Nap’an Nra Yib Jesus Nib Rir Ni Ke Pilung

“Ba’ boch e girdi’ u roy ndabra m’ad me yan i taw ko ngiyal’ ni bay ra guyed e en ni Fak e girdi’ riy ni ke yib ni ir e pilung.”​—MATTHEW 16:28.

1, 2. Mang e buch nde n’uw nap’an nga tomren e Pentekost 32 C.E., ma mang fan ni buch?

DE N’UW nap’an u tomren e Pentekost 32 C.E., me pig e changar rok dalip i apostal rok Jesus Kristus. Fare thin ni kan thagthagnag e be weliy ni “ke fek Jesus Peter nge fagali walag ni James nge John nga ranod nga daken bburey nib tolang ni goo yad. Ma nap’an ni yad be changar ngak me thil yaan.”​—Matthew 17:1, 2.

² Ke buch e re n’em u ba ngiyal’ nib baga’ fan. Ya ke tabab Jesus i weliy ngak pi gachalpen ni yira gafgownag min li’ ngem’ u Jerusalem, machane dawori tamilang u wan’rad. (Matthew 16:21-23) Ere n’en ni guy fa dalip i apostal e ke gelnag e michan’ rorad ma be fl’eg laniyan’rad ko ngiyal’ nra yim’ Jesus ma ke fl’eg rogorad ko pi duw nga m’on rorad nib gel e maruwel ni yad ra tay ma ba gel e skeng nra yib ko ulung ko Kristiano. Rayog ni ngad filed ban’en ko n’en ni kar guyed ni fan ko ngiyal’ ney fa? Arrogon, ya n’en ni be yip’ fan ko re n’em e ra lebug ko ngiyal’ ney.

3, 4. (a) Mang e yog Jesus nel’ e rran u m’on ni i thil yaan? (b) Mu weliy ko mang e buch u nap’an ni ke thil yaan Jesus.

³ Nel’ e rran u m’on ni ke thil yaan Jesus me yog ko pi gachalpen ni gaar: “En ni Fak e girdi’ e bay yib ni yad e pi engel rok ni be galgal ramaen ni bod e Chitamangin, me pi’ puluwon urngin e girdi’ nra be’ ma rogon puluwon ko tin ni rin’.” Pi thin nem e ra lebug u nap’an e “ngiyal’ ntomren e re m’ag ney.” Miki yog Jesus ni gaar: “Mu ted fanmed i yan ko re bugithin ni baaray! Ba’ boch e girdi’ u roy ndab ra m’ad me yan i taw ko ngiyal’ ni bay ra guyed e en ni Fak e girdi’ riy ni ke yib ni ir e pilung.” (Matthew 16:27, 28; 24:3; 25:31-34, 41; Daniel 12:4) Ke lebug e pi thin nem ko ngiyal’ ni ke thil yaan Jesus.

⁴ Ri mang e guy fa dalip i apostal? Ereray e n’en ni weliy Luke u morngaagen e re n’em: “Ma nap’an ni be meybil [Jesus] me thil yaan owchen me pig ramaen e mad rok ngari wechwech ni be galgal. Ka chingiyal’ nem me yib i m’ug l’agruw i pumoon u tooben Jesus nguur nonod Jesus; ni gali cha’ nem e Moses nge Elijah, nra m’uggow ni be galgal ramaen dowrow, mu ur nonod Jesus ni yad be weliy morngaagen nge rogon ndabi n’uw nap’an me mu’nag e tin ni ke finey Got ni nge ngongliy ni aram e nge yim’ u Jerusalem.” Ma aram “me yib i m’ug bangi manileng nge tagalul’nagrad [e pi apostal], ma faani yib fa gi manileng nga dakenrad me tamdag pi gachalpen. Me non ba lam u fithik’ e manileng ni gaar: ‘Ereray Fakag, ni ir e kug turguy. Me ere mu telmed ngak.’”​—Luke 9:29-31, 34, 35.

Kan Gelnag e Michan’ Rodad

5. Mang angin ni yib ngak apostal Peter ya ke guy Jesus ni ke thil yaan?

⁵ Weliy apostal Peter ni Jesus e ir “fare Kristus ni Fak fare Got nib fas.” (Matthew 16:16, NW) Ma fare thin ni yog Jehovah u tharmiy e ke micheg e re n’em, ma yaan Jesus ni ke thil e ke micheg nra yib Kristus ni ke Pilung nib rir mab gel gelngin, ma ra yib ni nge pufthinnag e girdi’. Ke pag 30 e duw nga tomren ni i pig yaan Jesus me yoloy Peter ni gaar: “Da gu torgad nga bogi yat ni girdi’ e sunumeg nggu weliyed ngomed morngaagen gelngin Somol rodad ni Jesus Kristus nge wub ni bay tay. Ya gguyed nga owchemad feni sorok. Gamad bay u rom me ta’ Got ni Chitamangiy fan Jesus Kristus me rirnag ko ngiyal’ ni baaram ni yib ba lam ngak, ni yib rok e en ni Th’abi Rir ni be gaar e re lam nem: ‘Ereray Fakag nrib t’uf rog, ni kari felan’ug ngak.’ Gamad e gu rung’aged e re lam nem ni be yib u tharmiy ngomad nga but’ ko ngiyal’ ni baaram ni gamad ba’ rok u daken fare burey nib thothup.”​—2 Peter 1:16-18, NW; 1 Peter 4:17.

6. Mang boch ban’en ni buch nga tomren ni ke thil yaan Jesus?

⁶ Ngiyal’ ney ma kan gelnag e michan’ rodad ko n’en ni guy fa dalip e apostal. Ma ke mon’og iyan boch ban’en ka nap’an e duw ni 32 C.E. iyib ngaray. Ya bin migid e duw me yim’ Jesus min faseg ko yam’, me yan i par nga ba’ ni mat’aw rok e Chitamangin. (Acts 2:29-36) Ma nap’an e Pentekost ko re duw nem ma kan sunumeg fa bin nib biech e “Israel rok Got”, ma kan tabab i machibnag e thin nib fel’ u Jerusalem ko som’on me munmun me wer nga gubin yang u fayleng. (Galatia 6:16; Acts 1:8) Ka chi ngiyal’ nem ma kan skengnag e michan’ ko pi gachalpen Jesus. Kan kol e pi apostal min li’rad ni bochan e dar talgad ko machib. De n’uw nap’an nga tomren min li’ Stefen ngem’. Ma aram min li’ James, ni ir fa en ni guy Jesus faani thil yaan. (Acts 5:17-40; 6:8–​7:60; 12:1, 2) Machane Peter nge John, e ur magaygow nib fas ni ngar pigpiggow ku Jehovah u lan in e duw. Ma nap’an ni ke chugur nga tungun e bin som’on e chibog C.E., me yoloy John ni ke pig e changar rok me guy Jesus nib rir u tharmiy.​—Revelation 1:12-20; 14:14; 19:11-16.

7. (a) Wuin e lebug e n’en ni be yip’ fan yaan Jesus ni thil? (b) Wuin e pi’ Jesus puluwon boch e girdi’ ko tin ni kar rin’ed?

⁷ Ka nap’an e ngiyal’ ntabolngin “fare rran rok Somol” ko 1914, ma ke lebug boor ban’en ni guy John faani pig e changar rok. (Revelation 1:10) Ma mang fan fare thin u morngaagen Jesus ni ‘bay yib ni be galgal ramaen ni bod e Chitamangin,’ ni aram e be yip’ fan u yaan Jesus faani thil? Me tabab ni nge lebug e re n’ey u nap’an ni sum Gil’ilungun Got u tharmiy ko duw ni 1914. Nap’an ni ke tolang Jesus nga lang ni bod e fasuran ya ke mang Pilung, ma aram e bod ni ke puf e woch ko reb e rran nib biech. (2 Peter 1:19; Revelation 11:15; 22:16) Ere ke pi’ Jesus puluwon boch e girdi’ ko tin ni ur rin’ed ko ngiyal’ nem fa? Arrogon. Ya bay e mich riy ni de n’uw nap’an nga tomren ma kan tabab i faseg e pi Kristiano ni kan dugliyrad ni nga ranod nga tharmiy.​—2 Timothy 4:8; Revelation 14:13.

8. Mang boch ban’en nra buch ni aram e tin tomuren e tin nra lebug ko n’en ni be yip’ fan yaan Jesus ni thil?

⁸ Ma dabki n’uw nap’an ma ra yib Jesus “ni yad e pi engel rok ni be galgal ramaen” ni fan ni nge pufthinnag urngin e girdi’. (Matthew 25:31) Ngiyal’ nem ma ra dag ir ni kari galgal ramaen mab rir ma ra pi’ puluwon urngin e girdi’ “nra be’” ma rogon puluwon ko tin ni rin’. Piin ni yad bod e saf e ra un ko yafas ni manemus u lan fare Gil’ilungun ni kan fl’eg rogon ni fan ngorad, ma piin ni yad bod e kaming e ra un ko “math mit.” Aram e tin tomren e n’en nra lebug ko n’en ni be yip’ fan u yaan Jesus ni thil!​—Matthew 25:34, 41, 46; Mark 8:38; 2 Thessalonika 1:6-10.

Fagali Cha’ ni Yad Jesus ni Galgal Ramaenrow

9. Susun ngad lemnaged ni ra moy Moses nge Elijah ni yad Jesus u nap’an nra lebug e n’en ni be yip’ fan yaan Jesus ni ke thil fa? Mu weliy.

⁹ Gathi yigoo Jesus ni pig yaan. Ya kan guy ni yad Moses nge Elijah. (Matthew 17:2, 3) Rriyul’ ni ur moyew u rom fa? Danga’ ya kar m’ow faram ma yow be mol u fithik’ e fiyath ma yow be sonnag e ngiyal’ nran fasegrow ko yam’. (Eklesiastes 9:5, 10; Hebrews 11:35) Ere yow ra m’ug ni yad Jesus u nap’an ni ra yib nib rir u tharmiy fa? Danga’ ya i par Moses nge Elijah ko ngiyal’ u m’on ni kan bing e kanawo’ ni nge yan e girdi’ nga tharmiy. Ere yow ra fas ko yam’ ko ngiyal’ ni ran “faseg urngin e girdi’ ko yam’ . . . ni tin nib mat’aw,” u fayleng. (Acts 24:15) Ere fan ni ke thil yaanrow e be yip’ fan ban’en. Ni mang?

10, 11. Mini’ e be yip’ fan Elijah nge Moses u ba ngiyal’ nge ba ngiyal’?

¹⁰ Moses nge Elijah e ma sor fan ko thin ko profet. Ya Moses e ir e maaf ko fare Motochiyel, me ere be yip’ fan Jesus, ni ir e maaf ko fa bin nib biech e m’ag. (Deuteronomy 18:18; Galatia 3:19; Hebrews 8:6) Ma Elijah e be yip’ fan John ni Tataufe, ya ke m’on rok fare Messiah. (Matthew 17:11-13) Maku rogon ni be yog ko Revelation guruy ni 11, e Moses nge Elijah e be yip’ fan e tin ni ka bay girdien fachi ulung ko ngiyal’ ko tomur. Mang e mich riy?

¹¹ Ngam mu pithig e Bible rom ko Revelation 11:1-6. Verse  3 e be gaar: “Bay gu l’og l’agruw e mich ni ngar weregew murung’ageg ni ka ron’ew e mad ni tutuw; ma bay ra weregew e thin rok Got u lan e re ragag nge l’agruw mir’ay nge re nel i ragag i rran nem.” Ke lebug e re thin ko profet ney u daken e pi Kristiano ni kan dugliyrad u nap’an e World War I.a Mang fan l’agruw e mich? Ya tin ni ka bay e girdi’ ni kan dugliyrad e yad ma rin’ boch e maruwel ni taareb rogon ko maruwel ku Moses nge Elijah. Ma be yog ko verse 5 nge 6 ni gaar: “Faanra guy be’ rogon ni nge maad’ad ngorow [fagali mich], ma bay yib e nifiy u l’ugunrow nge li’ e toogor rorow; ere en nra guy rogon ni nge maad’ad ngorow e ereray rogon e yam’ nra tay. Ma ba’ mat’awrow ni ngar ningew lan e lang ni nge dab ki aw e n’uw ko ngiyal’ i n’en ni baaram ni bay ur weregew e thin rok Got riy. Ma ba’ mat’awrow nga gubin e alublub ni ngar pingegew nge ngal’ e ran riy nracha’; ma ku ba’ mat’awrow ni ngar gafgownigew e fayleng nga gubin mit e gafgow ko yu ngiyal’ i n’en ni yow ra finey.” Ere be pug ngan’dad ko pi maangang ni fl’eg Elijah nge Moses.​—Numbers 16:31-34; 1 Kings 17:1; 2 Kings 1:9-12.

12. Mini’ e be yip’ fan Moses nge Elijah ko ngiyal’ ni ke galgal ramaen dowrow?

¹² Ere mini’ e be yip’ fan Moses nge Elijah faani thil yaarow? Gaar Luke ma ra m’uggow u tooben Jesus “ni be galgal ramaen dowrow.” (Luke 9:31) Ere yow be yip’ fan e pi Kristiano ni kan dugliyrad ko kan ni thothup ni yad “pi walagen” Jesus ni yad be athapeg ni ngar uned ko “rir” rok. (Roma 8:17) Piin ni kan dugliyrad min fasegrad ko yam’ e yad ra moy rok Jesus u nap’an nra yib nib rir ni bod e Chitamangin ni nge “pi’ puluwon urngin e girdi’ nra be’ ma rogon puluwon ko tin ni rin’.”​—Matthew 16:27.

Pi Mich ni Bod Moses nge Elijah

13. Mang boch ban’en e be dag ni Moses nge Elijah e be yip’ fan pi walagen Jesus ni kar uned ko rir rok?

¹³ Bay boch ban’en ni aram e pow riy ni Moses nge Elijah e be yip’ fan pi walagen Jesus ni kan dugliyrad. I pigpig Moses nge Elijah ni yow mit e thin rok Jehovah u lan in e duw. Ma yow l’agruw e i puwan’ be’ ni pilung ngorow. Ma ngiyal’ nib t’uf ban’en rorow ma girdien reb e tabinaw nu bang e i ayuwegrow. Ma yow l’agruw e ur yiiynagew boch e thin ngak e piin pilung mar togopuluwgow ko pi profet ni googsur. Me Moses nge Elijah e yow l’agruw e ur guyew gelngin Jehovah u daken fare Burey ni Sinai (ku yima pining Horeb ngay). Yow l’agruw e ur duguliyew e en nra yan nga luwrow u ba’ ni ngek ko fare lul’ ni Jordan. Ma ngiyal’ nap’an Moses (nge Joshua) nge Elijah (nge Elisha) e kan fl’eg e maangang ni th’abi yoor ni de un e ngiyal’ nap’an Jesus ngay.b

14. Uw rogon ni ke pigpig girdien fachi ulung ni yad mit e thin rok Jehovah, ni bod Moses nge Elijah?

¹⁴ Gathi ma yib ngan’dad e pi n’en nem ko fare Israel rok Got fa? Ri arrogon. Yog Jesus ngak pi gachalpen nib yul’yul’ ni gaar: “Ere mmarod ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge fare Kan ni Thothup, mi gimed fil ngorad rogon ni nguur folgad u gubin e tin ni ku gog ngomed ni nguum rin’ed. Ma dab mpaged talin ni gubin ngiyal’ ma gu ba’ romed nge yan i mada’ nga tomren e fayleng.” (Matthew 28:19, 20) Pi Kristiano ni kan dugliyrad e kar folgad ko pi thin nem mar rogned e thin rok Jehovah ni ka nap’an e Pentekost 33 C.E. nge mada’ ko ngiyal’ ney. Bod rogon Moses nge Elijah, ni i damumuw e piin pilung ngorad ma kar machibnaged yad. Yog Jesus ngak fa 12 e apostal rok ni gaar: “Ma bay ni pufthinnagmed u p’eowchen e piin ni baga’ lungurad nge pi pilung ni bochag, ni bochan e kam manged e mich ngorad nge ngak e pi nam.” (Matthew 10:18, NW) Boor yay ni ke lebug e pi thin nem u n’umngin nap’an e ulung ko Kristiano.​—Acts 25:6, 11, 12, 24-27; 26:3.

15, 16. Uw rogon ni kan taareb rogonnag girdien fachi ulung ku Moses nge Elijah ni fan ko (a) rogon ni dar rusgad ni ngar pared nib mudugil ko tin riyul’? (b) nge rogon ni ke ayuwegrad e piin ni gathi yad piyu Israel?

¹⁵ Maku pi Kristiano ni kan dugliyrad e yad bod Moses nge Elijah ya dar rusgad ni ngar weliyed e thin riyul’ nib togopuluw ko pi teliw ni googsur. Mu lemnag rogon ni togopuluw Paul ngak Bar-Jesus ni ir e profet ni googsur nu Jew ma ke fel’ nifengin l’ugun nga rogon ni ke tamilangnag ni googsur e pi got ko piyu Athens. (Acts 13:6-12; 17:16, 22-31) Ku mu lemnag ko ngiyal’ ney ni tin ni ka bay girdien fachi ulung e dar rusgad ni ngar tamilangnaged e kireb ko Kristendom ma pi thin nem e ke gafgownag.​—Revelation 8:7-12.c

¹⁶ Nap’an ni mil Moses rok Farao, me yan nga tafen Reuel ni be’ ni gathi girdi’ nu Israel ni kun pining Jethro ngak. Ma bay biyay ni ke fonownag Reuel Moses u morngaagen e yaram ko ulung, ma Hobab ni fak Reuel e ir e pow’iy piyu Israel iyan nga daken e ted.d (Exodus 2:15-22; 18:5-27; Numbers 10:29) Bay ban’en ni taareb rogon ko re n’em ni girdi’ ni gathi yad e girdi’ ko fare Israel rok Got ye dan dugliyrad machane yad be ayuwegrad fa? Arrogon, aram girdien fare “ulung ni baga’” ni yad “yugu boch e saf,” ni yad be ayuwegrad ko ngiyal’ ney. (Revelation 7:9; John 10:16; Isaiah 61:5) I yiiynag Jesus u morgaagen rogon nra t’ufeg e pi “saf” ney pi walagen ni kan dugliyrad me gaar: “Gum’ ko bilig mi gimed pi’ ganag, ma gum’ ko belel mi gimed pi’ e garbod ngog; gu be’ nda mu nanged owcheg mi gimed fekeg nga tabinaw romed, dariy e mad ni nggon’ mi gimed pi’ e mad ni nggon’; gu m’ar mi gimed taliliyneged, ma gu bay u kalbus mi gimed yib mu guyed gag. . . . Ngari gog ngomed, yu ngiyal’ ni um rin’ed e pi n’ey ni fan ngak bagayad e pi cha’ ney nth’abi sobut’ u fithik’ e pi cha’ ni pi wlageg ney e kam rin’ed ngog.”​—Matthew 25:35-40.

17. Mang e buch ko girdien fachi ulung nib taareb rogon ko n’en ni buch ku Elijah u daken e Burey ni Horeb?

¹⁷ Maku bay ban’en ni buch ngak fare Israel rok Got ni taareb rogon ko n’en ni buch ngak Elijah u daken fare Burey ni Horeb.e Bod rogon Elijah u nap’an ni ke mil rok Jezebel ni Pilung ni ppin ma tin ni ka bay girdien fachi ulung e ur rusgad mar lemnaged ni ke m’ay e maruwel rorad u tomren e World War I. Ma bod Elijah, mar mada’gad Jehovah ni ke yib ni nge pufthinnag e pi ulung ni be yog ni yad e “tabinaw rok Got.” (1 Peter 4:17; Malaki 3:1-3) De puluw Kristendom ko re n’em ma kan tamilangnag ni girdien fachi ulung e yad “fare tapigpig nib yul’yul’ mab gonop” ni ke dugliyrad Jesus nib mil fan ngorad urngin e tirok ban’en u fayleng. (Matthew 24:45-47) U Horeb, me rung’ag Elijah ba lam “ni be kathkath mab mocha’” ni aram laman Jehovah ni be weliy ngak e n’en ni nge rin’. U nap’an e ngiyal’ nga tomren fare mahl ma ke rung’ag e pi tapigpig rok Jehovah ni kan dugliyrad e re lam ney ni be non ngorad u daken e thin ko Bible. Ma ke tamilang u wan’rad e n’en nib mil fan ngorad ni ngar rin’ed.​—1 Kings 19:4, 9-18; Revelation 11:7-13.

18. Uw rogon ni m’ug gelngin Jehovah u daken fare Israel rok Got?

¹⁸ Ma ke dag Jehovah gelngin nib gel u daken fare Israel rok Got fa? Tomren ni yim’ Jesus ma ke ngongliy e pi apostal boor e maang’ang machane munmun me tal. (1 Korinth 13:8-13) Ngiyal’ ney ma dariy e maang’ang ni gad ma guy nga owchedad. Machane ke yog Jesus ngak pi gachalpen ni gaar: “Nggog e tin riyul’ ngomed: en nra gu mich u wan’ e ra rin’ e pi n’en ni gu be rin’​—ri erera’ rogon, ka baga’ e tin nra rin’.” (John 14:12) Ke lebug e re n’ey u nap’an ni machibnag pi gachalpen fare thin nib fel’ u gangin yu Roma u nap’an e bin som’on e chibog. (Roma 10:18) Ma ka baga’ e tin ni yibe rin’ e ngiyal’ ney ya ke wereg girdien fachi ulung fare thin nib fel’ “u gubin yang u fayleng ni nge urngin e girdi’ me nang.” (Matthew 24:14) Ma mang wenegan riy? Nap’an e bin 20 e chibog ma tin th’abi yoor e girdi’ e kar ognaged yad ku Jehovah mar manged pi tapigpig rok nib yul’yul’. (Revelation 5:9, 10; 7:9, 10) Aram rogon ni dag Jehovah gelngin nib gel!​—Isaiah 60:22.

Ra Yib Pi Walagen Jesus nib Rir

19. Wuin ni yira guy pi walagen Jesus ni kar uned ko rir rok?

¹⁹ Nap’an ni mu’nag e tin ni ka bay i pi walagen Jesus e yafas rorad u fayleng, ma ra uned ko rir rok. (Roma 2:6, 7; 1 Korinth 15:53; 1 Thessalonika 4:14, 17) Ma yad ra mang e pi pilung nge pi prist ndabra m’ad biid mi yad un ko Gagiyeg u tharmiy. Ma yad Jesus, e bay ra “gagiyegnaged e pi nam nga ba ley i wasey ngar t’et’ared girdien e pi nam ngay ni nochiyang ni bod bogi th’ib ni but’.” (Revelation 2:27; 20:4-6; Psalm 110:2, 5, 6) Bay ra uned ku Jesus, mi yad par nga daken e chiya’ ko pilung mi yad pufthinnag “fa ragag nge l’agruw i ganong nu Israel.” (Matthew 19:28) Tin ni kan sunumiy ni yad be gel’gel’ e ur sonnaged e pi n’en nem, ni aram e chirofen “ni bayi tamilangnag Got pi fak.”​—Roma 8:19-21, NW; 2 Thessalonika 1:6-8.

20. (a) Mang e ke athapeg Peter ni ke gelnag e michan’ rok ya ke guy Jesus ni ke thil yaan? (b) Uw rogon ni ma gelnag e michan’ ko pi Kristiano ko ngiyal’ ney ya ke thil yaan Jesus?

²⁰ I weliy Paul u morngaagen e ngiyal’ nra m’ug Jesus u nap’an fare “gafgow ni baga’” ni gaar: “Ya re rran ni baaram nra yib nge yog urngin e girdi’ rok e sorok ngak, me tay urngin e girdi nib mich u wan’rad fan.” (Matthew 24:21; 2 Thessalonika 1:10) Aram ban’en nib fel’ ni fan ko Peter, James, John, nge urngin e pi Kristiano ni kan dugliyrad! Ke gel e michan’ ku Peter ni bochan ni ke guy Jesus ni thil yaan. Dabi siy ni kan gelnag e michan’ rodad u nap’an ni gad ma bieg morngaagen ma kari mich u wan’dad ni dabki n’uw nap’an ma ra pi’ Jesus “puluwon urngin e girdi’ nra be’ ma rogon puluwon ko tin ni rin’.” Pi Kristiano ni kan duguliyrad ni ka yad ba fas e chiney e kari mudugil e michan’ rorad ni yad ra un ko rir rok Jesus. Ma ke gel e michan’ ko piin ni yad yugu boch e saf ya yad manang ni ra ayuwegrad Jesus ko ngiyal’ ntomren e re m’ag nib kireb ney mar thapgad nga lan e fayleng nib biech. (Revelation 7:14) Yibe pi’ e athamgil nga laniyan’dad ya ngad pared nib mudugil nge mada’ ko tomur! Ma ka bay boor ban’en nrayog ni ngad filed ko ngiyal’ ni ke thil yaan Jesus ma aram e n’en ni gad ra weliy ko bin migid e thin.

[Boch e Thin nra Tamilangnag Murung’agen]

Ka Ga Manang?

◻ Mini’ yad Jesus u nap’an ni ke thil yaan?

◻ Uw rogon ni ke gel e michan’ rorad e pi apostal ni bochan ni ke thil yaan Jesus?

◻ Nap’an ni m’ug Moses nge Elijah ni ke “galgal ramaen dowrow” ni yad Jesus, ma mini’ e yow be yip’ fan?

◻ Uw rogon ni taareb rogon Moses nge Elijah ko fare Israel rok Got?

[Sasing ko page 10]

Ke gel e michan’ ko pi Kristiano kakrom nge ngiyal’ ney ni bochan ni ke pig ramaen Jesus