Yaan Gil’ilungun Got Ni Kan Guy E Ke Riyul’

“Ba fel’ ni ngam tiyan’med ko [pi thin ko profet nem], ya bod ba magal ni be mat ramaen u fithik’ e lumor.”​—2 PETER 1:19.

1. Mang e pi n’en ni be thilthil nrayog ni ngad guyed u fayleng e ngiyal’ ney?

KE yoor i yoor e gafgow nra chuw reb me yib reb​—aram rogon e fayleng e chiney. Gafgow e yib ko ecology nge mada’ ko terrorism u fayleng ni ga’ngin, be m’ug ni gowa dabkiyog ni ngan pithig e magawon ko girdi’. Mus ko pi Yuraba i teliw nu fayleng ma de yog ni ngar ayuweged. Tin riyul’ riy, e yad be ubchiyanag e magawon ya gubin ngiyal’ ni yad be mochuchnag boch e girdi’, nge fanenikan, nge t’ufeg nib pag rogon ni fan ko nam ni be yoor raba’nag e girdi’. Arrogon, rogon ni ke m’ay i yog, e “boch e nam” e yad ra par u “fithik’ e lumor nib gel.” (Isaiah 60:2, NW) Machane, yugu aram rogon ko ngiyal’ i n’em, ma bokum milyon e girdi’ ni yad be sap nga m’on u fithik’ e pagan’. Mang fan? Ya bochan kar tayedan’rad ko thin rok Got ni kan yiiynag “ni bod ba magal ni be gal ramaen u fithik’ e lumor.” Yad ma pag ni “Thin” rok Got ni yira pirieg u lan fare Bible e chiney, e nge pow’iy e yan rorad.​—2 Peter 1:19.

2. Rogon ni yog e yiiy rok Daniel u murung’agen e “tin tomren e rran,” e kemus ni mini’ e kan pi’ e tamilangan’ ngorad nib spiritual?

² Rogon e ngiyal’ ko “tin tomren e rran,” e yoloy Daniel ni profet ni gaar: “Ma boor e girdi’ ni bay ur guyed rogon ni ngar nanged fan e tin ni be yib i m’ug. Ma bay i ga’ e llowan’ i yan. Boor e girdi’ ni bay ni machalbognagrad mi yad par ni kar yal’uwgad. Girdi’ nib kireb e bay dabra nanged fan, nguur pired ni yad be ngongliy e kireb; ma piin ni yad ba gonop e bay ra nanged fan.” (Daniel 12:4, 10) Tamilangan’ ko tirok Got e kemus ni fan ko girdi’ ni ri “yad be guy rogon”, ara yad be fil e Thin rok Got nib gel, mar folgad ko kenggin e motochiyel rok, ma yad be athamgil ni nguura rin’ed e tin nib m’agan’ ngay.​—Matthew 13:11-15; 1 John 5:20.

3. Nap’an e duw ni 1870, ma mang e tin riyul’ ni ke nang e pi Bible student fan?

³ Nap’an e duw ni 1870, u m’on ni dawori tabab e “tin tomren e rran”, me tabab Jehovah Got ni nge pi’ boch e tamilang nib peth ko “tin nda nnang ni murung’agen e gagiyeg nu tharmiy.” (2 Timothy 3:1-5; Matthew 13:11) Ngiyal’ nem ma ba ulung ko girdi’ ni ma fil e Bible e kar nanged ban’en​—nib togopuluw ko tin ma lemnag e girdi’—​ni bayi sul Kristus ni dabin guy. Tomren ni ke par Jesus nga tagil’ u tharmiy, ma ra sul nga fayleng ya ra mang pilung riy. Fare pow riy ni rayog ni ngan guy e ra ayuweg pi gachalpen ni yad ra nang ni ba’ ni ke tabab ko gagiyeg rok.​—Matthew 24:3-14.

Nap’an ni Ke Riyul’ e N’en ni Kan Dag Yaan

4. Uw rogon ni ke gelnag Jehovah e michan’ rok e pi tapigpig rok e ngiyal’ ney?

⁴ Fare n’en ni thil yaan e aram yaan e flaab ni bayi yib ngak Kristus u nap’an e gagiyeg rok. (Matthew 17:1-9) Ke gelnag e re n’em e michan’ rok Peter, James, nge John u ba ngiyal’ ni boor e girdi’ ni kar talgad i lek Jesus ya bochan de rin’ e n’en ni ur lemnaged ni nge rin’. Maku, ngiyal’ rodad ney ko tomur, ni ke gelnag Jehovah e michan’ rok e pi tapigpig rok ni be ayuwegrad ngari tamilang u wan’rad ni ke riyul’ e re n’em ni kan dag yaan kakrom ma boor e yiiy nib l’eg ngay. Gad ra weliy e chiney boch ban’en ni ke lebug ni be gelnag e michan’.

5. Kan nang ni mini’ fare Fasuran, ma wuin nge uw rogon ni ke ‘yib nga lang’?

⁵ Be weliy murung’agen fare n’en ni thil yaan, i yoloy Peter ni apostal ni gaar: “Aram fan ni kari pagan’mad ko thin rok Got ni i weliy fapi profet. Ba fel’ ni ngam tiyan’med ko pi thin nem, ya bod ba magal ni be mat ramaen u fithik’ e lumor nge yan i mada’ ko Rofen nem ni bayi puf e woch, ma aram e bayi tamilangnag ramaen e fasuran lanin’med.” (2 Peter 1:19) Re Fasuran nem, ara “fare t’uf nib ga’ raen ni kakadbul,” e aram Jesus Kristus ni kan tolangnag. (Revelation 22:16) Me ‘puf e woch’ u nap’an ni tabab Gil’ilungun Got u tharmiy ko duw ni 1914, ni aram e pow ni ke tabab ba ngiyal’ nib biech. (Revelation 11:15) Nap’an ni buch fare transfiguration, me m’ug Moses nge Elijah u tooben Jesus, ni yad be non. Kar dagew yaan mini’ ni bay fini yib?

6, 7. Moses nge Elijah u lan fare n’en ni thil yaey, e be yip’ fan mini’ ma mang e pi n’en nib ga’ fan ni be yog e Bible u murung’agrad?

⁶ Bochan ni ke un Moses nge Elijah ko flaab rok Kristus, gali mich nem nib yul’yul’ e be yip’ fan e piin ni yad ra un ngak Jesus ko Gil’ilungun ngar gagiyeggad. Fare tamilangan’ ni bay e girdi’ ni ra un ngak Jesus ko gagiyeg e ba puluw ko n’en ni ke guy Daniel ni profet u nap’an ni kan piliyeg e changar rok me guy fare Messiah ni be par u tagil’. Ke guy Daniel “be’ ni bod yaan fak e girdi’” ni kan pi’ ngak e “gagiyeg ndariy n’umngin nap’an” ni yib rok e en “Kab Kakrom ni Immoy,” ni Jehovah Got. Machane mu guy ko mang e kan dag ngak Daniel nde n’uw nap’an nga tomren. I yoloy ni gaar: “Fare gil’ilungun nge fare gagiyeg nge gilbuguwan ko pi gil’ilungun u tan e tharmiy ni polo’ e kan pi’ ngak e girdi’ rok e En Th’abi Tolang ni yad ba thothup.” (Daniel 7:13, 14, 27) Arrogon, ke pag lal e chibog u m’on ni dawori buch fare transfiguration, me dag Got ni bay e “girdi’ nib thothup” ni yad ra un ngak Kristus ngar manged pi pilung nib gilbuguwan.

⁷ Mini’ e girdi’ nib thothup ni kan dag u nap’an ni kan piliyeg e changar rok Daniel? Yad e piin ni weliy Paul ni apostal murung’agrad ni gaar: “Fare Kan ni Thothup rok Got e ir e be micheg nga lanin’dad ni gadad pi fak Got. Ere faanra kad manged pi fak, ma rayog ngodad e flaab ni ke tay ni fan ko girdi’ rok, ma ku ra da uned ngak Kristus ngad fanayed e tin ni ke tay Got ni fen; ya faanra gadad be un ko gafgow ni tay Kristus, ma gadad ra un ko flaab rok.” (Roma 8:16, 17) Tin riyul’ riy e girdi’ nib thothup e yad e pi gachalpen Jesus ni kan dugliyrad ko kan ni thothup. U lan fare babyor ni Revelation, e yog Jesus ni gaar: “Piin ni yad ra gel ndar paged yad ko kireb e gu ra pi’ mat’awrad ni ngar pired nga but’ u toobeg u tagil’ig, ni bod rogon ni kug gel ngak e kireb, me ere chiney e kug par nga but’ u tooben e Chitamag u tagil’.” Pi cha’nem ni kan fasegrad ko yam’ ma ‘kar gelgad’ ni yad 144,000 u gubin, ma yad bay rok Jesus, e yad ra gagiyegnag e fayleng ni ga’ngin.​—Revelation 3:21; 5:9, 10; 14:1, 3, 4; 1 Korinth 15:53.

8. Uw rogon ma pi gachalpen Jesus ni kan dugliyrad e kar uned ko maruwel ni i rin’ Moses nge Elijah, ma mang angin?

⁸ Machane, mang fan ni kan dag yaan Moses nge Elijah ni be yip’ fan e piin Kristiano ni kan dugliyrad? Aram rogon ya bochan pi kristiano nem e nap’an ni ka yad bay u fayleng ni yad e girdi’, mu ur rin’ed e maruwel ni taareb rogon ko pi n’en ni rin’ Moses nge Elijah. Ni Bodrogon, ni kar pigpiggad ni Pi Mich Rok Jehovah, ni mus u nap’an ni keb e togopuluw nge gafgow. (Isaiah 43:10; Acts 8:1-8; Revelation 11:2-12) Ni bod Moses nge Elijah, kar weliyed murung’agen e teliw ni googsur ni dar rusgad ma yad be fonownag e girdi’ nib yul’yul’ ngar pigpiggad ku Got u polo’ i lanin’rad. (Exodus 32:19, 20; Deuteronomy 4:22-24; 1 Kings 18:18-40) Gur keb angin e maruwel rorad? Arrogon! Gathi kemus ni kar ayuweged ngar ulunguyed urngin e Kristiano ni kan dugliyrad, ya ku ka ra ayuweged bokum milyon e girdi’ ni “yugu boch e saf” ni ngar daged nib m’agan’rad ngay ni ngar pared u tan pa’ Jesus Kristus.​—John 10:16; Revelation 7:4.

Be Gel i Yan Kristus ko Mahl ni Bayi Gel ni Polo’

9. Uw rogon ma Revelation 6:2 e be dag yaan Jesus e ngiyal’ ney?

⁹ Chiney e Jesus e gathi be’ ni ba’ u daken fak e os, ya ke mang Pilung nib gel gelngin. Kan weliy ni be par u daken ba os​—ni be yip’ fan e mahl u Bible. (Proverbs 21:31) “Am sap! reb e os nib wechwech,” ireray e n’en ni yog e Revelation 6:2, (NW) me ulul ngay ni gaar, “en ni ba’ u daken e bay ba gat’ing u pa’; ma kan teeliyawnag, ma be gel iyan ko mahl ni bayi gel ni polo’.” Maku, David ni psalmist e i yoloy murung’agen David ni gaar: “Fare sog ni aram gelngim e bayi pi’ Jehovah nge yan nga wuru’ yu Zion, ni be gaar: ‘Um gagiyeg u fithik’ e pi toogor rom.’ ”​—Psalm 110:2.

10. (a) Uw rogon ma gel ko mahl ni tay Jesus e ke tabab ni ba flaab? (b) Uw rogon ma gel ni tay Kristus ni bin som’mon e ke rin’ ban’en ngak e girdi’ nu fayleng ni polo’?

¹⁰ Tin som’mon e pi toogor ni rib gel ni gel Jesus ngorad e​—Satan nge pi moonyan’. Ke tharbograd u tharmiy, me yin’rad ngaray nga fayleng. Bochan ni yad manang ni ke ngoch e tayim rorad, ma pi kan nib kireb ney e kar daged e damumuw rorad nib gel ngak e girdi’, mab gel e gafgow ni yib riy. Revelation e ku be weliy murung’agen dalip e girdi’ ni yad be yan u daken e os ni be dag yaan e re gafgow ney. (Revelation 6:3-8; 12:7-12) Rogon ni yog e yiiy rok Jesus u murung’agen “fare pow ni be dag ni [ba’] nge tomur ko fare m’ag nib kireb,” tin kar rin’ed ni yad bay u daken e os e ke yibnag e mahl, nge gafgow ko ggan, nge gechig nib gel. (Matthew 24:3, 7; Luke 21:7-11) Taareb rogon ko amith ni ma yib ngak e ppin ni be n’en ni nge gargel, ma re “amith ney” e ba mudugil ni nge gel i yan nge mada’ ko ngiyal’ ni ke mu’ Kristus i ‘gel ngak e pi toogor rok’ ni aram e ra gothey urngin ban’en rok Satan u lan e ulung rok nrayog ni ngan guy.a​—Matthew 24:8.

11. Uw rogon ma chepin e ulung ko Kristiano e be micheg mat’awon Kristus ni pilung?

¹¹ Maku rayog ni ngan guy mat’awon Jesus ni reb e pilung ya be ayuweg e ulung ko Kristiano ni fan ni nge lebuguy e maruwel rok ni ngan machibnag e thin ko Gil’ilungun u fayleng ni ga’ngin. Yugu aram rogon ni fare Babylon nib Gilbuguwan​—ni aram e pi Yuraba’ e teliw ni googsur—​nge pi am ni tatogopuluw, e kar togopuluwgad nrib gel ma maruwel ni ngan wereg e machib e gathi kemus ni be ulul i yan ya kan wereg ko binaw ni boor ni ra ngan taarebnag ko n’en ni kan rin’ ni kab kakrom i yib. (Revelation 17:5, 6) Reb e mich e re n’ey nib gel ni ke pilung Kristus!​—Psalm 110:3.

12. Mang fan ni boch e girdi’ e dar nanged ni ba’ Kristus ni dabin gu’?

¹² Machane, bay e kireban’ riy, ya oren e girdi’ nib muun ngay, bokum milyon e girdi’ ni ma yog ni yad e Kristiano, e dara nanged fan ni tin ni be buch u fayleng e be dag ni bay ban’en ni ke lebug ni dabin guy. Maku yad ma moningnag e piin ni ma machibnag murung’agen Gil’ilungun Got. (2 Peter 3:3, 4) Mang fan? Bochan ke ta’ Satan lanin’rad nga fithik’ e lumor. (2 Korinth 4:3, 4) Tin riyul’ riy, e tabab i ta’ laniyan’ e piin ni ma yog ni yad e Kristiano nga fithik’ e lumor kakrom ni ke yoor e chibog ni ke yan, ke k’aringrad kar paged e athap rorad ko Gil’ilungun nib ga’ fan.

Kan N’ag e Athap ko Gil’ilungun

13. Piin ni ka nog e Kristiano ngorad ni yad be par u fithik’ e lumor e ra pow’iyrad ngan?

¹³ I yiiynag Jesus ni piin ni apostates, e bay ra bad nga lan e ulung ko Kristiano mar soreged boor e girdi’ nga bang, ni bod e pan ni kan yung u fithik’ e wheat. (Matthew 13:24-30, 36-43; Acts 20:29-31; Jude 4) Munmun, ma piin ni ka nog e Kristiano ngorad e kar uned ko pi madenom, nge tin yima rin’, nge machib ko piin ma pigpig ko got ni googsur maku yad be yog ni “ngongolen e Kristiano e pi nem.” Reb riy, e Baynag ni i tabab ko tin ni yima rin’ nib peth ko Liyor ku got ni googsur ni Mithra nge Saturn. Machane mang e ke k’aring e piin ni ma yog ni yad e Kristiano ni ngar uned ko pi madenom ney ni piin Kristiano e darur rin’ed? I yog fare The New Encyclopædia Britannica (1974) ni gaar: “Fare Baynag, ni aram e madenom ko fare rran ni gargeleg Jesus Kristus riy, e kan sunmiy ya bochan ni ke yoor e girdi’ ni dab kuura sonnaged ngal’an ni nge sul Kristus.”

14. Uw rogon ma machib rok Origen nge Augustine e be thiliyeg fan e tin riyul’ ko Gil’ilungun?

¹⁴ Maku mu lemnag fare bugithin ni “gil’ilungun” ni kan thiliyeg fan. Fare babyor ni The Kingdom of God in 20th-Century Interpretation ni gaar: “Ke thiliyeg Origen [reb e theologian ko fa bin dalip e chibog] rogon ni ma fanay e Kristiano fare bugithin ni ‘gil’ilungun’ ni be yip’ fan e gagiyeg rok Got u lan e gum’ircha’.” U uw ke fek Origen e machib rok riy? De fek u lan e Bible, ya “lem ko fayleng nrib thil ko lem rok Jesus nge pi galesiya kakrom.” U lan e babyor rok ni De Civitate Dei (Fare Mach rok Got), ma Augustine nu Hippo (354-430 C.E.) e ke yog ni fare galesiya e aram e Gil’ilungun Got. Re lem nem ni aram rogon e de puluw ko Thin nu Bible e ke pi’ tapgin ngak e pi galesiya ko Kristiano ni googsur ni ngar fanayed gelngin e am. Ma kar fanayed ere gelngin nem u lan boor e chibog u reb e kanawo’, ni baga’ ni dariy e runguy riy.​—Revelation 17:5, 18.

15. Uw rogon ni ke lebug e thin ni bay ko Galatia 6:7 ni fan ko boor e galesiya ko Kristiano ni googsur?

¹⁵ Machane, chiney, e ke t’ar e pi galesiya wom’engin e n’en ni kar yunged. (Galatia 6:7) Be m’ug ni boor i yad e dakuriy gelngin maku dakuriy e girdi’ rorad. Rib gagiyel e n’en ni aram rogon u Europe. Rogon ni yog fare journal ni Christianity Today e be gaar, “ngiyal’ ney ma pi cathedrals nu Europe nib gang’ e yibe [fanay] ni gathi fan ko liyor ya museums, ni kemus ni piin ni tourists e ma yan ngay.” N’en ni aram rogon e ku rayog ni ngan guy u yu yang u fayleng. Mang e be dag e re n’em ni fan ko teliw ni googsur? Gur ra m’ay ya bochan dakuriy e ayuw ni yima pi’ ngay? Ma mang e ra rin’ ko bin riyul’ e liyor?

Mu Fal’eg Rogom ni Fan ko Rran Rok Somol nib Ga’

16. Mang fan ni fare togopuluw ni be gel i yan ni yibe ta’ ni fan ko Babylon nib Gilbuguwan e ba’ fan?

¹⁶ Bod rogon e ath nge fiyath ni be yib ko volcano ni kakrom i par ndariy ban’en ni ma rin’ e rayog ni be dag ni ke chuchugur ni nge pil, ma togopuluw ni yima ta’ ni fan ko teliw ni be yoor i yan e be dag ni pi rran ko yuraba’ i teliw ni googsur e ke m’ay i theeg. Dabki n’uw nap’an, ma ra k’aring Jehovah e pi n’en ni bang ko am ko fayleng ni ngar taarebgad ngar gagiyelniged e kireb ko Babylon nib Gilbuguwan ni ma chuway’ ngak mar gotheyed. (Revelation 17:15-17; 18:21) Gur bay fan ni nge rus e tin riyul’ e Kristiano u nap’an ni ra buch e re n’em nge ku boch ban’en ni ra buch ni bang ko fare “gafgow nib ga’”? (Matthew 24:21) Ri danga’! Tin riyul’ riy, e bay fan ni ngar felfelan’gad u nap’an ni ra rin’ Got ban’en nib togopuluw ko girdi’ nib kireb. (Revelation 18:20; 19:1, 2) Mu lemnag e n’en ni ra buch ko Jerusalem ko bin som’mon e chibog nge fapi Kristiano ni ur pared riy.

17. Mang fan ni pi tapigpig rok Jehovah nib yul’yul’ e ra mada’nag e tomur ko re m’ag ney u fithik’ e pagan’?

¹⁷ Nap’an e pi salthaw nu Roma ni ra liyeged yu Jerusalem ko duw ni 66 C.E., ma pi Kristiano ni be od ko tirok Got ban’en e dar gin gad maku dar rusgad. Bochan ni yad ma fil e thin rok Got nib elmerin, ma kar nanged ‘ndabki n’uw nap’an min kirebnag yu Jerusalem.’ (Luke 21:20) Maku yad manang ni ra pi’ Got e kanawo’ ngorad ma rayog ni ngar milgad nga bang nib pagan’rad. Nap’an ni pi’ Got e kanawo’ ngorad, mi yad mil riy. (Daniel 9:26; Matthew 24:15-19; Luke 21:21) Maku arrogon e ngiyal’ ney, piin ni yad manang Got ma yad ma fol rok Fak e rayog ni ngar sabaliyed e tomur ko re m’ag ney u fithik’ e pagan’. (2 Thessalonika 1:6-9) Tin riyul’ riy, e nap’an ni ra yib fare gafgow nib baga’, mar felfelan’gad ‘mi yad sak’iy ngar changargad nga lang, ya aram e ke chugur ni ngan chuwegrad u fithik’ e gafgow.’​—Luke 21:28.

18. Mang angin e bin tomur e cham ni ra tay Gog ngak e pi tapigpig rok Jehovah?

¹⁸ Tomren ni ke magothgoth fare Babylon nib Gilbuguwan, ma bochan e maruwel rok ni ir e Gog nu Magog, e ra yib Satan ni nge cham ko yay ntomur ngak e Pi Mich Rok Jehovah ni yad e girdi’ ni yad ba gapas. Bochan bay ra bad ni yad boor “ni bod bangi manileng ni ra upunguy fare binaw,” ma ra lemnag e pi salthaw rok Gog nib mom ni ngar gelgad ngorad. Bay ra gingad ngay nib gel! (Ezekiel 38:14-16, 18-23) I yoloy John ni apostal ni gaar: “Ma aram mu gguy e tharmiy ni ke mab, mug guy ba os nib wechwech, ni en ni ke af nga daken e Yul’yul’ nge Riyul’ fithingan . . . Me yib ba sayden u lan l’ugun nib m’uth, ni ir e nge maruwel ngay nge gel ngak e pi nam.” Re “Pilung ko pilung” ney e ra ayuweg e piin ni ma liyor ku Jehovah u fithik’ e yul’yul’ ma ra thang e fan rok urngin e toogor rorad. (Revelation 19:11-21) I ir e tomur nrib fel’ rogon ni ra lebug fare n’en ni thil yaey!

19. Uw rogon ma gel ko mahl ni polo’ ni tay Kristus e ra rin’ ban’en ngak pi gachalpen nib yul’yul’, ma mang e yad be athamgil ni ngara rin’ed e chiney?

¹⁹ Ma Jesus e yira “ngat ngak ko re rran nem ni urngin e piin ni ke mich u wan’rad.” (2 Thessalonika 1:10) I gur ga baadag ni ngam un ngak e piin ni bay ra ngatgad u fithik’ e tayfan ngak Fak Got ni ke gel ko mahl? Ere nguum ulul ni ngam gelnag e michan’ rom ma ‘ngam fal’eg rogom, ya lan ba awa ni damur lemnag, nra yib e en Fak e girdi’ riy e ir e ra yib.’​—Matthew 24:43, 44.

Mu Par nib Tamilang Lanin’um

20. (a) Uw rogon ma rayog ni ngada daged ni gad be pining e magar ni ke pi’ Got ngodad “fare tapigpig nib yul’yul’ mab gonop”? (b) Mang boch e deer e thingarda fithed gadad riy?

²⁰ “Fare tapigpig nib yul’yul’ mab gonop” e ma fonownag e girdi’ rok Got u gubin ngiyal’ ni ngar pired nib od ko tirok Got ma ngar pired nib fel’ e lem rorad. (Matthew 24:45, 46; 1 Thessalonika 5:6) Ga be pining e magar ko pi puguran ney nib puluw ngal’an? Ga ma fanay e pi n’em nrogon ni ga ma yarmiy ban’en ni rib ga’fan ko yafas rom? Mang fan ni dabmu fithem: ‘Ba tamilang fan u wan’ug e n’en ni be buch u fayleng ma riyul’ ni Fak Got e be gagiyeg u tharmiy? Rayog ni nggu guy ni ke fal’eg rogon ni nge pufthin ni fan ko Babylon nib Gilbuguwan nge yu yang ko m’ag rok Satan?’

21. Mang fan ni ke war e changar rok boch e girdi’ ko tirok Got, ma mang e thingara rin’ed nib papey?

²¹ Boch e girdi’ e chiney ni ur chaggad ngak e girdi’ rok Jehovah e kar paged ni nge war rogon e sap rorad ko tirok Got. Gur gathi ke yodor ya bochan ni dariy e gum’an’ ara k’adan’ rorad, ni bod e n’en ni rin’ pi gachalpen Jesus kakrom? Gathi magafan’, nge chogowen e chugum, ara togopuluw nge gafgow ni kan tay ngorad e ir e ke warnagrad? (Matthew 13:3-8, 18-23; Luke 21:34-36) Sana boch e girdi’ e kar pirieged boch e thin ni ke wereg “fare tapigpig nib yul’yul’ mab gonop” nib mo’maw’ ni ngar nanged fan. Faanra bay reb riy ni ke magawonnagem, ma gamad be fonownigem ni ngam fil e thin rok Got u fithik’ e pasig biyay ma ngam meybil ngak Jehovah nib gel ma rayog ni ngari fel’ thilmew biyay.​—2 Peter 3:11-15.

22. Mang e ke rin’ ngom fare n’en ni kan guy ko fare n’en ni thil yaey nge boch e yiiy nib peth ngay?

²² Fare n’en ni thil yaey e kan dag ngak pi gachalpen Jesus u nap’an nib t’uf rorad ni ngan pi’ e athamgil nga lanin’rad. Ngiyal’ ney, ma bay ban’en rodad ni kab gel ni ra gelnagdad​—ni aram fare n’en ni thil yaey ni ke riyul’ e chiney nge boch e yiiy nib peth ngay. Gad ra fal’eg i lemnag e pi n’en nem ni ke lebug nrib fel’ nge n’en ni bay yib nib l’ag ngay, manga yugu dogned e thin ni yog John ni apostal u nap’an ni yog ni gaar: “Amen! Moy, Jesus ni Somol.”​—Revelation 22:20.

[Footnote]

Ka Ga Manang?

• U lan e duw ni 1870, ma mang e ke nang fan fare ulung nib achichig ni Bible students u murung’agen Kristus ni nge sul?

• Uw rogon ni ke lebug e n’en ni kan dag ko fare n’en ni thil yaey?

• Mang e ke rin’ e gel ko mahl ni tay Jesus ngak e girdi’ nu fayleng nge girdi’ u lan e ulung ko Kristiano?

• Mang e thingarda rin’ed ma rayog ni ngada uned ko piin ni ngar magaygad nib fas u nap’an ni ra gel Jesus ngak urngin e toogor rok?

[Pictures on page 12, 13]

N’en ni kan dag ko fare n’en ni thil yaey e ke riyul’

[Pictures on page 14]

Ga manang ko mang e ke buch u nap’an ni ke tabab Kristus ni nge gel ko mahl?