Ma Kireban’um ya Yigoo Gur, ma Ga Ma Rus, Fa?

Am guy e chi pagel ni baaray ko sasing. Gur, gathi ke kireban’ ni yigoo ir, ma be rus? Ka am lem ni aray rogon ba ngiyal’?​— Gad gubin ni gad ma lem ni aray rogon. Be weliy e Bible murung’agen boch e fager rok Jehovah ni i kireban’rad ya yigoo yad, maku ur rusgad. Bagayad e pi girdi’ nem e Elijah. Chiney e ngad filed boch ban’en u murung’agen.

U m’on ni ngan gargeleg Jesus, ma i par Elijah u Israel. Ahab ni ir e pilung nu Israel e da i pigpig ngak e bin riyul’ e Got, ni aram Jehovah. Ahab nge Jezebel ni ppin rok e ur pigpiggow ngak Baal. Ere, aram fan ni boor e girdi’ nu Israel nra tababgad ni ngar liyorgad ngak Baal. Jezebel ni leengin fare pilung e ir be’ nrib kireb, ma baadag ni nge li’ gubin e pi tapigpig rok Jehovah nge yim’, nib muun Elijah ngay! Ga manang ko mang e n’en ni rin’ Elijah?​—

I mil nge yan nga daken e ted, me yan i mith nga lan reb e yiy. Ga be lemnag ma mang fan ni rin’ e re n’em?​— Arrogon, ke rus Elijah. Machane, susun ndabi rus. Mang fan? Ya manang nrayog ni nge ayuweg Jehovah. U m’on riy ma ke dag Jehovah gelngin ngak Elijah. Immoy bayay ni pi’ e nifiy u tharmiy nge yib nga but’ ni bochan e nge fulweg taban e meybil rok Elijah. Ere, riyul’ nrayog rok Jehovah ni nge ayuweg Elijah!

Nap’an ni immoy Elijah u lan fare yiy, me fith Jehovah ngak ni gaar: ‘Mang e ga be rin’ u roy?’ Me fulweg Elijah ni gaar: ‘Kemus ni yigoo gag e kug be pigpig ngom. Kemus ni yigoo gag e kug magey, ma gu be rus ni yira lieg nggum’.’ Ke lemnag Elijah ni kan li’ gubin e tapigpig rok Jehovah kar m’ad. Machane, yog Jehovah ngak ni gaar: ‘Danga’, de riyul’ e re n’ir. Ya ka bay 7,000 e girdi’ ni ka yad be pigpig ngog. Ere, dab kum rus. Ya bay e maruwel ni bay gu pi’ ngom ni ngam rin’!’ Ga be lemnag ni ke felfelan’ Elijah u nap’an ni rung’ag e re n’ey?​—

Mang e rayog ni ngam fil ko n’en ni buch rok Elijah?​— Dab i kireban’um ni yigoo gur, maku dab um rus. Bay e fager rom nib t’uf Jehovah rorad ma ka gab t’uf rorad. Maku reb, e ba gel gelngin Jehovah, ma gubin ngiyal’ nra ayuwegem! Ere, kam felfelan’ ni kam nang e re n’ey, fa?​—