Ga Ra Par Nib Yul’yul’ Ni Bod Elijah?

“Machane u m’on ndawori taw e re Rran nem rok Jehovah, ni aram fare Rran ni baga’ ma ba gel e gafgow riy, e bay gu l’og fare profet i Elijah nge yib ngomed.”​—MALAKI 4:5, New World Translation.

1. Mang boch e magawon ni ke buch u tomren 500 e duw ni i par yu Israel u lan fare Binaw ni kan Micheg ngorad?

“BA BINAW nib sug ko milik nge t’ay e ngul.” (Exodus 3:7, 8) Aram e n’en ni pi’ Jehovah Got ngak piyu Israel u tomren ni ke pithigrad kar chuwgad u Egypt u nap’an e bin 16 e chibog B.C.E. Machane msap! Lal e chibog ni ke yan, ma chiney ma ke yib e uyungol nib gel ngak fa ragag i ganong nu Israel. Ke mo’maw ni ngan pirieg e pan nib galunglung. Be yim’ e gamanman, ma der aw e n’uw u lan dalip nge baley e duw. (1 Kings 18:5; Luke 4:25) Mang e ke n’igin e re gafgow ney?

2. Mang tapgin e magawon ko nam nu Israel?

² Sum e re magawon ney ni bochan e apostasy. Ke th’ab Ahab ni Pilung e motochiyel rok Got ya ke leengiy Jezebel ni fak e pilung nu Kanaan ma ke pag ni nga un liyor ku Baal u Israel. Ma n’en ni rin’ ni kab gel e kireb riy e ke toy reb e tempel ko re got ngoogsur ney u Samaria ni mach ni tochuch. Kan waliy yu Israel mi yad lemnag ni liyor ku Baal e ra yibnag e galwog! Machane ke ginangrad Jehovah ni ke yib e riya’ ngorad ni yad ra ‘yim’ u lan e binaw rorad ni binaw nib fel’.’​—Deuteronomy 7:3, 4; 11:16, 17; 1 Kings 16:30-33.

Ba Skeng ko Mini’ e Got

3. Uw rogon ni ke tamilangnag Elijah e bin riyul’ e magawon ko piyu Israel?

³ Nap’an ni tabab fare uyungol me yog Elijah ni profet rok Got ngak Ahab ni Pilung ni gaar: “U fithingan Jehovah ni fare Got nu Israel ni be par nib fos, ni gag e tapigpig rok, e nggog ngom ni bayi par ndakuriy e waangchol nge n’uw u lan l’agruw ara dalip e duw, nge mada’ ko ngiyal’ ni bay fin gog!” (1 Kings 17:1) Tomren ni ke riyul’ e re thin ney ma ke puwan’ fare pilung ngak Elijah me yog ni ir e en ni ke yibnag e gafgow ngak yu Israel. Machane yog Elijah ngak nib kireb e rok Ahab nge chon e tabinaw rok ya kar manged apostate ya kar liyorgad ku Baal. Ni ngan tirigily e re magawon nem me yog e profet rok Jehovah ku Ahab ni Pilung ni nge yog ko yu Israel ni ngar muulunggad nga daken fare Burey ni Karmel nge fa 450 e pi profet rok Baal nge 400 e profet ko fare ley i gek’iy nib thothup. I muulung Ahab nge urngin e girdi’ u rom, ya sana yad be athapeg ni ran taleg fare gafgow nder aw e n’uw. Machane ke gagiyelnag Elijah yugu ban’en ni kab baga’ fan. I fith ni gaar: “Uw n’umngin nap’an ni ngam pired mfin gimed dugliy lanin’med? Faanra Jehovah e ir Got, mi gimed fol rok; ma faanra Baal e ir e Got, mi gimed fol rok.” Me par yu Israel nda rogned taab bugithin.​—1 Kings 18:18-21.

4. Mang e yog Elijah ni ngan rin’ ni nge tirigily fare magawon ko mini’ e Got?

⁴ U lan in e duw me guy yu Israel rogon ni ngar athkuyed e liyor ku Jehovah nge Baal. Ni ngan tirigiliy fare magawon ko mini’ e Got, me yog Elijah reb e tagenging. Ra fl’eg rogon ba garbaw ni pumoon ni ngan pi’ ni maligach, ma pi profet ku Baal e ku yad ra fl’eg rogon reb. Ma aram me yog Elijah ni gaar: “Thingar mu pininged fithingan e got romed, me gag e nggu pining fithingan Jehovah; ma arorow nra pag e nifiy, e aram e an ke fulweg taban e meybil, e ir Got.” (1 Kings 18:23, 24, NW.) Mu lemnag e re n’em ni ra yib e nifiy u tharmiy ni nge fulweg taban e meybil!

5. Uw rogon ni kan tamilangnag ndariy fan e liyor ku Baal?

⁵ I pining Elijah e pi profet ku Baal ni ngar m’ongad. Kar fl’eged rogon ba garbaw ni pumoon ni ngan pi’ ni maligach min tay nga daken e altar. Ma aram ma ur liyeged fare altar mi yad meybil ni gaar: “O Baal, mfulweg taban e meybil romad!” Ke tabab e re n’ey ni “kakadabul nge yan i mada’ ko misiw.” Me moning Elijah ngorad ni gaar: “Mu ga’niged lammed ko meybil! Yi ir ba kan, sana ba’ ban’en ni be lemnag nib gel, ara be mol ndabi siy ni ngam puged!” Me meybil fapi profet ni kar ga’niged lamrad. Msap! Yad be rasey dowrad ko yar nge pochoch nrogon ni yad ma rin’ ngar malukgad ko racha’. Ma rib ga’ lamrad ya yad 450 u gubin ni yad be tolul ni baga’ lamrad! Machane de yib e fulweg ko meybil rorad.​—1 Kings 18:26-29.

6. Mang e rin’ Elijah faani fl’eg rogon fare skeng ko mini’ e Got?

⁶ Ma chiney e ra n’igin Elijah ban’en. Ke ubung fare altar rok Jehovah, me ker e wol’ e ran nib liyeg, me fl’eg rogon fare maligach. Nge mu’ me yog ni ngan puog e ran nga daken e l’ud nge fare maligach. Ragag nge l’agruw e rume’ e ran ni kan puog nga daken fare altar nge nga but’ nge suguy fare wol’ e ran. Mu lemnag rogon ni yibe son u nap’an ni be meybil Elijah ni gaar: “O Jehovah, ni gur fare Got rok Abraham, nge Isak, nge Israel, mmicheg e chiney ni gur fare Got rok yu Israel, me gag e tapigpig rom ma urngin e pi n’ey e kug ngongliy ni bod ni ka mog ngog. O Jehovah, mfulweg taban e meybil rog, wenig ngom mfulweg ya nge nang e pi girdi’ ney ni gur Jehovah e gur e Got, ni gur e ngam fulwegrad ngom.”​—1 Kings 18:30-37.

7, 8. (a) Uw rogon ni fulweg Jehovah taban e meybil ku Elijah? (b) Mang angin ni yib ko pi n’en ni buch u daken fare Burey ni Karmel?

⁷ Kan fulweg taban e meybil rok Elijah, ‘me pag Jehovah e nifiy u lang ko fare altar, me urfiy fare maligach, nge fapi l’ud, nge fapi malang, nge gowel e but’ me m’ay fapi ran u lan fare wol’ e ran nib liyeg fare altar.’ Me paraw e girdi’ nga but’ ma yad be non ni lungurad: “Jehovah e ir e Got; ke mus ni Jehovah e ir e Got!” (1 Kings 18:38, 39) Ma ke rin’ Elijah ban’en. Ke tay chilen ni gaar: “Mu koled fapi profet rok Baal nge dabi mil taa bagayad!” Kan li’rad kar m’ad u lan fare loway ni Kishon, me yib e manileng nib talumor u lang. Ma aram me yib e n’uw nib baga’!​—1 Kings 18:40-45; mu taarebnag ko Deuteronomy 13:1-5.

⁸ Rib fel’ e rofen nem! Ya ke sorok Jehovah ko re skeng nem ko mini’ e Got. Maku boor piyu Israel e kar sulod ngak Got. Re n’em nge yugu boch ban’en ni rin’ Elijah e ke micheg ni ir ba profet nib yul’yul’, ma aram e be yip’ fan ban’en.

“Elijah ni Profet” e Ka Bay Nga M’on Nra Yib?

9. Mang e kan yiiynag u Malaki 4:5, 6?

⁹ Boch nga tomren, me yiiynag Got u daken Malaki ni gaar: “Machane u m’on ndawori taw e re Rran nem rok Jehovah, ni aram fare Rran ni baga’ ma ba gel e gafgow riy, e bay gu l’og fare profet i Elijah nge yib ngomed. Ma aram e bayi fulweg e pi matam nge pi bitir nga taabang bayay. Ma faan mang e dabi yodorom ma ku gub kug kirebnag e nam romed.” (Malaki 4:5, 6, NW) I par Elijah 500 e duw u m’on ni ka nog e pi thin nem. Aram e thin ko profet, ere pi Jew u nap’an e bin som’on e chibog C.E. e be sonnag Elijah ni nge yib me lebuguy.​—Matthew 17:10.

10. Mini’ e kan yiiynag nra taareb rogon ku Elijah, ma uw rogon ni gad manang?

¹⁰ Ere mini’ Elijah ni bay yib? I tamilangnag Jesus Kristus ko mini’ faani yog ni gaar: “Ngiyal’ ni baaram ni machibnag John ni Ta taufe e thin rok Got ngeb i mada’ ko bin daba’ e rran e ba gel e athamgil ni yibe tay ko gagiyeg nu tharmiy, ma girdi’ ni yad be athamgiliy e yad be guy rogon ni ngar feked. Urngin e profet nge fare Motochiyel rok Moses, ngeb i mada’ ngak John e ur weliyed morngaagen e gagiyeg rok Got; faanra mm’agan’med ngay ni nge michan’med ko thin ni kan pi’ ngorad kar feked i yib, me ere John e ir Elijah, ni ir e ni yiiynag morngaagen e wub ni bay tay.” Arrogon, John ni Ta Taufe e gonapan Elijah. (Matthew 11:12-14; Mark 9:11-13) Yog reb e engel ngak Zekariah ni chitamangin John ni bayi yan John ni “ba gel gelngin e thin rok ni bod Elijah ni profet” ma “bayi ngongliy rogon girdien Jehovah ngar pired ni yad be sonnag Jehovah.” (Luke 1:17) Taufe ni tay John e fan ni ngan tamilangnag ni ke kalngan’ be’ ko denen ni rin’ nib togopuluw ko fare Motochiyel ni be pow’iy piyu Jew iyan ngak Kristus. (Luke 3:3-6; Galatia 3:24) Ere maruwel rok John e ke ‘ngongliy rogon girdien Jehovah ngar pired ni yad be sonnag Jehovah.’

11. U nap’an e Pentekost ma mang e yog Peter u morngaagen fare “rran rok Jehovah” ma wuin ni ke yib?

¹¹ Maruwel ni tay John ni Ta Taufe ni ir “Elijah” e ke dag ni ke chugur e “rran rok Jehovah.” Ki tamilangnag apostal Peter ni ke chugur e rorran nem ni ra gechignag Got e pi toogor rok me ayuweg e girdi’ rok. Ke tamilangnag ni pi maangang ni buch u nap’an e Pentekost ko 33 C.E. e ke lebuguy fare thin ni yiiynag Joel u morngaagen e kan ni thothup rok Got ni yira puog. Dag Peter ni ra buch e re n’em u m’on “dawori taw fare Rran ni ir e baga’ ma ba th’abi fel’ ni Rran rok Jehovah.” (Acts 2:16-21, NW; Joel 2:28-32) Ke lebuguy Jehovah e Thin rok u nap’an e 70 C.E. ya ke n’igin e pi salthaw nu Roma ni ngar pied e gechig rok Got ngak fare nam ni kar n’aged Fak.​—Daniel 9:24-27; John 19:15.

12. (a) Mang e yog Paul nge Peter u morngaagen yugu reb e “rran rok Jehovah” ni bay yib? (b) Mang fan nib mutrug ni ra buch ban’en ni ma sor fan ko maruwel ni tay Elijah?

¹² Machane, ka bay boch ban’en nra buch u tomren e 70 C.E. I puthuy apostal Paul ngay fare “rran rok Jehovah” ni bay yib ko ngiyal’ ni ra moy Jesus Kristus. Miki weliy apostal Peter u morngaagen e rorran nem nib peth ko fa “bin nib biech e tharmiy nge bin nib biech e fayleng” ni ka bay nga m’on. (2 Thessalonika 2:1, 2; 2 Peter 3:10-13) Mu lemnag ni John ni Ta Taufe e ke rin’ e maruwel ni bod Elijah u m’on ni yib fare “rran rok Jehovah” ko duw ni 70 C.E. Urngin e pi n’ey e be tamilangnag ni ka bay ban’en nra buch ni be yip’ fan e maruwel ni tay Elijah. Mang e binem?

Bay Gelngin Elijah Rorad

13, 14. (a) Uw rogon nib taareb rogon e pi n’en ni rin’ Elijah nge pi Kristiano ko ngiyal’ ney ni kan dugliyrad? (b) Mang e rin’ e pi apostate nu Kristendom?

¹³ Maruwel rok Elijah e gathi ke mus ni ke taareb rogon ko pi n’en ni rin’ John ni Ta Taufe ya kub taareb rogon ko pi Kristiano ni kan duguliyrad ko ngiyal’ ney ni ngiyal’ ni baga’ fan ni be sor iyan ko “rran rok Jehovah.” (2 Timothy 3:1-5) Bay gelngin Elijah rorad ma yad ba passig i tay tanggin e bin riyul’ e liyor. Ma rib t’uf e re n’em! Tomren ni yim’ e pi apostal rok Kristus ma ke yib e apostasy nib togopuluw ko bin riyul’ e Kristiano, ni bod rogon ni ke fel’ rogon e liyor ku Baal u Israel u nap’an Elijah. (2 Peter 2:1) Ke tabab e piin ni ur pininged e Kristiano ngorad ni ngar athkuyed e machib ko Kristiano nge machib ni googsur. Baaray rogon, ur uned ko fare machib nu bang ni be yog ni bay e yaal ko girdi’ nder yim’. (Eklesiastes 9:5, 10; Ezekiel 18:4) Pi apostate nu Kristendom e dakura fanayed fithingan Jehovah ni bin riyul’ e Got. Ya yad be liyor ko Trinitas. Ma kar uned ko ngongol ku Baal ni yima siro’ ko liyos ni yaan Jesus nge Maria ni chitiningin. (Roma 1:23; 1 John 5:21) Machane gathi ke mus e re n’em ni kan rin’.

¹⁴ Ka nap’an e bin 19th e chibog iyib ngaray, ma pi tayugang ko Kristendom e kar guyed rogon ni nge maruwaran’uy nib riyul’ e thin ko Bible. Susun, ur rogned ni de riyul’ e thin ko Genesis u morngaagen rogon ni sunmiy Got urngin ban’en ma kar rogned nib sorok fare machib ko evolution, mi yad yog ni aram ba thin nib puluw ko “science.” Re n’ey e ba togopuluw ko n’en ni fil Jesus Kristus nge pi apostal rok ngak e girdi’. (Matthew 19:4, 5; 1 Korinth 15:47) Machane bod Jesus nge pi gachalpen ma pi Kristiano ni kan dugliyrad ko kan ni thothup ko ngiyal’ ney e yad ma tay tanggin e thin ko Bible u morngaagen rogon ni sunmiy Got urngin ban’en.​—Genesis 1:27.

15, 16. Mang e ba math keru’ ko piyu Kristendom ya gubin ngiyal’ ma bay e ggan rorad ko tirok Got ban’en, ma uw rogon?

¹⁵ Nap’an ni be yan e fayleng iyan ko “ngiyal’ ney ni tin tomren e rran,” ma ke par Kristendom u fithik’ e uyungol ko tirok Got ban’en. (Daniel 12:4; Amos 8:11, 12) Machane pi Kristiano ni kan dugliyrad ni yad buch uw e kar falfalan’gad ya kan pi’ e ggan ko tirok Got ban’en ngorad ko “ngiyal’ nib puluw,” ni bod rogon ni ke pi’ Jehovah ggan ngak Elijah ko ngiyal’ ni bay e uyungol. (Matthew 24:45; 1 Kings 17:6, 13-16) Pi girdi’ ney e kan nog International Bible Students ngorad faram ma yad e pi tapigpig rok Got nib yul’yul’ ma munmun min tunguy fare ngochol ngorad nib puluw ko Bible ni Pi Mich Rok Jehovah.​—Isaiah 43:10.

¹⁶ Fan e ngochol rok Elijah e “Jehovah e Got rog” ma ke lubeg e re n’em. Ma fare babyor ni Wulyang Ntagil’ e Damit e aram e babyor ni ma fl’eg e pi tapigpig rok Jehovah u fayleng, ma gubin ngiyal’ ma be weliy riy fithingan Got. Ma bin l’agruw ken e re babyor nem (August 1879) e ke weliy riy ni ke michan’rad ni Jehovah e be tay tanggin e re ke babyor nem. Re ke babyor nem nge yugu boch e babyor ni ke fl’eg fare Watch Tower Society e be tamilangnag e machib ko Kristendom nde puluw ko Bible nge ku arrogon Babylon nib Gilbuguwan ni aram e pi yuraba’ i teliw nu fayleng ni googsur, maku ma tay tanggin e Thin Rok Got nu Bible ni aram e thin riyul’.​—2 Timothy 3:16, 17; Revelation 18:1-5.

Ngan Par nib Yul’yul’ u Fithik’ e Skeng

17, 18. Mang e rin’ Jezebel u nap’an ni kan thang e fan rok e pi profet ku Baal, machane uw rogon ni kan ayuweg Elijah?

¹⁷ Rogon ni ke dabuy e pi tayugang ko teliw ni kan tamilangnag e kireb rorad e taareb rogon ku Jezebel u nap’an ni ke nang ni ke li’ Elijah e pi profet ku Baal. Ke pi’ e thin ngak fare profet rok Jehovah nib yul’yul’, ni be micheg ni ran li’ ngem’. Re n’ey e gathi yugu be yog e thin nib kireb, ya ke mu’ Jezebel i li’ bokum e profet rok Got kar m’ad. Ere ke rus Elijah me mil nga le’luch u Beer-sheba. Aram me pag e tapigpig rok u rom, me mil iyan nib palog nga orel nga daken e ted, me meybil ni nge yim’. Machane de digey Jehovah e profet rok. Ke m’ug reb e engel ngak Elijah ni nge ayuweg nge taw ko Burey ni Horeb nib palog nga orel. Ere kan pi’ e ggan ngak ni ke ayuweg ni nge yan 40 e rran nib pag 190 e mayal n’umngin. Mu rom u Horeb, e non Got riy ngak u tomren ni ke dag gelngin u daken ba nifeng nib gel, nge durru’, nge nifiy. Demoy Jehovah ko pi n’en nem. Ya aram gelngin e kan ni thothup ara gelngin ni ma mithmith. Ma aram me non Jehovah ko profet rok. Mu lemnag ko uw fene gel e athamgil ni kan pi’ nga laniyan’ Elijah ko re n’em. (1 Kings 19:1-12) Ma faanra gad bod Elijah, ma ra yib e marus ngodad u nap’an ni ra togopuluw e pi toogor ko bin riyul’ e liyor rodad? N’en ni buch ngak e susun nge ayuwegdad ngad nanged ni der ma digey Jehovah e girdi’ rok.​—1 Samuel 12:22.

¹⁸ I tamilangnag Got ni ka bay e maruwel ko profet ni thingari rin’ Elijah. Ma i lemnag Elijah ni kari mus ni ir e ke magay ko piin ma liyor ngak e bin riyul’ e Got u Israel, machane dag Jehovah ngak ni ka bay 7,000 e piin ni dar ragbuggad nga but’ ku Baal. Ma aram me yog Got ni nge sul Elijah ko maruwel rok. (1 Kings 19:13-18) Bod Elijah, ma sana be gafgownagdad e pi toogor ko bin riyul’ e liyor. Sana ran togopuluw ngodad nib gel ya arrogon ni yiiynag Jesus nra buch. (John 15:17-20) Ma yu ngiyal’ ma gad ra rus. Machane rayog ni ngad boded Elijah ni ke pi’ Got e athamgil nga laniyan’ ma aram me ul’ul’ ko pigpig ku Jehovah u fithik’ e yul’yul’.

19. Mang e buch ko pi Kristiano ni kan dugliyrad u nap’an e World War I?

¹⁹ Ke gel e togopuluw u nap’an e World War I, ma aram me rus boch e Kristiano ni kan dugliyrad mar talgad ko machib. Ke oloboch e lem rorad ya ur lemnaged ni ke m’ay e maruwel rorad u fayleng. Machane de n’agrad Got. Ya ke runguyrad ke tay tanggirad, ni bod rogon ni ke duruw’iy Elijah. Bod Elijah, ma piin ni kan dugliyrad ni yad ba yul’yul’ e kar folgad ko fonow ni yib rok Got mar sulod ko maruwel rorad. Kan pithig owcherad kar guyed ni yad ba taw’ath ni rayog ni ngar wereged fare thin ko Gil’ilungun Got.

20. Ngiyal’ ney ma mang taw’ath ni kan pi’ ko piin ni kar yul’yul’gad ni bod Elijah?

²⁰ Ke yiiynag Jesus u morngaagen e ngiyal’ ni ra moy me weliy u morngaagen e maruwel ni bay ntay u ga’ngin e fayleng ni ran museg u m’on ko ngiyal’ nran thang e re m’ag nib kireb ney. (Matthew 24:14) Ngiyal’ ney ma ka be rin’ e pi Kristiano ni kan dugliyrad e re maruwel ney ma bokum milyon e girdi’ e be un ngorad ni yad be athapeg e par u paradis u fayleng. Ke mus ni piin nib yul’yul’ ni bod Elijah e rayog ni ngar uned ko re taw’ath ney ni ngan wereg fare thin ko Gil’ilungun Got.

Ngam Yul’yul’ ni Bod Elijah

21, 22. (a) Mang maruwel ni be mon’ognag e pi Kristiano ni kan dugliyrad ko ngiyal’ ney? (b) Yibe lubeg e maruwel ko machib u daken e ayuw ku mini’, ma mang fan nib t’uf?

²¹ Tin riyul’ e Kristiano ni kan dugliyrad e yad ba passig ni bod Elijah mi yad rin’ e tin nib mil fan ngorad ni ngar ayuweged e tirok Jesus ban’en u fayleng ni ir e Pilung. (Matthew 24:47) Ma chiney e ke pag 60 e duw ni be fanay Got e pi girdi’ ney ni kan dugliyrad ni ngar mon’eged fare maruwel ni ngan pingeg e girdi ngar manged pi gachalpen mi yad athapeg e yafas ni manemus u paradis u fayleng. (Matthew 28:19, 20) Pi girdi’ ney ni yad bokum milyon e ri yad ma pining e magar riy ni tin ni ka bay e girdi’ ni kan dugliyrad ni yad buch uw e ka yad ba passig mab yul’yul’ i rin’ e tin nib mil fan ngorad!

²² Kari mus rogon ni yibe lubeg e re maruwel ney ko machib ko Gil’ilungun Got e bochan gelngin Jehovah ni ma pi’ ngak e piin ni ma taga’ nga daken u fithik’ e meybil. Weliy James u morngaagen Elijah ya nge tamilangnag gelngin e meybil ku be’ nib mat’aw me gaar: “I Elijah e be’ ni ku bod gadad e tiney e girdi’.” (James 5:16-18) Gathi gubin ngiyal’ ma be yog Elijah e thin ko profet ara be ngongliy e maangang. Ya bod gadad ma taareb rogon laniyan’ ngodad ma taareb rogon e pi n’en nib meewar riy, machane i yul’yul’ ko pigpig ku Got. Ku arrogodad ma bay e ayuw rok Got rodad ma ma pi’ gelngidad, ma aram e rayog ni ngad pared nib yul’yul’ ni bod Elijah.

23. Mang fan ni bay tapgin ni ngad pared nib yul’yul’ ma ngad sapgad nga m’on?

²³ Bay tapgin ni ngad yul’yul’gad ma nge par lanin’dad nib fel’ rogon. Mu lemnag e maruwel ni tay John ni Ta Taufe e taareb rogon ku Elijah u m’on ni yib fare “rran rok Jehovah” ko duw ni 70 C.E. Pi Kristiano ni kan dugliyrad e be rin’ e maruwel ni taareb rogon ko n’en ni rin’ Elijah nge taab gelngin ni pi’ Got ngorad ni ngar rin’ed e maruwel u Ga’ngin e fayleng. Re n’ey e be micheg ni kari chugur e “rran rok Jehovah.”

Uw Rogon ni Ga Ra Fulweg?

◻ Uw rogon ni kan micheg ni Jehovah e ir Got u daken fare Burey nu Karmel?

◻ Mini’ ‘Elijah ni bay yib,’ ma mang e ke rin’?

◻ Uw rogon ni dag e pi Kristiano ni kan dugliyrad ko ngiyal’ ney ni yad bod Elijah?

◻ Mang fan nrayog ni ngad pared nib yul’yul’ ni bod Elijah?

[Kahol ko page 14]

Bin Ngan e Tharmiy ni ke Yan Elijah Ngay?

“MA NAP’AN ni be yan [Elijah nge Elisha] ni yow be non ma yugu ra gingow ma ke yib ba karrow nib nifiy ni be girngiy bogi os nnifiy, me yib nga thilrow nge weregrow, me fek ba nanyor Elijah nga tharmiy.”​—2 Kings 2:11.

Mang e be yip’ fan fare bugithin ni “tharmiy”? Yu ngiyal’ ma ma sor fan ko gin ni ma par Got nge pi fak riy ni yad e pi engel. (Matthew 6:9; 18:10) “Tharmiy” e ku rayog ni nge sor fan ko lan e lang ara palpal th’ib. (Deuteronomy 4:19) Ma be fanay e Bible e re thin ney ni nge sor fan ko nifeng ko fayleng, ni gin ni ma changeg e arche’ riy ma ma thoy e nifeng riy.​—Psalm 78:26; Matthew 6:26.

Ere bin ngan e tharmiy ni ke yan Elijah ngay? Be m’ug riy ni kan afuweg u lan e lang nge yan nga yugu bang u fayleng. Ya ka bay Elijah u fayleng in e duw nga tomren e re n’em, ya ke yoloy e babyor ngak Jehoram ni Pilung nu Judah. (2 Kronicles 21:1, 12-15) I tamilangnag Jesus Kristus ni de yan Elijah nga giyow ko kan ni aram tagil’ Jehovah Got faani yog ni gaar: “Ya dariy be’ ni kaa yan nga tharmiy ya ke mus ni yigoo en ni Fak e Girdi’ ni ir e yib u tharmiy nga but’,” ni aram Jesus. (John 3:13) Tomren ni yim’ Jesus Kristus, min faseg ko yam’ me yan nga tharmiy ma aram e ngiyal’ nsom’on ni kan bing e kanawo’ nrayog ni nge un e girdi’ ndar flontgad ngar uned ko yafas u tharmiy.​—John 14:2, 3; Hebrews 9:24; 10:19, 20.