke ta’?
3 Fapi messiah nge yiiy rorad e gubin ni ke aw nib m’ay fan, machane ngan tiyan’uy ko thin rok Got ni i weliy fapi profet e dari reb nde riyul’. Jesus Kristus, ni ir fare Messiah ni riyul’, e par nib fas ni nge lebuguy boor e thin u Bible ni kan yiiynag ni fan ngak. Bod rogon fa en ni ta yol ko fare Gospel ni Matthew me yoloy biyay e thin rok Isaiah, ni gaar: “ ‘Nug nu Zebulun, nge nug nu Naftali, ni migid ko lipath ni bay u baraba’ e Jordan, ni aram e Galile rok e piin ni gathi yad piyu Israel! Girdi’ ni yad be par u fithik’ e lumor e bay ra guyed ba tamilang ni baga’! Bayi gal ramaen nga daken e piin ni yad be par u fithik’ e lumor u daken e nam ko yam’!” Aram e re ngiyal’ ni tabab Jesus ko machib ni be gaar, ‘Mpied keru’med ko denen ni gimed be rin’! Ya gagiyeg nu tharmiy e ke chugur!’” (Matthew 4:15-17; Isaiah 9:1, 2) Jesus e ir fare “tamilang ni baga,” ma fare maruwel ko machib ni ke tay e be micheg ni ir fare Profet ni i yog Moses. Piin ni dabra motoyilgad ku Jesus e ngan thang owcherad.—Deuteronomy 18:18, 19; Acts 3:22, 23.
4. Uw rogon ni ke lebuguy Jesus e thin ni bay ko Isaiah 53:12?
4 Ku ke lebuguy Jesus fapi thin ni kan yiiynag ni bay ko Isaiah 53:12 ni gaar: “Pi’ ir ngan li’ ngem’, min taareb rogonnag ngak e girdi’ ni ke th’ab e motochiyel. Me yan i fek luwan e pi tadenen ni pire’, me meybil ni nge n’ag Got fan e denen rorad.” Bochan ni manang Jesus ni dabki n’uw nap’an ma nge pi’ e yafas rok nib girdi’ ni maligach, ma aram i gelnag Jesus e michan’ rok pi gachalpen. (Mark 10:45) Me rin’ e re n’ey u yug reb e kanawo’ ni aram e ke thil yaan.
Fare N’en ni Thilyaan e Ma Gelnag e Michan’
5. Uw rogon ni ngam weliy fare n’en ni ke buch ni ke thil yaan Jesus ko thin rom?
5 Fare yaan ni ke thil e aram e n’en ni kan yiiynag u m’on ni nge buch. I yog Jesus ni gaar: “Ya en ni Fak e Girdi’ e bay yib ni yad e pi engel rok ni be galgal ramaen ni bod e Chitamangin . . . Mu ted fanmed i yan ko re bugithin ni baaray! Ba’ boch e girdi’ u roy ndab ra m’ad me yan i taw ko ngiyal’ ni bay ra guyed e en ni Fak e Girdi’ riy ni ke yib ni ir e pilung.” (Matthew 16:27, 28) Riyul’ ni boch fapi gachalpen Jesus e kara guyed ni be yib nga gil’ilungun? Matthew 17:1-7 e be gaar: “Ma nel’ e rran nga tomren me fek Jesus Peter nge fa gali walag ni James nge John nga ranod nga daken burey nib tolang ni goo yad. Ma nap’an ni yad be changar ngak me thil yaan.” Riyul’ ni ri ma dag ban’en e re nem! “Me galgal owchen ni bod feni galgal mit e yal’, me wechwech e mad rok ni bod ramaen e yal’. Ma, am sap! ke yib Moses nge Elijah ngorad, ni yad be sabethin.” Maku, “me yib bangi manileng nib galgal ramaen nga dakenrad,” me non ba lam u fithik’ fa gi manileng ni gaar: “‘Ereray Fakag ni rib t’uf rog, ni kari felan’ug ngak- ere mu telmed ngak.’ Ma faani rung’ag pi gachalpen fare lam me ri yib e tamdag ngorad nib gel ma aram mi yad palpal nga but’. Me yib Jesus i math ngorad me gaar ngorad, ‘Mu sak’iygad, dabmu tamdaggad.’ ”
6. (a) Mang fan ni ke yog Jesus ni fare n’en ni ke buch ngak ni ke thil yaan e ku ke thil e changar rok ko ngiyal’ nem? (b) Fare n’en ni ke thiliyeg Jesus yaan e be m’ug nib m’on ko mang?
6 Sana ke buch e re n’em ni ma gin e girdi’ ngay u reb ko pi sigiren e Burey ni Hermon, ni aram fa gin ni i toffan Jesus nge fa dalip i apostal rok riy e re nep’ nem. Baga’ ni nep’ e ke thilyaan Jesus, arfan ni rib gagiyel e re n’em. Reb i fan ni yog Jesus ni kan piliyeg e changar rok ko ngiyal’ nem e bochan ni gathi riyul’ ni immoy Moses nge Elijah u rom ya ngiyal’ nem ma ke n’uw nap’an ni kar m’ow. Goo Kristus e riyul’ ni immoy. (Matthew 17:8, 9) Fare n’en ni rib galgal ramaen ni ke guy Peter, nge James, nge John e ke ayuwegrad ni ngar guyed u m’on fare wub rok Jesus’ ni bay gelngin nra yib nga gil’ilungun. Ma Moses nge Elijah e be yip fan e piin ni kan dugliyrad ni yad ra un ngak Jesus, ma fare n’en ni ke buch u rom e ri be gelnag e thin ni ke weliy u murung’agen Gil’ilungun nge fare gagiyeg ni ra ta’ nga m’on.
7. Uw rogon ni ngad nanged ni kab tamilang uwan’ Peter fare thil yaan ni tay Jesus?
7 Fare n’en ni ke buch u rom ni ke thilyaan Jesus e ke gelnag e michan’ rok fa dalip i apostal ya yad ra un ko maruwel ni baga fan u lan e ulung ni Kristiano. Owchen nge mad rok Kristus ni be galgal ramaen, nge laman Got ni be yog ni Jesus e ir Fak ni rib t’uf rok ni thingara motoyilgad ngak—e urngin e pi n’em e kari yib angin. Machane fapi apostal e thingari dabrogned ngak be’ e n’en ni ke buch u rom nge mada’ ko ngiyal’ ni ran faseg Jesus ko yam’. Tomren ni ke yan 32 e duw, ma ri kab tamilang uwan’ Peter e n’en ni ke buch u rom. Be lemnag Peter u murung’agen nge mang fan e re n’em, ma aram me yoloy ni gaar: “Dagu torgad nga bogi yat ni girdi’ e sunmeg nggu weliyed ngomed murung’agen gelngin e Somol rodad ni Jesus Kristus nge wub ni tay. Ya gguyed nga owchemad feni sorok! Gamad bay u rom me ta’ Got ni Chitamangiy fan Jesus Kristus me piliyeg ramaen downgin nge galgal ko ngiyal’ ni baaram ni yib ba lam ngak, ni yib rok e en ni Tha’bi Flaab ni be gaar e re lam nem, “Ere ray fakag nrib T’uf rog, ni kari felan’ug ngak!” Gamad e gu rung’aged e re lam nem ni be yib u tharmiy ngomad nga but’ ko ngiyal’ ni baaram ni gamad ba’ rok u daken fare burey nib thothup.”—2 Peter 1:16-18.
8. (a) Pi thin ni ke yog Got u murung’agen Fak e be dag e mang? (b) Mang fan e re n’em ni ke yib e manileng ko ngiyal’ ni ke thil yaan Jesus?
8 N’en ni baga fan e aram e n’en ni ke yog Got ngorad ni gaar: “Ereray fakag, nrib t’uf rog, ni kari felan’ug ngak.” Re thin ney e be weliy murung’agen Jesus ni ke ta’ Got ni nge mang Pilung, ni urngin e tin ni sunmiy e yad ra fol rok. Fare manileng ni be par u dakenrad e be micheg ni ra lebug e re n’em ni dabni gu’. Ke mus ni piin nib tamilang uwan’rad “fare pow” ni be dag ni ke taw Jesus’ ma ke tabab ko gagiyeg rok e dabni guy ni bay u gelngin Gil’ilungun. (Matthew 24:3) I yog Jesus ni dab nog ngak yugu boch e girdi’ fare n’en ni kar guyed nge mada’ ko ngiyal’ ni kan faseg ko yam’, ma be dag e re n’em ni yira pining e sorok ngak ma ran tolangnag ni ra buch u tomren ni kan faseg ko yam’.
9. Mang fan ni fare n’en ni ke buch ku Jesus ni ke thil yaan e susun e ra gelnag e michan’ rodad?
9 Tomren i weliy Peter e re n’em ni kan thiliyeg yaan Jesus, me gaar: “Aram fan ni kari pagan’mad ko thin rok Got ni i weliy fapi profet. Ba fel’ ni ngarim tiyan’med ko pi thin nem, ya bod ba magal ni be mat ramaen u fithik’ e lumor nge yan i mada’ ko Rofen ni bayi puf e woch, ma aram e bayi tamilangnag ramaen e fasuran laninmed. Machane bin som’on e ngam tiyed fanmed i yan ko re bugithin nem ni gaar: dariy be’ ni rayog rok ni gelngin e lem rok e nge maruwel ngay nge weliy fan bbugithin ni bay u lan e babyor nib thothup, ni Profet e yiiynag. Ya dariy bbugithin ni yog e profet ni sum u laniyan’ be’, ya fare Kan ni Thothup rok Got e yib i ying ngak e girdi’ ngar weliyed e thin ni ke yib rok Got ngorad.” (2 Peter 1:19-21) Fare n’en ni ke thilyaan Jesus e be micheg ni thin rok Got ni i weliy fapi profet e rayog ni ngan pagan’uy ngay. Thingarda tedan’dad ko re thin nem ma dabda torgad nga “bogi yat ni girdi’ e sunumeg” ni de m’agan’ Got ngay. Fare n’en ni kan thiliyeg yaan Jesus e susun ni ra gelnag e michan’ rodad ko pi thin rok Got ni i weliy fapi profet ya binem e be dag u m’on ni gagiyeg rok Jesus e ke riyul’. Arrogon, bay e mich riy nib tamilang ni bay Kristus e chiney ni ir e Pilung nu tharmiy nib gel gelngin.
Uw Rogon ni nge M’ug fare Fasuran
10. Mini’ ara mang fare “fasuran” ni ke yog Peter, ma mang fan ni aram rogon e fulweg rom?
10 Me yol Peter ni gaar: “Ba fel’ ni ngam tiyan’med ko [pi thin rok Got ni i weliy fapi profet], ya bod ba magal ni be mat ramaen u fithik’ e lumor nge yan i mada’ ko Rofen ni bayi puf e woch, ma aram e bayi tamilangnag ramaen e fasuran lanin’med.” Mini’ ara mang fare “fasuran”? Fare bugithin ni “fasuran” (daystar) e ke mus ni taab yay ni kan yoloy u Bible, ma re ney nge fare “fasuran” (morning star) e taab fan.” Revelation 22:16 e kan pining ngak Jesus Kristus ni “fare fasuran ni baga’ ramaen.” Boch e tayim u reb e duw, ma aram e pi t’uf nib tomur ni ma m’ug u lan e ngek. Ma ra m’ug nib m’on boch ko yal’, ma yad ra pi’ e tamilang ko ngiyal’ ni ke chuchugur ni nge tabab reb e rran nib biech. I fanay Peter fare bugithin ni “fasuran” ni be sor fan ku Jesus u tomren ni ke yib Ngak mat’awon ko Gil’ilungun. Ngiyal’ nem, me yib Jesus nge pi’ e tamilang nga urngin yang u palpalthib, ma ba muun ngay e fayleng rodad! Bochan ni ir fare Messiah ni Fasuran, ma aram e ir e be pi’ e tamilang ko reb e rran nib biech, ara ngal’an, ni fan ko girdi’ ni yad ma fol.
11. (a) Mang fan ni fare thin ni bay ko 2 Peter 1:19 e dagathi fan e ra yib e “fasuran” nga gum’ercha’en e girdi’? (b) Uw rogon ni ngam weliy fan e 2 Peter 1:19?
11 Boor e Bible ni thin riy e ba puluw ko fare lem rok Peter ni apostal ni bay ko 2 Peter 1:19 ni be weliy murung’agen fare gum’ercha’ ko girdi’. Tomalngin gum’ercha’en be’ ni ke ilal e kemus ni 9 nge mada’ ko 11 ounces. Uw rogon ni Jesus Kristus—ni ir reb e kan ni ma par u tharmiy e chiney ni dabki yim’ ma be galgal ramaen—e rayog ni nge m’ug ko pi gumer’cha’en e girdi’ ney ni kaygi achichig? (1 Timothy 6:16) Riyul’, ni gum’ercha’dad ni be yip fan ban’en e ba muun ngay, ya gad ma fanay e pi n’en nem ni fan ni ngada tiyan’dad ko fapi thin rok Got ni fapi profet e i weliy. Machane ngam sap nib fel’ rogon ko bin 2 Peter 1:19, ma rayog ni ngam guy ni fare New World Translation e be fanay e comma ni be kieg fare bugithin ni “nge yan i mada’ ko rofen ni bayi puf e woch ma ra m’ug fare fasuran” ko pi thin nib m’on nge fan fare bugithin ni “lan gum’ercha’med.” Rayog ni ngan nog fan e re verse ney ni gaar: ‘Kari mudugilan’mad ko pi thin rok Got ney ni i weliy fapi profet; mab fel’ rogon e n’en ni gimed be rin’ ni gimed be tiyan’med ngay ni bod ba magal ni be mat ramaen u fithik’ e lumor, ni aram lan gum’ercha’med, nge yan i mada’ ko rofen ni bayi puf e woch ma ra m’ug e fasuran.’
12. Baga’ ni uwrarogon gum’ercha’en e girdi’, ma uwrarogon e pi Kristiano nib riyul’?
12 Uw rarogon gum’ercha’en e girdi’ nib kireb ni be yip fan ban’en ni yad urngin? Gum’ercha’rad e riyul’ ni be par u fithik’ e lumor ko tirok Got! Machane, faanra gadad e pi Kristiano nib riyul’, ma bod ni bay ba magal ni be galgal ramaen u gum’ercha’dad, ra dariy ma ba lumor. Ma rogon ni be dag e pi thin rok Peter, e susun ni ngan tiyan’uy ko thin rok Got ni i weliy fapi profet ni be galgal ramaen ma aram rogon nrayog ni nge par nib od e pi Kristiano nib riyul’ ma be par u fithik’ e tamilang ko ngiyal’ ni ke chuchugur ni nge tabab e rran nib biech. Ma yad ra nang e tin riyul’ ni ke m’ug fare Fasuran, gathi ulan gum’ircha’en e girdi’, machane u p’eowchen urngin e tin ni kan sunmiy.
13. (a) Mang fan ni ke mudugil lanin’dad ni ke yib fare Fasuran? (b) Mang fan ni rayog ni nge par e pi Kristiano nib mudugil ko ngiyal’ ni nge yib ngodad e tayim nib mo’maw rogon ni yog Jesus?
13 fare Fasuran e ke m’ug! Rayog ni nge mudugil lanin’dad ni aram rogon ni faan gad ra tedan’dad ko thin ni baga’ ni ke yiiynag Jesus u murung’agen e ngiyal’ ni ba’. Chiney, e be lebug nib tamilang e pi n’en ni ke yog Jesus ni bod e mahl, nge uyungol, nge duru’, nge ngan machibnag fare thin nib fel’ u ga’ngin e fayleng. (Matthew 24:3-14) Yugu aram rogon ni fapi magawon ni ke yog Jesus ni nge yib e ku ke yib ngodad ni gadad e pi Kristiano, machane ngad pared nib mudugilan’dad ni ba gapas ma ba falfalan’ gum’ercha’dad. Mang fan? Bochan ni gad be tiyan’dad ko thin rok Got ni i weliy fapi profet ma ku ke michan’dad ko n’en ni ke micheg ni bay nga m’on. Gad manang ni gad bay ko ngiyal’ ko bin th’abi fel’ ya gad be par e chiney ko ngiyal’ ni kari chuchugur ni nge m’ay fare tayim ni kan nog “tomuren e fayleng” ngay! (Daniel 12:4) Kaygi gel e gafgow ni ke yib ko fayleng rogon ni yog ko Isaiah 60:2, ni gaar: “Yugu boch e nam e bay ra pired u fithik’ e lumor.” Uw rogon ni nge pirieg be’ e kanawo’ rok u fithik’ e re lumor ney? Thingari tiyan’ e girdi’ ko thin rok Got ni i weliy fapi profet u fithik’ e sobut’an e chiney, u m’on ni nge m’ay e tayim rok. Girdi’ ni ba yul’yul’ gum’ercha’rad e thingara sapgad ngak Got ni Jehovah, ni Ir i Yib rok e yafas nge tamilang. (Psalm 36:9; Acts 17:28) Kemus ni aram rogon e n’en ra rin’ be’ ni nge yog ngak e tamilang nib riyul’ nge fare athap ni bay nga m’on ni aram e tin nib m’agan’ Got ngay ni fan ko girdi’ nib mat’aw.—Revelation 21:1-5.
“Ke Yib fare Tamilang nga Fayleng”
14. Mang e thingarda rin’ed ma aram rogon rayog ni ngada uned nga boch e flaab ko ngiyal’ ni ke lebug e pi thin u Bible ni kan yiiynag?
14 Be tamilangnag e Thin u Bilble ni be gagiyeg Jesus Kristus e chiney ni ir e Pilung. Bochan ni ke tabab Jesus ko gagiyeg rok ko duw ni 1914, ma aram e ka bay boch e thin ni kan yiiynag ni dawori lebug. Thingari par nib sobut’ lanin’dad ma be par ni ke mich Jesus Kristus uwan’dad, ngada pied keru’dad ko denen ni uda rin’ed ko ngiyal’ ni dawori tamilang e thin rok Got uwan’dad, ra aram rogon ma rayog ni nge yog ngodad e pi n’ey. Ba mutrug ni piin ni yad baadag ni ngar pared u fithik’ e lumor e dabiyog ni nge yog ngorad e yafas ni manemus. I yog Jesus ni gaar: “Ba ara’ rogon ni ma yib e gechig: fare tamilang e yib ngak e girdi’ nu fayleng, machane girdi’ e kab t’uf e lumor rorad ko fare tamilang, yad ka be rin’ e tin nib kireb. Ya en ni ma rin’ e tin nib kireb e fanenikan fare tamilang ma dabi yib ko fare tamilang, ya dubun ngongolen nib kireb ni nge m’ug. Machane en ni ma rin’ e tin nib riyul’ e ke yib ngak fare tamilang ni bochan e nge yog ni dag fare tamilang ni ir e be ngongol ni be fol rok Got.”—John 3:19-21.
15. Mang e ra buch ni faan gad ra dariyfannag e kanawo’ ni ke bing Got ni ngada thapgad ngak u daken Fak?
15 Fare tamilang nib spiritual e ke yib nga fayleng u daken Jesus, ma baga’ fan ni ngan motoyil ngak. Me yoloy Paul, ni gaar: “Kakrom e boor yay ni i non Got ngak pi chitamangidad ni boor kanawoen ni i non ngorad u l’ugun e pi profet, machane tiney e rran ni ir e tomren e rran e ke non ngodad u l’ugun e en ni Fak. Ir faanem ni pa’ e maruwel Got ngay nge sunumeg e fayleng nge urngin ban’en ni ba’ riy, me ir faanem ni ke dugliy ni nge mil suwon urngin ban’en ngak ko tomur.” (Hebrews 1:1, 2) Mang e ra buch ni faan gad ra dariyfannag fare athap ni ngad thapgad ngak Got ni ke bing e kanawo’ ngodad u daken Fak? I yog Paul, ni gaar: “Thin rok Got ni yog e pi engel ngak e pi chitamangidad e yib i m’ug nib riyul’, ma en nde tiyan’ ngay ara de fol riy e ngan ni gechignag nrogon ni ngan gechignag. Ere uw rogon ma gadad thay riy ni faanra dariy fan uwan’dad e n’en ni ir e th’abi manigil ni ke rin Kristus ni fan ngodad ni bochan e ngad thapgad ngak Got? I Somol e ir e som’on ni weliy murung’agen kanawoen min thap ngak Got, ma pi cha’ nra rung’aged e re bugithin nem ni yog e kar micheged ngodad nre bugithin nem e ba riyul’.” (Hebrews 2:2-4) Arrogon, Jesus e ir e en ni baga’ fan ko fare maruwel ni ngan machibnag fare thin rok Got ni i weliy fapi profet.—Revelation 19:10.
16. Mang fan ni ngari michan’dad ko urngin e thin rok Jehovah ni ke yiiynag?
16 Rogon e ne’n ni kan dag, me gaar Peter: ‘Ya dariy bbugithin ni yog e profet ni sum u laniyan’ be’.’ Girdi’ ni ir rok e dabiyog ni ngara yiiynaged boch e thin ni riyul’, machane rayog ni ri michan’dad ko thin rok Got ni i weliy fapi profet. I sum e re n’ey rok Got ni Jehovah. Ke ayuweg Got e pi tapigpig rok ni ngar nanged ko uw rogon ni be lebug e yiiy u Bible u daken e kan ni thothup. Riyul’ ni gad be falfalan’ ni kada guyed ni ke lebug boor ko pi thin rok Jehovah ni i weliy fapi profet ni ka nap’an e duw ni 1914. Ma kari mudugil lanin’dad ni boch ko yiiy u murung’agen tungun e re m’ag ney nib kireb e ra yan i aw nib riyul’. Ri baga’ fan ni ngada pared ni ngad tiyan’dad nga boch e thin ni kan yiiynag ni yib rok Got ma ngad athamgilgad ni nge mat ra’edad. (Matthew 5:16) Ri gad be pining e magar ya Jehovah ke n’igin ‘ni nge yib e tamilang ngodad ko ngiyal’ ni ka gad be par u fithk’ e lumor’ ni aram e n’en ni be upunguy e fayleng e chiney!—Isaiah 58:10.
17. Mang fan ni ba t’uf rodad e tamilang nib spiritual ni yib rok Got?
17 Fare tamilang ni be m’ug ramaen e be ayuwegdad ni ngad guyed ban’en. Maku be ayuwegdad e re n’ey ni nge tugul e pi woldug ni aram e n’en ni be pi’ ngodad e ggan nib boor mab thil thil. Dabiyog ni ngada pared nib fas ni faanra dariy e re tamilang ney ni be m’ug ramaen. Ma uw rogon fare tamilang ko tirok Got? Re n’ey e be pow’iydad ma be dag ngodad e tin ni bay nga m’on nrogon ni be dag e thin rok Got, ni fare Bible. (Psalm 119:105) Ma ‘pi’ Jehovah e tamilang nge thin rok nriyul’ u fithik’ e t’ufeg.’ (Psalm 43:3, New World Translation) Ba mutrug ni gad ra falfalan’ ko re yaram ney. Ere ngad athamgilgad ni ngad rin’ed e tin ni rayog rodad ni nge yog ngodad e “tamilang rok Got ni be gal ramaen” ya aram e n’en ni ra pi’ e tamilang nga gum’ercha’dad ni be yip’ fan ban’en.—2 Corinthians 4:6, NW; Ephesians 1:18.
18. Ke bung rogon e Fasuran rok Jehovah ni nge rin’ e mang?
18 Kari falfalan’dad ni kad nanged ni Jesus Kristus, fare Fasuran, ni ke yib ko duw ni 1914 ni nge wereg e tamilang nga ga’ngin e palpalthib me tabab ni nge lebuguy fapi n’en ni ke dag kakrom ni ke thilyaan! Fare Fasuran rok Jehovah e bay e chiney, ni ke tay talpen ni nge lebuguy e tin nib m’agan’ Got ngay ni aram fare—“mahl ni fan ko fare rran ni ba ga’ fan, ni Rran rok Got ni Gubin ma Rayog rok” nib l’ag ko n’en ni ke rin’ Jesus kakrom ko ngiyal’ ni ke thilyaan. (Revelation 16:14, 16) Tomren ni kan thang e re m’ag ney ni ke kakrom, ma ra rin’ Jehovah e tin ni ke micheg ni aram e “bin ni biech e lan e lang nge bin ni biech e fayleng” ma ngiyal’ nem e rayog ni ngada pininged e sorok ngak e En ni ba Th’abi Tolang u palpalthib ni ir fare Got ko pi thin rriyul’ ni i weliy fapi profet. (2 Peter 3:13) Chiney nge yan i mada’ ko fare rran ni baga’, ma nguu darod iyan ko fare tamilang ni yib rok Got ni aram e ngada tiyan’dad ko thin rok Got ni i yiiynag fapi profet.
Uw Rogon ni Ngam Pi’ e Fulweg?
• Uw rogon ni ngam weliy e thiliyeg yaan ni i tay Jesus?
• Uw rogon ni nge ubung e michan’ fare thiliyeg yaan ni i tay Jesus?
• Mini’ ara mang e Fasuran rok Jehovah, ma wuin ni ke yib ni nge pi’ e tamilang?
• Mang fan ni thingarda tiyan’dad ko pi thin rok Got ni i weliy fapi profet?
[Picture on page 21]
Rayog ni ngam weliy fan fare thiliyeg yaan ni i tay Jesus?
[Picture on page 23]
Fare Fasuran e ke yib ni nge pi’ e tamilang. Ga manang ko uw rogon nge wuin?